December

MuBayibolu, Abarahama amutena nawu ibwambu daNzambi kapampa kasatu. (2 Kushi. 20:7; Isa. 41:8; Yak. 2:23) Diyi muntu hohu atenawu nawu ibwambu daNzambi muBayibolu. Komana chinayi mukwila nawu Abarahama diyi hohu wekalili ibwambu daYehova? Inehi. Bayibolu yahoshaña nawu wejima wetu tunateli kwikala amabwambu jindi. Mwizu daNzambi mwekala nsañu yahosha hadi amayala niambanda ashinshika amwakamini Yehova, amukuhweleleli nawa ekalili amabwambu jindi chikupu. Ekala hezanvu ‘devu dawayinsahu’ dateneniyi Pawulu. Awa antu ejima adiña amabwambu jaNzambi. (Heb. 12:1) Tutwalekenuhu kwimbujola chakutalilahu chanawa antu ashinshika. (Heb. 6:11, 12) Neyi twila mwenimu, dikwila nawu twakatambwila wuloku wakwikala amabwambu jaYehova haya nyaka. w16.02 2:1, 2, 19

Fwikijenu ibwambu denu nayinki motoka. Yayinka niyipapilu yamotoka nakuyileja nindi: “Motoka yeyi iyi.” Ilaña ibwambu denu yayileja nindi: “Iyami nukwikalaña nansapi. Nawa yami nukwendeshaña motoka, bayi eyi.” Mukutiya ñahi? Mukumumona ñahi ibwambu denu wunayinki motoka? Neyi muntu yadihana kudi Yehova wamulejaña Nzambi nindi: “Nakwinki wumi wami. Nukwikala kukabadi keyi.” Yehova wakeñaña nindi muntu wunadihani yeli kwesekeja namunamukaniyi. Indi neyi iwu muntu yaleka kumwovwahila Yehova kuhitila mukukeña muntu wakudisumbula nindi wabulaña kumukalakela Nzambi? Indi kwiji iwu muntu yeñila mudimu wukumuletesha yabuleña kuwana mpinji yakushimwina hela kuya nakupompa mpinji yejima? Dikwila nawu iwu muntu nakwila wanyi mwamukaniniyi Yehova. Chidi neyi nakuhemba nsapi yamotoka. Neyi tudihana kudi Yehova, twamulejaña netu, “Nukwikalaña kukabadi keyi, bayi kamiku.” Dichi twatela kwilaña yuma yejima yakeñañayi Yehova nindi twili bayi yitunakukeña etu aweniku. Twatela kumwimbujola Yesu, neyi chinamwekeshi nsona yalelu. w16.03 1:16, 17

Kwakwihi nayaaka 3,000 yinahituhu, kaprofwetu Elija wamwilili kansi Elisha nindi yekali kalama kindi. Chakadi nikushintajala, Elisha wetejeli iwu mudimu nawa wamukwashileñaku ona kashinakaji nyidimu yikwawu. (2 Anya. 3:11) Chelili yaaka yitanu nachimu yakumudizisha hiyikumana, Elisha welukili nindi Elija keña yamanishi kuzata mudimu windi muIsarela. Hayina mpinji Elija wamulejeli ibwambu dindi wadizishiliyi chiwahi nindi yaleki kumulondela, ilana Elisha wafuukwiluhu kubula kumushiya ntañishi yindi. Neyi wudi manakwetu wakansi, wunateli kumwimbujola ñahi Elisha makonu? Nyakalenuña kwiteja nyidimu, kushilahu ninyidimu yamwekenaña neyi yalema wanyi. Monenuña ntañishi yenu nenu hibwambu denu nawa musakililenuña chinakuzatayi nañovu hakuyikwasha. Sweje-e dinu, ikalenu ashinshika hampinji yimunakuzata mudimu wejima wunayinkuwu. Chumichi chalemenadi? Muloña neyi mumwekesha nenu mwashinshika nawa ayikuhwelela, aeluda akwiluka nawu Yehova nakukeña kuyinka nyidimu yikwawu yamuchipompelu.—Mas. 101:6; 2 Tim. 2:2. w15 4/15 2:13, 14

