Nshapita wa 24
Mukenji musheme ne wa bululu
Tshikena-kumona 6—Buakabuluibua 10:1-11:19
Tshiena-bualu: Tshikena-kumona tshia muvungu mukese; malu adi enzeka mu ntempelo; diela dia mpungi wa muanda-mutekete
Tshikondo tshia dikumbana: Biangatshile ku dibanjijibua dia Yezu mu 1914, too ne ku dikenga dinene
1, 2. (a) Diakabi dibidi diakapatula tshipeta kayi, ne kuakula bua bualu buadi nekushikile penyi? (b) Nnganyi udi Yone umona mpindieu upueka ufuma mu diulu?
DIKENGA dibidi divua dibutudi. Nditute bukua-buena-nkristo ne balombodi babu, “tshia-bisatu tshia bantu,” bavuabo batandule ngikadilu wabu wa lufu lua mu nyuma. (Buakabuluibua 9:15) Pashishe, Yone wakadiebeja tshivua diakabi disatu ne bua kutuala. Kadi, indila tung! Diakabi dibidi ki ndianji kujika nansha; kuakula bua bualu buadi nekushikile mu Buakabuluibua 11:14. Kumpala kua kufika aku, Yone neikale kabidi ntemu wa mianda muikalaye ne bua kukumbaja pende mudimu munene. Diambedi, udi umona muanda kampanda udi ukemesha:
2 “Ne meme kumona muanjelu mukuabu wa bukole uvua upueka ufuma mu diulu, muvuale ditutu, ne muanza-nkongolo uvua pa mutu wende, ne mpala wende uvua bu dîba, ne makasa ende avua bu makunji a kapia.”—Buakabuluibua 10:1.
3. (a) “Muanjelu wa bukole” nnganyi? (b) Muanza-nkongolo udi ku mutu wende udi tshimfuanyi tshia tshinyi?
3 “Muanjelu wa bukole” eu nnganyi? Mbimueneke se: n’Yezu Kristo mutumbisha, mu dikumbaja dia mudimu mukuabu. Mmuvuale ditutu didi dileja dibenga-kumueka. Ebi bidi bituvuluija mêyi aa a Yone wakamba pa bidi bitangila Yezu ne: “Monayi, udi ulua ne matutu, ne dîsu dionso nedimumone, ne aba bakamutua difuma.” (Buakabuluibua 1:7; fuanyikija ne Matayi 17:2-5.) Muanza-nkongolo udi pa mutu wende udi utuvuluija tshikena-kumona tshivua Yone mupete kumpala, tshia nkuasa wa butumbi wa Yehowa munyunguluka kudi “muanza-nkongolo mufuane dibue dia emerode ku tshimuenekelu.” (Buakabuluibua 4:3; fuanyikija ne Yehezekele 1:28.) Muanza-nkongolo eu uvua uvuluija bupole ne ditalala bidi binyunguluke nkuasa wa butumbi wa Nzambi. Bia muomumue, muanza-nkongolo udi ku mutu wa muanjelu udi usunguluja menemene muine eu bu mutuadi wa mukenji wa pa buende, mutuadi wa mukenji wa ditalala, “Muana wa mukalenge wa ditalala” mumanyisha kudi Yehowa.—Yeshayi 9:6, 7.
4. Miaku eyi idi yumvuija tshinyi (a) mpala wa muanjelu wa bukole “uvua bu dîba”? (b) Makasa a muanjelu avua “bu makunji a kapia”?
4 Mpala wa muanjelu wa bukole uvua “bu dîba.” Musangu mushale, mu tshikena-kumona tshivuaye mupete tshivua tshileja Yezu mu ntempelo wa Nzambi, Yone wakamona ne: mpala wa Yezu uvua “bu dîba padidi dikenka ne bukole buadi buonso.” (Buakabuluibua 1:16) Bu mudiye “dîba dia buakane,” Yezu udi umueneka muikale ne luondapu mu mapuapua ende bua diakalenga dia aba badi batshina dîna dia Yehowa. (Malaki 4:2) Pa kumbusha mpala wende, makasa a muanjelu eu adi pawu akenka; adi “bu makunji a kapia.” Muanjelu eu udi ne tshimuenekelu tshia Eu udi Yehowa mupeshe “butumbi buonso . . . mu diulu ne pa buloba.”—Matayi 28:18; Buakabuluibua 1:14, 15.
