February

Komana wekala Chinsahu chaYehova wadihana? Neyi dimu, wukweti wuswana walema dikwila nawu wubwambu weyi naNzambi. Hela chochu iwu wubwambu bayi neyi awuzeyeshaña hamuloña wakwila twekala mukaayi kaSatana hohuku, ilaña nikubula kuwanina kwetu etu aweni. AkwaKristu ejima amonaña iku kukala. Dichi, wubwambu wetu naYehova watela kwikala wakola chikupu. Komana mwekala nawubwambu walala chikupu naYehova? Komana munakukeña kuwukolesha? Mukanda waYakoba 4:8 nsona yefuku dalelu, wayilejaña chimwatela kwila. Ilukenu nenu iwu wubwambu wekala hohu wenwenu naYehova. Chitwaswila kwakwihi naNzambi, niyena wukuswila kwakwihi nanetu. Chitwasweja kwila mwenimu, wubwambu wetu naYehova niwena wukusweja kukolelaku. Chikufumamu wubwambu wetu wukwikala wakola chikupu. Tukwikala nachikuhwelelu neyi chadiña naYesu, wahosheli nindi: “Yena wantemesheli diyi walala, nawa . . . Ami namwiluka.”—Yow. 7:28, 29. w15 4/15 3:1, 2

Twili netu ntaña yenu imwakeña anamuhañi muchipompelu. Mweluka dehi chakushakama namuntu ahañawu kuhitila muyuma yimwadizaña muBayibolu. (1 Kor. 5:11; 2 Yow. 10) Ilaña kulemesha mwanafuukuluwu kutalisha hakuhaña muntu muchipompelu hichuma chakala hama, nawa mpinji yikwawu himukutwesha kwovwahilaku. Komana munateli kukuhwelela nenu Tata yenu wamwiwulu nateli kuyinka ñovu yimunakukeña kulonda mwovwahili nshimbi yamuBayibolu yahosha hakuhaña muntu muchipompelu? Komana mukumona chumichi nenu hinjila yimwatela kukoleshelamu wubwambu wenu naYehova kuhitila mukukundama kwakwihi nindi? Komana chumichi chaya mukwila nawu hitwatela kukeña chikupu antaña jetuku? Inehi! Ilaña twatela kumukeña Yehova chikupu. (Mat. 22:37, 38) Neyi twamukeña Yehova nankashi tunateli kukwasha antaña jetu chiwahi, chili anakumukalakela Yehova hela nehi. Neyi chuma cheliliyi ntaña yenu ahañawu muchipompelu chayineñesheli nankashi, mulejenu Yehova yuma yejima yimunakukeña mukulomba.—Fwi. 4:6, 7. w15 4/15 4:14, 16

Dichi chatama wanyi neyi tutiyaña kuwaha nanyidimu yazatañawu akwetu nikudisamba chashikilamu nanyidimu yawu. Hitwatela kutiya nsonyi nachisaka chetu, chisemwa chetu hela iluña ditwakulilaku. (Yil. 21:39) Ilaña kwekala kudisamba kukwawu kunateli kutamisha wubwambu wetu naYehova. Kudinka wanta kwamuchidiwu kunateli kuleñela kukaana munakutufumbawu chatela twikali adizoza nakwiteja. (Mas. 141:5) Kudinka wanta kwamuchidiwu akulumbulula nawu “hikusweja kudinyamuna” hela “yililu yakudivwimba yekala nawantu akuhwelela nawu abadika akwawu chakubula muloña watelela.” Yehova wahela antu adinkaña wanta. (Ezek. 33:28; Amosa 6:8) Ilaña Satana watiyaña kuwaha neyi yamona antu adinkaña wanta muloña niyena wekala wadivwimba. Satana watiyili kuwaha nayililu yakudivwimba yawamayala adi neyi Nimirodi, Fwaro niAbisalomi muloña wejima wawu afwili mumuhetu wakudinka wanta.—Kutach. 10:8, 9; Kwid. 5:1, 2; 2 Sam. 15:4-6. w15 5/15 2:5, 6

