Luka
2 Mumafuku wenowu, Kesari Agusitusi wahanini lushimbi lwakwila nawu antu ejima ashakamaña hamaseki ayisoneki. 2 (Iku kudisonekesha kwatachi kwadiñaku hampinji Kerini yadiñayi nguvulu waSiriya.) 3 Dichi antu ejima ayili nakudisonekesha, muntu-himuntu kumusumba wawu. 4 Yosefu niyena wafumini mumusumba waNazareta, muÑaliliya, nakuya mumusumba waDavidi watenañawu nawu Betelemi, muYudeya, muloña wadiña wamwitala nawa wamuchisaka chaDavidi. 5 Wayili nakudisonekesha naMariya asumbwiliyi neyi chochamukaniniyi nawa wadiña kwakwihi nakusampuluka. 6 Chadiñawu kwenoku, mpinji yakusampuluka yashikili. 7 Dichi wavweli mwana weyala wawedi nawa wamuvuñekeli mumahina nakumukaamika mwadiilaña yimuna,* muloña mwitala mwakukaama enyi himwadiña kapeka mwakukaama wenaku.
8 Kunodu iluña kwadiña cheñi atubiña ashakamineña mwisaña nakuhemba nyikanka yayimuna yawu nawufuku. 9 Hohenohu kañelu kaYehova wamwekeni kudi wena nawa kulema kwaYehova kwayitoñekeleli chejeji heluña hadiñawu hejima, dichi wena atiyili woma nankashi. 10 Ilaña kañelu wayilejeli nindi: “Bayi mutiya womaku, tiyenu, inakuyileja nsañu yayiwahi yamuzañalu wasweja wakekala nawantu ejima. 11 Muloña dalelu mumusumba waDavidi munayivwalikili chamwinu, diyi Kristu Mwanta. 12 Ichi dichinjikijilu chimukumwilukilaku; mukuwana mukeki anavuñekeliwu mumahina nawa anamukaamiki mwadiilaña yimuna.”* 13 Hohenohu, kukashimuka iwu kañelu wudi namazaza awañelu amwiwulu, anakumuhameka Nzambi nawu: 14 “Kulema kwikala kudi Nzambi mwiwulu nawa hamaseki hekali kuwunda hakachi kawantu atiyañayi kuwaha.”
15 Chelili añelu anayishiyi dehi nakuya mwiwulu, atubiña atachikili kuhanjeka mulwawu nawu: “Tuyenu kuBetelemi tukamoni yuma yinamwekani, yinatulejiyi Yehova.” 16 Dichi ayili swayi-swayi, amuwanini Mariya niYosefu nimukeki anamukaamiki mwadiilaña yimuna.* 17 Chamweniwu chumichi, ashimwini nsañu yayilejeliwu yaniwu mwana wanyanya. 18 Nawa antu ejima atiyili iyi nsañu yayilejeliwu kudi atubiña ahayamini nankashi, 19 ilaña Mariya watachikili kuhemba iyi nsañu yejima, nakutoñojoka mumuchima windi mwatalishili iyi nsañu. 20 Kuhiñahu, atubiña afuntili iku anakumulemesha nikumuhameka Nzambi hayuma yejima yatiyiliwu nikumona, neyi chochayilejeliwu.
21 Chimwahitili mafuku 8, chashikili mpinji yakumwalamisha, amutumbili ijina nawu Yesu, ijina dashimwiniyi kañelu henohu kanda amubaabi mwivumu.
22 Cheñi, chiyashikili mpinji yakuyitookesha kwesekeja naNshimbi jaMosi, amuleteli kuYerusalema kulonda amuhani kudi Yehova, 23 neyi chochasonekawu muNshimbi jaYehova nawu: “Mwana weyala wejima wawedi,* atela kumutena nawu wajila waYehova.” 24 Nawa alambwili mulambu kwesekeja nachahosha Nshimbi jaYehova nawu: “tuteela tuyedi hela tupompa* tuyedi.”
