May

Hakwila nawu tuhosheña nawantu munjila yaluwi twatela kuyilemesha nikwakamena chinakutiyawu. Dicheliliyi Yesu. Chakutalilahu, chamweniyi izaza dinakufwila kumutiyilila, watiyili kuwaha kuhanjeka nawu nikuyitañisha. (Maku 6:34) Yesu chamutukiluwu, yena hafuntishili matukaku. (1 Pet. 2:23) Hela chakwila twakeña chisaka chetu niamabwambu, hadaha tunateli kuhosha nawu mazu akubula luwi muloña twayiluka chikupu. Tunateli kutoñojoka netu twatela kuhosha nawu munjila yidi yejima. Yesu wahosheleña nawamabwambu jindi munjila yaluwi. Hampinji yaditadikishileñawu amabwambu jindi nawu wabadika hinyi hakachi kawu, wayifumbili munjila yaluwi nawa wazatishili chakutalilahu chamwana wanyanya kulonda aleki iyi yitoñojoka. (Maku 9:33-37) Aeluda anateli kumwimbujola Yesu hakufumba amakwawu munjila yaluwi.—Ŋal. 6:1. w15 12/15 3:15, 16

Twakeña nankashi amanakwetu muloña Yehova diyi watulejaña kukeñañana. Hitunateli kukeña Yehova neyi tubula kukeña amanakwetuku. (1 Yow. 4:7, 20, 21) Cheñi, twakeña amanakwetu muloña wejima wetu twakeñaña wukwashu, sweje-e mumpinji yakala. Hampinji yasonekeleñayi Pawulu mukanda kudi akwaKristu aHeberu, welukili nindi akwaKristu amakwawu akushiya matala niyuma yawu. Yesu washimwini iyi mpinji chiyikekala. (Maku 13:14-18; Luka 21:21-23) Dichi, henohu iyi mpinji kanda yishiki, ana akwaKristu ateleli kukeñañana chikupu. (Rom. 12:9) Lukadi lwasweja mukuhanda kwawantu lunakwinza katataka. (Maku 13:19; Chim. 7:1-3) Twatela kuyaña hohu wanyi kuyipompelu. Pawulu walejeli akwaKristu aHeberu kudikolesha wumu namukwawu kulonda akeñañani nikwilila akwawu mwamuwahi.—Heb. 10:24, 25. w16.01 1:6-8

Mwadiña mumwaka wa 33 C.E., nawa dadiña ifuku daPentekosta. Atumbanji twaYesu 120 apompeli mukapeka kahewulu muYerusalema, hiyakukakela mbe mukulomba. (Yil. 1:13-15) Kaprofwetu Yoweli wasonekeli haniyi yuma yamwekeni henohu kunashali yaaka 800. (Yow. 2:28-32; Yil. 2:16-21) Yumanyi yalema yamwekeni? HaPentekosta 33 C.E, Nzambi wechilili spiritu yindi yajila hadi ana akwaKristu nawa awayisheweli. (Yil. 1:8) Kufumahu, izaza denjili nakuyiwuña nawa atumbanji atachikili kuhosha yuma yayiwahi yamwenuwu nikutiya. Kapostolu Petulu walumbulwili yuma yamwekeni nikulema kwayu. Kuhiñahu, walejeli izaza nindi: ‘Balumukenu munyichima yenu, ayipapatishi wejima wenu mwijina daYesu Kristu, kulonda kuyanakena nyiloña yenu; mutambuli chamukunkulu chaspiritu yajila.’ Hanidi ifuku, antu akushika ku 3,000 ayipapatishili nawa atambwilili spiritu yajila.—Yil. 2:37, 38, 41. w16.01 3:1-3

Wawayishewa nateli kudya ñahi kudinkendi nikunwa kuvinyu “chakadi kutela” haChanukishu? Neyi wahembaña wubwambu windi naYehova wanyi nawa hashinshikaku, ilaña wadyaña kudinkendi nikunwa kuvinyu dikwila nawu walemesha wanyi Chanukishu. (Heb. 6:4-6; 10:26-29) Iku kusoñamisha kwayikwashaña awayishewa kutwalekahu kwikala ashinshika neyi anakukeña kutambwila ‘masomu akutambika kwaNzambi kwamudi Kristu Yesu kwamwiwulu.’ (Fwi. 3:13-16) Pawulu walejeli akwaKristu nindi: “Ami akasilawu mukaleya mudi Mwanta, nayilembeleli nami endenuña mwatelela kutambika kwayitambikiluwu.” Anateli kwila ñahi mwenimu? Walumbulwili nindi: “Nakudizoza kwejima nakwovwaha, nakudiwunjika, nakuditiyilila wumu namukwawu nakukeña, nakusha muchima hakuhemba kunuñañana kwaSpiritu, nakudikasa mwonji wakuwunda.” (Efwes. 4:1-3) Spiritu yaYehova yajila yakwashaña ambuñindi kwikala adizoza, bayi adivwimbaku.—Kol. 3:12. w16.01 4:5, 6

