Nshapita wa 7

Utemeshilule dinanga dia diambedi!

EFESO

1. Ntshisumbu kayi tshidi Yezu utumina mukenji wende wa kumpala, ne ntshinyi tshidiye uvuluija batangidi?

MUKENJI wa kumpala wa Yezu mmutumina tshisumbu tshia ku Efeso, tshimenga tshia bubanji tshia mu tshikondo atshi, ku muelelu wa mbuu, ku Azi Minere pabuipi ne tshidiila tshia Patmose. Wakatumina Yone dîyi ne: “Kudi muanjelo wa tshisumbu tshia ku Efeso funda ne: Mona tshidibo bamba kudi eu udi mukuate mitoto muanda-mutekete mu tshianza tshiende tshia balume, yeye udi wenda munkatshi mua bitekedi bia miendu muanda-mutekete bia ngolo.” (Buakabuluibua 2:1) Anu bu mu mikenji mikuabo isambombo, apa Yezu udi ukoka ntema pa tshintu tshia pa buatshi tshidi tshileja bukokeshi budiye nabu. Udi uvuluija batangidi ba ku Efeso bua se: bakulu buonso badi ku bukubi bua butangidi buende nkayende, kabidi bua se: udi ukontolola midimu ya bisumbu bionso. Too ne mu matuku etu aa, utshidi’anu mutungunuke ne bumfumu buende bua dinanga, ukuba bakulu ne udiisha ne muoyo muimpe bena mu tshisumbu buonso. Ku musangu ne ku musangu, udi wakaja mianda ya mu tshisumbu bua butoke kukenkabo biakane. Eyowa, Yezu udi mfumu Mulami wa tshisumbu tshia mikoko ya Nzambi.​—Matayi 11:28-30; 1 Petelo 5:2-4.

2. (a) Mbua malu kayi mimpe budi Yezu welela tshisumbu tshia ku Efeso ka-lumbandi? (b) Mmubelu kayi wa mupostolo Paulo uvua batangidi ba ku Efeso mua kuikala balonde?

² Kunyima, Yezu udi ufila mukenji udi bu tshilejilu bua itanu ya ku mikenji yende yonso: udi utuadija ne diela ka-lumbandi ka musangelu. Bua bena ku Efeso, wakatuma mukenji eu: “Ndi mumanye bienzedi biebe, ne mudimu webe, ne dinanukila diebe; ne kuena mua kuanyisha bantu babi, ne uvua mutete aba badi badiamba mudibo bapostolo, pabo kabayi bapostolo, ne wewe kubasangana bena dishima. Udi uleja kabidi dinanukila, uvua muanyishe makenga bua dîna dianyi ne kuvua mupungile.” (Buakabuluibua 2:2, 3) Bidimu bivule kumpala, mupostolo Paulo uvua mudimuije bakulu ba ku Efeso pa bidi bitangila “mibuabua ya tshikisu,” peshi batontolodi bajudiji ba bimvundu munkatshi mua tshisumbu tshia mikoko, e kuambilaye bakulu aba bua “kushala batabale,” pa kulonda tshilejilu tshiende tshia dibenga kupungila. (Bienzedi 20:29, 31) Bu mudi Yezu ubela ka-lumbandi mpindieu bua mudimu wabo mukole ne bua dinanukila diabo, bavua ne bua kuikala balonde mubelu eu.

3. (a) Mmunyi muvua “bapostolo ba dishima” bakebe mua kushima bena lulamatu ba mu matuku etu aa? (b) Ndidimuija kayi didi Petelo mufile pa bidi bitangila batontolodi?

³ Mu dituku dia Mukalenge kabidi, nkupatuke “bapostolo ba dishima” badi “bakula bintu bitshimbakane bua kukoka balongi munyima muabo.” (2 Kolinto 11:13, Bienzedi 20:30; Buakabuluibua 1:10) Badi bamona malu mimpe mu tusumbusumbu tuonso tudi tulongesha malu mabengangane, bamba mudi Nzambi kayi ne bulongolodi, bavila mudi Yezu kayi mupete bukokeshi bua Bukalenge mu 1914. Badi bakumbaja mulayi wa mu 2 Petelo 3:3, 4 wa se: “Mu matuku a ku nshikidilu, baseki nebapatuke ne tuseku tuabu, benda bilondeshile masanka abo ne bamba ne: ‘Dikalaku diende diakalayabo diepi? Bualu, kubangila ku dituku diladile bakaku betu tulu mu lufu, malu wonso adi’anu bu muvuawu menemene ku ntuadijilu wa bufuki.’”

