Yehowa udi ukumbajila bena lulamatu malaya ende
“Mmuena lulamatu udi mulaye.”—EBELU 10:23, NW.
1, 2. Bua tshinyi tudi mua kuikala ne dieyemena dia tshishiki mu malaya a Yehowa?
YEHOWA udi ulomba bua basadidi bende badime ne balame ditabuja dikole kudiye ne mu malaya ende. Ne ditabuja dia mushindu’eu muntu udi mua kueyemena Yehowa menemene bua se: enze tshidiye mulaye bua kuenza. Dîyi diende dienzeja ku spiritu didi dimanyisha ne: ‘Yehowa wa misumba wakaditshipa, wamba ne: Bulelela, bu mungakapangadija bua kuenza, bualu nebuenjibue; bu mungakasungula mu mutshima wanyi, nebujalame muomumue.’—Yeshaya 14:24.
2 Tshiambilu tshia se: ‘Yehowa wa misumba wakaditshipa’ tshidi tshileja ne: udi wenza mutshipu wende wa patoke bua kukumbaja malaya ende. Ke bua tshinyi Dîyi diende didi diamba ne: ‘Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamijile njila yebe.’ (Nsumuinu 3:5, 6) Tuetu beyemene Yehowa ne balekele meji ende atulombola, bushuwa njila yetu neyitufikishe ku muoyo wa kashidi, bualu meji a Nzambi adi “mutshi wa muoyo kudi badi bâkuata mu bianza.”—Nsumuinu 3:18; Yone 17:3.
Ditabuja dilelela mu bikondo bia kale
3. Mmunyi muvua Nowa muleje ditabuja kudi Yehowa?
3 Muyuki wa bienzedi bia Yehowa kudi aba bavua ne ditabuja dilelela udi ujadika mudiye wa kueyemena. Tshilejilu, kukadi bidimu bipite pa 4 400, Nzambi wakambila Nowa ne: Mvula munene wa buloba bujima uvua ne bua kubutula bulongolodi bua mu matuku ende. Wakambila Nowa bua kuenza buatu bunene bua kukuba mioyo ya bantu ne ya nyama. Ntshinyi tshiakenza Nowa? Ebelu 11:7 udi utuambila ne: ‘Bua ditabuja Nowa, pakadiye mudimujibue bua malu akadi kaayi manji kumuenebua, muenzejibue ku ditshina dia Nzambi, wakalongolola buatu bua kusungila nabu ba mu nzubu muende.’ Bua tshinyi Nowa uvua ne ditabuja mu tshintu tshivua katshiyi tshianji kuenzeka, tshintu ‘tshiakadi katshiyi tshianji kumuenebua’? Bualu uvua mumanye malu a bungi avua Nzambi muenzele dîku dia bantu bua kuitaba ne: tshionso tshidi Nzambi wamba tshidi tshienzeka. Nenku Nowa uvua mushindike ne: Mvula munene uvua ne bua kuloka.—Genese 6:9-22.
4, 5. Bua tshinyi Abrahama wakeyemena Yehowa tshishiki?
4 Tshilejilu tshikuabu tshia ditabuja dilelela ntshia Abrahama. Kukadi bidimu bu 3 900, Nzambi wakamuambila bua kumulambula Izake, muanende umuepele mumulelela kudi mukajende Sara. (Genese 22:1-10) Mmunyi muakandamuna Abrahama? Ebelu 11:17 udi wamba ne: ‘Bua ditabuja Abrahama, pakamutetabu, wakafila Izake bu mulambu.’ Kadi, mu minute ya ndekelu, muanjelu wa Yehowa wakalekesha Abrahama. (Genese 22:11, 12) Kadi, bua tshinyi Abrahama uvua mene mua kuitaba bua kuenza tshintu tshia mushindu’eu? Bualu, anu mudi Ebelu 11:19 wamba, “wakamanya ne, Nzambi udi ne bukole bua kumubisha [Izake] munkatshi mua bafue mene.” Kadi mmunyi muvua Abrahama mua kuikala ne ditabuja mu dibiishibua pavuaye kayi muanji kumona nansha dimue ne kakuvua muyuki wa kale nansha umue wa dibiishibua kampanda?
