June

Neyi muntu yahosha yuma yinatuhilishi, chikuwaha neyi tukuhosha munjila yaluwi. (Yish. 15:1) Chakutalilahu, kansi weyala kampululu mwana kamumbanda wabula kusumbuka welileña yuma yatama iku nakumwekesha neyi nakumukalakela Yehova. Muhela wumu muchipompelu watiyilili luwi mama yaniwu mwana nawa wamulejeli nindi: “Mwaneyi wamufumbili chiwahi wanyi.” Iwu nvwali wamweneni nakutoñojoka nawa wahosheli nindi: “Chinatami hohu yuma yidi chiwahi wanyi, ilaña yuma yinamudizishili nakuyizatisha. Wakañihuli hanyima yaAmagedoni; dihu twakeluka walala.” Atwalekeluhu kwikala amabwambu muloña iwu nvwali wamweneni nawa wahosheli naluwi kudi muhela. Cheñi, mwana watiyili chahosheli mama yindi nawa welukili nindi achidi amukuhwelela nawu wakahimpa. Dichi walekeli kwenda nawamabwambu atama, wapapatisheweli nkumininaku wayili nakuzatila haBeteli. Mpinji yejima yitunakuhosha nawamanakwetu, chisaka chetu, hela antu itwabula kwiluka, mazwetu atela ‘kwikala aluwi, akutoweja namuñwa.’—Kol. 4:6. w15 12/15 3:15, 17

Atumbanji adiña mukapeka kahewulu akajimbala wanyi idi ifuku. Wejima wawu adiña namuzuzu wudi neyi kesi hanyitu. Yehova wayinkeli wuswa wakuhosha madimi ashiyashana. Ajinokeli wanyi nawu anayiwayishi naspiritu yajila. (Yil. 2:6-12) Ilaña ichi chihayamisha chayimwekenaña wanyi akwaKristu neyi anayiwayishi makonu. Chakutalilahu, Bayibolu yahosha wanyi nawu antu awayishiluwu ifuku dalondeleluhu muYerusalema adiña namuzuzu wudi neyi kesi. Ayiwayishili hampinji yayipapatishiluwu. (Yil. 2:38) Cheñi, bayi neyi akwaKristu ejima ayiwayishaña hampinji yinayipapatishiwuku. A Samariya ayiwayishili hanyima yakuyipapatisha. (Yil. 8:14-17) Kwambukaku, Konelisu niantu amwitala dindi wena ayiwayishili henohu kanda apapatishewi.—Yil. 10:44-48. w16.01 3:3, 5

Dichi awayishewa hiyadimonaña kulema kubadika akwawuku. Muloña eluka nawu Yehova wahanaña spiritu yajila kudi ambuñindi ejima. Nawa hiyamonaña neyi elukisha Bayibolu kubadika amakwawuku. Hiyalejaña muntu wudi wejima nawu nawayishewi nawa watela kutachika kunwa hela kudya haChanukishuku. Ilaña ekala adizoza nawa eluka nawu Yehova hohu diyi wunateli kutambika antu kuya mwiwulu. AkwaKristu awayishewa akeñaña wanyi kuyilemesha kudi antu. (Efwes. 1:18, 19; Fwi. 2:2, 3) Eluka cheñi nawu Yehova chayiwayishiliyi halejeluhu muntu wudi wejimaku. Dichi muntu wawayishewa wahayamaña wanyi neyi antu amakwawu ajinoka nawu anamuwayishi. Bayibolu yahosha nawu hitwatela kushikena kukuhwelela muntu wahoshaña nindi Nzambi namutonduku.—Chim. 2:2. w16.01 4:6, 7

Yehova wayikiñili aAbarahama naSara muchihayamisha kakavulu. (Kutach. 12:10-20; 20:2-7, 10-12, 17, 18) Yumiyi yakolesheli chikuhwelelu chaAbarahama. Tunateli kwikala amabwambu jaYehova? Eña, tunateli! Twatela kumwiluka Yehova neyi cheliliyi Abarahama. Ninetu tunateli kumwiluka Nzambi nikumona chakwashañayi antu. Makonu, tweluka yuma yayivulu kubadika Abarahama. (Dan. 12:4) MuBayibolu mwekala nsañu yahosha hadi “welili niiwulu niiseki.” Nsañu yitwadizaña yatukwashaña kumukeña Yehova nikumulemesha chikupu. (Kutach. 14:22) Iku kukeña kwatusañumunaña kumwovwahila Nzambi. Neyi twovwahila, tukwiluka chatukiñañayi nikutukiswila, nawa chumichi chikutukwasha kumona chakwashañayi antu nawa chikuhwelelu chetu chakolelañaku. Kumuzatila Yehova chikupu kukutukwasha kwikala nakukeña, kuwunda nimuzañalu. (Mas. 34:8; Yish. 10:22) Neyi tumwiluka Nzambi tukwikala nankisu jajivulu nawa tukwikala nawubwambu wawuwahi nayena. w16.02 1:7, 8

