April

Mpinji yimu, wadiña nawubwambu wawuwahi naYehova. Hela chochu, iwu muntu wakuspiritu watachikili kukeña nindi antu adifukuleña kudi yena. Chatela yaleki kutoñojoka hayuma yatama, watwalekeluhu kutoñojoka nawa yakulili nakuvwala nshidi. (Yak. 1:14, 15) Tweluka netu iwu chileñaleña wakuspiritu hiSatana, ‘wabulili kwimana munsañu yalala.’ Wadikañili naYehova nakwikala ‘tata yantwambi.’ (Yow. 8:44) Kufuma hampinji yadikañiliyi, Satana wadimwekesha nindi hichilumbu muneni waYehova nawa hakweti wubwambu nawantuku. Nkumbu jamwinkawu Satana jamwekeshaña nawu watama chikupu. Ijina daSatana daya mukwila nawu “Mukwakudimbulula,” dikwila nawu iwu muntu watama wakuspiritu wadikañaña nachiyuulu chaNzambi; wachihela nawa wachizuñishaña. Sweje-e dinu, Satana wakeñaña nindi chiyuulu chaYehova chileki kuyuula. w15 5/15 1:1, 2

Kwekala yuma yikwawu yitwahetelañamu neyi tudizaña Bayibolu kubadika hakwiluka yuma yitunateli kwila kulonda twikali nawubwambu wawuwahi naYehova. Yatukwashaña cheñi kusweja kukeña nshimbi jaYehova jajiwahi jatuleñelaña kumukeña chikupu. Neyi tukumukeña Nzambi chikupu niyena watukeñaña hama nawa mpanda yetu nayena yakolaña. Hakwila tukundami kwakwihi naYehova, twatela kwikala nayitoñojoka yayiwahi hakudiza Bayibolu. Mukanda waYowanu 17:3 wahosha nawu: ‘Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.’ Dichi, nkeñelu yetu hiyatela kwikala yakudiza hohu yumaku, ilaña twatela ‘kumwiluka’ Yehova chachiwahi neyi Muntu. (Kwid. 33:13; Mas. 25:4) Neyi tumwiluka Yehova neyi ibwambu detu chikupu, hitunateli kwakamena neyi nsañu yikwawu yamuBayibolu hiyalumbulula muloña waweni weliliyi mwenomuku. w15 4/15 3:6-8

Katataka, izanvu dawaeluda dakwashili amana kwawu kukulilaku kuspiritu ayihwili njila yazatishañawu hakudizisha amakwawu. Hela chakwila chihandilu chanawa aeluda chashiyashana, ilaña ashimwini yuma yoyimu. Chumichi chamwekeshañadi? Chamwekeshaña nawu kufumba kwashindamena muBayibolu kwakwashaña antu adizaña ‘ejima muyipompelu yejima’ neyi chochichadiña mumafuku akapostolu Pawulu. Ntañishi watela kukeña njila yayiwahi yakwilukilamu muntu wunakudizishayi. Neyi chochadimañayi ndimi hela kuwahisha iseki henohu kanda yatumbi mbutu, dichi ntañishi niyena watela kuloñesha muchima wamuntu henohu kanda yatachiki kumudizisha yuma yayiha. Indi ntañishi nateli kukeña ñahi njila yayiwahi yakwilukilamu muntu wunakudizishayi? Kuhitila mukulondela njila yoyimu yazatishiliyi Samweli haloñesheleñayi Sawulu kulonda yalomboli aIsarela.—1 Sam. 9:15-27; 10:1. w15 4/15 1:11, 12

Dichi, yuma yayivulu yamukanu kaayi yambuka nanshimbi yamuBayibolu. Kafwampi bayi neyi yuma yejima yamukaayi yatamaku. Hela chochu, twatela kwiluka netu Satana nateli kuzatisha yuma yamukaayi kulonda yeluki yuma yitwafwilaña nikutuhuñumuna munshidi hela kutuleñela kutachika kukeña kaayi nakudiwula kudifukula kwetu kudi Yehova. (1 Yowanu 2:15, 16) Chakadi nikujina, kukeña kaayi kwayiluwañesheli akwaKristu amuyaaka nkulakaji yakusambila. Chakutalilahu, Pawulu wasonekeli nindi: ‘Demasi nanshiyi dehi, muloña nakeñi yuma yamakonu.’ (2 Tim. 4:10) Bayibolu hiyashimuna jiika yuma yayeni yamukaayi yamuleñeleli Demasi yamushiyi Pawuluku. Hekwawu Demasi watachikili kufwila maheta kubadika mudimu wamukalakeleleñayi Yehova. Neyi diyi yuma yafwilileñayi, dikwila nawu Demasi washaliluhu kukooleka kwakuwahi mumudimu waNzambi, wahetelelumu mwodi? Komana kaayi kadi kumwinka Demasi yuma yadi kubadika nkisu yadi kumwinkayi Yehova yakwikala mulunda waPawulu?—Yish. 10:22. w15 5/15 2:10, 11

