September

Henohu Abarahama kanda yayishiyi añamba jindi wayilejeli nindi: ‘Shalenu kunu nachimbulu, ninami nimukwenzi tukuya kuna, twakadifukuli kudi Nzambi, tukwinza cheñi, tukuyiwana.’ (Kutach. 22:5) Abarahama watalishili mudihi? Watwambileña hakuhosha nindi wukufunta hamu naIsaka henohu neluki nindi nakuya nakumulambula? Inehi. Bayibolu yahosha nawu Abarahama welukili nindi Yehova natweshi kumusañula Isaka. (Heb. 11:19) Abarahama welukili nindi Yehova wamwinkeli ñovu yakuvwala mwana hela chakwila yena naSara adiña ashinakaja dehi. (Heb. 11:11, 12, 18) Dichi wakuhweleli chikupu nindi kwosi chuma chinateli kukañanyayi Yehova. Abarahama welukili wanyi chuma chadi kumwekana adina ifuku. Ilaña wakuhweleli nindi neyi mwanindi yafwa, Yehova wukamusañula kulonda yikaninu yaNzambi yejima yikashikijewi. Dichamutenenañawu Abarahama nawu “nkakulula yawakwakukuhwelela ejima.”—Rom. 4:11. w16.02 1:3, 13

Jonatani niantu amakwawu amuIsarela adiña mukukala. Mwanta Sawulu tata yaJonatani, walekeli kwovwahila nawa Yehova wamukaanini. (1 Sam. 15:17-23) Hela chochu, Nzambi wamwitejeli Sawulu kutwalekahu kuyuula hadi yaaka yayivulu. Dichi chayikalilileña antu kwikala ashinshika kudi Nzambi chelili mwanta atondeluwu kushakama “hetanda daYehova” welileña yuma yatama. (1 Kushi. 29:23) Jonatani watwalekeluhu kwikala washinshika kudi Yehova. Tunateli kwovwahila Yehova kuhitila mukwovwahila nfulumendi yamwituña detu neyi chinatwesheki. Yehova weteja “mawanta” kutwiyula nawa wakeñaña nindi tuyilemesheña. (Rom. 13:1, 2) Dimuloña waweni wutwatelela kulemeshela akulumpi janfulumendi hela chakwila ashinshika wanyi nawa hiyalondelaña nshimbuku. Twatela kulemesha antu ejima enkayi Yehova wuswa wakuyuula.—1 Kor. 11:3; Heb. 13:17. w16.02 3:5, 6, 8

Bayibolu yahosha nawu antu jaYehova ejima kushilahu tuhu niatwansi, akamukalakela ‘chakufuma hamuchima.’ Dichi muntu wunakukeña kupapatishewa watela kwiluka nindi hikufuukula kwindi. Nawa watela kwiluka muloña waweni wunakupapatishewelayi sweje-e neyi wakulila muchalala. Hampinji yimwakulileña mwamweneña antu amavulu anakupapatishewa hekwawu munamoni amabwambu jenu ayayenu nianyiki jenu. Ilaña mwatela kubabala kulonda mubuli kupapatishewa muloña nenu munakuli hela muloña ejima anakupapatishewa. Munateli kwila ñahi hakwila nawu mulemeshi chipapatishu neyi chachilemeshayi Yehova? Ikalenu nampinji yakutoñojoka chaletesha chipapatishu kwikala chalema. w16.03 1:11, 12

Tunateli kwila mwenimu neyi ‘twekala adinuña hamu’ nawa tunakuzatila hamu muchipompelu. (Efwes. 4:16) Hakwila nawu tushimwini antu amavulu, twatela kudiloñesha chikupu mumudimu wakushimwina. Kufumba kutwatambwilaña kuchipompelu kwatukwashaña kudiloñesha. Hanyima yakubulakana kwakuya mumudimu wamwiha, twayaña nakuleja antu nsañu yayiwahi yaWanta. Nawa twayinkaña nyikanda yashindamena haBayibolu. Iyi nyikanda tunayihani yayivulu mukaayi kejima. Mpinji yikwawu anateli kutuleja kuzataku mumakampeni adimena. Neyi muzata iwu mudimu, mukuzatila hamu nayihita yawantu amakwawu mukaayi kejima anakushimwina nsañu yoyimu. Cheñi nawa, munakuzatila hamu nawañelu, anakukwasha antu jaNzambi kushimwina nsañu yayiwahi yashimunawu haChimwekeshu 14:6. w16.03 3:4, 5

