Dilongesha dia 8

Baluishi ba Nzambi mbanganyi?

Muluishi munene wa Nzambi n’Satana Diabolo. Satana mmuntu wa mubidi wa nyuma wakatombokela Yehowa. Satana udi utungunuka ne kuluisha Nzambi ne udi ukebela bantu makenga makole. Satana mmuenji wa malu mabi. Mmuena mashimi ne mmushipianganyi.—Yone 8:44.

Bakuabu bantu ba mubidi wa nyuma bakalonda Satana mu ditombokela Nzambi. Bible udi ubabikila ne: ba-demon. Anu bu Satana, ba-demon mbaluishi ba bantu. Mbasue kukengesha bantu. (Matayo 9:32, 33; 12:22) Yehowa neabutule Satana ne ba-demon bende bua kashidi. Mbashale anu ne lupolo luîpi lua tshikondo lutshidibu batatshisha bantu.—Buakabuluibua 12:12.

Biwikala musue kulua mulunda wa Nzambi, kuena ne bua kuenza tshidi Satana musue bua wenza nansha. Satana ne ba-demon mbakine Yehowa. Mbaluishi ba Nzambi, ne mbasue bua wewe pebe ulue muena lukuna wa Nzambi. Udi ne bua kusungula uudi musue kusankisha: Satana anyi Yehowa. Biwikala musue kupeta muoyo wa tshiendelele, wenze tshidi Nzambi musue. Satana udi ne mayele ne mishindu ya bungi ya kudinga bantu. Bantu ba bungi badi balekela Satana ubashima.—Buakabuluibua 12:9.