Nshapita Wa Dikumi Ne Muisatu
Musumba munene kumpala kua nkuasa wa butumbi wa Yehowa
1. (a) Bangabanga ne basadidi ba Nzambi bavuaku kumpala kua Yezu kulua pa buloba ne bantu 144 000 kupetabu difutu diabu, tshidi ne bua kubafikila ntshinyi? (b) Ntshinyi tshikala “musumba munene” wa bantu badi ne muoyo mu tshikondo etshi ne bua kupeta?
BASADIDI ba Nzambi ba lulamatu ba kubangila ku Abele too ne ku Yone Mubatiji bakateka kuenza disua dia Nzambi pa muaba wa kumpala mu nsombelu wabu. Kadi buonso buabu bakafua, ne mbashale bindile dibika ku lufu bua kuikalabu ne muoyo pa buloba mu bulongolodi bupiabupia bua Nzambi. Bantu 144 000 bikala ne bua kukokesha ne Kristo mu Bukalenge bua Nzambi bua mu diulu, badi pabu ne bua kuanji kufua bangabanga ne kupetabu diabu difutu. Kadi, Buakabuluibua 7:9 udi uleja ne: mu matuku a ku nshikidilu aa, kuvua ne bua kuikala “musumba munene” wa bantu ba mu matunga onso bikala kabayi ne bua kufua ne bikala ne ditekemena dia kuikala ne muoyo wa kashidi pa buloba. (MMM) Udi wa munkatshi muabu anyi?
Dijingulula musumba munene
2. Tshiakafikisha ku lumvu luimpe lua diumvuija dia musumba munene wa mu Buakabuluibua 7:9 ntshinyi?
2 Mu tshidimu tshia 1923, basadidi ba Yehowa bakajingulula ne: “mikoko” ya mu mufuanu wa Yezu udi mu Matayo 25:31-46 ne “mikoko mikuabo” yakambaye mu Yone 10:16, mbantu bikala mua kusomba tshiendelele pa buloba. Mu tshidimu tshia 1931, bakamona ne: bantu badibu bambe mu Yehezekele 9:1-11 ne: mbabafunde tshimanyinu pa mpala yabu, bavua pabu aba bavua ne ditekemena dia kusomba tshiendelele pa buloba. Pashishe mu tshidimu tshia 1935 bakamanya ne: musumba munene mbena mu kasumbu ka mikoko mikuabu ivua Yezu muakule bualu buayi. Lelu’eu, musumba munene wa diakalenga eu udi ne bantu miliyo mivule.
3. Bua tshinyi mêyi a ne: ‘mbimane kumpala kua nkuasa wa butumbi’ kaena atangila kasumbu ka bantu badi mu diulu?
3 Mu Buakabuluibua 7:9, bena mu musumba munene kabena bamueneka bikale mu diulu to. Bua ‘kuimanabu kumpala kua nkuasa wa butumbi’ wa Nzambi, kabiena bikengela anu bua kuikalabu mu diulu to. Bidi biumvuija ne: badi ku mêsu kua Nzambi. (Musambu 11:4) Bualu bua ne: musumba munene wa bantu ‘bavua muntu kayi mua kubala’ ki nkasumbu ka bantu badi mu diulu, budi bumueneka bimpe patudi tufuanyikija bungi bua bantu abu budi kabuyi bumanyike ne tshidibu bafunde mu Buakabuluibua 7:4-8 ne Buakabuluibua 14:1-4. Mu mvese eyi mbamanyishe bungi bua badibu bangate pa buloba bua kuyabu mu diulu ne: badi bantu 144 000.
4. (a) “Dikenga dinene” mudi bena mu musumba munene bapandukila ntshinyi? (b) Bilondeshile Buakabuluibua 7:11, 12, badi batangila musumba munene eu ne batendelela nawu pamue mbanganyi?
4 Mu Buakabuluibua 7:14 badi bamba bua musumba munene eu ne: “Aba mbantu badi bumuka mu dikenga dinene.” Mbapanduke mu njiwu mikole itu kayiyi mianji kuenzeka katshia ne katshia. (Matayo 24:21) Pambabu ne dianyisha dionso ne: lupandu luabu ndufumine kudi Nzambi ne kudi Kristo, bifukibua bionso bia lulamatu bidi mu diulu nebidisangishe nabu pamue bua kuamba ne: ‘Amen, disanka ne butumbi ne meji ne disakidila ne bunême ne bukokeshi ne bukole bikale kudi Nzambi wetu too ne tshiendelele; Amen.’—Buakabuluibua 7:11, 12.
