TSHIENA-BUALU TSHINENE | BANJELU BATUKU ANYI? BUA TSHINYI KUMANYA MALU ABU?

Tshitudi mua kumanya bua banjelu

Udiku musue kumanya malu adi atangila banjelu anyi? Tshidibu, kudibu bafumine, ne tshidibu benza anyi? Kakuena muaba mukuabu utudi mua kupetela mandamuna pa kumbusha mu Bible, Dîyi dia Nzambi difundisha ku nyuma wende. (2 Timote 3:16) Ntshinyi tshidi Bible wamba bua bualu ebu?

Anu bu mudi Nzambi muikale nyuma, banjelu pabu badi nyuma idi kayiyi imueneka, idi kayiyi ne “munyinyi ne mifuba.” Banjelu ba lulamatu mbasombele mu diulu ne badi ne mushindu wa kufika buludiludi kudi Nzambi mu diulu.—Luka 24:39; Matayi 18:10; Yone 4:24.
Kuvua misangu ivua banjelu bamuenekela bantu ne mibidi ya bantu bua kukumbaja mudimu uvua Nzambi mubapeshe pa buloba ne pashishe balekela mibidi ayi pavuabu bajikija mudimu wabu.—Balumbuluishi 6:11-23; 13:15-20.
Nansha mudi Bible uleja banjelu bu bantu balume ne nansha muvuabu bamuenekela bantu anu bu bantu balume, munkatshi muabu kamuena tshilumbu tshia bulume anyi bukaji to. Kabatu baselangana ne balela bana to. Bualu bukuabu kabidi, banjelu kabavua banji kuledibua bu bantu pa buloba (bikale bana ba mu maboko, bana bapuekele, anyi bantu bakulumpe) pashishe balua banjelu mu diulu padibu bafua to. Yehowa ke uvua mufuke banjelu, ke bualu kayi Bible udi ubabikila ne: “Bana balume ba Nzambi.”—Yobo 1:6; Misambu 148:2, 5.
Bible udi wakula bua “miakulu ya bantu ne ya banjelu” bua kuleja ne: banjelu badi ne wabu muakulu. Nansha mudi Nzambi muenze mudimu ne banjelu bua kuambila bantu malu, kena utuanyishila bua kutendelela banjelu anyi kubasambila to.—1 Kolinto 13:1; Buakabuluibua 22:8, 9.
Kudi mbombo ne mbombo ya banjelu, pamuapa bikale miliyare ne miliyare.a—Danyele 7:10; Buakabuluibua 5:11.
Banjelu badi ‘bena bukitu mu bukole buabu,’ mbuena kuamba ne: badi ne bukole bupite bua bantu ne meji mapite a bantu kule ne kule. Badi mua kuenza luendu ne lubilu lua katshia, kupita mudi bantu mua kuelela meji.—Misambu 103:20; Danyele 9:20-23.
Nansha mudi banjelu bikale ne meji a bungi ne bukole bupite, badi ne mikalu ne kudi malu adibu kabayi bamanye.—Matayi 24:36; 1 Petelo 1:12.
Mbafuke banjelu ne bumuntu bushilashilangane, ne ngikadilu ya Nzambi, ne budikadidi bua kudisunguila malu. Nunku anu bu bantu, badi mua kusungula bua kuenza tshidi tshimpe anyi tshidi tshibi. Diakabi, bamue banjelu bakasungula bua kutombokela Nzambi.—Yuda 6.

a Tshiambilu tshia mu tshiena Greke tshidi mu Buakabuluibua 5:11 tshidi tshiakula bua “makumi a binunu misangu makumi a binunu,” tshifila lungenyi lua ne: banjelu badi mua kuikala nkama ya miliyo anyi miliyare ne miliyare.

Banjelu mbalongolola mushindu kayi?

Mfumu wa banjelu: Mikaele udi ku mutu kua banjelu bualu udi ne bukole ne bukokeshi kubapita. Bible udi uleja patoke ne: Mikaele ndîna dikuabu dia Yezu Kristo.—1 Tesalonike 4:16; Yuda 9.

Baselafima: Badi mu mulongo mubandile munkatshi mua banjelu bualu badi ne midimu minene ne lumu, ne mbanyunguluke nkuasa wa bukalenge wa Nzambi.—Yeshaya 6:1-3.

Bakeluba: Badi pabu mu mulongo mubandile ne badi ne midimu ya pa buayi idi mu diumvuangana ne bumuntu bua butumbi bua Wa Bukole Buonso. Badi batamba kubaleja bamuenzela mudimu.—Genese 3:24; Yehezekele 9:3; 11:22.

Mbombo ne mbombo ya banjelu bafidi ba mikenji: Mbena mudimu ba Mutambe Bunene ne baleji mpala bende mu dikumbaja disua diende.b—Ebelu 1:7, 14.

b Wewe musue kumanya malu makuabu bua banjelu, bala nshapita wa 10 wa mukanda wa Bible utu ulongesha tshinyi menemene?, pamue ne tshisakidila tshia ne “Mikaele muanjelu mutambe bakuabu bunene nnganyi?” mupatula kudi Bantemu ba Yehowa. Udi mua kuupetela kabidi mu www.jw.org.