January

Kunyeñumuka kaayi kejima ankoñi añinza awana neyi muyipompelu yayivulu mudi kukankila kweneni kutalisha hakudizisha amanakwetu atwansi niakulumpi kulonda ashikuhu hakuhemba nyikoku. Chumichi chinateli kuleta kukala kweneni. Muloñadi? Neyi mudi aeluda akwaKristu, chakadi nikujina, mweluka nenu kudizisha antu amakwawu hichuma chalema. Mweluka nenu amanakwetu amavulu anakukeñeka kulonda akwashi mudimu wakuhemba yipompelu kwikala yakola kuspiritu nikukwashaku yipompelu yayiha yinakutuñewa. (Isa. 60:22) Mweluka cheñi nenu Izu daNzambi dayikonkomwenaña ‘kudizisha akwenu.’ Hela chochu chinateli kuyikalila kwila mwenimu. Chineli mwakamenaña chisaka chenu, mudimu wakumujimba, nyidimu yamuchipompelu niyuma yikwawu yamwekanaña mukukasumwisha, chinateli kuyikalila kuwana mpinji yakudizisha amakwawu muchipompelu. Ilaña kudizisha kunakukeñeka kulonda azatileña hamu nyidimu yachipompelu. Neyi chumichi chizatika antu ejima muchipompelu akuhetelamu. w15 4/15 1:2, 3

Manakwetu wunatondiwu katataka watela kutoñojoka wanyi nindi chamwinkawu hohu kuzata nyidimu muchipompelu, watela kushikena dakuhimpa yuma kulonda yazateña munjila yambukaku nachazatileñawu akwawuku. Ilukenu nenu hiyenu mwatela kuhimpa yuma kulonda mwili chimunakukeñaku, ilaña chipompelu dichi chatela kuhimpa yuma kwesekeja nanshimbi yahanaña kuloñesha kwaYehova. Dichi neyi anayitondi, mwatela kukolesha akwenu akwakwitiya nikulemesha aeluda akuluka yitembi kuhitila mukutwalekahu kuzatisha nsañu yamuBayibolu yayilejeluwu. Chakadi nikujina, chimweluka yuma munateli kudikwasha nawakwenu hakuhimpa yuma yinateli kukwasha chipompelu kwendela hamu nakuloñesha kwaYehova. Mukuhita kwampinji Yehova nateli kuyikwasha enu ejima atudizi ashinshika kukoña yuma yamaneni kubadika antañishi jenu.—Yow. 14:12. w15 4/15 2:17

Neyi mudi mukukala kwakweni, munateli kutiya neyi chatiyiliyi Pawulu watiyili neyi kwiji wudi kwakwihi ‘nakanwa kamutupa.’ (2 Tim. 4:17) Hampinji yamuchidiwu chalema nankashi kumukuhwelela Yehova. Chakutalilahu, twili netu munakuhemba ntaña yenu wunakuyekela nayikatu. Hadaha munalombi nenu Nzambi yayinki maana niñovu. Neyi mwila yuma yejima yimwatela kwila kwesekeja nakukala kumukweti, komana himunateli kwikala nakuwunda neyi mwiluka nenu mesu aYehova adi hadenu nawa wukuyikwasha kulonda muumiki? Kudi yuma yinateli kuyileñela kumona neyi Yehova nakuyikwasha wanyi. Andotolu anateli kuyileja nsañu jashiyashana. Hamwaha antaña jenu imwakuhwelela nenu akuyikundeja anateli kuleñela yuma yiyikalili. Twalekenuhu kulomba kudi Yehova kulonda yayikoleshi. Twalekenuhu kukundama kwakwihi nayena. (1 Sam. 30:3, 6) Neyi ayikwasha, wubwambu wenu naNzambi wukukola. w15 4/15 4:10, 11

Chineli twekala ambuña aYehova, hitwekala hakachi kanawa adimbañawu nawu Satana kwosi. Tweluka netu Diyabolu wekala kwoku, muloña Satana diyi wahosheli naEvu kuhitila mudi kapela. (Kutach. 3:1-5) Satana wamusawili Yehova hansañu yaYoba. (Yoba 1:9-12) Satana diyi wafwilileña kumweseka Yesu. (Mat. 4:1-10) Hanyima yakuvwalika kwaWanta waNzambi mu 1914, Satana diyi watachikili ‘kwasa njita’ nawashalahu awayishewa. (Chim. 12:17) Iyi njita yatwalekeluhu muloña Satana wafwilaña kukisa chikuhwelelu chawakwaKristu ashalahu a 144,000 nianyikoku acheñi. Hakwila tushindi ndombu, twatela kudikaña naSatana nikutwalekahu kwikala nachikuhwelelu chakola. Satana wadinka wanta chikupu. Kafwampi kudinka wanta diku kwaletesheli chileñaleña wumu wakuspiritu kwikala wahamuka hakwila yadikañi nachiyuulu chaYehova kulonda niyena yekali nzambi halwindi. Hakwila tudikañi naSatana twatela kuleka kudinka wanta nakwikala adizoza.—1 Pet 5:5. w15 5/15 2:3, 4

