March

Aeluda akweti kashinshi azatishaña mpinji yawu hakudizisha amana kwetu achidi atwansi yuma yinadizuwu hayaaka yinamuzatiluwu Nzambi nakashinshi. (Mas. 71:17, 18) Aeluda adizishaña amakwawu ekala alema kudi nyikoku. Akoleshaña mpanda yachipompelu. Munjilanyi? Aeluda azataña nañovu hakudizisha amana kwetu amavulu aleñelaña chipompelu kwikala chakola nikunuñañana chayinu mpinji, sweje-e mumpinji yalukadi lweneni lunakwinza. (Ezek. 38:10-12; Mika 5:5, 6) Aeluda, tunayilembeleli netu shenu maana hakudizisha amakwawu muyuma yashiyashana yamumudimu wenu wakushimwina makonu. Kafwampi, tweluka netu mpinji yimwazatishaña hakwakamena nyidimu yikwawu yamuchipompelu yalema, nawa yayileñela mubuli kwikala nampinji. Dichi, mwatela kwambula mpinji yenu kulonda muyizatisheña hakudizisha amakwawu. (Mukwa. 3:1) Neyi mukudizisha amakwawu akayikwashaku nyidimu kumbidi. w15 4/15 1:8-10

Chakadi nikujina, mweteja nenu muBayibolu mwekala nsañu yakwashaña antu ejima. Komana Bayibolu yahosha cheñi chimwatela kukundama kwakwihi naYehova? Eñañi. Munjilanyi? Chimukutañaña nikudiza Bayibolu mpinji yejima, shenuku kashinshi kulonda mwiluki yuma yimunakutaña chiyinakuyikwasha nichimunateli kuyizatisha muchihandilu chenu; chimwela mwenimu munakumwiteja Yehova kuhosha nanenu kuhitila Mwizu dindi. Yumiyi yikuyileñela kwikala nawubwambu wawuwahi naNzambi. (Heb. 4:12; Yak. 1:23-25) Chakutalilahu, tañenu nikutoñojokahu chikupu hamazu aYesu akwila nawu “bayi mudilumbikilaña maheta hanu hamasekuku.” Neyi mumona nenu mwatwamijañaku Wanta waNzambi muchihandilu chenu, mukwiluka nenu Yehova watiyaña kuwaha nanenu. Munjila yikwawu, neyi mwiluka nenu mwatela kupeleshaku chihandilu chenu nakutwamijaku Wanta waNzambi, dikwila nawu Yehova nayikwashi kwiluka yuma yimwatela kwila hakwila mukundami kwakwihi nayena.—Mat. 6:19, 20. w15 4/15 3:3-5

Kufwana Pawulu, twadikitaña chikupu mumudimu wakushimwina, twakuhwelela netu Yehova ‘wakatushilaku’ yuma yikwawu yejima yitwakeñaña. (Mat. 6:33) Hakwikala akwakushimwina aWanta, ‘atukunjika mudimu wakushimwina nsañu yayiwahi,’ nawa Yehova watumonaña nindi ‘tuyakwakukalakala hamu’ nindi. (1 Tesa. 2:4; 1 Kor. 3:9) Neyi tutwalekahu kuzata mudimu waNzambi neyena, chikatupelela kuhembelela mpinji yakatukwashawu. Tuzatishenu iyi mpinji yamakonu kulonda tukoleshi wubwambu wetu naNzambi. Neyi kudi nsañu yitunakwakama, tukuyizatisha kulonda tukundami kwakwihi naYehova. Eñañi, tumukuhwelelenu Yehova netu nateli kutukwasha mukukala kutwamonaña makonu nikutukamona kumbidi kuhitila mudiza chikupu Izu daNzambi, kulomba mpinji yejima nikudikita munyidimu yaNzambi. w15 4/15 4:17, 18

Kudivwimba kunatela kukañesha kuwunda muchipompelu. Eñañi, neyi twahela akwetu nikudimona netu twalema kuyibadika, tunateli kuhosha hela kwila chuma chinateli kuyihilisha. (Yish. 12:18) Neyi twekala nachaaku chakudimona netu twabadika akwetu, twatela kwanuka netu ‘antu ejima adinkaña wanta munyichima yawu Yehova wayimonaña nindi hiyishimashima.’ (Yish. 16:5) Tunateli cheñi kudishinshika etu aweni kulonda twiluki chitwamonaña antu ekowa dacheñi, ituña hela chisemwa. Neyi twamonaña netu ikowa detu hela ituña detu dalema, dikwila nawu tunakudiwula mazu aNzambi akwila nawu ‘wafumishili kudi muntu wumu nyunza yawantu ejima.’ (Yil. 17:26) Munjila yikwawu, kwekala hohu muchidi wumu muloña antu ejima akweti nkakulula wumu, Adama. Dichi, chatama nankashi neyi muntu yakuhwelela nindi antu akumuchidi wukwawu alema kubadika akwawu. Neyi tutoñojoka muniyi njila, tunakumwiteja Satana kuluwañesha kukeña nikunuñañana kwetu kwawakwaKristu. (Yow. 13:35) Hakwila tudikañi naSatana nikumushinda, twatela kudikaña nayitoñojoka yejima yakudinka wanta.—Yish. 16:18. w15 5/15 2:8, 9