Musumba munene udi ne bua kuleja ne: mmuakanyine lupandu
5. Mmunyi mutudi mua kujadika tshidi tshikengela kuenza bua kuikala munkatshi mua bena mu musumba munene?
5 Dipanduka dia bena mu musumba munene mu dikenga dinene didi diumvuangana ne mikenji miakane ya Yehowa. Mbaleje bimpe mu Bible ngikadilu idi isunguluja bantu bikala ne bua kupandishibua. Nunku, kudi mushindu wa bantu badi banange buakane kuenzabu malu kubangila ku mpindieu ne tshipatshila tshia kudileja bakanyine lupandu. Tshidibu ne bua kuenza ntshinyi?
6. Bua tshinyi bidi biakanyine bua kufuanyikija musumba munene ne mikoko?
6 Mikoko nnyama itu kayiyi ne tshikisu ne itu ikokela. Nunku, pakamba Yezu ne: udi ne mikoko mikuabu ivua kayiyi ya mu kasumbu ka mu diulu, uvua wakula ki ng’anu bua bantu basua kusomba tshiendelele pa buloba to, kadi kabidi bikala mua kutumikila malongesha ende. Wakamba ne: ‘Mikoko yanyi idi yumvua dîyi dianyi, ndi muyimanye, idi indonda.’ (Yone 10:16, 27) Aba mbantu badi bateleja Yezu bulelela ne batumikila bidiye wamba, balua bayidi bende.
7. Bayidi ba Yezu badi ne bua kuikala ne ngikadilu kayi?
7 Nngikadilu mikuabu kayi ivua muyidi ne muyidi yonso wa Yezu ne bua kuikala nayi? Dîyi dia Nzambi didi diandamuna ne: ‘Numushe bienu [bumuntu] bua kale, bu muakadi tshikadilu tshienu tshia diambedi, nudivuadike [bumuntu] bupiabupia buakafukibua mu tshimfuanyi tshia Nzambi ne buakane ne tshijila bidi bifuma ku malu malelela.’ (Efeso 4:22-24) Badi bapeta ngikadilu eyi idi ikolesha buobumue bua basadidi ba Nzambi, tuamba ne: “dinanga, disanka, ditalala, muoyo-mule, bulenga, buimpe, ditabuja, bupole-malu, didikanda.”—Galatia 5:22, 23, NW.
8. Ntshinyi tshiafikila bena mu musumba munene bualu badi bakuatshisha bashadile?
8 Bena mu musumba munene badi bakuatshisha bantu bungi bukese badi ne ditekemena dia kuya mu diulu ne badi bantunga-mulongo mu mudimu wa diyisha. (Matayo 24:14; 25:40) Mikoko mikuabu idi yambuluisha mushindu’eu, nansha mudiyi mimanye bimpe ne: nebayiluishe bualu Yezu ne banjelu bende bakipata Satana ne ba-demon bende mu diulu ku mbangilu kua matuku a ku nshikidilu aa. Bualu ebu ke buakenza bua ‘mulawu wikale pa buloba, bualu bua Diabolo wakapueka kutudi, muikale ne tshiji tshikole, mumanye ne: udi ne [tshikondo tshîpi].’ (Buakabuluibua 12:7-12) Ke bualu kayi Satana udi ukolesha mvita idiye wela basadidi ba Nzambi eyi bualu nshikidilu wa bulongolodi ebu udi wenda usemena pabuipi.
9. Mmunyi mudi mudimu wa basadidi ba Nzambi wa diyisha lumu luimpe muye kumpala, ne mbua tshinyi?
9 Nansha babakengesha ne tshikisu mushindu kayi, mudimu wa diyisha udi anu utungunuka ne diya kumpala. Ku ndekelu kua Mvita ya Kumpala ya Buloba bujima, bamanyishi ba Bukalenge bavua anu binunu bikese, kadi mpindieu badi miliyo mivule, bionso ebi anu bualu Yehowa wakalaya ne: ‘Kakuena tshielelu tshia mvita tshidibu batula bua kukuluisha natshi tshidi mua kuikala ne diakalengele.’ (Yeshaya 54:17) Too ne muena mu kabadi kanene ka bena Yuda mukuabu wakajingulula ne: mudimu wa Nzambi kabena mua kuutshimuna to. Wakambila Bafalese mu bidimu lukama bia kumpala bua bidi bitangila bayidi ba Yezu ne: ‘Kanubenzedi bualu; bualu bua bikala lungenyi elu anyi mudimu eu bia bantu, nebijimine; kadi bikala bualu ebu bua Nzambi, kanuena bamanye mua kubupumbisha; nunku nebanusangane nuluisha Nzambi mvita.’—Bienzedi 5:38, 39.