Yesu welukili chayandileñawu antu amakwawu, hela chakwila yena hayandileñaku. Chakutalilahu, atuzweñi achinineña akulumpi jayipompelu adiña nakuyidimba nikuyikabisha nanshimbi jajivulu jatuñiluwu antu. (Mat. 23:4; Maku 7:1-5; Yow. 7:13) Yesu hiyamudimbili hela kumuchinishaku, ilaña welukili kukala kwamweneñawu antu. Dichi, “chanamoniyi mazaza awantu, hakuyitiyila wushona, muloña akabakeni, apalañeni neyi nyikoku yakadi kabiña.” (Mat. 9:36) Kufwana Tata yindi, Yesu wadiña nawushona nikukeña. Yesu chamweniyi antu anakuyanda, wayikwashili muloña wayikeñeli. Dichi wamwekesheli kukeña neyi kwaTata yindi. Hanyima yakushimwina chikupu, Yesu niapostolu indi akeñeleña kuya kwakankawawu kulonda anookuhu. Muloña watiyilili wushona izaza dadiña nakumuhembelela, Yesu watachikili ‘kuyitañisha yuma yayivulu.’—Maku 6:30, 31, 34. w15 5/15 4:3, 4

Mwana kaNzambi wawedi diyi chakutalilahu chacheni chamaana aYehova asweja kukunama. Maana aNzambi amwekeneni mudi yena nawa wakalakeleña hamu naTata yindi neyi “mukalawenu.” Fwikijenu muzañalu watiyiliyi Yesu hakumona Tata yindi ‘nakuloñesha mawulu’ ‘nikufunjeka hawushimatilu weseki.’ Hela chakwila walemesheli iyi yuma yakadi wumi, Mwana kaNzambi wawedi ‘watiyileña kuwaha nankashi nawanyana kawantu.’ (Yish. 8:22-31) Eñañi, Yesu watachikili kutiya antu kuwaha henohu kanda yekali muntu. Mukuhita kwayaaka, hakwila yamwekeshi nindi wamwovwahila nikumukeña Tata yindi kushilahu tuhu nikukeña kwakeñayi chikupu ‘anyana kawantu,’ Wedi waNzambi ‘wadikehesheli’ nakwinza kulonda yekali neyi chekalawu antu. Welili mwenimu kulonda yekali ‘ifutu dakukuula nachu antu amavulu.’ (Fwi. 2:5-8; Mat. 20:28) Wakeña antu nankashi. w15 6/15 2:1, 2

Mwasakililaña yuma yayililayi Yehova? Neyi mwasakililaña, komana dinu mwatela kudihana nikupapatishewa. Neyi mudihana munakumukana Yehova nenu mukwilaña nkeñelu yindi haya nyaka. Komana mwatela kutiya woma kumukana Nzambi? Inehi! Yehova wakeñaña nindi mwikaleña namuzañalu nawa wakakiswila antu elaña nkeñelu yindi. (Heb. 11:6) Mukwikala namuzañalu muchihandilu chenu neyi mudihana kudi Yehova nikupapatishewa. Manakwetu wudi nayaaka 24 wapapatisheweli henohu kanda yekali kampululu, wahosheli nindi, “Nadi kwilukisha yuma chiwahi neyi nadiña nakula dehi, ilaña kufuukulahu kudihana kudi Yehova kunankwashi kubula kwila yuma yamukaayi.” Yehova wakeñaña nindi mwikaleña namuzañalu. Ilaña, Satana wekala nalwisu nawa wayakamenaña wanyi. Kwosi yuma yayiwahi yikuyinkayi neyi mutachika kwila nkeñelu yindi. Wukuyinka ñahi yuma yabulayi? w16.03 2:16, 18, 19

