November

Neyi tutaña netu Abarahama wadiña ‘kashinakaji wanyaka nanyaka,’ bayi tutoñojoka netu washinakajili chakwila hakeñeleña kuhandaku. Bayibolu yahosha nawu Abarahama “wadiñi nakutalila ñanda yikweti yikuku, yakwila mukwakuyipima nikuyituña yowu Nzambi.” (Heb. 11:10) Abarahama wakuhweleli nindi ifuku dimu wakamona iyi ñanda, Wanta waNzambi, wakayuulaña hamaseki. Mwalala wakayimona! Fwikijenu muzañalu wakatiyayi Abarahama kushakama muparadisa hamaseki nikutwalekahu kukolesha wubwambu windi naNzambi. Wakazañalala chikupu hakwiluka nindi chikuhwelelu chindi chinakwashi ambuña aNzambi hayaaka yayivulu. MuParadisa wakeluka nindi mulambu wahaMpidi yaMoriya wemeneneñaku mulambu wabadika kulema. (Heb. 11:19) Nawa wakeluka nindi chichamukatili kumuchima hakulambula mwanindi Isaka chinakwashi yihita yawantu kwiluka chichamukatili Yehova kumuchima hakuhana Mwanindi, Yesu Kristu, kwikala ifutu danyiloña dawantu.—Yow. 3:16. w16.02 1:15, 16

Tunateli kwikala cheñi ashinshika kudi Yehova neyi manakwetu wunakulombola natwili katama. Mwanta Sawulu amutondeli kudi Nzambi, ilaña wamwilili chatama mwanindi wakudivwalila. Welukili wanyi chaletesheli Jonatani yamukeñi Davidi. Dichi chelili Jonatani nindi yamukwashi Davidi, Sawulu watiyili kutama nawa wamutiyishili mwanindi nsonyi hakachi kawantu. Ilaña Jonatani watwalekeluhu kumulemesha tata yindi. Hampinji yoyimu, wekalili washinshika kudi Yehova nikudi Davidi atondeluwu kudi Nzambi kwikala mwanta wawaIsarela. (1 Sam. 20:30-41) Muyipompelu yetu makonu, amanakwetu anakulombola azataña nañovu hakwila ekali chiwahi kudi ejima. Ilaña awa amanakwetu awanina wanyi. Chineli awanina wanyi, chinateli kuyikalila kwiluka chinaleteshi twili yuma yituneli. (1 Sam. 1:13-17) Dichi neyi atwila katama, twatela kwikala ashinshika kudi Yehova. w16.02 3:14, 15

Atwansi amakwawu eluka wanyi chaambu chekala hakudihana nakupapatishewa. Amakwawu anateli kuhosha nawu adihana kudi Yehova ilaña anadiloñeshi wanyi kupapatishewa. Komana muntu nateli kudihana chakadi kudiloñesha kupapatishewa? Kudihana hikumuleja Yehova mukulomba nenu mukumukalakelaña haya nyaka. Dichi chimwapapatishewa, mukumwekesha kudi antu nenu mwadihana dehi kudi Yehova. Ilaña, henohu kanda mupapatishewi, mwatela kwiluka chichalumbuluka kudihana kudi Nzambi. Neyi mudihana kudi Yehova dikwila nawu munakumuleja nenu ichi mukwikalaña kukabadi kindi. Munakani nenu kumukalakela dichuma chimukulemeshaña nankashi muchihandilu chenu. Mwatela kushikija mumunamukani Nzambi.—Mat. 5:33. w16.03 1:14, 15

Pawulu wayilumbulwili akaAefwesesa chatela kuzatila hamu chipompelu, nawa wayilejeli nindi antu ejima muchipompelu atela kukula “muyuma yejima.” (Efwes. 4:16) Dichi, hela tudi atwansi hela akulumpi, twakola kumujimba hela nehi, chumanyi chitwatela kwila wejima wetu? Yesu watonda aeluda kulonda alomboleña muchipompelu, nawa wakeñaña nindi wejima wetu tuyilemesheña nikulondela munakutulejawu. (Heb. 13:7, 17) Kwila mwenimu kwakala. Ilaña twatela kulomba Yehova netu yatukwashi. Spiritu yajila yinateli kutukwasha kwovwahila mwejima mwanatulejiwu aeluda. Toñojokenu cheñi chimunateli kuleta kunuñañana muchipompelu neyi mwadizoza nawa mwazatilaña hamu nawaeluda. Chipompelu chikwikala chanuñañana nawa kukeña kwetu kukuswejelaku. w16.03 3:8, 9