Chakadi nikujina, twazañalalaña muloña Nzambi wakana kuyinka awayishewa ashinshika wumi wabulaña kufwa mwiwulu, “anyikoku acheñi” niwena ayikana kuyinka wumi wahaya nyaka hanu hamaseki. (Yow. 10:16; 17:3; 1 Kor. 15:53) Hela mukweti kuchiñeja kwakwikala nawumi wabulaña kufwa mwiwulu hela wumi wahaya nyaka hanu hamaseki, mwamonaña kukala kwayandishaña antu makonu. Yehova weluka kukala kutwamonaña, neyi chelukiliyi chayandileñawu aIsarela muEjipitu neyi anduñu. Eñañi, “mwejima mwakabiluwu wena, dimu mwakabiliyi yena nawa.” (Isa. 63:9) Chimwahitili yaaka yayivulu, aYudeya atiyili woma muloña wawayilumbu ayikañesheleña kutuñulula tembeli, ilaña Nzambi wahosheli nindi: ‘Muntu wukukunkeyi, nakunki hakantu kadisu dami.’ (Zek. 2:8) Kufwana mama yawantu wakeña mwanindi wankemba, Yehova niyena wayikeña antu jindi. (Isa. 49:15) Munjila yikwawu, Yehova nateli kutiya chatiyañawu antu amakwawu, anetu nawa watwinka wuswa weniwu.—Mas. 103:13, 14. w15 5/15 4:2

Komana Yesu watalishili mukwila nindi hamaseki hakwikala hohu atuzweñi? Inehi, watalishili mukwila nindi chineli kaayi katama kachidi kutwaleka atuzweñi niwena akutwaleka nakwikalaku. Makonu antu amavulu hiyatuzweñi muloña wawanyuuli atama. Hela chochu, mpinji keña yishiki yikela antu ovwahila akadiluñisha mwituña mwakabula maseleka niwuzweñi (Mas. 72:16) Yihayamisha yakoñeliyi Yesu yatuleñelaña kukuhwelela netu wukweti wuswa nawa wafwilaña kuzatisha ñovu jindi munjila yikatukwasha. (Mat. 14:14-21) Hela chakwila hitunateli kukoña yihayamishaku, ilaña tunateli kuleja antu Izu daNzambi donenawu neyena. Wuprofwetu wamuBayibolu watulejaña chikupu nawu kumbidi tukekala nachihandilu chachiwahi. Chineli twekala aYinsahu jaYehova adihana nawa tweluka yuma yikamwekana kumbidi, komana hitwamonaña netu tukweti mukudi wakulejaku antu acheñuku? (Rom. 1:14, 15) Neyi tutoñojokaña chikupu haniyi nsañu, chumichi chikutusañumuna kulejaku akwetu nsañu yayiwahi yaWanta waNzambi.—Mas. 45:1; 49:3. w15 6/15 1:7, 10, 11

Neyi tulemesha wubwambu wetu naYehova, tukufwilaña kumuzañalesha muyuma yejima yamuchihandilu chetu kushilahu niyuma yitwatoñojokaña. Twafwilaña kwikala ‘namuchima wutooka’ kuhitila mukutoñojoka yuma yitooka, yasweja kuwaha niyuma yaya mpuhu yayiwahi. (Mas. 24:3, 4; 51:6; Fwi. 4:8) Kafwampi, Yehova weluka nindi twawanina wanyi. Weluka nindi twekala nachaaku chakufwila kwila yuma yatama. Ilaña tweluka netu Nzambi waneñaña neyi tuleka yitoñojoka yatama yikuli chatela tuzati nañovu kulonda tuleki kutoñojoka yuma yamuchidiwu. (Kutach. 6:5, 6) Kutoñojoka hachumichi kwatukwashaña kufuukulahu kutoñojoka yuma yitooka. Njila yalema mutwatela kumwekeshela netu twashindamena hadi Yehova hikutwalekahu kulomba kulonda tubuleña kutoñojoka yuma yatama. Neyi tukundama kwakwihi naYehova mukulomba, niyena wukukundama kwakwihi nanetu. Watwinkaña spiritu yindi yajila kulonda yitwinki ñovu yakukaana yitoñojoka yakwila wuvumbi nikutwalekahu kwikala ashinshika. w15 6/15 3:4, 5

