Nshapita wa 1

Buakabuluibua​—Nkomenu wa disanka!

1. Mmunyi mutudi bamanye ne: Nzambi udi ujinga bua tuikale bena diakalenga?

BUAKABULUIBUA BUA YONE: mukanda eu wa dikema wa mu Bible udi ufikisha muyuki wa Nzambi ku nkomenu wa disanka. Bua tshinyi ng’wa “disanka”? Bualu badi babikila Mufundishi wa Bible ne: “Nzambi wa disanka,” mufidi wa “lumu luimpe lua butumbi” kudi aba badi bamunange. Udi ujinga se: tuetu petu tuikale ne disanka. Ke bualu kayi, mukanda wa Buakabuluibua udi utuadija ne mêyi aa: “Wa diakalenga ng’eu udi ubala . . . mêyi a mu mulayi eu.” Ne ujikija ne miaku eyi: “Wa diakalenga ng’eu yonso udi utumikila mêyi a mu mulayi wa mu muvungu eu.”​—1 Timote 1:11; Buakabuluibua 1:3; 22:7.

2. Ntshinyi tshitudi ne bua kuenza bua kupeta diakalenga ku diambuluisha dia mukanda wa Buakabuluibua?

² Mmunyi mua kupeta diakalenga ku diambuluisha dia mukanda wa Buakabuluibua? Mpa kudifila bua kujingulula bimanyinu anyi bimfuanyi bia dikema bidimu ne pa kubitumikila. Netulonge mushindu washikila mu tshitupa tshîpi emu nsombelu wa disalu, palua Nzambi ne Yezu Kristo kukumbaja dilumbuluisha pa bulongolodi ebu bubi ne pa muaba wabu, kupingaja “diulu dipiadipia ne buloba bupiabupia” muikala too ne “lufu kalutshiyimu kabidi.” (Buakabuluibua 21:1, 4) Katuenaku buonso buetu tujinga kusomba mu bulongolodi bua mushindu’eu muikala ditalala ne dikubibua bia bushuwa ne bua kukokesha anyi? Netufike aku amu bituikala tukolesha ditabuja dietu ku diambuluisha dia dilonga dia Dîyi dia Nzambi pamue ne mulayi wa dikema wa mu Buakabuluibua.

Apokalipse ntshinyi?

3. Bua bantu bavule, miaku eyi: Apokalipse ne Armagedon idi yumvuija tshinyi?

³ Batu kabidi babikila Apokalipse ne: mukanda wa Buakabuluibua. Bushuwa, “Buakabuluibua” nnkudimuinu wa muaku wa tshiena-Greke a·po·kaʹly·psis. Bavule batu bela meji ne: Apokalipse nkabutu kalua kudituta pa bukua-bantu kafumina ku mvita ya nikleere. Mu tshimenga tshia Texas, muvuabo benza bombe eyi ya nikleere, bena kuitabuja bavule bavua ne tshibidilu tshia kuamba ne: “Tuetu ke bashipibua diambedi.” Bavua bamba ne: bamfumu ba bitendelelu ba mu tshitupa etshi tshia buloba bavua “batuishibue se: kakuena mushindu wa kuepula Armagedon, kadi, ukadi pabuipi, kabidi, mvita ya kashikisha yenzeka kumpala eku, pankatshi pa makole a buimpe ne a bubi, pankatshi pa makole a Nzambi ne a Satana, neyikale ya nikleere.”a

4. Muaku “apokalipse” udi umvuija tshinyi menemene, ne bua tshinyi mbiakanyine menemene bua mukanda wa ndekelu wa mu Bible kubikidibuawu ne: “Buakabuluibua”?