Fwikijenu Abarahama wudi nayaaka 125 nakukandama hampidi chovu-chovu. Nawa mwanindi Isaka wudi nayaaka 25 nakumulondela hanyima. Isaka nasendi nchawa, Abarahama nasendi mpoku niyuma yakukwatisha nachu kesi. Iyi mpinji yatela yadiña yakala muchihandilu chaAbarahama. Bayi neyi muloña wawushinakajuku. Wachidiña nañovu. Ilaña iyi mpinji yadiña yakala muloña Yehova wamulejeli kulambula mwanindi! (Kutach. 22:1-8) Chikuhwelelu chaAbarahama chadiña mukweseka. Antu amakwawu ahoshaña nawu Nzambi wadiña mbanji hakumuleja Abarahama kulambula mwanindi. Amakwawu ahoshaña nawu Abarahama wetejeli kulambula mwanindi muloña wamuheleli. Antu ahoshaña mwenimu muloña adana chikuhwelelu nawa eluka wanyi mwatalisha chikuhwelelu chalala hela chichazatikaña. Ilaña Abarahama hamwovwahilili Nzambi chakubula kwilukaku, hela netu chakubula kutoñojokaku. Wovwahilili muloña wadiña nachikuhwelelu chalala. Welukili nindi Yehova hanateli kumuleja yakoñi chuma chikumuletesha yaneñi haya nyakaku. Abarahama welukili nindi neyi yovwahila, Yehova wukumukiswila hamu nimwanindi akeñayi. Chumanyi chaletesheli Abarahama yekali nachikuhwelelu chamuchidiwu? Wateleleli kumwiluka Nzambi nikumona chakwashañayi antu. w16.02 1:3, 4

Mariya wadi kuvwala nikukulisha Mwana kaNzambi. Kakavulu twahoshaña hakukooleka kwadiñayi naku Mariya. Hanu dinu kuduhu yuma yakameneniyi? Chakutalilahu, kañelu Gabireli wamulejeli nindi wukwimita chakadi kubulakana neyala. Ilaña Gabireli walumbulwilili wanyi chisaka chindi hela antuñi nindi chakemitayi. Antaña jindi adi kutoñojokadi? Nateli kumuleja ñahi Yosefu nindi nakuhosha walala? Kubombelahu, wadiña namudimu weneni wakukulisha Mwana kaNzambi. Tweluka wanyi yuma yakameneniyi Mariya, ilaña tweluka yuma yeliliyi hanyima yakuhosha naGabireli. Wahosheli mazu adi munsona yefuku dalelu.—Luka 1:26-37. w16.02 2:13, 14

Hushayi wadiña ibwambu daMwanta Davidi washinshika. Chelili antu akeñi kumuswanisha Abisalomi wanta, Hushayi wateleli kwikala wahamuka kulonda ekali washinshika kudi Davidi nikudi Nzambi. Welukili nindi Abisalomi nenzi kuYerusalema nawamashidika indi nawa Davidi natemuki. (2 Sam. 15:13; 16:15) Hanu dinu Hushayi welilidi? Komana washili Davidi nakukwasha Abisalomi? Inehi. Hela Davidi wadiña washinakaja dehi nawa antu amavulu akeñeleña kumujaha, Hushayi wekalili washinshika kudi Davidi muloña Yehova watondeli Davidi kwikala mwanta. Dichi Hushayi wayili kuMpidi yaOliveta nakumuwana Davidi. (2 Sam. 15:30) Davidi walejeli Hushayi kufunta kuYerusalema nakudimwekesha neyi hibwambu daAbisalomi kulonda yamushinjili Abisalomi kutiyila yena chatela atiyilileña Ahitofweli. Hushayi wadiña wahamuka nawa washili wumi windi hakatoña kulonda amwovwahili Davidi nikwikala washinshika kudi Yehova. Davidi walombeli nindi Yehova yamukwashi Hushayi nawa wamukwashili. Abisalomi watiyilili Hushayi chatela atiyilili Ahitofweli.—2 Sam. 15:31; 17:14. w16.02 4:15, 16

Chineli tudi akwaKristu, ninetu tunateli kuhetela muwunlomboli waYehova wahanayi muNshimbi. Munjilanyi? Twatela Kwimana nakutachika kutalatala hayishina hashindamena Nshimbi. Hela chakwila twalondelaña wanyi yina nshimbi, tunateli kazatisha jimu kulonda jitulomboleña muwumi wetu nihakudifukula kudi Yehova. Wasonekeli iji nshimbi muBayibolu kulonda tudizileñaku, kutulombola nayishina nikusakilila Yesu watudizishili yuma yabadika Nshimbi. Kutiyilila chahosheliyi Yesu nindi: “Munatiyi cheliluwu nawu, Kwila wuvumbi chinjila. Ilaña ami nukuyileja nami muntu wukutala mumbanda namesu akumufwila, neli dehi nindi wuvumbi mumuchima windi.” Twatela kubula kwila wuvumbi nikukaana yitoñojoka nikufwila kwejima kwawuvumbi.—Mat. 5:27, 28. w16.03 4:6, 8