Bayibolu yatulejaña nawu mwituña dadiha, twakatambwila nyivuñilu yanshimbi jajiha. Iyi nyivuñilu yikalumbulula nshimbi jaYehova kudi antu hayina mpinji. Antu ejima kubombelaku niantu akasañulawu chakadizawu iji nshimbi, akeluka yuma yinakukeñayi Nzambi kudi wena. Nyivuñilu yikatukwasha kwiluka chatoñojokañayi Yehova. Nawa twakayiluka chikupu Bayibolu, dichi antu ejima muParadisa akadikeña, akekala nakavumbi nawa akadilemeshaña. (Isa. 26:9) Toñojokenu yuma yayivulu yitwakadiza nikudizisha antu hampinji yakatulombolañawu kudi Mwanta, Yesu Kristu. Neyi tulondela wunlomboli ‘wasonekawu munyivuñilu’ nawa twikala ashinshika kudi Yehova hakweseka kwakukumishaku, wakasoneka majina etu ‘mumukanda wawumi.’ Twakatambwila wumi wahaya nyaka! Dichi twatela kwimana nakutaña Bayibolu chiyahosha, kutalatala nakutiyishisha chiyahosha, kutiyilila kuhitila mukwovwahila wunlomboli waNzambi. Neyi twila mwenimu, twakapuluka lukadi lwasweja nikutwalekahu kwiluka Nzambi yetu wukweti maana nikukeña. w16.03 4:19, 20

Aeluda akuluka yitembi eluka kulema kwakutachika kudizisha amana kwetu achidi anyanya kuhitila mukuyinka nyidimu yamuchipompelu yatela kuzatawu kwesekeja nayaaka yikwetuwu. Neyi muyidizisha muniyi njila henohu achidi atwansi chikuyikwasha kushinshika hayikonkwanyi yakuspiritu yinateli kuyikwasha neyi anakuli dehi hampinji yakamonañawu yuma yayivulu yaluwañeshaña. (Mas. 71:17) Aeluda akumusañumuna cheñi kadizi kwikala nampwila yakuzata bayi neyi kuhitila mukumulumbulwila hohu yuma yatela kwilayuku, ilaña nimuloña wukuletesha yeli mwenomu. Neyi amuleja muloña watelela kwililayi mwenomu, aeluda akwimbujolaña Ntañishi Muneni Yesu. Chakutalilahu, henohu kanda yayinki apostolu indi mudimu wakwilisha atumbanji, Yesu wayilejeli muloña waweni watela kwovwahilawu. Wahosheli nindi: “Ñovu jamwiwulu nijahamaseki jejima anajinyinki.” Wabombeleluhu cheñi nindi: ‘Yenu mwakelishi atumbanji munyunza yejima.’—Mat. 28:18, 19. w15 4/15 2:5, 6

AkwaKristu ashakamineña muRoma adiña muwubanji. Atumbanji twaKristu ayikabishileña chikupu muloña ayitwambililili nawu ocheli kesi mumusumba mu 64 C.E. Chakadi nikujina, muniyi mpinji yakala dimu mwamushiluwu Pawulu mukaleya kamuchiyedi muRoma. Komana akwaKristu amakwawu amukwashili? Hakusambila Pawulu watela wadiña nakwakamena nindi amukwashili wanyi, muloña wamusonekeleli Timotewu nindi: “Chinadihakwilili chakusambila, hikwadiñi muntu niwumu wankwashiluku, ejima anshiyili.” (2 Tim. 4:16) Hela chochu, Pawulu wetejeli nindi adiña nakumukwasha. Wakuhweleleli nindi Yehova wukumukolesha kuumika makabi amweneñayi yina mpinji niadi kumonayi kumbidi. Kafwampi, watwalekeluhu nakuhosha nindi: “Mwanta wakampulwisha kunyidimu yatama yejima.” (2 Tim. 4:18) Eñañi, Pawulu welukili nindi hela chakwila antu hiyanakumukwashaku, wukwashu wafumaña kudi Yehova niMwanindi walala chikupu. w15 4/15 4:1-3

