Paudi ufuisha muntu
Mu Dibidi dia matuku 17 a ngondo wa 7 tshidimu tshia 2007 pa dîba dia 7:00, ndeke mukuabu uvua muambule bena ngendu uvua ujuka mu tshipalu tshinene tshia ndeke tshia mu tshimenga tshia São Paulo mu ditunga dia Brésil. Ndeke au kupangila mua kubuka, kusambuluka njila munene, kudituta mu nzubu munene wa mabuki. Bantu batue ku 200 bakafua.
BAVUA bamba bua njiwu ayi ne: ke njiwu mitambe bubi ya ndeke itu kayiyi mianji kuenzeka mu Brésil yashala mu mitu ya bantu bavua bafuishe bana babu. Claudete uvua pende mufuishe muanende mu njiwu ayi. Pavuaye ulonda ngumu ku TV, yeye kumvua bakula bua ndeke uvua moshike. Muanende Renato uvua pende mu ndeke amu. Uvua ne bidimu 26 tshianana. Uvua udilongolola bua kusela mu ngondo wa 10. Claudete kumubikila ku telefone ne muoyo muneme, kadi kakuyi muntu wandamuna. Wakakuluka panshi ne kutuadija kudila kakuyi mushindu wa kumusamba.
Antje wakafuisha nsongalume uvua mumubangile mu njiwu ya mashinyi ivua mienzeke mu ngondo wa kumpala wa 1986. Pakapetaye lumu, wakaya mufue nayi munda. Udi wamba ne: “Tshimvua muenze kumpala nkuela mpata. Ngakamona anu bu mvua ndota tshilota tshibi, katshiyi bualu bulelela to. Ngakazakala ne kumvua kanyinganyinga kakole bienza anu bu se: mbantue kela ku muoyo.” Antje wakashala ne kanyinganyinga pabuipi ne bidimu bisatu. Nansha muvua bualu ebu buenzeke kukadi bidimu bipite pa 20, udi anu umvua luzakalu lumukuata padiye uvuluka tshivua tshienzeke.
Bitu bualu bukole bua kumvuija kanyinganyinga kakole, nanku padi muntu ufua lufu lua tshikoso bantu batu anu banji bela mpata, bapangila ne bukole. Kadi, nansha mulela anyi mulunda wetu yeye mufue lufu lutukavua bamane kumona bua disama dia matuku a bungi, kanyinganyinga kadi anu mua kuikala ka bungi. Kakutu muntu ukadi mudilongolole menemene bua lufu lua muntu udiye munange nansha. Mamuende wa Nanci wakafua mu 2002 bua disama dia matuku a bungi. Kadi, dituku diakafuaye, Nanci wakasomba panshi mu lupitadi mufua nayi. Muoyo wakamutonda. Bidimu bitanu bimane kupita katshia mamuende wafua, udi anu udila padiye umututshila muoyo.
Mulongeshi Holly Prigerson wakamba ne: “Kanyinganyinga kakatu kajika to, batu bibidila naku tshianana.” Muntu uuvua munange yeye mufue lufu lua tshikoso anyi lua disama dia matuku a bungi, udi mua kudikonka ne: ‘Mbimpe kudila anyi? Ntshinyi tshingenza pangashala? Nemmonanganeku nende kabidi anyi?’ Tshiena-bualu tshidi tshilonda etshi netshiandamune nkonko eyi ne mikuabu iudi mua kuikala udiela.
[Mêyi a dianyisha bua tshimfuanyi mu dibeji 3]
EVERTON DE FREITAS/AFP/Getty Images