July

Awa mazu atwanukishaña cheliluwu Abarahama naLoti. Awa amayala ayedi amwekesheli kukeña kudi enyi abuliluwu kwiluka. Nkumininaku, Abarahama naLoti elukili nawu awa enyi adiña añelu. (Kutach. 18:2-5; 19:1-3) Tunateli kumwekesha ñahi chisambu kudi akwetu? Tunateli kutambika amanakwetu niahela kwitala detu nakuda hela nakuyikolesha. Hela chakwila twayiluka chiwahi wanyi ankoñi etu añinza niañodawu, tunateli kuyitambika kwitala neyi anendeli chipompelu chetu. (3 Yow. 5-8) Hitwatela kuyiloñeshela yakuda yayivulu hela kuzatisha mali amavuluku. Tunakufwila hohu kukolesha amanakwetu, bayi kuyitiyisha kuwaha nayuma yitukwetuku. Bayi tutambika hohu antu ituneluki netu niwena akatukwasha. (Luka 10:42; 14:12-14) Dichi, hela tudi nanyidimu yayivulu, bayi tuvulamena kumwekeshela akwetu chisambuku. w16.01 1:11, 12

Yehova wazatishaña spiritu yindi yajila hakuyimwekeshela hatooka chikupu awa akwaKristu nindi nayitondi kuya mwiwulu. Muniyi njila, spiritu yajila ‘dichinjikijilu’ chakumwekesha nawu kumbidi akashakama mwiwulu bayi hamasekuku. (2 Kor. 1:21, 22; 5:5) Neyi mukwaKristu anamuwayishi, komana chinayi mukwila nawu wakatambula wuloku windi? Inehi. Neluki chikupu nindi anamutondi kuya mwiwulu. Ilaña nateli kutambwila wuloku windi neyi yatwalekahu kwikala washinshika kudi Yehova. Petulu walumbulwili muniyi njila, nindi: ‘Dichi enu ana kwetu, dikwatishenu nakukolesha kutambika kwayitambikiluwu, nikutonda kwayitondeluwu; muloña neyi mukwila yumiyi himwamba kadimbukaku. Neyi mukwila mwenimu akayenzulwila muwiñililu wakwiñila chachiwahi muWanta wahaya nyaka, waMwanta wetu yowu Chamwinu Yesu Kristu.’ (2 Pet. 1:10, 11) Dichi mukwaKristu wawayishewa wejima bayi eteja chuma chidi chejima chimukañeshi kukalakela Yehovaku. Hela chakwila amutambika kuya mwiwulu, neyi yabula kushinshika, hanateli kutambwila wuloku winduku.—Heb. 3:1; Chim. 2:10. w16.01 3:6, 7

Chatama kukumbwa muntu nankashi, hela wekala mana kwaKristu wawayishewa. Bayibolu neyi yinakuhosha hadi aeluda, yatukoleshaña kwimbujola chikuhwelelu chawu ilaña yatulejaña wanyi kwilisha muntu wudi wejima kwikala nlomboli yetu. (Heb. 13:7) Bayibolu yahosha nawu antu amakwawu atela “kuyilemesha chakubadika.” Ilaña ichi chinayi mukwila nawu “ayulaña chachiwahi” nawa ‘ashimwinaña nikuleja,’ bayi neyi muloña awayishewaku. (1 Tim. 5:17) Neyi tusweja kuhameka awayishewa, tukuyitiyisha nsonyi. Chikusweja kutama neyi tuyiletesha atachika kudimona kulema. (Rom. 12:3) Kwosi muntu niwumu hakachi ketu wunakukeña kwila chuma chikuletesha amanakwaKristu awayishewa kwila chuma chamuchidiwu.—Luka 17:2. w16.01 4:9

Wubwambu wudi neyi chuma chalema wuseya. Ilaña wudi wanyi neyi chuma chalema wuseya chitunateli kulanda nakusha mwitala kulonda mumwekaneña lubanji. Wubwambu wekala neyi nkenu yakeñekaña menji kulonda yikenukeña. Abarahama watwalekeluhu kwikala ibwambu daYehova. Wubwambu windi watwalekeluhu ñahi? Abarahama watwalekeluhu kumwakama Nzambi nikumwovwahila. Chakutalilahu, chayiliyi kuKenani nachisaka chindi niañamba jindi, wakuhweleleli Yehova kumukwasha kufuukula chiwahi muyuma yejima. Yehova wamulejeli Abarahama kwalamisha amayala ejima amwitala dindi henohu wudi nayaaka 99 nawa kunashali chaaka chimu hakwila Isaka yavwaliki. Komana Abarahama wajinokeli hela kukaana mwamulejeliyi Yehova? Inehi, wamukuhweleleli Yehova chikupu nawa wamwovwahilili ‘dodina ifuku.’—Kutach. 17:10-14, 23. w16.02 1:9, 10