Hakwila wubwambu wenu naYehova wukoli, mwatela kwiluka nenu watiya kulomba kwawantu ejima. Toñojokenu chumichi: Kufuma tuhu mpinji yadiñayi mwiwulu, Yesu wamweneña Yehova chakwileñayi kulomba kwawantu Jindi. Kuhiñahu, hampinji yazatileñayi mudimu windi hamaseki, Yesu wazatishileña kulomba neyi njila yakuhanjekelamu naTata yindi wamwiwulu. Neyi welukili nindi Yehova hatiyaña mwalombañawu antuku, komana wadi kulomba wufuku wejima? (Luka 6:12; 22:40-46) Yesu neyi welukili nindi kulomba kwakwashaña hohu muyitoñojoka, komana wadi kuyidizisha atumbanji twindi chakulomba? Chakadi nikujina, Yesu welukili nindi kulomba diku kwatukwashaña kutiyañana naYehova. Anetu nawa tunateli kukuhwelela netu Yehova “watiyaña mwalombañawu antu.”—Mas. 65:2. w15 4/15 3:11, 13

Neyi munakulomba hamu nawanyanenu, akudiza kushindamena hadi Yehova. Neyi munakulomba, bayi mulomba hohu nenu Yehova yakwashi anyanenuku, ilaña yayikwashi ninenu aweni. Ana wakuBrazil, wahosheli nindi: “Anvwali jami neyi adi nakukala hela neyi ankaka akata, amulombeleña Yehova kulonda yayikwashi kuumika mukukala kwamweneñawu nikuyinka maana akufuukula chiwahi. Hela kukala kusweji ñahi, ashileña yuma yejima mumakasa aYehova. Chafuminumu, nadizili kushindamena hadi Yehova.” Neyi anyanenu atiya munakulomba kudi Yehova kuyikwasha kushimwina kudi antuñi nenu hela munakulomba nenu mukulumpi wamudimu yakayiteji kuya kukupompa, akwiluka nawu mwashindamenaña hadi Yehova nawa niwena akushindamenaña hadi Nzambi. w15 11/15 1:7, 8

Njila yimu yayiwahi muwatela kukoleshela wubwambu weyi naYehova hikutoñojoka chiwahi hefutu danyiloña, chawaana chalema chatwinkayi Nzambi. (2 Kor. 5:14, 15; 1 Yow. 4:9, 19) Neyi wila mwenimu, wukumwekesha kusakilila hanichi chawaana chachiwahi nawa chalema. Kusakilila kweyi kwachawaana chefutu danyiloña tunateli kukwilumbulula muniyi njila: Fwikijaku wunakunwina, dichi muntu yakupulwisha. Komana wukuya kwitala chakadi kumusakilila iwu muntu hakukupulwisha? Inehi! Wukumusakililaña mpinji yejima iwu muntu wunakupulwishi. Munjila yoyimu, twatela kumusakilila chikupu Yehova niYesu hakutwinka ifutu danyiloña. Muloña wumi wetu wekala mumakasawu. Tukweti kuchiñeja kwakushakama haya nyaka hamaseki muParadisa muloña atukeña! w16.03 2:16, 17

Yehova welukili nindi Mwanindi wasemuka nkawidi wukutwalekahu kwikala washinshika, iwu mwana wadiña washinshika kudi yena hadiñayi mwiwulu hadi yaaka yayivulu. Hadiñayi hamaseki Yesu wahitili mukukala kwasweja, wadiña washinshika nawa wahakwililuku wuswa waYehova wakuyuula. Twatela kumusakililaña chineli ifutu daYesu dahaniniyi datwinka kukooleka kwakushakama haya nyaka mwituña dadiha daNzambi. Kapostolu Yowanu wahosheli nindi: “Kukeña kwatukeñayi Nzambi kwamwekeni hatemesheliyi Nzambi Mwanindi wumu hohu mumpata yamunu mwishina, kulonda tuhandili mudi yena. Kweniku diku kukeña; hiyetu twakeñeli Nzambuku, yena diyi watukeñeletu, hakutemesha Mwanindi ekali ifutu danyiloña yetu.”—1 Yow. 4:9, 10. w15 11/15 3:13, 14

Wejima wetu twaswana nshidi nikufwa kudi Adama, dichi kwosi muntu wukuhosha nindi, “Ami nateleli ifutu danyiloña wanyi.” Nikambuña Nzambi washinshika chikupu watelela ifutu danyiloña. Wejima wetu atwanakena dehi nyikudi yetu yejima. Kukeña niluwi lwaYehova lwatela kutusañumuna kwiladi? Neyi kudi muntu wayivulumwini, yinu diyi mpinji yayiwahi yakwimbujola Yehova “waanakenaña.” (Nehe. 9:17; Mas. 86:5) Neyi twikala naluwi lwasweja neyi lwaYehova, tukuyitiyila akwetu luwi nawa tukuyanakena chakufuma hamuchima. Neyi tubula kukeña nikuyanakena amanakwetu, Yehova wukutukeña wanyi nawa hakutwanakenaku. (Mat. 6:14, 15) Neyi twanakena akwetu, hichikutukataña kumuchimaku nawa chikutukwasha kwikala namuzañalu kumbindi. w16.01 2:5, 15-17