Etu akwaKristu atukoleshaña kufwikija hachihandilu chetu chakushakama mwiwulu hela hamaseki. Komana munateli kufwikija munakudiluñisha yuma yatukanayi Nzambi? Kutoñojoka chikupu hayuma yimwakela neyi Nzambi nashikiji dehi yuma yakanayi, chakadi nikujina chayizañaleshaña. Hadaha ‘mwadimonaña’ munakushakama hamaseki haya nyaka. Toñojokenu chimwakatiyañanaña nawakwenu hakubalumuna dinu iseki kwikala paradisa. Antuñi nenu akamukeña Yehova neyi chimwamukeña enu. Mwakola kumujimba, mudi nañovu nawa kwosi chuma chimunakwakamena. Munakudiluñisha muloña antu anakulombola mudimu wakuwahisha iseki anakuyakamena chiwahi. Nawa munakutiya kuwaha kuzata mudimu wumweluka muloña yuma yejima yimunakuzata yinakukwasha antu amakwawu nikulemesha Nzambi. Chakutalilahu, munakukwasha amaha akasañulawu kulonda amwiluki Yehova. (Yow. 17:3; Yil. 24:15) Neyi munakufwikija yuma yamuchidiwu, himunakulotaku. Yumiyi yikashikijewa muloña Bayibolu yahosha hayuma yikamwekana kumbidi.—Isa. 11:9; 33:24; 35:5-7; 65:22. w15 5/15 3:15

Yesu wayinkeli vinyu yayiwahi yayivulu muchihayamisha yakuwanina antu ejima apompeli. (Yow. 2:6-11) Chelili Diyabolu yamweseki Yesu nindi yabalumuni malola kwikala mankendi, Kristu wakaanini kuzatisha ñovu jindi jachihayamisha kulonda yaditiyishi kuwaha. (Mat. 4:2-4) Ilaña wazatishili ñovu jindi kulonda yakwashi antu adiña nakukaankila. Tunateli kwimbujola ñahi yililu yayiwahi yaYesu? Yesu wakolesheli ambuña Nzambi nindi ekali nachaaku ‘chakuhana.’ (Luka 6:38) Komana tunateli kumwekesha chililu chachiwahi chakuhana kuhitila mukutambika antu kumatala etu nakudiila hamu yakudya yakumujimba hela yakudya yakuspiritu? Komana tunateli kuzatisha mpinji yetu hanyima yakupompa kuhitila mukukwasha muntu wunakukeña wukwashu, chidi neyi kumutiyilila manakwetu wunakuhituluka mumpanji yindi? Tunateli kukwasha ñahi antu anakukeña kuyidizisha chakushimwina mumudimu wamwiha? Twamwekeshaña netu tunadizili kudi Yesu kuhitila mukwikala namuchima wakuhana yuma yakumujimba niyakuspiritu kudi akwetu kwesekeja nahanakumini ñovu jetu. w15 6/15 1:3, 4, 6

Neyi tuhemba kashinshi ketu kawakwaKristu, tunateli kumona chihayamisha cheneni chahaya nyaka chakupuluka kulukadi lweneni. Katataka hanyima yanjita yaAmagedoni, kukumwekana yihayamisha yayivulu yidi neyi yakwinka antu nyijimba yayiwahi. (Isa. 35:5, 6; Chim. 21:4) Fwikijenu munakutala antu anakunata malolu, nyikombu, makinga awayifwayi, tuyuma twakwashaña antu kutiyisha chiwahi niyuma yikwawu. Antu akapuluka haAmagedoni akekala nanyidimu yayivulu yakuzata. Akatiya kuwaha kubalumuna iseki, chawana chatwinkayi Nzambi kwikala paradisa. (Mas. 115:16) Yesu chayuukileñayi antu kunyima, chumichi chakoleshaña ‘amwizaza deneni’ makonu nawa akweti muzañalu wakuchiñeja nawu akayuuka yikatu yawu yejima. (Chim. 7:9) Muloña wakuuka antu, Mwana kaNzambi wawedi wamwekesheli nindi wakeña antu chikupu. (Yow. 10:11; 15:12, 13) Luwi lwaYesu lwamwekeshaña Yehova chakamenañayi ambuñindi ejima.—Yow. 5:19. w15 6/15 2:16, 17

