August

Wubwambu waAbarahama naNzambi wakoleleluku muloña Abarahama wamwovwahilileña Yehova nimuyuma yanyanya. Wakeñeleña kumuleja Yehova yuma yidi yejima nikumulomba wukwashu. Chakutalilahu, Abarahama wakameneni chelili Yehova yahoshi nindi musumba waSodoma naGomora wukuwujilumuna. Muloñadi? Wakameneni nindi antu amawahi akufwila hamu nawantu atama. Wakameneni mwihwa windi Loti nachisaka chindi ashakamineña muSodoma. Abarahama wamukuhweleli Yehova, “Mukwakusompesha iseki dejima,” dichi wamulejeli yuma yadiña nakwakamenayi. Yehova wadiwunjikili nebwambu dindi nawa wamumwekesheleli luwi. Yehova wamulumbulwili nindi neyi yaleta wunsompeshi, wakeñakeñaña antu amawahi nikuyipulwisha. (Kutach. 18:22-33) Kumwiluka Nzambi nikumona chakwashañayi antu kwamukwashili Abarahama kwikala nawubwambu wakola naYehova. w16.02 1:11, 12

Twahamekaña antu ekala nakashinshi. Komana twahamekaña Jonatani muloña wadiña washinshika kudi Davidi? Inehi, kwikala washinshika kudi Nzambi dikwadiña kwalema muchihandilu chaJonatani. Dichaletesheli yekali washinshika kudi Davidi nikubula kumutiyila lwisu hela chakwila Davidi diyi wekalili mwanta bayi yena. Jonatani wamukwashili Davidi kushindamena hadi Yehova. Adiña ashinshika kudi wumu namukwawu nikudi Yehova. Atwalekeluhu kwila mwadikaninuwu Ninetu twatela kwikala ashinshika nachisaka chetu, amabwambu jetu niamanakwetu nawahela muchipompelu. (1 Tesa. 2:10, 11) Ilaña twatela kwikala ashinshika chikupu kudi Yehova. Diyi watwinka wumi! (Chim. 4:11) Neyi twikala ashinshika kudi Yehova tukwikala namuzañalu. Tweluka netu twatela kwikala ashinshika kudi Nzambi nimumpinji yakala. w16.02 3:3, 4

Kansi wapama wakolelaña kuyuma yakuhwelelayi hela wudi mukukala. Wukwikala wanyi neyi iloñolu wahimpaña kwesekeja neluña hadiyi. Welaña wanyi chashikayi Kwitala daWanta hibwambu daNzambi ilaña chikushikayi kushikola hibwambu dakaayi. Ilaña wukutwalekahu kwikala washinshika hela chakwila anamweseki. (Efwes. 4:14, 15) Kwosi muntu wawanina. Wejima wetu twaluwañeshaña mpinji yikwawu. (Mukwa. 7:20) Ilaña neyi munakukeña kupapatishewa, mwatela kwovwahilaña nshimbi jaYehova. Dihulenu nenu, ‘Novwahilaña Yehova mpinji yejima?’ Anukenu chimwelili hampinji yimwadiña mukweseka. Mwelukili chuma chachiwahi chimwateleleli kwila? Kufwana Danyeli, kudihu muntu wayilejahu dehi kuzatisha yawana yenu mudinu ituña daSatana? Neyi anakuyeseka munjila yamuchidiwu, mwanukaña yuma yakeñayi Yehova?—Efwes. 5:17. w16.03 1:7-9

Tunakushakama ‘mumafuku akukuminina,’ nawa katataka tumoni lukadi lwakadi kwikalañaku dehi. (2 Tim. 3:1) Cheñi, Satana niandemoni jindi ayinata hamaseki kufuma mwiwulu, anakuleta makabi kudi antu. (Chim. 12:9, 12) Kubombelahu, twalondelaña lushimbi lwaYesu kuhitila mukushimwina mukaayi kejima kudi antu amavulu nawa mumadimi amavulu kubadika kunyima. Hakwila nawu tutambwili nkisu jaNzambi, twatela kutiyilila wunlomboli wejima watwilejañayi muchipompelu chawakwaKristu. Neyi tujilondela makonu, chikatukwasha kwovwahila hampinji ‘yalukadi lwasweja,’ hakamukisañanañawu Satana nikaayi kindi kejima. (Mat. 24:21) Kuhiñahu, akatwinka nshimbi jajiha mwituña dadiha. w16.03 4:16, 18