Yesu chavwalikiliyi, Satana welukili nindi iwu mukeki wakakula nakwikala Mesiya akaninuwu. Komana Satana watoñojokeleña nindi kujaha nkemba chadiña chuma chatama nankashi? Satana hakamenaña nindi ichi chuma chachiwahi hela chatamaku. Nawa Satana wakeñeleña kumujaha Yesu hadiñayi mwana chakadi kulaba. Munjilanyi? Mwanta Herodi wahilili chikupu chehwiluwu akwakuhoña natutumbwa kutalisha ‘hakuvwalika kwamwanta wawaYudeya’ nawa wafwilileña kumujaha. (Mat. 2:1-3, 13) Hakwila nawu iwu nkemba amujahi, wahanini nshimbi yakujaha ankemba ejima awamayala adiña nayaaka yakusemuka yiyedi nakufunta mwishina adiña muBetelemi nimunyikala yejima yamukamwihi. (Mat. 2:13-18) Yesu wapulukili haniyi mpinji yajahiluwu anyana amavulu, hanu dinu chumichi chatudizishaña chumanyi hadi chilumbu chetu Satana? Chinamwekani hatooka to-o nawu Diyabolu hakamenaña wumi wawantuku. Hakamenaña anyanaku. Eñañi, Satana diyi “mutupa wabulumaña.” (1 Pet. 5:8) Dichi bayi mulalamena nenu Satana wukweti wukatuku! w15 5/15 1:10, 12, 13

Nzambi watwinka chawana chakwikala nawuswa wakufwikija nyevulu yayuma yitwabula kumona. Wuswa weniwu watukwashaña kufuukula chiwahi nikutalila yuma yayiwahi kumbidi. Yehova weluka yuma yikamwekana kumbidi nawa watulejelaña chadimu yuma yayivulu yikamwekana kumbidi kuhitila muBayibolu. Tunateli kufwikija nyevulu yayuma yikamwekana. Kafwampi wuswa wutukweti wakumona yuma yitwabula komana watukwashaña kwikala nachikuhwelelu. (2 Kor. 4:18) Hampinji yadiña nakutoñojokayi Hana hayuma yikamwekana neyi namutwali dehi mwanindi Samweli nakuzatila hatabanaka, kwadiña chuma chaletesheli yafwikiji mwenimu. Chashindameneni hachuma chafuukwiliyi, nawa chumichi chamukwashili kwila mwafukwiliyi. (1 Sam. 1:22) Neyi tufwikijaña hayuma yatukanayi Nzambi, dikwila nawu tunakutoñojoka hayuma yikamwekana. (2 Pet. 1:19-21) Mwamweni, antu ashinshika akunyima afwikijileña yuma yayiwahi yakanayi Nzambi. w15 5/15 3:1-3

Yitoñojoka yatama hikufwikija mudi namaheta amavulu chakwila himunakusha muchima kunyidimu yaNzambuku. Yesu washimwini nsañu yamwekeshaña wushona watiyañayi muntu “wadilumbikilaña maheta amavulu, nindi indi yomweni hohu, hekalaña namaheta kumesu aNzambuku.” (Luka 12:16-21) Yehova watiyaña kuwaha neyi twila yuma yamuzañaleshaña. (Yish. 27:11) Wenowu muzañalu wutwatiyaña neyi twikala nawuselewa windi muloña tunakudilumbikila “maheta mwiwulu”! (Mat. 6:20) Nawa kwikala nawubwambu wawuwahi naYehova didu iheta dasweja kulema ditwatela kwikala nadu. Tukusweja kwakama neyi chakwila tudilumbikila “maheta hanu hamaseki.” (Mat. 6:19) Yesu wazatishili chakutalilahu kulonda yashimuni “kwakama kwamakonu nikudimbana kwamaheta” chikunateli kuvumbisha mazu aWanta.—Mat. 13:18, 19, 22. w15 5/15 4:15, 16

Ñovu yaNzambi yamukwashili Yesu Kristu kukoña yihayamisha yashiyashana. Wokili mbumba hohu wanyi, ilaña wokili nyisoñu yejima niyikatu yejima yadiña nawantu. Makonu mpinji yikwawu andotolu anonaña yiidi yamuntu wacheñi hakwila oki ayeji awu. Ilaña Yesu wokili yiidi yayeni yamujimba yadiña yakata. Nawa wadiña nakuuka antu hohenohu, mpinji yikwawu wayuukileña hela adi kwakulehi. (Yow. 4:46-54) Indi iyi yakutalilahu yakuhayamisha yamwekeshañadi? Yamwekeshaña nawu Yesu, Mwanta wawanta wamwiwulu hakweti ñovu hohuku, ilaña wafwilaña cheñi kuuka antu haya nyaka. Chitwadiza njila yahanjikileñayi Yesu nawantu chikutuleñela kukuhwelela netu mwituña dadiha, wuprofwetu wamuBayibolu wakashikijewa, wahosha nawu: “Niwazeya niwabula yuma wakayitiyila wushona.” (Mas. 72:13) Eñañi, Yesu wakela kwesekeja nachuma chafwilañayi mumuchima windi hakukwasha akabakana. w15 6/15 2:6