Mu 1914, kwavulumukili njita hakachi kanyunza yamuEurope, iyi njita yatandili nakuwanina kaayi kejima. Iyi njita chiyamanini muchaaka cha 1918, yaleteli nzala yakapwelendendi nichipupu chatenañawu nawu flu chajahili antu amavulu kubadika ninana afwili kunjita. Dichi “chinjikijilu” chashimwiniyi Yesu chakumwekesha kwinza kwindi kwakadi kumona namesu neyi Mwanta wamuha wahamaseki chatachikili kushikijewa. (Mat. 24:3-8; Luka 21:10, 11) Wunsahu wawuvulu washimunaña nawu Mwanta Yesu Kristu ‘amwinkeli chibaaba’ muchaaka cha 1914. “Hakuya nakwimika mushindu kulonda nawa akemikaña mushindu ho-o.” (Chim. 6:2) Wawahishili mwiwulu kuhitila mukulwa njita naSatana niandemoni jindi anatililuwu hamaseki. Kufuma tuhu hayina mpinji, antu eluka chalala chanawa mazu onenawu adi munsona yalelu. w15 6/15 4:13

Chimwahitili kwakwihi nayaaka nkulakaji hanyima yakwila chipompelu chawakwaKristu anachituñi dehi, akwakusekesha atachikili kumwekana neyi chiyashimwineñahu dehi. (Yil. 20:28-30; 2 Tesa. 2:3, 4) Chimwahitili yaaka, chakalili nankashi kwiluka antu alala amukalakeleleña Nzambi hatembeli yindi yakuspiritu. Mwahitili yaaka yayivulu chikupu hakwila Yehova yazatishi Yesu Kristu hakumwekesha antu aweni amukalakelaña Nzambi. Chashikili chaaka cha 1919, antu atondeluwu kudi Yehova nawa azatilileña hatembeli yindi yakuspiritu ayilukili chiwahi. Ayitookesheli kuspiritu kulonda Nzambi yeteji nyidimu yawu yamukalakeleleñawu. (Isa. 4:2, 3; Mal. 3:1-4) Dikwila nawu chimwahitili makombakaji ayaaka, yuma yamweniyi kapostolu Pawulu muchimwenu yatachikili kushikijewa chovu-chovu. Chimwenu chaPawulu achilumbulula hamukanda wa 2 Akorinda 12:1-4. Yuma yamweniyi Pawulu muchimwenu chabadika ayitenaña nawu chimwekeshu. Mwabombela yuma yikamwekana kumbidi, bayi neyi yuma yadiñaku mumafuku induku. w15 7/15 1:6-8

Komana chumichi chaya mukwila nawu awayishewa “akayisenda nakuya muluzwizu”? Antu amavulu amuKristendomu akuhwelela iyi ntañishilu, yakwila nawu akwaKristu akayisenda munyijimba yawuntu kufuma hamaseki. Kuhiñahu, akuhwelela nawu akamumona Yesu chakenzayi nakuyuula hamaseki. Hela chochu, Bayibolu yashimuna hatooka nawu “chinjikijilu chaMwana kamuntu” chikamwekana mwiwulu nawa nawu Yesu wakenza “hamavu amwiwulu.” (Mat. 24:30) Mazu ejima awa amwekeshaña yuma yakamonewaña. Kubombelahu, ‘mashi nimujimba hiyakutwesha kuswana Wanta waNzambuku.’ Dichi antu akaya mwiwulu atela kusambila ‘kuyibalumuna hohenohu, mukulabula kwadisu, hampuña yakukuminina.’ (1 Kor. 15:50-53) Hela chakwila hitwazatishaña mazu akwila nawu ‘kuyisenda nakuya muluzwizuku’ muloña akundama kuntañishilu yakutwamba, awayishewa ashinshika akayipompesha hamu neyi mukulabula kwadisu. w15 7/15 2:14, 15

Itala daWanta hiluña mwabulakenañawu antu amuchituñilu nakudifukula kudifukula kwalala. Hakachi kayuma yatuloñeshelayi Yehova yakoleshaña wubwambu wetu nayena, hikupompa kwamulungu nimulungu Hetala daWanta. Dihu hitwatambwilaña yakudya yalema yakuspiritu niwunlomboli wafumaña mukuloñesha kwindi. Hela chakwila tukweti kukooleka kwakututambika nakudya ‘kumesa yaYehova,’ bayi tumona iwu mutambi netu wamukunkulwayuku. (1 Kor. 10:21) Yehova wamonaña iyi mpinji yakudifukula nikudikolesha nindi yalema, dichi chaletesheli yamoneni kapostolu Pawulu kutukolesha nindi bayi tuleka kupompaku. (Heb. 10:24, 25) Komana tunateli kumwekesha kalemesha kudi Yehova neyi tujiña kukupompa kwawakwaKristu chakadi nyiloña yatelela? Kafwampi, tunateli kumwekesha netu twamusakililaña Yehova hama nikuloñesha kwindi kuhitila mukuloñesha chiwahi nikwakulañahu hakupompa chakufuma hamuchima. w15 7/15 4:3, 4

