Lukonko ludi lusamisha mutu

BANTU badi ne ngenyi ya bungi mishilashilangane bua muoyo ne lufu. Kudi badi bamba ne: padibu bafua nebatungunuke ne kuikala ne muoyo, pamuapa mu mushindu mukuabu anyi muaba mukuabu. Bakuabu badi bamba ne: nebaledibue kabidi bua kuikala ne muoyo muaba mukuabu. Banga pabu badi bela meji ne: lufu ndekelu wa bionso.

Udi mua kuikala ne webe mmuenenu mu bualu ebu, bilondeshile mudibu bakukoleshe anyi bilele bia muaba uudi mukolele. Bu mudi ngenyi ya tshidi tshienzeka padi muntu ufua mishilangane bikole nunku, kudiku muntu udi mua kutupesha mandamuna mimpe a kueyemena a lukonko ludi lusamisha mutu elu peshi muaba kampanda utudi mua kuapetela anyi?

Munkatshi mua bidimu nkama ne nkama, bamfumu ba bitendelelu mbalongeshe ne: anyima kena ufua to. Bena mu bitendelelu binene pa kuamba bionso (bu mudi bia bena Kristo, ba Hindu, bena Yuda, ba Mizilman, ne bikuabu) badi bitaba ne: anyima kena ufua to, kadi udi utungunuka ne kuikala ne muoyo muaba wa mu nyuma padi mubidi ufua. Bena Buddha bobu badi bitaba ne: ku diambuluisha dia diledibua misangu ya bungi, bukole budi munda mua muntu budi mua kufika ku nsombelu wa disanka dipite bungi udibu babikila ne: Nirvana.

Bua malongesha aa, bantu ba bungi ba pa buloba bujima mbafike ku ditaba ne: lufu ludi lunzuluila muntu tshiibi bua kuikala ne muoyo muaba mukuabu. Nunku bua bantu ba bungi, lufu ludi ne mushinga wa bungi bua muntu kutungunuka ne kuikala ne muoyo mu mushindu mukuabu, ne badi bamona ne: Nzambi mmusue bua bantu bikale bafua. Kadi ntshinyi tshidi Bible wamba bua bualu ebu? Suaku ubale tshiena-bualu tshidi tshilonda. Diandamuna diwapeta didi mua kukukemesha.