Samweli hakeñeleña kwila chuma chamulejeluwu antu jinduku, chakwila Yehova wamulejeli mapampa kasatu nindi yitiyilili. (1 Sam. 8:7, 9, 22) Hela chochu, Samweli hamuhembeleli nkunyi iwu muntu wamuswaninuku. Yehova chamulejeliyi nindi yamuwayishi Sawulu, iwu kaprofwetu wovwahilili bayi neyi chakumukanjikijaku ilaña namuchima wakukeña. Kufwana Samweli, aeluda akuluka yitembi makonu amwekeshaña yililu yayiwahi hakudizisha amakwawu. (1 Pet. 5:2) Aeluda amuchidiwu hiyashintajalaña hakudizisha amakwawu muloña wakuchiina kuyitambula nyidimu yikwetuwu muchipompeluku. Antañishi ekala namuchima wawuwahi amonaña atudizi nawu hiyakwakudibecha nawuku, ilaña nawu ‘hiyakwawu akwakukalakala hamu nawu,’ nawa alema muchipompelu. (2 Kor. 1:24; Heb. 13:16) Nawa antañishi abula lwisu azañalalaña hakumona atudizi anakuzatisha wuswa wawu hakukwasha chipompelu.—Yil. 20:35. w15 4/15 1:16, 17

Mwanta Azariya ‘watwalekeluhu kwila chaloña kumesu aYehova.’ Ilaña, “Yehova wamweteli mwanta ekali mukwambumba nikwifuku dafwiliyi.” (2 Anya. 15:1-5) Muloñadi? Bayibolu hiyashimunaku. Komana chumichi chinateli kutuleñela kwakamena hela kutukojeja kujinoka netu Yehova wamubabesheli Azariya chakadi muloña? Hitunateli kutoñojoka muniyi njilaku neyi twamwiluka Yehova chachiwahi. Mwanta Azariya ateneneñawu cheñi nawu Mwanta Uziya. (2 Anya. 15:7, 32) Munsañu yadifwana yekala ha 2 Kushindulula 26:3-5, 16-21, twadizaña nawu hela chakwila Uziya welileña yuma yaloña kumesu aYehova, chimwahitili yaaka watachikili “kudivwimba mumuchima windi hakwila nichakudikisañana.” Hamuloña wakudivwimba wakeñeleña kuzata nyidimu yawatupristu yabuliluwu kumwitejawu kuzata. Atupristu 81 amukaanishili kwila chumichi. Chumanyi cheliliyi Uziya? Wamwekesheli chikupu nindi wadiña wadivwimba. Uziya ‘wayizuwilili’ atupristu. Dichi chaletesheli Yehova yamweti nambumba! w15 4/15 3:8, 9

Neyi chimunamoni, Satana amutena nawu Diyabolu, dikwila nawu “Mukwakutwamba.” Chumichi chatwanukishaña nawu Satana wamusawulaña Yehova nindi himukwakutwamba. Mazu akwila nawu “kapela mukulu” atwanukishaña Satana chamudimbiliyi Evu muEdeni hazatishiliyi kapela. Nhoshelu yakwila nawu ‘chanzañombi muneni’ yamwekeshaña yililu yaSatana yakutiyisha woma nimakudi akwetiyi, chakwila wakeñaña kukañesha nkeñelu yaYehova nikukisañana antu Jindi. Chakadi nikujina, Satana wakeñaña chikupu kukisañana kashinshi ketu. Dichatusoñamishilaña Bayibolu nawu: ‘Tonenuña; mukwankunyi nenu Diyabolu wudi nakuya nakutambatamba nakukeñekeña akudyayi, neyi mutupa wabulumaña.’ (1 Pet. 5:8) Satana watiyaña kuwaha neyi muntu waNzambi naluwañeshi chikupu nawa chumichi chamuleñelaña yatachiki kumusawula Yehova.—Yish. 27:11. w15 5/15 1:3, 4, 10

Yehova wakeñaña nindi tushakameña chachiwahi nawa chumichi chamwekana hatooka neyi tushinshika mukala wayinkeliyi aAdama naEvu. (Kutach. 2:9) Ilaña Satana nateli kuzatisha yuma yitwafwilaña ‘yakudimbana kwamaheta’ kulonda yatuhuñumuni. (Mat. 13:22) Antu amavulu atoñojokaña nawu maheta anateli kuyiletela muzañalu hela nawu anateli kwikala nachihandilu chachiwahi neyi ekala nayuma yayivulu. Yitoñojoka yamuchidiwu yakutwamba, nawa yinateli kutuleñela kujimbesha iheta detu dalema, wubwambu wetu naYehova. Yesu wasoñamishili atumbanji twindi nindi: “Kwosi muntu natweshi kukalakela anyanta ayeduku; chiña yohelahu wumu, akeñahu mukwawu; hela yokakelahu wumu, mukwawu amudiwula. Himukutwesha kukalakela niNzambi nimahetaku.” (Mat. 6:24) Neyi tukalakelaña hohu Maheta, dikwila nawu tunaleki kumukalakela Yehova nawa chumichi dichi chakeñañayi Satana nindi twileña. Dichi bayi twiteja mali hela yuma yitwalandaña namali yikali yalema kubadika wubwambu wetu naYehovaku. Hakwila tudikañi naSatana, twatela kwikala nayitoñojoka yayiwahi kutalisha hamaheta.—1 Tim. 6:6-10. w15 5/15 2:12