⁴ Kadi, apokalipse ntshinyi menemene? Nkonga-miaku idi yumvuija muaku eu pa kuangata miaku bu mudi: “disemena pabuipi dia kabutu ka buloba,” kadi, muaku wa tshiena-Greke a·po·kaʹly·psis udi umvuija nangananga “Kusokolola” peshi “Kutandula.” Nunku, mbiakane bua mukanda wa ndekelu wa mu Bible kubikidibuawu ne: “Buakabuluibua.” Kamuena amu mukenji wa nshikidilu wa bulongolodi ebu to, kadi, nditandula dia malelela a Nzambi malongolola bua kutabuluja mu mutshima wetu ditekemena dia disanka ne ditabuja dikole.

5. (a) Mbanganyi babutudibua ku Armagedon, ne mbanganyi bapanduka? (b) Nnsombelu kayi mulenga wa mu matuku atshivuavua udi muindile aba bapanduka ku Armagedon?

⁵ Bushuwa, mukanda wa ndekelu wa mu Bible udi uleja Armagedon bu “mvita ya dituku dinene dia Nzambi Wa-Bukole-Buonso.” (Buakabuluibua 16:14, 16) Kadi mvita eyi kayakuikala mumue ne ya bombe ya nikleere to! Bualu, mvita ya mushindu’eu, idi ne bua kubutula tshintu tshionso tshidi ne muoyo pa buloba. Kabiyi nanku, Dîyi dia Nzambi didi difila dishindika dia disanka dia se: anu bantu babi, baluishi ba Nzambi, ke babutudibua​—kudi biluilu bidi ku bukokeshi buende. (Misambu 37:9, 10; 145:20) Musumba munene wa bantu bafume mu matunga wonso neupanduke ku dikumbajibua dia dilumbuluisha dia Nzambi ku Armagedon. Pashishe, Kristo Yezu neadiishe bantu aba ne neabalombole mu Mparadizu pa buloba bua kupetabo muoyo wa kashidi. Udi pebe musue kuikala umue wa kudibo anyi? Diakalenga, mukanda wa Buakabuluibua udi uleja se: mbipepele!​—Buakabuluibua 7:9, 14, 17.

Ditandula dia malu masokoka a Nzambi

6. Mu kupita kua bidimu, mmikanda kayi ivua Bantemu ba Yehowa bapatule bua kufila butoke pa Buakabuluibua?

⁶ Mu 1917, Société Watch Tower wakapatula mukanda wa Le mystère accompli, uvua umvuija mvese umue ku umue ya mu mukanda wa Yehezekele ne wa Buakabuluibua. Pashishe, bu muvua mianda ya pa buloba bujima ileja patoke dikumbana dia milayi ya mu Bible, bakapatula mu 1930, mukanda wa Light (Butoke) mu bitupa bibidi, uvua ukonkonona tshiakabidi mukanda wa Buakabuluibua. Bu muvua butoke butungunuka ne “kupatukila bantu bakane,” mu 1963, Bantemu ba Yehowa bakapatula mukanda wa mabeji 704 ne tshiena-bualu etshi: “Babylone la Grande est tombée!” Le Royaume de Dieu a commencé son règne! Mukanda eu uvua umvuija malu wonso, bumue ku bumue, adi atangila dipatuka ne diupuka dia Babilone Munene, nsangilu wa pa buloba bujima wa bitendelelu bia dishima, ne ushikila ne dikonkonona dia nshapita tshitema ya ndekelu ya mukanda wa Buakabuluibua. Bu muvua ‘njila wa bantu bakane ukenka ne butoke buvule,’ nangananga mu 1969, pa bidi bitangila mudimu mu bisumbu, kuakapatuka mukanda udi ne tshiena-bualu etshi: “Alors sera consommé le mystère de Dieu,” wa mabeji 414 uvua ukonkonona pawu nshapita 13 ya ntuadijilu ya Buakabuluibua.​—Musambu wa 97:11; Nsumuinu 4:18.

7. (a) Bua tshinyi Bantemu ba Yehowa mbapatule mukanda eu pa Buakabuluibua? (b) Ntshinyi tshiambuluisha babadi ba mukanda eu pa bidi bitandila malongesha?

