Matewu

13 Hanodu ifuku, Yesu wafumini munodu itala nawa washakamini kuchikumu chakaluñalwiji. 2 Mazaza amaneni awantu apompeli kwadiñayi, dichi wakandamini muwatu nakushakama, ilaña izaza dawantu dejima demeni kuchikumu. 3 Kuhiñahu wayilejeli yuma yayivulu nayakutalilahu,* nindi: “Tiyenu! Mukwakukuwa wayili nakukuwa mbutu. 4 Chakuwileñayi, mbutu jimu jaholokeleli kunsa yanjila, kuhiñahu atuda enjili nakujiida. 5 Mbutu jikwawu jaholokeleli heseki damalola nawa jashikeneni dakumena muloña hadiña maseki antesha. 6 Ilaña itena* chidashikili mwiwulu, mbutu jababikili nawa jomini muloña hijadiña nanyijiku. 7 Mbutu jikwawu jaholokeleli munyiña, nyiña chiyakulili yakañesheli mbutu kukula. 8 Ilaña mbutu jikwawu jaholokeleli hamaseki amawahi nawa jatachikili kusoña nyikabu, iji 100, jikwawu 60, jikwawu 30. 9 Dichi muntu wukweti matu, yatiyi.”

10 Dichi atumbanji enjili nakumwihula nawu: “Muloñadi chiwahoshelaña nawu nayakutalilahu?” 11 Wayakwili nindi: “Enu anayinki kashinshi kakwiluka yuma yajila yakujinda yaWanta wamwiwulu, ilaña wena anayinki wanyi. 12 Muloña muntu wejima wukweti, akamwinkelahu jikwawu nawa wakekala najajivulu; ilaña muntu wejima wunabuli, nichikwetiyi akamutambulachu. 13 Dichi chankojejaña nihosheña nawu nayakutalilahu; muloña kutala atalaña, ilaña hiyamonañaku, kutiya atiyaña, ilaña hiyatiyililaña hela kwiluka muchatalishaku. 14 Wuprofwetu waIsaya wunakushikijewa hadi wena. Wahosha nawu: ‘Kutiya mwakatiya, ilaña himwakeluka muchatalishaku, kutala mwakatala, ilaña himwakamonaku. 15 Muloña nyichima yanawa antu yinachinchiki nawa anatiyi namatu awu, ilaña anadiwuli, anajiki mesu awu kulonda abuli kumona namesu awu nikutiya namatu awu nakwiluka muchatalisha munyichima yawu kulonda abalumuki niyuuki.’

16 “Hela chochu, enu mudi namuzañalu muloña mesu enu amonaña nimatu enu atiyaña. 17 Muloña inakuyileja chalala nami, atuprofwetu amavulu niantu aloña afwilileña kumona yuma yimunakumona enu, ilaña hiyayimweniku, cheñi afwilileña kutiya yuma yimunakutiya enu, ilaña hiyayitiyiliku.

18 “Ichi dinu tiyenu mwatalisha chakutalilahu chamuntu wakuwili mbutu. 19 Muntu wejima watiyaña mazu aWanta ilaña kwiluka muyatalisha nehi, watama wenzaña nakusompola* mbutu jinakuwiwu mumuchima windi; iji dijaholokeleli kunsa yanjila. 20 Hakwila mbutu jaholokeleli heseki damalola, diyi muntu watiyaña mazu nawa hohenohu hakuyitambwila namuzañalu. 21 Hela chochu, hakweti nyijiku ilaña watwalekañahu hakapinji kantesha nawa neyi yamona lukadi hela ikabisha hamuloña wamazu, washikenaña dakuleka kukuhwelela mazu. 22 Ilaña mbutu jaholokeleli munyiña, diyi muntu watiyaña mazu, ilaña kwakama kwanshakaminu yamakonu* niñovu yakudimbana kwamaheta jikukañesha mazu nawa akuleka kusoña nyikabu. 23 Ilaña mbutu jaholokeleli hamaseki amawahi, diwu antu atiyaña mazu nakwiluka muyatalisha nawa asoñaña nyikabu, iwu 100, mukwawu 60, mukwawu 30.”

24 Wayilejeli chakutalilahu chikwawu nindi: “Wanta wamwiwulu anateli kuwufwanisha namuntu wakuwili mbutu yayiwahi mwiha dindi. 25 Henohu antu achidi akama, chilumbu chindi wenjili nakukuwa matahu* mukachi katidiku yaya nikuya. 26 Chameneni tidiku nakusoña, matahu niwena amwekeni. 27 Dichi anduñu enjili kudi mwanta wetala nakumwila nawu, ‘Mwanta, komana hiwakuwili mbutu yayiwahi mwiha deyiku? Hanu dinu matahu anafumi kudihi?’ 28 Wayilejeli nindi, ‘Chilumbu chami diyi wuneli chumichi.’ Anduñu amwilili nawu, ‘Komana wunakukeña tuyi nakuyibwitamu?’ 29 Yena wayakwili nindi, ‘Inehi, muloña hakubwita matahu mwakenda kabwitila kumu nitidiku. 30 Jilekenu jejima jikulili hamu kushika nimpinji yakwaañula nawa muchilaaka chakwaañula, nakaleja akwakumuna nami: Sambilenu kukuñwija matahu muyikasi muyita hamu kulonda ­muyochi; kuhiñahu mupompeshi tidiku nakuyisha munkalaña.’”