Antu amavulu anateli kuhoshela kumutu mazu ekala muKulomba kwaMwanta. Mumudimu wetu wakushimwina kwitala nikwitala twavula kuzatisha iku kulomba kulonda tukwashi enimatala kwiluka nawu Wanta waNzambi hinfulumendi yalala yikahimpa yuma hamaseki. Hela tunateli kuzatisha kulomba kwatachi kulonda kumwekesha netu Nzambi wukweti ijina dindi, itwatela kujilika. (Mat. 6:9) Komana Yesu washimwini nindi antu atela kuzatishaña mazu wowamu ekala muniku kulomba neyi chelañawu aKristendomu? Inehi. Henohu Yesu kanda yahoshi awa mazu ekala muniku kulomba kwachitalilu, wahosheli nindi: ‘Chimukulomba, bayi muhitulukaña nakutenatena mwamukunkulwayiku.’ (Mat. 6:7) Hampinji yikwawu wazatishili iku kulomba kuzatisha mazu acheñi. (Luka 11:1-4) Dichi Yesu watukwashili kwiluka yuma yitwatela kulomba nawa mundonda wayuma yalema. Dichi iku kulomba kunashikilumu kukutena netu kulomba kwachitalilu. w15 6/15 4:1, 2

Yehova watwinkaña spiritu yindi yajila yikweti ñovu yinateli kutukolesha nikutukwasha kulonda tuumiki kweseka. Nzambi watusoñamishaña cheñi kuhitila Mwizu dindi nimuchipompelu kutalisha kuyuma yitwatela kutondolwela yidi neyi kumanisha mpinji yeneni, mali niñovu kuyuma yamukunkulwayi. Espen naJanne adiña apayiniya adi nawanyana ayedi. Espen wahosheli nindi: “Kakavulu twalombaña kudi Yehova kulonda tubuli kuholokela mukweseka chineli hitwatweshaña kuzata mpinji yeneni mumudimu wakushimwina neyi chitwazatileña kumafuku akunyimaku. Twamulombaña Yehova kulonda yatukwashi kutwalekahu kwikala akola kuspiritu nikwikala neyena mumudimu wakushimwina.” Kutala nyevulu yanzekesi hikweseka kukwawu kunakumwekana makonu. Antu amakwawu anaholokeli mukweseka kweniku muloña wakutwalekahu nakutoñojoka hayuma yatama. Ilaña tunateli kukaana kweseka neyi chelawu amana kwetu amavulu.—1 Kor. 10:13. w15 6/15 5:15, 16

Yumanyi yikamwekana neyi yipompelu yakutwamba anayijilumuni dehi? Yakekala mpinji yakumwekesha yuma yayeni yekala mumuchima wetu. Antu amavulu akakeña kubatama muyipompelu yawantu esekejawu ‘namalola akumapidi.’ Hela chochu, antu jaNzambi akatemukila kwiluña kwakayiloñeshelayi Yehova. Muyaaka nkulakaji yakusambila, mpinji yafuntiluwu aRoma hiyadiña mpinji yakushimwina aYudeya kulonda ekali akwaKristuku. Yadiña mpinji yakwila antu adiña dehi akwaKristu ovwahili nshimbi yayinkeluwu. Munjila yoyimu, hitunateli kukuhwelela netu mpinji yakumbidi yakakañeshawu lukadi lwasweja yakekala mpinji yaketiyawu antu amavuluku. Ilaña yakekala mpinji yakela akwakwitiya alala ejima akamwekeshi nawu amukeña Yehova nikukwasha amana kwaKristu.—Mat. 25:34-40. w15 7/15 2:7

Komana nkulilu yenu hela iluña dimwashakamaña dayileñelaña kumona nenu iluña denu hela ituña denu dalema kubadika dikwawu? Komana muchidi nakutoñojoka yuma yamuchidiwu munyichima yenu? AkwaKristu hiyatela kutoñojokaña nawu ituña dawu dalema kubadika dawakwawuku. Chumanyi chimukwila neyi mwiluka nenu mukweti yitoñojoka yatama kutalisha hadi antu akwituña, chisemwa, idimi hela ikowa dacheñi? Chikuwaha neyi mukutoñojoka chikupu chamonañayi Yehova antu amonaña nawu ituña dawu dalema kubadika dawakwawu nichaambu. Kusandujola iyi nsañu ninsañu yadifwanaku yinateli kuyikwasha nankashi. Dichi mulombenu Yehova kulonda yayikwashi kwikala namaana akumonaña yuma neyi chayimonañayi yena. (Rom. 12:2) Twatela kwila mwenimu muloña katataka hela kumbidi ambuña Yehova ejima afwilaña kumukalakela nachinleji chitooka kulonda ekali ambukaku nawakwawu akanyidimu, akashikola, antuñi nawu, antaña hela antu amakwawu. Ilaña twatela kwikala ambukaku. w15 7/15 3:14, 15