Awa mazu amwekeshaña nawu Mariya welukili Nyikanda yachiHeberu chikupu. Munjilanyi? Mazu ahosheliyi Mariya adifwana namazu alombeliyi Hana, mama yaSamweli. (1 Sam. 2:1-10) Chinamwekani neyi Mariya wazatishili mazu ekala muNsona kapampa 20 mumazu ahosheliyi. Chinamwekani hatooka nawu walejeleña antu chalala chadiziliyi kudi Ibwambu dindi muneni, Yehova. Kufwana Mariya, mpinji yikwawu Yehova nateli kutwinka mudimu wutukumona netu wakala. Twatela kwimbujola cheliliyi, kutambula mudimu nikukuhwelela netu Yehova wukutukwasha. Tunateli cheñi kwimbujola chikuhwelelu chaMariya neyi tutiyililaña chikupu Yehova nikutoñojoka hayuma yitunadizi hadi yena ninkeñelu yindi. Neyi twila mwenimu tukuleja akwetu yuma yitunadizi.—Mas. 77:11, 12; Luka 8:18; Rom. 10:15. w16.02 2:17, 18

Twazañalalaña hakumona atwansi amavulu anakupapatishewa hachaaka nichaaka. (Mukwa. 12:1) Ilaña anvwali akwaKristu niaeluda atela kudizisha atwansi muchipompelu kulonda adifuukwileña aweni nikwiluka chalumbuluka chipapatishu. Twadizaña muBayibolu nawu kudihana nichipapatishu diyi ntachikilu yachihandilu chachiha chamukwaKristu. Ichi chihandilu chachiha chaletaña nkisu jajivulu kufuma kudi Yehova niikañesha kudi Satana. (Yish. 10:22; 1 Pet. 5:8) Dimuloña waweni anvwali akwaKristu chatela kudizishilawu anyanawu kwiluka mwatalisha kwikala kambanji kaKristu. Neyi atwansi hiyakweti anvwali akwaKristuku, aeluda muchipompelu atela kuyikwasha kwiluka mwatalisha kudihana nikupapatishewa. (Luka 14:27-30) Neyi muntu nakukeña kutuña itala watela kudiloñesha, munjila yoyimu atwansi niwena atela kudiloñesha henohu kanda apapatishewi kulonda akamukalakeli Yehova nakashinshi kushika “nikunsa.” w16.03 1:1, 2

Yehova waheni Nshimbi jaMosi kudi aIsarela kulonda yayidizishi chakushakama nikudifukula kudiyena. Kutachika tuhu muyaaka nkulakaji yakusambila, antu jaNzambi afumineña kunyunza nikuyitachi yashiyashana, nawa ayiteneneña nawu aIsarela akuspiritu. Alondeleli “lushimbi lwaKristu,” lwashindameneni hayishina yasonekeliwu munyichima yawu, bayi hamalola. Ilu lushimbi lwalombweleña nikuhetesha akwaKristu kwejima kwadiwu. (Ŋal. 6:2) A Isarela akuspiritu aheteleli chikupu muwunlomboli waYehova kuhitila mudi Yesu. Henohu tuhu kanda yaleti chitiyañenu chachiha, Yesu waheni nshimbi jiyedi jalema. Yimu yahosheleña hamudimu wakushimwina. Yikwawu yahosheleña hayilwilu yatela kwikalawu nayu akwaKristu nichatela kudimonawu wumu namukwawu. Iji jadiña jawakwaKristu ejima, dichi jazatikaña kudi wejima wetu makonu, hela tukweti kuchiñeja kwakushakama haya nyaaka mwiwulu hela hamaseki. w16.03 4:10, 11

Eluda watela kudizisha manakwetu kuhitila mukuwana mpinji yayiwahi yakunooka nikwikala nawubwambu wawuwahi nayena. Njila jikuzatishayi eluda jikushiyashana kwesekeja nachekala chisemwa niiluña dawu. Hichidi namuloña nakumwashakamañaku, ikalenu nampinji yakwikala hamu nakadizi kulonda yeluki nindi ‘mwamulemesha.’ Chakadi nikujina, atudizi akusakilila chikupu hakukeña kumukuyimwekeshela nichimukuyakamena. Ntañishi wamuwahi bayi neyi himuntu wakeña kudizisha akwawu hohuku, ilaña wakeñaña muntu wunakudizishayi. (Esekejenu Yowanu 5:20.) Kadizi welukaña nindi ntañishi yami wukweti kukeña nawa yililu yamuchidiwu yikumukwasha kulonda yashuku maana kuyuma yimunakumudizisha. Dichi enu aeluda, hampinji yimunakudizisha ikalenu amabwambu, bayi neyi antañishi hohuku.—Yish. 17:17; Yow. 15:15. w15 4/15 1:19, 20

