October

Yehova watachikili kutonda awayishewa hanyima yakumusañula Yesu. Chinamwekani neyi mumafuku awapostolu, akwaKristu alala ejima ayiwayishili. Chimwahitili yaaka yayivulu, antu amavulu adiña nakuditena nawu akwaKristu alondeleli Kristu wanyi. Hela chochu, hayina mpinji, Yehova wawayishili antu antesha adiña akwaKristu alala. Adiña neyi tidiku yahosheliyi Yesu nindi yakakulila hamu namatahu. (Mat. 13:24-30) Munanu mafuku akukuminina, Yehova natwalekuhu kutonda antu kwikala hamukanka wawa 144,000. Dichi Nzambi neyi nafuukuluhu kutonda antu amakwawu henohu kukuma kanda, twatela kujinoka wanyi netu nakwila yuma yayiwahi. (Isa. 45:9; Dan. 4:35; Rom. 9:11, 16) Twatela kubabala kuchina twakenda kela neyi chelili akwakukalakala amutobeleleña mukwetempa nawu ayinki mali amavulu kubadika ana akwawu enjili hanyima.—Mat. 20:8-15. w16.01 4:15

Makonu, Yehova watwilaña wanyi nindi tulambuli anyanetu, ilaña watulejaña kwovwahila nshimbi jindi. Mpinji yikwawu chinateli kutukalila kwiluka chikwekalila iji nshimbi hela jinateli kutukalila kujovwahila. Ninenu dichimwamonaña? Antu amakwawu kushimwina kwayikalilaña. Hadaha atiyaña nsonyi nikutiya woma kuhosha nawantu abula kwilukawu. Amakwawu atiyaña woma kwikala ambukaku nawakwawu kunyidimu hela hashikola. (Kwid. 23:2; 1 Tesa. 2:2) Neyi anayili nawu mwili chuma chimu chikuyikalila, londelenu chikuhwelelu nikuhamuka kwadiña naAbarahama. Neyi tutoñojokaña hayuma yelileñawu amayala niambanda ashinshika, chikutukwasha kuyimbujola nikukundama kwakwihi Nebwambu detu, Yehova.—Heb. 12:1, 2. w16.02 1:3, 14

Chelili Sawulu yahoshi nindi nakukeña kujaha Davidi, Jonatani chamukalilili kwiluka chakwila. Wakeñeleña kwikala washinshika kudi tata yindi nikudi Davidi. Jonatani welukili nindi Nzambi wadiña naDavidi bayi naSawulu, dichi wafuukwiluhu kwikala washinshika kudi Davidi. Wamusoñamishili Davidi kuswama nawa wamulejeli Sawulu kubula kumujaha Davidi. (1 Sam. 19:1-6) Twatela kwikala ashinshika chikupu kudi Yehova kubadika kwikala ashinshika kwiizanvu dayisela, kushikola hela kwituña. Chakutalilahu, Henry wadiluñishileña kuhema chesi nawakwawu akashikola nawa wakeñeleña kuwinisha shikola yawu. Chineli wahemeneña chesi kunsa yamulungu, wadiña nampinji wanyi yakuya nakushimwina hela kuya nakupompa. Henry wahosheli nindi walemesheli nankashi kwikala washinshika kushikola kubadika kudi Nzambi. Dichi, walekeli kuhema chesi.—Mat. 6:33. w16.02 3:10, 12

Enu atwansi, munateli kwiluka neyi kufuukula kwenu kwakupapatishewa kunakufuma hamuchima neyi mutoñojoka hayuma yimwahoshaña mukulomba kwenu. Mwalombaña mpinji yejima kudi Yehova? Mwalombaña yuma yimunakukeña? Chimukwakula awa malwihu chikumwekesha chidi wubwambu wenu naYehova. (Mas. 25:4) Yehova wakulaña kulomba kwetu kuzatisha Bayibolu. Njila yikwawu yinateli kuyikwasha kwiluka neyi mwalala munakukeña kukundama kwakwihi naYehova nikumukalakela kufuma hamuchima hikwiluka chidi ndandanda yakudiza halwenu. (Yosh. 1:8) Dihulenu nenu: ‘Natañaña Bayibolu mpinji yejima? Nahoshañahu hakudifukula?’ Chimukwakula awa malwihu, chikuyikwasha kwiluka neyi mwalala munakukeñesha kupapatishewa. w16.03 1:11, 13