10. (a) “Tshimanyinu” tshidibu bafunda pa mpala ya bena mu musumba munene tshidi tshiumvuija tshinyi? (b) Mmushindu kayi udi basadidi ba Nzambi batumikila ‘dîyi didi difuma mu diulu’?
10 Bena mu musumba munene badi bu bantu badibu bafunda tshimanyinu tshia lupandu. (Yehezekele 9:4-6) “Tshimanyinu” etshi tshidi tshijadika ne: mbadilambule kudi Yehowa, mbatambule bua kuikala bayidi ba Yezu, ne badi benza muabu muonso bua kuikala ne bumuntu bua buena bua Kristo. Badi batumikila ‘dîyi didi difuma mu diulu’ didi diamba bua nsangilu wa Satana wa bitendelelu bia dishima bia buloba bujima ne: ‘Bantu banyi, [patukayi] munkatshi muende, bua nuenu kanuikadi ne buobumue nende mu malu mabi ende, bua kanuangatshi makenga ende.’—Buakabuluibua 18:1-5.
11. Mmu mushindu kayi munene udi bena mu musumba munene baleja ne: mbasadidi ba Yehowa?
11 Yezu wakambila kabidi bayidi bende ne: ‘Bua bualu ebu bantu bonso nebamanye ne: nudi bayidi banyi, [binuanangangana] nunku.’ (Yone 13:35) Pabi, bena mu bitendelelu bia panu apa badi bashipangana nkayabu mu mvita, misangu ya bungi anu bualu bisamba biabu mbishilangane ne bia bakuabu! Dîyi dia Nzambi didi diamba ne: ‘Mu muanda eu bana ba Nzambi ne bana ba Diabolo badi bajinguluka; muntu yonso udi kayi wenza malu makane kêna wa Nzambi; ne yeye udi kayi unanga muanabu kabidi. Tunangangane; ki mbua kuikala bu Kana, wakadi wa mubi, wakashipa muanabu.’—1 Yone 3:10-12.
12. Ntshinyi tshikala Yehowa mua kuenza ku dikenga dinene ne ‘mitshi’ mibi anyi bitendelelu bidi bipatula mamuma mabi?
12 Yezu wakamba ne: “Mutshi wonso muakane udi ukuama bimuma biakane; kadi mutshi mubi udi ukuama bimuma bibi. Mutshi muimpe kawena mua kukuama bimuma bibi, kabidi mutshi mubi kawena mua kukuama bimuma biakane. Mutshi wonso udi kauyi ukuama tshimuma tshiakane badi baukosa, bawela mu kapia. Nenku, bambi ba mafi nenubamanyine ku bienzedi biabu.’ (Matayo 7:17-20, MMM) Mamuma adi bitendelelu bia mu bulongolodi ebu bipatula adi aleja ne: bitendelelu ebi ‘mmitshi’ mibole idibu ne bua kuosha mu katupa kîpi emu kudi Yehowa mu dikenga dinene.—Buakabuluibua 17:16.
13. Mmushindu kayi udi bena mu musumba munene baleja ne: ‘mbimane kumpala kua nkuasa wa butumbi’ wa Yehowa mu buobumue?
13 Buakabuluibua 7:9-15 udi uleja malu adi afikisha bena mu musumba munene ku dipandishibua. Badi babaleja ‘bimane kumpala kua nkuasa wa butumbi’ wa Yehowa bikale bonso mu buobumue, batumbisha bumfumu buende butambe bunene. Mbasukule mizabi yabo mu mashi a Muana wa Mukoko, bileja ne: badi banyisha mulambu wa Yezu udi ubuikila mpekatu. (Yone 1:29) Mbadilambule kudi Nzambi ne mbitabe bua kutambula mu mâyi bua kuleja didilambula diabu edi. Nunku mbantu bakezuke kezukezu ku mêsu kua Nzambi, badi bavuale mizabi mitoke, ne badi “bamukuatshila mudimu munya ne butuku.” Kudiku mishindu mikuabu iudi mua kuenza bua nsombelu webe apetangane bikole ne malu adibu batele mu mvese eu anyi?