5 Vuluka ne: Sara uvua ne bidimu 89 pavua Nzambi mubalaye muana wa balume. Munda mua Sara kamuvua mua kuimita—tuambe ne: muvua mufue. (Genese 18:9-14) Nzambi wakunzulula munda mua Sara, ne wakalela Izake. (Genese 21:1-3) Abrahama uvua mumanye ne: bu muvua Nzambi munzulule munda mua Sara muvua kamuyi mua kuimita, nenku uvua kabidi mua kupingaja Izake ku muoyo pavuabi mua kukengedibua. Lomo 4:20, 21 udi wamba bua Abrahama ne: ‘Bua yeye wakatangila ku mulayi wa Nzambi, kakalenduka mu bupidia, kadi wakakola mu ditabuja, mutumbishe Nzambi, ne muujibue tente ne dimanya ne: Nzambi udi mua kuenza bu muakandayaye kabidi.’
6. Mmunyi muvua Yoshua muleje dieyemena kudi Yehowa?
6 Kukadi bidimu bipite pa 3 400 pavua Yoshua ne bidimu bipite pa lukama, ne panyima pa tshikondo tshia didimuena mudi Nzambi muikale wa kueyemena, Yoshua wakafila kabingila aka bua dimueyemena diende: ‘Nudi bamanye mu mitshima yenu yonso ne mu mioyo yenu yonso ne: kanuakapanga tshintu tshimpe [nansha] tshimue tshiakanulaya Yehowa, Nzambi wenu; nuakapeta bintu bionso, kanuakapanga tshintu [nansha] tshimue.’—Yoshua 23:14.
7, 8. Mmuanda kayi wa lupandu wakenza bena nkristo ba lulamatu mu siekele wa kumpala, ne bua tshinyi?
7 Kukadi bidimu bipite bu 1 900, bantu ba bungi badipuekeshi bakaleja ditabuja dilelela. Ku diambuluisha dia dikumbana dia milayi ya mu Bible bakajingulula ne: Yezu uvua Masiya ne bakitaba malongesha ende. Bikale ne nshindamenu mukole mu malu menzeka ne mu Mifundu ya tshiena-Ebelu, bakaleja ditabuja mu bivua Yezu ulongesha. Nenku, pakamba Yezu ne: dilumbuluisha dia Nzambi divua diluila Yudeya ne Yeruzaleme bua dipanga lulamatu, bakamuitaba. Ne pakabambilaye tshivuabu ne bua kuenza bua kusungila mioyo yabu, bakatshienza.
8 Yezu wakambila bena kuitabuja ne: pavua biluilu binyunguluka Yeruzaleme, bavua ne bua kunyema. Biluilu bia bena Roma biakalua bua kuluisha Yeruzaleme mu tshidimu tshia 66 B.B. Kadi panyima bena Roma bakumbuka bua kabingila kakayi kumvuija. Atshi tshivua tshimanyinu bua bena nkristo kumbukabu mu tshimenga, bualu Yezu uvua muambe ne: “Panuamona tshimenga tshia Yeruzaleme tshijingila kudi biluilu bia mvita, numanye ne: kabutu katshio kadi pabuipi. Diba adio, bantu bikala mu Yudeya banyeme, baye ku mikuna; bikala munda mua tshimenga bumuke, bikala mu mpata kabapinganyi mu tshimenga.” (Lukase 21:20, 21, MMM) Aba bavua ne ditabuja dilelela bakumbuka mu Yeruzaleme ne mu bitupa bia pabuipi apu, ne bakanyema bua kupanduka.
Bipeta bia dipanga ditabuja
9, 10. (a) Mmunyi muakaleja bamfumu ba bitendelelu dipanga diabu dia ditabuja kudi Yezu? (b) Dipanga adi dia ditabuja diakapatula bipeta kayi?