Chineli wadiña nakumwimbujola Tata yindi, ‘Kristu, ñovu yaNzambi,’ kakavulu wakamunwineña chikasa chindi nakwinka atumbanji twindi yuma yakeñeleñawu. (1 Kor. 1:24) Bayi neyi welileña chumichi muloña yamwekeshi nindi wadiña nañovuku. Wadiña nakwakamena antu. Tushinshikenu mukanda waMatewu 14:14-21. Atumbanji twaYesu enjili nakumuleja kukala kwadiñawu naku kwakubula yakudya. Bayi neyi wena diwu afwili nzalaku, ilaña adiña nakwakamena mazaza amulondeleli Yesu hamaseki kufuma munyisumba muloña azeyeli nawa adiña nanzala. (Mat. 14:13) Chumanyi cheliliyi? Yesu wadiishili amayala 5,000 kushilahu ambanda nianyana namankendi atanu ninshi jiyedi. Mazaza “Adiili, ekutili wejima wawu.” Chumichi chinakumwekesha nawu kwadiña yakudya yayivulu. Bayi neyi Yesu wayinkeli mankendi amawahi hohuku, ilaña yakudya yakwinka mazaza ñovu yakwendela lwendu lwalulehi hakufunta kumatalawu. (Luka 9:10-17) Nawa yimpaya 12 ayinzesheli nayakudya yashaliluhu. w15 6/15 1:8, 9

Wuvumbi wunasweji chakwila munateli kudihula nenu, ‘Komana muntu nateli kushakama chakubula kwila wuvumbi?’ Eñañi, Yehova nateli kukwasha. Hela chochu, hakwila twikali ashinshika chakubula kwila wuvumbi, twatela kukaana yililu yawuvumbi. Neyi chochinateli ilowa dikweti ndisha kukokola inshi, yitoñojoka yakukeña kwila wuvumbi niyena yinateli kumudimba mukwaKristu neyi yabula kuleka kutoñojoka hayumiyi chakubula kuumba mpinji. Yinateli kutukokola nakutuleñela kwila wuvumbi. Mukuhita kwampinji, kudimbana kwanshidi kunateli kusweja chakwila kufwila kwatama kunateli kubaaba ivumu. Hampinji yamuchidiwu hela kambuña Yehova nateli kwila yuma yafwilañayi neyi yawana mpinji yakwila mwafwilañayi. Eñañi, ‘kufwila kwatama . . . kwavwalaña nshidi.’ (Yak. 1:14, 15) Chalema kutoñojokaña hayuma yitwafwilaña hakapinji kantesha chiyinateli kumuleñela muntu kukoña nshidi yahamesu bwi-i. Dichi chachiwahi kwiluka netu neyi tukañesha kufwila kwatama kumena nyiji mudi etu, hitwatela kudiñija muyililu yawuvumbi kulonda twakamoni jomisha mbañaku.—Ŋal. 5:16. w15 6/15 3:1-3

Kwakwihi nayaaka 6,000 yinahitihu, nkeñelu yaNzambi ayilileña hamaseki. Diwu muloña waweni Yehova chamweniyi yuma yayiwahi yayinkeliyi antu nindi: “Yinawahi nankashi.” (Kutach. 1:31) Kufuma tuhu hampinji yadikañiliyi Satana, antu antesha hohu diwu anakwila nkeñelu yaNzambi hamaseki. Ilaña makonu tukweti kukooleka kwakushakama mumafuku akwila aYinsahu akushika ku 8 miliyoni hiyanakulomba hohu nawu nkeñelu yaNzambi ayili hanu hamasekuku, ilaña anakufwila kwila yuma kwesekeja nakulomba kweniku. Elaña mwenimu kuhitila mukwikala nachihandilu chamuzañaleshaña Nzambi nikudikita chikupu mumudimu wakwilisha atumbanji. Tukutwalekahu nakulomba netu nkeñelu yaNzambi ayileña, kushika nikumpinji yakafumishawu ayilumbu jaWanta waNzambi hanu hamaseki. Dihu dinu hitwakamona nkeñelu yaNzambi chikayilañawu chikupu hamaseki neyi mabiliyoni awantu anayisañwili dehi muparadisa hamaseki. (Yow. 5:28, 29) Tukatiya muzañalu nankashi haniyi mpinji hakutambwila antaña jetu itwakeña afwa dehi. w15 6/15 4:15, 17

