Luka
1 Antu amavulu anakeñakeñi dehi nikusoneka nsañu yayuma yejima yamwekeni, yitwakuhwelela ninetu. 2 Amakwawu niwena amweniku nawa akwakushimwina nsañu yaNzambi diwu atulejeli yumiyi. 3 Dichi, eyi Tiyofwilu wasweja kulema, nashinshiki yuma yejimiyi nawa ninami nafuukulihu kukusonekela yumiyi mundonda. 4 Nakusonekeli yuma yejimiyi kulonda wiluki chikupu neyi yuma yejima yiwadiza, yalala.
5 Mumafuku aHerodi,* mwanta waYudeya, kwadiña kapristu ateneneñawu nawu Zekariya wamwizanvu daAbiya. Wasumbwili mumbanda wamuchisaka chaAroni nawa ijina dindi wadiña Elizabeta. 6 Ejima wawu ayedi adiña aloña kumesu aNzambi, endeleña mukuloña kwesekeja nanshimbi niyuma yejima yayilejeliyi Yehova nindi atela kuyila. 7 Ilaña hiyadiña namwanaku, muloña Elizabeta wadiña nshinta nawa ejima wawu ayedi akulili chikupu.
8 Dichi wazatileña neyi kapristu kumesu aNzambi, muloña yadiña himpinji yakuzata izanvu dindi hatembeli. 9 Kwesekeja nachaaku chelileñawu atupristu mpinji yejima, mpinji yaZekariya yakwocha insensi yashikili heñililiyi mwiluña dajila daYehova. 10 Nawa izaza dawantu dejima dadiña hanji nakulomba hampinji yocheleñawu insensi. 11 Kañelu kaYehova wamwekeni kudi yena nawa wemeni kukabadi kachidiilu kakameña hakwochela insensi. 12 Ilaña Zekariya chamumweniyi wakamini nankashi nawa watiyili woma. 13 Hela chochu, kañelu wamulejeli nindi: “Zekariya, bayi wutiya womaku, muloña kulembelela kweyi anakutiyi, dichi ñodeyi Elizabeta wakakuvwela mwana weyala, wakamutumba ijina neyi Yowanu. 14 Wakazañalala nikutiya kuwaha nankashi nawa antu amavulu akatiya kuwaha hakuvwalika kwindi, 15 muloña wakekala muneni kumesu aYehova. Ilaña hatela kunwa vinyu hela walwaku nawa wakenzala naspiritu yajila henohu wuchidi mwivumu damama yindi, 16 nawa wakabalumuna anyana kaIsarela amavulu kwinza kudi Yehova Nzambi yawu. 17 Cheñi, wakayañahu dehi hambidi yindi hamu naspiritu niñovu yaElija kulonda yakabalumuni nyichima yawatata jawantu yakekali neyi yawanyana nikukojeja antu adikañaña akekali namaana awakwakuloña. Wakela mwenimu kulonda yakayilishi akekali antu amutelela Yehova.”
18 Zekariya wamwilili kañelu nindi: “Nateli kukuhwelela ñahi chumichi? Muloña ami nakuli dehi niñodami niyena nasweji dehi kukula.” 19 Kañelu wamulejeli nindi: “Yami Gabireli wemanaña kumesu aNzambi, anantemeshi kwinza nakuhosha naneyi nikukuleja iyi nsañu yayiwahi. 20 Ilaña tiyaña, wukwikala kamama nawa hiwukuhoshañaku kushika niifuku dakamwekana yumiyi, muloña hiwunakuhweleli mazu ami akashikijewa hampinji yayitoñwelawuku.” 21 Ilaña antu atwalekelihu nakumuhembelela Zekariya nawa ahayamini nanochu chashimbwiliyi nankashi mwiluña dajila. 22 Chedikiliyi hanji, hatwesheli kuhosha nawuku, dichi antu elukili nawu namoni chihayamisha* mwiluña dajila. Wahosheleña nawu kuzatisha makasa muloña hatwesheleña kuhoshaku. 23 Chamanini mafuku akuzata mudimu windi wajila, wafuntili kwitala dindi.