Muyaaka nkulakaji yakusambila, kapostolu Yowanu wamweni chimwenu mwadiña añelu 7 anakwimba mpuña. Chelili kañelu wamuchitanu yembi mpuña, Yowanu wamweni “katumbwa kanaholoki dehi kwiwulu kanashiki dehi hamaseki.” Kana “katumbwa” kazatishili nsapi hakwenzununa kuchisu chawina wakunama nawa mwekala mwidima. Chatachi, muwina mwakakumukili wishi nawa muwishi himukufuma tubola. Chatela itu tubola tukisañani nyitondu nimunyenvu, ilaña twena twalukukili antu abulili “chilamiki chaNzambi hamahamawu.” (Chim. 9:1-4) Yowanu welukili nindi tubola tunateli kukisañana chikupu, muloña twakisañenihu dehi muEjipitu mumafuku aMosi. (Kwi. 10:12-15) Tubola twamweniyi Yowanu twemenañaku akwaKristu awayishewa ashimwinaña nsañu yakusompesha nsakililu yakutwamba. Nawa yihita yawantu atalilaña kuheta wumi hamaseki adibombaña kudi awayishewa. Wejima wawu, anakuzatila hamu mumudimu wakushimwina. Iwu mudimu wunakwashi antu amavulu kufuma munsakililu yakutwamba nikusubuka kukaayi kanakuyuulayi Satana. w16.03 3:3

Hakwiluka yitoñojoka niyililu yamanakwetu wabula kushikahu kutalisha hansañu yalala yaWanta, aeluda atela kumwihula nawu, ‘Indi kudihana kwenu kudi Yehova kunahimpi chihandilu chenu munjilanyi?’ Ilu lwihu lunateli kuleñela kutachika kuhanjeka hachuma chaleñelaña mudimu wetu wajila tuwuzateña namuchima wejima. (Maku 12:29, 30) Chimwamanisha kuhanjeka muniyi njila munateli kulomba kudi Yehova kulonda yamwinki manakwetu spiritu yindi yajila hakwila yimukwashi kudiza chiwahi. Chinateli kumukolesha manakwetu neyi yatiya eluda nakumulombelelaku. Hakutachika kumudizisha, eluda nateli kuhanjeka hansañu yamuBayibolu yinateli kumuleñela kadizi kwiluka kulema kwakwikala namuchima wakudihana, kumukuhwelela nikudizoza. (1 Anya. 19:19-21; Nehe. 7:2; 13:13; Yil. 18:24-26) Yililu yeniyi yinateli kumukwasha kadizi neyi chochakwashaña wushi iseki. Yikumukwasha kukula swayi kuspiritu. nawa ‘yikumutonesha mesu’ ‘kuyuma yakuhayamisha’ Mwizu daNzambi. w15 4/15 2:3, 4

Kuhanjeka naYehova mpinji yejima hichuma chalema hakwila muntu yakundami kwakwihi nayena. Munateli kuhanjeka ñahi naNzambi? Mwahoshaña naYehova kuhitila mukulomba mpinji yejima. (Mas. 142:2) Munjila yikwawu, Yehova wahoshaña nanenu hampinji yimwatañaña Izu dindi dasonekawu nikutoñojokañahu chikupu. (Isa. 30:20, 21) Neyi mulombaña chakufuma hamuchima, mukwiluka chikupu nenu Yehova wakulaña kulomba kwenu, hela chakwila hiyakuyakula hanoyu mpinjuku. Neyi kulomba kwenu akwakula chikuyileñela mumwiluki Yehova chikupu. Kubombelahu, chimwasweja kumuleja Yehova yitoñojoka yenu chakufuma hamuchima niyena wukukundama kwakwihi nanenu. Tunateli kutwalekahu kwikala nawubwambu wakola naYehova haya nyaka. Twatela kufwila kukundama kwakwihi naNzambi neyi tunakukeña netu niyena yakundami kudi etu. Dichi tufwilenu kuhanjeka naNzambi mpinji yejima kuhitila mukutaña Bayibolu nikulomba. Neyi twila mwenimu, wubwambu wetu naYehova wukwikala wakola chikupu nawa chikutukwasha kuumika kweseka. w15 4/15 3:3, 14, 16

Awa mazu anakumwekesha chazuwayi Satana. Hela chakwila kaayi kejima kashakama mumakasindi, Satana wudi nanzala yayeni yakukeña kudya antu amavulu. Mutupa wudi nanzala hatiyilaña luwi kanyama wadyañayuku. Henohu kanda yamujahi hamutiyilaña wushonaku nawa haneñaña neyi namujahi dehuku. Munjila yoyimu, Satana hatiyilaña luwi antu akeñañayi kudyaku. Chakutalilahu, toñojokenu Satana Diyabolu chabatamineñayi mukuswamujoka kakavulu neyi aIsarela aholokela munshidi yidi neyi wuvumbi nilwisu. Neyi mutaña nsañu yahosha hayihuñu yamweniyi chivumbi Zimiri niGehazi walwisu, komana munateli ‘kumona’ mutupa wabulumaña chatiyañayi kuwaha neyi nashindi?—Kuch. 25:6-8, 14, 15; 2 Anya. 5:20-27. w15 5/15 1:8, 9