Kakavulu chapela wanyi kwiluka kukala kunakumonawu akwetu. Antu amavulu amonaña kukala kutwabulahu dehi kumona. Amakwawu amonaña kukala hamuloña wakudikatisha, yikatu hela wushinakaji. Amakwawu niwena amonaña kukala hamuloña wachineñi, kusweja kwakamena hela yuma yafumaña mukuyikabisha. Amakwawu niwena akweti yisaka yayaña mukwitiya kwashiyashana hela hiyanvwali ajiki. Muntu wudi wejima wamonaña kukala, nawa kakavulu iku kukala kwambukaku nakwetu. Neyi akwetu adi nakukala kwamuchidiwu, tunateli kwimbujola ñahi kukeña kwaNzambi? Kuhitila mukutiyilila nakanañachima kulonda twiluka chinakutiyayi mukwetu. Chitwela mwenimu, tukwimbujolaña kukeña kwaNzambi kuhitila mukuyilila akwetu yuma yinakukeñawu. Hela chakwila yuma yakeñañawu antu yashiyashana, ilaña tunateli kuyikolesha kuspiritu nikuyikwasha muyuma yikwawu yakeñekaña.—Rom. 12:15; 1 Pet. 3:8. w15 5/15 4:6, 7

Yehova diyi Nsulu yañovu yaKristu, dichi twatela kukuhwelela netu Nzambi Mukwakubadika watela kufwomona yuma yañovu yadimwekenaña. Shinshikenu yakutalilahu yantesha. Henohu Dibaji kanda ditachiki, Yehova wahosheli nindi: “Kunashali mafuku atanu nayedi, nakanokesha nvula hamaseki mafuku makumi awana nimwaana niwufuku.” (Kutach. 7:4) Chochimu nihamukanda waKwidika 14:21, twatañañahu nawu: “Yehova wafuntishili kaluñalwiji hanyima nampepela yañovu yakumusela.” Hamukanda waYona 1:4 nihena twatañañahu nawu: ‘Yehova watemesheli mpepela yeneni kukaluñalwiji, menji hiyakusweja nankashi kuzuwa, niwatu wakeñeli kubaluka.’ Chatuzañaleshaña hakwiluka netu Yehova nateli kufwomona yuma yañovu yadimwekenaña. Chakadi nikujina, iseki akadiwahisha kumbidi. Twazañalalaña neyi tutoñojoka hampinji yikwakabula yuma yañovu yadimwekenaña yikajahaña hela kukatisha antu muloña “tabanaka yaNzambi [yakekala] nawantu.” (Chim. 21:3, 4) Twatela kukuhwelela netu ñovu yaNzambi yekala mudi Kristu yikafwomona yuma yañovu yadimwekenaña Muyaaka Ikombakaji. w15 6/15 1:15, 16

Wubanji wafumaña mukubula kwovwahila iku kufumba awishimuna mumukanda waYishimu kapetulu 7, hitwatañaña nsañu yamukwenzi weyala wayili nakwendujola kwakwihi netala damumbanda chivumbi. Elili wuvumbi. Chadi kuwaha neyi wabulili kuya kwadiñayi iwu mumbanda. (Yish. 7:6-27) Komana ninetu tunateli kumwekesha yililu yoyimu yakubula kashinshi hadaha nikudiñija muyuma yatama yinateli kusañumuna yitoñojoka yatama? Chakutalilahu, maprogiramu amakwawu ahaTV amwekeshañawu nawufuku ekala atama. Chumanyi chinateli kumwekana neyi tunakuhimpa himpa machanewu? Chinateli kwikala chatama neyi tuyaña haIntaneti nakwenzulula hadi hejima chakubula kwiluka yuma yitunakwenzulula, kushilahu nikuhanjekela haIntaneti hela kutala haWebu sayiti hatiyakeshañawu yililu yawuvumbi ninyevulu yanzekesi. Komana yuma yamuchidiwu yikutuleñela kumona yuma yinateli kusañumuna kufwila kwila yuma yatama nikutwalekahu kwikala ashinshika chabula kwila wuvumbi? w15 6/15 3:8, 9