Nhoshelu yakwila nawu “paradisa yakuspiritu” twayizatishaña mukuloñesha kwetu. Yalumbululaña kuwunda kwetu kwadimena kutwadiluñishaña naNzambi ninawamana kwetu. Kafwampi hitwatela kukunkulula netu mazu akwila nawu “paradisa yakuspiritu” “nitembeli yakuspiritu” wowamuku. Tembeli yakuspiritu hintanjikilu yaNzambi yakudifukula kwalala. Paradisa yakuspiritu yamwekeshaña chikupu antu akweti wuselewa waNzambi nawa amukalakelaña makonu hatembeli yindi yakuspiritu. (Mal. 3:18) Tukweti muzañalu hakwiluka netu kufuma tuhu mu 1919, Yehova weteja antu abula kuwanina kuzata nindi nikukolesha antu amavulu hamaseki kwikala naparadisa yakuspiritu. Komana ninenu mwazatañaku iwu mudimu walema? Komana munakukeña kutwalekahu kuzata naYehova hakulemesha ‘kuwudatilu wanyendu yindi’? w15 7/15 1:10, 11

Henohu ashalahu a 144,000 kanda ayi mwiwulu, Gogi wakalukuka antu jaNzambi. Chumanyi chikamwekana? Antu jaNzambi hamaseki akamwekana neyi kwosi wakuyamwina. Akwovwahila nshimbi yahaninuwu mumafuku aMwanta Yehoshafwati yakwila nawu: ‘Hichikweti enu kulwa kunjita iyuku. Mwakakumina dakwimana, mwakaduñumika kwenu nzo-o, mwakamona wamwinu waYehova wudi nanenu, enu aYuda nawakwaYerusalema. Bayi mutiya woma hela kwakamaku.’ (2 Kushi. 20:17) Hela chochu, mwiwulu mwakamwekana chuma chacheñi. Kutalisha hampinji yakela awayishewa ejima anayi dehi mwiwulu, mukanda waChimwekeshu 17:14 watulejaña nsañu yakundama kudi ayilumbu jawantu jaNzambi nawu: ‘Wenawa akaasa njita naMwana kaMukoku; Mwana kaMukoku wakayimika mushindu, muloña diyi Mukulumpi wawakulumpi, diyi Mwanta wawanyanta; ninawa adiyi nawu atambikewa, atondewa, ashinshika.’ Yesu wakazatila hamu nawa 144,000 akayuulayi nawu mwiwulu hakupulwisha antu jaNzambi hamaseki. w15 7/15 2:16

Kalemesha kitwamumwekeshelaña Nzambi watutambikaña kukupompa kwawakwaKristu katela kumwekena muyililu yetu, nvwalilu nimmwekenu yetu. Twatela cheñi kuleka yililu yatama. Yehova wakeñaña nindi antu jindi nienyi atiyeña kuwaha neyi adi Hetala daWanta. Neyi tunakupompa hitwakeñaña kuluwañesha akwetu kuhitila mukuvwala yakuvwala yabula kutelela, kutemesha meseji hanshiña, kuhanjeka hampinji yakupompa hela kudya yakudya kushilahu niyuma yikwawuku. Anvwali atela kudizisha anyanawu kulonda eluki nawu Itala daWanta bayi neyi hiluña dakukidimokela hela kuhemenaku. Muloña wakwila wahilili, Yesu wahañili mutembeli yaNzambi antu atachikili nyidimu yakuselujola. (Yow. 2:13-17) Matala etu aWanta himaluña akudifukwila kudifukula kwalala nishikola yakuspiritu. Dichi nyidimu yejima yakuselujola hiyakundama kuyuma yakuspirituku, twatela kuyilila kwacheñi.—Esekejenu Nehemiya 13:7, 8. w15 7/15 4:7, 8

Bayibolu yashimuna nawu kutama kukaswejelaku nankashi “kumafuku akukuminina.” (2 Tim. 3:13; Mat. 24:21; Chim. 12:12) Dichi tunateli kukuhwelela netu yuma yatama yamukaayi yinakumwekana makonu yikatwalekahu nakutaminaku. Munakuhweleli nenu yuma yikataminaku ñahi henohu ‘yihuñu yamaneni’ kanda? (Chim. 7:14) Chakutalilahu, munakukuhwelela nenu kwakekala njita mumatuña ejima, antu ejima ekekala nanzala nawa hetala hetala antu akekala akata? Neyi yuma yizatika muniyi njila, niantu abulaña kukuhwelela anateli kuyikakeja kwiteja nawu wuprofwetu wamuBayibolu wunakushikijewa. Hela chochu, Yesu wahosheli nindi antu amavulu ‘hiyakeluka’ kwinza kwinduku, akatwalekahu nakudiluñisha nanyidimu yawu nichakashika ifuku odu. (Mat. 24:37-39) Kafwampi, Nyikanda Yajila yashimuna nawu yuma mukaayi hiyikasweja kutaminaku kumafuku akukuminina kulonda yikayileñeli antu kwiteja nawu kukuma kudi mukamwihuku.—Luka 17:20; 2 Pet. 3:3, 4. w15 8/15 2:6, 7

