CHIBALU 2
Munzhilanyi Muwunatwesheli Kudiza Walala Hadi Nzambi?
1, 2. Chitalilwinyi chinakulumbulula nawu kunakukeñewa chipimu chakusakwilaku nsañu yakwitiya?
MUNZHILANYI mutunatwesheli kumwilukila Nzambi? Chatela kwikala chaswayi kushinshika hantañishilu yakwitiya kwezhima? Hichaswayiku. Hela chakwila tunatweshi kwila mwenimu, tukwiluka ñahi netu ntañishilu yimu hohu diyi yalala?
2 Munzhila yoyimu, kushinshika hakwambuka kwantañishilu yezhima hadi Nzambi, twatela kukeña nzhila yakwilukilamu chalala, yalumbuluka yatela kwitezhawu kudi antu. Chakutaliluhu: Twili netu kunediki ntadi hachisankanu hansañu yakuleha kwehina. Mukwakulandisha nindi idi ihina dadilehi mamita asatu, ilaña mukwakulanda nindi hidatela kushikila mumamita asatuku. Hanu dinu anateli kumanisha ñahi iyi ntadi? Atela kuyimanisha kuhitila mukuzatisha chipimu chakupiminaku.
3. Muloñadi chasonekeleliwu Bayibolu?
3 Kwekalahu chipimu chakupiminaku chashikila, chakusakwilaku nsañu zhakwitiya? Eña, hiBayibolu. Nzambi wakeñeli nindi Bayibolu yisonekewi kulonda antu kwezhima atweshi kudiza walala windi. Yihita nayihita yanyikanda yinasonekewi. Yinatuntulewi yezhima, hela muyikunku yakubadika hanyichidi 2,100. Kwakwihi namuntu wudi wezhima natweshi kutaña walala waNzambi mumuchidi windi yomweni.
4. Mazwinyi awanikaña muBayibolu?
4 Bayibolu hichawana chaswezha wuseya kufuma kudi Nzambi. Yalumbululaña yuma yimu oyu yitwabula nikwiluka. Yatulezhaña hadi owu ashakamaña muwanta wawaspiritu. Yalumbululaña yitoñozhoka yaNzambi, wuntu windi, ninkeñelu yindi. Yatulezhaña chazatiliyi nawantu makombakazhi anyaka kunyima. Yashimunaña hayuma yamba kamwekana kumbidi. Nawa yamwekeshaña ochitwatela kuwana nzhila yaya kuwumi wahaya nyaka.
Muloña Yiwunatwesheli Kukuhwelela Bayibolu
5. Chitalilwinyi chinakumwekesha nawu Bayibolu yaditezhaña nasayansi?
5 Kudi nyiloña yayivulu yatukozhezhaña kukuhwelela kwila nawu Bayibolu chalala Hiizu daNzambi. Muloña watachi wudi wakwila nawu Bayibolu yendelaña hamu nasayansi. Mpinji yakunyima antu kunyeñumuka kaayi kezhima atoñozhokeleña nawu iseki dashindamena hachuma. Chakutalilahu, antu Akumuzhika waAfrica akuhweleleli nawu iseki adikwata kudi kapela wamapinji, wudi namapinji akushika ku 3,500 hewulu, nimapinji 3,500 heshina deseki. Kwesekezha nachahoshaña sayansi, nsoneki yaBayibolu mukuhita kwa nyaka 3,500 wasonekeli nindi Nzambi “wakudikaña iseki hamukunkulwayi.”—Yoba 26:7.
6. Kulumbululanyi kweneni kunakumwekesha nawu Bayibolu yafuma kudi Nzambi?
6 Kulumbulula kwabadika kwakwila nawu Bayibolu mwamweni yafuma kudi Nzambi, hinsonekelu yachu yoloka hakushimwina dekulu yuma yamba kamwekana kumbidi. Kwambukaku nawantu akwakuhoña, Nzambi weluka chikupu zhakumbidi; yuma yezhima yahoshañayi yamwekanaña.
7. Mawuprofwetwinyi amuBayibolu owu ashikizheweli mumpinji yakunyima?
7 Mawuprofwetu amavulu amuBayibolu ashikezheweli mumpinji yakunyima. Chakutalilahu, mukuhita kwa yaaka 700, Bayibolu yahosheli choloka nawu Yesu wakasemuka mumukala waBetelemi, mwamweni dimu chamwekeneni. (Mika 5:2; Matewu 2:3-9) Kubombelahu hamawuprofwetu amakwawu ahoshaña hadi Yesu, Bayibolu yashimwinini dekulu nawu Yesu wakavwalika kudi muzhiki, nkumininaku akamufukezha namali asiliva makumi asatu. Mawuprofwetu wenowu niwena ashikizheweli. Mwamweni, kwosi muntu niwumu wunatweshi kushimuna yuma yamuchidiwuku!—Isaya 7:14; Zekariya 11:12, 13; Matewu 1:22, 23; 27:3-5.
8. Mawuprofwetwinyi amuBayibolu amakwawu anakushikizhewa makonu, nawa amwekeshañadi?
8 Mawuprofwetu amavulu amuBayibolu anakushikizhewa mumpinji yetu. Hanu hadi hohu mawuprofwetu antesha:
“Muza wakanyamuka nakulwa namuza wukwawu [nzhita], wanta nawanta wukwawu. Kwakaholoka nyitentanshi yayeni, ninzala, niyipupu kwacheñi nakwacheñi.”—Luka 21:10, 11.
Kwakela “kuvula [kwa]kuluwa.”—Matewu 24:12.
“Kumafuku akukuminina . . . antu akekala akwakudikeña, akwakufwila mali, . . . abulaña kwovwahila anvwali zhawu, . . . abulaña kudihemba, aswezha kuzuwa, abulaña kukeña yayiwahi, . . . akwakuditohesha, antu akeñaña yakuditiyisha aweni kuwaha, kukeña Nzambi nehi.”—2 Timotewu 3:1-5.
Komana hiwunetezhi neyi iyi yuma yinakumwekana makonuku? Walala nikwoloka kwawuprofwetu wamuBayibolu kwamwekeshaña nawu Bayibolu hiyidi neyi mukanda wudi wezhimaku. Hizu donenawu naspiritu yaNzambi!—2 Timotewu 3:16.
Komana Bayibolu Ayihimpa?
9, 10. Chumanyi chinakumwekesha nawu Nzambi hetezha antu kuhimpa Bayiboluku?
9 Toñozhokaku neyi yeyi wadiña mwini fakitoli, walamikili ndandanda hachipapilu chidi nanshimbi kulonda ankoñi zheyi alondeleña. Hanu neyi chiluwañimbi wumu wahimpili zhina nshimbi zhiwasonekeli, chumanyi chiwatela kwila? Komana hiwatela kuhimpa hana hanahimpiyiku? Munzhila yoyimu, Nzambi hetezha muntu niwumu kuhimpa walala Wezu dindi, Bayiboluku.
10 Antu amakwawu esekeli kuhimpa ntañishilu Yezu daNzambi hiyatwesheliku. Neyi tukwesekezha Bayibolu yitudinayu makonu nanyikanda yaBayibolu yakushankulu, hitukuwanahu chambuku. Ichi chinakumwekesha nawu mukuhita kwanyaka, Bayibolu hiyayihimpaku.