Yehova watiyaña chitwamulembelelaña nawa weluka kukala kwetu kubadika antu ejima. Chakulañayi kukulomba kwetu, chamwekeshaña kukeña kwatukeñayi kwabulaña kumana. Tunateli kudiza yuma yayivulu kukulomba kwasonekawu Mwizu daNzambi. Mpinji yikwawu, tunateli kuhetelamu chikupu neyi tudiza hakulomba kweniku hampinji yakudifukula kwachisaka. Neyi tutoñojokaña chikupu hadi ambuña Yehova akushankulu chamulejeleñawu Nzambi yuma yatoñojokeleñawu, chinateli kutukwasha kuwahisha kulomba kwetu. Chakutalilahu, shinshikenu Yona chalombeliyi nachineñi hampinji yadiñayi mwivumu danshi muneni. (Yona 1:17–2:10) Hitulukenu muchalombeliyi Solomoni kudi Yehova chakufuma hamuchima hakwenzununa tembeli. (1 Anya. 8:22-53) Toñojokenu chikupu hakulomba kwachitalilu kwahosheliyi Yesu hakwila tuhetelumu. (Mat. 6:9-13) Sweje-e dinu, “mulejenu Nzambi yuma yejima yimunakeñi” mpinji yejima. Chikufumamu, “kuwunda kwaNzambi kwabadika maana ejima kwakahemba nyichima yenu niyitoñojoka yenu.”—Fwi. 4:6, 7. w15 8/15 1:11, 12

Twakatiya kuwaha hakwikala muchiyuulu chaYehova mwituña dadiha hampinji yitukawahishaña iseki, kutañisha antu akasañulawu nikwila nkeñelu yaYehova yafuukwilayi antu. Twakeladi neyi atuleja kuzata mudimu wutwabula kukeña? Komana twakalondela iwu wunlomboli nakuzata hakumina ñovu jetu kulonda tukadiluñishi mudimu wetu? Etu amavulu tukwiteja. Komana twovwahilaña wunlomboli waNzambi makonu? Neyi tunakwila mwenimu tunakudiloñesha kwikala nawumi wahaya nyaka muchiyuulu chaYehova. Bayi neyi twatela kuloñesha chitwakashakamaña mwituña dadiha kuhitila mukulondela ntanjikilu yaYehova yakatataka hohuku, ilaña twatela cheñi kuzata kulonda tubuleña kufwila yuma yayivulu nikwikala naspiritu yakwovwahila. Neyi twovwahila anakutulombola makonu, hadaha nikutiya kuwaha mudimu wetu wawuha, dikwila nawu twakekala nayililu yoyimu mwituña dadiha. w15 8/15 3:6, 7

Muloña wakudikunda nawantu atama, Solomoni wajimbesheli maana indi nawa walekeli kudifukula kudi Nzambi walala. (1 Anya. 11:1-6) Iku hikusoñamisha kwakweni kudi akwaKristu anakukeña kusumbula hela kusumbuka namuntu wabula kumukeña Yehova. Chumanyi chatela kwilayi muntu neyi yekala mukwakudifukula waNzambi, ilaña wasumbula hela wasumbuka namuntu wabula kwitiya? Bayibolu yahosha nawu: “Enu ambanda, shakamenu nakwovwahila anfumu jenwenu aweni; kulonda, hela amu anabuli kwovwahila mazu, akayikoki chakadi mazu, nanochu chakushakamawu añodi jawu.” (1 Pet. 3:1) Awa mazu ahoshaña hadi ambanda akwaKristu, ilaña akundama cheñi nikudi amayala ekalaña akwakudifukula aYehova henohu asumbula muntu wabula kwitiya. Kufumba kwamuBayibolu kwahosha hatooka to-o nawu: Ikalenu iyala hela mumbanda wamuwahi nawa londelenuña nshimbi jaloña jaNzambi jahosha hawuluwi. Antu amavulu akweti eni kwawu abula kwitiya adizaña chalala hamuloña wakumona yililu yayiwahi mudi eni kwawu ahimpili chihandilu chawu hanyima yakudiza nshimbi jaNzambi. w15 8/15 4:15, 16