Komana kwikala nampinji yakudiloñesha hachihandilu chamwituña daNzambi dadiha, chaya mukwila nawu tunakudibonda chihandilu chachiwahi makonu? Kwakulehi mwani! Kumuzatila Yehova dichi chuma chasweja kulema muchihandilu. Hitwamuzatilaña Nzambi hamuloña wakwila anakutukanjikija kudi muntu hela netu tukapuluki halukadi lwaswejaku. Wakeñaña nindi twikali namuzañalu weneni neyi tumuzatilaña yena. Neyi Yehova yatulombolaña nikutumwekeshela kukeña kwindi, diyi njila yayiwahi kubadika kuhanda chihandilu chakadi wubwambu nayena. (Mas. 63:1, 2) Kafwampi, hitunateli kuchiñilila ituña dadiha kulonda twakadiluñishi nkisu jakuspiritu jafumaña mukumuzatila Yehova namuchima wumuku, nimakonu tunakudiluñisha nkisu yeniyi. Eñañi, etu amavulu twatachikili dehi kudiluñisha nkisu yeniyi nawa tweluka netu kwosi chihandilu chinateli kutuletela muzañalu wabadikaku.—Mas. 1:1-3; Isa. 58:13, 14. w15 8/15 3:16

Chikuhwelelu chinateli kutukwasha kwila yuma yinateli kumwekana neyi yakala. (Mat. 21:21, 22) Etu amakwawu twahimpa chikupu yililu yetu chakwila antu atwilukili kunyima anakutujina. Twahimpili yililu yetu muloña twamukeña Yehova nawa watukwashili kulonda tuhimpi. (Kol. 3:5-10) Twadihanini kudi Yehova muloña twamukuhweleleli, twekalili amabwambu jindi, chuma chitunateli kubula kwila nañovu jetu. Chikuhwelelu chatukwashaña kwikala akola. Chakutalilahu, chikuhwelelu chatukwashaña kushinda kukulukuka kwaDiyabolu, chilumbu chetu wukweti ñovu. (Efwes. 6:16) Kukuhwelela Yehova kwatukwashaña kubula kwakama neyi tudi mukukala. Muloña Yehova wakana nindi wakatwinka yuma yitwakeñaña neyi tumukuhwelela nikutwamijaku Wanta windi. (Mat. 6:30-34) Yehova watwikana cheñi wumi wahaya nyaka neyi tumukuhwelela.—Yow. 3:16. w15 9/15 3:4, 5

Yehova wamwekeshaña ñahi nindi diyi ‘wasambilili kutukeñetu’? Bayibolu yahoshaña nawu: “Hohitwachidiñi akwanshidi, Kristu watufwilili.” (Rom. 5:8) Kukeña hichililu chaYehova chabadika. Dichaletesheli Yesu kuhosha nindi lushimbi lwalema lwakwila nawu: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima, nañovu jeyi jejima.” (Maku 12:30) Yehova wakeñaña nindi tumukeñi “namuchima wetu wejima.” Yehova watiyaña kutama neyi tukeña muntu hela chuma chacheñi kubadika chitwamukeña yena. Ilaña kukeña kutwamukeña hikwatela kwikala hohu muyitoñojokaku. Yehova cheñi wakeñaña nindi tumukeñi ‘namaanetu ejima’ ‘ninañovu jetu jejima.’ Dikwila nawu kukeña kutwamukeña Yehova kwabombelamu chitwatoñojokaña niyuma yitwelaña.—Mika 6:8. w15 9/15 5:1-3