Yesu wahosheli awa mazu adi hewulu kulonda yakwashi Petulu niatumbanji amakwawu kufwikija yuma yakumbidi.Ateleleli kutoñojoka hamudimu wakazatañawu munfulumendi yikayuula iseki dejima nakuleta nkisu yayiwahi kudi antu ovwahila. Ambuña Yehova ahamaseki ahetelañamu mpinji yejima neyi atoñojoka chikashikijewa yikaninu yaNzambi. Abeli welukili yuma yayivulu kutalisha hankeñelu yaNzambi hakwila yafwikiji chihandilu chachiwahi chakumbidi, wadiña nachikuhwelelu nawa wachiñejeleña yuma yakanayi Nzambi. Abarahama wadiña nachikuhwelelu chakola muloña ‘wamweni’ kushikijewa kwawuprofwetu waNzambi wahosheleña hadi ‘mwana’ akaninuwu. (Kutach. 3:15) Mosi ‘watalilili chikupu hesomu damba kamusomwenawu,’ wadiña nachikuhwelelu nawa kukeña kwamukeñeliyi Yehova kwaswejeli. (Heb. 11:26) Chikuhwelelu chetu nikukeña kutwamukeña Nzambi kunateli kutukwasha kufwikija chikashikijewa yikaninu yaYehova. w15 5/15 3:17, 18

Muntu wakeñaña kwikala mukwaKristu wapama wembujolaña chakutalilahu chaYesu nawa wakeñaña kutiyisha Bayibolu chikupu. Wasandujolaña yuma yakunama yamuNsona, muloña weluka nindi “kudya kwakola kwambala kwawantu apama dehi.” (Heb. 5:14) MukwaKristu wapama wakeñaña kwiluka ‘nsañu yalala’ yamuBayibolu. (Efwes. 4:13) Dihulenu nenu: ‘Natañaña Bayibolu mafuku ejima? Nikweti ndandanda yakudiza kwahalwami? Twekalaña nakudifukula kwachisaka mulungu nimulungu?’ Neyi munakudiza Bayibolu, keñenu yishina yinateli kuyikwasha kwiluka chatoñojokañayi Yehova nichatiyañayi. Kuhiñahu zatishenu iyi yishina neyi munakufukula. Neyi mwila mwenimu mukukundama kwakwihi naYehova. w15 9/15 1:5, 9, 10

Dichi, Yesu weluka chachiwahi chekala iseki. Weluka chakuzatisha nikuyuula yuma yejima yekalahu munjila yayiwahi. Hampinji yadiñayi hamaseki, Yesu wamwekesheli nindi diyi “ñovu yaNzambi” kuhitila mukufwomona yuma yañovu yadimwekenaña. Fwikijenu chumichi: Kristu nazeyi namudimu wakushimwina. Mankanda anakweta kuwatu nakusamona menji nikafulolu muwatu. Hela chakwila kudi ipumba danvula yampepela nawa watu wunakupitoka nañovu, Yesu natwalekuhu kukama. Nakukeña kunooka. Atumbanji anatiyi woma hiyakumuhindwisha Yesu nakubilela nawu: “Tunafwi!” (Mat. 8:25) Yesu chinahindukiyi hakumwenesha mpepela nikaluñalwiji namazu akwila nindi: ‘Mwenaku, wundaku nzo-o’! nimpepela yakunkileña yileka nikuleka. (Maku 4:39) Munjila yikwawu, Yesu nakuleja mpepela nikaluñalwiji kumwena nikutwalekahu kumwena. Yumanyi yinafumumu? ‘Kumwena nibetete-e.’ Yesu namwekeshi nindi wukweti ñovu chikupu. w15 6/15 1:12-14