9 Ntshinyi tshiakenza aba bavua kabayi ne ditabuja dilelela? Kabakanyema pavuabu ne mpunga wa kunyemena. Bakela meji ne: balombodi babu bavua mua kubapandisha. Pabi, balombodi abu ne babalondi kabidi bavua ne tshijadiki tshia bu-Masiya bua Yezu. Nenku bua tshinyi kabakitaba tshiakambaye? Bua ngikadilu mubi wa mitshima yabu. Ngikadilu eu uvua muela patoke kumpala pakamonabu bantu ba tshianana ba bungi batshimukila kudi Yezu panyima pa yeye mumane kubiisha Lazare. Yone 11:47, 48 udi ulonda ne: ‘Bakuidi banene ne Bafarizeyi bakadisangisha mu tshifufu [“Sanhedrin,” NW] [kabadi kakulu ka bena Yuda], bakakonkangana ne: Muntu eu [Yezu] udi wenza bimanyinu bia bungi, netuenze tshinyi? Bituamulekela patupu, bantu bonso nebamuitabuje; bena Lomo nebalue, nebanyenge muaba wetu ne tshisamba tshietu.’ Mvese wa 53 udi wamba ne: ‘Ku dituku adi too bakadi basangisha dîyi diabu bua kumushipa.’
10 Ntshishima kayipu tshia dikema tshivua Yezu muenze—kujula Lazare ku bafue! Kadi balombodi ba bitendelelu bavua basue kushipa Yezu bua dienza dia tshishima atshi. Bubi buabu bunene buakatanduka pashishe ‘pakasangisha bakuidi banene dîyi diabu bua kushipa Lazalo kabidi, bualu bena Yuda ba bungi bavua bumuka, bitabuja Yezu bua bualu buende.’ (Yone 12:10, 11) Batshivua bafuminaku ku dijula Lazare ku bafue, ne bakuidi abu bavua basue kumumona tshiakabidi mufue! Kabavua baditatshisha bua disua dia Nzambi anyi bua diakalenga dia bantu. Bavua bena buiminyi, baditatshisha anu bua mianzu ne masanka abu. “Kusua kuabo kua butumbi bua bantu kuakatamba kusua kuabo kua butumbi bua Nzambi.” (Yone 12:43) Kadi bakafuta bua dipanga diabu dia ditabuja. Mu tshidimu tshia 70 B.B., biluilu bia bena Roma biakapingana ne biakabutula muaba wabu ne tshisamba tshiabu, pamue ne bantu bavule ba munkatshi muabu.
Ditabuja ndileja mu tshikondo tshietu etshi
11. Ku ntuadijilu wa siekele eu, mmunyi muvua ditabuja dilelela dileja?
11 Mu siekele eu, kudi kabidi balume ne bakaji ba bungi badi ne ditabuja dilelela. Tshilejilu, kale ku ntuadijilu wa bidimu bia 1900, bantu bonso bavua batekemena matuku atshivua alua a ditalala ne a bubanji bua bungi. Mu tshine tshikondo atshi, aba bavua ne ditabuja kudi Yehowa bavua bamanyisha ne: bukua-bantu buvua pabuipi ne kubuela mu tshikondo tshiabu tshitambe bubi ne tshia bimvundu kabidi. Atshi ke tshivuabu badianjile kuamba mu Dîyi dia Nzambi mu Matayo nshapita 24, 2 Timote nshapita 3 ne mu miaba mikuabu. Malu avua bena ditabuja abu bambe akenzeka bushuwa, kubangila mu 1914 ne Mvita ya Kumpala ya Buloba bujima. Bushuwa, bulongolodi ebu buakabuela mu “matuku a ku nshikidilu” ne mu “bikondo bikole mua kupita nabi” bidianjila kuamba. (2 Timote 3:1, NW) Bua tshinyi basadidi ba Yehowa bavua bamanye bulelela pa nsombelu wa bulongolodi abu mu tshikondo atshi pavua eku bakuabu kabayi bamanye? Bualu, anu bu Yoshua, bavua ne ditabuja dia se: nansha dimue dia ku mêyi a Yehowa kadivua mua kupanga kukumbana.