Mpinji yikwawu tunateli kumona wanyi chatukwashañayi Nzambi. Muloñadi? Neyi tunakukabakana, tunateli kuvulamena netu Yehova watukwashahu dehi kakavulu. Dichamumwekeneni Elija. Wadiña wahamuka, ilaña watiyili woma chelili Mwadi Yezebeli yakeñi kumujaha. Wavulameneni chamukwashiliyi Yehova. Bayibolu yamwekeshaña nawu Elija wakeñeleña kufwa. (1 Anya. 19:1-4) Kudihi kwadi kuwanayi wukwashu nikuhamuka? Wateleleli kulomba kudi Yehova. (1 Anya. 19:14-18) Yoba niyena washili maana hakukala kwadiñayinaku chakwila wakañenyi kukwimona neyi chakwimweneñayi Yehova. (Yoba 42:3-6) Chinateli kutukalila kumona chatukwashañayi Nzambi muloña wamakabi etu. Tunateli kwila ñahi hakwila nawu tumoni yuma yatwililayi Nzambi? Twatela kutoñojoka chahosha Bayibolu hamakabi etu. w15 10/15 1:15, 16

Yesu wakeñeleña wanyi chuma chidi chejima kumukañesha kushimwina. Chakutalilahu, hanyima yakwila natachiki dehi mudimu wakushimwina, mazaza awantu muKaperinawu akeñeleña Yesu kushakama mumusumba wawu. Welili ñahi? Watwalekeluhu namudimu windi. Wahosheli nindi: “Chiña nishimwina nsañu yaWanta waNzambi yayiwahi nikunyikala yikwawu yinashali nawa; muloña dichi chantemesheleluwu.” (Luka 4:42-44) Yesu wendeli maluña amalehi nakushimwina nsañu yayiwahi nikutañisha antu amavulu. Wadiña wawanina, ilaña wazeyeleña muloña wazatileña nañovu nawa wanokeleña. (Luka 8:23; Yow. 4:6) Yesu hadizishileñayi atumbanji twindi nsañu yalema, muntu wumu wamuketwili nakuhosha nindi: “Eyi Nkuluñaña, mwili mana kwami twambuli nindi wuswana wetu.” Yesu watachikili wanyi kumanisha kukala kwaniwu iyala. Ilaña watwalekeluhu kudizisha atumbanji twindi.—Luka 12:13-15. w15 10/15 3:10, 11

Kukeña dichililu chaNzambi chabadika. Wekala hohu nakukeña wanyi. Ilaña diyi kukeña. Kukeña dikwamusañumunaña kwila yuma yejima yelañayi. Twamusakililaña Yehova chaleñeliyi mawulu niiseki kushilahu niyuma yejima yonaña muloña wakukeña kwindi! Yehova watiyilaña luwi yileñaleña yindi. Twakuhwelela netu nkeñelu yindi kutalisha hadi antu yikashikijewa hampinji yatelela muloña watukeña. Dichi antu amwovwahilaña akashakamaña chiwahi. Chakutalilahu, muloña wakukeña, Yehova ‘nashumu dehi ifuku damba kasompeshayi matuña mwaloña, neyala anatondiyi dehi,’ Yesu Kristu. (Yil. 17:31) Tunakuhweleli netu iku kusompesha kwakamwekena. Antu amwovwahilaña, akatambwila nkisu yikadiluñishañawu haya nyaka. w15 11/15 3:1, 2

Antu atambwilaña nsañu yitwashimwinaña munjila yamboka-mboka. Antu amakwawu atutiyililaña, amakwawu ahela nsañu yitwashimwinaña. Yehova wakeñaña nindi twileña ñahi nawantu abulaña kudifukula kudiyena? Hela antu akaana hela eteja, twalondelaña kufumba kwamuBayibolu. Mpinji yejima yitunakuhakwilaku yuma yitwakuhwelela, twatela kwila mwenomu “nakudizoza nawoma” muloña twakeña akwetu. (1 Pet. 3:15) Neyi antu ahila hela akaana nsañu yitwashimwinaña, twamwimbujolaña Yesu kuhitila mukuyimwekeshela kukeña. Yesu “chamutukiluwu, hafuntishili cheñi matukaku; chamweniyi yihuñu hazuwiluku.” Ilaña, Yesu wamukuhweleli Yehova. (1 Pet. 2:23) Dichi mpinji yejima twikali adizoza nawa tulondeleña iku kufumba: “Bayi mutamisha mukwenu nanochu chanakutamishiyuku, hela kumutuka nanochu chanakutukiyuku. Chiña kukiswila nkisu.”—1 Pet. 3:8, 9. w15 11/15 4:17, 18

