Mishindu idibu bamanyisha lumu luimpe

BADI balomba bena Kristo bua ‘kuvuija ba bisamba bionso bayidi,’ kadi ki mbuena kuamba ne: badi ne bua kusuisha bantu bulelela ku bukole anyi kubakudimuija mutshima kabiyi ku disua diabu nansha. Mudimu uvua nawu Yezu uvua wa “kuambila badi mu dikenga lumu luimpe,” ‘bua kusangaja mitshima ya badi batamba kunyingalala, bua kusamba bonso badi mu madilu.’ (Matayo 28:19; Yeshaya 61:1, 2; Luka 4:18, 19) Bantemu ba Yehowa badi benza mudimu eu ku diambuluisha dia lumu luimpe ludi mu Bible ludibu bamanyisha. Anu bu muakenza muprofete Yehezekele kale, Bantemu ba Yehowa badi lelu’eu benza muabu muonso bua kupeta “bantu badi batua mikemu ne badila bua malu mabi onso adi bantu benza munkatshi muabo.”—Yehezekele 9:4, MMM.

Mushindu mutambe kumanyika bimpe utu Bantemu benza bua kupeta bantu badi babungama bua nsombelu mibi idiku mpindieu, ndiya ku nzubu ne ku nzubu ya bantu abu. Nunku badi benza muabu muonso bua kumonangana ne bantu ba bungi anu bu muakenza Yezu pavuaye ‘wendakana mu bimenga ne mu misoko mikese, wambila bantu bualu bua Nzambi, wenda ne lumu luimpe lua Bukalenge bua Nzambi.’ Ke tshiakenza bayidi bende ba kumpala. (Luka 8:1; 9:1-6; 10:1-9) Lelu’eu patu Bantemu ba Yehowa ne mushindu, batu benza muabu muonso bua kuya ku nzubu kua muntu ne muntu yonso misangu mivule ku tshidimu, bakeba mua kuyikila ne bantu nansha bua minite mikese patupu bua malu adi akoka ntema peshi atonda bantu, malu adi enzeka miaba idibu anyi makuabu adi enzeka pa buloba bujima. Badi mua kubala mvese umue anyi ibidi; padi muntu ujinga kumanya bia bungi, Ntemu udi mua kumvuangana nende bua kumupinganyina pa dîba dikalabu bumvuangane bua kuyikilabu tshiakabidi. Badi bapesha bantu Bible ne mikanda idi yambuluisha bua kumulonga nayi. Nunku padi muntu wanyisha, badi batuadija kulonga nende Bible kayi ufuta dikuta nansha dimue to. Badi balombola pa tshibidilu miliyo mivule ya malonga a Bible adi ambuluisha bena mêku ne bakuabu bantu pa buloba bujima.

Mushindu mukuabu udibu bamanyisha bantu “lumu luimpe lua bukalenge” mpadibu mu bisangilu bidibu benzela mu Nzubu wa Bukalenge udi pabuipi nenu. Lumingu luonso Bantemu batu benzelamu bisangilu. Tshimue tshia ku bisangilu tshitubu benza mmuyuki wa patoke muashila pa tshiena-bualu kampanda tshidi tshitangila bantu, ne kunyima kua muyuki wa patoke batu balonga tshiena-bualu tshikuabu peshi mulayi kansanga wa mu Bible ku diambuluisha dia tshibejibeji tshia Tshibumba tshia Nsentedi. Tshikuabu tshisangilu nkalasa, mudibu balongesha Bantemu bua kuluabu bamanyishi ba lumu luimpe bapiluke, pashishe kudi kulua kulonda tshisangilu tshidi tshiotshi tshimanyina pa mudimu wa diyisha udi wenzeka muaba udibu. Bantemu batu kabidi badisangisha musangu umue ku lumingu luonso mu amue mêku, mu tusumbu tukese, bua kulonga Bible.

Bantu bonso badi mua kubuela mu bisangilu ebi. Kabatu bendeshamu tubondu ta malongo bua kusangisha makuta to. Bisangilu ebi bidi biambuluisha bantu bonso. Bible udi wamba ne: “Tuvulukanganayi bua kukoleshangana mitshima bua kutamba kunanga ne kuenza malu mimpe. Katulekedi bua kubuela mu bisangilu bietu; katuikadi bu bakuabo bakuditua mu tshilele tshia kubenga kubuelamu. Kadi tukoleshanganayi mitshima, tutambe kuenza nanku bu munudi numona dituku dia Mfumu dikadi disemena pabuipi.” Dilonga dia muntu pa nkayende ne dienza makebulula bidi ne mushinga, kadi kudisangisha pamue ne bakuabu kudi kukankamijangana bikole: ‘Bu mudi tshiamu tshisakisha tshinga tshiamu, mbu mudi muntu ulengeja tshikadilu tshia mulunda wende.’—Ebelu 10:24, 25, MML; Nsumuinu 27:17.