Ilukenu nenu iku hikulomba kwamuntu wumuku, muloña hikunakuhosha nawu nyinki kudya “kwami” kunukukeña leluku, ilaña kunakuhosha nawu “twinki” kudya kwetu kutukukeña lelu. Victor nkoñi wañinza wamuAfrica, walumbulwili nindi: “Kakavulu namusakililaña Yehova nami, ami niñodami hitwakamenaña chikupu kutalisha kutunateli kuwana yakudya yitukudya hela netu hinyi wukutufwetela italaku. Amana kwetu atwakamenaña chiwahi hefuku hefuku. Ilaña nalombaña nami antu atukwashaña atwalekuhu kwikala nanjila yakuwaninamu mali chineli akala.” Neyi tukweti yakudya yamafuku amavulu, tunateli kutoñojokelaku amana kwetu abula yuma hela adi muwubanji wadimwekenaña. Hitwatela kuyilombelelaña akwetu hohuku, ilaña twatela kwila yuma kwesekeja nachitunakulomba. Chakutalilahu, neyi tukweti yuma, twatela kuyinkahu akwetu akwakudifukula anakaankili. Tunateli cheñi kuhanaña yawana kumudimu wamukaayi kejima muloña iyi yawana yakwashaña amana kwetu anakaankili.—1 Yow. 3:17. w15 6/15 5:4-6

Mudimu walema wakuhimpa yuma kutalisha hakuloñesha kwaYehova kwahamaseki akwishimwineñahu dehi hamukanda waIsaya 60:17. Atwansi hela amaha muchalala atañahu dehi wunsahu wahosha hakuhimpa yuma hela atiyahu dehi nsañu yamuchidiwu kudi antu amakwawu. Ilaña amana kwetu niahela amonahu dehi aweni yuma chiyahimpikili akweti kukooleka. Dichi eluka chikupu nawu Yehova nakulombola kuloñesha Kwindi kuhitila mudi Mwanta aswanishayi. Eluka nawu akuhwelela yuma yalala nawa wejima wetu twakuhwelela chumichi. Neyi mutiya chasakililañawu chakufuma hamuchima chikukolesha chikuhwelelu chenu nawa mukumukuhwelela Yehova. Hela chakwila tunashimbuli chikupu muchalala, twatela kulejaku antu amakwawu kutalisha hakuloñesha kwaYehova. Hakwila twikali naparadisa yakuspiritu mukanu kaayi katama, katoka nawa mwekala antu abula kukeñañana, hichihayamisha chamakonu. w15 7/15 1:12, 13

Njita yaAmagedoni yikaleñela kulemesha ijina daYehova dajila. Haniyi mpinji, antu ejima adi neyi ampembi “akaya kwawu mukubabesha kwahaya nyaka.” (Mat. 25:31-33, 46) Heseki akafumishahu antu atama ejima nawa izaza deneni dikapuluka chibalu chakukumishaku chalukadi lwasweja. Chineli tunakutalila yuma yayiwahi yidi kumbidi, chumanyi chitwatela kwila hamuntu hamuntu? Kapostolu Petulu amoneneni kusoneka nindi: “Ochu chineli yumiyi yejima yakasuñunuka chochichi, shakamenu nakujila nakwakama Nzambi, nakutalila nakukeña nankashi chakenza ifuku daNzambi . . . Dichi enu akwetu twakeña chimwatalilaña yumiyi, dikwatishenu kulonda akayiwani munashakami chachiwahi [nzo-o], chakadi ihuji, nakubula hakuyinkela muloña kumesu indi.” (2 Pet. 3:11, 12, 14) Dichi twatela kufwila kutwalekahu kwikala atooka kuspiritu nikukwasha Mwanta waKuwunda. w15 7/15 2:17, 18

Kuloñesha kwaYehova kwazataña nañovu hakuhana mali akutuña nachu Matala aWanta ashikilamu. Mudimu wakufunjijeka, kutuña nikutuñulula awuzataña kudi antu azataña mukudikeñela abulaña kufwetawu. Kufuma tuhu muNovember 1, 1999, maluña akudifukwilamu kudifukula kwalala amawahi akubadika ha 28,000 ayituñila yipompelu mukaayi kejima. Chumichi chinayi mukwila nawu muyaaka 15, atuñaña Matala aWanta amaha atanu hefuku hefuku. Azataña nañovu hakwila akwashuku mudimu wakutuña Matala aWanta anakukeñeka kudi kwejima. Iyi ntanjikilu yakukeña yashindamena hanshimbi yamuBayibolu yakwila nawu yuma yayivulu yikweti antu amakwawu yikwashi akwawu anabuli ‘kulonda kwakekali kwesekana.’ (2 Kor. 8:13-15) Chinafumumu, yipompelu yayivulu ayituñila maluña amawahi akudifukwilamu kudifukula kwalala nawa yipompelu yeniyi hiyadi kutwesha kutuña Matala aWanta namali awu awenuku. w15 7/15 4:9-11