Hakutena hakudya kwetu kwamafuku ejima, chakadi nikujina Yesu watalishili kuyuma yitwakeñaña chikupu. Dichi, watwalekeluhu nakulumbulula Nzambi chavwikañayi nkenu yamumpata, kuhiñahu wahosheli nindi: ‘Abuli kuyivwikenu chakubadika, enu mukweti chikuhwelelu chantesha?’ Wakunkulwili nakufuntila haniku kufumba kwalema kwakwila nawu: “Bayi mwakama ifuku dakumadikuku.” (Mat. 6:30-34) Chumichi chamwekeshaña nawu hitwatela kufwila kwikala namaheta amavuluku, ilaña twatela kwikala hohu nayuma yantesha yitwakeñaña hefuku hefuku. Yuma yitwakeñaña yabombelamu kwikala nahakukaama hahawahi, mudimu watela kutukwasha nachisaka chetu nikwikala namaana akutukwasha kufuukulahu chiwahi neyi tunakati. Hela chochu, neyi tukulombaña hohu hayuma yakumujimba yitwakeñaña, tukumwekesha netu twasha maana kuyuma yimu hohu. Tukweti yuma yakuspiritu yitwakeñaña yasweja kulema kubadika yuma yejima. Mwanta wetu wahosheli nindi, ‘Muntu hatela kuhanda namankendi hohuku, ilaña namazu ejima afumaña mukanwa kaYehova.’ (Mat. 4:4) Dichi twatela kutwalekahu nakulomba netu Yehova yatwalekuhu kutwinka yakudya yakuspiritu hampinji yatelela. w15 6/15 5:4, 7, 8

Komana twamulombaña Nzambi kutukwasha kuhemba kanshinshi ketu hampinji yitudi mukweseka? Nkulilu yetu hela yaaku yetu yayikulu yinateli kutuleñela kukeña yililu yahelayi Yehova. Hela chochu, nateli kutukwasha kuhimpa kulonda tutwalekuhu kumukalakela munjila yetejayi. Mwanta Davidi welukili chumichi. Hanyima yakwila wuvumbi naBatisheba, Davidi wamulombeli Yehova nindi: “Nleñelumu muchima wutooka . . . mbalumwini spiritu yayiha yakashinshi mukachi kami.” (Mas. 51:10, 12) Mujimba wetu wazeya wunateli kutiya kuwaha nayililu yatama, ilaña Yehova nateli kutwinka muchima wakumwovwahila. Hela chakwila yitoñojoka yatama yinashimati chikupu nawa yinakufwila kuluwañesha yitoñojoka yetu yitooka, Yehova nateli kukiña nyendu yetu kulonda twovwahili nshimbi jindi nikutwesha kujilondela. Nateli kutukwasha kuyuula yitoñojoka yetu yatama.—Mas. 119:133. w15 6/15 3:5, 6

Anashimbuli mukuloñesha anukaña mpinji yadiña yipompelu nankoñi wamuchipompelu chatela kwikali izanvu dawaeluda, mpinji yadiña matuña nankoñi wamutayi chatela kwikali Komiti yaMutayi, nimpinji yahanineñawu nshimbi kudi presidenti waWatch Tower Society chatela kwikali Izanvu Dalombolaña dawaYinsahu jaYehova. Hela chakwila awa amana kwetu ejima adihana ayikwashileña kudi ankwashi ashinshika, muntu wumu hohu diyi wadiña nakufuukula mwakwilila muyipompelu, hatusanji twamutayi nihakasanji keneni kamukaayi. Muma 1970, ahimpili kulonda mazanvu awa aeluda alomboleña chatela muntu wumu alomboleña. Kuhimpika kwashindameneni hayuma yayivulu yelukawu yashimunawu muNyikanda Yajila. Chatela muntu wumu hohu yafuukuleña yuma yejima, kuloñesha kwaNzambi kwahetelaña muyililu yayiwahi yawaaeluda ejima ‘yamukunkulu mudi antu’ atwinkayi Yehova.—Efwes. 4:8. w15 7/15 1:14, 15

AkwaKristu alala atela kwikala ashinshika nakubula kudiñija munsañu yamatuña nachiyuulu mpinji yejima, bayi neyi hampinji yanjita hohuku. Muloñadi? Muloña antu ejima adihana kudi Yehova amukana nawu akumukeña, kwikala ashinshika nikumwovwahila. (1 Yow. 5:3) Twafwilaña kwovwahila nshimbi jaNzambi jaloña kudi kwejima kutwashakamaña nawa hichikweti muloña nankulilu yetu, kwituña kutwafuma hela chisemwa chetuku. Kwikala ashinshika kudi Yehova niWanta windi kwabadika kulema yuma yejima. (Mat. 6:33) Kashinshi kamuchidiwu kakeñekaña hakwila akwaKristu abuli kudiñija mumadombu ejima amukanu kaayi. (Isa. 2:4; Yow. 17:11, 15, 16) Antu abula kukuhwelela yuma yitwakuhwelela alemesha chikupu ituña dawu, muchidi wawu, chisemwa chawu niizanvu dayisela damwituña dawu. Kukala kwafumaña mukulemesha yuma yamuchidiwu kwaleteshaña kudibecha, madombu nawa mpinji yikwawu kwaleteshaña kujilumuna antu amuchidi wacheñi. Chikuwaha neyi mukwambuka kunsañu yamatuña nachiyuulu kulonda mubuli kudiñijamu. w15 7/15 3:1, 2