12. Lelu’eu, ndilaya kayi dia Yehowa didi basadidi bende beyemena tshishiki?
12 Lelu’eu, basadidi ba Yehowa, aba badi bamueyemene, badi miliyo mitue ku isambombo pa buloba bujima. Mbamanyine ku bijadiki bia dikumbana dia dîyi dia Nzambi dia tshiprofete ne: mu katupa kîpi emu neabutule ndongoluelu eu wa malu wa tshinyangu ne buenzavi. Nenku mbashindike ne: tshikondo tshikadi pabuipi tshiamonabu dikumbana dia 1 Yone 2:17 (NW), udi wamba ne: “Bulongolodi ebu budi bupita ne dijinga diabu kabidi, kadi eu udi wenza disua dia Nzambi udi ushala kashidi.” Basadidi bende badi ne dieyemena dia tshishiki dia se: Yehowa neakumbaje dilaya edi.
13. Mmu bualabale kayi muudi mua kueyemena Yehowa?
13 Mmu bualabale kayi muudi mua kueyemena Yehowa? Udi mua kumueyemena muebe muonso! Nansha wewe mujimije muoyo webe mpindieu bua dimusadila, neakupingajile muoyo mutambe bunene ku dibiishibua. Yezu udi utujadikila ne: “Dîba didi dilua diumvua aba buonso badi mu nkita ya tshivulukilu [mmumue ne: mu tshivulukidi tshia Nzambi] dîyi diende ne nebapatukemu.” (Yone 5:28, 29, NW) Udiku mumanye doktere, mulombodi wa malu a tshididi, muena malu a sianse, ngenda-mushinga anyi muntu mukuabu udi mua kuenza nanku anyi? Miyuki yabu ya kale idi ileja ne: kabena mua kuenza nanku. Yehowa udi mua kuenza nanku, ne neenze nanku!
Matuku atshilualua malenga bua bena lulamatu
14. Mmatuku atshilualua kayi malenga adi Dîyi dia Nzambi dilaya bena lulamatu?
14 Yezu wakaleja dishindika bua bulongolodi bupiabupia bulombola kudi Bukalenge bua Nzambi bua mu diulu, wamba ne: ‘Badi ne mitshima mipuekele badi ne disanka, bua buobu nebapiane buloba.’ (Matayo 5:5) Abi biakakolesha dilaya dia Nzambi didi mu Musambu 37:29 dia se: ‘Bantu bakane nebapiane buloba, nebashikamemu tshiendelele.’ Ne katupa kakese kumpala kua lufu lua Yezu pakaleja muenji wa malu mabi ditabuja kudiye, Yezu wakamuambila ne: ‘Newikale nanyi mu Mparadizu.’ (Luka 23:43) Eyowa, bu mudiye Mukalenge wa Bukalenge bua Nzambi, Yezu neatabalele bua muntu eu kubiishibua pa buloba ne diakalenga dia kuikala ne muoyo kashidi mu Mparadizu au. Lelu’eu, aba badi baleja ditabuja diabu mu Bukalenge bua Yehowa badi pabu mua kutekemena bua kuikala ne muoyo mu Mparadizu ‘pakupula [Nzambi] tshinsonji tshionso ku mêsu abu, ne lufu kaluyiku kabidi; madilu kaayiku kabidi, nansha miadi, nansha bisama kabiyiku kabidi.’—Buakabuluibua 21:4, NW.
15, 16. Bua tshinyi nsombelu neatambe kuikala wa ditalala mu bulongolodi bupiabupia?
15 Tuanjibi kudimona bu bakadi mu bulongolodi abu bupiabupia. Ela meji ne: tukadi basombelamu. Diakamue, ne lukasa luonso tudi tumona miaba yonso bantu ba disanka basombe pamue mu ditalala dia tshishiki. Badi ne nsombelu mifuane idibu bumvuije mu Yeshaya 14:7 ne: ‘Ba pa buloba bonso badi ne dikisha, badi ne ditalala, badi babisha mêyi abu mu kuimba kua musambu.’ Bua tshinyi badi ne nsombelu wa mushindu’eu? Mbua bualu bumue, tangila ne: biibi bidi ku nzubu kabiena ne bikuvu. Kabena nabi bualu, bu mudiku kakuyi dibunda dia bibawu anyi tshinyangu. Mbienzeke anu bu muakamba Dîyi dia Nzambi ne: ‘Nebashikame, muntu ne muntu, muinshi mua muonji wende wa tumuma tua mvinyo ne muinshi mua mutshi wende wa mfigi; kakuena muntu wabakuatshisha buôwa.’—Mika 4:4.