Hakwila nawu chinjikijilu chikweti yuma yayivulu chikakoñi mudimu wachu, chatela kumwekana chikupu nawu chinakushikijewa kulonda achimoni kudi antu ovwahilaña kufumba kwaYesu kwakwila nawu ‘tonenuña.’ (Mat. 24:27, 42) Nawa diyi yuma yamwekanaña kufuma tuhu mu 1914. Kufuma tuhu hayina mpinji, yuma yashimunawu muchinjikijilu yinakushikijewa. Chakadi nikujina, tunakushakama ‘kumakumishilu anyaka yamakonu,’ mukapinji kantesha hohu kanashaluku hakwila nyaka yatama ayijilumuni. (Mat. 24:3) Hanu dinu muloñadi akwaKristu makonu chiyatela kutwalekahu nakuchiñilila? Hamuloña wakumwovwahila Yesu Kristu, twatwalekañahu nakuchiñilila. Tweluka cheñi chinjikijilu chakwinza kwindi. Bayi neyi twachiñililaña hamuloña wakukuhwelela yuma yejima yitwatiyañaku, ilaña twakuhwelela wunsahu walala wekala muNsona watuleñelaña kwikala asoñama nawa atona hakuchiñilila kukuma kwayinu nyaka yatama. w15 8/15 2:8, 9

Mwituña dadiha daNzambi twakadiluñisha kwikala nampinji yakwila yuma yitwakeñaña. Muloñadi Yehova chatuleñeliyi nampwila yakukeña kwila yuma yitwakeñaña nawa yatuzañaleshaña neyi chakwila hakeñeleña nindi twakadiluñisheña yumiyuku? (Mukwa. 2:24) Muniyi yuma niyuma yikwawu, Yehova ‘wakekutisha yuma yejima yikweti wumi nayuma yakeñawu.’ Twakeñaña kuzañalala nikwikala nampinji yakunoka, ilaña muzañalu wutwatiyaña hakwila yumiyi waswejelañaku neyi tutwamijaku wubwambu wetu naYehova. Dichi chitwakatiyaña nimuParadisa yahamaseki. Chikuwaha neyi twambula mpinji yakwila yuma yitwakeñaña, kulonda tusambileña kukeña Wanta nikusha muchima hankisu yakuspiritu yidi nawantu jaYehova makonu. (Mat. 6:33) MuParadisa yinakwinza, twakekala namuzañalu weneni wutwabulahu dehi kwikala nawu. Tumwekeshenu mpwila yetu yayeni yakukeña wumi walala chikupu kuhitila mukudiloñesha makonu. w15 8/15 3:17, 18

Yesu wadiña wawanina. Ilaña hadiñayi hamaseki, washakamineña nawantu abula kuwanina. Anvwali jindi, amanakwindi niahelindi adiña awanina wanyi. Atumbanji twindi niwena aditiyileña nawa akeñeleña yuma yakuditiyisha aweni kuwaha. Chakutalilahu, wufuku wakwila Yesu kanda yafwi, atumbanji twindi aditadikishileña nawu “mwinetwinyi aketejawu nawu nabadiki akwawu.” (Luka 22:24) Hela chakwila atoñojokeleña mwaluwa, Yesu welukili nindi atumbanji twindi katataka ekali akwaKristu apama nawa akutuña chipompelu chanuñañana. Wufuku wowumu, Yesu wayilombeleluku atumbanji twindi kwikala anuñañana. Wamulombeli Tata yindi wamwiwulu nindi ekali anuñaña, walombeli nindi: “Neyi chiwekala eyi Tata mudami ninami mudeyi.” Watwalekeluhu nindi: “Kulonda akekali wumu neyi chitwekaletu wumu.”—Yow. 17:21, 22. w15 9/15 1:10, 11