Twatiyaña kuwaha neyi tutaña muYearbook hayuma yayiwahi yinakufuma mumudimu wetu wakushimwina mukaayi kejima. Toñojokenu cheñi chitwazatilaña hamu mukaayi kejima neyi tunatambiki antu kukupompa kwetu kweneni. Twatiyililaña kunsañu yoyimu. Jimpanji, yimwenu niyakutalilahu yatukoleshaña wejima wetu kumukalakela chikupu Yehova. Twanuñañana nawamanakwetu niahela mukaayi kejima neyi tuya kuChanukishu hachaaka hachaaka. (1 Kor. 11:23-26) Twapompaña ifuku dodimu daNisani 14, hanyima yakuhuma kwetañwa kulonda tumwekeshi kusakilila hachuma chatukoñeleliyi Yehova nikwovwahila lushimbi lwaYesu. Nawa munyilungu yakwila Chanukishu kanda, twazatilaña hamu kutambika antu amavulu kulonda akenzi kuchidika chalema. Kabola kamu kakutwesha wanyi kukisañana chikupu. Nkawetu kwila tutwesha kushimwina antu ejima nehi. Ilaña chineli twazatilaña hamu, twashimwinaña antu amavulu kulonda amwiluki Yehova nikukwasha amakwawu kulonda amuhameki nikumulemesha. w16.03 3:4, 6, 7

Amanakwetu anakudiza chakuzata nyidimu yamuchipompelu atela kudizishewa chakuzatisha nshimbi jamuBayibolu. Chakutalilahu, neyi eluda yenka manakwetu mudimu wakuhemba njila yaya Hetala daWanta nawunyonji. Eluda nateli kutaña nsona yaTitusa 2:10 nikumulumbulwila manakwetu mudimu wukuzatañayi wakuwahisha Itala daWanta chiwakwashañaku ‘kuwahisha ntañishilu yaNzambi, Chamwinu chetu.’ Nateli kuleja cheñi kadizi kwakamenaku atushinakaji amuchipompelu nichinateli kuhetelamu neyi yazataña mudimu windi chiwahi. Kumuleja kadizi muniyi njila hampinji yimunakumudizisha chikumukwasha kusha maana hakukwasha antu bayi neyi hakuhemba hohu nshimbuku. Wukuzañalalaña hakumona amana kwetu niahela muchipompelu chiyanakuhetelamu munyidimu yinakuzatayi. Eluda watela cheñi kumuhameka kadizi chinakuzatishayi yuma yimunakumuleja. Kumuhameka kadizi chakufuma hamuchima chidi neyi munakutukumwina mbutu, kukumukwasha kuzata chiwahi. w15 4/15 2:7, 8

Mwamonahu dehi kukala kweneni chakwila mutiya neyi kwosi muntu wakuyikwasha? Hadaha hikubula mudimu, ikakeja dakushikola, kukata hela kukala kukwawu. Hekwawu mwalombeli wukwashu, ilaña akwenu akañenyi muloña hiyayinkeli yuma yimwakeñeleñaku. Kafwampi kukala kukwawu hiyanateli kukumanisha kudi antuku. Neyi mumona kukala kwamuchidiwu, komana munateli kukuhwelela kufumba kwamuBayibolu kwakwila nawu “Mukuhweleli Yehova”? (Yish. 3:5, 6) Komana iku kufumba kwamukunkulwayi? Inehi! Nzambi wakwashanaña chikupu neyi chashimunawu munsañu yayivulu yamuBayibolu. Dichi, neyi akwenu antu akañanya kuyikwasha chatela muyihembeli nkunyi, mwatela kumukuhwelela chikupu Yehova kulonda yayikwashi neyi chamukwashiliyi kapostolu Pawulu. Chumichi chinateli kukolesha chikuhwelelu chenu nawa wubwambu wenu naYehova wukwikala walala. w15 4/15 4:3-5

Satana nateli kuyileñela antu amufutaleli Nzambi yetu, Yehova. (1 Yow. 4:8) Kuhitila mukutwamba, Satana natwalekuhu nakwilisha antu ekali “atuzweñi muspiritu.” (Mat. 5:3) Dikwila nawu “naputishi mesu ayitoñojoka yawantu abula kwitiya; kuchina mwaana wansañu yayiwahi yalubanji lwakulema kwaKristu, chinfwana chaNzambi, kuyichiila.” Kwitiya kwakutwamba diyi njila yimu yabadika mwadimbilañayi Satana antu. Satana watiyaña muzañalu hama neyi yamona antu anakudifukula kudi ankakulula jawu, yileñaleña, anyama, muntu wudi wejima hela chuma chidi chejima kubadika kudifukula kudi Yehova, ‘wakeñaña kudifukula kudi yena hohu nkawindi.’ (Kwid. 20:5) Niantu adifukulaña kudi Nzambi munjila yayiwahi niwena ayiluwañeshaña nantañishilu yakutwamba niyidika yamukunkulwayi. ‘Mwakabakenañadi hachuma chabulaña kwikutisha? Ntiyililenu chachiwahi, . . . mudiluñishi munyichima nayanuna.’—Isa. 55:2. w15 5/15 1:14, 15