Bayibolu hiyatena yaaka yatela kushikijayi muntu hakwila nawu yapapatishewiku. Twatañaña haYishimu 20:11 netu: “Hela mwana wanyanya amwilukilaña kuyuma yelañayi, neyi nyidimu yindi yitooka, hela neyi yoloka.” Mwana niyena nateli kwila yuma yaloña nawa nateli kwiluka chalumbuluka kudihana kudi Nleñi yindi. Dichi kansi wunapami nawa wunadihani kudi Yehova watela kupapatishewa. (Yish. 20:7) Kupama kwatalisha mudihi? Kupama kwatalisha hohu wanyi kukukula kwakumujimba. Bayibolu yahoshaña nawu antu apama afumba dehi “yitoñojoka yawu” yakwambula yayiwahi nayatama. (Heb. 5:14) Muntu wapama weluka yaloña nawa wadikasaña mumuchima windi nindi wukuyila. Hanateli kuhuhwankana nakwila yuma yatamaku.—Fwi. 2:12. w16.03 1:4, 5

Jonatani watela watiyili kuwaha hakumona kuhamuka kwadiña nakansi Davidi. Davidi wajahili chikelamu cheyala Goliyati nawa waleteli “mutu wakaFwilistinu” kudi tata yaJonatani Mwanta Sawulu wawaIsarela. (1 Sam. 17:57) Jonatani welukili nindi Nzambi wadiña naDavidi, kufuma tuhu yina mpinji Jonatani naDavidi ekalili amabwambu chikupu. Adikanini nawu akutwalekahu kwikala ashinshika kudi wumu namukwawu. (1 Sam. 18:1-3) Jonatani wadiña washinshika kudi Davidi muchihandilu chindi chejima. Jonatani watwalekeluhu kwikala washinshika kudi Davidi hela chakwila Yehova watondeli Davidi kwikala mwanta wawaIsarela bayi yenaku. Chelili Sawulu yakeñi kujaha Davidi, Jonatani waneñeli. Welukili nindi Davidi wadiña muchinkalampata chaHoreshi, dichi wayili nakumukolesha kulonda yatwalekuhu kushindamena hadi Yehova. Kuna, Jonatani wamulejeli Davidi mazu adi munsona yefuku dalelu.—1 Sam. 23:16. w16.02 3:1, 2

Yehova naYesu ekala anuñañana kufuma tuhu haleñeluwu yuma yejima. Yehova waleñeli Yesu henohu kanda yaleñi yuma yejima. Kuhiñahu, Yesu wazatili hamu naNzambi nawa wadiña “mukalawenu.” Ambuña aYehova niwena adiña anuñañana mumudimu wazatileñawu. Chakutalilahu, Nowa nichisaka chindi atuñili watu hamu. Kuhiñahu, aIsarela azatili hamu hakutuña tabanaka, kuyikasununa nikuyisenda kufuma kwiluña dimu nakuya kwiluña dikwawu. Embilileña hamu tumina nikumushimeka Yehova natumina twatuwahi hatembeli. Antu jaYehova atwesheli kwila yuma yejimiyi muloña adiña anuñañana. (Kutach. 6:14-16, 22; Kuch. 4:4-32; 1 Kushi. 25:1-8) AkwaKristu amumafuku awapostolu niwena adiña anuñañana. Kapostolu Pawulu walumbulwili nindi hela chakwila adiña nawuswa washiyashana ninyidimu yashiyashana, adiña anuñañana. Wejima wawu embujolileña Nlomboli yawu, Yesu Kristu. Pawulu wayesekejeli namujimba wudi nayidi yayivulu yazatilaña hamu.—1 Kor. 12:4-6, 12. w16.03 3:1, 2

Kunyima, antu akunyuza enjileña kuIsarela nakumukalakela Yehova. (1 Anya. 8:41-43) Ilaña Yesu wahanini lushimbi lutwawanaña munsona yefuku dalelu. Yesu walejeli atumbanji ‘kuya’ kudi antu ejima. Hapentekosta 33 C.E, Yehova wamwekesheli nindi wakeñeleña nsañu yayiwahi yishiki kudi antu mukaayi kejima. Hadina ifuku, antu akushika ku 120 enzeli naspiritu yajila nawa atachikili kuhosha madimi ashiyashana kudi ayudeya niantu abalumukili kwikala ayudeya. (Yil. 2:4-11) Kuhiñahu, iluña datoheli kushika nikuSamariya. Chashikili chaaka cha 36 C.E, iluña datoheleliku chikupu abombeleliku niajentili abulili kwalama. Chamwekesheleña nawu akwaKristu ateleli kushimwina mukaayi kejima. w16.03 4:12