Sawulu wakeñeleña Jonatani kwikala mwanta bayi Davidiku. (1 Sam. 20:31) Ilaña Jonatani wakeñeli Yehova nawa wadiña washinshika kudiyena. Jonatani wamutiyilili wanyi Davidi ichima, wekalili ibwambu dindi nawa wahembeli mwadikaninuwu. Muntu wejima wamukeña Yehova nawa washinshika. Chineli twashinshika kudi Nzambi, tukwilaña mutwakanini. Chakutalilahu, neyi tutiyañana kwila chuma namuntu, twatela kwila kwesekeja nachitwadikanini hela yuma yinakali ñahi. Nawa neyi tukweti kukala mumaluwi, tukumwekesha kukeña kudi Yehova neyi twikala ashinshika kudi anfumwetu hela añodetu. (Mal. 2:13-16) Twatela kwimbujola Jonatani kuhitila mukwikala ashinshika kudi Nzambi nimumpinji yakala. Dichi tutwalekuhu kwikala ashinshika. Neyi twila mwenimu tukumuzañalesha Yehova ninetu aweni. (Yish. 27:11) Tweluka chikupu netu wukutwililaña yuma yayiwahi nikutwakamena. w16.02 3:16, 17

Yehova weluka hakumina ñovu jetu. (Mas. 103:14) Dichi, hakeñaña nindi tuumikeña kweseka nañovu jetuku, ilaña watukwashaña neyi tata yawantu. Kafwampi, mpinji yikwawu tunateli kutoñojoka netu hitukutwesha kuumikaku. Ilaña Yehova watukana nindi haketeja ambuñindi kuyeseka chakubadika ñovu jawuku. Eña, “wukubuzilaku njila.” (1 Kor. 10:13) Dichi, tukweti muloña watuleñelaña kukuhwelela netu yuma yamonañayi Yehova nindi tunateli kuumika yaloña. Neyi tulomba netu atukwashi ilaña hanatwakuli hanoyu mpinjuku, twatela kumuchiñilila Muntu weluka mpinji yakutukwasha. Anukenu nenu niyena wadiwunjika nawa wafwilaña kutukwasha. “Chakachiñililayi Yehova, kulonda akayitiyili luwi; dichi chakaditwalilayi kwiwulu, kulonda akayitiyili wushona; muloña Yehova hiNzambi wawuñaji.” w15 4/15 4:8, 9

Hampinji yakudifukula kwachisaka, atela kuhituluka muyuma yakazatishawu mumudimu wakushimwina, nawa chumichi chikuyikwasha wejima wawu kwikala adiloñesha. Neyi wejima wawu ahoshaña nsañu yakuspiritu nawa amona nawu amukeña Yehova nikukeña kumuzañalesha, akwikala anuñañana. Eyala namumbanda anateli kwikala ñahi anuñañana? Neyi wejima wawu amukeña Yehova nikumukalakela hamu, akwikala namuzañalu nawa akunuñañana muwulu wawu. Atela kudikeña neyi chadikeñeliwu aAbarahama naSara, Isaka naRebeka niElekana naHana. (Kutach. 26:8; 1 Sam. 1:5, 8) Neyi eyala namumbanda adikeña, akwikala anuñañana nawa akukundama kwakwihi naYehova.—Mukwa. 4:12. w16.03 3:12, 13

Satana wudi nadombu nawawayishewa ashalahu ‘nianyikoku acheñi.’ (Yow. 10:16) Diyabolu nakufwila kudya ambuña Yehova amavulu chikupu mukapinji kantesha kanashaliyi naku. (Chim. 12:9, 12) Komana tunateli kushinda ndombu yitwalwaña naSatana? Eña. Bayibolu yahosha nawu: ‘Dikañenu naDiyabolu, niyena wukuyitemuka.’ (Yak. 4:7) Antu amavulu ajinookaña nawu Satana wekala kwoku. Antu wenawa atoñojokaña nawu Satana niandemoni adi neyi antu akulumbisha hohu amunyikanda, mujifilimu jatama niyisela yahavidiyo. Antu amuchidiwu atoñojokaña nawu muntu wukweti maana hatela kukuhwelela nindi aspiritu atama ekala kwokuku. Komana munakutoñojoka nenu Satana watiyaña kutama muloña antu akuhwelela wanyi nawu yena niandemoni jindi ekala kwoku? Piñi mwani. Kafwampi Satana chamukalilaña wanyi kuputisha mesu ayitoñojoka yawantu ajinokaña nawu wekala kwoku. (2 Kor. 4:4) Satana watandishaña yitoñojoka yakwila nawu aspiritu ekalaku wanyi kulonda aluwañeshi antu. w15 5/15 2:1, 2

