Dilongesha 2

Nzambi ke mulunda muimpe mutambe

Kulua mulunda wa Nzambi ke tshintu tshimpe ku bionso. Nzambi neakulongeshe mushindu wa kuikala ne disanka ne kuepuka njiwu; neakulamune ku malongesha a dishima ne ku bibidilu bibi. Neateleje masambila ebe. Neakuambuluishe bua kupeta ditalala dia mu mutshima ne dieyemena kabidi. (Musambu 71:5; 73:28) Nzambi neakuambuluishe mu bikondo bia ntatu. (Musambu 18:18) Ne Nzambi udi ukupesha dipa diende kampanda: muoyo wa tshiendelele.—Lomo 6:23.

Paudi udia bulunda ne Nzambi, udi udia bulunda ne bantu badi badie nende bulunda. Nebalue pabu balunda bebe. Bushuwa, nebikale anu bu bana benu. Nebikale ne disanka bua kukulongesha malu a Nzambi, nebakuambuluishe ne nebakukankamije kabidi.

Katuena muomumue ne Nzambi to. Paudi ujinga kudia bulunda ne Nzambi, udi ne bua kumanya muanda kampanda wa mushinga. Bulunda ne Nzambi ki mbulunda pankatshi pa bantu badi muomumue to. Mmutupite bikole ku bidimu, ku meji ne ku makanda. Amu yeye ke udi muakanyine kuikala Mukokeshi wetu. Nenku bituasua kuikala balunda bende, tudi ne bua kumuteleja ne kuenza bidiye utulomba. Bionso ebi mbua diakalenga dietu.—Yeshaya 48:18.