Chamanishawu kutuñawu Itala daWanta, twatela kudihemba nawunyonji kulonda dimwekesheña yililu yaNzambi wutwadifukulañaku, Nzambi wakuloña. (1 Kor. 14:33) Bayibolu yesekejaña kujila niwunyonji wakuspiritu nawunyonji wakumujimba. (Chim. 19:8) Dichi, neyi antu anakukeña kwikala nawuselewa waYehova, atela kwikala awunyonji. Kwesekeja naniji nshimbi, twatela kutiyaña kuwaha hakutambika antu akweti mpwila kukupompa kwetu, nikukuhwelela netu wunyonji Wetala daWanta wakwashaña nsañu yayiwahi yitwayishimwinaña. Akwiluka nawu twadifukulaña kudi Nzambi wajila nawa keña yabalumuni iseki kwikala paradisa yakadi majilu. (Isa. 6:1-3; Chim. 11:18) Hichikweti muloña nayitoñojoka yawantu hela chekala yumaku, twatela kuhemba Itala detu daWanta nawunyonji muloña demenañaku ijina daYehova nawa hiiluña dakudifukwila kudifukula kwalala.—Kuhit. 23:14. w15 7/15 4:13-15

Chelukiluwu nawu Kristu watachikili kuyuula mu 1914, atumbanji twaYesu elukili nawu kukuma keña kwinzi kala mpinji. Elili mwenimu kuhitila mukudikita chikupu mumudimu wakushimwina Wanta. Yesu washimwini nindi nateli kwinza mpinji yacheñi, “hedikilaña ikombu, kwiji budidi.” Neyi chumichi chamwekeni, atumbanji twindi adi kwiladi? Wahosheli nindi: ‘Tonenuña.’ Hela chakwila hanahiti mpinji yeneni kufuma hitwatachikili kuhembelela, hichinayi mukwila nawu kukuma kuchidi kwakulehuku hela hikwakenza mwikiñu detuku. Mwituña dadiha, tukekala nawunsahu wakatuleñela kutoñojoka hayuma yejima yashimwineñahu dehi yakundama kumakumishilu anyaka yamakonu netu chalala yamwekeni. Neyi tutoñojokaña chikupu yuma chiyamwekeni, chumichi chikakolesha chikuhwelelu chetu mudi Yehova niyikaninu yindi yikekala kanda yishikijewi. (Yosh. 23:14) Chakadi nikujina tukamusakililaña Nzambi ‘washili mpinji niyilaaka yatoñweliyi mumuchima windi,’ watukonkomweneni kulonda twiluki netu ‘yuma yejima yashikili kwakwihi nakukuma.’—Yil. 1:7; 1 Pet. 4:7. w15 8/15 2:10, 11, 14

Antu amavulu amonaña hela kwila yuma yashimunawu muBayibolu nawu himadombu, wuvumbi, kupanda hela yililu yikwawu yatama nawu hiyisela. Chakutalilahu, Intaneti, maprogiramu ahaTV, mafwilimu, nyikanda niyibaaba yamumagazini yavula kumwekesha madombu niwuvumbi neyi hiyuma yayiwahi. Yililu yamweneñawu nawu yatama ichi ayiteja munshimbi mumatuña amakwawu. Ilaña Nzambi hetejaña yililu yamuchidiwuku. (Rom. 1:28-32) Muyaaka nkulakaji yakusambila atumbanji twaYesu hiyadiñijileña muyisela yatamaku. Hamuloña wakwikala nayililu yayiwahi nikubula kudiñija muniyi yisela, adiña nakuyifukejela nikuyikabisha kudi antu amakwawu. Kapostolu Petulu wasonekeli nindi, “Dichi wena anahayami chimwabulaña [enu akwaKristu] kuya nawu lufuchi mukubajama kwasweja; enda ayitena chatama.”—1 Pet. 4:4. w15 8/15 4:2, 3