Muloñadi Yesu chazatishiliyi izu dakwila nawu “nyikudi” henohu hampinji yikwawu wazatishili izu dakwila nindi “nyiloña”? (Mat. 6:12; Luka 11:4) Kubadika hadi yaaka 60 yinahitihu, Kaposhi Kakutalila kalumbulwili chiwahi nawu: “Nshidi yitwavulumunaña kutalisha hanshimbi yaNzambi diyi yatuleñela kwikala namukudi kudi Nzambi. . . . Neyi tukoña nshidi kudi Nzambi, dikwila nawu hitunakumuzatila namuchima wumuku. . . . Nzambi nateli kufumishahu kuwunda kwindi nawa wubwambu wetu nayena wunateli kumana. . . . Twatela kumukeña nikumwovwahila; dichi neyi tuvulumuna dikwila nawu tunakañanyi kufweta mukudi wetu wakukeña muloña nshidi yamwekeshaña nawu twamukeña wanyi Nzambi.” (1 Yow. 5:3) Chitwakeñaña mafuku ejima netu atwanakeni chamwekeshaña nawu Nzambi nateli kutwanakena hohu nshidi jetu kushindamena hamulambu wefutu danyiloña daYesu. Hela chakwila idi ifutu adihanini kwakwihi nayaaka 2,000 yinahituhu, twatela kudilemesha neyi hichawana chinahanuwu lelu. ‘Wuseya wefutu’ wafweteluwu hawumi wetu ‘walema chikupu’ chakwila muntu wabula kuwanina hanateli kuwufwetaku.—Mas. 49:7-9; 1 Pet. 1:18, 19. w15 6/15 5:9, 10

Toñojokenu hakuhimpika kwakatataka, chidi neyi mmwekenu yanyikanda, yuma yasonekañawu ninjila yakuhaninamu nyikanda yetu. Twatiya kuwaha kuhana nyikanda yikweti nsañu yakwashaña antu nawa yaletaña ikoku mumudimu wakushimwinaku. Nawa neyi tuzatisha yuma yakutuñatuña yakatataka hakutandisha chalala, chidi neyi webusayiti ya jw.org, twamwekeshaña mpwila yaYehova yakulombola antu amavulu akeñaña kuyilombola kwejima kudiwu. Twasakililaña hakuhimpa ntanjikilu yetu yakupompa hakwila twikaleña nampinji yaKudifukula kwaChisaka hela kudiza nkawetu. Twasakililaña cheñi hakuyilaku hambidi mumaprogiramu ekalaña hakupompa kwanyanya nikwamaneni. Twavula kuhosha netu, awahilañaku chaaka nichaaka. Twazañalalaña chikupu hayuma yayivulu yatudizishañawu mumashikola amukuloñesha kwaNzambi. Yehova diyi walombolaña yuma yejima yahimpañawu. Wawahishaña chovu-chovu lubanji lwakuloñesha kwindi niparadisa yakuspiritu yitunakudiluñisha makonu. w15 7/15 1:16, 17

Neyi chayikalilaña kwambuka kunsañu jamatuña nachiyuulu, chikuwaha neyi mukudihula nenu, ‘Chumanyi chadi kwilayi Yesu?’ Yesu washakamineña mwituña mwadiña antu akumaluña ashiyashana, Yudeya, Ñaliliya, Samariya nimaluña amakwawu. Bayibolu yashimuna nawu kwadiña yikonkojola hakachi kawantu amunawa maluña ashiyashana. (Yow. 4:9) Yikonkojola yadiña cheñi hakachi kawaFwarisi nawaSadusi (Yil. 23:6-9), hakachi kawantu nawansonkeshi (Mat. 9:11) nihakachi kawantu atañili shikola yawaRabi ninana abulili kutaña muniyi shikola. (Yow. 7:49) Muyaaka nkulakaji yakusambila, aIsarela ayiyuulileña kudi aRoma nawa awa aRoma ayiheleli nankashi kudi aIsarela. Hela chakwila Yesu watañishileña nsañu yalala yahosha hadi Yehova nawa welukili nindi wamwinu wafumini kudi aIsarela, ilaña hayilejeleña atumbanji twindi nindi adiña abadika akwawuku. (Yow. 4:22) Kwambukaku, wayikonkomweneni kukeña antu ejima neyi akwawu. w15 7/15 3:5

Antu ayileñeli nachililu chakufwila kukeña akwawu niwena afwilaña kuyikeña. Antu aneñaña neyi abula kuyimwekeshela kukeña hamuloña wayuma yamwekanaña yabula kukuhwelelawu hela ayineñesha, kukata kumujimba, kukala kwamali hela kubula kuzata chiwahi mumudimu wakushimwina. Neyi tutachika kutoñojoka netu Yehova hatukeñaku, chikuwaha neyi twanuka netu twalema kumesu indi nawa wekala kwoku, ‘watukwataña kuchikasa chetu chachidiilu’ nawa nakutukwasha. Neyi twikala ashinshika, hamba katuvulamenaku. (Isa. 41:13; 49:15) Brigitte, wakulishili anyana ayedi nkawindi hanyima yakufwisha nfumwindi, wahosheli nindi: “Kukulisha anyana mukanu kaayi kaSatana hichuma chakala nankashi, sweje-e kudi anvwali ajiki. Ilaña nakuhweleli chikupu nami Yehova wankeña muloña wankwashili mumpinji yinadiña nachineñi chikupu, nawa hañumba kulonda nimoni kukala kunukukañanya kuumikaku.”—1 Kor. 10:13. w15 8/15 1:1-3

