Matewu

5 Chamweniyi mazaza awantu, wakandukili hampidi; chelili nashakami dehi, atumbanji twindi enjili kudi yena, 2 nawa watachikili kuyitañisha nindi:

3 “Adi namuzañalu wowu antu eluka nawu atela kudiza hadi Nzambi,* muloña Wanta wamwiwulu wawu.

4 “Adi namuzañalu wowu antu aneñaña, muloña akayikundeja.

5 “Adi namuzañalu wowu antu adizoza,* muloña akaswana iseki.

6 “Adi namuzañalu wowu antu atiyaña nzala nimpwila yayuma yaloña, muloña akayikutisha.

7 “Adi namuzañalu wowu antu akweti luwi, muloña akayitiyila luwi.

8 “Adi namuzañalu wowu antu atooka munyichima, muloña akamumona Nzambi.

9 “Adi namuzañalu wowu antu aletaña kuwunda,* muloña akayitena nawu anyana kaNzambi.

10 “Adi namuzañalu wowu antu akabishañawu muloña wakwila yuma yaloña, muloña Wanta wamwiwulu wawu.

11 “Mudi namuzañalu enu ahoshañawu kasawuntu kudi antu nikuyikabisha nakuyitwambila yuma yatama yeñi-nayeñi kukoola ami. 12 Zañalalenu nawa tiyenu kuwaha chikupu, muloña wufwetu wenu weneni mwiwulu, dichakabishiliwu niatuprofwetu adiñaku henohu enu kanda muvwaliki.

13 “Enu yenu muñwa wahamaseki, ilaña neyi muñwa wusamunuka, akuwutowesha ñahi cheñi? Hiwukwikala namudimu cheñiku, akukumina dakuwumwañila hanji kulonda awudatoleña kudi antu.

14 “Enu yenu chejeji chamukaayi. Musumba hiwunateli kuswama neyi wudi hewulu dampidiku. 15 Antu hiyabutulaña inoñu nakudibutila mwibañuku,* ilaña aditentekaña hatentekañawu inoñu kulonda ditoñekeli ejima adi mwitala. 16 Ninenu nawa, chejeji chenu chitoñekeña kudi antu hakwila amoneña nyidimu yenu yayiwahi kulonda amulemesheña Tata yenu wekala mwiwulu.

17 “Bayi mutoñojoka nenu nenjili nakukisañana Nshimbi hela mazu awaTuprofwetuku. Hinenjili nakuyikisañanaku, ilaña nenjili nakuyishikija. 18 Inakuyileja chalala nami, iwulu niiseki keña jihiti, ilaña kwosi kansona hela kamu kakehelamu kamuNshimbi kakahitaku, sampu yuma yejima yinamwekani dehi. 19 Dichi muntu wejima wukufumpa lushimbi lumu haniji nshimbi jakehelamu nakutañisha akwawu kulonda eleña mwomumu, akamutena nawu wakehelamu muWanta wamwiwulu. Ilaña muntu wejima wajovwahilaña nikutañisha akwawu, akamutena nawu muneni muWanta wamwiwulu. 20 Muloña inakuyileja nami, neyi kuloña kwenu hikukubadika kwawansoneki nikwawaFwarisiku, himwakeñila muWanta wamwiwuluku.

21 “Mwatiyili dehi mwayilejeliwu antu akushankulu nawu: ‘Bayi wujaha muntuku, nawa wejima wukujaha muntu akumusompesha kuchota chanyiloña.’ 22 Ilaña ami inakuyileja nami muntu wukutwalekahu kumuhilila manakwindi akumusompesha kuchota chanyiloña; nawa muntu wejima wukumuhosha manakwindi mazu akasawuntu akumusompesha kuChota Cheneni chaNyiloña;* ilaña muntu wejima wukuhosha nindi, ‘Eyi chisupi wamukunkulwayi!’ wukwikala namuloña wakumunatila muGehena* yakesi.

23 “Dichi, neyi wunakuleta mulambu weyi kukameña nawa kwenoku wanuka neyi wukweti muloña namanakweyi, 24 shiyaku mulambu weyi kumbidi yakameña nawa funtaku. Sambilaku kutiyañana namanakweyi, kuhiñahu dinu wufunti nakulambula mulambu weyi.