Kufuma tuhu kushankulu ambuña Nzambi eluka nawu kudizisha amakwawu mwafumaña yuma yayiwahi. Nkakulula Abarama ‘watwalili antu jindi amayala afundishiliyi njita’ kulonda amupulwishi Loti nawa awa mayala amupulwishili. (Kutach. 14:14-16) Mumafuku aMwanta Davidi, akwakwimbila mwitala daNzambi ‘afundishiluwu kumwimbila Yehova’ amuhamekeli Nzambi. (1 Kushi. 25:7) Makonu, tunakulwa njita yakuspiritu naSatana niantu jindi. (Efwes. 6:11-13) Tunakuzata cheñi nañovu kulonda tumuhamekeña Yehova. (Heb. 13:15, 16) Dichi, kufwana ambuña Nzambi akushankulu, hakwila tuzati chiwahi atela kutudizisha. Muchipompelu, Yehova wayinka aeluda mudimu wakudizisha amakwawu. Henohu kanda mumudizishi manakwetu wabula kushikahu yuma yikwawu, aeluda mwatela kwiluka nsona jikwawu jimwatela kumuleja kulonda muloñeshi muchima windi hayuma yayivulu yikudizayi.—1 Tim. 4:6. w15 4/15 2:1, 2

Chumichi hichaya mukwila nawu wajahaña antu yomwenuku. Hela chochu, yililu yindi yakujahana yenzala mukaayi. Kubombelahu, muloña wakwila Evu wetejeli chamudimbiluwu kudi Satana nawa Adama wadikañili naNzambi, nshidi nikufwa yeñilili mudi antu ejima. (Rom. 5:12) Muniyi njila, Diyabolu wukweti ‘ñovu yakuleta kufwa.’ Dichi chamuteneneniyi Yesu nindi “mbanji.” (Yow. 8:44) Satana hichilumbu wukweti ñovu chikupu. Neyi tudikaña naSatana, dikwila nawu tunakudikaña cheñi nawantu ejima atiyañanaña nindi nawa abulaña kwovwahila chiyuulu chaNzambi. Hakachi kanawa antu hekala cheñi mukanka wanyanya wayileñaleña yakuspiritu yadikañili hela netu andemoni. (Chim. 12:3, 4) Mumpinji mumpinji awa andemoni anamwekeshi ñovu jawu jabadika jawantu kuhitila mukukabisha antu ayandishañawu. (Mat. 8:28-32; Maku 5:1-5) Bayi mudiwula ñovu jikwetuwu awa añelu atama hela ‘jamwanta wawandemonuku.’ (Mat. 9:34) Chakubula wukwashu waYehova, hitukutwesha kudikaña naSatanaku. w15 5/15 1:6, 7

Neyi muholokela mukweseka kwakwila wuvumbi, chumanyi chimunateli kwila? Mwatela kwiluka kuzeyazeya kumukweti. (Rom. 7:22, 23) Lombenu kudi Nzambi kulonda yayikwashi. (Fwi. 4:6, 7, 13) Lekenu kwila yuma nikuya kumaluña kunateli kuyileñela mwili wuvumbi. (Yish. 22:3) Nawa neyi mudi mukweseka, kaanenu chakubula nikulaba. (Kutach. 39:12) Yesu watushilili chakutalilahu chalema chinateli kutukwasha kushinda kweseka. Hiyamudimbili kudi Satana kuhitila mukumukana yumaku, nawa hashintajalili nakutoñojoka haniyi yumaku. Ilaña, Yesu wakaanini chakubula nikuumba mpinji namazu akwila nindi: “Anasoneki nawu.” (Mat. 4:4-10) Yesu welukili Izu daNzambi nawa chumichi chamukwashili kwakula swayi-swayi namazu amunsona iku wudi mukweseka. Hakwila tudikañi naSatana nikumushinda, twatela kukaana kwiñila mukweseka kwakwila wuvumbi. w15 5/15 2:15, 16

Chineli twekala nawuswa wakwiluka yuma yitwabula kumona, chumichi chinateli kutukwasha kwimbujola maana aYehova nikwilukila chadimu yuma yikumwekana hachuma chitunakwila. Neyi Yehova nakukeña kuyizatisha, welukilaña chadimu yuma yejima yinateli kumwekena. Hitukweti wuswa wakwilukila chadimu yuma neyi Nzambuku, ilaña chikuwaha neyi tutoñojokela chadimu yuma yikamwekana hachuma chitunakukeña kwila. Hakwila twimbujoli maana aNzambi, chikuwaha neyi tutoñojoka hela tufwikija yuma yatama yikafumamu muyuma yitukwila. Chakutalilahu, neyi tunakudiluka namuntu wakwiñila nindi muwuluwi, twatela kwiluka netu chakala kudihemba munsañu yawuvumbi. Bayi tutoñojokaña hela kwila chuma chidi chejima chinateli kutamisha wulunda wetu wawuwahi naYehovaku. Dichi, twatela kwila yuma yesekana nanawa mazu onenawu akwila nawu: “Muntu wadihoñeshaña mumuchima wamonaña katama, hakubatama; ilaña abula maana ayaña tuhu kwawu, hiyakumwenamu jakala.”—Yish. 22:3. w15 5/15 4:10, 11