16 Kakuena kabidi mvita, bualu mu bulongolodi ebu bupiabupia, mbakandike mvita. Bia-mvita bionso mbiandamuna bia-mudimu bia ditalala. Mu ngumvuilu wa tshishiki, Yeshaya 2:4 ukadi mukumbane: ‘Nebafule nkasu ya kudima nayi ku miele yabu ya mvita, nebafule miele ya kukosa nayi matamba mafubidile a mitshi ku mafuma abu; tshisamba tshikuabu katshiena tshibisha muele wa mvita bua kuluisha nawu tshisamba tshikuabu, ne kabena bayila lungenyi lua kuluangana nalu mvita kabidi.’ Kadi, atshi ke tshituvua batekemene tshikondo atshi! Bua tshinyi? Bualu basombi bavule ba mu bulongolodi bupiabupia abu bakalonga mua kuenza nanku pavuabu basadila Nzambi mu bulongolodi bua kale.
17. Nnsombelu kayi ikalaku mu Bukalenge bua Nzambi?
17 Tshintu tshikuabu tshiudi umona ntshia se: kamuena bupele. Muntu nansha umue ki mmusombele mu kazubuzubu anyi muvuale bilamba bisunsuke peshi kayi ne nzubu. Muntu yonso udi ne nzubu muimpe ne lupangu lulama bimpe ne mitshi milenga ne bilongo. (Yeshaya 35:1, 2; 65:21, 22; Yehezekele 34:27) Ne kakuena nzala bualu Nzambi mmukumbaje dilaya diende dia se: kuvua ne bua kuikala biakudia bivule bua bantu bonso: ‘Biakudia nebivulangane pa buloba ne pa nsongo ya mikuna.’ (Misambo 72:16, MMM) Bushuwa, ku buludiki bua Bukalenge bua Nzambi, mparadizu wa butumbi udi utangalaka pa buloba bujima, anu bu muvua Nzambi mulongolole kale mu Edene.—Genese 2:8.
18. Mu bulongolodi bupiabupia, mbintu kayi bikala kabiyi mua kukuatshisha kabidi bantu buôwa?
18 Udi ukatshila kabidi bua makanda a mubidi adi nawu muntu yonso. Bidi nenku bualu badi mpindieu ne mibidi ne ngenyi mipuangane. Kakuena kabidi mabedi, bisama anyi lufu. Kakuena muntu udi mu dikalu dia balema anyi mu bulalu bua lupitadi. Bionso abi mbijimine kashidi. (Yeshaya 33:24; 35:5, 6) Ee, nyama nansha umue kêna ukuatshisha buôwa, bualu bukole bua Nzambi mbuyivuije ya ditalala!—Yeshaya 11:6-8; 65:25; Yehezekele 34:25.
19. Bua tshinyi dituku dionso mu bulongolodi bupiabupia nedikale dia ‘disanka dinene’?
19 Nnshidimukilu kayipu mulenga muenza kudi basombi bena lulamatu ba mu bulongolodi ebu bupiabupia! Makanda ne mamanya abu ne bubanji bua pa buloba mbitangija ku bipatshila bilenga, ki nku bipatshila bibi; bua kuambuluishangana ne bakuabu, ki mbua kutembangana nabu. Ne muntu yonso uudi usambakena nende mmuntu uudi mua kueyemena bualu, anu bu muakalaya Nzambi, bonso badi “bantu balongesha kudi Yehowa.” (Yeshaya 54:13, NW) Bu mudi muntu yonso mulombola kudi mikenji ya Nzambi, buloba ‘mbûle tente ne kumanya kua Yehowa, bu mudi mâyi a mu mâyi manene abuikila miaba yawu yonso.’ (Yeshaya 11:9) Bulelela, dituku dionso mu bulongolodi bupiabupia ebu didi tshiakamba Musambu 37:11 (NW), dituku dia ‘disanka dinene.’
