Ntachikilu

Kudi Antu Amukeña Yehova

Yesu wahosheli nindi: “Mukwiluka nsañu yalala, ninsañu yalala yikuyifumisha muwuduñu.” (Yowanu 8:32) Awa mazu atukoleshaña chikupu. Eñañi, hela chakwila tunakushakama munanu mafuku akala ‘akukuminina’ munavuli nsañu jakutwamba, tunateli kwiluka chalala. (2 Timotewu 3:1) Komana mwanukaña mpinji yatachi yimwelukili chalala chashimunawu Mwiizu daNzambi? Wenowu muzañalu wumwatiyili!

Neyi chochalema kwiluka chikupu chalala chansañu yalala nikuleja antu chalala mpinji yejima, twatela cheñi kukakela kuchalala. Hakwila twili mwenimu, twatela kushakama mukukeña kwaNzambi. Yumanyi yinakukeñeka hakwila tushakami mukukeña kwaNzambi? Mazu ahosheliyi Yesu nawufuku henohu kanda yofwi anakuli ilu lwihu. Walejeli apostolu indi ashinshika nindi: “Neyi mukuhemba munayilejaña mukushakama mukukeña kwami; neyi chinahembañami mwanlejañawu kudi Tata yami, nashakamaña mukukeña kwindi.”—Yowanu 15:10.

Yesu washakamini mukukeña kwaNzambi kuhitila mukuhemba mwamulejeleñawu kudi Tata yindi. Anetu nawa dichitwatela kwila makonu. Hakwila tushakami mukukeña kwaNzambi, twatela kuzatisha chalala muchihandilu chetu chejima. Hawowenana melela, Yesu wahosheli nindi: “Neyi muneluki yumiyi himukuyila, munakooleki.”—Yowanu 13:17.

Dichi tunakuhweleli chikupu netu wunu mukanda wukuyikwashaku kutwalekahu kuzatisha chalala muchihandilu chenu nawa chikuyikwasha kushakama “mukukeña kwaNzambi, nakutalila . . . wumi wahaya nyaka.”—Yuda 21.

Izaza Dalombolaña dawaYinsahu jaYehova