Yikatu yikwawu yidana yitumbu. Dichi twatela kubabala nayitumbu yinakwilawu nawu yinakuka henohu kwosi muntu wunokuwu. Pawulu wasonekeli nindi: “Mwekeshenu kwovwaha kwenu kudi antu ejima.” (Fwi. 4:5) Kutoñojoka kukutukwasha kusha maana kukudifukula kudi Yehova chatela tushi maana hakukala kwetu kwakumujimba. Neyi tusha maana kukukola kwakumujimba, tukutoñojokaña hohu hayuma yitunakukeña. (Fwi. 2:4) Tweluka netu mukanu kaayi hitunateli kwikala akola kumujimba mpinji yejimaku. Dichi, mwatela kudishinshika kulonda mwiluki neyi mwalemesha kumukalakela Yehova muchihandilu chenu. (Fwi. 1:10) Indi kwiji yetu twabula kufumba chinleji chetu. Wejima wetu twatela kudifuukwila njila yakutukilamu nikwiteja yuma yinateli kufumamu. w15 9/15 2:8, 10

Yehova walombolaña anyanindi chachiwahi muloña ‘hiNzambi wansañu yalala.’ (Mas. 31:5) Watulejaña chekalayi. Nawa watulejaña cheñi chitunateli kudifukula kudi yena ninjila mutwatela kuhandila chiwahi. Yumanyi yatulejayi Yehova yamwekeshaña nawu watukeña nankashi? Chatachi, Yehova wadilumbulula yomweni. Wakeñaña nindi tumwiluki. (Yak. 4:8) Dichi watuleja ijina dindi. MuBayibolu mwekala ijina dindi kapampa kakavulu kubadika majina amakwawu. Yehova watuleja chekalayi. Twelukaña netu wekala namaana niñovu chitwatala yuma yaleñayi. (Rom. 1:20) Neyi tutaña Bayibolu, tukwiluka netu wamuwahi nawa watukeña. w15 9/15 4:8, 9

Antu amavulu amonaña nawu Nzambi washañaku maana wanyi kuyuma yelañawu. Atoñojokaña nawu Nzambi wakamenaña wanyi yuma yayimwekenaña. Chakutalilahu, hanyima yakwila nvula yampepela yinakisañani dehi yuma yayivulu kuPhilippines muNovember 2013, mukulumpi waboma yimu yeneni wahosheli nindi: “Nzambi watela wadiña kwacheñi.” Antu amakwawu atoñojokaña nawu Nzambi wamonaña wanyi yuma yelañawu. (Isa. 26:10, 11; 3 Yow. 11) Mumafuku akapostolu Pawulu, antu amakwawu atoñojokeleña chochimu. Pawulu wahosheli nindi: ‘Alekeli kwikala namaana akwiluka Nzambi.’ Adiña aloña wanyi nawa elileña yuma yatama. (Rom. 1:28, 29) Indochu etu? Tweluka netu Yehova wamonaña yuma yejima yitwelaña. Mwalala twakuhwelela netu Yehova watukeña? Twamonaña chatukwashañayi muchihandilu chetu? w15 10/15 1:1-3

Kushimwina hinjila yayiwahi yamwekeshaña nawu tukweti chikuhwelelu chakola. Muloñadi? Muloña neyi tukushimwinaña mpinji yejima, tukumwekeshaña nawu twakuhwelela netu kukuma kudi kwakwihi nawa ‘hikwakalabaku.’ (Hab. 2:3) Hakwila twiluki neyi chikuhwelelu chetu chakola, twatela kudihula netu: ‘Komana nalemesha mudimu wakushimwina? Nazataña nañovu kulonda nilejeñaku antu amwiluki Nzambi? Nakeñaña njila jajivulu kulonda nidikiteña chikupu mumudimu waYehova?’ (2 Kor. 13:5) Dichi tukoleshenu chikuhwelelu chetu kuhitila ‘mukubidika nsañu yakuhanda,’ dikwila nawu kushimwina nsañu yayiwahi. (Rom. 10:10) Twamwekeshaña cheñi netu twamukuhwelela Yehova neyi tuumika kukala kutunakumona mukanu kaayi. Neyi twakata, anatuneñeshi, anatuhilishi, tudi atuzweñi hela tudi nakukala kukwawu, twatela kukuhwelela netu Yehova niYesu ‘akutukwasha hitukumona kukala.’ (Heb. 4:16) Twamwekeshaña netu twamukuhwelela Yehova neyi tumulombaña wukwashu. w15 10/15 2:12-14