Anukenu chuma chamumwekeneni Mwanta Davidi. ‘Hewulu detala hadiñiyi [Davidi] wamweni mumbanda wudi nakuwela.’ (2 Sam. 11:2) Wakañenyi kutala kwacheñi nikutoñojoka hayuma yacheñi. Chumichi chamuleñeleli kutachika kumukeña mumbanda wadiña ñoda muntu wacheñi nawa welili nindi wujila. Hakwila tudikañi nayitoñojoka yawuvumbi, twatela ‘kutiyañana namesu etu’ neyi cheliliyi Yoba washinshika. (Yoba 31:1, 7, 9) Dichi twatela kufuukulahu chikupu kuyuula mesu etu kulonda tubuli kutala muntu wacheñi namesu akufwila kwila nindi wuvumbi. Chumichi chabombelamu kubula kushinshika nyevulu yinateli kusañumuna wuvumbi, yidi hakompyuta, hachipamba, hefu dahewulu damagazini hela kudi kwejima. Hakudikaña nakufwila kwatama, mwatela kuzatilahu swayi-swayi. Itejenu kufumba kwaMwizu daNzambi kunateli kuyikwasha kubula kuvulumuna nikutwalekahu kwikala ashinshika chakubula kwila wuvumbi.—Yak. 1:21-25. w15 6/15 3:12-14

Neyi tushinshikaña hayuma yamumwekeneni Yesu hanyima yakupapatishewa, yinateli kutukwasha kwiluka chitwatela kulombela netu: “Bayi wututwala mukwesekaku.” Yesu amutwalili muchinkalampata kudi spiritu yaNzambi. Muloñadi? ‘Kulonda akamweseki kudi Diyabolu.’ (Mat. 4:1) Komana chumichi chatela kutuhayamisha? Tunateli kuhayama neyi tuneluki wanyi muloña waweni wamutemesheleliyi Nzambi Mwanindi hamaseki. Wenjili nakumanisha nyiloña yavulumwinuwu Adama naEvu chelili akaani kwovwahila chiyuulu chaNzambi. Hateleleli kuhita mpinji yeneni kulonda amanishi iku kukala kwaleteliyi Satana. Chakutalilahu, komana hadi haluwañesheliyi Nzambi hakuleña antu? Komana chadiña chaswayi muntu wawanina kuhakwilaku chiyuulu chaNzambi hela chakwila amwesekeleña kudi ‘watama’? Komana antu anateli kudimena chakubula kuyiyuula kudi Nzambi neyi chahosheliyi Satana? (Kutach. 3:4, 5) Hakwakula malwihu amuchidiwu hatela kuhita mpinji yeneni kulonda antu ejima niañelu akeluki nawu chiyuulu chaYehova dichi chachiwahi. w15 6/15 5:12

Indi lukadi lwasweja lukatachika ñahi? Mukanda waChimwekeshu wakula kuhitila mukulumbulula chakajilumunawu “Babiloni Muneni.” (Chim. 17:5-7) Kwitiya kwakutwamba kwejima chakwesekejawu nachivumbi chatelela. Akulumpi jakwitiya elaña wuvumbi nawanlomboli amukanu kaayi katama. Chatela akwasheña Yesu niWanta windi nakashinshi, akwashaña anyuuli awantu nawa afumpaña nshimbi jaNzambi kulonda adiñiji munsañu yajipolitiki. Ambukaku chikupu nawawayishewa aNzambi afwana ajiki nawa akadi majilu. (2 Kor. 11:2; Yak. 1:27; Chim. 14:4) Hinyi wakajilumuna iku kuloñesha kudi neyi chivumbi? Yehova Nzambi wakasha ‘yitoñojoka yindi’ munyichima ‘yanseñu ikumi’ ‘jakanyama kachinana.’ Iji nseñu jemenañaku yiyuulu yejima yamakonu yamapolitiki yikweti ñovu yakwashaña United Nations, chipompelu chemenañaku “kanyama kachinana.”—Chim. 17:3, 16-18. w15 7/15 2:3, 4