5. Ntshinyi tshidi Yone umona mu tshianza tshia muanjelu wa bukole?
5 Yone udi ubandila kabidi muanda eu: “Ne uvua ne muvungu mukese mubulula mu tshianza tshiende. Ne wakateka dikasa diende dia balume pa mbuu, kadi dia bakaji pa buloba.” (Buakabuluibua 10:2) Mmuvungu mukuabu anyi? Eyowa, kadi, ki mmutua bikangilu to. Nenku, tudi mua kutekemena kumona masokolola makuabu a dikema pamue ne Yone mu tshitupa tshîpi emu. Kadi, diambedi, netuanji kujingulula nsombelu muikala mianda itshivuavua ne bua kuenzeka.
6. (a) Bua tshinyi mbikumbanyine bua Yezu kuteka dikasa dimue pa buloba ne dikuabo pa mbuu? (b) Ndîba kayi diakakumbana menemene Musambu wa 8:5-8?
6 Tupingane ku diumvuija dia tshimuenekelu tshia Yezu. Makasa ende adi akenka bu kapia mmateka pa buloba ne pa mbuu, miaba idiye ne bukokeshi buonso mpindieu. Ebi bidi biumvuangane menemene ne musambu eu wa mulayi: “Wewe [Yehowa] wakaditua kabidi ku dimuvuija [Yezu] mupuekele kudi aba badi bafuane Nzambi, ne wakamuas ku mutu butumbi ne bulengele. Wakamuvuija mukokeshi pa midimu ya bianza biebe; wakateka tshintu tshionso muinshi mua makasa ende: nyama mikese ya ku bimuna ne ngombe, yonso pamue, kabidi ne nyama ya tshisuku, nyunyu ya muulu ne mishipa ya mu mbuu, bionso bidi bipitshila mu tujila tua ku mbuu.” (Musambu wa 8:5-8; tangila kabibi Ebelu 2:5-9.) Musambu eu wakakumbana menemene mu 1914, pakatekibua Yezu mu nkuasa bu Mukalenge wa Bukalenge bua Nzambi ne pakatuadija tshikondo tshia ku nshikidilu. Nanku, malu adi Yone umona mu tshikena-kumona etshi mmatuadije kukumbana kubangila ku tshidimu atshi.—Musambu wa 110:1-6; Bienzedi 2:34-36; Danyele 12:4.
Makubakuba muanda-mutekete
7. Mmushindu kayi udi muanjelu wa bukole wela lubila, ne lubila elu ludi ne diumvuija kayi?
7 Muanjelu wa bukole yeye nkayende udi ukosesha dimubandila dia Yone: “Ne [muanjelu] wakela lubila ne dîyi dikole, amu bu patu ntambue ukungula. Ne pakelaye lubila, makubakuba muanda-mutekete akumvuija pawu mêyi awu.” (Buakabuluibua 10:3) Lubila elu lukole luakakoka ntema ya Yone; ludi lujadika ne: Yezu udi bushuwa “Ntambue wa mu tshisa tshia Yuda.” (Buakabuluibua 5:5) Yone udi ne bua kumanya kabidi ne: imue misangu, pa bidi bitangila Yehowa, mbambe ne: utu pende “ukungula.” Pa kukungula, Nzambi wakamanyisha mu mulayi disangishibua dia Izalele wa mu nyuma ne dilua dia “dituku dia Yehowa,” dituku dia kabutu. (Hoshea 11:10; Yoele 3:14, 16; Amosa 1:2; 3:7, 8) Nenku, mbimueneke patoke se: lubila elu lufuane kukungula kua ntambue luela kudi muanjelu wa bukole ludi lumanyisha kabidi mianda minene yenzekela mbuu ne buloba. Ludi lulomba makubakuba muanda-mutekete bua kuakulawu.
8. ‘Mêyi a makubakuba muanda-mutekete’ ntshinyi?