25 “Nyakalaku kutiyañana namukwenu wunakuholokeli kuchota chanyiloña hampinji yinakukutwalayi kuchota, kulonda yabuli kukuhana kudi nsompeshi, nsompeshi niyena yabuli kukuhana kudi kapasu kulonda yakushi mukaleya. 26 Dichi inakukuleja chalala nami, wakafumamu wanyi sampu wunafweti mali ejima.*

27 “Mwatiyili dehi mwayilejeliwu nawu: ‘Bayi wila wujilaku.’ 28 Ilaña ami inakuyileja nami muntu wejima wukutala mumbanda namesu akufwila kudikaama nindi, neli dehi nindi wujila mumuchima windi. 29 Neyi disu deyi dachidiilu dinakukuhukesha, difumishi wudinatili kwakulehi. Muloña chikusweja kuwaha neyi wukujimbesha chiidi cheyi chimu chamujimba kubadika kunatila mujimba weyi wejima muGehena.* 30 Cheñi nawa, neyi chikasa cheyi chachidiilu chinakukuhukesha, chiketuli wuchinatili kwakulehi. Muloña chikusweja kuwaha neyi wukujimbesha chiidi cheyi chimu chamujimba kubadika kunatila mujimba weyi wejima muGehena.*

31 “Ahosheli cheñi nawu: ‘Muntu wukuseña ñodindi, yamwinki mukanda wakumuseñelahu.’ 32 Ilaña ami inakuyileja nami, muntu wejima wukuseña ñodindi hakadi muloña wawuvumbi,* wukumuleñela yeli wujila, nimuntu wukusumbula owu mumbanda anaseñiwu, neli wujila.

33 “Cheñi nawa, mwatiyili dehi mwayilejeliwu antu akushankulu nawu: ‘Bayi musanyika chakadi kwilamuku, ilaña chiña mwila mumwamukanini Yehova.’ 34 Ilaña ami inakuyileja nami: Bayi musanyika hela hantiku, hela kutena iwulu, muloña hiitanda daNzambi; 35 hela kutena iseki, muloña hichitwamu chakudata nyendu yindi; hela kutena Yerusalema, muloña himusumba waMwanta muneni. 36 Bayi wusanyikila kumutuku, muloña hiwukutwesha kubalumuna lusuki lumu lwiikali lutooka hela lwiyilaku. 37 Neyi mwiteja nenu ‘Eña,’ ilenu mwomwenomu nawa neyi mukaana nenu ‘Inehi,’ ilenu mwomwenomu, muloña mazu ejima imukushilahu anafumi kudi watama.

38 “Mwatiyili dehi mwahosheliwu nawu: ‘Disu nadisu nawa izewu nezewu.’ 39 Ilaña ami inakuyileja nami: Bayi mudikaña namuntu watamaku, ilaña wejima wukuyeta kwikidi dachidiilu, mushetumwinenu nikudikwawu. 40 Neyi muntu nakukeña kukuholokela kuchota chanyiloña nawa yakutambula chakuvwala cheyi chamukachi, mwinki nichakuvwala cheyi chahewulu; 41 nawa neyi mukwawuswa nakuleji nindi wuyi nindi mayilu* yimu, yaku nindi mamayilu ayedi. 42 Muntu wunakukulomba mwinki nawa muntu wunakukeña nindi wumukongweshi,* bayi wumuminaku.

43 “Mwatiyili dehi mwahosheliwu nawu: ‘Keñaku mukwenu nawa helaku chilumbu cheyi.’ 44 Ilaña ami inakuyileja nami: Twalekenuhu kukeña ayilumbu jenu nawa yilombelenuñaku antu ayikabishaña, 45 kulonda mwiikali anyana kaTata yenu wekala mwiwulu, muloña watuntwishaña itena* dindi hadi antu ejima atama niamawahi nawa wanokeshaña nvula hadi antu ejima aloña niabula kuloña. 46 Muloña neyi mukukeña hohu antu ayikeña, mukuwanamu wufwetwinyi? Hidimu mwelañawu niakwakutambula nyisonkuku? 47 Nawa neyi mukwimusha anakwenu hohu, chumanyi chabadika kuwaha chimunakwila? Hidimu mwelañawu niantu akunyuzaku? 48 Dichi ninenu mwatela kwikala awanina,* neyi chawaninayi Tata yenu wekala mwiwulu.