Petulu chendeleñayi Hejiya daÑalaliya, watiyili woma. Muloñadi? Muloña wampepela nimankanda. Yumiyi tunateli kuyesekeja nayihuñu yayivulu nikweseka kunakumonawu akwaKristu makonu. Hela chakwila kukala kunasweji, Yehova nateli kutukwasha kwikala akola. Anukenu yuma yamumwekeneni Petulu. Bayi neyi watachikili kujiya hamuloña wampepela nimankanda amuhumineñaku. Ilaña, Bayibolu yahosha nawu: “Chamweniyi mpepela, hakutiya woma.” (Mat. 14:24-32) Petulu walekeli kutala kudi Yesu nakutachika kushinshika ñovu yampepela. Dichi chikuhwelelu chindi chakeheli. Munjila yoyimu, neyi tusweja kudakamena nakukala kutunakumona, tukutachika kujinoka netu Yehova hanateli kutukwashaku. Twatela kwiluka netu chidi chaswayi kujimbesha chikuhwelelu chetu. Muloñadi? Muloña Bayibolu yahoshaña nawu kujimbesha chikuhwelelu ‘hinshidi yanyakalaña kutulamata.’ (Heb. 12:1) Kufwana Petulu, neyi tushinshikaña hayuma yatama, chikuhwelelu chetu chikuzeya. w15 9/15 3:1, 6, 7

Neyi muntu yayinka chawaana, twasakililaña. Neyi muchilemesha ichi chawana, munateli kuchizatisha. Twasakililaña chikupu chineli Yehova watwinkaña yuma yejima yitwakeñaña hakwila tuhandi nikwikala namuzañalu. Twamonaña chatukeñayi nawa twakeñaña kumwekesha netu twamukeña. Komana dichimwatiyaña ninenu? AIsarela atambwilili yuma yayivulu yayiwahi kufuma kudi Yehova. Hayaaka yayivulu, wayilombweleña nanshimbi jindi nikuyinka yuma yayivulu yakeñeleñawu kulonda atwalekuhu kuhanda. (Kuhit. 4:7, 8) Nawa aIsarela amwekesheleña kusakilila kudi Yehova kuhitila mukwovwahila nshimbi jindi. Chakutalilahu, neyi anakuhana nyilambu kudi Yehova, ahanineña ‘nyikabu yayiwahi yatachi yamahawu’ yamwituña. (Kwid. 23:19) AIsarela elukili nawu Yehova nateli kutwalekahu kuyikiswila neyi atwalekahu kumwovwahila nikumulambula yuma yayiwahi.—Kuhit. 8:7-11. w15 9/15 5:5, 6

Munateli kwiluka ñahi chayikwashañayi Yehova muwumi wenu? Chatachi, Yehova wayikwashili kuwana chalala. Chamuchiyedi, hadaha munakwanuka ifuku dimwayili kukupompa kwawakwaKristu hela kutiyilila mpanji himukuhosha nenu, “Diwukwashu wunakeñeleña!” Chamuchisatu, mwamona Yehova chakulayi kulomba kwenu. Chamuchiwana, hadaha mwakeñeleña kumuzatila nankashi Yehova nawa mwamweni chayikwashiliyi. Chamuchitanu, hekwawu mwalekeli mudimu muloña wayimanishilileña mpinji yakumuzatila Yehova, ilaña mwamweni Nzambi chashikijiliyi mwakanayi kwila nawu: “kukushiya hinakakushiyaku.” (Heb. 13:5) Neyi twikala nawubwambu wakola naYehova, nawa “atooka munyichima,” chikutupelelaña kumona chatukwashañayi muchihandilu chetu. Tunateli kwikala ñahi “atooka munyichima”? Twatela kwikala nayitoñojoka yitooka nikuleka yuma yatama. (2 Kor. 4:2) Twatela kutwalekahu kukolesha wubwambu wetu naNzambi, chumichi chinateli kutukwasha kumona chatukwashañayi Yehova. w15 10/15 1:17, 19

A Griki amakwawu ayili kuchidika chaChipandakenu muYerusalema amweni yuma yakoñeliyi Yesu nawa atiyili kuwaha. Dichi amulejeli kapostolu Fwilipu kulonda adimoni naYesu. Ilaña Yesu wakeñeleña wanyi antu akumukwasha hela kumuhakwilaku. Washili maana hachuma chalema. Nawa wakeñeleña kwila nkeñelu yaYehova, dikwila nawu kuhana wumi windi neyi mulambu. Dichi wayanukishili atumbanji twindi nindi keña yafwi nawa antu ejima amulondaña atela kuhana wumi wawu. Wahosheli nindi: “Muntu wukukeña wumi windi wakawujimbesha; muntu wukuhela wumi windi mumpata yamunu mwishina, wakawuhemba nikukuhanda kwahaya nyaka.” Dichi Yesu wahosheli mazu adi munsona yefuku dalelu. Fwilipu chiña diyi wayilejeli aGriki iyi nsañu yakukundeja. (Yow. 12:20-25) Yesu chadiñayi hamaseki washili maana kumudimu wakushimwina nsañu yayiwahi. Hela chakwila washili maana hakushimwina, ilaña welileña niyuma yikwawu. w15 10/15 3:13, 14