24 Chimwahitili mafuku, ñodindi Elizabeta wabaabili ivumu nawa hadi tukweji tutanu hafumineña hetalaku, wahosheleña nindi: 25 “Ichi dichinañiliyi Yehova munanu mafuku. Nañanuki kulonda yanfumishi nsonyi kumesu awantu.”
26 Chashikijiliyi tukweji 6, kañelu Gabireli amutemesheli kudi Nzambi kuya kuNazareta musumba wamuÑaliliya, 27 kudi mumbanda mujiki oteliwu* kudi iyala wejina daYosefu wamwitala daDavidi nawa ijina danowu mumbanda wadiña Mariya. 28 Kañelu cheñililiyi, wamulejeli nindi: “Kolaku, eyi wakiswilewa chikupu, Yehova wudi naneyi.” 29 Ilaña yena waluwankeni nankashi namazu ahosheli kañelu nawa wafwilili kwiluka mwatalishili oku kwimusha. 30 Dichi kañelu wamulejeli nindi: “Bayi wutiya womaku Mariya, muloña Nzambi nakutiyi kuwaha. 31 Nawa tiyaña! wakabaaba* ivumu nawa wakavwala mwana weyala, wakamutumba ijina neyi Yesu. 32 Owu mwana wakekala muneni, akamutena nawu Mwana kaMukwakubadika Chikupu nawa Yehova Nzambi wakamwinka itanda datata yindi Davidi, 33 wakekala Mwanta haya nyaaka mwitala daYakoba nawa Wanta windi hiwamba kakumaku.”
34 Ilaña Mariya wamwihwili kañelu nindi: “Chumichi chakamwekana ñahi, chineli ami hinadikaamañahu neyalaku?” 35 Kañelu wamwakwili nindi: “Spiritu yajila yakenza hadi eyi nawa ñovu yaMukwakubadika Chikupu yakakubuta. Hamuloña wachumichi, owu wakavwalika akamutena nawu wajila, Mwana kaNzambi. 36 Nawa tiyaña! ntaña yeyi Elizabeta elukawu nawu hinshinta, niyena nabaabi mwana weyala muwushinakaji windi nawa kanu diku kakweji kamu 6; 37 muloña kwosi chuma chahoshañayi Nzambi chabulaña kushikijayiku.” 38 Kuhiñahu Mariya wahosheli nindi: “Talaña, ami nduñu waYehova wamumbanda! Lekaku chimwekani kudi ami kwesekeja nachiwunahoshi.” Hohenohu kañelu wamushiyili.
39 Dichi mumafuku wenowu, Mariya wanyamukili nakuya swayi-swayi kwituña damapidi, mumusumba wamuYuda, 40 weñilili mwitala daZekariya nawa wamwimushili Elizabeta. 41 Elizabeta chatiyili kwimusha kwaMariya, mukeki wadiña mwivumu dindi watuntokeli, hohenohu Elizabeta wenzeli naspiritu yajila 42 nawa wabidikili nañovu nindi: “Wakiswilewa hakachi kawambanda nawa mwana iwukavwala wakiswilewa! 43 Indi nekali ñahi naniku kukooleka chakwila mama yaMwanta wami yenzi kudi ami? 44 Muloña tiyaña! chinatiya hohu kwimusha kweyi, mukeki wudi mwivumu dami watuntoka namuzañalu. 45 Nawa wudi namuzañalu yowu mumbanda wakuhwelelaña, muloña yuma yejima yamulejeliwu kudi Yehova, yakashikijewa.”
