Ditekemena dia pa buadi!
“Muntu yonso udi ne muoyo ne uleja ditabuja kundi kakufua nansha, kashidi.” —YONE 11:26, NW.
PAJULABU miliyo ya bantu ku dibiishibua, kabakubapingaja ku muoyo pa buloba kapayi bantu nansha. (Bienzedi 24:15) Nebabike mu miaba milengeja bimpe ne nebasangane nzubu ya kusombela, bilamba ne biakudia bia bungi bimana kubalongoluela. Mbanganyi balongolola bionso ebi? Kakuyi mpata, bantu badi ne bua kuikalaku ne muoyo mu bulongolodi bupiabupia kumpala kua dibiishibua dia pa buloba kutuadijadi. Kadi mbanganyi abu?
2 Dikumbana dia mulayi wa mu Bible didi dileja ne: tudi mu ‘matuku a ku nshikidilu’ a ndongoluelu eu wa malu.a (2 Timote 3:1) Mpindieu mu katupa kîpi emu, Yehowa Nzambi ukadi pa kubuela mu malu a bantu ne kumbusha bubi buonso pa buloba. (Musambu 37:10, 11; Nsumuinu 2:21, 22) Dîba adi, ntshinyi tshienzekela aba badi basadila Nzambi ne lulamatu?
3 Yehowa kakubutula bakane pamue ne babi nansha. (Musambu 145:20) Katu muanji kuenza bualu bua nanku, ne kakubuenza pakezulaye buloba ku malu mabi onso. (Fuanyikija ne Genese 18:22, 23, 26.) Eyowa, mukanda wa ndekelu wa mu Bible udi wakula bua “musumba munene uvua muntu kayi mua kubala, wa mu matunga onso ne bisa bionso ne bisamba bionso ne miakulu yonso,” ufumina ku “dikenga dinene.” (Buakabuluibua 7:9-14, NW) Ee, bantu musumba munene nebapanduke ku dikenga dinene patua bulongolodi ebu bubi ku tshibungubungu, ne nebabuele mu bulongolodi bupiabupia bua Nzambi. Muine amu, bukua-bantu buena butumike nebusanke tshishiki bua dilongolola dia mpatshi dia Nzambi dia kupikula bukua-bantu ku mpekatu ne lufu. (Buakabuluibua 22:1, 2) Nenku, “musumba munene” kawakulabula lufu nansha kakese. Bushuwa, nditekemena dia pa buadi!
4 Tudi mua kuikala ne dieyemena mu ditekemena edi didi dikemesha anyi? Menemene! Yezu Kristo nkayende wakaleja ne: nekuikale tshikondo tshikala bantu ne muoyo kabayi bafua kashidi. Kumpala mene kua kubiisha mulunda wende Lazare, Yezu wakambila Marta ne: “Muntu yonso udi ne muoyo ne uleja ditabuja kundi kakufua nansha, kashidi.”—Yone 11:26, NW.
Udi pebe mua kuikala ne muoyo wa kashidi
5 Udi musue kuikala ne muoyo wa kashidi mu Mparadizu pa buloba anyi? Udi ujinga bikole bua kumona tshiakabidi banangibue bebe anyi? Nanku udi ne bua kupeta dimanya dijalame dia disua dia Nzambi ne malongolola ende. Mu dinga disambila kudi Nzambi, Yezu wakamba ne: “Etshi tshidi tshiumvuija muoyo wa kashidi, dipeta diabu dia dimanya diebe wewe, Nzambi umuepele mulelela, ne dia eu uwakatuma, Yezu Kristo.”—Yone 17:3, NW.
6 Nzambi mmusue bua se: “bantu ba mishindu yonso bapandishibue ne bafike ku dimanya dijalame dia bulelela.” (1 Timote 2:3, 4, NW) Mpindieu ke dîba dia kulonga muudi mua kuikala ne muoyo wa kashidi mu Mparadizu pa buloba, pamue ne miliyo ya bakuabu bakadi benza disua dia Nzambi. Bantemu ba Yehowa nebasanke bua kukuambuluisha mu dilonga bivule pa bidi bitangila Nzambi ne malu-malomba ende. Bua tshinyi kubenga kupetangana nabu ku Nzubu wa Bukalenge udi pabuipi nebe anyi kubafundila mu adrese wa pabuipi menemene ku eyi idi mitela mu dibeji didi dilonda edi?
Note: Please insert the latest ti branch address listing. If the brochure is going to be printed in Brooklyn and the standard English ad is to be used, please do not insert the ad. Brooklyn will insert the latest English ad for you if you note on the control document that the English ad should be used. Branches supplying translated ads should make the ad part of the page.
[Mêyi adi kuinshi]
a Tangila mukanda wa Dimanya didi difikisha ku muoyo wa kashidi, mabeji 98-107, mupatula kudi Watchtower Bible and Tract Society of New York, Inc.
[Nkonko ya dilonga]
1. Bantu miliyo mivule badi bafue mpindieu nebabiishibue mu muaba wa mushindu kayi?
2-4. Nditekemena kayi dia pa buadi didi kumpala bua aba badi ne muoyo mu ‘matuku a ku nshikidilu’?
5, 6. Biwasua kuikala ne muoyo wa kashidi mu Mparadizu pa buloba, ntshinyi tshiudi ne bua kuenza?
[Tshimfuanyi mu dibeji 31]
“Musumba munene” kawakulabula lufu nansha kakese