Hampinji yakulileñawu, amanakwetu atwansi amakwawu hiyayikwashileña kufwila yuma yakuspirituku. Atwansi amuchidiwu hiyalemesheli chalala muchihandilu chawu chikupuku. (Mat. 10:24) Dichi, eluda watela kwikala nampinji yakwikala nawubwambu namanakwetu wunakukeñayi kudizisha kuzata nyidimu yamuchipompelu nawa watela kumuleja nindi niyena wukweti mudimu muchipompelu. Dichi mukuhita kwampinji, eluda watela kuhanjeka namanakwetu hansona jamuBayibolu nikumukwasha kulonda atoñojoki hakudihana kwadihaniniyi kudi Yehova. (Mukwa. 5:4; Isa. 6:8; Mat. 6:24, 33; Luka 9:57-62; 1 Kor. 15:58; 2 Kor. 5:15; 13:5) Eluda nateli kumwihula nindi, ‘Yumanyi yiwamukanini Yehova hampinji yiwadihanini kudi yena?’ Munateli kweseka kusañumuna muchima windi kuhitila mukumwihula nenu, ‘Wunakutoñojoka neyi Yehova watiyili ñahi chiwapapatisheweli?’ (Yish. 27:11) ‘Indi Satana watiyili ñahi?’ (1 Pet. 5:8) Aeluda atela kudiwula wanyi yuma yikufuma mudi mana kwetu neyi amutañila chiwahi nsañu yamuBayibolu. w15 4/15 2:9, 11

Muloñadi Yehova chabulilañayi kutwinka hohenohu yuma yejima yitwamulombaña? Anukenu nenu wesekejaña wubwambu wetu nayena nawubwambu wekala hakachi kawanyana natata yawantu. (Mas. 103:13) Mwana hanateli kukuhwelela nindi nvwali wukumwinka chuma chejima chinalombiyi hela kumwinka yoyenoyu mpinjuku. Yuma yikwawu yalombañawu anyana hiyayikeñaku. Amakwawu ahembelelaña kulonda ayinki hampinji yatelela. Ilaña yuma yikwawu yalombaña mwana hiyinateli kumukwasha yena hela akwawuku. Cheñi nawa, neyi nvwali yamwinkaña mwana yuma yejima yikukeñayi hohenohu chumichi chikuleñela wubwambu wawu kuhimpika nakwikala neyi wamwanta nanduñu, mwana wukwikala mwanta. Munjila yoyimu, Yehova nateli kuhitishahu mpinji henohu kanda yatwinki yuma yitwamulombaña. Iyi diyi ñovu yikwetiyi Nleñi yetu wukweti maana, Mwanta wakukeña nawa Tata yetu wamwiwulu. Neyi atwinka yuma yitwakeñaña hohenohu, wulunda wetu naNzambi wukuluwankana.—Isa. 29:16; 45:9. w15 4/15 4:6, 7

Hampinji yitunakuswila kwakwihi nakukuma kwanyaka yamakonu, Satana nakukeña nindi tubuleña kwikala atona, ‘kubula kudakamenaña’ nikutuleñela kusha maana kuyuma yamukaayi. Bayi mwiteja yumiyi yiyimwekenuku! Dichi, ‘twalekenuhu kwikala atona.’ (Mat. 16:22, 23; 24:42) Bayi mwitejaña nsañu yakutwamba yashimunañayi Satana yakwila nawu kukuma kwanyaka yinu kuchidi kwakulehi, hela nawu hikwamba kenzaku. Satana wafwilaña tukuhweleli netu Nzambi hatukeñaku nawa hanateli kutwanakena nshidi jetuku. Awa himakudi aSatana. Kuhosha hohu chalala, hinyi ahelawu chikupu kudi Yehova? Satana diyi. Hinyi akabula kwanakenawu chikupu? Satana diyi cheñi. Ilaña Bayibolu yatushiika nawu: “Nzambi waloña, hakavulamena mudimu wenu hela kukeña kumwakeñeli ijina dinduku.” (Heb. 6:10) Yehova watiyaña kuwaha chitwazataña nañovu kulonda tumuzañalesheña nawa mudimu wetu hiwamba kaya mumenjuku. (1 Kor. 15:58) Dichi bayi atudimba namakudi aSatanaku. w15 5/15 1:16-19