Iku kusoñamisha kwakuwahi chineli Yesu watulejeli kwila mwenimu, twatela kutwalekahu nakuchiñilila. Muniyi nsañu, kuloñesha kwaYehova kwatwimikila chakutalilahu chachiwahi. Nyikanda yamukuloñesha yatukonkomwenaña mpinji yejima nawu ‘tutalileña nikukeña nankashi chakenza ifuku daNzambi’ nikuchiñeja ituña dadiha datukanayi Nzambi. (2 Pet. 3:11-13) Hela chakwila akwaKristu akushankulu ateleleli kuchiñilila, chumichi chalema nankashi kudi etu makonu. Muloñadi? Muloña tunakushakama mumufuku akwinza kwaKristu. Chinjikijilu chakwinza kwindi chatachikili kumwekana kufuma tuhu mu 1914. Nawa chinjikijilu chikweti yuma yayivulu chinabombelimu yuma yamukaayi yinakutaminaku nimudimu wakushimwina Wanta mukaayi kejima, yumiyi yinakumwekesha nawu tunakushakama ‘kumakumishilu anyaka yamakonu.’ (Mat. 24:3, 7-14) Chineli Yesu hashimwini kuleha kwampinji yikahitahu henohu kukuma kanda kwinzuku, twatela kwikala ababala nawa anakutona. w15 8/15 2:4, 5

Mwituña dadiha, twakazañalala muloña akatwinka cheñi yuma yakuspiritu yitwakeñaña. (Mat. 5:3) Twakatwamijañaku nyidimu yakuspiritu nawa twakamwekeshaña netu twatiyaña kuwaha nankashi kumukalakela Yehova. Neyi tutwamijañaku yuma yakuspiritu makonu, tunakudiloñesha hawumi walala chikupu wudi kumbidi. (Mat. 6:19-21) Tunateli kusweja ñahi kuzañalala hakumukalakela Nzambi? Njila yimu, hikwikala nayikonkwanyi yakuspiritu. Neyi mudi atwansi nawa munakutoñojoka chikupu kumuzatila Yehova, komana kwila mutoñojoka hansañu yashiyashana yasonekawu munyikanda yetu yakundama kumudimu wampinji yejima kulonda mutonduhu njila yimu nakwimika chikonkwanyi, nehi? Munateli kuhanjeka nawantu anazati yaaka yayivulu mumudimu wampinji yejima. Neyi muzataña nañovu mumudimu wakushimwina, dikwila nawu munakudiloñesha kutwalekahu kuzata nyidimu mwituña dadiha daNzambi mwakayidizishawu kuzata nyidimu yalema yaNzambi. w15 8/15 3:13, 14

Nyikabu yikwawu yamukabu wakuspiritu—yidi neyi kwovwaha, kudihemba nikudiwunjika—niyena yakwashanaña. (Ŋal. 5:23) Iyi yililu yinateli kumukwasha mukwaKristu wapama kuumika kukala chakubula kuhila nikuumika yuma yatama yinamumwekeni chakadi kujiyisha chikuhwelelu chindi. Hakudiza nkawindi, mukwaKristu wapama wasandujolaña yishina yamuBayibolu yinateli kumukwasha kwiluka yuma yayiwahi niyatama. Kuhiñahu, neyi yazatisha chinleji chindi chafumbewa naBayibolu, wukufuukulaña chiwahi. MukwaKristu wapama wekala wadizoza, dichi weluka nindi yitoñojoka yindi yalema wanyi kubadika wunlomboli waYehova ninshimbi jindi. Washimwinaña nsañu yayiwahi neyena nawa wazataña nañovu kulonda yakwashi chipompelu kwikala chanuñañana. Hela chakwila tunamuzatili Yehova yaaka yayivulu, twatela kudihula netu: ‘Kuduhu yuma yinatela kuleka kulonda nimwimbujoli Yesu chikupu? Kuduhu yuma yinatela kuzatilahu?’ w15 9/15 1:6, 7

Atumbanji amakwawu amweni Yesu nakwenda Hejiya daÑalaliya. Petulu wamutambikili Yesu, wamwilili Yesu nindi nleji ninzi kuwudi. Yesu chamulejeliyi Petulu kuya kwadiñayi, wafumini muwatu nakuya. Hashimbwili wanyi, Petulu watachikili kunekama. Muloñadi? Muloña watalili mankanda nimpepela dichi watiyili woma. Petulu wabidikili kulonda amukwashi, dichi Yesu wamukwatili nawa wamulejeli mazu adi hewulu. (Mat. 14:24-32) Petulu wadiña nachikuhwelelu chakola. Muloñadi wutunahosheli mwenimu? Yesu chamwitejeliyi, Petulu wafumini muwatu nawa watachikili kwenda hamenji. Wakuhweleli nindi Nzambi wukumwinka ñovu yakwenda hamenji neyi chenkeliyi Yesu. Munjila yoyimu, chatwililiyi Yesu kwikala atumbanji twindi, twadihanini kudi Yehova nawa twapapatisheweli. Muloñadi? Muloña twamukuhweleleli Yehova niYesu nawa twelukili chikupu netu akatukwasha.—Yow. 14:1; 1 Pet 2:21. w15 9/15 3:1, 3