MukwaKristu wapama welaña yuma yaletaña kunuñañana muchipompelu. (Efwes. 4:1-6, 15) Chineli tudi akwaKristu, twakeñaña kwikala ‘anuñañana chiwahi,’ dikwila nawu kuzatila hamu mukunuñañana. AkwaKristu atela kwikala adizoza kulonda ekali anuñañana. MukwaKristu wapama wazataña nañovu kulonda yaleti kunuñañana muchipompelu hela chakwila naneñi nayiluwa yawamanakwetu. Dihulenu nenu: ‘Nelaña ñahi neyi manakwami hela muhela naluwañeshi? Natiyaña ñahi neyi ananvulumuni? Nalekaña kuhosha namuntu wunanvulumuni? Indi kwiji nesekaña kumanisha kukala?’ MukwaKristu wapama wamanishaña kukala bayi kuleta kukalaku. Komana munakufwila kuleta kunuñañana muchipompelu? w15 9/15 1:12, 13

Yesu welukili chikupu nindi Bayibolu Hizu daNzambi nawa mwekala kufumba kwakuwahi. Hakwila nawu tumwimbujoli Yesu, twatela kutañaña Bayibolu mafuku ejima, kudiza nikutoñojoka chikupu nsañu yitunakudiza. Twatela cheñi kuwana ñakwilu yamalwihu itukweti. Chakutalilahu, mwalala mwakuhwelela nenu tunakushakama mumafuku akukuminina? Koleshenu chikuhwelelu chenu kuhitila mukudiza wuprofwetu wunakumwekesha nawu tunakushakama mumafuku akukuminina. Munakukeña kukuhwelela chikupu yuma yakanayi Nzambi kumbidi? Komana dizenuña wuprofwetu washikijewa dehi. Mwakuhwelela chikupu nenu Bayibolu yinateli kutukwasha makonu? Mwatela kutaña nsañu yahosha hadi amanakwetu niahela ahimpili yihandilu yawu muloña wakudiza Bayibolu. (1 Tesa. 2:13.) Munateli cheñi kumwimbujola Yesu kuhitila mukutoñojoka hayikaninu yayiwahi yayikanayi. (Heb. 12:2) Yimonenuña nenu nayikani yowenenu bayi neyi antu adi ejimaku. w15 9/15 3:16, 17

Twamwinkaña kuhitila mukuzatisha yuma yetu yitukweti hakwila tumulemeshi. Chakutalilahu, tunateli kuhana yawana yakukwasha mudimu waWanta muchipompelu chetu nimukaayi kejima. Hela tukweti yuma yayivulu hela nehi, wejima wetu twatela kuzatisha yuma yitukweti hakwila tumwekeshi kukeña kwetu kudi Yehova. (2 Kor. 8:12) Ilaña kudi njila jikwawu mutunateli kumwekesha netu twamukeña Yehova. Yesu watulejeli nindi bayi twakama hayakudya niyakuvwalaku, ilaña tusambileña kukeña Wanta. Tata yetu watukana nindi wukutwinkaña yuma yitwakeñaña. (Mat. 6:31-33) Twamukuhwelela Yehova nawa tweluka netu wukutwinkaña yuma yatukanayi. Muloña neyi wumukeña muntu nankashi wunateli kumukuhwelela. Dichi neyi tumukuhwelela chikupu Yehova, tukumwekeshaña netu twamukeña. (Mas. 143:8) Twatela kudihula netu: ‘Komana yuma yinafuukulaña, chinazatishaña mpinji niñovu yami yamwekeshaña nawu namukeña Yehova chikupu? Komana nashindamena hadi Yehova nami wukuñakamenaña mpinji yejima? w15 9/15 5:7, 8

Mwadihulahu dehi nenu, ‘Komana nashikilimu kunzatisha kudi Nzambi hampinji yalukadi lwasweja nikwikala mwituña dadiha?’ Chuma chimu chakeñekaña chikupu hikwikala nachikuhwelelu chakola. Kapostolu Petulu wahosheli hachikuhwelelu chawantu ‘chesekawu.’ (1 Pet. 1:7.) Lukadi lweneni ludi kwakwihi, dichi twatela kwikala ‘nachikuhwelelu chakutambula wamwinu wawumi.’ (Heb. 10:39) Twatela kuzata nañovu hakwila nawu tukoleshi chikuhwelelu chetu. Tunakukeña kwikala hakachi kawantu akakiswilawu neyi Yesu Kristu, Mwanta wetu, nenzi dehi. Dichi, neyi chochalombeliyi ona iyala nindi amuvulishili chikuhwelelu kudi Yesu, ninetu twatela kuhosha netu: “Nkwashuku chinakañanyi kukuhwelela chachiwahi.” (Maku 9:24) Hela tunateli kuhosha neyi apostolu, ahosheli nawu: ‘Tuvulishili chikuhwelelu.’—Luka 17:5. w15 10/15 2:1, 2