Kaprofwetu Habakuki, amwinkeli mudimu wakushimunañahu dehi chakamujilumunawu Yerusalema. Hampinji yatachikiliyi kuprofweta, mazu akutena kujilumuna iwu musumba adiña ayishimuna dehi hayaaka yayivulu. Yuma yatamini chakwila ‘antu atama akuchikili antu aloña nawa wuñaji adiña nakuwuheñesha.’ Hichatuhayamishañaku hakumona neyi Habakuki wehwili nindi: “Eyi Yehova, nukudila dile-e kushika kumwakanyi chakadi eyi kutiya?” Yehova wamukolesheli kaprofwetu windi washinshika nindi kujilumuna kwashimwineñahu dehi ‘hikwakalabaku.’ (Hab. 1:1-4) Twili netu Habakuki wazeyeli nakutoñojoka nindi: ‘Hanahiti yaaka yayivulu kufuma hampinji yinatachikili kutiya nawu Yerusalema akamujilumuna. Indi neyi kuchidi yaaka yayivulu hakwila amujilumuni? Chikuwaha wanyi neyi nitwalekahu kuprofweta henohu musumba anakuwujilumuna wanyi katataka. Nukushila akwetu iwu mudimu.’ Neyi Habakuki watachikili kutoñojoka muniyi njila wadi kujimbesha wuselewa windi naYehova, nawa chiña wafwili hampinji yajilumwinuwu Yerusalema kudi akaBabiloni. w15 8/15 2:12, 13

Hakwila tubuli kutamisha yililu yetu yayiwahi, hitwatela kudikunda nawantu elaña yuma yatamaku. Ichi hichakundama hohu kukudikunda nawantu elaña yuma yatama abula kwitiyaku, ilaña ninawantu atwambaña nawu adifukulaña kudi Yehova afumpaña nshimbi jindi mumushikila. Neyi antu aditenaña nawu hiyakwaKristu akoña nshidi yahamesu bwi-i nawa abula kubalumuka mumuchima, hitwatela kutwalekahu kudikunda nawuku. (Rom. 16:17, 18) Neyi tudikundaña nawantu abulaña kwovwahila nshimbi jaNzambi, tunateli kwikala nachaaku chakwila yuma yelañawu hakwila tutiyañaneña nawu. Chakutalilahu, neyi tudikundaña chikupu nawantu elaña wuvumbi, tunateli kutachika kwila wuvumbi. Chumichi chayimwekeneni akwaKristu amakwawu adihana, nawa amakwawu ayihañili muchipompelu hamuloña wakubula kubalumuka mumuchima. (1 Kor. 5:11-13) Neyi abula kubalumuka munyichima, anateli kwikala neyi antu ashimwiniyi Petulu.—2 Pet. 2:20-22. w15 8/15 4:4-6

Yesu watondeleña chiwahi amabwambu. Yesu watondeli amabwambu jindi adiña nakumulondela nawa adiña amukeña Yehova nikumukalakela. Mwatondaña amabwambu amukeña Yehova namuchima wawu wejima? Muloñadi wumwatela kutondela antu amukeña Yehova? Kukeña kwawamanakwetu kunateli kuyikwasha kwikala mukwaKristu wapama. Neyi wudi kansi, wunakutoñojoka yuma yiwakela muchihandilu cheyi? Neyi dimu, watela kutonda amabwambu anamukalakeli Yehova hadi mpinji yayilehi nawa aletaña kunuñañana muchipompelu. Hadaha amonahu dehi kukala mukuhanda kwawu nawa omikili kukala kwakuvulu iku anakumukalakela Yehova. Anateli kukukwasha kutonda yuma yikakukwasha muchihandilu cheyi. Neyi wudikundaña nawu akukwasha kufukula chiwahi nikwikala mukwaKristu wapama.—Heb. 5:14. w15 9/15 1:14, 15

Nsañu yahosheleñayi Yesu niyuma yelileñayi yakwashili atumbanji twindi kwikala nachikuhwelelu chakola. (Maku 11:20-24) Dichi twatela kumwimbujola Yesu. Neyi twila mwenimu, tukukolesha chikuhwelelu chetu nichawakwetu. (Yish. 11:25) Munateli kukwasha ñahi antu amwiluña denu dimwashimwinaña? Neyi munakudizisha antu Bayibolu, yikwashenu eluki nawu Nzambi wekala kwoku, watwakamenaña nawa nenu Bayibolu Hizu daNzambi. Munateli kukwasha ñahi amanakwenu niahela kwikala nachikuhwelelu chakola? Neyi mwiluka nenu manakwetu nakutobela amanakwetu anakulombola, bayi mushikena dakumwambukaku. Ilaña wanenu njila yakukoleshelamu chikuhwelelu chindi. (Yuda 22, 23) Neyi muchidi kuya kushikola nawa antañishi hiyakuhosha nsañu yakwila nawu yuma yadileñeli yayeni, ikalenu ahamuka hakuyileja yuma yimwakuhwelela hakuleña. Mukuhayama chikuzañalalawu antañishi niakwenu akwashikola. Yehova watukwashaña wejima wetu kwimana chakola muchikuhwelelu. ( 1 Pet. 5:10) Twatela kuzata nañovu hakwila tukoleshi chikuhwelelu, nawa Yehova nateli kutukiswila hañovu jetu. w15 9/15 3:20, 21