Tata yawantu wukweti kukeña wakiñaña chisaka chindi kuwubanji. Dichelañayi Tata yetu wamwiwulu, Yehova. Toñojokenu hanichi chuma: Neyi chochimwakiñaña mesu enu muloña alema, Yehova niyena wanyakalaña kukiña antu jindi muloña alema kudi yena. (Zek. 2:8) Ilaña ambuña aYehova amakwawu chidi neyi Stefwanu niamakwawu afwili muloña wakashinshi kawu. Mpinji yikwawu Yehova wakañeshaña wanyi yuma yamuchidiwu kumwekana. Ilaña wakiñaña antu jindi hamu neyi izanvu kuhitila mukuyisoñamisha njila jinateli kuzatishayi Satana kuyidimba. (Efwes. 6:10-12) Twawanaña iku kusoñamisha muBayibolu nimunyikanda yasonekaña kuloñesha kwaYehova. Chakutalilahu, twadizaña wubanji wakuzatisha Intaneti, kukeña mali nimafilimu, nyikanda niyisela yamwekeshaña yuma yatama. Mwamweni Yehova watukeña nawa watukiñaña. w15 9/15 4:15, 17

Yehova nakwashi cheñi antu jindi kuhakwilaku nsañu yayiwahi. (Fwi. 1:7) Chakutalilahu, nfulumendi chiyatulekesheluwu mudimu wakushimwina, twadihakwililuku muchota. Kufuma mu 2000, tunayiñi nyiloña 268 mukaayi kejima muyota yamaneni nawa hakachi kaniyi nyiloña, nyiloña 24 yadiñaku muchota cheneni chaEuropean Court of Human Rights. Mwalala kwosi wunateli kukañesha chikasa chaNzambi! (Isa. 54:17) Nsañu yayiwahi chiyinatandi mukaayi kejima chinakumwekesha nawu Nzambi nakukwasha antu jindi. (Mat. 24:14; Yil. 1:8) Antu jaYehova akunyuza yejima ekala anuñañana muloña Yehova wayikwashaña. Iku kunuñañana kwambukaku chikupu. Antu abulaña kumuzatila Yehova ahoshaña nawu: “Chalala Nzambi wekala mukachi kenu.” (1 Kor. 14:25) Tukweti wunsahu wawuvulu wunakumwekesha nawu Nzambi wudi nawantu jindi.—Isa. 66:14. w15 10/15 1:13, 14

Bayibolu yatusoñamishaña kubula kuzatisha nankashi yuma yamukaayi. Ichi chinabombelumu kumanishila mpinji yeneni kuyuma yamukaayi. (1 Kor. 7:29-31) Yuma yejima yatama wanyi, ilaña yinateli kutumanishila hohu mpinji. Chakutalilahu, twatiyaña kuwaha kutaña nyikanda, kutala TV, kuya kumaluña amawahi, kulanda yuma nikukeña kwiluka yuma yayiha yinakutuñatuñawu. Amakwawu akeña kuhosha hanshiña, kutuma mamesaji nima e-melu, kutala nsañu yinakumwekana nikutala bola. Ilaña antu amakwawu ateñukaña nayumiyi. (Mukwa. 3:1, 6) Neyi tumanishila mpinji yeneni kuyuma yamukunkulwayi, tukusha wanyi maana kuyuma yalema, dikwila nawu kumukalakela Yehova. (Efwes. 5:15-17) Satana wazatishaña jinjila jajivulu kulonda yatukokoli nayuma yamukaayi nikutuluwañesha kumukalakela Yehova. Dicheliliyi mumafuku awapostolu nawa anu mafuku nasweji. (2 Tim. 4:10) Dichi twatela kulondela kufumba kudi munsona yalelu. w15 10/15 3:7, 8

Manowa nañodindi elukili chikupu nawu akekalahu namwana wanyi. Ilaña ifuku dimu, kañelu kaYehova walejeli ñoda Manowa nindi wukavwala mwana weyala. Ñoda Manowa wazañaleli chikupu! Chamulejeliyi nfumwindi iyi nsañu, watiyili kuwaha hama. Hela chochu, watoñojokeli nankashi chatela kukulishayi mwana neyi navwaliki kwesekeja nachakeñeleñayi Yehova. Adikumudizisha ñahi mwanawu kumukeña Yehova nikumuzatila henohu antu amavulu muIsarela elileña yuma yatama? Manowa wamulembeleli Yehova kutuma cheñi kañelu nawa wahosheli nindi: “Ona muntu waNzambi watemesha, enzi cheñi kudetu atuleji mutwakamwila mwana wakavwalika.” (Ansomp. 13:1-8) Neyi mudi anvwali, muneluki chatiyiliyi Manowa. Ninenu mukweti mudimu wakukwasha anyanenu kwiluka nikumukeña Yehova. (Yish. 1:8) Hakudifukula kwachisaka, yikwashenu kutwalekahu kumwiluka Yehova niBayibolu. Ilaña kudi yuma yikwawu yimwatela kwila kubadika kudiza hohu Bayibolu nawanyanenu mulungu nimulungu. (Kuhit 6:6-9) Yumanyi yikwawu yinateli kuyikwasha kudizisha anyanenu kumukeña Yehova nikumuzatila? w15 11/15 1:1, 2