Abeli watela watoñojokeli chikupu hanichi chikaninu nawa welukili nindi kwakekala muntu ‘akachikawu kukatutu’ kulonda antu akekali awanina neyi chadiña Adama naEvu henohu kanda avulumuni. Abeli wakuhweleleli muchikaninu chaNzambi nawa Yehova wetejeli mulambu windi. (Kutach. 4:3-5; Heb. 11:4) Nowa wapulukili haDibaji muloña wadiña nachikuhwelelu. (Heb. 11:7) Chamanini Dibaji, chikuhwelelu chamuleñeleleli kulambula nyilambu yawanyama. (Kutach. 8:20) Kufwana Abeli, chakadi nikujina Nowa wakuhweleleli nindi antu akafuma muwuduñu wanshidi nikufwa. Chamanini Dibaji watachikili cheñi kushakama mukaayi katamini mwadiña Nimirodi wadikañili naYehova, ilaña Nowa watwelekeluhu nachikuhwelelu. (Kutach. 10:8-12) Chakadi nikujina, watiyileña kuwaha kutoñojoka chakalubukawu antu kudi anyuuli ayikabishaña, nshidi yaswaninuwu nikufwa. Anetu nawa tunateli ‘kumona’ yuma yayiwahi yamuchidiwu nawa yidi kwakwihi.—Rom. 6:23. w15 5/15 3:4, 6

Neyi tusweja kudakamena tukukata nawa tukuluwañesha wubwambu wetu naNzambi. Tumukuhwelelenu Yehova nakwanuka mazu adi munsona yefuku dalelu. Tunateli kuzañalala neyi mukwetu watwiluka yatukolesha namazu amawahi. Neyi tuleja anvwali, mwini kwetu, hela ibwambu detu itwakuhwelela nawa wamwakama Nzambi nsañu yinakutukabisha nateli kutukwasha nawa hitukusweja kwakamaku. Kwosi muntu weluka kukala kwetu kubadika chelukayi Yehova. Pawulu wasonekeli nindi, “Bayi mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila. Kuwunda kwaNzambi kwabadika maana ejima kwakahemba nyichima yenu niyitoñojoka yenu mudi Kristu Yesu.” (Fwi. 4:6, 7) Toñojokenu hadi antu anakutukwasha kulonda tubuli kujimbesha wubwambu wetu naNzambi, akwetu akwakwitiya, aeluda, nduñu wakashinshi, añelu, Yesu niYehova yomweni. w15 5/15 4:16, 17

Kuchimunswa chatembeli kwadiña ijiya dateneneñawu nawu Beteseda. Mazaza amaneni awantu akata niayifwayi apompeleleña kwenoku, nakukuhwelela nawu akuyuuka muchihayamisha. Muloña waluwi, Yesu wayili kudi muntu wadiña wakata hayaaka yayivulu kubadika yashakaminiyi Yesu hamaseki. (Yow. 5:6-9) Yesu yamwihuli neyi nakukeña kukola. Wakwili chakubula kuumba mpinji. Iwu iyala wakeñeleña kumuuka, ilaña helukili chakukewayi wanyi muloña hikwadiña muntu wakumukwasha kwiñila mwijiyaku. Dichi Yesu wamulejeli iwu iyala kwila chuma chakala, kusenda chikaña chindi kulonda yendi. Chineli wakuhweleleli mwahosheliyi Yesu, iwu iyala wasendeli chikaña chindi nakutachika kwenda. Ichi chuma chachiwahi chamwekeshaña yuma yikakoñayi Yesu mwituña dadiha. Munichi chihayamisha twamonaña cheñi netu Yesu wekala naluwi. Wakeñeli antu adiña nakukala. Chakutalilahu chaYesu chatusañumunaña kukeñakeña antu mwiluña detu dakushimwina ananeñi muloña wayuma yatama yamwekanaña mukanu kaayi. w15 6/15 2:8-10