Chumanyi chitwadi kwila neyi nsañu yikwawu yahosha hadi Mwanta Azariya (Mwanta Uziya) hiyayilumbulwili Mwizu daNzambuku neyi chiyabula kulumbululawu munsañu yikwawu yamuBayibolu? (2 Anya. 15:7, 32; 2 Kushi. 26:3-5, 16-21) Komana mukufwila kujinoka nenu Nzambi welili chuma chaloña? Indi kwiji mwadi kutoñojoka nenu muBayibolu mwekala nsañu yayivulu yatuleñelaña kukuhwelela netu Yehova welaña yuma yaloña mpinji yejima nawa washaku nshimbi yakwambula nachu yatama nayayiwahi? (Kuhit. 32:4) Neyi tumwiluka Yehova chachiwahi neyi Muntu, kukeña kutwamukeña ninshimbi jindi kukuswejelaku chakwila hitukukeñaña netu nsañu jejima jelañayi ajilumbululuku. Ilukenu chikupu nenu mukusweja kumukeña Nzambi neyi muzata nañovu hakudiza nikutoñojoka chikupu hansañu yayilejañayi Nzambi Mwizu dindi dasonekawu. (Mas. 77:12, 13) Chumichi chikukolesha wubwambu wenu naYehova, nawa wukwikala walala chikupu. w15 4/15 3:8, 10

Yileñaleña yakuspiritu yatenañawu nawu añelu ekala “asweja ñovu.” Abadika antu nawa akweti ñovu nimaana asweja. Añelu ashinshika azatishaña ñovu jawu munjila yayiwahi. Chakutalilahu, mpinji yimu kañelu kaYehova wajahili amashidika awaAshuri ayilumbu 185,000, muntu wumu hadi kutwesha kwila chumichiku hela tuhu amashidika ejima hiyadi kutweshaku. (2 Anya. 19:35) Hampinji yikwawu kañelu mukwawu wazatishili maana niñovu jindi jabadika antu kulonda yafumishi apostolu aYesu mukaleya. Ona kañelu amumweni wanyi kudi atulama hampinji yakiyilwileñayi yenzelu nakuyidisha apostolu nikukiya cheñi yenzelu, nawa atulama adiña mwomu hampinji yelileñayi yuma yejimiyi. (Yil. 5:18-23) Yileñaleña yashinshika yakuspiritu yazatishaña ñovu jawu munjila yayiwahi, ilaña Satana wazatishaña ñovu jindi munjila yatama. Wekala nañovu! Bayibolu yamutenaña nawu ‘mwanta wayuulaña mpata yamunu mwishina.’—Yow. 12:31. w15 5/15 1:5, 6

Hela tudi muwuluwi hela tudi ajiki, twatela kudikaña chikupu nanyichidi yejima yawuvumbi. Komana chumichi chapela? Chapela wanyi! Chakutalilahu, neyi wuchidi kansi hadaha watiyaña akwenu akashikola adisamaña nawu elaña wuvumbi hela kuditemeshela nsañu yawuvumbi hanshiña. Kumaluña amakwawu iyi yililu ayimonaña nawu chochimu nakutandisha nyevulu yanzekesi yawatwansi. Bayibolu yahosha nawu: “Muntu welaña wuvumbi waditamishaña mujimba windi yomweni.” (1 Kor. 6:18) Antu akabakanaña nikufwa muloña wakutanda kwanyisoñu yasambukilaña hakudikama. Atwansi amavulu abula kusumbula hela kusumbuka adikamini aditoñeshaña hayuma yeliluwu. Yuma yafumaña mukwila wuvumbi yambuka chikupu nayisela yamwekeshañawu hayikunzulemba, yinateli kutuleñela kutachika kukuhwelela netu neyi tufumpa nshimbi jaNzambi himunateli kufuma yuma yomisha mbañaku. Yitoñojoka yamuchidiwu yaleñelaña antu kufwa mumuhetu ‘wakudimbana kwanshidi.’ w15 5/15 2:14