Abarahama wadiña nawunsahu wawuvulu wakumwekesha nindi yuma yachiñejeleñayi yalala chakwila wadiña neyi nakumona yuma yabulili kumonayi. Muloña Abarahama wakuhweleleli yikaninu yaNzambi, chumichi chamukolesheli kwila nkeñelu yaNzambi. Wafumini mumusumba waUri muloña wakwikala nachikuhwelelu nawa wakaanini kushakama munyisumba yejima yamuKenani. Kufwana antu amuUri, antu amuKenani hiyadiña nachikuhwelelu chakolaku muloña ayiyuulileña kudi antu abulileña kumwakama Nzambi. (Yosh. 24:2) Muchihandilu chindi chejima, Abarahama “wadiñi nakutalila ñanda yikweti yikuku, yakwila mukwakuyipima nikuyituña yowu Nzambi.” (Heb. 11:10) Abarahama ‘wadimweni’ nakushakama mwiluña dadiwahi dinakuyuulawu kudi Yehova. Abeli, Enoki, Nowa, Abarahama niantu amakwawu adiña neyi wena akuhweleleli mukusañuka kwawafu nakutalila wumi hamaseki muchiyuulu chaWanta waNzambi, ‘ñanda yikweti yikuku yalala.’ Kufwikija hankisu jamuchidiwu kwakolesheli chikuhwelelu chawu mudi Yehova.—Heb. 11:15, 16. w15 5/15 3:8, 9

Yehova wamwekesheli ñovu jindi kuhitila mudi Yesu Kristu munjila yakuhayamisha. Nyikanda yaNsañu Yayiwahi yiwana yashimuna yuma yakoleshaña chikuhwelelu kutalisha hayihayamisha yikwawu yakoñeliyi Kristu. Chakadi nikujina, wakoñeli yihayamisha yikwawu yayivulu. (Mat. 9:35; Luka 9:11) Eñañi, ñovu jaNzambi jamwekeneni mudi Yesu. Dichi chaletesheli kapostolu Pawulu yahoshi hadi Yesu nindi: “Kristu diyi ñovu yaNzambi.” Hanu dinu, yihayamisha yaYesu yatudizishañadi muchihandilu chetu? Kapostolu Petulu wahosheli nindi Yesu wakoñeli “yihayamisha.” (Yil. 2:22) Nyidimu yañovu yakoñeliyi Yesu hamaseki yemeneneñaku yuma yamaneni yakelayi muchiyuulu chindi. Yemenañaku yihayamisha yakakoñayi Yesu mwituña dadiha daNzambi heseki dejima. Yihayamisha yindi yatukwashaña cheñi kwiluka chikupu yililu yindi niyaTata yindi. w15 6/15 1:1, 2

Chelili yeluki nindi Tata yindi, Yehova diyi wunamuuki iwu mumbanda, Yesu wahosheli nindi munjila yayiwahi nindi: ‘Eyi mwanami, chikuhwelelu cheyi chinakukoleshi dehi; yaña nakuwunda, musoñu weyi wukufumi.’ (Maku 5:34) Yesu wukweti luwi hama. Tuneluki netu wadiña wakeña antu akabakeneña nayikatu. Satana wakeñaña kutushinjila kulonda tutoñojokeña netu atukeña wanyi nawa tudi amukunkulwayi. Yihayamisha yakoñeliyi Yesu yamwekeshaña hatooka to-o nawu watwakamenaña etu nikukala kwetu. Tukweti Mwanta nawa Kapristu Muneni wukweti luwi. (Heb. 4:15) Chapela wanyi kwiluka chatiyañawu antu ayekelaña nayikatu, sweje-e neyi kanda tukateñahu dehi yikatu yamuchidiwu. Twatela kwanuka netu Yesu watiyilileña luwi antu akata hela chakwila yena hakatiluhuku. Chakutalilahu chaYesu chatuleñelaña kuzata hakumina ñovu jetu kulonda tutiyili antu luwi.—1 Pet. 3:8. w15 6/15 2:11, 12

