Matewu
28 Chelili Sabata yinahiti dehi nawa chikwayileña nakucha hefuku datachi* mumulungu, Mariya Mandaleni niMariya mukwawu ayili nakutala kwijamu.
2 Chashikiliwu kukamwihi, ashikeneni dakumona nawu kwahita mutentanshi weneni muloña wakwila kañelu kaYehova wenjili kufuma mwiwulu nakulañumuna ilola dashinkiliwu kwijamu nawa kañelu washakamini hanodu ilola. 3 Owu kañelu wamwekeneña neyi kukena kwanzaji nawa yakuvwala yindi yadiña yitooka to-o neyi mayimakanza.* 4 Hamuloña wakumutiya woma owu kañelu, antu ahembeleña ijamu azaalili nawa amwekeni neyi anafwi.
5 Ilaña kañelu wayilejeli awa ambanda nindi: “Bayi mutiya womaku, muloña neluki nami munakukeña Yesu ajahilawu hamutondu. 6 Kunu kwosiyi, anamusañuli dehi neyi chochahosheliyi. Inzenu mutali mwakaama mujimba windi. 7 Yenu swayi-swayi mwakaleji atumbanji twindi nenu anamusañuli dehi kufuma mudi afu nawa wukuyañahu dehi kuÑaliliya. Kwenoku dikumukumumwena. Mwanuki mazu innayileji.”
8 Dichi afuminiku kwijamu* swayi-swayi nakuya lufuchi nakuleja atumbanji twindi iku anatiyi woma nimuzañalu wasweja. 9 Kuhiñahu Yesu wayibulakeni awa ambanda nakuyila nindi: “Kolenu!” Dichi wena ayili kwadiñayi nawa amukwatili kunyendu yindi nawa adifukwili* kudi yena. 10 Yesu wayilili nindi: “Bayi mutiya womaku! Yenu muyileji anakwami kulonda ayi kuÑaliliya, kwenoku dikukummwenawu.”
11 Chayileñawu, amu hakachi kanowu ahembeleña ijamu ayili mumusumba nakuleja akulumpi jawatupristu yuma yejima yamwekeni. 12 Akulumpi jawatupristu apompeli hamu nawakulumpi kulonda akasi kafuta, kuhiñahu owu mashidika ahembeleña ijamu, ayinkeli mali amavulu asiliva 13 nawa ayilejeli nawu: “Muhosheña nenu, ‘Atumbanji twindi enza wufuku nakumwiyamu henohu etu tudi mutulu.’ 14 Neyi nguvulu wukutiya iyi nsañu, tukumulumbulwila,* bayi mwakamaku.” 15 Dichi atambwili owu mali asiliva nawa elili kwesekeja namwayilejeliwu. Nawa iyi nsañu yatiyakana kudi aYudeya kushika nikulelu.
16 Kuhiñahu, atumbanji 11 ayili kuÑaliliya kumpidi kwayilejeliyi Yesu nindi ayi kulonda akadiwaniniku. 17 Nawa chamumweniwu, adifukwili* kudi yena, ilaña amu ajinokeleña. 18 Yesu wayili kudi wena nakuyileja nindi: “Nzambi wanyinka wuswa wejima wakutala yuma yamwiwulu niyahamaseki. 19 Dichi, yenu mwakelishi antu akunyuza yejima ekali atumbanji, muyipapatisheña mwijina daTata nidaMwana nidaspiritu yajila, 20 muyidizisheña ahembeña yuma yejima yinnayileji enu. Nawa tiyenu! Ami nukwikalaña nanenu mafuku ejima kushika nikukukuma kwanshakaminu yamakonu.”*