8 Yone ukavua mumane kumvua makubakuba avua afumina ku nkuasa mene wa butumbi wa Yehowa. (Buakabuluibua 4:5) Mu matuku a Davidi, pamu’apa bavua bakula bua makubakuba bu “dîyi dia Yehowa.” (Musambu wa 29:3) Mu matuku avua Yezu ukumbaja mudimu wende pa buloba, bavule bakitabuja ne: Yehowa wakakungula pakamanyishaye mu mushindu mumvuike ne: dilongolola diende ndia kutumbishisha dîna diende. (Yone 12:28, 29) Nanku, bidi bia meji bua kukomesha ne: ‘mêyi a makubakuba muanda-mutekete’ mmushindu wa kumanyisha, kudi Yehowa yeye nkayende, malongolola ende. Diumvuika dia makubakuba “muanda-mutekete” didi dileja ne: malu avua Yone mumvue mmakumbane tshishiki.
9. Dîyi difume mu diulu didi dilomba Yone bua kuenzaye tshinyi?
9 Kadi, teleja tung! Dîyi dikuabo didi diumvuika. Didi dituma dîyi didi ne bua kumueneka dikemesha Yone: “Ne pakakula makubakuba muanda-mutekete, nkavua nsua kufunda, kadi, meme kumvua dîyi difuma mu diulu diamba ne: ‘Sokoka, malu mamba kudi makubakuba muanda-mutekete, kuafundi to.’” (Buakabuluibua 10:4) Yone uvua ne bua kuindila ne muoyo kulukulu bua kumvua ne kufunda mikenji eyi ivua ikungula, anu bu muvua bena mu kasumbu ka Yone bindile mu matuku etu aa ne muoyo kulukulu bua Yehowa kusokolola malongolola ende bua kuamanyishabo. Kadi, masokolola adi afidibua amu pa dîba difunda kudi Yehowa.—Luka 12:42; tangila kabidi Danyele 12:8, 9.
Dikumbana dia bualu bunsantu busokoka
10. Mmu dîna dia nganyi mudi muanjelu wa bukole utshipa tshieleka, ne bivua bua kumanyisha tshinyi?
10 Mu mutantshi eu, Yehowa udi upesha Yone bukenji bukuabu. Kunyima kua dikungula dia makubakuba muanda-mutekete, muanjelu wa bukole udi wakula tshiakabidi: “Ne muanjelu umvua mmona muimane pa mbuu ne pa buloba wakajula tshianza tshiende tshia balume muulu, e kutshipa tshieleka mu dîna dia Eu udi ne muoyo tshiendelele, wakafuka diulu ne bintu bidimu, ne buloba ne bintu bidipu, ne mbuu ne bintu bidimu, ne: ‘Kakuakunenga kabidi lupolo to.’” (Buakabuluibua 10:5, 6) Mmu dîna dia nganyi mudi muanjelu wa bukole utshipa tshieleka? Yezu mutumbisha udi utshipa tshieleka, ki mmu dîna diende nkayende, apo mmu dîna dia Mfumu mutambe bunene udi ku mutu kua bionso: Yehowa, Mufuki ukena-ufua wa diulu ne buloba. (Yeshayi 45:12, 18) Ku mutshipu eu, muanjelu udi ushindikila Yone ne: bua Nzambi, kakuakunenga kabidi lupolo to.
11, 12. (a) Miaku eyi “kakuakunenga kabidi lupolo” idi yumvuija tshinyi? (b) Ntshinyi tshidi tshifikishibue ku dikumbana diatshi?
11 Bu mudi muaku “lupolo” muikale nkudimuinu wa muaku wa tshiena-Greke khroʹnos, udi umvuija ku dîna ne: “dîba.” Bamue badi bela meji ne: dimanyisha edi dia muanjelu didi ne bua kukudimunyibua se: “kakuakuikala kabidi dîba nansha,” bienz’amu bu ne: dîba, mu ngumvuilu utudi bamanye, didi ne bua kujimina. Kadi, mu mvese eu mbatumike ne muaku khroʹnos kawuyi ne kanungu kasunguluji. Nenku, kawena umvuija dîba mu ngumvuilu ukena musunguluke nansha, kadi, “ndîba kampanda” peshi “tshikondo kansanga.” Mu ngakuilu mukuabu, bua Yehowa, kakuakunenga kabidi tshikondo kampanda tshia pa mutu (peshi lupolo kansanga) to. Muaku kampanda wa pa muanda wa tshiena-Greke udi ufuma ku muaku khroʹnos mmutumika kabidi nawu mu Ebelu 10:37, mudi Paulo ufunda pa kutela Habakuka 2:3, 4 ne: “eu udi ulua . . . kakunenga kabidi lupolo to.”
