Maku

6 Dichi wafumini kunodu iluña nakuya mwiluña damumukala wawu nawa atumbanji twindi amulondeleli. 2 Sabata chiyashikili, watachikili kutañisha musinagogi, antu atiyili nsañu yatañishileñayi ahayamini nankashi nakuhosha nawu: “Indi iwu muntu wafumishili kudihi yuma yejimiyi? Muloñadi chamwinkelawu awa maana nawa muloñadi iyi nyidimu yañovu yamuchidiwu chiyinakuzatikila kuhitila mudi yena? 3 Komana iwu hidiyi mukwakusoña mwana kaMariya nawa mana kwaYakoba niYosefu niYuda niShimonaku? Ahelindi hitwashakamaña nawu kunuku?” Dichi akaanini kumukuhwelela. 4 Ilaña Yesu wayilili nindi: “Kaprofwetu amulemeshaña kwacheñi, hakwila mwiluña damumukala wawu nikudi antaña jindi nimwitala dindi hiyamulemeshañaku.” 5 Wokili hohu antu antesha adiña akata, nakuyinañika makasa. Ilaña hakoñelihu chihayamisha chikwawu kwenokuku. 6 Mwamweni, wahayamini nankashi muloña hiyadiña nachikuhweleluku. Kuhiñahu wayili mwahita nyikala mwejima nakutañisha.

7 Dichi watambikili apostolu 12 nawa watachikili kuyitemesha ayedi-ayedi nikuyinka wuswa wakufumisha andemoni. 8 Cheñi hayitejeli kusenda chuma nichimu halwenduku, chiña hohu mukombu, wayikaanishili kusenda mankendi, ipakumuna dayakuda nimali* muyikwama yawu, 9 ilaña wayilejeli kuvwala nkwabilu nikubula kuvwala yakuvwala yiyedi.* 10 Kubombelahu, wayilejeli nindi: “Mwitala mwejima mumukwiñila, shakamenu mwenomu sampu munafumimu. 11 Nawa kwiluña kwejima kukubula kuyitambwilawu hela kutiyilila kunsañu yenu, hakufuma kwenoku, mutotomoneña lunkuñu kunyendu yenu kulonda kwakayilili wunsahu.” 12 Dichi ayili, ashimwinini nawu antu atela kubalumuka munyichima, 13 nawa afumishili andemoni amavulu nikuyiwayisha manji antu akata nikuyuuka.

14 Dichi Mwanta Herodi watiyili nsañu iyi, muloña ijina daYesu dayili mpuhu nawa antu ahosheleña nawu: “Yowanu Mupapatishi anamusañuli kufuma mudi afu nawa ichi dichamukojeja yekali nañovu yakukalakala nyidimu yañovu.” 15 Ilaña antu amakwawu ahosheleña nawu: “Diyi Elija.” Amakwawu niwena nawu: “Hikaprofwetu wudi neyi atuprofwetu akushankulu.” 16 Herodi chachitiyiliyi, wahosheli nindi: “Yowanu ona inaketwili mutu diyi anasañuliwu.” 17 Herodi wasumbwili Herodiya, ñoda manakwindi Fwilipu, muloña wachumichi, Herodi watemesheli antu kuya nakumukwata Yowanu nawa wamukasili nakumusha mukaleya. 18 Muloña Yowanu wamulejeleña Herodi nindi: “Kwesekeja nanshimbi, hiwatela kusumbula ñoda manakweyiku.” 19 Dichi Herodiya wamuhembeleli Yowanu nkunyi nawa wakeñeleña kumujaha, ilaña wakañenyi. 20 Herodi wamutiyileña Yowanu woma, muloña wamwilukili nindi himuntu waloña nawa wajila, dichi wamuhembeleña chiwahi. Mpinji yejima neyi yamutiya nakuhosha, helukileña chuma chatela kumwilayiku, ilaña watiyileña kuwaha kumutiyilila.

21 Ilaña mpinji yayiwahi yashikili helili Herodi yaloñesheli ayilolu jindi, akulumpi jamashidika niantu alema amuÑaliliya kuda kwamelela hefuku dakwanakana kuvwalika kwindi. 22 Dichi mwana kaHerodiya wamumbanda weñilili mwadiñawu nawa wahañeni chiwahi chakwila wamutiyishili Herodi kuwaha niantu adiileñayi nawu.* Mwanta wamulejeli owu kansi wamumbanda nindi: “Nlombi chuma chejima chiwunakukeña, nukukwinkachu.” 23 Wasanyikili kudi owu kansi wamumbanda nindi: “Chuma chejima chiwukunlomba, nukukwinkachu hela chibalu chawanta wami.” 24 Dichi wayili kudi mama yindi nakumwihula nindi: “Chumanyi chinukulomba?” Mama yindi wamwakwili nindi: “Lombaku mutu waYowanu Mupapatishi.” 25 Hohenohu owu kansi wamumbanda wayili nakumuleja mwanta nindi: “Inakukeña katatakichi wunyinki mutu waYowanu Mupapatishi hacheña.” 26 Hela chakwila chumichi chamuneñesheli mwanta, hamuloña wakusanyika kwasanyikiliyi nihamuloña wawantu adiileñayi nawu,* hakeñeleña kukaana kumwinka owu mwana chuma chalombeliyiku. 27 Hohenohu mwanta watemesheli nhembi nakumuleja nindi yaleti mutu waYowanu. Dichi wayili mukaleya, wamuketwili mutu 28 nakuwuletela hacheña. Wamwinkeli owu kansi wamumbanda, yena nawa wamwinkeli mama yindi. 29 Atumbanji twindi chatiyiliwu chumichi, enjili nakusenda mujimba windi nakuwisha mwijamu.*

