Banjelu badi ne tshidibu mua kukuenzela mu nsombelu webe anyi?

Dia lumingu dikuabu ku dilolo, Kenneth ne Filomena badi basombele mu Curaçao, bakaya kutangila tatu kampanda ne mukajende bavuabu balonga nabu Bible.

Kenneth udi wamba ne: “Patuakafika tuakasangana ku nzubu kukanga, mashinyi kaayiku to. Kadi muoyo wakansaka bua kubikila mukaji ku telefone.”

Mukaji au wakandamuna, kuambaye ne: bayende uvua ku mudimu. Kadi pakajingululaye ne: Kenneth ne Filomena bavua ku tshiibi, wakalua kukangula, kubambilaye bua babuele.

Bakamona diakamue ne: uvua mudile. Pavua Kenneth muenze disambila bua kutuadijabu kulonga Bible, mukaji wakatuadija kudila kabidi. Ke Kenneth ne Filomena kumuebejabu ne dîyi dimpe ni uvua ne bualu.

Mukaji au wakabambila ne: uvua mulongolole bua kudishipa dilolo adi, ne uvua wenda ufundila bayende mukanda bua kumulaya pavua Kenneth mumubikile ku telefone. Wakabambila ne: uvua ne dibungama dikole, ke bobu kumuambuluisha ne mibelu ya mu Bible. Mibelu eyi yakapandisha muoyo wende.

Kenneth udi wamba ne: “Tuvua bele Yehowa tuasakidila bua muvuaye muenze bua tuambuluishe mukaji uvua ne dibungama au, nangananga bua muvuaye mutusake (pamuapa ku diambuluisha dia muanjelu anyi nyuma wende muimpe) bua kubikila mukaji au ku telefone.”a

Mbimpe bua mudi Kenneth ne Filomena bela meji ne: Nzambi uvua mubambuluishe ku butuangaji bua muanjelu anyi bua nyuma wende muimpe peshi bukole buende buenzeji anyi? Peshi Kenneth uvua mubikile ku telefone anu ku mpukampuka?

Katuena bamanye to. Kadi tshitudi bamanye ntshia ne: Nzambi utu wenza mudimu ne banjelu bua kuambuluisha bantu mu malu a mu nyuma. Tshilejilu, Bible udi wamba ne: Nzambi uvua muenze mudimu ne muanjelu bua kutuma muambi Filipo bua kuambuluisha muena Etshiopi uvua dijinga ne diambuluisha bua kumvua malu a Nzambi.​—Bienzedi 8:26-31.

Bitendelelu bia bungi bidi bisaka bantu bua kuitaba ne: bifukibua bia mu nyuma bidiku, ne bimue bia kudibi mbifukibua bimpe bidi bienza disua dia Nzambi anyi bilama bantu. Bantu ba bungi badi bitaba ne: banjelu badiku ne badi mua kubambuluisha mu mushindu kampanda. Kadi bakuabu pabu kabena bitaba ne: banjelu badiku to.

Banjelu batuku anyi? Bikalabi nanku, mbafumine kuepi? Ntshinyi tshitudi mua kumanya bua banjelu? Badiku ne tshidibu mua kukuenzela mu nsombelu webe anyi? Tukonkononayi malu aa.