Chumanyi chadi kumanisha iyi yitoñojoka yaleteleña chaambu? Pawulu wayikonkomweneni akwaKristu nindi: “Enu ana kwetu, nayilembeleli . . . nami hoshenu mazu wowamu wejima wenu; bayi mwambuka aha chendu chimu, aha chendu chikwawuku; chiña kudibomba hamu nayitoñojoka yimu nikutiyañana kumu.” (1 Kor. 1:10, 11, 13) Muchipompelu chawakwaKristu makonu himwatela kwikala chaambu chidi chejimaku. (Rom. 16:17, 18) Pawulu wayikonkomweneni akwaKristu awayishewa kusha maana hawenimbu wawu wakushakama mwiwulu chatela ashi maana hayuma yamaseki. (Fwi. 3:17-20) Ateleleli kwikala neyi añimenu jaKristu. Añimenu hiyadiñijaña munsañu yamatuña mwayitemeshawuku. Ovwahilaña antu ayitemeshaña. (2 Kor. 5:20) AkwaKristu akweti chikuhwelelu chakushakama hamaseki niwena hiyantu akayuulawu kudi Wanta waNzambi, dichi niwena hiyatela kudiñija munsañu jamatuña nachiyuuluku. w15 7/15 3:9, 10

Kutoñojoka chikupu haniyi vasi kunateli kukukwasha kwiluka neyi Yehova wakukeña nawa wakwakamenaña halweyi. Ilukaku chikupu neyi walema kumesu aYehova. (1 Pet. 5:6, 7) Twatela kulemesha Bayibolu chikupu muloña Nzambi wahoshaña nanetu kuhitila muBayibolu. Neyi anvwali atiyañanaña chiwahi nawanyanawu, chumichi chikuyikwasha kukolesha kukeña kwawu nawa akudikuhwelela. Indi Yehova nateli kwila ñahi? Hela chakwila kanda tumumoneñahu dehi nawa kanda tutiyeñahu dehi izu dindi, ‘wahoshaña’ nanetu kuhitila Mwizu dindi donenawu nawa twatela kutiyilila. (Isa. 30:20, 21) Yehova wafwilaña kutulombola etu antu jindi adihana nikutukiña kuyuma yatama. Wakeña cheñi nindi tumwiluki nikumukuhwelela.—Mas. 19:7-11; Yish. 1:33. w15 8/15 1:6, 7

Hela chakwila tunakutalila paradisa, ilaña nkisu yayeni yitukatambwila mwituña dadiha hiyuma yakuspiritu. Wenowu muzañalu wutwakatiya hakwiluka netu ijina daYehova anadijiliki nawa wanta windi anawuyiñisha! (Mat. 6:9, 10) Twakazañalala chikupu hakumona nkeñelu yaYehova yakusambila yafuukwililiyi antu niiseki chiyakashikijewaña. Nawa toñojokenu chichakatupelela kukundama kwakwihi naYehova chitukekalaña awanina chovu-chovu. (Mas. 73:28) Tunateli kwikala naniji nkisu muloña Yesu watukana nindi “yuma yejima yinatwesheki kudi Nzambi.” (Mat. 19:25, 26) Dichi neyi tunakufwila kushakama mwituña dadiha nikutwalekahu kuhada hanyima yaYaaka Ikombakaji daChiyuulu chaKristu, yinu diyi mpinji yitwatela ‘kukwata chikupu’ kuwumi wahaya nyaka. (1 Tim. 6:19) Twatela kushakama nakuchiñilila kukuma kwakanu kaayi katama nawa twatela kwikala nayililu yayiwahi chayinu mpinji kulonda tumwekeshi netu tunadiloñeshi makonu chakushakama mwituña dadiha. w15 8/15 3:2, 3

Yuma yayivulu yamwekeshañawu hayikunzulemba yamukaayi yinateli kuleta wubanji wakuspiritu kudi akwaKristu. Yuma yeniyi hiyakoleshaña chikuhwelelu chetu mudi Yehova niyikaninu yinduku. Ilaña, yamwekeshaña kaayi katama kaSatana niyuma yekalamu. Dichi, twatela kwikala asoñama kulonda tubuli kutonda yuma yinateli kusañumuna ‘kufwila yuma yatama yampata yamunu mwishina.’(Tit. 2:12) Kwambukaku nayuma yedishaña kaayi, yuma yedishaña kuloñesha kwaYehova munanu mafuku akukuminina yatukwashaña kwikala nayililu yakatutwala kuwumi wahaya nyaka. Tukweti kukooleka chikupu kwakwikala namagazini, mabuloshuwa, nyikanda, mavidiyo niWebu sayiti yinakutiyakesha kudifukula kwalala. Kuloñesha kwaNzambi kwatanjika cheñi ntanjikilu yakupompa mpinji yejima muyipompelu yakubadika ha 110,000 mukaayi kejima. Haniku kupompa nikupompa kwanyanya nikwamaneni, twatañaña nsañu yashindamena haBayibolu yakoleshaña chikuhwelelu chetu mudi Nzambi niyikaninu yindi.—Heb. 10:24, 25. w15 8/15 4:9, 11