30 Apostolu apompeli kudi Yesu nakumuleja yuma yejima yeliliwu niyuma yatañishiliwu. 31 Kuhiñahu, wayilejeli nindi: “Tuyenu kwakankawetu kulonda tunookihu chanti.” Muloña kwadiña antu amavulu enjileña niayileña chakwila hiyadiña nampinji yakunooka hela kudaku. 32 Dichi akandamini muwatu nakuya kwiluña kwakankawawu. 33 Ilaña chayileñawu ayimweni kudi antu nawa amavulu elukili chumichi, antu afumini munyisumba yejima atwamininiku kwenoku hamaseki lufuchi. 34 Yesu chafuminiyi muwatu, wamweni izaza deneni dawantu, wayitiyilili wushona, muloña adiña neyi anyikoku akadi kabiña. Dichi watachikili kuyitañisha yuma yayivulu.

35 Hanoyu mpinji kwadiña kwela dehi melela, dichi atumbanji twindi enjili kudi yena nakumwila nawu: “Kudinu iluña hikwashakamaña antuku nawa mpinji yinamani dehi. 36 Lejaku antu ayi kumaluña amukamwihi nimunyikala yamukamwihi kulonda alandi yakuda yawu.” 37 Yena wayilili nindi: “Yowenenu yinkenu yakuda.” Chatiyiliwu awa mazu amwihwili nawu: “Tuyi nakulanda mankendi akulanda namadenari 200 kulonda tuyinki antu adi tahindi?” 38 Yena wayihwili nindi: “Mukweti mankendi añahi? Yenu mutali.” Chayitaliliwu, amulejeli nawu: “Mankendi atanu niinshi jiyedi.” 39 Kuhiñahu, walejeli antu ejima nindi ashakami hamatahu atuuta, aha izanvu, aha izanvu. 40 Dichi ashakamini mumazanvu awa 100, amakwawu 50. 41 Chanoneliyi owu mankendi atanu niinshi jiyedi, watalili mwiwulu nawa walombeli. Kuhiñahu, wahumwini mankendi nakuyinka atumbanji kulonda enki antu nawa wanoneli oju inshi jiyedi nakuyanzañena antu ejima. 42 Dichi wejima wawu adiili nawa ekutili, 43 chakwila anoneli yakuda yashalilihu nakuyisha muyimpaya* 12 nawa yenzeli to-o kufumishaku inshi jashalilihu. 44 Antu adiili mankendi adiña amayala 5,000.

45 Hohenohu walejeli atumbanji twindi nindi akandami muwatu kulonda atwaminiku nakuya kuchikumu chakwishinadi kuBetesayida, ilaña yena washalili nakuleja izaza dawantu nindi ayi kwawu. 46 Chelili nadishaliki dehi nezaza dawantu, wayili kumpidi nakulomba. 47 Chikwelili melela, watu wadiña hakachi kakaluñalwiji ilaña yena wachidiña kwenoku kwakankawindi. 48 Chayimweniyi anakukabakana hakuvuwa watu muloña wampepela yafumineña kwayileñawu, wayili kwadiñawu iku nakwenda hakaluñalwiji kwakwihi nachilu chamuchiwana* nawa wendeleña neyi kwiji nakukeña* kuyipandakana. 49 Chamumweniwu nakwenda hakaluñalwiji, atoñojokeli nawu: “Himujimu!”* Nawa abidikili. 50 Muloña wejima wawu amumweni nawa atiyili woma. Hohenohu Yesu wayilejeli nindi: “Kolenu! Iyami; bayi mutiya womaku.” 51 Kuhiñahu wakandamini muwatu mwadiñawu nawa mpepela yalekeli. Wena chamweniwu chumichi, ahayamini nankashi, 52 muloña atiyishili wanyi mwatalishili mankendi ahaniniyi, ilaña atwalekelihu kujinoka munyichima yawu.

53 Chashikiliwu kuchikumu chakwishinadi, ashikili muGenesareta nawa watu awukasilili kwakwihi nachikumu. 54 Ilaña chafuminiwu hohu muwatu, antu ashikeneni dakumwiluka. 55 Atemukili nakuya munodu iluña dejima nawa atachikili kuleta antu adiña akata hayileyi* kwiluña kwatiyiliwu nawu dikwadiyi. 56 Nawa mwejima mweñilileñayi chili munyikala hela munyisumba hela mumaluña amukamwihi, antu atentekeleña antu akata muyisankanu nakumulembelela nawu akwati hohu kunzombu yachakuvwala chindi chahewulu. Dichi antu ejima akwatiliku, akoleli.