Makonu, Yehova watudizishaña yuma yayivulu hadi yomweni, nkeñelu yindi, yuma yaleñayi Nizu dindi. Kaayi kakoleshaña antu kudiza nankashi, ilaña mashikola ahewulu ayileñelaña aleki kumukeña Nzambi. Kwambukaku, Yehova hakeñaña nindi tudizi hohuku, ilaña watukwashaña kwikala namaana. Wakeñaña nindi tuzatisheña yuma yitunakudiza kulonda tuhetelumu nikukwasha amakwawu. (Yish. 4:5-7) Chakutalilahu, wakeñaña nindi tushimwini antu “nsañu yalala chikupu” nikuyikwasha kulonda akapuluki. (1 Tim. 2:4) Twamwekeshaña netu twamukeña Yehova niantu neyi tudizishaña antu amavulu nsañu yahosha haWanta waNzambi niyuma yiwukelila antu.—Mas. 66:16, 17. w15 9/15 5:10, 11

Shinshikenu yuma yitanu mwamwekesheleliyi Elija nindi wamukuhweleleli Yehova.  Cheliliyi Elija yamuleji Mwanta Ahabi nindi Yehova wakaleta chaaña, wamulejeli chakadi woma nindi: “Chahandayi Yehova Nzambi yaIsarela inemanaña kumesu indi kwaamu, nyaka iyi hikwakekala hela wuumi hela nvulaku.” (1 Anya. 17:1) Elija welukili nindi Yehova wakamwinka yuma yakakeñawu neyi chaaña chinenzi. (1 Anya. 17:4, 5, 13, 14) Elija welukili cheñi nindi Yehova wukumusañula mwana kanfwila weyala. (1 Anya. 17:21) Wajinokeli wanyi nindi kesi kaYehova kakusenda mulambu windi hampidi yaKarameli. (1 Anya. 18:24, 37) Henohu nvula kanda yinoki, Elija wahosheli chakadi woma kudi Ahabi nindi: “Yaña kweyi wakadyi, wakanwi, muloña kudi lushindu lwanvula yeneni.” (1 Anya. 18:41) Hanyima yakuhanjeka iyi nsañu, tunateli kudihula netu, ‘Komana chikuhwelelu chami chakola neyi chichadiña chaElija?’ w15 10/15 2:4, 5

Chitwatweshaña kuzatisha idimi, hichawaana chatwinkayi Yehova. (Mas. 139:14; Chim. 4:11) Watwinka cheñi chawana chikwawu chatuleñelaña kwikala ambukaku nawatunyama. Antu ayileñeli neyi “chochekalayi Nzambi.” Tukweti chawaana, chakudifuukwila etu aweni mutunakeñi. Nawa tunateli kutondahu kuzatisha idimi hakumuzatila nikumuhameka Yehova. (Kutach. 1:27) Yehova watuleja muBayibolu chitunateli kumuzatila nikumuhameka. Bayibolu yamukuma hela yachibalu yidi mumadimi kubadika 2,800. Neyi tutoñojokaña chahosha Bayibolu, tunateli kutachika kutoñojoka neyi Yehova. (Mas. 40:5; 92:5; 139:17) Yitoñojoka yaYehova yatukwashaña kwikala namaana nikutuleñela tukatambwili wumi wahaya nyaka. (2 Tim. 3:14-17) Muntu neyi nakutoñojoka dikwila nawu nakutoñojokahu chikupu hayuma yinakudizayi. (Mas. 77:12; Yish. 24:1, 2) Twahetelañamu nankashi neyi tutoñojokaña hansañu yitwadizaña hadi Yehova niYesu.—Yow. 17:3. w15 10/15 4:2-4

Yesu walejeli atumbanji twindi kwikala adizoza nikubula kuditiyisha aweni kuwaha, nawa niyena dicheliliyi (Luka 22:27) Apostolu indi amweni nawu wadihanini kumuzatila Nzambi nikukwasha antu, dichi niwena adizili nawu atela kudihana. Ninenu munateli kudizisha anyanenu nayuma yimwelaña. A Debbie, adi nawanyana ayedi ahosheli nawu: “Natiyileña kutama wanyi nampinji yamanishileñawu anfumwami kuhanjeka nawantu chineli hiyaeluda. Muloña nelukili nami ekalileña nampinji yakwakamena chisaka.”Chakutalilahu chawaDebbie nawanfumwawu aPranas chakwashili ñahi chisaka chawu? A Pranas ahosheli nawu anyanawu azatileñaku nyidimu hakupompa kwanyanya. Adiña namuzañalu, akwatili amabwambu amawahi nawa akeñeleña hohu kwikala nawamanakwetu niahela. Chayinu mpinji ejima muchisaka anakumuzatila Yehova mumudimu wampinji yejima. Neyi mwadizoza nawa himwelaña yuma yakuditiyisha enu aweni kuwahaku, mukudizisha anyanenu kukwasha amakwawu. w15 11/15 1:9