Tunateli kudikaña ñahi naSatana nikumushinda? Yesu walejeli atumbanji twindi nindi: “Mukukakela kwenu, dimu mumukumwena wumi wenu.” (Luka 21:19) Kwosi chuma chikwilawu antu chinateli kukañesha wumi wetu wahaya nyakaku. Kwosi muntu wunateli kuhukula wubwambu wetu walema naNzambuku, chiña hohu neyi etu aweni twiteja chumichi kumwekana. (Rom. 8:38, 39) Hela neyi ambuña Yehova anafwi hichinayi mukwila nawu Satana nashinduku, muloña Yehova wakayisañula. (Yow. 5:28, 29) Munjila yikwawu, Satana hakweti kuchiñeja kwawumi wahaya nyakaku. Chakela kanu kaayi kindi katama anakijilumuni dehi, Satana akamuumbila mwikela hadi yaaka 1,000. (Chim. 20:1-3) Kumakumishilu aChiyuulu chaYesu chaYaaka Ikombakaji, Satana “akamusubula mwamupatililuwu” hakapinji kantesha kulonda yakayi nakudimba antu awanina kakukumishaku. Kufumahu dinu, Diyabolu akamujilumuna. (Chim. 20:7-10) Hela chakwila Satana akamujilumuna, ilaña enu mwakaheta wumi wahaya nyaka. Twalekenuhu kudikaña naSatana nikwikala nachikuhwelelu chakola. (1 Pet. 5:9) Munateli kudikaña naSatana nikumushinda. w15 5/15 2:1, 18

Muntu wadihoñeshaña mumuchima welukaña nindi yitoñojoka yidi neyi kesi. Kesi neyi akizatisha chiwahi, kanateli kukwashana chidi neyi kutelekelahu yakudya. Ilaña kesi katama neyi kandala dehi chakwila kanateli kwocha itala nikujaha antu adumu. Munjila yoyimu, yitoñojoka yayiwahi sweje-e neyi yinakutukwasha kumwimbujola Yehova. Kafwampi, yitoñojoka yinateli kwikala yatama neyi tutoñojokaña hayuma yazonda. Chakutalilahu, neyi twikala nachaaku chakutoñojoka hayuma yatama, chumichi chikutuleñela kwila yuma yitwatoñojokaña. Mwamweni, kusweja kutoñojoka hayuma yatama kunateli kutamisha wubwambu wetu naYehova. (Yak. 1:14, 15) Yesu wasoñamishili kutalisha hakufwikija yuma yawuvumbi. Wahosheli nindi: “Muntu wukutala mumbanda namesu akumufwila, neli dehi nindi wuvumbi mumuchima windi.”—Mat. 5:28. w15 5/15 4:11, 12, 14

Hampinji yejima yashimwinineñayi, Yesu wamwekesheli chikupu nindi wadiña wakeña antu. Mumusumba wumu wamuÑaliliya, Yesu wawanini muntu wamutiyishili luwi. (Maku 1:39, 40) Wamweni iyala wadiña namusoñu wambumba. Hakushimuna nindi musoñu waniwu iyala waswejeli, Luka wadiña ndotolu wamulumbulwili nindi “wazemoka dehi namusoñu wambumba.” (Luka 5:12) “Chanamumoniyi Yesu, hakudinata chamesu heseki, hakumulembelela nindi, Mwanta, neyi wuneteji, wukutwesha kuntookesha.” Chakadi nikujina, iwu iyala wakuhweleleli nindi Yesu wadiña nañovu yakumuuka, ilaña chuma chakeñeleñayi kwiluka chakwila nawu, komana Yesu wafwilileña kumuuka? Yesu wakwili ñahi chamulombeluwu chakufuma hamuchima? Yesu wolweli chikasa chindi nakumukwata mukwambumba, nakuhosha nezu dañovu nawa daluwi, wahosheli nindi: “Neteji, tookaku.” Kuhiñahu “musoñu windi wambumba wumufuma nikumufuma.” (Luka 5:13) Eñañi, Yesu wamwekesheli nindi wayikeñeli antu chikupu.—Luka 5:17. w15 6/15 2:3-5