Hela chakwila munateli kwiluka wanyi yuma yidi munyichima yawantu neyi chelileñayi Yesu, munateli kwikala nakashinshi. Yehova nateli kuyikwasha kumona yililu yayiwahi mudi anyanenu. Neyi mwanenu nayineñeshi, bayi muhosha nenu watama hela nenu hichiluwañimbi. Bayi mumutoñojokela mwenimuku. Ilaña mulejenu nenu mwamonaña yililu yayiwahi yikwetiyi nawa nenu munakuhweleli nenu nakufwila kwila mwaloña. Monenu chinakuzatayi chiwahi nawa muhamekenu. Mukwashenu kulonda yatwalekuhu kwikali nayililu yayiwahi kuhitila mukumwinka nyidimu yakuzata. Dicheliliyi Yesu nawatumbanji twindi. Chimwahitili chaaka chimu nachikunku, Yesu wamwinkeli Nataneli mudimu weneni. Wamwilishili kwikala kapostolu nawa Nataneli wazatili nakashinshi mudimu wamwinkeluwu kudi Yesu. (Luka 6:13, 14; Yil. 1:13, 14) Chatela mwanenu wakampululu yatoñojokeña nindi waluwañeshaña mpinji yejima, muhamekenu nawa mukoleshenu. Mulejenu nenu nateli kuyitiyisha enu niYehova kuwaha nawa nateli kuzatisha wuswa windi kumuzatila Yehova. w15 11/15 2:15, 16

Chatachikili mafuku akukuminina mu 1914, kwadiña ambuña Nzambi awayishewa antesha hohu. Muloña wakukeña akwawu nichayikwashiluwu kudi Nzambi naspiritu yajila, awa amanakwetu niahela awayishewa ashimwinini nsañu yayiwahi yaWanta hela chakwila amweneña makabi. Yumanyi yafumamu? Makonu izaza deneni dawantu akweti kuchiñeja kwakushakama hamaseki haya nyaka anakudipompesha. Ichi aYinsahu tudi 8,000,000 muyipompelu 115,400 mukaayi kejima, nawa naambala yinakutohelaku hohu. Chakutalilahu, aYinsahu 275,500 apapatisheweli muchaaka chamudimu cha 2014. Dikwila nawu antu 5,300 apapatisheweleña mulungu-nimulungu. Kuloñesha kwetu kunakuyilaku hambidi muloña twamukuhwelela Nzambi nawa tweteja netu Bayibolu hiIzu dindi donenayi. (1  Tesa. 2:13) Twadiluñishaña nkisu yaYehova hela chakwila Satana watuhela nawa nakutukañesha.—2 Kor. 4:4. w15 11/15 4:12, 14, 16

Akwakusandujola Bayibolu akuluka yitembi asandujoleli chikupu mamanyusikiliputi amavulu, yibalu yamamanyusikiliputi nimaBayibolu abalumwiniwu kushankulu. Hanyima yakuyesekeja, awanini nawu mavasi antesha hohu diwu adiña natuyiluwa twantesha. Ilaña nsañu yamuBayibolu yahimpikili wanyi. Kusandujola kwamuchidiwu kunakwashi atudizi aBayibolu ashinshika kwiluka nawu, Bayibolu yikwetuwu makonu Hiizu daYehova donenewa. Bayibolu yidi mumadimi kubadika ha 2,800, hela chakwila antu akeñeleña kuyijiyisha. Dikwila nawu yabadika nyikanda yejima yiduku makonu. Hela chakwila antu amavulu amukuhwelela wanyi Nzambi, Izu dindi dimukanda wunatandi chikupu mukaayi. MaBayibolu amakwawu akala kutaña nawa oloka chikupu wanyi, ilaña ejima anateli kukwasha muntu kwikala nakuchiñeja nikwiluka chinateli kuhetayi wumi wahaya nyaka. w15 12/15 1:13, 14