Hela chakwila kudi yuma yinateli kuyikañesha kudiza bayibolu, kwosi chinateli kuyikañesha kutoñojoka hansañu yimwahembela kumutuku, chidi neyi nsona yimwakeñesha hela tumina twaWanta. (Yil. 16:25) Spiritu yaNzambi yikayikwasha kwanuka yuma yimwadizili nawa yumiyi yikayikwasha kutwalekahu kwikala ashinshika. Munateli kutanjika ñahi kutaña Bayibolu mafuku ejima? Mafuku amakwawu mumulungu munateli kutaña nikutoñojoka hakutaña Bayibolu kwamulungu nimulungu. Mafuku amakwawu munateli kutaña nikutoñojoka hanyikanda yahosha hachihandilu chaYesu, yaMatewu, Maku, Luka niYowanu kulonda mwiluki nsañu yahosheliyi Yesu niyuma yeliliyi. (Rom. 10:17; Heb. 12:2; 1 Pet. 2:21) Tukweti mukanda walumbululaña mundonda yuma yamwekeni muchihandilu chaYesu. Iwu mukanda wukuyikwasha nankashi chimunakutaña nyikanda yahosha hachihandilu chaYesu.—Yow. 14:6. w15 10/15 4:11, 12

Yesu hadiña hohu Ntañishi yawapostoluku. Wadiña cheñi ibwambu dawu. Mpinji yakunyima, muntu walejeleña wanyi anduñu jindi chinakutoñojokayi. Ilaña Yesu wamweneña wanyi atumbanji twindi neyi anduñu. Wayikeñeli nawa wahanjekeleña nawu. Wayilejeleña chatoñojokeleñayi nawa watiyilileña nakanañachima neyi anakuhosha chinakutoñojokawu. (Maku 6:30-32) Iku kuhanjeka kwadiña hakachi kaYesu nawapostolu indi kwayiletesheli ekali amabwambu nawa kwakwashili apostolu kudiloñesha kuzata mudimu kumbidi. Yesu welukili nindi atumbanji twindi akwikala namuzañalu neyi atwalekahu kumuzatila Yehova neyena nikushimwinaña nsañu yayiwahi. Dichi wayikolesheli kuzata nañovu mumudimu wakushimwina nawa wayikanini nindi wukayikwashaña.—Mat. 28:19, 20. w15 11/15 2:3, 5

Kukeña dichililu chaYehova Nzambi chabadika. (1 Yow. 4:16) Chileñaleña chindi chatachi, Yesu Kristu, washakamini yaaka yayivulu nankashi mwiwulu naTata yindi, dichi welukili nindi Yehova hiNzambi wukweti kukeña. (Kol. 1:15) Yesu wamwekesheli kukeña kokumu hadiñayi mwiwulu nihamaseki. Dichi tunateli kukuhwelela netu Yehova niYesu akayuulaña chiwahi. Muntu wumu chamwihwiliyi Yesu lushimbi lwabadika, Yesu wakwili nindi: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima. Dilu lushimbi lwabadika lwakusambila. Kudi nawa lwamuchiyedi lwafwana neyi ilu nawu, Keñaku mukwenu neyi chiwadikeña eyi aweni.” (Mat. 22:37-39) Twatela kukeña akwetu. Yesu wahosheli nindi twatela kukeña Yehova niakwetu. w15 11/15 4:1-3

Nzambi hahosheleña nawantu muchiHeberu hohuku. Mpinji yafuminiwu aIsarela muBabiloni, antu jaNzambi amakwawu ahosheleña chiAramayiki. Hadaha dichaletesheli Danyeli, Yeremiya niEzera kusoneka nyikanda yamuBayibolu muchiAramayiki. Alesanderi Muneni washindili nyunza yayivulu mukaayi, dichi chiGiriki atachikili kuchihosha mumatuña amavulu. A Yudeya amavulu atachikili kuhosha chiGiriki, nkumininaku Nyikanda yachiHeberu ayibalumwini muchiGiriki. Iku kubalumuna akwitenaña nawu Septuagint. Dikwadiña kubalumuna kwaBayibolu kwatachi nawa kwekala kwalema. Amakwawu abalumwini kufuma muNsona yachiHeberu hezu hezu, amakwawu nehi. Hela chochu, aYudeya ahosheleña chiGiriki niakwaKristu akuhweleli nawu Septuagint yadiña Izu daNzambi. w15 12/15 1:4-6