Neyi tuhamuka nakulejamu mukwaKristu wapama nateli kutukwasha kulonda tubuli kufwila yuma yatama. (Heb. 3:12, 13) Neyi tuleja akwaKristu apama kuspiritu kukala kwetu anateli kutukwasha kwiluka mwakwilila. Chumichi chinateli kutukwasha kuhimpa hanakukeñeka kulonda tushakami mukukeña kwaYehova. Aelunda akwaKristu anateli kutukwasha chikupu. (Yak. 5:13-15) Chalema kukeña wukwashu neyi chuma chinakuyileñela kufwila kwila wuvumbi hichaaku chakutala nyevulu yanzekesi. Neyi mushintajalaña kukeña wukwashu mukwiñila mukukala chakwila kufwila kwatama ‘kukubaaba ivumu nakuvwala nshidi’ nawa chumichi chikuneñesha antu amakwawu nikuleta kasawuntu hejina daYehova. Mpwila yakukeña kumuzañalesha Yehova nikutwalekahu kwikala muchipompelu chawakwaKristu yaleñela ambuñindi amavulu kwiteja mwayikwashañawu.—Yak. 1:15; Mas. 141:5; Heb. 12:5, 6. w15 6/15 3:15-17

Komana tunateli kuhosha netu chakajilumunawu yipompelu yaBabiloni Muneni, akajilumuna niantu ejima ayileña muniyi yipompelu? Inehi. Akulumpi jayipompelu amakwawu akashiya yifulu yawu nakukaana nawu hiyadiña mukwitiya kukutwamba. (Zek. 13:5, 6) Yumanyi yikamwekana kudi antu jaNzambi hayina mpinji? Yesu walumbulwili nindi: ‘Neyi akabula kukehesha wena mafuku owu, hikwakekala antu akahandaku. Ilaña mafuku owu akayikeheshela hanyijimba yawatondewa.’ (Mat. 24:22) Muchaaka cha 66 C.E. mafuku alukadi ‘ayikehesheli.’ Chumichi chayikwashili “atondewa,” akwaKristu awayishewa kutemuka mumusumba ninyikala yikwawu yadikuminuwu nayu. Munjila yoyimu, mafuku alukadi lweneni akutachikilahu ‘akayikehesha’ hamuloña ‘wawatondewa.’ Anyuuli ajipolitiki ‘yanseñu ikumi’ akweti ñovu hiyakayiteja kujilumuna antu jaNzambuku. (Chim. 17:16) Ilaña, kwakekala kuwunda kwantesha. w15 7/15 2:5, 6

Chidi kudi muntu yomweni kwiteja kumweseka hela nehi. (Mat. 6:13; Yak. 1:13-15) Ilaña Yesu wakaanini kweseka kudi kwejima kwaDiyabolu chakubula nikuumba mpinji kuhitila mukuzatisha mazu alema aMwizu daNzambi. Dichi, Yesu wahakwililuku chiyuulu chaNzambi chaloña. Ilaña Satana hazeyeluku. Wahembeleli “nindi amoni hekwawu hakamwesekelayi.” (Luka 4:13) Yesu watwalekeluhu kukaana mwejima mwamwesekeluwu kudi Satana nindi yafumpi kashinshi kindi. Hela chochu, Satana wesekaña kuhuñumuna atumbanji twaYesu, kushilahu nineyi. Hamuloña wansañu yachiyuulu chaNzambi, Yehova wamwiteja Mukwakweseka kuzatisha kanu kaayi kulonda yatweseki. Nzambi hatwesekañaku. Ilaña, wakuhwelela nindi tukwikala ashinshika nawa wakeñaña kutukwasha. Hela chochu, chineli watwinka wuswa wakufuukulahu etu aweni, Yehova hatukañeshaña kulonda tubuli kuholokela mukwesekaku. Ilaña twatela kwila yuma yiyedi, kwikala atona kuspiritu nikutwalekahu nakulomba. w15 6/15 5:13, 14

AkwaKristu afumba yitoñojoka yawu nichinleji chawu kulonda akuleña chiwahi neyi kunamwekani nsañu yamatuña nachiyuulu. (Rom. 14:19) Talenu chakutalilahu chaMirjeta wakwiluña dadiña daYugoslavia. Mumbanda yeniwu chakulileñayi waheleli antu akuSerbia. Chelukiliyi nindi Yehova hekala nachaambuku nawa nindi Satana diyi waletaña kukala kudi antu ambuka makowa, wafwilili kuzata nañovu kulonda yabuli kwikala nachaambu chadiñayi nachu. Ilaña chelili antu anyichidi yacheñi atachiki kuzuña mwiluña dawu, kuhelañana kwadiñayi naku kwasañumukili chakwila Mirjeta chamukalilileña kushimwina kudi antu akuSerbia. Muhela yeniwu welukili nindi hateleleli kushakama hohu nakukuhwelela nindi yitoñojoka yatama yamuchidiwu yinateli kudimanina nkawayuku. Wamulembeleli Yehova kulonda yamukwashi kumanisha iku kukala. Wahosheli nindi, “Namoni neyi kusha maana hamudimu wakushimwina kunankwashi chikupu. Neyi inakushimwina, nafwilaña kwimbujola yililu yayiwahi yaYehova nawa yililu yami yatama yamana.” w15 7/15 3:11-13