Yesu wembujoleli luwi lwaNzambi. Chumanyi chamukwashili Yesu kwila mwenimu? Wayitiyilileña antu luwi kuhitila mukwiluka mazu atela kuzatishayi nichiyanateli kuneñesha antu amakwawu. Chakutalilahu, mumbanda mukwanshidi wenjili nakumuwana Yesu iku nakudila nikuzowesha kunyendu yaYesu namadilu indi. Yesu welukili nindi nabalumuki mumuchima nawa welukili chatiyileñayi hayina mpinji neyi chakwila wamuhañili. Dichi, wamuhamekeli nikumwanakena. Kafwarisi chatiyiliyi kutama nayuma yamwekeni, Yesu wamukwashili mumesu awunda. (Luka 7:36-48) Tunateli kwimbujola ñahi luwi lwaNzambi? Kapostolu Pawulu wasonekeli nindi: “Nduñu yaMwanta, chinjila kufwila ntadi, chiña ekali wamwovu nawantu ejima, wukweti kashinshi kakuleja akwawu, ekali mukwakutiyilila akwawu.” (2 Tim. 2:24) Neyi twiluka chinakutoñojokawu akwetu nikufwila kwiluka chinateli kutiyawu nansañu yitukuhosha, chikutukwasha kwiluka chakuhosha nikwila yuma munjila yikumwekesha nawu tunakwimbujola luwi lwaYehova.—Yish. 15:28. w15 5/15 4:8, 9

Neyi amana kwetu anakuyanda, tunateli kuyikundeja nikuyikwasha muyuma yakumujimba, muyitoñojoka nikuspiritu. (Yish. 17:17) Chakutalilahu, tunateli kuyikwasha neyi adi mukukala kwadimwekenaña. Tiyenu nfwila wumu chasakilililiyi chakufuma hamuchima hanyima yakwila itala dindi dinakisiki dehi nanvula yeneni yampepela, welili nindi: “Nasakililaña chikupu hakwikala mukuloñesha kwaYehova, bayi neyi hawukwashu wunatambwili wakumujimba hohuku ilaña nihawukwashu wakuspiritu.” Tiyenu cheñi mazu ahosheliyi muhela wumu mujiki waneñeli nikuhayama hanyima yakumona itala dindi chidakisikili nanvula yampepela. Chamukwashiluwu wahosheli nindi: “Nakañanyi nimwakuhosha! Hinikutwesha kulumbulula chinatiyiluku.  . . Nasakilili Yehova!” Twatiyaña kuwaha hakwikala hakachi kawana kwetu akwashaña amakwawu chakufuma hamuchima muyuma yakeñekaña. Twazañalalaña chikupu muloña Yehova niYesu Kristu akamenaña antu jaNzambi. w15 6/15 1:17

Bayibolu yatukwashaña cheñi kubula kwikala nayitoñojoka yatama kuhitila mukutufumba chakushakama namuntu weyala hela wamumbanda. Iku kufumba kwakaanisha kukenkama. Amakwawu amonaña neyi kuzatisha yiidi yamujimba nikutala muntu munjila yakumwekesha kukeña hikunateli kuleta kukalaku muloña anakudikwata wanyi. Ilaña kukenkama hela kwiteja muntu kukukenkamina, kwaleteshaña kwikala nayitoñojoka yatama yinateli kukojeja muntu kwila wuvumbi. Chumichi chamwekanahu dehi nawa chinateli kumwekena cheñi. Yosefu hetejeli kumukenkaminaku. Chelili ñoda mwanta windi Potifwari yatachiki kumukenkamina, Yosefu wakaanini. Ilaña mumbanda yeniwu halekeluku. Mafuku ejima wamulejeleña Yosefu nindi ashakami nindi. (Kutach. 39:7, 8, 10) Hela chochu, Yosefu wafuukwiluhu kubula kwila yuma yatama hela kwiteja kumukenkamina, chumichi chamukwashili kubula kwikala nakufwila kwatama mumuchima windi. w15 6/15 3:10, 11