Keba bua kupeta masanka mpindieu
14. Ng’amue masanka kayi a pa buawu adi basadidi ba Yehowa bapeta kubangila ku mpindieu?
14 Pamuapa udi mumone masanka a pa buawu adibu bapeta nansha mpindieu kudi bantu badi bakuatshila Yehowa mudimu. Tshilejilu, pawakamanya malu makane adi Yehowa mulongolole bua kuenza, se wakajingulula ne: kuvua ditekemena dilenga bua matuku atshilualua. Mpindieu udi ne tshipatshila tshilelela mu nsombelu webe tshia kuenzela Nzambi mulelela mudimu ne ditekemena dia mpatshi dia kuikala ne muoyo wa tshiendelele pa buloba bukudimuna mparadizu. Eyowa, Mukalenge Yezu Kristo ‘nealombole [bena mu musumba munene] ku mishimi ya mâyi a muoyo.’—Buakabuluibua 7:17.
15. Mmabenesha kayi adi Bantemu ba Yehowa bapeta bua mudibu balamate mêyi a mu Bible adi atangila malu a tshididi ne bikadilu bimpe?
15 Bualu butambe bulenga butudi tumona lelu’eu kudi bena mu musumba munene ndinanga ne buobumue budi munkatshi mua basadidi ba Yehowa pa buloba bujima. Bu mutudi bonso tudia biakudia bia mu nyuma bia muomumue, tudi bonso tutumikila mikenji imue ne mêyi amue adi mu Dîyi dia Nzambi. Ke bua tshinyi malu a tshididi anyi dinanga dia matunga etu kabiena bitutapulula nansha. Tudi kabidi tutumikila mikenji ya mushinga mukole idi itangila bikadilu bilenga idi Nzambi muelele bantu bende. (1 Kolinto 6:9-11) Nunku, pamutu pa bantu ba Yehowa kuikala mu bilumbu, kuabulukangana anyi kuikala ne nsombelu wa tshiendenda udi mutangalaka pa buloba lelu, buobu badi mu tshitudi mua kubikila ne: mparadizu wa mu nyuma. Tangila mudibu bumvuije bualu ebu mu Yeshaya 65:13, 14.
16. Nansha mudi bena mu musumba munene bapeta ntatu itu ikuatakuata bantu bonso, nditekemena kayi didibu nadi?
16 Kadi nansha nanku, bantu badi benzela Yehowa mudimu kabena bapuangane to. Batu pabu bapeta ntatu itu ikuata bantu bonso panu, bu mudi nsombelu mikole anyi dikenga ne lufu mu mvita. Batu kabidi pabu basama, bakenga ne bafua mene. Kadi badi ne ditabuja dia se: mu ndongoluelu wa malu mupiamupia, Nzambi ‘neakupule tshinsonji tshionso ku mêsu kuabu; ne lufu kaluena luikalaku kabidi, madilu kaena ikalaku kabidi, nansha muadi, nansha kanyinganyinga kabidi.’—Buakabuluibua 21:4.
17. Nansha bualu kayi buobu mua kutufikila lelu’eu, mmasanka kayi adi mindile badi batendelela Nzambi mulelela kumpala eku?
17 Nansha wewe mua kujimija muoyo webe mpindieu bua dikulakaja, disama, njiwu ta dikukengesha, Yehowa neakubishe ku lufu bua wewe kubuela mu Mparadizu. (Bienzedi 24:15) Pashishe, neutungunuke ne kuikala mu difesto dia mu nyuma mu Bukokeshi bua Bidimu Tshinunu bua Kristo. Dinanga diudi munange Yehowa nedikole menemene paudi umona malu adiye mulongolole akumbana ntuntuntu. Pashishe, masanka etu mena dîna aa akupeshabu kudi Yehowa neatambe kabidi kukolesha dinanga diebe kudiye. (Yeshaya 25:6-9) Bushuwa, masanka mavule mmindile bantu ba Nzambi kumpala eku!
Diambulula
• Mbualu kayi bunene budi Bible utela pamue ne musumba munene?
• Bituikala basue bulelela kuikala munkatshi mua bena mu musumba munene badi Nzambi wanyisha aba, ntshinyi tshitudi ne bua kuenza mpindieu?
• Mabenesha adi bena mu musumba munene bapeta mpindieu ne apetabu mu ndongoluelu wa malu mupiamupia wa Nzambi adi ne mushinga kayi ku mêsu kuebe?
[Tshimfuanyi mu dibeji 123]
Bantu miliyo mivule ba mu musumba munene badi batendelela Nzambi mulelela mu buobumue