Nhoshelu yakwila nawu “Tata yetu,” bayi “Tata yamuku,” yatwanukishaña nawu twekala hakachi ‘kawamana kwetu’ adikeña chikupu. (1 Pet. 2:17) Tukweti kukooleka kweneni. AkwaKristu awayishewa atondawu kwikala anyana kaNzambi akweti chikuhwelelu chakuya mwiwulu, amutenaña Yehova nawu “Tata” namuchima wawu wejima. (Rom. 8:15-17) AkwaKristu akweti kuchiñeja kwakushakama hamaseki haya nyaka niwena anateli kumutena Yehova nawu “Tata.” Diyi Wayinkaña Wumi nawa akwakudifukula indi alala ejima wayinkaña yuma yakeñañawu. Antu akweti kuchiñeja kwakushakama hamaseki akekala anyana kaNzambi chikupu hanyima yakwikala awanina neyi akatwalekuhu kwikala ashinshika hakayesekawu kakukumishaku. (Rom. 8:21; Chim. 20:7, 8) Anvwali ayinkaña anyanawu chawaana chachiwahi neyi ayidizisha chakulomba nikumumona Yehova nawu hiTata wakamenaña wekala mwiwulu. Kwosi chawaana chabadika kulema chinateli kwinkawu anvwali anyanawu, kubadika kuyikwasha kulonda ekali nawubwambu wawuwahi naYehova. w15 6/15 4:4-6

Hakwila twileña yuma kwesekeja nakulomba kwakwila nawu ‘twamwini kudi watama,’ twatela kufwila kubula kwikala “ampata yamunu mwishina [yaSatana].” Hitwatela ‘hela kukeña mpata [yaSatana] yamunu mwishina, hela yuma yamunu mwishinaku.’ (Yow. 15:19; 1 Yow. 2:15-17) Twatela kutwalekahu kuzata nañovu hakwila twili mwenimu. Twakazañalala hampinji yakakulayi Yehova kulomba kwetu kuhitila mukumufumishahu Satana nikaayi kindi katama. Hela chochu, twatela kwiluka netu, chamunatililuwu Satana hanu hamaseki welukili nindi wadiña nakapinji kantesha. Chineli wahila, wazataña hakumina ñovu jindi kulonda tufumpi kashinshi ketu. Dichi twatela kulomba mpinji yejima hakwila atwamwini kudi iwu watama. (Chim. 12:12, 17) Komana wafwilaña kumona iyi yuma chiyikashikijewa? Dichi twalekakuhu nakulomba neyi Wanta waNzambi wujiliki ijina daNzambi nakuleñela nkeñelu yindi kuyila hanu hamaseki. Talaku kudi Yehova kulonda yakakwinki yuma yakuspiritu niyakumujimba yiwakeñaña. Eñañi, fwilaku kwila yuma kwesekeja nakulomba kwachitalilu.—Mat. 6:9-13. w15 6/15 5:12, 17, 18

Hela chakwila hituneluki jiika yuma yejima yikamwekana hayina mpinji yakwesekaku, tunateli kukuhwelela netu twatela kudihana muyuma yikwawu. Muyaaka nkulakaji yakusambila, akwaKristu ashili yikumba yawu nakutatakena hakwila ahandi. (Maku 13:15-18) Hakwila tutwalekuhu kwikala ashinshika, komana twaketeja kujimbesha maheta? Komana twakadiloñesha kwila yuma yejima yikakeñeka kulonda twakamwekeshi netu twamwovwahila Yehova? Toñojokenu chumichi. Haniyi mpinji, yetu hohu twakalondelaña chakutalilahu chakaprofwetu wakushankulu Danyeli kuhitila mukutwalekahu kudifukula kudi Nzambi yetu hela chakwila yuma yikakala. (Dan. 6:10, 11) Iyi hiyakela mpinji yakushimwina ‘nsañu yayiwahi yaWantaku.’ Mpinji yakushimwina yikekala yahita dehi. Mpinji ‘yakukumisha’ yakashika. (Mat. 24:14) Chakadi nikujina, antu jaNzambi akashimwina nsañu yawunsompeshi chakadi woma. Nsañu yeniyi mukabombela nikubidika kwakwila nawu kaayi kaSatana katama keña kamani. w15 7/15 2:3, 8, 9

Hitwatela kuhayamaku neyi kaayi katuhela hamuloña wakwikala ambukaku; Yesu watusoñamishili nindi akatuhela. Akwakudimbulula amavulu hiyeluka chalemeshawu akwaKristu kubula kudiñija munsañu jamatuña nachiyuuluku. Ilaña etu twayilemesha iyi nsañu chikupu. Hakwila twikali ashinshika kudi Yehova, twatela kumwovwahila hela chakwila tunamoni kukala kweneni. (Dan. 3:16-18) Antu ejima achinaña, ilaña atwansi chayikalilaña nankashi kwikala ambukaku hakachi kawakwawu. Neyi anyanenu anakumona kukala kudi neyi kubuzwila mpandela hela kwanakana mafuku amukaayi, bayi mushintajala kuyikwashaku. Zatishenu progiramu yaKudifukula kwaChisaka kulonda mukwashi anyanenu kwiluka yuma yabombelamu kulonda alumbululi yuma yakuhwelelawu chakadi woma. Yikwashenu alumbululi chiwahi nawa nakalemesha. (Rom. 1:16) Hanjekenu nawantañishi jawu neyi chinatwesheki. w15 7/15 3:15, 16