4. (a) Nku malu kayi kudi lutambishi ne ngikadilu wa buntomboji bia bena tuseku bimueneka? (b) Amu bu bena Efeso, ntshinyi tshidi bena nkristo ba lelu’eu benza bua kutantamena bena lukuna ba mashimi?

⁴ Baseki aba kabena banyisha lungenyi lua kumanyisha ditabuja diabo patoke nansha. (Lomo 10:10) Badi batuibua nyama ku mikolo kudi bamfumu ba bukua-buena-nkristo ne badi bapeta diambuluisha dia bikandakanda bipiabipia, tudiomba ne televizion bua kumuangalaja luapolo ya dishima pa bidi bitangila bena mudimu nabo ba kale. Bena nkristo ba lulamatu bakajingulula diakamue se: ngakuilu ne bienzedi bia bena dishima aba kabiena bileja bulelela nansha. Anu bu bena Efeso, bena nkristo ba lelu’eu “kabena mua kuanyisha bantu babi,” nanku, badi babipata mu bisumbu biabo.a

5. (a) Bilondeshile Yezu, mbufuba kayi buvua nabu bena Efeso? (b) Mmêyi kayi avua bena Efeso ne bua kuikala bavuluke?

⁵ Mpindieu, anu bu mudiye wenza bua bitanu bia ku bisumbu muanda-mutekete, Yezu udi ujula tshilumbu tshikole. Udi wambila bena Efeso ne: “Nansha bikale nanku, bualu bundi mukulamine ku muoyo, mbua pawudi mulekele dinanga diuvua nadi ku ntuadijilu.” (Buakabuluibua 2:4) Kabavua ne bua kupanga kulama dinanga diabo nansha, bualu bidimu 35 kumpala, Paulo uvua mubafundile pa bidi bitangila “dinanga dinene didi Nzambi mutunange nadi,” e kubakankamija ne: “Nunku, vuayi bidikiji ba Nzambi, bu bana bananga, ne tungunukayi ne kuenda mu dinanga, anu bu muakanunanga kabidi Kristo.” (Efeso 2:4; 5:1, 2) Kabidi, mêyi aa a Yezu avua ne bua kuikala malamate kashidi mu mitshima yabo: “Yehowa Nzambi wetu udi’amu Yehowa umu’epele, ne udi ne bua kunanga Yehowa Nzambi webe ne muoyo webe wonso, ne anyima webe wonso, ne tshieledi tshiebe tshionso tshia lungenyi, ne bukole buebe buonso.” (Mako 12:29-31) Bena Efeso bavua bajimije dinanga edi dia diambedi.

6. (a) Nansha tuetu bakumbaje matuku mavule anyi makese mu tshisumbu, tudi ne bua kudilama ku njiwu ne mmuenenu kayi mibi? (b) Dinanga dietu bua Nzambi didi ne bua kutusaka ku tshinyi?

⁶ Nansha tuetu tudisangisha ne bena mu tshisumbu kukadi bidimu bivule peshi matuku makese, tudi ne bua kudikuba bua katujimiji dinanga dietu dia kumpala bua Yehowa. Mmunyi mutudi mua kujimija dinanga edi? Mpa kulekela ditabalela dietu dia mudimu wetu wa ku mubidi, dijinga dia kupeta mfranga mivule, peshi dipatshila dia masanka a mubidi kuluabi pa muaba wa kumpala mu nsombelu wetu. Nanku, tshieledi tshietu tshia lungenyi netshishindamene pa bintu bia ku mubidi pamutu pa kushindamena pa bintu bia mu nyuma. (Lomo 8:5-8; 1 Timote 4:8; 6:9, 10) Dinanga dietu bua Yehowa didi ne bua kutusaka ku diumusha majinga a mushindu’eu ne ‘kutungunuka ne kukeba diambedi bukalenge bua Nzambi ne buakane buende,’ bua tuetu ‘kudibutshila biuma mu diulu.’​—Matayi 6:19-21, 31-33.

7. (a) Ntshinyi tshidi ne bua kutusaka ku disadila Yehowa? (b) Yone udi wamba tshinyi pa bidi bitangila dinanga?