Antu amavulu akeñaña wanyi kufumba chinleji chawu. Ilaña, antu jaYehova akeñaña chinleji chawu kuzata chiwahi muloña chinateli kuyikwasha kuleta kunuñañana muchipompelu. Tunakukeña chinleji chetu chitwanukisheña nshimbi jamuBayibolu jahosha hakwila yuma yayiwahi niyatama. Hela chochu, hakwila tufumbi chinleji chetu nikuchizatisha twatela kwila yuma yitunakudiza muBayibolu. Twatela kukeña nshimbi jaNzambi nikukuhwelela netu jikutukwasha. Pawulu wasonekeli nindi: “Mwakulejeluwu mwalonda kukeña kwakufuma mumuchima wutooka, nachinleji chamuchima chachiwahi, nikukuhwelela kwakadi kudimbana.” (1 Tim. 1:5) Chitukufumbaña chinleji chetu nikwila muchinakutuleja, tukusweja kumukeña Yehova nichikuhwelelu chetu chikukola. Nawa wubwambu wetu naNzambi wamwekeneña munzatishilu yachinleji chetu, chidi muchima wetu nichitunakufwila kumuzañalesha Yehova. Chinleji chamwekeshaña chitwekala. w15 9/15 2:2, 3

Yehova diyi watuleñeli. (Mas. 100:3-5) Dimuloña waweni Bayibolu chiyatenenaña muntu watachi nawu “mwana kaNzambi” nawa Yesu niyena watulejeli kutena Yehova netu “Tata yetu wekala mwiwulu.” (Luka 3:38; Mat. 6:9) Dikwila nawu Yehova hiTata yetu nawa watukeña neyi tata yawantu wukweti kukeña chakeñayi anyanindi. Antu amakwawu chayikalilaña kwiteja nawu tata yawantu nateli kwikala nakukeña. Hadaha anukaña chayikabishileñawu kuwansi kudi atata yawu. Yehova wakabishaña wanyi anyanindi. Hitata yetu wamuwahi. (Mas. 27:10) Chitweluka netu Yehova watukeña, tukumukeña chikupu.—Yak. 4:8. w15 9/15 4:3, 4

Chineli twamukuhwelela nikumukeña, twalombaña wukwashu windi nawa twasandujolaña kulonda twiluki chatoñojokañayi hanoyu nsañu henohu kanda tufuukuli. Mumafuku aSamweli, aIsarela ayishindili kudi aFwilistinu. Chatela alombi wukwashu kudi Yehova, ahosheli nawu: “Twakaleti chimbañu chachitiyañenu chaYehova chidi kuShilo, chakenzi kunu chakekali mukachi ketu, chakatwamwini kudi ayilumbu jetu.” Yumanyi yafuminumu? “Kwadiña kutapana kweneni nankashi; kwadimbokeli aIsarela akwakwendela hamaseki makombakaji makumi asatu. Akwatili nichimbañu chaNzambi.” (1 Sam. 4:2-4, 10, 11) A Isarela atoñojokeleña nawu kwikala naChimbañu mukachi kawu kukuleñela Yehova yayikwashi nikuyikiña. Ilaña, alombeli wanyi wukwashu kudi Yehova hela kusandujola kulonda eluki chatoñojokeleñayi. Elili mwatoñojokeleñawu nawu mwaloña nawa chumichi chaletesheli ayishindi.—Yish. 14:12. w15 9/15 5:16, 17

Munateli kukolesha ñahi chikuhwelelu chenu? Bayi mwiluka hohu yuma yimwadizili henohu kanda mupapatishewuku. (Heb. 6:1, 2) Chakutalilahu, kudiza wuprofwetu wekala muBayibolu washikijewa dehi kukuyikwasha kwikala nachikuhwelelu chakola nikuchihemba. Munateli kuzatisha cheñi Izu daNzambi kulonda mwiluki neyi chikuhwelelu chenu chakola. (Yak. 1:25; 2:24, 26) Kapostolu Pawulu wahosheli nindi akwaKristu anateli ‘kukwashañana kukuhwelela kwawu.’ (Rom. 1:12) Chumichi chinatalishi mudihi? Neyi twikala nakapinji kakuhanjeka nawamanakwetu niahela, wejima wetu tukwikala nachikuhwelelu chakola. Tunateli kwila mwenimu sweje-e neyi twikalaña nakapinji nawantu akweti chikuhwelelu ‘chesekawu.’ (Yak. 1:3) Amabwambu atama ajiyishaña chikuhwelelu chetu, ilaña amawahi achikoleshaña. (1 Kor. 15:33) Dichiyatulejelañawu nawu tuyeña ‘nakupompa mpinji yejima.’—Heb. 10:24, 25. w15 10/15 2:2, 8, 9