Atwinkeli chawaana chalema chamulambu wefutu danyiloña wahaniniyi Yesu kulonda ‘tuhandi.’ (1 Yow. 4:9) Hakuhosha hakukeña kwaNzambi kwabadika, kapostolu Pawulu wasonekeli nindi: ‘Hashikili mwaka watelela, Kristu wafwilili adiwula Nzambi. Kufwila muntu waloña chakala, ilaña muntu wamuwahi, kwiji kukumwekana wumu wukubula woma wakumufwila. Ilaña Nzambi wamwekeshaña kukeña kwindi yomweni kudetu, hohitwachidiñi akwanshidi Kristu watufwilili.’ (Rom. 5:6-8) Iku kukeña kwaNzambi kwasweja kwaleñeleli antu kwikala nawuselewa waYehova. Kuhitila mwifutu danyiloña, Yehova wayimwekeshelaña antu kukeña. Neyi twakuhwelela kushakama hamaseki haya nyaka nawa tutwalekahu nakumuzatila Nzambi nakashinshi, twatela kwiluka chikupu netu Nzambi wakatwinka chihandilu chachiwahi mwituña dadiha. Chikusweja kuwaha neyi tukumonaña ifutu danyiloña netu hiwunsahu waweni wamwekeshaña kukeña kwaNzambi kwabulaña kumana. w15 8/15 1:13, 15

Hakwila twakekali nakukooleka kwakushakama muchiyuulu chaWanta waNzambi, twatela kuzata nañovu kulonda tuzatileña hamu nakuloñesha kwaYehova nikuzata nyidimu yaNzambi. Hela chochu, chihandilu chetu chinateli kuhimpika. Chakutalilahu, amana kwetu niahela amakwawu adiña muchisaka chaBeteli chamuUnited States ayinka cheñi kuzata mudimu wakushimwina nawa anakudiluñisha nkisu jajivulu munyidimu yampinji yejima. Hamuloña wakukula kumujimba hela yuma yikwawu, amana kwetu amakwawu adiña mumudimu wawunkoñi wañinza anayihimpi nakwikala apayiniya adimena. Neyi tukuzañalalaña nayuma yitukweti, kulomba wukwashu kudi Nzambi nikuzata hakumina ñovu jetu mumudimu windi, tukwikala namuzañalu nawa tukutambwila nkisu jajivulu hela chakwila tudi mumafuku akukuminina akala. (Yish. 10:22) Indi yuma yitwachiñililaña yakekala ñahi kumbidi? Tunateli kufwikija iluña ditwakakeña kushakama mwituña dadiha, ilaña anateli kutuleja kuya kwiluña dacheñi. Hichidi namuloña nakwiluña kutwakazatilaña nimudimu wutwakazatañaku, ilaña twatela kwiluka netu twakatiyaña kuwaha nayuma yitukekala nayu nawa tukazañalalaña chikupu. w15 8/15 3:8

Nowa washakamineña mwituña datama, ilaña wakeñeleña wanyi kudikunda nawantu ashakamineñamu. Hakeñeleña kudikunda nawantu abulileña kumwakama Nzambuku. Yena nichisaka chindi chawantu atanu nayedi adikitileña mudimu wayinkeluwu kudi Nzambi kushilahu nikutuña watu. Hampinji yoyimu, Nowa wadiña cheñi “mukwakushimuna kuloña.” (2 Pet. 2:5) Muloña wakwila Nowa wadiña nakushimwina, kutuña watu nikudikunda nachisaka chindi, yumiyi yamuleñeleli kwila yuma yayiwahi yamuzañalesheleña Nzambi. Chumichi chaleñeleli Nowa nichisaka chindi kupuluka Dibaji. Twatela kuyisakilila muloña wejima wetu makonu twafuma kudi antu apulwishiluwu kudi Yehova, Nowa washinshika, ñoda Nowa, anyanindi niañodijawu. Chochimu, akwaKristu ashinshika nawa ovwahila amuyaaka nkulakaji yakusambila atwalekeluhu nakubula kudibomba nawantu abulileña kumwakama Nzambi nawa apulukili chajilumwinuwu Yerusalema nichiyuulu chawaYudeya mu 70 C.E.—Luka 21:20-22. w15 8/15 4:17, 18