Hela chakwila atumbanji twindi aditadikishileña kakavulu nawu wabadika hakachi kawu hinyi. Yesu wadiwiluku wanyi kuniku kukala. Ilaña, kakavulu wayifumbileña mumesu awunda. Wadiña naluwi nawa wahembeleleña mpinji niluña dadiwahi kwakuyifumbila (Maku 9:33-37) Mwatela kufumba anyanenu muloña mwayikeña. Mpinji yikwawu munateli kuyileja hohu munaluwañeshuwu. Indi neyi anyana kwovwahila nehi? (Yish. 22:15) Imbujolenu Yesu. Twalekenuhu kuyifumba kuhitila mukuyilombola, kudizisha nikuyolola. Tondenu mpinji niluña dadiwahi kwakuyifumbila nawa yifumbenu munjila yaluwi. Elaine wakuSouth Africa wahosheli nindi: “Anvwali jami ambabesheleña wanyi neyi anahili hela chakadi kunleja chinakumbabeshelawu, chumichi chankwashili kwiluka nami anvwali jami adiña ankeña.” w15 11/15 1:5, 6

Chihandilu chawantu chadikwikala ñahi neyi Nzambi wadiña wanyi nakukeña? Antu adi kutwalekahu kudiyuula aweni nikuyiluwañesha kudi nzambi watama, Satana. (2 Kor. 4:4; 1 Yow. 5:19; Chim. 12:9, 12) Kaayi kadi kutaminaku neyi Yehova watukeñeli wanyi. Satana chadikañiliyi nachiyuulu chaNzambi wajinokeli wuswa waNzambi Wakuyuula. Satana wahosheli nindi nateli kuyuula chiwahi kubadika Nzambi. (Kutach. 3:1-5) Yehova wamwitejeli Satana kuyuula kulonda yamwekeshi neyi mwahosheliyi mwalala. Ilaña yuma yafumamu yamwekesha nawu antu hela Satana hiyanateli kwikala ayuuli amawahuku. w15 11/15 3:3, 4

Kudizoza kwatukwashaña kwovwahila chishina chaheniyi Yesu. Walumbulwili nindi: “Munatiyi cheliluwu nawu, keñaku mukwenu, helaku chilumbu cheyi. Ilaña ami nukuyileja nami keñenu ayilumbu jenu, ninawa ayikabishaña, yilombelenu; kulonda mwikali anyana kaTata yenu wudi mwiwulu, muloña yena watuntwishaña itañwa dindi nihadi atama nihadi amawahi, wanokeshaña nvula nihadi aloña nihadi aheña.” (Mat. 5:43-45) Chineli tudi ambuña Yehova, twatela kukeña ayilumbu jetu hela anakutukabisha chamuchidinyi. Mpinji yejima, twatela kumwekesha netu twamukeña Yehova niakwetu. Hela chakwila antu atuhela nawa akaanaña nsañu yitwashimwinaña, twayikwashaña neyi adi mukukala. w15 11/15 4:17, 19, 20

Kufuma hayina mpinji, antu jaNzambi anazatishi chawana chedimi hakumuhameka Yehova nikuleja amakwawu ijina dindi. Chayinu mpinji, antu jaNzambi anazatishi ichi chawana kubalumuna Bayibolu kulonda antu amavulu amwiluki Yehova. Kwekala maBayibolu amavulu, ilaña amakwawu oloka nankashi wanyi. Hakwila abalumuni Bayibolu yoloka, Komiti yaNew World Bible Translation yalondeleli yikuma yisatu hakubalumuna: (1) Kulemesha ijina daNzambi nikudizatisha Mwizu dindi neyi chadizatishiluwu munyikanda yatachi. (Mat. 6:9) (2) Kubalumuna nsañu yasonekeluwu hatachi hezu-hezu neyi chinatwesheki. Hanakali, asonekeleña munatalishi nsañu. (3) Kuzatisha idimi dapela kutaña nikutiya.—Nehe. 8:8. w15 12/15 2:1, 2