Yehova hakeñaña nindi tudakameneña hohu etu aweni kutalisha hawubwambu wetu naYehovaku, ilaña twatela kwakamenaku niwawakwetu kushilahu niantu atuvulumunaña. Kakavulu, iyi nyiloña yekala yanyanya nawa yatwinkaña kukooleka kwakumwekesha nawu twayikeña amana kwetu chikupu nawa twafwilaña kuyanakena neyi chatwanakenañayi Nzambi. (Kol. 3:13) Chineli twawanina wanyi, mpinji yikwawu tunateli kushila akwetu nkunyi. (Lev. 19:18) Neyi tukuhoshaña nsañu yinatwiluwu akwetu, tukuleta chaambu muchipompelu. Neyi tukwiteja yuma yamuchidiwu kutwalekahu, tukumwekesha netu hitwasakililaña haluwi lwaNzambi niifutu danyiloñaku. Neyi twikala namuchima wakubula kwanakena, Tata yetu niyena hanateli kutwanakena kuhitila mwifutu daMwaninduku. (Mat. 18:35) Yesu washimwini chumichi chamanishiliyi tuhu kuhosha hakulomba kwachitalilu. (Mat. 6:14, 15) Dichi hakwila nawu Nzambi yatwanakeni, twatela kuzata nañovu kulonda tuleki chaaku chakukoña nshidi yahamesu bwi-i.—1 Yow. 3:4, 6. w15 6/15 5:9-11

Tukweti kukooleka muloña Yehova watwiteja kuwahisha paradisa yetu yakuspiritu. Twelaña mwenimu kuhitila mukudikita chikupu mumudimu wakushimwina nsañu yayiwahi yaWanta nikwilisha atumbanji amavulu. Neyi tumukwasha muntu nawa yadihana nakwikala mukwaKristu, dikwila nawu tunakutohesha paradisa yakuspiritu. (Isa. 26:15; 54:2)Tunateli cheñi kuwahisha lubanji lwaparadisa yetu yakuspiritu kuhitila mukuwahisha yililu yetu yawakwaKristu. Chitwela mwenimu, tukwilisha iyi paradisa kwikala yayiwahi chikupu kudi antu. Kakavulu antu enzaña mukuloñesha kwaYehova nikukundama kudi Nzambi niKristu muloña twekala awunda nawa tukweti yililu yayiwahi, bayi neyi enzaña muloña tweluka nsañu yamuBayiboluku. Yehova naYesu atiyaña kuwaha makonu neyi amona paradisa yetu yakuspiritu yalubanji. Muzañalu wutukweti chayinu mpinji hakuwahisha lubanji lwaparadisa yakuspiritu wemenañaku muzañalu wutukatiya kumbidi hakuzata nakwilisha iseki kwikala paradisa. w15 7/15 1:18-20

Makonu antu ejima atela kufuukulahu neyi chakwila atela kukuhwelela nawu njila yelilañamu Nzambi yuma yabadika yaSatana hela nehi. Kuhosha hohu chakufuma hamuchima, komana mwamuhakwilañaku Yehova kuhitila mukwovwahila nshimbi jindi chatela mwileña yuma munjila yimunakeñi? Komana mwamonaña Wanta waNzambi nenu diwu wakamanisha kukala kwamonañawu antu? Indi kwiji mwakuhwelela nenu antu anateli kudiyuula aweni? Ñakwilu yenu kutalisha kunawa malwihu yinateli kumwekesha chimunateli kwakula neyi muntu yayihula chimwatoñojokaña kutalisha kunsañu yamatuña nachiyuulu. Akapolitiki, akwakutiyakesha nsañu jamapolitiki niantu afwilaña kuwahisha yuma anakabakani hadi yaaka yayivulu kulonda amanishi kukala. Ekala nayitoñojoka yayiwahi hakwila mwenimu. Ilaña akwaKristu eluka nawu Wanta waNzambi hohu diwu wukamanisha kukala kwamonañawu antu nakuleta kuwunda kwalala. Twatela kukunjika iyi nsañu mumakasa aYehova. Kafwampi neyi akwaKristu ejima adiña nakushimuna chuma chinateli kumanisha kukala, komana yipompelu hiyadi kwambokelamuku? w15 7/15 3:7, 8

Komana tunateli kumona kukeña kwaYehova kwabulaña kumana kwatukeñayi muyuma yaleñayi? Eñañi, muloña yileñaleña yamwekeshaña kukeña kwaNzambi. (Rom. 1:20) Waleñeli iseki niyuma yejima munjila yinateli kutukwasha kwikala nawumi. Hela chochu, wakeñaña nindi twileña yuma yayivulu kubadika kwikala hohu nawumi. Twatela kudya kulonda tutwalekuhu kuhanda. Yehova waleñeli iseki munjila yakwila disoñeña mafu amboka-mboka amavulu itunateli kuteleka neyi yakudya yayiwahi. Watuleñeli munjila yitwatela kudiluñisha hakudya. (Mukwa. 9:7) Yehova watuleñeli nawuswa wakuzata nyidimu yayiwahi yitunateli kudiluñisha muchihandilu chetu. (Mukwa. 2:24) Wakeñeli nindi antu awanini heseki, adovwahishi, ekali anyanta awanshi, awatujila niyuma yejima yayumi. (Kutach. 1:26-28) Yehova watuleñeli nayililu yayiwahi kulonda tumwimbujoleña.—Efwes. 5:1. w15 8/15 1:4, 5

