Mushindu uudi mua kumvua Bible
1. Lomba Nzambi diambuluisha
Mamu Ninfa wa mu Italie udi wamba ne: “Kuvua tshikondo tshimvua mbala Bible dituku dionso kumpala kua kulala. Mvua mubala bualu mvua mumanye mudiyi Dîyi dia Nzambi, ne nansha mumvua tshiyi munange kubala, mvua musue anu kumanya tshivua Nzambi mufunde mu Bible. Mvua mudifundila tshipatshila tshia kumujikija yonso. Ku mbangilu uvua mupepele, kadi meme kufika pa bitupa bivua bikole bua kumvua, ke meme kulekela dibala.”
BUALU bua buena bua Ninfa ebu mbukuenzekelaku pebe anyi? Mbienzekele bantu ba bungi. Nansha nanku, anu bu mutuvua bambe mu tshiena-bualu tshishale, Yehowa Nzambi muena Bible mmusue bua wewe kumvua Dîyi diende. Kadi mmunyi muudi mua kufika ku dimumvua? Tshintu tshia kumpala tshia wewe kuenza nkulomba Nzambi diambuluisha.
Bavua bamona bapostolo ba Yezu bu bantu bavua ‘kabayi bamanye mukanda ne ba patupu’ bualu kabavua balonge tulasa tua malu a Nzambi tua bafalese. (Bienzedi 4:13) Nansha nanku Yezu wakabambila ne: bavua mua kuvua malu adi mu Dîyi dia Nzambi. Mmushindu kayi? Yezu udi umvuija ne: ‘kadi musambi, nyuma muimpe mene, watumabu kudi Tatu mu dîna dianyi, yeye neanuyishe malu onso.’ (Yone 14:26) Nzambi uvua muenza mudimu ne nyuma muimpe eu, anyi bukole buende bua kufuka buloba ne bintu bionso bidi ne muoyo bidipu. (Genese 1:2) Wakapesha kabidi bantu batue ku 40 nyuma eu bua kufundabu ngenyi yende mu Bible. (2 Petelo 1:20, 21) Nyuma wende eu udi kabidi wambuluisha bantu badi basue kumvua Bible.
Mmushindu kayi uudi mua kupeta nyuma muimpe wa Nzambi? Mbimpe kumulomba kudi Nzambi ne ditabuja. Mu diamba bimpe, bidi bikengela kulomba ne disuminyina. Yezu wakamba ne: nutungunuke ne ‘kulomba, nebanupe. Binuamanya mua kupa bana benu bintu bimpe, Tatu wenu wa mu diulu kena upa batu bamulomba nyuma muimpe anyi?’ (Luka 11:9, 13) Yehowa mmusue bua kupesha bantu badi bamulomba ne muoyo mujima nyuma wende muimpe. Nyuma muimpe udi mua kukuambuluisha bua kumvua mêyi a mu Bible mafundisha ku nyuma kukadi bidimu binunu. Nyuma wa Nzambi udi kabidi mua kukupesha meji adi mua kukuambuluisha bua kutumikila malu audi mulonge mu Bible mu nsombelu webe.—Ebelu 4:12; Yakobo 1:5, 6.
Misangu yonso iudi usomba bua kubala Bible, lomba Nzambi bua akuambuluisha ne nyuma wende bua wewe kumvua biudi ubala.