12 “Kakuakunenga kabidi lupolo to”—mmushindu kayipu udi miaku eyi yumvuika misheme ku matshi a banunu bena mu kasumbu ka Yone lelu’eu! Mmu ngumvuilu kayi mudiku kakuyi kunenga kabidi lupolo? Yone udi utumanyisha ne: “Kadi, mu matuku a diela mpungi kudi muanjelu wa muanda-mutekete, pikalaye pa kuela mpungi wende, ke pakumbana bualu bunsantu busokoka bua Nzambi, bilondeshile lumu luimpe luvuaye mumanyishe bapika bende baprofete.” (Buakabuluibua 10:7) Bua Yehowa, etshi ke tshikondo tshia kufikisha bualu buende bunsantu busokoka ku nkomenu wabu wa disanka, ne tshipeta tshia butumbi.
13. Bualu bunsantu busokoka bua Nzambi ntshinyi?
13 Bualu bunsantu busokoka ebu ntshinyi? Budi butangila dimiinu divuabo balaye mu Edene bua musangu wa kumpala, diakadileja dikale menemene Yezu Kristo. (Genese 3:15; 1 Timote 3:16) Bualu busokoka ebu budi kabidi butangila muanda wa kumanya mukaji, kudi Dimiinu edi difumine. (Yeshayi 54:1; Galatia 4:26-28) Kabidi, budi butangila bakuabu bena mu kasumbu ka dimiinu ne Bukalenge budi Dimiinu eu ne bua kukokesha. (Luka 8:10; Efeso 3:3-9; Kolosai 1:26, 27; 2:2; Buakabuluibua 1:5, 6) Lumu luimpe ludi lutangila Bukalenge ebu bumuepele bua mu diulu ludi ne bua kumanyishibua pa buloba bujima mu tshikondo tshia ku nshikidilu.—Matayi 24:14.
14. Bua tshinyi dikenga disatu ndisuikakaja ku Bukalenge bua Nzambi?
14 Kabiyi mpata, ndumu luimpe kutamba mikuabo. Pabi, mu Buakabuluibua 11:14, 15, diakabi disatu ndisuikakaja ku Bukalenge. Mbua kabingila kayi? Bualu, bua bantu badi bapite kunanga bulongolodi bua malu bua Satana, dimanyisha edi dia lumu luimpe difuane muadi wa mpungi didi diamba mudi bualu bunsantu busokoka bua Nzambi bukumbana—mbuena-kuamba ne: Bukalenge bua Masiya bua Nzambi bukadiku—mmukenji mubi kudibo. (Fuanyikija ne 2 Kolinto 2:16.) Udi umvuija ne: bulongolodi budibo banange bikole bukadi pa kubutudibua. Bu mudi dituku dia kudisombuela dia Nzambi dienda disemena ku kakese ku kakese, mêyi a makubakuba muanda-mutekete adi ne madimuija aa matuadi a diakabi adi enda avua matoke menemene ne a bukole buvule.—Sefanya 1:14-18.
Muvungu mubulula
15. Ntshinyi tshidi dîyi difume mu diulu ne muanjelu wa bukole bambila Yone, ne kudia muvungu kuvua ne buenzeji kayi kudi Yone?
15 Padi Yone muindile diedibua dia mpungi wa muanda-mutekete ne dikumbana dia bualu bunsantu busokoka bua Nzambi apa, udi upeshibua mudimu kampanda: “Ne dîyi dimvua mumvue difuma mu diulu didi diakula kabidi nanyi diamba ne: ‘Ndaku, wangate muvungu mubulula udi mu tshianza tshia muanjelu udi muimane pa mbuu ne pa buloba.’ Ke meme kuya kudi muanjelu ne kumuambila bua kumpeshaye muvungu mukese. Ne kungambilaye ne: ‘Uwangate ne uwudie, newuvuije munda muebe bululu, kadi, newikale musheme mukana muebe bu buitshi.’ Ke meme kuangata muvungu mukese ku tshianza tshia muanjelu ne kuwudia, ne uvua musheme mukana muanyi bu buitshi; kadi, meme mumane kuwudia, munda muanyi muakavuijibua bululu. Ne buobo kungambila ne: ‘Udi ne bua kufila tshiakabidi milayi idi itangila bisamba ne matunga ne miakulu ne bakalenge bavule.’”—Buakabuluibua 10:8-11.