Yuma yinakumwekana mukaayi yinakumwekesha nawu wuprofwetu wamuBayibolu wunakushikijewa nawa kukuma kwanyaka yatama kudi mukamwihi. Dichi, bayi tutoñojoka netu kunakukeñeka mpinji yeneni kulonda yuma yamukaayi yishiki hachipimu chakwila nawu “nseñu ikumi” ‘nikanyama’ akamubalumukili Babiloni Muneni, wanta wamukaayi kejima wakwitiya kwakutwamba neyi chiyashimunawu haChimwekeshu 17:16. Twatela kwiluka netu Nzambi ‘wakasha munyichima yawu’ hakwila chumichi chikamwekani, nawa chumichi chinateli kumwekana mukunyakashana nawa kala mpinji. (Chim. 17:17) Kukuma kwanyaka yamakonu hikudi kwakulehuku. Kafwampi, twatela kulondela kusoñamisha kwaYesu kudi munsona yalelu. (Chim. 16:15) Dichi tufwilenu kumukalakela Yehova mukunyakashana, nakukuhwelela netu ‘wakoñelaña antu amuchiñililaña.’—Isa. 64:4. w15 8/15 2:17

Hela chakwila twakeñaña kwikala akasunuka nikudi antu abulaña kulondela nshimbi jaNzambi, hitwatela kukwata nawu wubwambuku. Dichi, chatama neyi Chinsahu chaYehova mujiki yatachika kudiluka namuntu wakusumbula hela kusumbuka nindi wabula kudihana nikumukuhwelela Nzambi nawa wabulaña kulemesha nshimbi Jindi. Kwikala ashinshika kudi Nzambi hichuma chalema chikupu kubadika kuzañalesha antu abulaña kulemesha nshimbi jaYehova. Twatela kudikunda chikupu nawantu elaña nkeñelu yaNzambi. A Isarela amweni kukala kweneni muloña adikundili nawantu atama. (Kwid. 23:24, 25; Mas. 106:35-39) Chineli hiyadiña ashinshika kudi Nzambuku, chimwahitili mpinji Yesu wayilejeli nindi: “Talenu itala denu anayishiyilidu dehi.” (Mat. 23:38) Yehova wayikaanini aIsarela nakutonda chipompelu chachiha chawakwaKristu chatuñiluwu.—Yil. 2:1-4. w15 8/15 4:7, 8

Yehova Nzambi waleñeli antu nawuswa wakufukula munakeñuwu aweni. Hakwila nawu tufuukuleña mwaloña, Yehova watwinka chuma chatwikwashaña. Ichi chuma chatukwashaña hichinleji, chaleñelaña twilukeña netu ichi chachiwahi ichi chatama. Neyi tuzatisha chinleji chetu munjila yayiwahi, chikutukwasha kwila yuma yayiwahi nikutondolwela yatama. Chinleji chetu chamwekeshaña nawu Yehova watukeña nawa wakeñaña nindi twileña yayiwahi. Antu amakwawu makonu elaña yuma yayiwahi hela chakwila eluka wanyi nshimbi jamuBayibolu. (Rom. 2:14, 15) Muloñadi? Muloña akweti chinleji. Chakwashaña antu amavulu kubula kwila yuma yatama. Toñojokenu yuma chiyadi kutama mukaayi neyi chakwila twadiña tudana chinleji! Twatela kumusakilila Yehova hakutwinka chinleji. w15 9/15 2:1, 2

Kapostolu Yowanu watukolesheli kutoñojoka chikupu hakukeña kwaNzambi kwabadika kwatukeñayi. Ha 1 Yowanu 3:1, twatañañahu nawu: “Tiyenu kukeña kwanatukeñiyi Tata!” Twakundamaña kudi Yehova nikumukeña nankashi neyi tutoñojokaña chikupu chatukeñayi nichatumwekeshelañayi kukeña. Chawushona, antu amakwawu eluka wanyi chayikeñayi Nzambi. Atoñojokaña nawu Nzambi wakamenaña wanyi antu. Hadaha eluka nawu Nzambi wahanaña hohu nshimbi nikubabesha abulaña kumwovwahila. Muloña wantañishilu yakutwamba, antu amakwawu atoñojokaña nawu Nzambi watama muchima wukumukeña niwanyi. Antu amakwawu ahoshaña nawu Nzambi wakeña antu ejima hela chakwila elaña yuma yatama. Ilaña kudiza Bayibolu kunayikwashi kwiluka walala hadi Yehova. Muneluki nenu kukeña hichililu chindi chabadika nawa dichaletesheli yahani Mwanindi neyi ifutu danyiloña yetu.—Yow. 3:16; 1 Yow. 4:8. w15 9/15 4:1, 2