Toñojokenu chuma chadi kuyimwekena amashidika neyi elukili wanyi mwatalishili chivumina! Neyi tubula kulumbulula yuma chatiyakana, antu akuluwankana hela akukuhwelela yuma yakutwamba. Hela chakwila tunakukeña kuhosha munjila yatiyakana, twatela kuhosha mazu akasawuntu wanyi. (1 Kor. 14:9) Mumukanda waMatewu kapetulu 5 nakushika ku 7 mwekala chakutalilahu chachiwahi chamwekeshaña Yesu chatondeliyi mazu apela kutiya. Mumpanji yahaniniyi, hakeñeleña kusehesha antu kuhitila mukuzatisha mazu akala kutiya hela amukunkulwayuku. Nawa hahosheli mazu ahilishili antuku. Yesu washimwini yuma yalema yakunama, ilaña wayihosheli munjila yapela kutiya. Chakutalilahu, Yesu walejeli atumbanji kubula kwakama yakudya yahefuku. Dichi walumbulwili nindi Yehova wadishaña atujila mpinji yejima. Nkumininaku, wayihwili nindi: “Enu himwayibadika nankashi kulemaku?” (Mat. 6:26) Yesu wazatishili awa mazu munjila yapela kulonda yayishiki antu hanyichima. w15 12/15 3:13, 14

Kukeña amanakwetu kwatalisha mudihi? Kwatalisha mukukeña kwekalaña muchisaka hela nawamabwambu. (Yow. 11:36) Twahoshaña hohu wanyi netu tudi amanakwetu niahela. Ilaña tudi amanakwetu niahela. (Mat. 23:8) Pawulu wahosheli nindi: “Keñañanenu nawana kwenu nawushona; itejenu mwinenu abadiki kulema.” (Rom. 12:10) Awa mazu amwekeshaña chitwakeña amanakwetu. Iku kukeña amanakwetu, kushilahu nikukeña kwawakwaKristu kwakwashaña antu jaNzambi kwikala amabwambu nawa anuñañana. AkwaKristu alala ejima ‘hiyamanakwetu’ hichikweti muloña netuña kwafumawuku. (Rom. 10:12) Yehova natudizishi kukeñañana wumu namukwawu hamu neyi amanakwamuntu.—1 Tesa. 4:9. w16.01 1:5, 6

Kumukeña Yesu kukutusañumuna kushimwina nikudizisha neyena. (Mat. 28:19, 20; Luka 4:43) Mumpinji yaChanukishu, kwila muzataku wupayiniya wakukwasha wamaora 30 hela 50 mumudimu wakushimwina nehi? Iyala wudi nayaaka 84 wafwisha mumbanda watoñojokeleña nindi wukutwesha wanyi kuzata wupayiniya muloña wakukula nikukatakata. Ilaña apayiniya amwiluña dindi amukwashili. Amuloñesheleli ñendelu nikumwinka iluña datela kushimwinayi. Chafuminumu, iwu manakwetu washikijili maora 30. Kuduhu muntu wumwatela kukwasha muchipompelu chenu kulonda yazati wupayiniya wakukwasha muMarch hela April? Bayi neyi antu ejima anateli kuzata wupayiniyaku, ilaña tunateli kuzatisha mpinji niñovu yetu hakuzataku mudimu waYehova. w16.01 2:7, 11

Neyi chakala kwiluka majina awantu awayishewa makonu, anyikoku acheñi ‘akaya’ ñahi nawu? Bayibolu yahosha nawu ‘amayala ikumi’ “akakwata kwihina dakaYudeya, nawu, tuyi nenu, muloña tunatiyi nawu Nzambi mwekala nindi.” Iyi vasi yatena kaYudeya wumu. Ilaña nhoshelu yakwila nawu “tuyi nenu” nawa cheñi nawu “mwekala nindi” yatenaña antu amavulu. Ichi chinayi mukwila nawu kaYudeya himuntu wumu hohuku, ilaña wemenañaku mukanka wejima wawawayishewa. Anyikoku acheñi eluka chumichi nawa amukalakelaña Yehova hamu nawu. Hiyatela kwiluka majina awantu ekala munidi izanvu kulonda ayilondeñaku. Yesu diyi Nlomboli yetu, nawa Bayibolu yatuleja nawu twatela kumulonda yena hohu.—Mat. 23:10. w16.01 4:4

Kufuma tuhu hampinji yakuvwalika kushika nikukufwa twakeñaña kutukeña. Antu ejima akeñaña kuyimwekeshela kukeña, bayi neyi kukeña kwekala muwuluwi hohuku. Twakeñaña kutukeña chikupu kudi Yehova. Antu amavulu eluka wanyi nawu anateli kwikala amabwambu jaNzambi muloña amumonaña wanyi nawa wabadika. Ilaña etu tweluka walala. Muloña Bayibolu yahosha hadi antu ekalili amabwambu jaNzambi. Twatela kudizila kudi awantu. Muloñadi? Muloña kwikala nawubwambu naNzambi dichuma chalema nankashi. Tushinshikenu hadi Abarahama. (Yak. 2:23) Wekalili ñahi ibwambu daNzambi? Wubwambu waAbarahama naNzambi washindameneni hachikuhwelelu nawa amutenaña nawu “nkakulula yawakwakukuhwelela ejima.”—Rom. 4:11. w16.02 1:1, 2