16. (a) Mmuanda kayi wa muomumue uvua muenzekele Yehezekele ne Yone? (b) Bua tshinyi muvungu mmusheme padi Yone uwudia, kadi muikale bululu munda muende?
16 Yone mmulombibue bua kuenza mushindu wa muomumue ne muprofete Yehezekele, uvua mupete pende bukenji bua kudia muvungu pavuaye muipata mu ditunga diende ne muela mu lukanu ku Babilone. Muvungu eu uvua umvuika musheme mukana muende, kadi, kunyima kua yeye mumane kuwuja tshifu tshiende, wakamusaka bua kumanyisha malu a bululu bua nzubu mutomboke wa Izalele. (Yehezekele 2:8-3:15) Bia muomumue, muvungu mubulula udi Yezu Kristo mutumbisha upesha Yone mmuenze bu mukenji wa Nzambi. Bushuwa, Yone udi ne bua kufila bumanyishi budi butangila “bisamba ne matunga ne miakulu ne bakalenge bavule.” Mbimushemene bua kudia muvungu eu, bualu udi ufuma kudi Nzambi. (Fuanyikija ne Musambu wa 119:103; Yelemiya 15:15, 16.) Kadi, kusuyika kuawu mu tshifu udi umvua bululu bualu, amu bu eu uvua Yehezekele mudie mu tshikondo tshiende, muvungu eu udi umanyisha malu mabi bua bantu bena buntomboji.—Musambu wa 145:20.
17. (a) Nnganyi udi wambila Yone bua kufila bumanyishi “tshiakabidi,” ne ditumina dîyi edi didi diumvuija tshinyi? (b) Ndîba kayi divua muanda eu muleja mu tshimfuanyi ne mumona kudi Yone ne bua kukumbana?
17 Kabiyi mpata, Yehowa Nzambi ne Yezu Kristo ke badi bambila Yone bua kufila milayi tshiakabidi. Ku diambuluisha dia mamanyisha akavuaye mufunde mu mukanda wa Buakabuluibua, nansha muvuaye muipata ne muela mu lukanu mu tshidiila tshia Patmose, Yone ukavua mumane kufila milayi idi itangila bisamba, matunga, miakulu ne bakalenge. Muaku “tshiakabidi” udi umvuija ne: mpindieu udi ne bua kufunda ne kupatula patoke mamanyisha a ndekelu a mu mukanda wa Buakabuluibua. Kadi, tuvuluke se: Yone udi utumika bushuwa mu tshikena-kumona etshi tshia mulayi. Bidiye ufunda bidi bushuwa mulayi udi ne bua kukumbana kunyima kua 1914, padi muanjelu wa bukole uteka dimue dikasa pa buloba ne dikuabo pa mbuu. Muanda eu muleja mu tshimfuanyi udi umvuija tshinyi bua bena mu kasumbu ka Yone ba matuku etu aa?
Muvungu mukese wa matuku etu aa
18. Ku ntuadijilu wa dituku dia Mukalenge, nditabalela kayi divua bena mu kasumbu ka Yone baleje bua mukanda wa Buakabuluibua?
18 Mu mushindu wa dikema, malu adi Yone umona adi mundidimbi wa malu akenzekela bena mu kasumbu ka Yone ku ntuadijilu wa dituku dia Mukalenge. Ngumvuilu wabo wa malongolola a Yehowa, pamue ne wa malu avua ne bua kuenzeka pashishe bu bipeta bia makubakuba muanda-mutekete, kavua muanji kukumbana tshishiki tshikondo atshi to. Nansha bikale nanku, bavua baleje ditabalela dikole bua mukanda wa Buakabuluibua, ne Charles Taze Russell uvua mumvuije bitupa bivule mu matuku ende a muoyo. Kunyima kua lufu luende mu 1916, malu mavule avuaye mufunde akasangishibua ne kuapatulabo mu mukanda uvua ne tshiena-bualu tshia Le mystère accompli. Kadi, kunyima kua bidimu, biakamueneka se: mukanda eu kawuvua ufila mumvuija adi asankisha pa mukanda wa Buakabuluibua. Bashadile ba ku bana babo ne Kristo bavua kabidi ne bua kuindila katupa kîpi too ne patuadija bikena-kumona kukumbana, kumpala kua kupetabo ngumvuilu mulelela wa mukanda eu mufundisha ku spiritu wa Nzambi.