Chikuma chidi muchishimu chaYakoba anachishimuni mu vasi 6 “Idimi” hikesi. Idimi datukwashaña kuhosha. Kufwana kesi, mazu itwahoshaña anateli kuleta kukala. Mazu itwahoshaña anateli kukwasha muntu hela nehi. Bayibolu yatulejaña nawu tunateli kujahisha hela kuhandisha muntu namazu etu. (Yish. 18:21) Komana twatela kuleka kuhosha kuchina netu hadaha tukuluwañesha munhoshelu? Inehi. Hela chakwila tuneluki netu tunateli kuha nakesi, twatwalekañahu kukizatisha. Nawa twekalaña ababala hakuzatisha kesi. Chakutalilahu, tunateli kuzatisha kesi kutelekelahu yakuda, kota nikumunyika nachu mwitala. Munjila yoyimu, neyi tukuhoshaña mazu amawahi, tukumulemesha Yehova nikukwasha akwetu. (Mas. 19:14) Yehova watwinka wuswa wakuleja akwetu chitunakutoñojoka kuhitila mukuhosha hela kuzatisha idimi dawatumama.—Yak. 3:9, 10. w15 12/15 3:1-3

Hadaha Luka wamwinkeleñahu Pawulu niakwawu yitumbu neyi akata halwendu lwawu lwawumishonali. (Ŋal. 4:13) Neyi chochahosheli Yesu nindi, “akata” akeñekaña ndotolu. (Luka 5:31) Bayi neyi Luka walejeleña hohu antu chakudihemba kumujimbaku. Ilaña amudizishili kwikala ndotolu. Bayibolu yahosha wanyi mpinji niluña kwadiziliyi wundotolu. Ilaña yahosha nawu Pawulu wasonekeleli Akolosi nawu Luka nayimushi. Dichi tunateli kuhosha netu Luka watela amudizishili mumashikola awandotolu akuLayodikeya musumba wadiña kwakwihi naKolosi. Cheñi nawa, Luka hasonekeleñayi mukanda waLuka niwaYililu, wazatishili mazu azatishañawu andotolu. Chineli wadiña ndotolu, wasonekeli nsañu yahosheleña hadi Yesu chokiliyi antu. w15 12/15 4:11, 12

Yehova watwinka chawaana chabadika hakutemesha Mwanindi wumu hohu hamaseki, Yesu. (Yow. 3:16; 1 Yow. 4:9, 10) Kapostolu Pawulu wateneni ichi chawaana nindi ‘chamukunkulu chakañanya kushimunewa.’ Pawulu welukili nindi yikaninu yaNzambi yejima yakashikijewa kuhitila mumulambu waYesu. (2 Kor. 1:20) Ichi chinayi mukwila nawu ‘chamukunkulu chaNzambi chakañanya kushimunewa’ chabombelamu mulambu waYesu, yuma yayiwahi nikukeña kwalala kwatumwekeshelañayi Yehova. Ichi chawaana chalema chakala kuchilumbulula munjila yitunateli kutiya. Twatela kwila ñahi nanichi chamunkulu chalema? Nawa chatela kutusañumuna kwiladi? Komana chahimpaña chihandilu chenu? Chayikwashaña kwikala nachisambu nikukeña antu nikwanakena antu ayivulumwini? Anukenu chamunkulu chabadika kulema chatwinkayi Yehova kuhitila mudi Kristu.—1 Pet. 3:18. w16.01 2:1, 2, 4, 5

Muntu wawayishewa nateli kutoñojoka nindi, ‘Muloñadi Yehova chantondeliyi ami chatela yatondi wacheñi?’ Hadaha nateli kudijinooka neyi nashikilumu kutondewa. Wajinokaña wanyi nindi Yehova namutondi. Ilaña, watiyaña kuwaha nawa wasakililaña hanichi chawaana. Awayishewa atiyaña neyi chatiyiliyi Petulu wahosheli nindi: “Amukiswili Nzambi yaMwanta wetu Yesu Kristu, yowu Tata yindi watuvweli chachiha tukwati kukuchiñeja kwakuumi nakusañuka kwaYesu Kristu mudi afu, mwaya luwi lwindi lwasweja. Watuvweleli niwuswana wakatokaña, wakadi kujilola, wabulaña kujimuka, wanayiswekeluwu enu mwiwulu.” (1 Pet. 1:3, 4) Neyi awayishewa ataña awa mazu, chakadi nikujina elukaña nawu Tata yawu nakuhosha nawena. w16.01 3:11, 12