Tukweti kukooleka bayi neyi kwakwiluka ijina daNzambi hohuku, ilaña kwakwikala “antu ambala ejina dindi.” (Yil. 15:14; Isa. 43:10) Twamulombaña Tata yetu wamwiwulu netu: ‘Ijina deyi adijiliki.’ (Mat. 6:9) Neyi mulombaña muniyi njila chikuyileñela kulomba nenu Yehova yayikwashi kulonda mubuli kwila hela kuhosha yuma yidi yejima yikuleta kasawuntu hejina dindi dajila. Hitwakeñaña kwikala neyi chadiñawu antu amuyaaka nkulakaji yakusambila abulileña kwila yuma yatañishileñawuku, neyi chinashimunuwu munsona yalelu. Yumanyi yakeñekaña hakwila ijina daNzambi adijiliki chikupu nikufumishahu kasawuntu kejima? Hakwila chumichi chizatiki, Yehova watela kufumishahu antu ejima adikañaña nachiyuulu chindi mumushikila. (Ezek. 38:22, 23) Antu akekalaña awanina chovu-chovu. Twatalilaña mpinji akajilika antu ejima niañelu ijina daYehova. Nkumininaku, Tata yetu wamwiwulu wukweti kukeña ‘wakekala diyi hohu kanka windi chikupu, mwejima.’—1 Kor. 15:28. w15 6/15 4:7, 10

Kubombela hakutena iseki, izu dakwila nawu ‘itanda dakunyendu’ adizatisha cheñi muchifwikija Munyikanda Yajila yaChiheberu hakulumbulula tembeli yakushankulu yazatishileñawu aIsarela. (1 Kushi. 28:2; Mas. 132:7) Tembeli ayizatishileña hamaseki neyi iluña dakudifukwila kudifuukula kwalala. Diwu muloña waletesheli yikali yasweja kuwaha kumesu aYehova nawa iyi tembeli yalemesheleña iluña danyendu yaYehova. (Isa. 60:13) Hamaseki makonu hihekala tembeli yayeni yakudifukwila kudifukula kwalalaku. Hela chochu, kwekala tembeli yakuspiritu yamulemeshaña Yehova kubadika matala ejima. Iyi ntanjikilu yaleteshaña chikali chaswayi kutiyañana naNzambi kuhitila muwupristu nimulambu waYesu Kristu. Yekaliliku mu 29 C.E. hamupapatishiluwu Yesu nikumuwayisha neyi Kapristu Muneni watembeli yaYehova yeneni yakuspiritu.—Heb. 9:11, 12. w15 7/15 1:1-3

Iyi yakekala mpinji yakwinka wuloku antu ashinshika nikubabesha antu abula kushinshika. (Mat. 24:46, 47, 50, 51; 25:19, 28-30) Kwesekeja naMatewu, Yesu wamanishili kuhosha hachinjikijilu chikweti yuma yashiyashana nachishimu chawanyikoku nawampembi, nindi: ‘Ilaña chakenzayi Mwana kamuntu nalubanji lwakulema kwindi, hamu nawañelu jindi ejima, wakashakama hetanda dawanta dakulema kwindi. Akapompesha nyunza yejima kumesu indi; wakaambola munza namunza, neyi chaambulañayi kabiña anyikoku nawampembi. Anyikoku wakayisha kuchikasa chindi chachidiilu, ampembi kuchimunswa.’ (Mat. 25:31-33) Indi anyikoku niampembi akayiketwila ñahi nyiloña? Ichi chishimu chamana namazu akwila nawu: “Wenawa [ampembi] akaya kwawu mukubabesha kwahaya nyaka; aloña akaya muwumi wahaya nyaka.”—Mat. 25:46. w15 7/15 2:11, 12

Chalala twakeña ituña detu, chisemwa, idimi detu niyakudya yamwituña mutwakulila. Hela chochu, hitwatela kwikala nayililu yakwila nawu “yuma yamwituña detu yayiwahuku.” Yehova waleñeli yuma yayivulu yashiyashana yatutiyishaña kuwaha. (Mas. 104:24; Chim. 4:11) Muloñadi chitwatela kuhoshela netu njila yimu yakwililamu yuma yabadika yikwawu? Nzambi wakeñaña nindi antu ejima eluki nsañu yalala chikupu kulonda akaheti wumi wahaya nyaka. (Yow. 3:16; 1 Tim. 2:3, 4) Twatiyililaña yitoñojoka yawakwetu nawa twayitejaña hela chakwila yambukaku nayetu nawa chumichi chahembaña kunuñañana kwetu kwawakwaKristu. Hakwila tuhembi kashinshi ketu kudi Yehova, hitwatela kudiñija mumadombu amukaayuku. Hitwadiñijaña munsañu jamatuña nachiyuuluku. Twamusakililaña Yehova hakutusubula kuyililu yaletaña chaambu, kudinka wanta nikudibecha yenzala mukaayi kaSatana. w15 7/15 3:17, 18