Yesu wayilejeleña atumbanji twindi nindi wayikeña. (Yow. 15:9) Nawa wekalileña nampinji yeneni yakuhanjeka nawu. (Maku 6:31, 32; Yow. 2:2; 21:12, 13) Munjila yoyimu, yilejenu anyanenu nenu mwayikeña, nawa mwekeshenu chimwayikeña. (Yish. 4:3) A Samuel, akuAustralia, ahosheli nawu: “Hinadiña kansi, Atata antañilileña Mukanda Wami waMpanji Jamu Bayibolu mafuku ejima namelela. Akwileña malwihu ami, kunkumbata nikumpwepujola neyi hinukuya nakukama. Nahayamini chinelukili nami Atata akulila muchisaka mwabulileñawu kudikumbata nikudipwepujola! Ilaña esekeli nañovu kummwekeshela kukeña. Chumichi chaletesheli niyikeñi nankashi, nadiña wakasunuka nawa wakiñewa.” Kwashenu anyanenu kutiya chochimu kuhitila mukuyileja mpinji yejima nenu “nakukeña.” Yikumbatenu nikuyipwepujola. Ikalenu nampinji yakuhanjeka, kudiila hamu nikuhema nawu. w15 11/15 1:3, 4

Mu 1919, kadizanvu kanyanya kufuma hadi atudizi aBayibolu akitondeli kwikala “nduñu wamaana nikashinshi.” Hayina mpinji, nduñu wamaana wahosheleña nawantu jaNzambi kuzatisha Chizungu. Ilaña makonu, nyikanda yashindamena haBayibolu anakuyisoneka mumadimi kubadika 700. Mwamweni, antu jaNzambi akeñekeleña cheñi kwikala naBayibolu yakubalumuna chiwahi, yoloka nawa yapela kutiya. Dichi, atuñili Komiti yaNew World Bible Translation, nawa amanakwetu amuniyi komiti edishili yibalu yaBayibolu kufuma mu 1950 nakushika mu 1960. Chibalu chatachi hayibalu 6 achidishili hakupompa kwankambi kwadiñaku ha August 2, 1950. Manakwetu Knorr wakeñeleña nindi Bayibolu yaNew World Translation yikakwashi antu amavulu kumwiluka Yehova. w15 12/15 1:15, 17

Yumanyi yikutukwasha kwiluka chakuhosha? Tunateli kutaña muBayibolu nimunyikanda yetu kulonda twiluki njila yayiwahi yakuhoshelamu. Tukwiluka mwatalisha nhoshelu yitwabula kwiluka. Tunateli cheñi kudizila kuyuma yelileñayi Yesu kulonda twiluki chakuhosha munjila yinateli kukwasha amakwawu. Welukileña chikupu chakuhosha muloña Yehova wamulejeli “kuhosha mazu akukolesha nachu muntu nazeyi.” (Isa. 50:4) Chalema kwiluka cheñi mazu akuzatisha kudi kwetu. (Yak. 1:19) Tunateli kudihula netu: ‘Neyi nihosha ichi, muntu wukutiya munatalishi? Wukutiya ñahi?’ w15 12/15 3:12

Kwashalili hohu yaaka yitanu, akwaKristu ashakamineña muYudeya ateleleli kufuma mumusumba swayi swayi. Muloña Yesu walejeli atumbanji twindi nindi chamonawu hohu amashidika ananyeñumuki Yerusalema, atela kufuma mumusumba. (Luka 21:20-24) Mwahitili yaaka 28 kufuma hayisoñamishiliyi Yesu atumbanji twindi. Haniyi mpinji, akwaKristu muIsarela atwalekeluhu kwikala ashinshika hela chakwila ayikabishileña nikumona kweseka. (Heb. 10:32-34) Ilaña Pawulu wakeñeleña kuyikwasha kulonda adiloñeshi nayuma yikamwekana kumbidi. Adiña kwakwihi nakumona kweseka kweneni kwachikuhwelelu chawu. (Mat. 24:20, 21; Heb. 12:4) Ateleleli kuumika nikwikala nachikuhwelelu chakola hakwovwahila mazu aYesu akufuma mumusumba kulonda apuluki. (Heb. 10:36-39) Dichi Yehova wamoneneni Pawulu kuyisonekela mukanda ana amanakwetu niahela. Iwu mukanda awitenaña nawu Aheberu nawa awisonekeli kulonda wuyikoleshi. w16.01 1:1, 2