⁷ Mudimu utudi tuenzela Yehowa wikale matuku wonso wenjibua ku dinanga diondoke ditudi nadi buende yeye. Tuikale ne dianyisha dikole bua bionso bidi Yehowa ne Kristo batuenzele. Anu muvua Yone nkayende mufunde pashishe ne: “Dinanga mu muanda eu didi nunku: ki ntuetu bavua banange Nzambi, kadi yeye ke uvua mutunange, e kutuma Muanende bu mulambu wa dijimija nawu mpekatu yetu.” Yone udi utungunuka pa kutuambila ne: “Nzambi udi dinanga, ne eu udi ushala mu dinanga, udi ushala mu buobumue ne Nzambi, ne Nzambi udi ushala mu buobumue nende.” Tuenze muetu muonso bua dinanga dietu bua Yehowa, bua Mukalenge Yezu Kristo, ne bua Dîyi dia muoyo dia Nzambi kaditeketshi nansha kakese! Dinanga edi tudi mua kudileja, ki ng’amu ku mudimu wa mitalu utudi tuenzela Nzambi, kadi, ne ku ditumikila ku “dîyi edi didiye mututumine ne: eu udi unanga Nzambi, anange kabidi ne muanabo.”​—1 Yone 4:10, 16, 21; Ebelu 4:12; tangila kabidi 1 Petelo 4:8; Kolosai 3:10-14; Efeso 4:15.

“Enza midimu ya diambedi”

8. Bilondeshile Yezu, ntshinyi tshivua bena Efeso ne bua kuenza?

⁸ Bena Efeso badi ne bua kutemeshilula dinanga divuabo nadi kumpala, bua kabavu kujimija bionso. Yezu udi ubambila ne: “Nunku, vuluka malu adi makufikishe ku dipona, unyingalale ne wenze midimu yebe ya diambedi. Tshianana, ndi mvua kuudi, ne nengumushe tshitekedi tshiebe tshia miendu pa muaba watshi, biwabenga kunyingalala.” (Buakabuluibua 2:5) Mmunyi muvua bena nkristo ba ku Efeso bakidile mêyi aa? Katuena bamanye to. Tudi tutekemena se: bavua banyingalale ne bavua batemeshilule dinanga diabo bua Yehowa. Tshianana, muendu wabo uvua mua kujima ne tshitekedi tshiabo tshia miendu tshivua mua kumushibua. Bavua mua kujimija diakalenga divuabo nadi dia kukenkesha bulelela.

9. (a) Mmêyi kayi a dikankamija avua Yezu mutumine bena Efeso? (b) Kunyima kua lufu lua Yone, mmushindu kayi uvua bisumbu bipangile mua kulonda mubelu wa Yezu mutumina bena Efeso?

⁹ Nansha bikale nanku, Yezu udi utumina bena Efeso mêyi aa a dibakankamija nawu: “Pabi, udi mulame muanda eu: udi ukina bienzedi bia kasumbu ka Nikolawuse, bindi nkina panyi.” (Buakabuluibua 2:6) Tshidibi, bena Efeso bavua bakina tusumbusumbu, anu mudi Mukalenge Yezu Kristo ukina pende muanda eu. Diakabi, kunyima kua bidimu, bisumbu bivule biakalengulula mêyi a Yezu aa. Dipanga diabi dia dinanga bua Yehowa, bua bulelela ne bua bena mudimu nabo diakababueja mu mîdima ya mu nyuma. Biakatapuluka mu tusumbusumbu tuvua tuluishangana. Bafunduludi “bena nkristo” bapange dinanga bua Yehowa bakumusha dîna mene dia Nzambi mu mifundu ya tshiena-Greke ya mu Bible. Dipanga edi dia dinanga diakafikisha kabidi ku dipatuka dia malongesha a bena Babilone ne a bena Greke bu mudi inferno, mpurgatorio ne Busatu-Bunsantu, mu dîna dia buena-nkristo. Bu muvuabo bapange dinanga bua Nzambi ne bua bulelela, bavule ba ku aba bavua badiamba mudibo bena nkristo bakalekela kuamba kua lumu luimpe lua Bukalenge bua Nzambi. Bakafika ku dikokeshibua kudi kasumbu ka bamfumu ba malu a Nzambi bena buiminyi kavua kadienzele buaku bukalenge pa buloba apa.​—Fuanyikija ne 1 Kolinto 4:8.