Kwekala njila jajivulu jitunateli kumwekesha netu twamukeña Yehova. Chakutalilahu, twamwekeshaña netu twamukeña Nzambi niantuñi netu neyi tuzataña neyena mumudimu wakushimwina Wanta. (Mat. 24:14; 28:19, 20) Twamwekeshaña cheñi netu twamukeña Yehova chikupu kuhitila mukwikala ashinshika neyi tudi mukweseka. (Mas. 84:11; Yak. 1:2-5) Neyi tudi mukweseka kwasweja, twatela kukuhwelela netu Nzambi nakumona chitunakukabakana nawa wukutukwasha muloña twalema kumesu indi. (Mas. 56:8) Kukeña kutwamukeña Yehova kwatuleñelaña kutoñojoka chikupu hayileñaleña yindi ninyidimu yikwawu yakuhayamisha. Tukumwekesha netu twamukeña Nzambi nawa twalemesha nankashi Izu dindi kuhitila mukudiza Bayibolu nakanañachima. Kumukeña Yehova kwatuleñelaña kukundama kwakwihi nayena mukulomba. Nawa kumukeña Nzambi kwaswejelañaku neyi tutoñojokaña chikupu hamulambu wefutu danyiloña dahaniniyi hanshidi jetu. (1 Yow. 2:1, 2) Iji hinjila jekala hakachi kayuma yayivulu yatuleñelaña tumukeñi Yehova muloña wakukeña kwatukeñayi kwabulaña kumana. w15 8/15 1:6, 17, 18

Mwituña dadiha, kwakekala mpinji yikwawu yitwakakeñekaña kudiwunjika. Chakutalilahu, tunateli kutiya antu amakwawu anakuzañalala muloña antaña niamabwambu jawu anayisañuli. Ilaña etu twatela kuhembela chakasañulawu antu itwakeña. Neyi yuma yikala muniyi njila, komana twakazañalala nawakwetu nikwikala adiwunjika? (Rom. 12:15) Makonu neyi tudiza chililu chakudiwunjika nakutalila Yehova chakashikijayi yikaninu yindi, chakatukwasha kwikala adiwunjika hayina mpinji. Tunateli cheñi kuloñesha chitwakashakamaña mwituña dadiha kuhitila mukudiwunjika kutalisha hansañu yalala yitweluka yamuBayibolu yahimpañawu. Komana twadizaña nikwikala adiwunjika kutalisha hansañu yamuBayibolu yinakulumbululawu chovu-chovu makonu? Neyi twila mwenimu, hitwakekala nakukala hakwikala adiwunjika mwituña dadiha neyi Yehova nashimuni dehi yuma yikakeñekaña kudi antuku.—Yish. 4:18; Yow. 16:12. w15 8/15 3:9, 10

Kapostolu Pawulu wakeñeleña akwaKristu amuEfwesesa kwikala apama. Wayikolesheli kwikala anuñañana muchikuhwelelu nikutwalekahu kudiza nsañu yahosha hadi Yesu kulonda ‘ashiki mwiyala walala chikupu, mwashika chiminu chaKristu.’ (Efwes. 4:13) Chipompelu chamuEfwesesa chadiñikoku hampinji Pawulu yayisonekeleliyi mukanda. Antu amavulu muchina chipompelu adiña akwaKristu apama. Ilaña, mwadiña antu amakwawu ateleleli kukolesha wubwambu wawu naYehova. Nimakonu, amanakwetu niahela amavulu anamuzatili Yehova yaaka yayivulu nawa anekali akwaKristu apama. Hela chochu, antu amakwawu muchipompelu kanda apami. Chakutalilahu, antu amavulu apapatishewaña chaaka nichaaka, dichi atela kupama. Ndochu enu?—Kol. 2:6, 7. w15 9/15 1:2, 3

Yishina yamuBayibolu yatukwashaña kufumba chinleji chetu kulonda tutondi chiwahi yuma yakwila hampinji yakunooka. Yishimu 13:20 yatulejaña nawu: “Endaku nawakwamaana nineyi wakekala mukwamaana; ilaña wadikunda nawayisupi wakamwenamu jakala.” Dichi, twatela kuzatisha chinleji chetu chafumbewa naBayibolu hakutonda yuma yakwila hampinji yakunooka. Mwamanishaña maora añahi hampinji yakunooka? Komana mwalemesha kupompa, kushimwina nikudiza kwahalwenu, indi kwiji mwalemesha mpinji yakunooka? Yumanyi yimwalemesha? Yesu wahosheli nindi: “Sambilenu kukeña wanta windi nikuloña kwindi, niyuma yejimiyi akayishilaku.” (Mat. 6:33) Komana chinleji chenu chayanukishaña kufumba kwaYesu neyi munakufuukula chakuzatisha mpinji yenu? w15 9/15 2:13, 15