Talenu chuma chamumwekeneni Mwanta wawaYuda Yehoshafwati. Hampinji yimu, Yehoshafwati wetejeli kuya naMwanta wawaIsarela Ahabi kunjita. Hela atuprofwetu akutwamba 400 amulejeli Ahabi watama nawu wukashinda, kaprofwetu walala waYehova Mikaya washimwini nindi akuyishinda. Ahabi wafwilili kunjita nawa Yehoshafwati wapulukilili kunsuki. Chafuntiliyi kuYerusalema, amuzuwilili hamuloña wakwiteja kutiyañana naAhabi. Hela chochu, Yehu mwana kaHanani mukwakumona yimwenu wamulejeli Yehoshafwati nindi: “Mudeyi anamonumu yuma yayiwahi.” (2 Kushi. 18:4, 5, 18-22, 33, 34; 19:1-3) Eñañi, Yehoshafwati welili yuma yawusupi, ilaña Yehova havulameneni yuma yayiwahi yakoñeleñayuku. (2 Kushi. 17:3-10) Iyi nsañu yamuBayibolu yatwanukishaña nawu hela chakwila twawanina wanyi, Yehova wukatumwekeshela kukeña kwabulaña kumana neyi tufuukulahu kumuzañalesha namuchima wetu wejima. w15 8/15 1:8, 9w15 8/15 1:8, 9

Twatela kuloñesha ñahi chihandilu chamwituña daNzambi dadiha chayinu mpinji? Twili netu tunakufuukulahu kubuukila kwituña dacheñi. Tunateli kudiloñesha ñahi? Tunateli kutachika kudiza idimi dahoshañawu antu akunodu ituña. Kudiza chisemwa chawu kunateli kutukwasha. Tunateli kutompa yakudya yadyañawu. Munjila yikwawu, tunateli kutachika kuhanda neyi enimbu amunodu ituña. Kafwampi, dichi chitwakahandaña neyi tunashiki dehi munodu ituña. Munjila yoyimu, tunateli kuloñesha chihandilu chamwituña dadiha chayinu mpinji, kwesekeja nahakumina ñovu jetu neyi chitukahandaña. Yumanyi yinafumumu chineli antu amavulu atoñojokaña nawu chalema kudimena awenawu? Kubula kwiteja wunlomboli waNzambi chinaleñeli antu kumona makabi niyihuñu yamaneni. (Yere. 10:23) Tunakutalila chikupu mpinji yakela antu ejima akwovwahilaña chiyuulu chachiwahi chaYehova. w15 8/15 3:4, 5

Kwiluka antu akudikunda nawu hichuma chalema kudi akwaKristu ajiki anakukeña kusumbula hela kusumbuka. Bayibolu yafumbaña ambuña Nzambi anakukeña kwiñila muwuluwi nawu atela kusumbula hela kusumbukila ‘chiña mudi Mwanta hohu,’ dikwila nawu, kusumbula hela kusumbuka chiña namuntu wadihana nawa mukwakudifukula waYehova wapapatishewa walondelaña chatañishaña Bayibolu. (1 Kor. 7:39) Neyi yasumbula hela yasumbuka namukwawu mukwakwitiya, mukwaKristu wakwataña wulunda namuntu wadihana kudi Yehova nawa wukumukwasha kuhemba kashinshi kindi. Yehova weluka yuma yinateli kuyizañalesha ambuñindi nawa wayikoleshaña mpinji yejima kulondela nshimbi jahosha hawuluwi. Talenu nshimbi yindi yapela yayinkeliyi aIsarela kuhitila mudi Mosi. Hakutena nyunza yawantu ayinyeñumukili abulileña kumukalakela Yehova, aIsarela ayilejeli nawu. ‘Kusumbwañana nawu nehi. Wakenda kakubalumwina mwaneyi weyala hakaleka kunlondela, hakapesha ankishi. ’—Kuhit. 7:3, 4. w15 8/15 4:12, 13

Tunateli kufumba ñahi chinleji chetu? Twatela kudiza Bayibolu mpinji yejima, kutoñojoka hansañu yitunakutaña nikumulomba Yehova netu yatukwashi kuzatisha jitunadizi. Dikwila nawu kuzatisha nsañu yitunakudiza kubadika kwiluka hohu chahosha Bayibolu. Neyi tunakudiza Bayibolu, twakeñaña kumwiluka chiwahi Yehova. Twelukaña chikupu chekalayi, yuma yakeñayi niyahelayi. Chitwamwiluka nankashi Yehova, chinleji chetu chikwilukaña swayi yuma yamonañayi nindi yayiwahi niyamonañayi nindi yatama. Neyi tufumba chinleji chetu, tukutachika kutoñojoka neyi chatoñojokañayi Yehova. Ilaña, neyi tuneluki wanyi chinafuukuliyi mukwetu mukwakwitiya hayuma yimu, bayi tunyakala kumwinkamu nyiloña hela kumukanjikija netu yahimpi yitoñojoka yindiku. Hadaha chinleji chindi chichidi “chazeya” chakwila nakukeñeka kuchifumba hela kucholola. 1 Kor. 8:11, 12. w15 9/15 2:4, 8, 10