Neyi twiteja kukeña kwaNzambi, twatela kukeña amanakwetu. (1 Yow. 3:16) Tunateli kuyimwekeshela ñahi kukeña? Yuma yeliliyi Yesu yatukwashaña kwiluka chitunateli kukeña antu. Hampinji yadiñayi hamaseki, wakwashili antu, sweje-e adizoza. Wokili akata, ayifwayi, amputa mesu, atumama niajika matu. (Mat. 11:4, 5) Kwambukaku nawakulumpi jansakililu, Yesu wadizishileña antu akeñeleña kumwiluka Nzambi. (Yow. 7:49) Wakeñeli antu adizoza nawa wazatili nañovu hakuyikwasha. (Mat. 20:28) Munateli kukwasha amanakwenu niahela adi muchipompelu chenu, sweje-e atushinakaji. Kwila muyendela nehi? Kwila muyitwalila yakuda, kuyikwashaku nyidimu yahetala, kuyanawu nakupompa hela mumudimu wakushimwina nehi? Lekenu kukeña kwaNzambi kuyisañumuni kukeña amanakwenu. w16.01 2:12-14

Komana anyikoku acheñi atela kwiluka majina awantu ejima awayishewa makonu? Inehi. Muloñadi? Hela chakwila Nzambi wayitambika kuya mwiwulu, akatambwila wuloku wawu neyi atwalekahu kwikala ashinshika. Satana weluka chumichi, nawa wazatishaña “atuprofwetu akutwamba” kulonda ‘ayiluwañeshi.’ (Mat. 24:24) AkwaKristu awayishewa elukaña wanyi nawu akatambwila wuloku wawu, chiña neyi Yehova nayimwekesheli hatooka nindi ashinshika. Awayishewa atambwilaña chilamiku chawu chakukumishaku henohu kanda afwi hela henohu ‘lukadi lwasweja’ kanda lutachiki. (Chim. 2:10; 7:3, 14) Dichi kwosi chuma chikumukwasha muntu neyi yeluka antu akekala hakachi kawa 144, 000. w16.01 4:2, 3

Toñojokenu mudimu wakushimwina chiwesekana nankeñelu yaYehova kudi antu. Nkeñelu yaNzambi yadiña yakwila nawu antu ahandeña haya nyaka, chavulumwiniyi Adama yahimpili wanyi. Nzambi waloñesheli ntanjikilu yakutukuulilamu kunshidi nikukufwa. Munjilanyi? Yesu wenjili hamaseki nakuhana wumi windi. Ilaña hakwila nawu tuheteli muniwu mulambu, twatela kwovwahila Nzambi. Yesu walejeli antu kwila yuma yakeñañayi Nzambi, nawa walejeli atumbanji kuleja antu neyi cheliliyi. Neyi tunakushimwina nikukwasha antu kwikala amabwambu jaNzambi, dikwila nawu tunakuzata hamu naNzambi mukuloñesha kwindi kwakuwahi kwakukuula antu kunshidi nikukufwa. Chumichi chamwekeshaña nawu twayikeña akwetu antu nawa twamukeña Yehova. “Yena wakeña antu ejima nindi ahandi, eluki nsañu yalala chikupu.”—1 Tim. 2:4. w16.01 5:15, 16

Yuma yatama yelileñayi Ahazi yadi kuletesha mwanindi Hezekiya kumuhilila Yehova. Makonu, antu amakwawu anomiki kukala kwanti kubadika kwaHezekiya atoñojokaña nawu chachiwahi ‘kumuzuwila Yehova’ hela kuhilila kuloñesha kwindi. (Yish. 19:3) Amakwawu atoñojokaña nawu nkulilu yawantaña jawu yinateli kuyiletesha kwikala nachihandilu chatama hela kwila yuma yatama yelileñawu anvwali jawu. (Ezek. 18:2, 3) Yitoñojoka yeniyi yalala? Chihandilu chaHezekiya chamwekesha nawu ñakwilu yanilu lwihu yidi nawu inehi. Kwosi chuma chidi chejima chinateli kuletesha tumuhilili Yehova. Wakojejaña wanyi yuma yatama kumwekena antu. (Yoba 34:10) Anvwali anateli kuleja anyanawu kwila yuma yayiwahi hela yatama. (Yish. 22:6; Kol. 3:21) Ilaña chumichi hichinayi mukwila nawu anvwali jetu anateli kutuletesha kwikala amawahi hela atamaku. Muloñadi? Muloña Yehova watwinka wuswa wakufuukula, dikwila nawu tunateli kutonda kwila yuma yayiwahi hela yatama.—Kuhit. 30:19. w16.02 2:8-10