Bayi neyi mpinji yejima yakunooka yekala yayiwahi hela yatukwashañaku. Hitwatela kumanisha mpinji yeneni hampinji yakunookaku. Chinleji chetu chinateli kutukwasha ñahi kudiluñisha mpinji yakunooka nikuhetela muyuma yetejayi Yehova? Bayibolu yatusoñamishaña kubula kudiñija ‘munyidimu yachisemwa chaheseki.’ Iyi nyidimu yabombelamu “wuvumbi, wuzondu wamumuchima, kufwila yatama, kupesha, kupanda, kuhelañana, kuzuña, ichima, madombu, kukokwela kwenu, kudambola, kwitiya nsañu yaheña, lwisu, kusheta, yisela, niyuma yidi neyi iyi.” Pawulu wasonekeli nindi, “antu akwila mwenimu hiyamba kaswana wanta waNzambuku.” (Ŋal. 5:19-21) Dichi twatela kudihula netu: ‘Komana chinleji chami chankwashaña kutondolwela yisela yamandombu, kudibecha hela kukeña nankashi ituña? Komana chinleji chami chankaanishaña kutala filimu mudi nyevulu yanzekesi hela yinakuhosha hayililu yatama yidi neyi wuvumbi, kusheta hela kupesha?’ w15 9/15 2:11, 12

Bayibolu yahoshaña nawu Nzambi watuleñeli wanyi nawuswa wakufukula kwila yuma yatama niyayiwahi. Yehova weluka yuma yatela kutukwasha. Tunateli kudiluñisha wumi nikwikala mukuwunda neyi twiteja wunlomboli windi nikumwovwahila. Yehova watuleja iyi nsañu muloña watukeña. Tata yawantu wukweti kukeña watoñojokaña chikupu yuma yikayikwasha anyanindi kumbidi. Wakeñaña akekali nachihandilu chachiwahi. Chawushona, antu amavulu makonu akamaña hachikekala chihandilu chawu kumbidi hela ombaña mpinji yawu nakuzatila yuma yabulaña kushimbula. (Mas. 90:10) Tata yetu, Yehova watuleja chakushakama chachiwahi nawa watukana yuma yayiwahi kumbidi! w15 9/15 4:10, 11

Kunyima, antu adiña nakukooleka kwakumona nikutiya chayikwashileñayi Nzambi aIsarela. Yehova wazatishileña yihayamisha kupulwisha antu jindi muEjipitu nikushinda anyanta Mwituña daChikaninu. (Yosh. 9:3, 9, 10) Hela chakwila anyanta amakwawu atiyili nikumona Nzambi chapulwishiliyi antu jindi, ‘apompeli namuchima wawu wumu nawu akalwi naYoshuwa naIsarela.’ Ayilumbu awaIsarela ayishindili muloña akaanini kweteja nawu Yehova wadiña nakuyizuñilaku antu jindi. Kuhiñahu, Mwanta watama Ahabi niyena wadiña nakukooleka kwakumona ñovu yaNzambi. Ahabi wamweni chumichi. Dichi, Elija wamulejeli Ahabi nindi Yehova wukumanisha chaaña nawa wukunokesha nvula. (1 Anya. 18:22-45) Ahabi wamweni yihayamisha yejimiyi ilaña wakaanini kumona ñovu yaYehova. Yumanyi yitukudizila kuniyi yuma yamwekeni? Twatela kumona chatukwashañayi Nzambi. w15 10/15 1:4, 5

Bayi tujinooka netu Yehova hanateli kutukwashaku neyi tulondelaña wunlomboli windi. Dimuloña wutwatelela kwikalila nachikuhwelelu chakola mudi Muntu wunateli kutukwasha chikupu. Pawulu watwanukishaña nindi Nzambi “natweshi kwila chakubadika nankashi mutukulomba hela mutukutoñojoka mwejima, mwesekela ñovu yakoñaña mudi etu.” (Efwes. 3:20) Ambuña aYehova azataña nañovu hakwila nkeñelu yaNzambi, hela chochu eluka nawu awanina wanyi. Twamusakililaña Nzambi chekalayi nanetu nichatukiswilañayi. Tunateli kukuhwelela netu kulomba kwetu kwakutuvulishila chikuhwelelu akakwakula? Yehova watuleja nindi nateli kutwakula neyi “tukulomba chuma chamwaya muchima windi.” (1 Yow. 5:14) Neyi tumukuhwelela chikupu Yehova, wukutiya kuwaha. Wakakula kulomba kwetu, chikuhwelelu chetu chikakola nawa twakekala ‘atelela wanta waNzambi.’—2 Tesa. 1:3, 5. w15 10/15 2:16-18