Yehova chamweniyi nindi Kena hakukeña kwila chuma chatama, wesekeli kumukwasha hakumwihula nindi: “Wunazuwilidi? Wunadihombelidi Kumesu? Neyi wukwila chachiwahi hiyakukwitiyaku?” Kena wakanini kumukwasha kudi Yehova, dichi wamweni yuma yakala. (Kutach. 4:11-13) Yehova wamweni cheñi yililu yatama yadiña naBaruki nindi yamuletesheleña kuzeya nikuneña. Dichi Yehova wamulejeli Baruki nindi watoñojokeleña mwaluwa nawa wateleleli kuhimpa. Baruki watiyilili kufumba kwaYehova nawa wapulukili. (Yere. 45:2-5) Yehova watulombolaña nikutufumba muloña watukeña. Bayi neyi watubabeshaña hohuku, ilaña watufumbaña. (Heb. 12:6) MuBayibolu, twatañañamu hadi ambuña aYehova ashinshika afumbiliyi nawa ekalili antu amawahi. w15 9/15 4:12, 13

Eni Gibiyona elukili chikupu nawu aIsarela ayikwashileña kudi Nzambi walala. Rahaba niyena welukili nindi Yehova wukweti ñovu. Wadiña kaIsarela wanyi, ilaña watiyili yuma yeliliyi Yehova hakufumisha antu jindi muEjipitu. Chelili amuwani kudi akwakwendesha ituña ayedi, wayilejeli nindi: “Neluki nami Yehova nayinki ituñidi.” Rahaba welukili nindi Yehova wakamupulwisha hamu nachisaka chindi. Wamwekesheli chikuhwelelu chindi mudi Yehova hela chakwila welukili nindi kwila mwenimu kwadi kumuletela wubanji. (Yosh. 2:9-13; 4:23, 24) Iyi yuma niyakutalilahu yikwawu yamu Bayibolu yatukwashaña kwiluka mwatalisha ‘kumumona Nzambi’ hela ñovu jindi. Neyi tumwiluka Yehova niyililu yindi, tukumonaña chikasa chindi ‘namesu amunyichima yetu.’ (Efwes. 1:18) Chumichi chikutusañumuna kwimbujola antu ashinshika akunyima niamakonu amona Yehova chakwashayi antu jindi. w15 10/15 1:6, 7, 9

Mata wadiña ibwambu daYesu nawa Yesu wamukeñeli Mata. Bayi neyi Yesu wakeñeli Mata hohuku, ilaña kudi ambanda amakwawu akeñeliyi nawa alemesheliyi. Chakutalilahu, Mariya muhela aMata niyena wadiña ibwambu daYesu. Nawa Yesu wamukeñeli mama yindi, Mariya. (Yow. 19:25-27) Hanu dinu, muloñadi Yesu chamukeñeleliyi Mata? Yesu wamukeñeli Mata muloña wadiña naluwi, chisambu nawa wadiña wadikita. Ilaña chikuhwelelu chindi dichaletesheli Yesu yamukeñi nankashi. Wakuhweleleli nsañu yejima yatañishileñayi Yesu nawa wakuhweleleli nindi diyi Mesiya wakaninuwu. (Yow. 11:21-27) Hela chochu, Mata wadiña wawanina wanyi. Waluwañesheleña neyi chitwaluwañeshaña. Chakutalilahu, mpinji yayendeleliyi Yesu, Mata wamuhililili muhelindi Mariya nawa walejeli Yesu nindi watela kumufumba. Mata wahosheli nindi: “Mwanta, chananlekeliyi mwanyikami nyidimu nkanka wami, hiwunashuku muchima weyuku? Mwili enzi ankwashuku.”—Luka 10:38-42. w15 10/15 3:1, 2

Neyi mutoñojokaña hadi Yehova niYesu mukwikala neyena dakukeña chalala. Iyena dimukweti dikukolesha amanakwenu niantu imwawanaña mumudimu wakushimwina. Chimwatoñojoka cheliliyi Yehova hakuyinka ifutu damuloña daYesu, mukulemeshaña wubwambu wenu naNzambi. (Rom. 3:24) Manakwetu Mark waku South Africa washakamini yaaka yisatu mukaleya muloña wachikuhwelelu chindi, wahosheli nindi: “Tunateli kwesekeja kutoñojoka nakwenda maluña amawahi. Neyi tutoñojokaña hayuma yakuspiritu tukwiluka yuma yayivulu hadi Nzambi yetu, Yehova. Mpinji yikwawu neyi naneñi hela inakwakamena yuma yakumbidi, nanonaña Bayibolu nikutachika kutoñojoka nsañu yekala muNsona. Yankwashaña kwikala namuzañalu.” w15 10/15 4:15