Mosi amudizishili kudi anvwali jindi nsañu yaYehova ninkeñelu yaNzambi yakulubula aHeberu muwunduñu nakuyitwala Mwituña daChikaninu. (Kutach. 13:14, 15; Kwid. 2:5-10) Mosi chatoñojokeliyi chikupu hayuma yakaniniyi Yehova aIsarela, chikuhwelelu chindi nikukeña kwamukeñeliyi Nzambi kwaswejeleluku. Kufwana antu amakwawu amwakamaña Nzambi, chakadi nikujina wafwikijileña mpinji yamba kalubulayi Yehova antu muwunduñu wakufwa. (Yoba 14:14, 15; Heb. 11:17-19) Dimuloña waweni wamuleñeleli Mosi yamukeñi Nzambi watiyilili wushona aHeberu niantu ejima. Chikuhwelelu nikukeña kwamuleñeleli Mosi kumukeña Nzambi muchihandilu chindi chejima. (Kuhit. 6:4, 5) Hela chakwila Fwaro wamuchinishili Mosi nindi wukumujaha, chikuhwelelu, kumukeña kwamukeñeliyi Nzambi nikufwikija chihandilu chachiwahi chakumbidi, yumiyi yamuleñeleli kwikala nawulobu wakudimona cheñi nindi.—Kwid. 10:28, 29. w15 5/15 3:11-13

Hachawija chadiña kuKana wamuÑaliliya, Yesu welili chihayamisha chidi chatachi. Hadaha kwayili enyi amavulu kubadika akuhweleleluwu. Hela chochu, vinyu yamanini. Hakachi kawenyi ayili, hadiña niMariya mama yaYesu. Chakadi nikujina, hayaaka yayivulu watoñojokeleña chikupu hayikaninu yejima yawuprofwetu wahosha hadi mwanindi, welukiliyi nindi akamutena nawu “Mwana kaMukwakubadika Mwiwulu.” (Luka 1:30-32; 2:52) Komana wakuhweleli nindi Yesu wukweti ñovu yabuliliyi kumwekeshayi? Chamwekana hatooka to-o nawu Mariya naYesu atiyilili wushona antu adisumbwileña muKana nawa akeñeleña nawu awa antu abuli kutiya nsonyi. Yesu welukili nindi wateleleli kumwekesha chisambu. Dichi wabalumwini muchihayamisha kwakwihi namalita 380 amenji nakwikala “vinyu yayiwahi.” (Yow. 2:6-11) Komana Yesu wateleleli kwila ichi chihayamisha? Inehi. Wadiña hohu nakwakamena antu nawa wamwimbujoleli Tata yindi wekala mwiwulu hakwikala nachililu chakuhana. w15 6/15 1:3

Henohu Yesu kanda ayi mwiwulu, apostolu indi amwihwili lwihu ludi hewulu. Ñakwilu yaYesu yamwekesheli nawu hiyadiña mpinji yakwila eluki mpinji yakatachika Wanta waNzambi kuyuulaku. Wayilejeli atumbanji twindi kusha maana kumudimu walema wakushimwina wateleleli kuzatawu. (Yil. 1:7, 8) Hela chochu, Yesu wayilejeli atumbanji twindi kutalilaña Wanta waNzambi chiwakenza. Kufuma tuhu kumafuku awapostolu, akwaKristu alombaña nawu Wanta waNzambi winzi. Chashikili mpinji yakwila Yesu atachiki kuyuula Wanta waNzambi mwiwulu, Yehova wakwashili antu jindi kulonda eluki mpinji yikamwekana yumiyi. Muchaaka cha 1876, Charles Taze Russell wasonekeli chibaaba chedishiluwu mumagazini yaBible Examiner. China chibaaba chadiñi namutu wakwila nawu, “Gentile Times: When Do They End?,” chashimwini nawu 1914 hichaaka chalema. Ichi chibaaba chesekejeli “mpinji jitanu najiyedi” jekala muwuprofwetu waDanyeli ‘nakumana kwayaaka yawaJentili’ yashimwiniyi Yesu.—Dan. 4:16; Luka 21:24. w15 6/15 4:11, 12