Kutoñojoka hadi Yehova niYesu kunateli kukwasha muntu kwikala mukwaKristu wapama nikwikala nachikuhwelelu chakola. (Heb. 5:14; 6:1) Muntu wabulaña kutoñojoka chikupu hadi Nzambi wajimbeshaña wubwambu windi naYehova chovu-chovu hadaha nateli nikukaana Nzambi. (Heb. 3:12) Yesu wasoñamishili nindi neyi tubula kutiya hela kutambwila Izu daNzambi “namuchima wawuwahi walumbuluka,” ‘twakadikwata’ wanyi nañovu. Ilaña ‘kwakama, nimaheta, nikutiya kuwaha nayuma yawumi wunu, kukutujika.’ (Luka 8:14, 15) Dichi tutwalekenuhu kutoñojoka haBayibolu kulonda tumwiluka chiwahi Yehova. Neyi tumwiluka chiwahi chikutukwasha kwimbujola chikupu yililu yindi nichekalayi. (2 Kor. 3:18) Tunateli kutwalekahu kudiza hadi Tata yetu wamwiwulu nikumwimbujola haya nyaka. Chumichi chatuzañaleshaña hama!—Mukwa. 3:11. w15 10/15 4:13, 14

Hamu neyi anvwali, mwakeñaña anyanenu kwikala nawubwambu naYehova. Nawa Yehova nakukeña nindi mudizishi anyanenu nikuyifumba. Wayinka iwu mudimu. (Efwes. 6:4) Dichi mwatela kushaku maana chikupu kudizisha anyanenu mpinji yejima. Toñojokenu hachumiche: Mwatwalaña anyanenu kushikola muloña mweluka nenu shikola yalema nawa munakukeña nenu akatañi. Munjila yoyimu, mwatela kuleja anyanenu ayeña nakupompa, kupompa kwañinza nikudifukula kwachisaka. Muloña yuma yayidizishañayi Yehova yikayikwasha kupuluka. Dichi yikwashenu amwiluki Yehova nikwiluka nawu nateli kuyidizisha kwikala namaana. Dizishenu cheñi anyanenu kushimwinaña mpinji yejima. Imbujolenu Yesu kuhitila mukukwasha anyanenu kudizisha antu Izu daNzambi. w15 11/15 2:6

Hamuloña wakwila Nzambi wenkamu nshimbi muntanjikilu yawulu, kukeña dichuma chalema. Ilaña wumutu bayi wikala wakuditiya nawuku. Hela chakwila iyala diyi mutu wamumbanda, Bayibolu yalejaña iyala kulemesha ñodindi. (1 Pet. 3:7) Iyala nateli kulemesha ñahi ñodindi? Nateli kutoñojoka hayuma yinakukeña ñodindi nikulemesha chinakukeñayi. Bayibolu yahosha nawu: “Enu amayala, keñenu añodi jenu neyi chakeñeliyi Kristu chipompelu, hakudihanahu yomweni kuchikoola.” (Efwes. 5:25) Mwamweni, Yesu wahanini wumi kukoola atumbanji twindi. Neyi iyala wukweti kukeña neyi Yesu, mumbanda wukumukeña nikumulemesha nawa wukulondelaña munafuukuliyi.—Tit. 2:3-5. w15 11/15 4:6, 7

Chatandili wuKristu, akwaKristu ahosheleña chiGiriki. Nyikanda yaNsañu Yayiwahi yaMatewu, Maku, Luka niYowanu mwadiña nsañu yonenawu yayuma yahosheliyi Yesu nikwila, ayihanineña muchiGiriki. Dichi, atumbanji amavulu ahosheleña chiGiriki bayi chiHeberuku. Nyikanda yakapostolu Pawulu ninyikanda yikwawu yonenewa ayisonekeli muchiGiriki. Ansoneki aNyikanda yawakwaKristu yachiGiriki neyi anakukeña kusoneka mazu amuNyikanda yachiHeberu, afumishileña muSeptuagint. Mpinji yikwawu, nsañu yafumishileñawu muniyi nyikanda yambukileñaku nansañu yayeni yadiña muchiHeberu. Dichi Bayibolu yitukweti makonu mwekala tuyiluwa twawakwakubalumuna. Ichi chinakutudizisha nawu Yehova hamonaña idimi hela chisemwa chimu nindi chabadika chikwawuku.—Yil. 10:34. w15 12/15 1:8, 9

Mpinji yikwawu twatela kumwena. Bayibolu yahoshaña nawu kwekala “mpinji yakumwena.” (Mukwa. 3:7) Chakutalilahu, twamwenaña neyi akwetu anakuhosha kulonda tumwekeshi kalemesha. (Yoba 6:24) Cheñi, twahoshaña wanyi nsañu yakujinda. (Yish. 20:19) Neyi muntu yatuhilisha, chikuwaha neyi tukuwundisha mumesu nawa tubula kuhoshahu. (Mas. 4:4) Ilaña mpinji yikwawu twatela kuhosha. (Mukwa. 3:7) Neyi ibwambu denu yayinka chawaana, namoni mukuchisweka wanyi. Ilaña, mukumwekesha muchima wakakilila kuhitila mukuchizatisha. Ninetu twatela kuzatisha idimi chiwahi, muniyi njila tunakuhameka kudi Yehova. Tukuhoshaña nsañu yitunakutoñojoka, yuma yitunakaankili, kukolesha akwetu nikumushimeka Yehova. w15 12/15 3:4, 5