Abineri wamukwashili Sawulu wakeñeleña kujaha Davidi. (1 Sam. 26:1-5) Jonatani naAbineri elukili nawu Nzambi wakeñeli Davidi kwikala mwanta wawaIsarela. Ilaña chelili Sawulu nafwi dehi, Abineri wamukwashili wanyi Davidi. Wakeñeleña kuswanisha Ishibosheti mwana kaSawulu kwikala mwanta. Kuhiñahu Abineri watela wakeñeleña kwikala mwanta nawa hadaha dichaletesheli yakami nañoda Mwanta Sawulu. (2 Sam. 2:8-10; 3:6-11) Abisalomi, mwana kaMwanta Davidi niyena wadiña washinshika wanyi kudi Nzambi muloña hadizozeluku. Chineli wakeñeleña kwikala mwanta, dichi wasendeli “itemba nituwalu niamayala makumi atanu akuyañahu dehi kumbidi yindi lufuchi.” (2 Sam. 15:1) Waletesheli aIsarela amavulu kwikala ashinshika kudi yena. Wakeñeleña kujaha taata yindi, hela chakwila welukili nindi Yehova diyi wamwilishili Davidi kwikala mwanta wawaIsarela. (2 Sam. 15:13, 14; 17:1-4) Twamukeña Yehova nawa tunakukeña wanyi kuditiyisha etu aweni kuwaha neyi chelili Abineri naAbisalomi. Ilaña twatela kubabala kuchina twakenda katachika kufwila mali amavulu hela nyidimu yikuletesha tudimoneña kulema. Chumichi chikumanisha wubwambu wetu naYehova. w16.02 4:9-11

Neyi mukweti chikuhwelelu chakola, mukuchimwekeshela muyilwilu yenu. Atwansi atela cheñi kumwekesha ‘yilwilu yakujila.’ (2 Pet. 3:11) Hakwila twili mwenimu, yilwilu ‘yakujila’ hiyilwilwinyi? Neyi yilwilu yenu yajila, dikwila nawu mutooka. Chakutalilahu, anukenu tukweji 6 tunahituhu. Chayesekeliwu kwila yuma yatama, mwelili ñahi, mwatoñojokeli hayuma yayiwahi nayatama? (Heb. 5:14) Munakwanuka mpinji yimwabulili kwiteja kweseka hela ikakeja dawakwenu? Mwamwekeshaña yilwilu yayiwahi kudi akwenu kushikola? Mwatwalekañahu kwikala ashinshika kudi Yehova tahindi mwakeñaña kwikala neyi akwenu akashikola kulonda abuleña kuyiseha? (1 Pet. 4:3, 4) Kwosi muntu wawanina. Mpinji yikwawu, niantu anamukalakeli Yehova hadi yaaka yayivulu atiyaña nsonyi nawa chayikalilaña kushimwina. Ilaña muntu wadihana kudi Nzambi wadimwekeshaña nawu hiChinsahu chaYehova kuhitila muyilwilu yindi yayiwahi. w16.03 2:10, 11

Kufuma tuhu haleñeliwu antu, Yehova wenkaña antu nshimbi nikuyilombola. Chakutalilahu, mwitempa daEdeni, Yehova waheni nshimbi yadi kukwasha chisaka chawantu kutwalekahu kwikala nawumi nimuzañalu. (Kutach. 2:15-17) Ilaña Adama naEvu akaanini wunlomboli waTata yawu wukweti kukeña. Evu watiyilili kwizu datiyakeneña neyi dinakufuma mudi kapela nawa Adama watiyilili mwizu daÑodindi. Wejima wawu akabakeni nawa afwili chakadi kuchiñeja kudi kwejima. Cheñi hamuloña wakubula kwovwahila kwawu, chisaka chejima chekalili munjila yaya kukufwa. Yehova wemanaña kumesu awantu jindi, nakuyileja njila yaya kuwumi wahaya nyaaka nakufuma kuwubanji. Sweje-e dinu, wekala neyi kabiña wamuwahi, wayilejaña anyikoku chakwila nawa wayisoñamishaña kulonda abuleña kwenda munjila yatama. w16.03 4:2, 3