Pawulu washili maana ‘kuyuma yabadika kuwaha.’ Wazatili nañovu mumudimu wakushimwina, dichi wendeli maluña amavulu kubombelahu Siriya, Asia Minor, Masidoniya niYudeya. Pawulu Wahosheli nindi: “Navulamenaña yuma yamunyima, nafwilaña nami nakashiki kuyuma yakumbidi. Nadikwatishaña nankashi, nakukabila nami nakashiki kumufunda.” (Fwi. 1:10; 3:8, 13, 14) Pawulu wasumbwili wanyi nawa chumichi chamukwashili ‘kumukalakela Mwanta chakadi kuluwankana.’ (1 Kor. 7:32-35) Ambuña aYehova amakwawu makonu asumbulaña wanyi kulonda ashi maana kumudimu waYehova neyi cheliliyi Pawulu. (Mat. 19:11, 12) Ajiki adana yuma yayivulu yakwakamena kubadika asumbula. Chili twasumbula hela nehi, wejima wetu twatela ‘kutenteka yuma yikutulemena yejima’ kulonda tumukalakeleña Yehova chakadi kuluwankana. Twatela kuleka yuma yatumanishilaña mpinji hakwila tumukalakeli Yehova chikupu. w15 10/15 3:15, 16

Bayibolu yahosha cheñi nawu: “Eyi Yehova, neluki nami njila yamuntu hiyekala mudi yomwenuku, mudi muntu wendaña himwekala yakuyula nyendu yinduku.” (Yere. 10:23) Yuma yamwekanaña yamwekeshaña hatooka nawu awa mazu alala. Yehova waleñeli wanyi antu nawuswa wakudiyuula aweni. Yehova chetejeliyi yuma yatama kutwalekahu, wamwekesha nindi yena hohu diyi wunateli kuyuula chiwahi. Yehova wakajilumuna antu atama ejima. Hanyima yakuyijilumuna, muntu wejima wakajinooka chiyuulu chaNzambi, wakamujilumuna hohenohu. Nateli kuzatisha yuma yinakumwekana hakumwekesha nindi antu amuchidiwu atelela kuyijilumuna. Waketeja cheñi wanyi kutama. w15 11/15 3:5, 6

Yesu wakeñeli kuhosha nankashi haWanta waNzambi. Yesu hadiñayi hamaseki, wahosheleña nankashi haWanta kubadika yuma yikwawu. Mumudimu windi wakushimwina wateneni Wanta kubadika mapampa 100. Wanta wadiña walema chikupu kudi Yesu. (Mat. 12:34) Hanyima yakwila Yesu anamusañuli, wadimweni nezaza dawatumbanji 500. (1 Kor. 15:6) Iyi diyi mpinji Yesu yayinkeliyi atumbanji twindi lushimbi lwakushimwina “munyuza yejima.” Wayilejeli nindi akatwalekahu kuzata iwu mudimu wakushimwina, kushika ‘nikwakakumina nyaka.’ Neyi muzatañaku mudimu wakushimwina makonu, mukushikijaña iwu wuprofwetu. (Mat. 28:19, 20) Nawa Nzambi yetu watwinka ‘yuma yayiwahi yejima’ kulonda tuzati mudimu wakushimwina. w15 11/15 5:1-3

Ijina daNzambi adisonekeli nansona jiwana jachiHeberu jatenañawu nawu Tetragiramatoni. Tunateli kuwana Tetragiramatoni mumamanyusikiliputi akushankulu achiHeberu chidi neyi Nyivuñilu yawaniniwu kukaluñalwiji kaDead Sea. Tunateli kuyiwana cheñi munyikanda yachiGiriki yatenañawu nawu Septuagint. Iyi nyikanda ayisonekeli henohu kunashali yaaka 200 nakusemuka kwaKristu nichimwahitili yaaka 100 hanyima yakusemuka kwaKristu. Antu amavulu atiyaña kuwaha chamonawu ijina daNzambi dinakumwekana kakavulu mumamanyusikiliputi akushankulu. Mwalala, muBayibolu mwatela kwikala ijina daNzambi. Ilaña, mumaBayibolu amavulu mwekala wanyi ijina daNzambi. Bayibolu yaAmerican Standard Version yasonekeluwu chachiha niyena ayidishili. Yasonekeluwu mu 1901 yazatishili ijina daNzambi, ilaña yasonekeluwu mu 1952 mwadiña mwosi. Muloñadi? Akwakubalumuna atoñojokeleña nawu “hiyatela” kuzatisha ijina daNzambuku. MaBayibolu amavulu muChizungu nimadimi amakwawu niwena afumishamu ijina daNzambi. w15 12/15 2:3-5