10. Nnsombelu kayi uvua mu bitendelelu bia bukua-buena-nkristo mu 1918?

¹⁰ Pakatuadijila dilumbuluisha ku nzubu wa Nzambi mu 1918, bamfumu ba tusumbusumbu tua bukua-buena-nkristo bakafila patoke diambuluisha diabo mu Mvita ya Kumpala ya buloba bujima, basaka bena katolike ne bena mishonyi ba nseke ibidi mitapuluke ku dishipangana. (1 Petelo 4:17) Bishilangane ne tshisumbu tshia ku Efeso tshivua tshikina bienzedi bia kasumbu ka Nikolawuse, bitendelelu bia bukua-buena-nkristo bivua bidibipishe katshia ku kale ne malongesha adi mabengangane munkatshi muawo ne mikale mu buluishi ne aa adi Nzambi nkayende ulongesha, kabidi bamfumu babo bavua badisuike ne bena mu bulongolodi ebu, buvua Yezu muambile balongi bende bua kabadisangishi kudibu. (Yone 15:17-19) Bua dipanga kumanya tshiena-bualu tshinene tshia Bible, mbuena kuamba ne: Bukalenge bua Nzambi, bisumbu biabo kabivua bituadi bia miendu bikenkeshi bia bulelela bua mu Mifundu, ne benamu kabavua bena mu ntempelo wa mu nyuma wa Yehowa. Pamutu pa kuikala mitoto, bamfumu babo (balume ne bakaji) bakadileja patoke mudibo ba ku “mupetudi wa mikenji.”​—2 Tesalonike 2:3; Malaki 3:1-3.

11. (a) Mu 1918, pa buloba bujima, ntshisumbu kayi tshia bena nkristo tshivua tshitumikile mêyi avua Yezu mutumine bena Efeso? (b) Ntshinyi tshivua bena mu kasumbu ka Yone benze bituadije ku 1919?

¹¹ Kadi, bua bena mu kasumbu ka Yone, bakapatuka mu diyoyo dia mvita ya kumpala ya buloba bujima ne dinanga dikole bua Yehowa ne bua bulelela, ke tshiakabasaka ku dimusadila ne mitalu mikole. Bena nkristo aba bakatantamena aba bavua bakeba mua kubueja ditapuluka mu tusumbusumbu, tshilejilu, pa kupesha Charles T. Russell lumu lunekesha, luamba kufuanangana ne ntendelelu wa mpingu anyi bifukibua, kunyima kua lufu luende mu 1916. Bobo bamane kupeta dinyoka dia makengeshibua ne ntatu, bakumvua Mfumu wabo ubamba ne: “Mbimpe,” e kubikidibuabo mu disanka diende. (Matayi 25:21, 23) Bilondeshile dipitakana dia mianda pa buloba ne malu avua abenzekela, bena nkristo aba bakajingulula dikumbana dia tshimanyinu tshifila kudi Yezu tshivua ne bua kushindika dikalaku diende dikena-dimueka bu Mukalenge. Bituadijile mu 1919, bakaya batangile kumpala bua kudifila mu dikumbana dia tshitupa tshikuabo tshia mulayi munene wa Yezu, mbuena kuamba ne: “Lumu luimpe elu lua Bukalenge nelumanyishibue pa buloba bujima budi bantu base, neluikale tshimanyinu bua matunga wonso; apu, ke nshikidilu kushishaye kulua.” (Matayi 6:9, 10; 24:3-14) Bu dinanga diabo bua Yehowa mua kuikala ditalale mu mushindu kampanda peshi kansanga, diakatema bu ndimi ya kapia biangatshile ku tshikondo atshi.

12. (a) Ndubila kayi luakedibua mu 1922, mu mpuilu kayi kupua muoyo? (b) Ndîna kayi diakitaba bena nkristo balelela mu 1931, ne bakanyingalala ku malu kayi?