Yilumbulwilenu anyanenu chimunenkeluku olu lushimbi hela chimunafuukwili mwenomu. Neyi eluka, akwovwahila. A Barry akulishili anyana awana ahosheli nawu: “Anyana akuyikuhwelela neyi muyilumbulwila chimunafuukwili mwenomu.” Anyanenu atumpululu akwiluka nawu munakasi hohu wanyi lushimbi muloña wañovu yimukweti, ilaña kudi chinaleteshi mwili mwenomu. Mwatela kwiluka cheñi nenu atumpululu hiyatwansi wanyi. Anakudiza chakuditoñojokela nawa anakukeña adifuukwileña awenawu. (Rom. 12:1) A Barry alumbulwili nawu: “Atumpululu atela kufuukula chiwahi kushindamena hachinakutoñojokawu bayi chinakutiyawuku.” Dichi ikalenu adizoza nawa yilumbulwilenu anyanenu chimunafuukwili mwenomu. Neyi mwila mwenimu, mwana wukudiza kudifuukwila yomweni nawa wukwiluka nindi mwamulemesha nawa nindi muneluki nenu hakukula. w15 11/15 2:11

Makonu, mamiliyoni awantu mukaayi kejima anakudifukula kudi Yehova. Hiyamanakwetu niahela. Mwayimwekeshelaña kukeña? (Rom. 12:10) Kapostolu Petulu wahosheli nindi “kwovwahila nsañu yalala” kwaleteshaña ‘tukeñi ana kwetu.’ Petulu walejeli cheñi akwawu akwaKristu nindi: “Chasweja kulema yowu kukeñañana chacheni mukachi kenu.” (1 Pet. 1:22; 4:8) Kuloñesha kwetu kwamukaayi kejima kwadimena. Muloñadi? Muloña twekala nakukeña kwalala nawamanakwetu niahela. Ilaña chikuma chacheni chakwila nawu twamukeña Yehova nawa twamwovwahilaña, dichi watukwashaña nañovu jindi jabadika, spiritu yindi yajila. Spiritu yaNzambi yajila yatukwashaña kwikala anuñañana nawamanakwetu mukaayi kejima.—1 Yow. 4:20, 21. w15 11/15 4:8, 9

Yehova wakeñaña nindi tumwiluki nikwiluka nkeñelu yindi hichikweti muloña nedimi ditwahoshañaku. (Chim. 7:9, 10) Antu ahoshaña madimi ashiyashana, ilaña Yehova watiyaña. Tuneluki ñahi? MuBayibolu mwekala mazu aYesu antesha ahosheliyi mwidimi dahosheleñayi. (Mat. 27:46; Maku 5:41; 7:34; 14:36) Ilaña Yehova wakwashili antu kusoneka nsañu yaYesu nikuyibalumuna muchiGiriki, nawa mukuhita kwampinji, ayibalumwini mumadimi amakwawu. Chineli Izu daNzambi adituntulwileña kakavulu kudi aYudeya niakwaKristu, Izu Nzambi adikiñili. Iyi nyikanda yatuntulwiliwu ayibalumwini mumadimi amavulu. Chimwahitili yaaka 400 hanyima yakusemuka kwaKristu, John Chrysostom wahosheli nindi nsañu yaYesu anayibalumuni mumadimi awaSiriya, Ejipitu, India, Peresi, Etiyopiya niantu amakwawu. w15 12/15 1:10, 11

Neyi tuhosha hampinji yabula kutelela, antu anateli kutiya wanyi hela kwiteja mutunakuhosha. Chakutalilahu, MuMarch 2011, mutentanshi nitsunami yakisañeni nyisumba yayivulu kukabeta kamusela kaJapan. Antu akubadika ha 15,000 afwili. Hela chakwila aYinsahu jaYehova ajimbesheli yisaka niamabwambu jawu, azatishili Bayibolu hakukwasha amakwawu adiña mukukala kwokumu. Ilaña elukili nawu amavulu adiña aBuddha abula kwiluka Bayibolu. Chatela haniyi mpinji ayileji nsañu yakusañuka, amanakwetu ayikundejeli nikuyilumbulwila chaleteshaña kukala kumwekaneña kudi antu amawahi. w15 12/15 3:7