Yuma yitwahoshaña yinateli kuzañalesha akwetu hela kuyineñesha. Antu amavulu mukaayi kaSatana ahoshaña “mazu andulu” adi neyi “nyivu” hela neyi “mpoku yakabali” muloña akeñaña kuhilisha nikuneñesha akwawu. (Mas. 64:3) Amavulu adizaña iyi nhoshelu mumafwilimu nihama TV atambañawu. Ilaña akwaKristu ahoshaña wanyi mazu atama hela munjila yamaleñu. Maleñu amawahi nawa anateli kuletesha mazu itunakuhosha kutiyakana chiwahi. Ilaña bayi tuzatisha mazu atama akusupishaku, dikwila nawu, mazu anateli kutiyisha nsonyi hela kutukana kulonda tuseheshi amakwawu. Bayibolu yakanisha akwaKristu kuzatisha nhoshelu ‘yakutukana.’ Yahosha cheñi nawu: “Kuhosha mazu atama chinjila, chiña mazu amawahi anatweshi kukolesha antu hakumonawu kukala, kulonda akwashi naluwi awa akuyitiya.”—Efwes. 4:29, 31. w15 12/15 3:10

Awa mazu akukumishaku adiña njila yikwawu yakuyishalishilamu, atwanukishaña netu chatama wanyi kufwila kwikala akola kumujimba. Chineli twawanina wanyi, hitukutwesha kutondolwela yikatu yejimaku. Nawa neyi tukata, hitwatela kukuhwelela netu Yehova nateli kutuuka muchihayamishaku. Ilaña twatela kutalila mpinji yakumbidi yakatuukayi Nzambi. HaChimwekeshu 22:1, 2, kapostolu Yowanu wahosheli ‘hamenji awumi’ ‘nihamutondu wawumi’ wakuuka nachu antu ejima. Chumichi chatalisha wanyi kuyitumbu yitunateli kuzatisha makonu hela mwituña dadiha kulonda tukoli. Ilaña chatalisha kuyuma yejima yikatwililayi Yehova niYesu kulonda twakashakameña haya nyaka.—Isa. 35:5, 6. w15 12/15 4:17, 18

Yehova wahosheli kutalisha kumafuku etu nindi, “ikumi dawamayala akunyuza yamadimi ejima, akakwata kwihina dakaYudeya, nawu, Tuyi nenu, muloña tunatiyi nawu Nzambi mwekala nindi.” (Zek. 8:23) ‘KaYudeya’ nakwimenaku antu awayishayi Nzambi naspiritu yajila. Ayitenaña cheñi nawu, “aIsarela ambala aNzambi.” (Ŋal. 6:16) Yesu wahosheli nindi antu jaNzambi akekala anuñañana neyi chochahosheli kaprofwetu Zekariya. Wateneni antu akweti kuchiñeja kwakushakama mwiwulu nindi “kamukanka kawanyikoku kantesha” nawa wateneni antu akweti kuchiñeja kwakushakama hamaseki nindi “anyikoku acheñi.” Ilaña Yesu wahosheli nindi akekala “mukanka wumu” nawa akamulondaña, ‘kabiña wawu wumu.’ w16.01 4:2, 3

Twatela kukiña wubwambu wetu naYehova. Chineli tunakushakama mukaayi kaSatana nawa twawanina wanyi, tunateli kutachika kutoñojoka nikwila yuma yamukaayi. Chidi neyi tunakusala hakaloña hadi mpupa yinakututwala kutunabuli kukeña. Dichi, twatela kudinkaku hakwila tuyi kutunakukeña. Munjila yoyimu, twatela kuzata nañovu hakwila abuli kutuhuñumuna kudi kaayi kaSatana. Hanu dinu kushimwina kwatukiñaña ñahi? Neyi tunakushimwina antu kumwiluka Yehova niBayibolu, twayilejaña yuma yalema nawa yayiwahi, bayi yuma yikuzeyesha chikuhwelelu chetuku. Kushimwina kwakoleshaña chikuhwelelu chetu, muloña kwatwanukishaña yuma yayiwahi yatukanayi Nzambi ninshimbi jindi. Kwatukwashaña cheñi kutwalekahu kwikala nayililu yikutukwasha kudikiña kudi Satana nikaayi kindi. (Efwes. 6:14-17) Neyi tukwikala adikita, tukukiñewa muloña tukwikala nampinji yakwakamena kukala kutukweti wanyi. w16.01 5:12, 13

Talenu kukeña kwamwekesheliyi Luti kudi Yehova. Chumichi chamuzañalesheli Bowazi, wamuhamekeli Luti hakukeña ‘kubatama mumpuula jaYehova.’ (Luti 2:12) Mazu azatishiliyi Bowazi anateli kutwanukisha kaana kakada chikakeñaña kukikiña mumpuula jamama yindi. (Mas. 36:7; 91:1-4) Munjila yoyimu, Yehova wamukiñili Luti nawa wamukiswilili hamuloña wachikuhwelelu chindi. Luti waditoñesheluhu wanyi namwafuukwiliyi. Makonu antu amavulu adizaña hadi Yehova ilaña akeñaña wanyi kubatama mudi yena. Ashintajalaña kudihana kudi yena nakupapatishewa. Neyi ninenu mwashintajalaña, toñojokenu hachuma chaleteshaña. Antu ejima ekala nanzambi akalakelañawu. (Yosh. 24:15) Mukufuukula mwamaana neyi mukukalakelaña Nzambi walala. Neyi mudihana kudi Yehova mukumwekesha nenu mwakuhwelela nenu wukuyikiñaña. Nawa wukuyikwasha kutwalekahu kumukalakela hela mudi mukukala. Nzambi wamukwashili Luti. w16.02 2:6, 7