⁷ Bua tshinyi mbapatule mukanda mukuabo udi wakula bua Buakabuluibua ne baufundulule matuku aa? Mavule a ku mamanyisha mapatula diambedi avua matambe kumvuija malu wonso, bumue ku bumue, ne kabivua bipepele bua kuakudimuna ne kuapatula mu miakulu mivule to. Nenku, bivua bia mushinga bua kuenza mukanda umue wa Buakabuluibua udi mua kukudimunyibua mu miakulu ya bungi. Kabidi, musangu’eu, tudi benze muetu muonso bua kupepesha malongesha ku diambuluisha dia bimfuanyi, mazola ne mumvuija menza mu mêyi makese, biambuluisha babadi bua kujingululabo menemene mushinga wa mulayi eu wa dikema.

8. Nkabingila kayi kanene katudi naku pa kupatula mukanda eu?

⁸ Kadi, kabingila kanene ka dipatula dia mukanda eu, ndikengedibua dia kuenda pamue ne bulelela busokolola mu tshikondo etshi. Yehowa udi utungunuka ne kufila butoke buvule pa diumvuija dia Dîyi diende; nanku, tuikalayi batekemene ne: dimanya dietu dia mukanda wa Buakabuluibua ne dia milayi mikuabo neditambe kutokeshibua bu mutudi tuenda tusemena ku dikenga dinene. (Matayi 24:21; Buakabuluibua 7:14) Bidi bia mushinga bua se: tuikale bapete mamanyisha adi akengedibua. Monayi tshidi mupostolo Petelo mufunde pa bidi bitangila mulayi wa Nzambi: “Nudi nuenza bimpe panudi nuteya ntema [ku dîyi dia buprofete] didi bu muendu udi ukenka mu muaba wa mufitu, too ne muatshia butuku ne muabanda mutoto wa mu dinda, mu mitshima yenu.”​—2 Petelo 1:19.

9. (a) Bilondeshile Buakabuluibua ne milayi mikuabo, ntshinyi tshialua Nzambi kufuka? (b) Bulongolodi bupiabupia nntshinyi, ne mmunyi mua kupanduka bua kubuelamu?

⁹ Mukanda wa Buakabuluibua udi usakidila tshiawu tshijadiki ku milayi mikuabo mivule ya mu Bible, uleja se: Yehowa mmupangadije bua kufuka diulu dipiadipia ne buloba bupiabupia. (Yeshayi 65:17; 66:22; 2 Petelo 3:13; Buakabuluibua 21:1-5) Mukenji udimu mmutumina nangananga bena nkristo bela manyi badi Yezu musumbe ku mashi ende bua kukokeshabo nende mu diulu dipiadipia. (Buakabuluibua 5:9, 10) Kadi, lumu luimpe elu nelukoleshe kabidi ditabuja dia miliyo ya bantu badi bajinga kuikala ne muoyo wa kashidi mu Bukalenge bua Kristo. Udi pebe umue a kudibo anyi? Pikalabi nanku, mukanda wa Buakabuluibua neukoleshe ditekemena diebe dia kuikala ne muoyo mu Mparadizu, dia kuikala umue wa ku aba benza buloba bupiabupia, muwikala ne bua kusanka ne ditalala divule, makanda a mubidi malenga ne mabenesha kabukabu atungunuka Nzambi ne kupumuna. (Misambu 37:11, 29, 34; 72:1, 7, 8, 16) Udi ujinga kupanduka ne kubuela mu bulongolodi bupiabupia ebu anyi? Nanku, bidi bia lukasa, eyowa, kujingakanyi to, bua kuteya ntema ku diumvuija didi Buakabuluibua bufila bua tshikondo etshi tshidi tshifikisha ku nkomenu ukadi mpindieu pabuipi.​—Sefanya 2:3; Yone 13:17.

[Mêyi adi kuinshi]

[Tshimfuanyi dibeji dijima mu dibeji7]