46 Mariya wahosheli nindi: “Wumi wami* wunamutuumbakeshi Yehova, 47 nawa muchima wami wunakuzañalala nankashi naNzambi Chamwinu chami, 48 muloña namushinshiki nduñu yindi wamumbanda wakehelamu. Tiyaña, kufuma dalelu makiñu ejima akantena nawu nidi namuzañalu, 49 muloña Mukwañovu nankoñeli nyidimu yamaneni nawa ijina dindi dajila, 50 luwi lwindi lwekalaña hadi antu amutiyaña woma kufuma kwikiñu dimu nakushika kwikiñu dikwawu. 51 Nakoñi yuma yañovu nachikasa chindi; napalañeshi antu amwekeshaña kudivwimba munyichima yawu kuhitila muyuma yafwilañawu. 52 Nafumishi antu akwañovu hamatanda awu nawa natoheshi adikehesha; 53 antu adi nanzala nayikutishi chikupu nayuma yayiwahi, antu adiña namaheta nayihañi makasakasa. 54 Namukwashi kambuñindi Isarela. Neli mwenimu kulonda yamwekeshi nindi mpinji yejima wanukaña chikaninu chamukaniniyi chakumumwekeshela luwi 55 Abarahama nianyanindi,* neyi chochalejeliyi ankakulula jetu.” 56 Mariya washakamini naElizabeta hadi tukweji tusatu, kuhiñahu wafuntili kumukala wawu.
57 Mpinji yaElizabeta yakusampuluka yashikili, wavweli mwana weyala. 58 Nawa antuñi nindi niantaña jindi atiyili nawu Yehova namutiyili luwi, dichi azañaleli hamu nayena. 59 Hefuku damu 8 enjili nakumwalamisha mwana wanyanya nawa amutumbili nawu Zekariya, ijina datata yindi. 60 Ilaña mama yindi wahosheli nindi: “Inehi! tukumutenaña netu Yowanu.” 61 Hamuloña wachumichi amulejeli nawu: “Hakachi kawantaña jeyi hosi niwumu wekala nanidi ijina.” 62 Kuhiñahu, kuhitila mukuzatisha makasa amwihwili tata yindi ijina dakeñeleñayi nindi amutumbi. 63 Dichi walombeli nindi amwinki ilola dawubasa nawa wasonekelihu nindi: “Ijina dindi diyi Yowanu.” Antu ejima ahayamini. 64 Hohenohu kanwa kindi kenzunukili niidimi dindi dasubukili nawa watachikili kuhosha nakumushimeka Nzambi. 65 Antu ejima amuchituñilu chawu atiyili woma nawa yuma yejimiyi atachikili kuyihoshahu mwituña damapidi daYudeya dejima. 66 Antu ejima atiyili iyi nsañu ahosheleña munyichima yawu nawu: “Indi iwu mwana wanyanya wakekala muntu wamuchidinyi?” Muloña chikasa chaYehova chadiña nayena chikupu.
67 Kuhiñahu, tata yindi Zekariya wenzeli naspiritu yajila nawa waprofweteli nindi: 68 “Yehova Nzambi yaIsarela amushimeki, muloña naanuki antu jindi nawa nayikuuli. 69 Natunyamwini dehi luseñu lwawamwinu* mwitala dakambuñindi Davidi. 70 Chumichi chinesakani namazu ahosheliyi kuhitila mutunwa twawatuprofwetu indi ajila akushankulu. 71 Wahosheli hakutwamwina kudi ayilumbu jetu nimumakasa awantu atuhelaña. 72 Nawa wakashikija izu dindi dahosheliyi nawankakulula jetu nikuyimwekeshela luwi. Wakanuka chitiyañenu chindi chajila, 73 chasanyikiliyi kudi nkakulula yetu Abarahama, 74 hanyima yakutupulwisha mumakasa awayilumbu, wakatwinka kukooleka kwakumuzatila mudimu wajila chakadi woma 75 nakashinshi nikuloña kumesu indi mafuku etu ejima. 76 Hakwila eyi mwana wanyanya, akakutena nawu kaprofwetu kaMukwakubadika Chikupu, muloña wakayañahu dehi hambidi yaYehova kulonda wakamuloñesheli njila jindi, 77 wakaleji antu jindi nsañu yawamwinu kuhitila mukuyanakena nshidi jawu, 78 hamuloña waluwi lwaNzambi yetu. Ilu luwi lwakufuma mwiwulu lwakekala neyi chejeji chatoñekaña namwaana, 79 nakutoñekela antu ashakama mumwidima nimuwulelu wakufwa nikulombola nyendu yetu munjila yakuwunda.”
80 Iwu mwana wanyanya wakulili nikukola nawa watwalekelihu kushakama muchinkalampata kushika nihefuku dadimwekesheliyi hatooka kudi Isarela.