Yehova wamwekesha kukeña kwindi munjila jashiyashana. Toñojokenu hayuma yekala mwiwulu. Mwekala mabiliyoni anyilalanji, nawa mumulalanji wumu mwekala mabiliyoni atutumbwa nimapulaneti. Hakachi katutumbwa twekala mumulalanji watenañawu nawu Milky Way hitena. Neyi kwadiña kwosi itena, kachi yuma yonaña hamaseki yekalaku wanyi. Yuma yejimiyi yamwekeshaña nawu Yehova diyi Nleñi yetu, nawa yamwekeshaña yililu yindi, chidi neyi ñovu, maana nikukeña. Yehova waleñeli iseki kulonda dikwasheña yuma yonaña. Yuma yejima hamaseki yakwashaña atunyama niantu. Nzambi wadimini itempa dadiwahi mwakushakama antu nawa waleñeli antu awanina kulonda ashakameña haya nyaka. (Chim. 4:11) Nawa, “Wadiishaña ejima; luwi lwindi lwahaya nyaka.”—Mas. 136:25. w15 11/15 3:7, 8

Mwanta wetu watwinka yitwa yitwatela kuzatisha kulonda tukwashi antu kutambwila nsañu yayiwahi. Yitwa yikwawu yazatikili hakapinji kanti, yikwawu yinakuzatika nimakonu. Ilaña yitwa yejima yinatukwashi kushimwina chiwahi. Mu 1933, akwakushimwina atachikili kuzatisha makaadi, chitwa chakwashili antu amavulu kutachika kushimwina. Kaadi yadiña yanyanya hadiña nsañu yamu Bayibolu muwihi. Kaadi yakwashili akwakushimwina munjila jashiyashana. Chakutalilahu, akwakushimwina amakwawu atiyileña nsonyi, hela chakwila akeñeleña kushimwina, elukili wanyi chakushimwina. Akwakushimwina amakwawu alejeleña eni matala yuma yejima yelukiluwu mujiminiti jantesha, ilaña alumbulwileña chatiyakana wanyi. Itu tumakaadi twakwashili akwakushimwina ejima kushimwina munjila yatiyakana nawa yapela. w15 11/15 5:3-6

Nsona jajivulu jamwekeshaña nawu ijina daNzambi dalema nawa twatela kudilemesha. (Kwid. 3:15; Mas. 83:18; Isa. 42:8; 43:10; Yow. 17:6, 26; Yil. 15:14) Yehova woneneni ansoneki aBayibolu kulonda azatishi ijina dindi kakavulu mumamanyusikiliputi akushankulu. (Ezek. 38:23) Dichi neyi akwakubalumuna ajima ijina daNzambi, akumusawula Yehova. Makonu, kudi wunsahu wawuvulu wunakumwekesha nawu twatela kuzatisha ijina daYehova. Bayibolu yamu 2013 yasonekawu chachiha yaNew World Translation asonekamu ijina daNzambi mapampa 7,216. Dikwila nawu abombeleluku mapampa 6 kubadika Bayibolu yamu 1984. Hakachi kaniyi namba, atanu ayibombelumu muloña ijina daNzambi adiwana katataka muNyivuñilu yawaninuwu kukaluñalwiji kaDead Sea. Atanu ekala hamukanda wa 1 Sam. 2:25; 6:3; 10:26; 23:14, 16. Yamuchitanu nakamu, yekala hamukanda waAnsompeshi 19:18, ayisonekeli muloña asandujoleli mumamanyusikilituputi akunyaka. w15 12/15 2:5, 6

Twatela kukeña amanakwetu nankashi chayinu mpinji muloña chikatukwasha kuumika kweseka kwejima kutwakamona kumbidi. Tukweti njila jajivulu jakumwekeshelamu kukeña amanakwetu henohu lukadi lwasweja kanda lutachiki. Amanakwetu amavulu anakukabakana muloña wanyitentanshi, mabaji, mahurricane, matsunami, niwubanji wukwawu wadimwekenaña waweni. Amanakwetu anakuumika makabisha. (Mat. 24:6-9) Nawa kudi kukala kwamali niyakuda muloña wakushakama mwituña datama. (Chim. 6:5, 6) Hela chochu, neyi amanakwetu amona kukala twekalaña nakukooleka kwakuyimwekeshela kukeña. Hela chakwila antu mukanu kaayi amwekeshaña wanyi kukeña, twatela ‘kutwalekahu kukeña amanakwetu.’—Mat. 24:12. w16.01 1:8, 9