Asayantisiti ahitañana muluzwizu nawa awana nawu kwekala mapulaneti amavulu, ilaña kanda awaneñahu dehi pulaneti munateli kushakama antu. Yehova watwinkaña hohu wanyi yuma yakwila nawu tudiluñisheña wumi ilaña watwinka iseki dadiwahi nawa dalubanji. (Isa. 45:18) Neyi tutoñojoka heseki datwinkayi Tata yetu, Yehova, tukwiluka netu watukeña chikupu. (Yoba 38:4, 7; Mas. 8:3-5) Yehova watumwekeshela cheñi kukeña hakutwinka wuswa wakumwimbujola. (Kutach. 1:27) Dikwila nawu tunateli kwiluka netu watukeña nawa tunateli kumukeña. Weluka nindi neyi twiluka netu watukeña tukuzañalala. Anyana atiyaña kuwaha neyi eluka nawu anvwali jawu ayikeña. Neyi mwanuka, Yesu watulejeli nindi tunateli kwikala namuzañalu neyi tukundama kwakwihi naTata yetu, Yehova. (Mat. 5:3) Watwinkaña “yuma yejima nindi tuluñi nachu.” Mwamweni, wahanaña nawa watukeña nankashi.—1 Tim. 6:17; Mas. 145:16. w15 9/15 4:6, 7

Ñimbi yamasamu washindameneni hadi Yehova nawa wamukeñeli chikupu wasonekeli nindi: “Muchiñeji Nzambi, namba kamusakilila hohu nachina chakunkwashayi namesu indi. Eyi Nzambi yami, muchima wami wunadihombi dehi mukachi kami: Dichi chinukukwanukaña.” (Mas. 42:5, 6) Komana dichimwatiyaña hadi Yehova? Komana mwatiyaña nenu mwakundama kwakwihi naNzambi nawa mwamukuhwelela? Munateli kumukuhwelela Nzambi chikupu. Bayibolu yatulejaña nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi.” (Yish. 3:5, 6) Chineli wasambilili kutukeña, Yehova watudizisha chitwatela kumukeña. (1 Yow. 4:19) Dichi tutoñojokeña mpinji yejima hayuma yatwililayi nichatukeñayi. Nawa twileña yuma yikumwekesha nawu twamukeña namuchima, nawumi, namaana ninañovu jetu jejima.—Maku 12:30. w15 9/15 5:17-19

Twakoleshaña cheñi chikuhwelelu chetu neyi tushimwinaña nikudizisha antu nsañu yayiwahi yamuBayibolu. Kufwana akwaKristu akusambila, twamukuhwelelaña Yehova nawa twahoshaña chakadi woma neyi tudi mukweseka. (Yil. 4:17-20; 13:46) Chitwatoñojoka chatukwashañayi Yehova nichakulañayi kulomba kwetu, chikuhwelelu chetu chakolelañaku. Ichi dichamwekeni kudi Kalebi niYoshuwa. Amwekesheli nawu amukuhweleleli Yehova hampinji yayiluwu nakwendesha Ituña daChikaninu. Chimwahitili mpinji, chikuhwelelu chawu chakoleleluku chelili amoni chayikwashiliyi Yehova. Yoshuwa wayilejeleña aIsarela chakadi kujina nindi: “Hikunakañanyi chuma chachiwahi nichimu chayiteneniyi Yehova Nzambi yenuku.” Wahosheli cheñi nindi: “Dichi dinu mwakamenu Yehova, mukalakelenu chakadi kudimbana nakashinshi.” (Yosh. 23:14; 24:14) Neyi tumukuhwelela Yehova nikumona chatukwashañayi, chikuhwelelu chetu chikukola.—Mas. 34:8. w15 10/15 2:10, 11

Yumanyi yikwawu yitwatela kutoñojokahu? Neyi mwasonekaña yikuma hakupompa, kupompa kwanyanya nikweneni, wanenuku mpinji yakuhitulukamu. Chimukuhitulukañamu, dihulenu nenu, ‘Nadizidi Mwizu daNzambi nimukuloñesha kwindi?’ Munateli kutoñojoka cheñi hansañu yekalaña muKaposhi Kakutalila, Awake! ninyikanda yinedishuwu katataka hakupompa kweneni. Neyi munakutaña Yearbook, hudikilenu hanyima yakutaña yuma yamwekeni nawa fundenu yikuma yamaneni hela sonekenu kunsa. Iyi yikuma yikayikwasha hakuloñesha kufuntilaku, mpanji hela hakuya nakubiña. Nsañu yimunakutaña yikuyishika hamuchima neyi muhudikila nakutoñojoka yuma yimunatañi nawa mukwikala nampinji yakumusakilila Yehova hansañu yayiwahi yimunakudiza. w15 10/15 4:9, 10