Abishayi wakeñeleña kujaha Sawulu muloña wakeñeleña kwikala washinshika kudi Davidi. Ilaña Davidi welukili nindi chikutama kujaha “wambala waYehova,” dichi wamwitejeli wanyi kujaha mwanta. (1 Sam. 26:8-11) Chuma cheliliyi Abishayi chatudizishaña chuma chalema: neyi tunakutonda muntu wutwatela kumwekeshela kashinshi, twatela kutoñojoka hanshimbi jamuBayibolu jinateli kutukwasha. Chatama wanyi kwikala washinshika kudi muntu wutwakeña chidi neyi ibwambu hela ntaña yetu. Chineli twawanina wanyi, chitwatiyaña chinateli kutuluwañesha. (Yere. 17:9) Dichi neyi muntu wutwakeña nakwila yuma yatama nawa anamuhañi muchipompelu, twatela kwikala ashinshika kudi Yehova bayi kudi muntu wudi wejimaku.—Mat. 22:37. w16.02 4:5, 6

Muloñadi akwaKristu muRoma chateleli kwilawu yuma yetejeluwu kwila? Toñojokenu haniyi nsañu yamuBayibolu. Timotewu welukili Nsona chikupu. A mama yindi niankaka yindi diwu amudizishileña. Hela chochu, Pawulu wamulejeli Timotewu nindi: “Shakamaku muyuma yiwadizili nakushinshikamu.” (2 Tim. 3:14, 15) Izu dinazatishiwu dakwila nawu “kushinshikamu” datalisha “kukwiluka nikukuhwelela chikupu nawu ichi chuma chalala.” Dichi Timotewu welukili chikupu nindi chalala nateli kuchiwana muNsona. Bayi neyi wetejeli chalala muloña amama yindi niankaka yindi amulejeliku, ilaña muloña watoñojokeli hayuma yadiziliyi nikushinshikamu. (Rom. 12:1) Munjila yoyimu, kudiza kwahalweyi kukukwasha kwakula malwihu, kuleka kujinooka nikukolesha chikuhwelelu cheyi.—Yil. 17:11. w16.03 2:3, 4, 7

Hampinji yayiliwu aIsarela kuyidika yawu muYerusalema, azatilileña hamu. Aloñesheli yuma yejima yakudikwasha nachu munjila. Kuhiñahu, endeleleña hamu nikudikwasha wumu namukwawu. Mutembeli, ashimekeleña nikudifukula kudi Yehova hamu. Makonu, chitunakudiloñesha kushakama mwituña dadiha, twatela kwikala anuñañana nikuzatila hamu nawakwetu. Antu amavulu mukanu kaayi anakutoboka nikuzuña hayuma yayivulu. Twamusakililaña Yehova hakutukwasha kwikala mukuwunda nikwiluka chalala. Antu jindi mukaayi kejima anakudifukula munjila yakeñayi. Sweje-e munanu mafuku akukuminina, antu jaYehova ananuñañani chikupu. Wejima wetu tunakuya hamu “kumpidi yaYehova” neyi chaprofweteliyi Isaya naMika. (Isa. 2:2-4; Mika 4:2-4) Twakatiya kuwaha kumbidi neyi antu ejima hamaseki ‘anadinuñi hamu’ nawa anakuzatila hamu hakudifukula kudi Yehova. w16.03 3:16, 17

Aeluda amakwawu akañanyaña kuwana mpinji yakudizisha amakwawu. Hadaha atoñojokaña nawu: ‘Kudizisha amakwawu kwalema, ilaña hikwesekana nanyidimu yikwawu yamuchipompelu yakeñekaña kuzatilahu swayuku. Neyi nibula kunyakashana kudizisha amakwawu, chipompelu chikutwalekahu nakuzatika.’ Hela chakwila nyidimu yikwawu yakeñekaña eluda kuzatilahu swayi-swayi, neyi mulabajala kudizisha amana kwetu mukuzeyesha chipompelu. Aeluda akweti nyidimu yalema nankashi yakalakalañawu mukunyakashana. Neyi aeluda alabajala kudizisha amakwawu, mukuhita kwampinji chipompelu hichikwikala nawamana kwetu ashikahuku akuzataña nyidimu yejima yakeñekañaku. Chakadi nikujina, hitwatela kutoñojoka netu kudizisha amakwawu hichuma chabula kulemaku. Aeluda ekalaña nampinji yakudizisha amana kwetu abula kukuluka yitembi, hiyankoñi akweti maana nawa akwashaña chipompelu chejima.—1 Pet. 4:10. w15 4/15 1:4, 6, 7