25 Tiyenu! muYerusalema mwadiña muntu wumu ateneneñawu nawu Simeyona, iwu iyala wadiña waloña nawa wamwakama Nzambi, watalilileña mpinji yakakoleshayi Nzambi Isarela nawa spiritu yajila yadiña hadi yena. 26 Cheñi, Nzambi wamulejeli kuhitila mudi spiritu yajila nindi hakafwaku sampu namoni Kristu waYehova. 27 Chamulombweliwu kudi spiritu, weñilili mutembeli, anvwali chamuleteliwu Yesu mwana wanyanya kulonda amwili kwesekeja nachahosha Nshimbi, 28 wamutambwili mwana mumakasa indi nakumulemesha Nzambi nindi: 29 “Mwanta Wabadika, ichi namoni dehi mwana neyi chochiwahosheli, dichi dinu nateli kufwa mukuwunda, 30 muloña mesu ami anamoni njila yeyi yiwakaletelamu wamwinu 31 yiwunaloñeshi dehi nawa yinakumonawu antu ejima, 32 hichejeji chakufumisha nachu chuma chakañeshaña mesu awantu akunyuza kumona nawa hikulema kwawantu jeyi aIsarela.” 33 Dichi tata yaniwu mwana nimama yindi atwalekelihu kuhayama namazu ahosheleñayi hadi iwu mwana. 34 Cheñi, Simeyona wayikiswilili, wamulejeli Mariya mama yamwana nindi: “Tiyaña! Nzambi natemeshi iwu mwana nawa muloña wayena amakwawu muIsarela akadimbuka, amakwawu akanyamuka hela chakwila Nzambi wakayimwekeshela antu yinjikijilu yikamwekeshaña nawu wudi nayena, antu amavulu akamusawulaña 35 (eñañi, mpoku yakabali yakahanuka mudi eyi*), kulonda yuma yinakutoñojokawu antu amavulu munyichima yikasoloki hatooka.”
36 Dichi kwadiña kaprofwetu wamumbanda Ana, mwana kaFwanuweli wakumuchidi waAsheri. Iwu mumbanda wakulili chikupu, washakamini muwulu* nanfumwindi hadi yaaka 7, 37 nawa wekalili nfwila hadiñayi nayaaka 84. Mpinji yejima wawanikileña hatembeli nakuzata mudimu wajila mwaana niwufuku, nakushakama chakadi kuda nakulomba nakulembelela. 38 Hayoyina mpinji, wenjili kwakwihi nawa watachikili kumusakilila Nzambi nakuhosha hadi mwana kudi antu ejima adiña nakutalila mpinji yakakuulawu Yerusalema.
39 Dichi chamanishiliwu kwila yuma yejima kwesekeja naNshimbi jaYehova, afuntili kumusumba wawu waNazareta, muÑaliliya. 40 Iwu mwana wanyanya wakulileña nikukola nikwikala namaana nawa Nzambi wamutiyileña kuwaha.
41 Anvwali jindi ayileña kuYerusalema kuchawija chaChipandakenu hachaaka-hachaaka. 42 Nawa chashikijiliyi yaaka 12, anyamukili nakuya kuchawija kwesekeja nachiyelileñawu mpinji yejima. 43 Chamanini mafuku achawija, chelili hiyakufunta, kansi weyala Yesu washalili kunyima muYerusalema nawa anvwali jindi hiyelukiliku. 44 Chelili atoñojokeli nawu wudi hezanvu dawantu dafuntileña hamu nawu, endeli lwendu lwefuku dimu nawa atachikili kumukeñakeña hadi antaña jawu nihadi enimbu. 45 Hamuloña wakwila hiyamuwaniniku, afuntili cheñi kuYerusalema nakumukeñakeña chikupu. 46 Chimwahitili mafuku asatu, amuwanini mutembeli nashakami mukachi kawantañishi nakuyitiyilila nikuyihujola malwihu. 47 Ilaña antu ejima adiña nakumutiyilila ahayamini nankashi nañakwilu yindi nikashinshi kakutiyishisha yuma chiwahi. 48 Anvwali jindi chamumweniwu, ahayamini nankashi nawa mama yindi wamulejeli nindi: “Mwanami, wunatwililidi ñaana? Ami nitata yeyi tunakukeñakeñi chikupu.” 49 Ilaña yena wayilili nindi: “Muloñadi chimwankeñelaña? Komana himweluka nenu natela kwikala mwitala daTata yamiku?” 50 Hela chochu, wena hiyelukili mwatalishili mazu ayilejeliyiku.
51 Dichi wakunkumukili nakufunta hamu nawu kuNazareta nawa watwalekelihu kuyovwahila. Mama yindi niyena wahembeli awa mazu ejima kumuchima windi. 52 Yesu watwalekelihu kukula namaana nimuchiminu nawa amutiyileña kuwaha kudi Nzambi niantu.