TSHITUPA TSHIA 13

Ditabuja dilelela didi difikisha ku muoyo wa tshiendelele

MIFUNDU minsantu idi yamba ne: “muntu muakane neikale ne muoyo bua ditabuja.” (Lomo 1:17) Mêyi aa adi ne mulayi wa disanka udi ukutangila pebe. Mu mushindu kayi?

Yezu Masiya mumane kujikija mudimu wende pa buloba, wakabanda mu diulu bua kuikala pamue ne Nzambi. Pavua bayidi bende batangile, “wakabandishibua muulu, ditutu diakamujika ku mêsu kuabu.” (Bienzedi 1:⁠9) Mu diulu amu, Nzambi wakamutekamu Mukalenge wa bukole. Mu katupa kîpi emu, Yezu “Muana wa muntu,” nealue “mu butumbi buende ne banjelu bonso bikale nende, neasombe mu nkuasa wende wa butumbi. Bisamba bionso nebidisangishe kumpala kuende, neatapulule bantu anu bu mudi mulami wa mikoko utapulula mikoko ne mbuji.” (Matayo 25:​31, 32) Bualu ebu nebuenzeke dîba kayi?

Mifundu minsantu idi imanyisha tshikondo tshia ntatu pa buloba tshivua ne bua kuikala tshimanyinu tshia ne: Masiya ukavua pa kutuadija kulumbuluisha bisamba. Yezu wakumvuija malu avua ne bua kuenza tshimanyinu atshi wamba ne: “Tshisamba netshiluishe tshisamba tshikuabu, bukalenge nebuluishe bukalenge bukuabu, nekuikale bikumina bikole, bipupu bia masama ne biyole bia nzala nebienzeke bilondangane ku muaba ne ku muaba, nekuikale malu adi akuatshisha buôwa.”​—⁠Luka 21:​7, 10, 11.

Tudi tumona bimpe mudi mêyi a Yezu enda akumbana lelu. Mu katupa kîpi emu, Yezu nealue bua kubutula bantu babi. Ndekelu wa bionso, neabutule too ne Satana muine! Buloba bujima nebulue mparadizu. Bantu bonso nebasombe mu ditalala ne bakuabu, nebikale kabidi mu ditalala ne nyama. ‘Tshimungu netshilale mu nzubu umue ne muana wa mukoko, ne nkashama nealale popamue ne muana wa mbuji. Muana wa ngombe ne nyama wa ntambue ne nyama udi ne manyi neyidie mashinde mu muaba umue, ne muana mutekete neayilombole. Kabiena bienzela bikuabu bintu bibi.’ (Yeshaya 11:​6, 9) ‘Muena musoko kena wamba ne: Ndi ne disama. Mu dituku adi mêsu a mufofo neatabale, matshi a badi ne mapapa neajikuke.’ (Yeshaya 33:24; 35:⁠5) Nansha bafue nebabishibue ku lufu. ‘Yehowa neakupule binsonji ku mêsu kua bantu bonso,’ ne “lufu kaluakuikalaku kabidi, nansha madilu, nansha miadi, nansha bisama kabiakuikalaku kabidi.” (Yeshaya 25:8; Buakabuluibua 21:⁠4) Pashishe bualu buvua Nzambi mulongolole bua buloba ku ntuadijilu nebukumbane. Ditekemena dilenga be!

Tungunuka ne kukola mu ditabuja

Mbantu kayi bikala Nzambi mua kupesha muoyo mu mparadizu? Mbantu badi ne ditabuja: ditabuja dilelela!

Vuluka ne: ditabuja dilelela ndishindamene pa dimanya dijalame dia Dîyi dia Nzambi. Nunku, tungunuka ne kulonga bua kumanya Nzambi ne Yezu bimpe menemene!

Ditabuja dilelela didi dimuenekela ku bienzedi biakane. Dîyi dia Nzambi didi diamba ne: ‘Ditabuja didi kadiyi ne bienzedi ndifue.’ (Yakobo 2:26) Wewe ne bienzedi bimpe bia nunku, neuleje muudi ne ngikadilu milenga ya Nzambi eyi: bukole, buakane, meji ne dinanga. Tungunuka ne kudienzeja bua kuikala ne ngikadilu milenga eyi!

Kupeta ditabuja dilelela nekukupeteshe malu mimpe a bungi. Bushuwa, diodi ke didi dikuambuluisha bua kuikala ne disanka, mpindieu too ne mu matuku a tshiendelele atshilualua!

[Kazubu mu dibeji 31]

Mmunyi muwandamuna?

• Yezu udi muaba kayi mpindieu?

• Mmunyi mutudi bamanye ne: Yezu nealue mu katupa kîpi emu bua kulumbuluisha bisamba?

• Padi Yezu ulua, neenze tshinyi?

• Mmunyi muudi mua kutungunuka ne kukolesha ditabuja diebe?

[Tshimfuanyi mu dibeji 31]

Ntatu idiku lelu idi ileja ne: Masiya nealumbuluishe bisamba mu katupa kîpi emu

[Tshimfuanyi mu dibeji 30, 31]

Bantu badi ne ditabuja dilelela nebasombe mu mparadizu bua kashidi!