¹² Mu mpuilu kayi kupua muoyo muvuabo babuele kudi bantu 18 000 ba ku bena nkristo aba, ku Cedar Point, Ohio, ku Etats-Unis, kumbukila ku dia 5 too ne dia 13 Kabitende 1922, lubila luakedibua ne: “Pinganayi mu madimi, ô nuenu bana ba Nzambi muena-kulu! . . . Bena mu bulongolodi ebu badi ne bua kumanya ne: Yehowa udi Nzambi ne Yezu Kristo udi Mfumu wa bamfumu ne Mukalenge wa bakalenge. . . . Ke bualu kayi: Manyishayi, manyishayi, manyishayi Mukalenge ne bukalenge buende!” Dîna dia mushinga mukole dia Yehowa diakatamba kuzangikibua. Mu 1931, bena nkristo aba bavua badisangishe mu mpuilu ku tshimenga tshia Columbus, Ohio, ku Etats-Unis, bakangata ne disanka dîna dimanyisha kudi Nzambi mu mulayi wa Yeshayi, dia Bantemu ba Yehowa. (Yeshayi 43:10, 12) Mu nimero wa dia 1 Luabanya 1939, dîna dia tshibejibeji tshia nshindamenu tshia bulongolodi diakalua Tshibumba tshia Nsentedi, tshimanyishi tshia Bukalenge bua Yehowa (Angl.), nunku, lumu luonso luakapeshibua Mutufuki wetu ne kudi mbulamatadi wende wa bukalenge. Basakibue kudi dinanga dipiadipia bua Yehowa, Bantemu ba Yehowa bakanyingalala bua muvuabo balengulule bua kunemeka ne kutumbisha dîna diende ne Bukalenge buende biende lumu.​—Musambu wa 106:6, 47, 48.

“Kudi mutshimunyi”

13. (a) Ndibenesha kayi divua bena Efeso ne bua kupeta bu bobo bikale ‘batshimunyi’? (b) Mmunyi muvua bena nkristo ba ku Efeso mua ‘kutshimuna’?

¹³ Ku ndekelu, anu mudiye wenza mu mikenji yende mikuabo, Yezu udi ukoka ntema ku [mudimu wa] spiritu wa Nzambi udi umanyisha ku butuangaji bua Yezu difutu dia lulamatu. Udi wambila bena Efeso ne: “Eu udi ne matshi umvue tshidi spiritu wambila bisumbu: Kudi mutshimunyi, nempeshe diakalenga dia kudia mamuma a mutshi wa muoyo, udi mu mparadizu wa Nzambi.” (Buakabuluibua 2:7) Aba badi ne matshi a lumvu nebadifile diakamue bua kuteya ntema ku mukenji eu wa muoyo, eku bamanye ne: kawena ufuma kudi Yezu nkayende, kadi, kudi Mukalenge Munene Yehowa, ku diambuluisha dia spiritu wende munsantu peshi bukole buenzeji. Mmunyi muikalabo mua ‘kutshimuna’? Mpa kuendela biakane mu makasa a Yezu wakashala ne muoyo mutoke too ne ku lufu, e kuamba ne: “Kolayi ku muoyo! Ngatshimunyi bena mu bulongolodi ebu.”​—Yone 8:28; 16:33; tangila kabidi 1 Yone 5:4.

14. “Mparadizu wa Nzambi” mutela kudi Yezu udi ufunkuna tshinyi?

¹⁴ Bu mudibo kabayi ne ditekemena dia kuikala ne muoyo mu mparadizu pa buloba, mmunyi mudi bena nkristo bela manyi, bu mudi bena Efeso, mua kupeta bu difutu dia kudia “mutshi wa muoyo udi mu mparadizu wa Nzambi”? Kabiena mua kuikala Mparadizu muasulula pa buloba nansha, bualu, bena nkristo bela manyi 144 000, kusangisha ne ba mu tshisumbu tshia ku Efeso, mbasumbibue munkatshi mua bukua-bantu bua kukokesha pamue ne Muan’a mukoko, Kristo Yezu, pa mukuna wa Siyona wa mu diulu bu bana ba mu nyuma. (Efeso 1:5-12; Buakabuluibua 14:1, 4) Nanku, apa badi ne bua kuikala bafunkuna muaba wa mu diulu mufuanangane ne mparadizu udi batshimunyi aba ne bua kupiana. Kuine aku, “mu mparadizu wa Nzambi,” mbuena kuamba ne: kumpala mene kua Yehowa yeye muine, bilobo ebi biapeshibua muoyo ukena-ufua nebitungunuke ne kuikala ne muoyo wa kashidi, anu bu mudibi bileja mu tshimfuanyi apa ku didia diabo dia mutshi wa muoyo.