Bantemu batu kabidi bambila bantu batubu bapetangana nabu matuku onso lumu luimpe padi mushindu upeteka. Badi mua kuenza nanku nansha bua minite mikese patupu ne muena mutumba anyi ne muntu udibu babuele nende mu mashinyi peshi mu ndeke umue; badi mua kuyikila bua mutantshi mule ne mulunda peshi mulela wende, peshi kuyukila ne muena mudimu nabu dîba didibu banji kuikisha bangabanga ne kutuadijilula mudimu. Ke mushindu wakayisha Yezu misangu mivule patshivuaye pa buloba apa: dîba divuaye wendakana ku muelelu kua mbuu, pavuaye musombe pa mukuna, pavua muntu umubikidisha kuende bua kuya kudia, dîba divuaye uya mu difesto dia dibaka anyi pavuaye mu luendu mu buatu bua diloba nabu mu Mbuu wa Galela. Wakalongesha bantu mu nsunagoga ne mu ntempelo ku Yelushalema. Muaba wonso uvuaye uya, uvua wenza muende muonso bua kuakulaku bua Bukalenge bua Nzambi. Ke mudi Bantemu ba Yehowa benza pabu bua kulonda tshilejilu tshiende etshi.—1 Petelo 2:21.

BADI BAYISHA KU TSHILEJILU TSHIABU TSHIMPE

Nansha umue wa ku mishindu eyi idibu benza mudimu bua kukumanyisha lumu luimpe kauvua kuikala ne mushinga to bu muntu udi ukuyisha kayi utumikila yeye muine malu adiye ukulongesha. Kuamba bualu bumue ne kuenza bunga, nkuikala muena lubombo; ne mene buena mpala ibidi budi nabu bena malu a Nzambi mbufikishe bantu miliyo mivule ku dibenga Bible. Bua kuamba bualu mudibu, katuena mua kupisha Bible nansha kakese. Bafundi ne Bafalese bavua ne Mifundu ya tshiena-Ebelu, kadi Yezu wakababela patoke uleja muvuabu bena lubombo. Wakanji kuakula bua muvuabu babala Mikenji ya Mose, e kusakidila wambila bayidi bende ne: “Nuenze, nutumikile malu onso adibo banuambila; kadi kanuenji malu adibo benza; bualu bua bobo batu bamba, kadi kabatu benza.” (Matayo 23:3) Tshikadilu tshimpe tshia muena Kristo tshidi tshitamba kutuisha muntu kupita dimuyisha munkatshi mua mêba a bungi patupu. Ke tshivuabu baleje bakaji bena Kristo badi bambayabu kabayi bena kuitabuja, ne: ‘[Balume] badi mua kupetela ditaba ku nsombelu wa bakaji babu kakuyi dîyi, pamonabu nsombelu wenu mulenga.’—1 Petelo 3:1, 2, MMM.

Nunku, Bantemu ba Yehowa badi badienzeja bua bakuabu bafike pabu ku dianyisha lumu luimpe mushindu eu: pa kuikala buobu bine bena Kristo ba tshitembu anu mudibu balomba bakuabu bua kuikala. Badi baditatshisha bua ‘kuenzela bantu malu onso adibu basue babenzele.’ (Matayo 7:12) Badi bateta bua kusomba bimpe ne bantu bonso mushindu’eu, kabiyi anu ne Bantemu nabu, balunda babu, bena mutumba peshi balela babu to. Bu mudibu pabu bapange bupuangane, kabatu bafika misangu yonso ku dienza bualu buonso mudibi bikengela to; bualu mulengele kadiakubula kalema. Kadi dijinga diabu dilelela ndia kuenzela bantu bonso malu mimpe ki ng’anu padibu babamanyisha lumu luimpe lua Bukalenge to, kadi badi kabidi bajinga bua kubelesha diboko padiku mushindu.—Yakobo 2:14-17.

[Tshimfuanyi mu dibeji dia 19]

Hawaii

[Tshimfuanyi mu dibeji dia 19]

Venezuela

[Tshimfuanyi mu dibeji dia 19]

Yougoslavie

[Tshimfuanyi mu dibeji dia 20]

Nzubu ya Bukalenge miasa mushindu muakanyine, mmiaba mimpe ya dilongela Bible

[Tshimfuanyi mu dibeji dia 21]

Mu dîku ne padibu bapetangana ne bantu bakuabu, Bantemu batu badienzeja ne muoyo umue bua kutumikila malu adibu balongesha