Makonu, amanakwetu hiyanateli kutuuka muchihayamishaku. (1 Kor. 12:9) Ilaña hakufwila kutukwasha, anateli kutuleja chakwila hela tunayilombi wukwashu wanyi. Mwatulejañawu akwetu mwatama wanyi. Chakutalilahu, Pawulu wamulejeli Timotewu kunwaña vinyu. Timotewu wakatileña mwivumu, hadaha wanwineña menji amajilu. Manakwetu nateli kutukanjikija kuzatisha yitumbu yelukayi hela kutuleja kuda hela kuleka kuda yakuda yimu. Nateli kutuleja nindi yakwashili ntaña yidi wadiña nakukala kwokumu. Ilaña hichinayi mukwila nawu yinateli kuyikwasha ninenu. Twatela kwanuka netu hela chakwila antu amavulu azatishaña oyu yitumbu hela njila yakuyuukilamu, ilaña yinateli kutuletela kukala kweneni.—Yish. 27:12. w15 12/15 4:13

Wejima wetu twaswana nshidi kufuma kudi Adama, nawa wufwetu wanshidi hikufwa. (Rom. 5:12) Kukeña kwamusañumwini Yehova kutuma Yesu hamaseki nakufwila antu ejima, ‘kutompela antu ejima kufwa.’ (Heb. 2:9) Nawa mulambu waYesu wakakoña yuma yayivulu. Wakafumishahu kufwa haya nyaka. (Isa. 25:7, 8; 1 Kor. 15:22, 26) Antu ejima akumukuhwelela Yesu akekala mukuwunda nawa akazañalala haya nyaka, chili akayuula neyi anyanta naKristu mwiwulu hela neyi antu akayuulawu hamaseki kudi Wanta waNzambi. (Rom. 6:23; Chim. 5:9, 10) Nkiswinyi yikwawu yabombela muchawaana chaYehova? Chawaana chaNzambi chikaleta paradisa hamaseki, kuuka akata nikusañula afu. (Isa. 33:24; 35:5, 6; Yow. 5:28, 29) Twamusakililaña Yehova nimwanindi Yesu hakutwinka ‘chamukunkulu chakañanya kushimunewa.’—2 Kor. 9:15. w16.01 2:5, 6

Henohu Yehova kanda yatondi awa akwaKristu kuya mwiwulu, awayishewa adiña nachikuhwelelu chakushakama hamaseki haya nyaka. Atalileña mpinji yakelishayi Yehova iseki kwikala paradisa nikufumishahu kutama kwejima. Hadaha afwikijileña chiyakatambwilaña antaña jawu hela amabwambu afwili. Adiña nakutalila mpinji yakatuñawu matala nikushakamamu hela kutumba nyitondu nakuda nyikambu yachu. (Isa. 65:21-23) Muloñadi chahimpilañawu yitoñojoka yawu? Ahimpili muloña wakwila aneñeleña hela kukabakana nankashi? Komana afuukwili hohu nawu kushakama haya nyaka hamaseki kukaletaña wuudi nawa hiyakekalaña namuzañaluku? Tahindi akeñeleña kwiluka chichatiyakanaña kushakama mwiwulu? Inehi. Nzambi diyi wayifuukwilili. Chayitambikiliyi, wazatishili spiritu yajila kuhimpa chatoñojokeleñawu niwuloku watalilileñawu. w16.01 3:11, 13

Yehova wabadika. Waleñeli yuma yejima, nawa wekala namaana niñovu yasweja. Chelili namukwashi dehi Yoba kwiluka yumiyi, Yoba wahosheli nindi: ‘Neluki nami wunatweshi kwila yuma yejima; nami hikudi wunatweshi kukulekesha muwunatondi kwilaku.’ (Yoba 42:2) Yehova nateli kwila yuma yejima yinakeñi kwilayi chakadi kumukwasha. Ilaña wamwekeshaña kukeña hakuleja antu kulonda azati nindi hakushikija nkeñelu yindi. Yehova waleñeli Mwanindi Yesu, henohu kanda yaleñi yuma yejima. Kuhiñahu, Yehova wamulejeli Mwanindi kumukwasha kuleña yuma yejima. (Yow. 1:1-3, 18) Dichi, Yehova wamwinkeli Mwanindi mudimu walema nawa walejeli antu mudimu wazatañayi Yesu. Iku hikukooleka kweneni.—Kol. 1:15-17. w16.01 5:1, 2