Matuku atshilualua a disanka mmashindika
20. Ntshinyi tshitudi ne bua kuenza bua kufika ku matuku atshilualua a ditalala?
20 Ntshinyi tshitudi ne bua kuenza bua kufika ku matuku atshilualua au a disanka? Yeshaya 55:6 udi utuambila ne: ‘Keba Yehowa paudi mumanye mua kumusangana; umubikidile patshidiye pabuipi.’ Ne patudi tumukeba, mmuenenu wetu udi ne bua kuikala mudibi biumvuija mu Musambu 143:10: “Unyishe mua kuenza bu mudi disua diebe, bualu bua wewe udi Nzambi wanyi.” Aba badi benza nenku badi mua kuenda kabayi kadiwu kumpala kua Yehowa mu matuku aa a ndekelu ne badi mua kutekemena matuku atshilualua malenga. ‘Tangila muntu udi ne mutshima mutoke bimpe, mona muntu udi muakane; bualu [“matuku atshilualua a muntu au neikale a,” NW] ditalala. Kadi batomboki nebabutudibue, buonso buabu mene. [“Matuku atshilualua a bantu babi neajimijibue bushuwa,” NW].’—Musambu 37:37, 38.
21, 22. Ntshinyi tshidi Nzambi wenza lelu’eu, ne mmunyi mudi dilongesha adi dienzeka?
21 Kubangila ku mpindieu Yehowa udi ubikila mu ditunga dionso aba badi basue kuenza disua diende. Udi ubavuija tshishimikidi tshia nsangilu eu mupiamupia wa pa buloba, anu bu muakadianjila kuamba mulayi wa mu Bible ne: ‘Mu matuku atshidi alua [tshikondo tshitudi ne muoyo mpindieu] bantu ba bungi nebayeku, nebambe ne: Luayi bienu, tubande ku mukuna wa Yehowa [ntendelelu mulelela wende mutumbuke]. Yeye neatuyishe bienzedi biende, ne tuetu netuende mu njila yende.’—Yeshaya 2:2, 3.
22 Buakabuluibua 7:9 (NW) udi uleja bantu aba bu “musumba munene . . . wa mu matunga onso ne bisa ne bisamba ne miakulu.” Mvese wa 14 udi wamba ne: “Aba badi bafumina ku dikenga dinene,” bapanduka ku nshikidilu wa ndongoluelu eu. Tshishimikidi etshi tshia bulongolodi bupiabupia tshidi mpindieu ne bantu miliyo mifike ku isambombo, ne bantu bapiabapia bavule badi babuelamu ku tshidimu tshionso etshi. Basadidi ba Yehowa bonso aba badi babalongesha bua kuikala ne muoyo mu bulongolodi buende bupiabupia. Badi balonga malu a mu nyuma ne makuabu adi akengedibua bua kuandamuna buloba ebu mparadizu. Ne mbatekemene ne muoyo mujima ne: Mparadizu au neikale muanda mulelela bualu “Mmuena lulamatu udi mulaye.”—Ebelu 10:23, NW.
Malu a diambulula
◻ Mbipeta kayi bivua dipanga ditabuja dipatule mu siekele wa kumpala?
◻ Mmu bualabale kayi mudi basadidi ba Nzambi mua kumueyemena?
◻ Mmatuku atshilualua kayi adi mindile bena lulamatu?
◻ Ntshinyi tshitudi ne bua kuenza bua kudijadikila matuku atshilualua a disanka mu bulongolodi bupiabupia bua Nzambi?
[Tshimfuanyi mu dibeji 18]
Kubangila ku mpindieu Yehowa udi wenza tshishimikidi tshia nsangilu mupiamupia wa pa buloba