Antu amakwawu nimakampani ahoshaña nawu anawani yitumbu yikuuka chikatu chitukweti. Elaña mwenimu muloña akeñaña hohu mali amavulu. Anateli kuhosha nawu iyi yitumbu yinoki antu amavulu. Nawa neyi twakata tunateli kweseka yitumbu yashiyashana kulonda tutiyiku chiwahi nikutwalekahu kuhanda.Neyi tukweti maana tukwikala ababala hakutiyilila muntu wunakutuleja mwakwilila sweje-e neyi muntu wunakutuleja wataña wanyi. Tukudihula netu: ‘Nakuhosha nindi iyi yitumbu hela yakuda yakwashili antu, mwalala neluki nami yayikwashili? Hela chakwila yakwashili amakwawu, neluki ñahi nami yikunkwasha? Komana natela kusandujola nikwihula antu amakwawu adiza chakuuka chikatu chinukweti?’—Kuhit. 17:6. w15 12/15 4:14, 15

Pawulu welukili nindi neyi twiteja kukeña kwaYesu kwabadika, kukutusañumuna kukeña nikumulemesha Yesu. Neyi twiluka yuma yinatwililiyi Yehova, kukeña kwindi kukutusañumuna kwila yuma yikumwekesha nawu twalemesha Yesu. Kukeña kwindi kunateli kutusañumuna ñahi? Kukeña kwaYehova kukutusañumuna kumwimbujola Yesu nikulondela mumahaji indi chikupu. (1 Pet. 2:21; 1 Yow. 2:6) Tukumwekesha kukeña neyi twovwahila Nzambi niKristu. Yesu wahosheli nindi: “Muntu wukweti mazu inayilejaña nakuyihemba, diyi wankeña; ninowu wankeña akumukeña kudi Tata yami, ninami nukumukeña, nukudimwekeshaña kudi yena.” (Yow. 14:21; 1 Yow. 5:3) Dichi dihulenu nenu: ‘Munjilanyi mwinakumwimbujolela Yesu? Kuduhu yuma yinatela kuhimpa?’ Twatela kudihula awa malwihu muloña antu amukaayi akeñaña nawu twileña yuma yinakwilawu.—Rom. 12:2. w16.01 2:7-9

Komana mwazataña neyena mumudimu wakushimwina? Komana mwatiyishaña yuma yimwadizaña muBayibolu nikwiluka “yuma yaNzambi yayeni yakunama”? (1 Kor. 2:10) Komana mwatiyaña nenu Yehova nayikwashi kuleta antu amavulu muchalala? Mwakeñaña kwila yuma yakeñañayi Yehova kubadika yuma yejima? Komana mwakeña amanakwenu chikupu nawa mwakeñaña kuyikwasha kumukalakela Yehova? Komana munamoni chikupu nenu Yehova nayikwashi munjila jashiyashana muwumi wenu? Neyi ñakwilu yenu yidi nawu eña kunawa malwihu, komana chinayi mukwila nawu anayitondi kuya mwiwulu? Inehi. Muloñadi? Muloña antu jaNzambi ejima atiyaña chochimu, chili awayishewa hela nehi. Nawa Yehova wazatishaña spiritu yindi yajila kwinka ambuñindi ejima ñovu yoyimu, hichikweti muloña nawuloku wakatambwilawuku. Neyi munakujinoka neyi mwakaya mwiwulu hela nehi, dikwila nawu ayitonda wanyi. w16.01 3:14, 15

Yesu wahosheli nindi neyi tuhana hela tutambwila twazañalalaña. (Yil. 20:35) Hampinji yitwelukili chalala twazañaleli, hanu dinu muloñadi wutwazañalelaña neyi tuleja antu chalala? Muloña chelukawu yuma yahosha Bayibolu nikwikala nawubwambu wawuwahi naNzambi ekalaña namuzañalu. Chitwamona anakuhimpa yitoñojoka nichihandilu chawu twazañalalaña. Mudimu wakushimwina walema nankashi nawa diwu mudimu wawuwahi wutwatela kuzataña. Waleteshaña antu ekalaña amabwambu jaNzambi kwikala nawumi wahaya nyaka. (2 Kor. 5:20) Iwu diwu mudimu watuletelaña muzañalu muloña twakwashaña antu kulonda akashakami haya nyaka. w16.01 5:6, 7