19. (a) Mmushindu kayi uvua Yehowa mutumike ne bena mu kasumbu ka Yone kumpala mene kua mêyi a makubakuba muanda-mutekete kumvuikawu wonso? (b) Ndîba kayi diakapeta bena mu kasumbu ka Yone muvungu mukese mubulula, ne abi biakumvuija tshinyi buabu buobo?
19 Kadi, amu bu Yone, Yehowa ukavua mutuadije kutumika nabo kumpala mene kua mêyi a makubakuba muanda-mutekete kumvuikawu wonso. Bavua bafile bumanyishi ne mitalu munkatshi mua bidimu 40 bia kumpala kua 1914, ne bavua benza madikolela bua kushalabo batumika munkatshi mua mvita ya kumpala ya buloba bujima. Nenku, bakadileja muvuabo aba bakasangana mfumu pakafikaye, benda bapesha bena mudimu biakudia mu tshikondo tshiakanyine. (Matayi 24:45-47) Nanku, mu 1919, buobo ke bakapeshabo muvungu mukese mubulula, mbuena-kuamba ne: mukenji wa kumanyisha patoke kudi bukua-bantu. Amu bu Yehezekele, bivua bikengela bua buobo kumanyisha mukenji eu kudi bulongolodi bupange lulamatu—bukua-buena-nkristo—buvua budiamba mudibo busadila Nzambi, kadi, pa kuamba bulelela, kabuyi buenza nunku. Amu bu Yone, bavua kabidi ne bua kufila bumanyishi budi butangila “bisamba ne matunga ne miakulu ne bakalenge bavule.”
20. Kudia muvungu kudi Yone kudi kuleja tshinyi?
20 Kudia muvungu kudi Yone kudi kuleja ne: bana babo ne Yezu mbanyishe mudimu eu. Muine eu wakalua tshitupa tshia mubidi wabo mu ngumvuilu wa se: bavua basungulujibua bu badi basuikakane ne tshitupa etshi tshia Dîyi dia Nzambi difundisha ku spiritu, pa kudidiisha ne tshine etshi. Kadi, mukenji uvuabo ne bua kumanyisha uvua ne malumbuluisha a Yehowa avua kaayi masheme bua bantu bavule, bualu uvua ukongoloja kabidi makenga mamanyisha mu mukanda wa Buakabuluibua nshapita wa 8. Kadi, uvua musheme bua bena nkristo ba muoyo mutoke bu muvuabo bafike ku dimanya malumbuluisha aa ne ku disunguluja muvua Yehowa utumika nabo tshiakabidi bua kuamanyisha.—Musambu wa 19:9, 10.
21. (a) Mmu ngumvuilu kayi muvua mukenji wa mu muvungu mukese mulue kabidi musheme bua bena mu musumba munene? (b) Bua tshinyi lumu luimpe ludi lumu lubi bua bantu badi bafuane mbuji?
21 Pashishe, mukenji uvua mu muvungu wakalua musheme kabidi bua bena mu “musumba munene . . . ba mu matunga wonso ne bisa bionso ne bisamba bionso ne miakulu yonso,” bavua badilakana bua malu matambe bubi avuabo bamona enzeka mu bukua-buena-nkristo. (Buakabuluibua 7:9; Yehezekele 9:4) Badi bamanyisha pabu lumu luimpe ne mitalu pa kutumika ne mêyi masheme ne malengele bua kuakula bua ndongoluelu ya mpatshi miangata kudi Yehowa bua diakalenga dia bena nkristo badi bafuane mikoko. (Musambu wa 37:11, 29; Kolosai 4:6) Kadi bua bena lukuna, ndumu lubi. Mbua kabingila kayi? Bualu lumu elu ludi lumvuija ne: bulongolodi budibo beyemene—budi mene pamu’apa bubapetesha disankishibua dia tshitupa tshîpi, budi ne bua kujimina. Nenku, buabu buobo, lumu luimpe ludi lumvuija lufu.—Filipoi 1:27, 28; fuanyikija ne Dutelonome 28:15; 2 Kolinto 2:15, 16.
[Bimfuanyi mu dibeji 160]
Bena mu kasumbu ka Yone ne bena mudimu nabo badi bamanyisha mukenji musheme ne wa bululu kudi bantu buonso