15. Bua tshinyi dikankamija dia kutshimuna difila kudi Yezu didi ne mushinga mukole mutambe bua musumba munene lelu’eu?

¹⁵ Kadi, netuambe tshinyi bua batumikidi ba mikenji, balunda ba pa buloba ba bela manyi 144 000? Musumba munene wa Bantemu aba neutshimune pawu. Kadi, ditekemena dia batshimunyi aba ndia kubuela mu mparadizu pa buloba, muikalabo ne bua kunua ku “musulu wa mâyi a muoyo” ne kuondopibua ku diambuluisha dia “mabeji a mitshi” mikuna ku mielelu ya musulu eu. (Buakabuluibua 7:4, 9, 17; 22:1, 2) Nuenu badi bena mu musumba eu, ne musangelu, lejayi penu dinanga dienu bua Yehowa ne nutshimuna mvita ya ditabuja! Nenku, nenupete diakalenga dia kuikala ne muoyo wa kashidi mu Mparadizu pa buloba.​—Fuanyikija ne 1 Yone 2:13, 14.

[Mêyi adi kuinshi]

[Kazubu mu dibeji 36]

Disamuna mu dinanga Yehowa ne Muanende

Mukanda wa misambu muenza kudi tshisamba tshia Yehowa mu 1905 uvua ne misambu ivua isamuna Yezu misangu ibidi kupita eyi ivua isamuna Yehowa. Mu mukanda mupatula mu 1928, muvua misambu bungi bua muomumue, ivua itumbisha Yehowa ne eyi ivua itumbisha Yezu. Kadi, mu mukanda wa ndekelu mupatula mu 1984, mudi misambu idi itumbisha Yehowa misangu inayi kupita eyi ya disamuna nayi Yezu. Abi bidi mu diumvuangana ne mêyi aa a Yezu: “Tatu mmunene kuntamba meme.” (Yone 14:28) Dinanga bua Yehowa didi ne bua kuikala pa muaba wa kumpala; didi ne bua kusuikakajibua ne dinanga diondoke bua Yezu ne dianyisha bua mulambu wende wa mushinga mukole, ne bua muanzu wende wa Muakuidi Munene ne Mukalenge.

[Tablo mu dibeji 34]

Mfidilu wa mibelu wa Yezu

(pa kutela nshapita ne mvese bia mu Buakabuluibua)

Mukenji mutumina tshisumbu tshia Efeso

Bukokeshi bua kufila mibelu 2:1

Kalumbandi ku mbangilu 2:2, 3

Tshilumbu tshileja patoke 2:4

Mubelu ne/​anyi dikankamija 2:5, 6

Mabenesha afuminaku 2:7

Mukenji mutumina tshisumbu tshia Smirne

Bukokeshi bua kufila mibelu 2:8

Kalumbandi ku mbangilu 2:9

Tshilumbu tshileja patoke —

Mubelu ne/​anyi dikankamija 2:10

Mabenesha afuminaku 2:11

Mukenji mutumina tshisumbu tshia Pergame

Bukokeshi bua kufila mibelu 2:12

Kalumbandi ku mbangilu 2:13

Tshilumbu tshileja patoke 2:14, 15

Mubelu ne/​anyi dikankamija 2:16

Mabenesha afuminaku 2:17

Mukenji mutumina tshisumbu tshia Tiatire

Bukokeshi bua kufila mibelu 2:18

Kalumbandi ku mbangilu 2:19

Tshilumbu tshileja patoke 2:20, 21

Mubelu ne/​anyi dikankamija 2:24, 25

Mabenesha afuminaku 2:26-28

Mukenji mutumina tshisumbu tshia Sarde

Bukokeshi bua kufila mibelu 3:1

Kalumbandi ku mbangilu —

Tshilumbu tshileja patoke 3:1, 2

Mubelu ne/​anyi dikankamija 3:3, 4

Mabenesha afuminaku 3:5

Mukenji mutumina tshisumbu tshia Filadelfi

Bukokeshi bua kufila mibelu 3:7

Kalumbandi ku mbangilu 3:8

Tshilumbu tshileja patoke —

Mubelu ne/​anyi dikankamija 3:8-11

Mabenesha afuminaku 3:12

Mukenji mutumina tshisumbu tshia Laodisé

Bukokeshi bua kufila mibelu 3:14

Kalumbandi ku mbangilu —

Tshilumbu tshileja patoke 3:15-17

Mubelu ne/​anyi dikankamija 3:18-20

Mabenesha afuminaku 3:21