Twatela kwikala nampinji yakutoñojoka neyi tunakuloñesha kuya nakulombola kadizi. Toñojokenu hadi kadizi wenu, nawa wanenu lwihu hela chakutalilahu chikumukwasha kuyilaku hambidi. Neyi mukudiloñeshaña kulombola kadizi muniyi njila, chikuhwelelu chenu chikukola nawa mukwikala ntañishi waBayibolu wamuwahi. Mukuzataña chiwahi neyi mutoñojokañahu henohu kanda muyi nakushimwina. (Ezera 7:10) Kutaña kapetulu mumukanda waYililu kunateli kuyikwasha kwikala neyena dakushimwina. Munateli kutoñojoka cheñi hansona yimunakukeña kuzatisha odu ifuku nimukanda wumukuhana. (2 Tim. 1:6) Toñojokenu hadi antu ekala mwiluña denu dakushimwina ninsañu yikuyitiyisha kuwaha. Neyi mukudiloñeshaña muniyi njila, mukuzatishaña Bayibolu chiwahi hakushimwina antu.—1 Kor. 2:4. w15 10/15 4:9

Dihulenu nenu: ‘Anyanami eluka nawu nyevulu yanzekesi yatama? Yumanyi yikuyiletesha atali iyi nyevulu? Nekala wakasunuka kuhosha nawanyanami kutalisha hansañu yidi yejima, chakwila anateli kulomba wukwashu hela anayeseki kutala nyevulu yanzekesi?’ Hela chakwila anyana achidi anyanya, munateli kuyileja nenu: “Neyi mumona yuma haIntaneti yikuyileñela kutiya wuvumbi nawa munakukeña kuyitala, mwatela kunleja. Bayi mutiya woma hela nsonyi kunlomba wukwashu. Inakukeña kuyikwasha.” Neyi munakukeña yisela yakuhema, toñojokenuhu chiwahi kulonda mwikali chakutalilahu chachiwahi kudi anyanenu. Anvwali ejina daPranas, ahosheli nawu: “Munateli kuleja anyanenu yuma yayivulu, ilaña akutalaña yuma yimunakwila nawa akuyimbujola.” Neyi mutondaña chiwahi tumina, nyikanda nimavidiyo, anyanenu niwena akutondaña chiwahi.—Rom. 2:21-24. w15 11/15 1:12-14

Kushimwina hatooka hinjila yikwawu yinakuzatika chiwahi kushimwina antu. Tunakuzata nañovu kulonda tushimwineña antu awanikaña kuchitesheni, kuyitesheni yamasuwa, maluña akwimikila nyotoka, kudi antu amavulu nikuyisankanu. Mwachinaña kushimwina hatooka? Neyi mwachinaña, lombenu wukwashu nawa toñojokenu mazu ahosheliyi Manakwetu Manera, nkoñi wendeña, nindi: “Twamweneña njila yayiha yakushimwinamu netu hinjila yakumuzatilamu Yehova, netu hinjila yakumwekeshelamu kwovwahila, njila yakumwekeshelamu kashinshi nawa twakeñeleña kumuzatila munjila yidi yejima yinakukeñayi.” Neyi tuleka kutiya woma nawa tutachika kuzatisha njila jajiha jakushimwinamu, twakoleshaña wubwambu wetu naYehova nawa twekalaña akwakushimwina amawahi. (2 Kor. 12:9, 10) Akwakushimwina amavulu alejaña antu webu sayiti yetu ya jw.org/lun. Webu sayiti yetu yinakushika kwejima. w15 11/15 5:12, 13, 15

Chayikalilileña akwakubalumuna kubalumuna Bayibolu yaNew World Translation mumadimi amakwawu. Chakutalilahu, Bayibolu yaChizungu yazatishili izu dakwila nawu “Shelu” hamukanda waMukwakutaŋisha 9:10 nimumavasi amakwawu. Idi izu dadiña nimumaBayibolu amakwawu aChizungu. Hela chochu, mumaBayibolu amakwawu adi kusonekamu wanyi idi izu muloña antañi amavulu munawa madimi eluka wanyi izu dachiHeberu dakwila nawu “Shelu.” Hiyadiña namadikishonali mwekala idi izuku nawa antu amakwawu atoñojokeleña nawu hiijina deluña. Dichi akwakubalumuna ayitejeli kubalumuna izu dachiHeberu dakwila nawu “Shelu” nidachiGiriki dakwila nawu “Hadesi” kwikala “Ijamu.” Iku kubalumuna koloka nawa nsañu yapela kutiya. Mazu aChizungu adiña akushankulu ayisinsishili namazu amakonu aletesheli Bayibolu kwikala yapela kutaña nikutiya nawa yoloka. MaBayibolu abalumwinuwu mumadimi amakwawu niwena akwashili kuwahisha Bayibolu yaChizungu. w15 12/15 2:10, 12

