Tshia kuenza bua kuikala mu bulongolodi bupiabupia

Tuvua bamone mu biena-bualu bishale ne: Nzambi ukadi pa kubutula bantu babi ne kumbusha ntatu yonso idi pa buloba. Tudi batuishibue ne: bualu ebu nebuenzeke. Bua tshinyi? Bualu Dîyi dia Nzambi ndilaye ne:

“Buloba budi bupita.”—1 YONE 2:17.

Tudi batuishibue ne: kudi bantu bapanduka bualu mvese eu udi ulaya kabidi ne:

“Muntu udi wenza disua dia Nzambi udi ushalaku kashidi.”

Nunku tuetu basue kupanduka, tudi ne bua kuenza disua dia Nzambi. Bua kudimanya, tudi ne bua kuanji kumumanya yeye.

‘MANYA’ NZAMBI BUA UPANDUKE KU NSHIKIDILU

Bimfuanyi bilamika: 1. Munganga muzonzome mu lupitadi muzengele ne mutshioke bikole menemene. 2. Musombe wikisha muaba wa kudiila, umone muena mudimu nende ubala tshibejibeji ne disanka dionso. 3. Muena mudimu nende au umubadila mvese wa mu Bible ne umupesha karte ka jw.org.

Yezu wakamba ne: “Bualu ebu budi bumvuija muoyo wa tshiendelele: bende bakumanya wewe, Nzambi umuepele mulelela.” (Yone 17:3) Bua tuetu kupanduka ku nshikidilu ne kushala ne muoyo kashidi, tudi ne bua ‘kumanya’ Nzambi. Katuena anu ne bua kuitaba ne: udiku anyi kumanya amue malu adi amutangila to. Tudi ne bua kulua balunda bende. Bua bulunda butudi badie ne muntu kukolabu, tudi ne bua kupitshisha nende dîba pamue. Ke mudibi kabidi bua bulunda buetu ne Nzambi. Tumone amue malu a mushinga adi Bible wamba adi atuambuluisha bua kudia bulunda ne Nzambi ne kubukolesha.

Malu malela atudi tulonga mu Bible

Bible udi utuambila ne: Nzambi uvua musue bua tusombe mu Mparadizu.

Wakafuka bantu ba kumpala, Adama ne Eva, kubatekaye muaba muimpe uvuabu babikila ne: budimi bua Edene. Bavua bapuangane, ne Nzambi uvua mubapeshe bintu bionso bivuabu nabi dijinga bua kuikalabu ne disanka. Bavua mua kushala ne muoyo kashidi. Bu bobu batungunuke ne kuikala balunda ba Nzambi, kabavua mua kufua to. Kadi bakabenga ku bukole bua kutumikila mukenji mupepele uvua Nzambi mubelele.

Bible udi utuambila bua tshinyi tudi tukenga.

Pavua muntu wa kumpala Adama mubenge kutumikila Nzambi, wakadijimijila yeye ne bantu bakuabu bonso diakalenga dia kuikala ne muoyo kashidi. Bible udi wamba ne: ‘Mpekatu mmubuele mu ba pa buloba kupitshila kudi muntu umue, ne lufu lubuele bua mpekatu, ne mushindu eu lufu lutampakane kudi bantu bonso.’ (Lomo 5:12) Anu mudi muntu mua kupiana disama kampanda kudi baledi bende, ke mudi bana ba Adama bonso bapiane dipanga bupuangane diende. Ke bualu kayi tudi tukulakaja ne tufua.

Bible udi utuambila tshikadi Nzambi muenze bua kutuambuluisha.

Udi wamba ne: “Nzambi uvua munange ba pa buloba bikole menemene, kufikaye ne ku difila Muanende mulela umuepele, bua muntu yonso udi uleja ditabuja kudiye kabutudibu, kadi apete muoyo wa tshiendelele.” (Yone 3:16) Nzambi uvua mutume Yezu pa buloba bua kutufuilaye. Tatu kampanda wa bidimu 86 wa mu ditunga dia Inde diende Prabhakar udi wamba bua tshienzedi tshia dinanga atshi ne: “Bidi bileja mudi Yehowaa munnange bikole menemene. Dinanga diende ndimpeteshe ditekemena dia kuikala ne muoyo wa tshiendelele.”

Bible udi utuambila tshitudi mua kuenza bua kuleja Nzambi dianyisha.

Bible udi wamba ne: tudi mua kuleja Nzambi dianyisha bua malu adiye mutuenzele patudi ‘tutumikila mikenji yende.’ (1 Yone 2:3) Yehowa Nzambi udi utuleja ne dinanga dionso tshitudi mua kuenza bua kuikala ne nsombelu mulenga lelu. (Yeshaya 48:17, 18, dimanyisha dia kuinshi kua dibeji) Nzambi ki mmusue tukenge to. Udi utulaya ne: tuetu tutumikila mikenji yende, netuikale ne nsombelu muimpe mpindieu ne netupete muoyo wa kashidi.

BALA BIBLE DÎYI DIA NZAMBI DITUKU DIONSO

Munganga pambelu mu dikisha mutangile muulu yeye mumane kubala Bible. — Udi mua kupanduka ku nshikidilu wa buloba ebu wewe ulomba Nzambi diambuluisha ne wenza disua diende

Tutu tudia biakudia bua kuikala ne muoyo. Kadi Yezu wakamba ne: “Muntu udi ne bua kuikala ne muoyo, kabuyi anu bua diampa nkayadi, kadi bua dîyi dionso didi dipatuka mukana mua Yehowa.”—Matayi 4:4.

Lelu tudi tupeta mêyi a Yehowa mu Bible. Paudi ulonga mukanda wa tshijila eu neumanye malu avua Nzambi muenze kale, adiye wenza mpindieu ne aluaye kuenza mu matuku adi kumpala.

LOMBA NZAMBI DIAMBULUISHA

Ntshinyi tshiudi mua kuenza wewe musue kutumikila Nzambi kadi bikukolela bua kulekela amue malu adiye kayi wanyisha? Dîba adi kumanya Nzambi bimpe nekukuambuluishe.

Tuangate tshilejilu tshia mamu kampanda diende Sakura uvua ne tshibidilu tshia kuenda masandi. Pakatuadijaye kulonga Bible, wakamanya mukenji wa Nzambi wa ne: “Nyemayi masandi.” (1 Kolinto 6:18) Sakura wakalomba Nzambi diambuluisha, kufikaye ku dilekela tshibidilu tshibi atshi. Kadi utshidi uluangana natshi. Udi wamba ne: “Padi lungenyi lua kuenda masandi lunduila, ntu ndeja Yehowa malu onso mu disambila mujadike ne: tshiena mua kutshimuna ku bukole buanyi nkayanyi to. Disambila ndinsemeje pabuipi ne Yehowa.” Anu bu Sakura, bantu miliyo ya bungi badi balonga bua kumanya Nzambi. Udi ubapesha bukole budibu nabu dijinga bua kushintulukabu ne kuenza malu adi amusankisha.—Filipoyi 4:13.

Paudi wenda umanya Nzambi bimpe, udi wenda ‘umanyika kudiye’ bu mulunda wende udiye munange bikole. (Galatiya 4:9; Misambu 25:14) Dîba adi neulue mukumbane bua kubuela mu bulongolodi bupiabupia bua Nzambi. Kadi bulongolodi bupiabupia abu nebuikale mushindu kayi? Tshiena-bualu tshidi tshilonda netshiakule bua bualu ebu.

a Bible udi uleja ne: Yehowa ke dîna dia Nzambi.