Hela chakwila tata yindi wadiña mwanta watama muYuda, Hezekiya wekalili wamuwahi. (2 Anya. 18:6) Hezekiya wakeñeleña kumanisha kukala kwaleteliyi tata yindi. Wawayishili tembeli, wamulombeli Nzambi kwanakena nshidi jawantu nikukisañana ankishi mwituña dejima. (2 Kushi. 29:1-11, 18-24; 31:1) Kuhiñahu, chelili mwanta wawaAsiriya, Senakeribi yakeñi kulukuka Yerusalema Hezekiya wamwekesheli kuhamuka nichikuhwelelu. Wakuhweleli muwukwashu waYehova nawa wakolesheli antu jindi. (2 Kushi. 32:7, 8) Mpinji yimu Hezekiya wadinkeli wanta, ilaña chamufumbiluwu kudi Yehova wadizozeli. (2 Kushi. 32:24-26) Mwamweni, twatela kudizoza neyi cheliliyi Hezekiya. Wetejeli wanyi chihandilu chawantaña jindi kukisañana chihandilu chindi. Ilaña, wamwekesheli nindi Yehova diyi ibwambu dindi. w16.02 2:11

Ninenu munateli kusambila kwikala ashinshika kudi Yehova dinu kudi antu kuhitila mukwikala naluwi. Chakutalilahu, hadaha muneluki nenu manakwenu nakoñi nshidi yahamesu bwi-i. Mukukeña kwikala washinshika kudi yena, sweje-e neyi hibwambu denu hela hintaña yenu. Ilaña mukwanuka cheñi nenu mwatela kwikala ashinshika kudi Yehova. Kufwana Natani, ovwahilenu Yehova ilaña ikalenu naluwi kudi manakwenu. Mulejenu yayi nakulejamu aeluda nawa watela kuya swayi. Neyi kuya nehi, mwatela kuya nakuyileja aeluda. Neyi mwila mwenimu, mukwikala ashinshika kudi Yehova. Nawa mukumumwekeshela manakwenu luwi muloña aeluda akumukwasha kwikala nawubwambu wawuwahi naYehova. Akumufumba mukuwunda nawa munjila yayiwahi.—Lev. 5:1. w16.02 4:14

‘Kumwakama Nzambi’ kwatalisha mudihi? Kumwakama Nzambi kwabombelamu nyidimu yimwazataña muchipompelu, yidi neyi kuyaña nakupompa nikushimwina. Ilaña mwabombela cheñi yuma yabulaña kumonawu antu, yidi neyi kulomba nkawenu kudi Yehova nikudiza halwenu. Muntu wunadihani kudi Yehova watoñojokaña wanyi nindi iyi nyidimu hichisenda. Watiyaña neyi chatiyiliyi Mwanta Davidi wahosheli nindi: “Natiyi kuwaha nakwila muchima weyi, eyi Nzambi yami, mwalala, nshimbi jeyi jidi mukachi kamuchima wami.” (Mas. 40:8) Neyi wudihana kudi Yehova nawa wupapatishewa, wukwikala nawubwambu nayena. Dichi, mwatela wanyi kushindamena hadi anvwali jenu hela muntu wudi wejima hakumuzatila Yehova. Yilwilu yenu yakujila nikumwakama Nzambi yikumwekesha chikupu nawu mweluka chalala nawa mwalondelaña nshimbi jindi. Mukushikahu kupapatishewa. w16.03 2:10, 12, 15

Nshimbi yamwinkeluwu Mosi yayikiñili aIsarela kuyilwilu yatama nikunsakililu yakutwamba yadiña munyunza yikwawu. Neyi aIsarela amwovwahila Nzambi, akutambwila nkisu. Neyi amudiwula, adi kumona jomisha mbaña. Nshimbi jajiha jakeñekeleña hamuloña wukwawu. Nshimbi yayikwashili aIsarela kudiloñesha nachuma chikamwekana munkeñelu yaYehova, kwinza kwaMesiya, Yesu Kristu. Nshimbi jayanukishileña aIsarela nawu adiña awanina wanyi. Jayikwashileña kwiluka nawu akeñekeleña ifutu danyiloña, dikwila nawu, mulambu wawanina wunateli kufumisha nshidi jawu chikupu. (Ŋal. 3:19; Heb. 10:1-10) Kubombelahu, Nshimbi jakiñili chisaka mwadi kuvwalikilayi Mesiya nikuyikwasha aIsarela kumwiluka neyi namwekani dehi. Mwamweni, Nshimbi yadiña hohu neyi chuma chakuyilombola hakapinji kanti hela netu “nkuluñaña,” sampu Kristu nenzi. w16.03 4:6, 7