Anyana chapapatishewawu, anvwali azañalalaña nankashi. Anyana kamuhela Berenice ejima awana apapatisheweli henohu kanda ashikiji yaaka 14. Wahosheli nindi: “Twatiyili kuwaha nankashi nawa twadilili. Twatiyili kuwaha muloña anyanetu akeñeleña kumuzatila Yehova. Ilaña twelukili netu anyanetu akamonaña kweseka chekalawu atumpululu.” Muntu wumu wadiza nankashi chatoñojokañawu antu wahosheli nindi yaaka yawukampululu yinateli kwikala yakala kudi anvwali nianyana. Wahosheli cheñi nindi anyana ekala namaana, ahilaña nawa akeñaña kuhema nawakwawu. Hela achidi atumpululu, anyanenu anateli kwikala nawubwambu wakola naYehova, neyi cheliliyi Yesu hadiñayi kansi. w15 11/15 2:1, 2

Yehova wamwekeshaña cheñi nindi wakeña antu hakushaku nfulumendi yindi yaWanta wawuMesiya. Munjilanyi? Yehova watonda dehi Nyuuli wakeña antu nawa washikilamu kuyuula, Yesu Kristu. (Yish. 8:31) Nzambi watonda antu 144,000 kuyuula hamu naKristu mwiwulu. Chayisañulawu, alalamenaña wanyi yuma yahitilumu hiyadiñawu antu. (Chim. 14:1) Yesu hadiñayi hamaseki, wahosheleña nankashi haWanta nawa walejeli atumbanji twindi alombeleña Wanta ninkisu yiwukaleta. Bayibolu yamwekeshaña nawu Wanta waNzambi watachikili kuyuula mwiwulu mu 1914. Kufuma tuhu yina mpinji, ashalahu akayuula naYesu mwiwulu ayipompeshaña, “izaza deneni” dawantu akapuluka hakukuma kwanyaaka yinu nakwiñila mwituña dadiha nidena anakudipompesha.—Chim. 7:9, 13, 14. w15 11/15 3:16, 18

Yehova watachikilili kuleña muntu wateneniyi kapostolu Yowanu nindi “Izu.” (Yow. 1:1; Chim. 3:14) Yehova Nzambi wamulejeli Mwanindi wawedi yitoñojoka yindi. (Yow. 1:14, 17; Kol. 1:15) Kapostolu Pawulu wahosheli nindi añelu niwena ahanjekaña nawa akweti idimi dambuka chikupu nedimi dawantu. (1 Kor. 13:1) Yehova wayiluka chikupu añelu ejima niantu aleñayi. Watiyaña kulomba kwawantu amavulu hampinji yoyimu hela chakwila anakuzatisha madimi amboka-mboka. Yehova welaña iku nakutiyilila chinakulombawu antu, iku nakuhosha nawañelu jindi nikuyileja chiyatela kwilawu. Hakwila yeli mwenimu, yitoñojoka yaYehova nidimi dindi datela kwikala dambuka chikupu namadimi niyitoñojoka yawantu. (Isa. 55:8, 9) Dichi neyi nakuhosha nawantu, wahoshaña munjila yapela kulonda antu atiyi munakuhoshayi. w15 12/15 1:1, 2

Mumatuña amavulu, maBayibolu alema wuseya nawa akala kuyiwana. Kutambwila Bayibolu hinkisu yeneni. Chileji kufuma kuRwanda chahosheli nawu: “Antu amavulu adizishileñawu kudi amanakwetu ayilileñaku wanyi hambidi muloña adiña adana maBayibolu. Atwesheleña wanyi kulanda maBayibolu kumachechi. Nawa akañenyeña kutiyisha mavasi amakwawu, chumichi chaletesheli abuli kuyilaku hambidi.” Bayibolu yaNew World Translation chayibalumwinuwu mwidimi dawu, chisaka chimu chakuRwanda chikweti atumpululu awana chahosheli nawu: “Tunamusakilili Yehova ninduñu wamaana nikashinshi hakutwinka Bayibolu. Tudi atuzweñi nawa twadiña tudana mali akulanda nachu maBayibolu akwinka ejima muchisaka. Ilaña ichi wejima wetu tukweti maBayibolu. Hakwila tumwekeshi kusakilila kudi Yehova, twatañaña Bayibolu mafuku ejima hamu neyi chisaka.” w15 12/15 2:15, 16