31 Wayilejeli chakutalilahu chikwawu, nindi: “Wanta wamwiwulu wudi neyi luchacha lwamositadi* lwatumbiliyi muntu mwiha dindi. 32 Kafwampi hiluchacha lwakehelamu hanchacha jejima, ilaña neyi lunakuli dehi, lwatohaña nakwikala mutondu nawa lwabadikaña nyitondu yatumbañawu yamafu ejima adañawu nawa atuda amuluzwizu enzaña nakushakama hanyitayi yindi.”

33 Wayilejeli chakutalilahu chikwawu nindi: “Wanta wamwiwulu wudi neyi iluñi danoneliyi mumbanda nakudibomba namabañu asatu awuña walembuluka sampu nichavuvumukili chikanka chejima.”

34 Yesu walejeli mazaza awantu yuma yejimiyi nayakutalilahu. Mwamweni, hahosheleña nawu chakadi chakutalilahuku, 35 kulonda mazu ahosheleliwu kuhitila mudi kaprofwetu ashikijewi, wahosheli nindi: “Nakayileja nayakutalilahu; Nakashimuna yuma yajindiliwu kufuma haaliliwu chikuku chakaayi.”*

36 Chapalañesheliyi mazaza awantu, wayili nakwiñila mwitala. Atumbanji twindi enjili nakumwila nawu: “Tulumbulwili mwatalisha chakutalilahu chamatahu ameneni mwiha.” 37 Wayakwili nindi: “Mukwakukuwa mbutu yayiwahi diyi Mwana kamuntu; 38 iha hikaayi. Hakwila mbutu yayiwahi, hiyanyana kaWanta, ilaña matahu diwu anyana kawatama, 39 nawa chilumbu wayikuwili diyi Diyabolu. Kwaañula dikukuma kwanshakaminu yamakonu,* nawa akwakumuna hiyañelu. 40 Dichi, neyi chochakuñwijañawu matahu nakuyocha mukesi, dichichakekala nikukukuma kwanshakaminu yamakonu.* 41 Mwana kamuntu wakatemesha añelu jindi nawa akakuñwija nikufumisha muWanta windi antu ejima* aleñelaña akwawu kuvulumuna niantu akoñaña yakuluwalala, 42 nawa akayinatila muluteñu lwakesi. Mwenomu dimu mwakadililañawu nikudisumona kumazewu. 43 Hanoyu mpinji aloña akatoñeka chikupu neyi itena* muWanta waTata yawu. Dichi muntu wukweti matu, yatiyi.

44 “Wanta wamwiwulu wudi neyi iheta daswekawu mumpata dawaniniyi muntu hakudisweka; nawa hamuloña wamuzañalu, hakuya nakulandisha yuma yejima yikwetiyi nakulanda oyu mpata.

45 “Cheñi nawa, Wanta wamwiwulu wudi neyi mukwakulanda nakulandulula wendaña wayili nakukeñakeña mperola jajiwahi. 46 Chawaniniyi mperola yimu yasweja kulema wuseya, hohenohu wayili nakulandisha yuma yejima yadiñayi nayu nakuyilanda.

47 “Cheñi nawa, Wanta wamwiwulu wudi neyi kaleñi kekokela kalalumwininiwu mukaluñalwiji nakukwata inshi yeñi-nayeñi. 48 Kaleñi chikenzeli, akikokeleleli kuchikumu, chashakaminiwu, asakwilimu inshi jajiwahi nakujisha munyitoña, ilaña jatama ajinatili. 49 Dichi chichakekala nikukukuma kwanshakaminu yamakonu.* Añelu akaambula atama mudi aloña 50 nawa akayinatila muluteñu lwakesi. Mwenomu dimu mwakadililañawu nikudisumona kumazewu.

51 “Komana muneluki munatalishi yuma yejimiyi?” Wena amwakwili nawu: “Eña.” 52 Kuhiñahu wayilejeli nindi: “Chineli muneluki munatalishi yumiyi, ntañishi wejima anatañishiwu haWanta wamwiwulu wudi neyi mwanta wetala wafumishaña yuma yayiha niyayikulu mwahembelañayi maheta indi.”

53 Yesu chamanishiliyi kuhosha iyi yakutalilahu, wafumini kwenoku nakuya. 54 Dichi chashikiliyi mwiluña damumukala wawu, watachikili kuyitañisha musinagogi yawu chakwila ahayamini nankashi nakuhosha nawu: “Indi iwu muntu wafumishili kudihi awa maana nawa hinyi wamwinkeli ñovu yakukoña iyi nyidimu yañovu? 55 Komana iwu hidiyi mwana kamukwakusoñaku? Mama yindi hidiyi Mariyaku nawa anakwindi hidiwu aYakoba niYosefu niShimona niYudaku? 56 Nawa ahelindi ejima, hitwashakamaña nawu kunuku? Hanu dinu, kudihi kwafumishiliyi yuma yejimiyi?” 57 Dichi akaanini kumukuhwelela.* Ilaña Yesu wayilili nindi: “Kaprofwetu amulemeshaña kwacheñi, hakwila mwiluña damumukala wawu nimwitala dindi hiyamulemeshañaku.” 58 Nawa hakoñeli nyidimu yayivulu yañovu kwenokuku, muloña hiyadiña nachikuhweleluku.