Neyi twakata, twatela kulomba kudi Nzambi kulonda yatukundeji, kutwinka maana niwukwashu neyi chayililiyi antu akunyima. Ilaña tuneluki netu muntu wadiñaku hayina mpinji wakameneni atuzweñi hakabula kufwaku. Hanu dinu Yehova wadi kumukwasha ñahi ona muntu wamuwahi? Davidi wahosheli nindi: “Chakakamujokayi hakadidi nakuzeya Yehova wakamukwashaku; chakukatayi eyi wamuloñeshelaña kadidi kindi kejima.” (Mas. 41:3) Yehova weluka chikupu chakabakanañawu ambuñindi nawa hayivulamenañaku. Wayikoleshaña nikuyinka maana. Yehova waleña mujimba wetu munjila yakwila nawu wunateli kuduuka waweni. w15 12/15 4:7

Pawulu hasonekeliyi awa mazu, wateneneña amanakwetu adiña mutuleya muloña wachikuhwelelu chawu. Pawulu wahamekeli antu amuchipompelu muloña atiyilili “luwi antu adiñi munyonji.” (Heb. 10:34) Amanakwetu amakwawu amukwashili Pawulu hadiñayi mukaleya yaaka yiwana, ilaña amakwawu ashakamineña kwakulehi. Hanu dinu amukwashili ñahi? Adiña nakumulombelaku chakadi kuleka. (Fwi. 1:12-14; Heb. 13:18, 19) Makonu, aYinsahu amavulu adi mutuleya muloña wachikuhwelelu chawu. Amanakwetu niahela ashakamaña kwakwihi ayikwashaña. Ilaña etu amavulu twashakamaña kwakulehi nawanakwetu adi mutuleya. Tunateli kuyanukaña ñahi nikuyikwasha? Kukeña amanakwetu kukutusañumuna kutwalekahu kuyilombelaku. w16.01 1:13, 14

Nzambi waleñeli antu nindi akashakameña hamaseki haya nyaka, bayi mwiwuluku. (Kutach. 1:28; Mas. 37:29) Ilaña Yehova watonda antu amakwawu kwikala anyanta niatupristu mwiwulu. Dichi neyi anayiwayishi, yuma yachiñejeleñawu niyatoñojokeleñawu yahimpaña, kulonda adiloñeshi kutambwila wumi wamwiwulu. (Efwes. 1:18) Hanu dinu muntu welukaña ñahi nindi anamutondi kuya mwiwulu? Talenu yuma yahosheliyi Pawulu hadi amanakwindi awayishewa amuRoma, ‘atambikiluwu kwikala akwakujila.’ Wayilejeli nindi: ‘Himwatambwili spiritu yawuduñu mwaka mutiyi cheñi womaku; mwatambwili spiritu yakwikala anyana, yitwatambikaña nachu netu, Aba, Tata!’ (Rom. 1:7; 8:15) Kuzatisha spiritu yindi yajila, Nzambi wamwekeshelaña muntu hatooka nindi namutondi kuyuula neyi mwanta mwiwulu hamu naYesu.—1 Tesa. 2:12. w16.01 3:8, 9

Hanu tunateli kuyilemesha ñahi antu awayishayi Yehova? Twatela kuyihula wanyi chiyekalili awayishewa. Hinsañu yelukawu awenawu, tukweti wuswa wakuyihula wanyi. (2 Tesa. 3:11) Twatela cheñi kutoñojoka wanyi netu anfumwawu hela añodawu, anvwali jawu hela antaña jawu niwena awayishewa. Muntu waswanaña wanyi kuchiñeja kudi antaña jindi. (1 Tesa. 2:12) Hitwatela cheñi kwihula malwihu akuneñesha antu amakwawuku. Chakutalilahu, twatela wanyi kwihula ñoda manakwetu wawayishewa chakatiyañayi kushakama hamaseki haya nyaka chakubula anfumwawu. Henohu tweluka netu mwituña dadiha Yehova ‘wakayiikutishaña nayuma yakeñawu.’ (Mas. 145:16) Neyi tukumonaña wanyi awayishewa netu alema kubadika antu amakwawu, tukudikiña etu aweni. Munjilanyi? Bayibolu yatuleja nawu muchipompelu munateli kwikala “ana kwetu akutwamba” aditenaña nawu awayishewa. —Ŋal. 2:4, 5; 1 Yow. 2:19. w16.01 4:10, 11