Davidi watuleja cheñi muMasamu 41 yuma yamumwekeneni hampinji yadiñayi wakata, hazeyeliyi nihadiñayi nakwakama. Haniyi mpinji, mwanindi Abisalomi wakeñeleña kumutambula wanta. Davidi wadiña wakata chakwila hadikutwesha kumukañesha Abisalomuku. Welukili nindi kukala kwamwekeneña muchisaka chindi kwenjili muloña wanshidi yakoñeliyi naBatisheba. (2 Sam. 12:7-14) Davidi welukili nindi Yehova wamwanakeneni nshidi jindi nawa washindameneni hadi Nzambi kumukwasha hampinji yakatileñayi. Davidi hakeñeleña kumuuka muchihayamishaku. Wakeñeleña Nzambi kumukwasha munjila yoyimu yakwashilañamu Nzambi muntu wayitoñojokaña atuzweñi. Ichi chinabombelimu ‘kumukwasha hakakamujokayi hakadidi.’ (Mas. 41:3) Davidi wadiña nawubwambu wawuwahi naYehova, dihafumini yamulombi nindi yamukundeji nikumwakamena hakatileñayi. Wamulombeli cheñi nindi yamuuki. Tunateli kumulomba Yehova kutukwasha munjila yoyimu.—Mas. 103:3. w15 12/15 4:8, 9

Antu atambikañawu kudi Nzambi akeñekaña wanyi muntu wakuyileja nawu anayiwayishi. Yehova wayimwekeshelaña hatooka nindi nayitondi. Kapostolu Yowanu walejeli akwaKristu awayishewa nindi: ‘Enu awayishawu dehi kudi wajila, mweluka dehi yuma yejima.’ Wayilejeli cheñi nindi: “Kuwaya kwayiwayishiluwu kudi yena kwekala mudenu; himunabuli wakuyilejaku. Chela kuwaya kwayiwayishiluwu kudi yena kwayilejaña mwaya yuma yejima, kwalala, hikwatwambañaku, shakamenu mudi yena mwomwayilejeli kuwaya.” (1 Yow. 2:20, 27) AkwaKristu awayishewa atela kuyidizisha kudi Yehova neyi chadizishañayi ejima. Ilaña akeñekaña wanyi muntu wakuyileja nindi awayishewa. Yehova wazatishaña ñovu yindi yazatikaña, spiritu yajila, hakuyimwekeshela hatooka to-o nindi nayiwayishi! w16.01 3:9, 10

Kukuhwelela Yehova kunateli kutukwasha kumona yuma yitukweti netu yinawanini. Chumichi chinateli kutukwasha ñahi kumwekesha kukeña kudi amanakwetu? Neyi tumonaña yuma yitukweti netu yinawanini, tukwiluka netu amanakwetu niahela alema kubadika mali hela yuma. (1 Tim. 6:6-8) Tukukeñaña wanyi kuwana yiluwa mudi amanakwetu hela kudishona. Nawa tukuyitiyilaña antu amakwawu lwisu wanyi. Neyi tumonaña netu yuma yitukweti yinawanini, tukwikala nachisambu. (1 Tim. 6:17-19) Kukuhwelela Yehova kwatukwashaña cheñi kubula woma wakuumika kweseka kwakala. (Heb. 13:6) Kuhamuka kwatukwashaña kwikala nayililu yayiwahi. Tukumwekesha kukeña kudi amanakwetu kuhitila mukukwasha nikukundeja amanakwetu niahela. (1 Tesa. 5:14, 15) Nihampinji yalukadi lwasweja, tunateli kwikala ahamuka chineli tuneluki netu kupuluka kudi mukamwihi.—Luka 21:25-28. w16.01 1:16, 17

Kunyima, naambala yawantu adileña kudinkendi nikunwa kuvinyu haChanukishu yafuntileña mwishina. Ilaña makonu, naambala yinakuvulilaku chaaka nichaaka. Komana twatela kwakamena? Inehi. Tushinshikenu chikuletesha tubuli kwakamena. Kwambukaku naYehova, amanakwetu achindaña antu adyaña kudinkendi nikunwa kuvinyu haChanukishu elukaña wanyi chikupu muntu wawayishewa. Naambala yawantu adyaña yabombelamu antu atoñojokaña nawu awayishewa henohu awayishewa wanyi. Chakutalilahu, antu amakwawu adiña nakudya kudinkendi nikunwa kuvinyu alekeli. Amakwawu akata munyitu nawa akuhwelelaña nawu akayuula hamu naKristu mwiwulu. Kuhosha hohu chalala, tweluka wanyi antu awayishewa achidi hamaseki. Nawa Bayibolu yashimuna wanyi naambala yawawayishewa akashalahu hampinji yakatachika lukadi lwasweja. w16.01 4:12-14