MANDAMUNA A NKONKO YA MALU A MU BIBLE
Bafue nebapetululaku kabidi muoyo anyi?
Mu bulelela Mufuki wa muoyo udi mua kuupeshilula bantu
Yehowa Nzambi ke mpokolo wa muoyo. (Musambu 36:9) Nunku, Nzambi wa mushindu eu kenaku mua kupingajila bantu bakadi bafue muoyo anyi? Bible udi utujadikila ne: neenze nanku kumpala eku. (Bala Bienzedi 24:15) Kadi bua tshinyi neenze nanku?
Katshia ku ntuadijilu, Mufuki wetu utu anu musue bua muntu ashale ne muoyo tshiendelele. (Genese 1:31; 2:15-17) Utshidi anu ujinga bua bantu bikale nanku. Bidi bimusama ku muoyo padiye umona malu adi atutulukila lelu eu bu mudi ntatu ya mu nsombelu ne kufua kua lukasa.—Bala Yobo 14:1, 14, 15.
Bantu babishabu nebasombele penyi?
Nzambi uvuaku mufuke bantu bua basombele mu diulu anyi? Tòo. Banjelu ke bavuaye mufuke bua kusombela mu diulu. Uvua mufuke bantu bua kusombelabu pa buloba. (Genese 1:28; Yobo 38:4, 7) Bikale ne bualu ebu mu mutu, tumonayi mpindieu muvua Yezu mubishe bantu ku lufu. Uvua mubabishe anu pa buloba apa. Bia muomumue, bantu ba bungi babishabu nebikale ne muoyo anu pa buloba apa.—Bala Yone 5:28, 29; 11:44.
Nansha nanku, Nzambi mmusungule ndambu wa bantu bua kubishibuabu ne kuikala ne muoyo mu diulu bu bifukibue bia mu nyuma. (Luka 12:32; 1 Kolinto 15:49, 50) Bantu babishabu bua kuya mu diulu nebakokeshe ne Kristo pa buloba bu bakalenge.—Bala Buakabuluibua 5:9, 10.