Hela chochu, twatela kwila ñahi neyi Yehova yatufumba? Twatela kudiwula wanyi kufumba kwaYehova hela kutwalekahu kuhila neyi tunakeñi wanyi mwanatufumbiyi. Chineli twamukeña Yehova, twamutiyililaña neyi yatufumba nawa twahimpaña. KaayikaSatana kaleteshaña antu kuditiya nikwikala nechima. Antu amavulu akeñaña wanyi kuyifumba hela kuyileja chakwila. Amakwawu atiyililaña kufumba muloña wekakeja. Bayi twila mwenimuku. Bayibolu yatukanishaña ‘kulondeja mwelañawu antu amakonu.’ Dichi, twatela kwiluka yuma yakeñañayi Yehova kudetu nikumutiyisha kuwaha. (Rom. 12:2) Wazatishaña kuloñesha kwindi kulonda yatufumbi hampinji yatelela. Chakutalilahu, atulejaña chitwatela kudikunda nawantu awamayala hela awambanda, chakutonda amabwambu niyuma yitwatela kwila hampinji yakunooka. Neyi twiteja kufumba kwaYehova chakufuma hamuchima nikuhimpa kulonda tumutiyishi kuwaha, tukumwekeshaña kusakilila hawunlomboli windi nawa netu twamukeña hama.—Yow. 14:31; Rom. 6:17. w15 9/15 5:13, 15

Hakwila nawu tukoleshi chikuhwelelu chetu, twatela kumulomba Nzambi spiritu yajila. Muloñadi? Muloña chikuhwelelu chekala hakachi kanyikabu yaspiritu yajila. (Ŋal. 5:22) Komana twatela kulondela kufumba kwaYesu kwakulomba spiritu yajila. Yesu wahosheli nindi Yehova wakenka ‘antu akamulomba spiritu yajila.’ (Luka 11:13) Chitwekala nachikuhwelelu chakola mudi Nzambi, bayi tuchijiyishaku. Chikuhwelelu tunateli kuchesekeja nakesi. Chitwabutula kesi, muzuzu wekalaña nañovu. Ilaña neyi kwinkahu nchawa nehi kesi kakujima nawa hakushala hohu mawuti. Dichi neyi tutwalekahu kwinkahu nchawa, kesi kakutwalekahu kubutuka. Dichekala nichikuhwelelu chetu. Tukumukeña nankashi Yehova Nizu dindi Bayibolu neyi tukutañañamu nikudizamu mafuku ejima. Chikufumamu, chikuhwelelu chetu chikukola nawa chikujiya wanyi. w15 10/15 2:6, 7

Asayantisiti awaana nawu muntu nateli kwanuka swayi nsañu neyi yataña nezu datiyakana. Nleñi yetu weluka chikumichi, dichaletesheli yamuleji Yoshuwa kutaña mukanda waNshimbi ‘nezu datiyakana.’ (Yosh. 1:8) Kutaña Bayibolu nezu datiyakana kukuyikwasha kusha maana hansañu yimunakutaña nikuyanuka chikupu. Twatela kuzata nañovu hakwila tutoñojokeña nikusha maana hansañu yitunakudiza. Dichi, twatela kutoñojokaña hampinji yitunabuli kuzeya nawa tudi kwiluña damwena. Ñimbi yaMasamu Davidi watoñojokeleña nawufuku neyi nakami hakadidi iku nakutona. (Mas. 63:6) Yesu, muntu wadiña wawanina watondeleña maluña amwena akutoñojokelaku nikulomba.—Luka 6:12. w15 10/15 4:4, 6, 7

Mpinji yimu antu amakwawu akuÑaliliya enjili nakumukeña-keña. (Yow. 6:22-24) Welukili chuma chacheni chenjililuwu, bayi neyi enjili nakutiya chatañishileñayuku, ilaña akeñeleña yakuda. (Yow. 2:25-27) Hela chakwila mukutwesha wanyi kwiluka yuma yidi mumuchima wamuntu, munateli kwikala nakashinshi. Chakutalilahu, esekenu kutala neyi anyanenu akeña mudimu wakushimwina. Munateli kudihula nenu, ‘Anyanami akeñaña hohu kuya nakushimwina neyi niyileja nami nikuyinka chuma?’ Neyi mwiluka nenu anyanenu akeña wanyi mudimu wakushimwina, wanenu njila yinateli kuyikwasha kukeña mudimu wakushimwina. Yinkenu tunyidimu tukuyileñela atiyi nawu niwena anakuzataku mudimu wakushimwina. w15 11/15 1:10, 11

