Luka

3 Tiberusi Kesari chashikijiliyi yaaka 15 yakuyuula, hampinji yadiñayi Pontusi Pilatu nguvulu waYudeya, hampinji yadiñayi Herodi nyuuli wankambi yaÑaliliya, manakwindi Fwilipu hampinji yadiñayi nyuuli wankambi yaItureya niTarakonita nawa hampinji yadiñayi Lisaniyasi nyuuli waAbileni, 2 mumafuku aKayafwasi niamukulumpi wawatupristu Anasi, izu daNzambi denjili kudi Yowanu mwana kaZekariya mwisaña.

3 Dichi wayili munyikala yamuYodana, nakushimwina kudi antu nindi atela kupapatishewa hakwila amwekeshi nawu anabalumuki munyichima kulonda ayanakeni nshidi jawu, 4 neyi chochasonekawu mumukanda wakaprofwetu Isaya nawu: “Kudi muntu wunakubidika mwisaña nindi: ‘Loñeshenu njila yaYehova! Ololenu njila jindi. 5 Yinekineki yejima atela kuyishikila namaseki, mpidi nikapidi-pidi jejima atela kujishikumuna; njila jakonda atela kujolola, njila jamankulokela atela kujiwahisha; 6 nawa antu ejima akamona wamwinu waNzambi.’”*

7 Yowanu watachikili kuleja mazaza awantu enjileña kulonda ayipapatishi kudi yena nindi: “Enu anyana katubandayula, hinyi wunayisoñamishi nindi mutemuki kuzuwa kunakwinza? 8 Dichi, soñenu nyikabu yinakumwekesha nawu munabalumuki munyichima. Bayi mutoñojoka nakuhosha nenu, ‘Tukweti tata yetu Abarahamaku.’ Muloña inakuyileja nami Nzambi nateli kubalumuna awa malola kwikala anyana kaAbarahama. 9 Chalala, chizembi chidi dehi kunyiji yanyitondu. Dichi, mutondu wejima wabulaña kusoña nyikabu yayiwahi akawutema nakuwunatila mukesi.”

10 Nawa mazaza awantu amwihwileña nawu: “Hanu dinu, chumanyi chitwatela kwila?” 11 Yena wayakwileña nindi: “Muntu wukweti yakuvwala yiyedi,* yamwinkihu muntu wunabuli nawa wukweti yakuda niyena yamwinkihu wunabuli.” 12 Akwakutambula nyisonku niwena enjili nawu ayipapatishi, dichi amwihwili nawu: “Ntañishi, chumanyi chitwatela kwila?” 13 Yena wayakwili nindi: “Bayi mutambulaña nyisonku yabadika hamali atoñolawuku.” 14 Mashidika niwena amwihwileña nawu: “Chumanyi chitwatela kwila?” Yena wayakwileña nindi: “Bayi mukabisha* muntu hela kwinka muntu muloña wakutwambaku, ilaña zañalalenuña nawufwetu wenu.”

15 Chelili antu adiña nakutalila Kristu, ejima wawu atachikili kutoñojoka munyichima yawu hadi Yowanu nawu, “Iwu dinu diyi Kristu tahindi?” 16 Yowanu wayakwili ejima wawu nindi: “Ami, nayipapatishaña mumenji, ilaña wambadika ñovu nakwinza nawa hinukutwesha kukasununa nyiya yankwabilu jindiku. Yena wakayipapatisha naspiritu yajila nikesi. 17 Fosholu yindi yakupepa nachu* yidi muchikasa chindi kulonda yatookeshi chikupu heluña hakuhulila nikupompesha tidiku munkalaña yindi, ilaña muzuñu wakawocha nakesi kabulaña kujimawu.”

18 Cheñi, wahosheli mazu amakwawu amavulu akukolesha nawa watwalekelihu kushimwina nsañu yayiwahi kudi antu. 19 Dichi Herodi nyuuli wankambi, chiyamuhoshelimu kudi Yowanu hamuloña waHerodiya ñoda manakwindi nihanyidimu yatama yejima yakoñeliyi Herodi, 20 haniyi nyidimu yatama yejima yakoñeliyi, wakoñelelihu cheñi chumichi: Wamukasili Yowanu mukaleya.

21 Chelili antu ejima anayipapatishi dehi, Yesu niyena amupapatishili. Chalombeleñayi, iwulu denzunukili, 22 nawa spiritu yajila yamwekeneña neyi kapompa* yenjili nakuwila hadi yena, mwiwulu mwafumini izu nadu: “Yeyi Mwanami, inakeña; inatiyaña kuwaha.”