Nzambi yetu wukweti kukeña wenkaña ambuñindi ashinshika yuma yayiwahi. Bayibolu yahosha nawu: “Wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku.” Antu ovwahilaña Nzambi nawa amusakililaña muloña wakukeña kwindi akadiluñisha wumi wahaya nyaka! Bayibolu yahosha nawu: “Mutali chachiwahi muntu walala, mushinshiki muntu woloka; ona muntu kwakakuminayi wakamona kwawunda. Akwakuputola akayijilumwina hamu.” (Mas. 37:37, 38) “Muntu walala” wamwiluka Yehova niMwanindi nawa welaña nkeñelu yaNzambi. (Yow. 17:3) Wakuhwelela nindi “mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.” (1 Yow. 2:17) Chineli kukuma kwakaayi kudi kwakwihi, “muchiñeji Yehova, wulami munjila yindi” yoyinu mpinji.—Mas. 37:34. w15 11/15 3:11, 12

Antu jaNzambi anazatishi njila jashiyashana hakushimwina antu amavulu. Iji njila jatukwashili nankashi chineli kwadiña akwakushimwina antesha. Chakutalilahu, Yaaka yakunyima azatishili yipapilu yansañu kushimwina nsañu yayiwahi. Mulungu nimulungu Manakwetu Russell watemesheleña Mpanji yaBayibolu kudi akwakusoneka nsañu. Kuhiñahu, akwakusoneka nsañu atemesheleña mpanji yindi kuCanada, Europe, nikuUnited States. Kushika mu 1913, mpanji jaManakwetu Russell ajisonekeli muyipapilu yansañu 2,000 nawa ajitañili kudi antu 15,000,000. Azatishili cheñi chikunzulemba hakushimwina nsañu yayiwahi. HaApril 16, 1922, Manakwetu Rutherford wahanini mpanji yindi yatachi hachikunzulemba, nawa ayitiyili kudi antu 50,000. Dichi, twatachikili kuzatisha chikunzulemba chetu chaWBBR, nawa progilamu yatachi ayishili hampepela haFebruary 24, 1924. w15 11/15 5:10, 11

Yehova wakojejaña yileñaleña yindi kwikala mwanakeñiyi. Chakutalilahu, Nzambi wakojejeli Nowa kwikala mukwakutuña watu, Bezaleli kwikala mukwawukalawenu, Gideyona kwikala mushidika wañovu niPawulu kwikala kamishonali. Antu jaNzambi alemesha chikupu ijina daNzambi, dichi Kometi yaNew World Bible Translation yasonekeli idi ijina muBayibolu. MumaBayibolu amavulu afumishamu ijina daNzambi. Ilaña, asonekamu nkumbu yakwila nawu “Mwanta” hela ijina danzambi wakunodu iluña. Dichaletesheli Izanvu Dalombolaña kufuukula nawu antu amumadimi ejima ekali naBayibolu yalemesha ijina daNzambi. (Mal. 3:16) Dichi muBayibolu yaNew World Translation yinabalumuniwu mumadimi akubadika 130 asonekamu ijina daYehova. w15 12/15 2:7-9

Yehova wukweti ñovu yakubabesha muntu nayikatu nikuuka wakata. Wababesheli antu amakwawu nayikatu, chidi neyi Fwaro wamumafuku a Abarahama kuhiñahu Miriyami muhela aMosi. (Kutach. 12:17; Kuch. 12:9, 10; 2 Sam. 24:15) Nawa wababesheli aIsarela “nayikatu yejima niyipupu” hampinji yabuliluwu kumwovwahila. (Kuhit. 28:58-61) Yehova wakiñili cheñi antu jindi kuyikatu. (Kwid. 23:25; Kuhit. 7:15) Amakwawu wayuukili. Chakutalilahu, wokili Yoba wadiña wakata chikupu kwakwihi nakufwa. (Yoba 2:7; 3:11-13; 42:10, 16) Tweluka chikupu netu Yehova wukweti ñovu yakuuka akata. Yesu niyena wukweti ñovu yakuuka akata. Hadiñayi hamaseki, wokili antu adiña nambumba niakwachinkonya. Watonesheli amputamesu nawa wokili akata kalepa. (Mat. 4:23, 24; Yow. 9:1-7) Iyi yihayamisha yatukwashaña kuchiñeja yuma yikatwililayi Yesu mwituña dadiha. w15 12/15 4:3, 4