Yesu waneñeli hakumona antu amakwawu chaneñeluwu. Chamweniyi antu anakudila hamuloña webwambu dindi Lazaru wafwili, Yesu ‘wadishishimwini’ nawa ‘watiyili kukala.’ Waneñeli hela chakwila welukili nindi keña yamusañuli Lazaru. (Yow. 11:33-36) Yesu hatiyili nsonyi yakudilaku. Antu adiña nakutala amweni Yesu chamukeñeliyi Lazaru nichisaka chindi. Yesu wamwekesheli luwi hakuzatisha ñovu yamwinkeluwu kudi Nzambi hakumusañula ibwambu dindi. (Yow. 11:43, 44) Bayibolu yamulumbulula Yesu nawu “wamufwana chikupu [Nleñi] mwekalilayi.” (Heb. 1:3) Dichi, yihayamisha yakoñeleñayi Yesu yamwekesheli nawu yena niTata yindi afwilaña kufumishahu chineñi chatiyañawu antu hamuloña wakukata nikufwa. Chumichi bayi neyi achimwekesheli hohu kudi antu ashimunawu muBayibolu asañwiluwuku. Yesu wahosheli nindi: ‘Mpinji yinakwinza yakela antu ejima adi mumajamu achanukishu . . . akedikamu.’—Yow. 5:28, 29. w15 6/15 2:13, 14

Kwambukaku nawakwakwitiya amakwawu adidimbaña nawu akamuhamekaña Nzambi neyi anayi dehi mwiwulu, aYinsahu jaYehova ejima elukanawu atela kumuhameka Nzambi hanu hamaseki chayinu mpinji. Dichi twalondelaña chakutalilahu chawambuña Yehova ashinshika ashimunawu haMasamu 99:1-3, 5. Neyi chiyashimunawu munidi isamu, Mosi, Aroni niSamweli akwashili chikupu ntanjikilu yakudifukula kwalala mumafuku awu. (Mas. 99:6, 7) Makonu, henohu kanda ayi mwiwulu nakuzata neyi atupristu naYesu, amana kwindi ashalahu awayishewa azataña nakashinshi mutembeli yakuspiritu yahamaseki. “Anyikoku acheñi” akushika kumamiliyoni ayikwashaña nakashinshi. (Yow. 10:16) Hela chakwila akweti kuchiñeja kwashiyashana, mazanvu ejima ayedi anuñañana hakudifukula kudi Yehova hanu hetanda dakunyendu yaNzambi. Dichi, twatela kudihula hamuntu hamuntu netu, ‘Komana nakwashaña chikupu ntanjikilu yaYehova yakudifukula kwalala?’ w15 7/15 1:4, 5

Akwakudifukula aYehova atwalekahu kuchiñilila kushikijewa kwawuprofwetu wonenawu. Isaya washimwinañahu dehi nindi Yehova wakayifuntisha aYudeya mumukala wawu, wahosheli nindi: “Antu ejima akumuchiñilila yena anakooleki.” (Isa. 30:18) Mika niyena waprofweteli hadi antu jaNzambi akushankulu, wasanyikili nindi: ‘Nukutalaña kudi Yehova.’ (Mika 7:7) Hayaaka yayivulu, antu jaNzambi atwalekeluhu kuchiñilila kushikijewa kwawuprofwetu wahosheli hadi Mesiya hela Kristu. (Luka 3:15; 1 Pet. 1:10-12) Ambuña Nzambi amakonu niwena atwalekañahu kuchiñilila wuprofwetu wukwawu wahosha hadi Mesiya wuchidi kanda wushikijewi. Kuhitila muWanta wawuMesiya, Yehova keña yamanishi makabi awantu kuhitila mukujilumuna antu atama kulonda yakuuli antu jindi mudinu ituña didi mumakasa aSatana. (1 Yow. 5:19) Dichi, tutwalekenuhu kwikala atona nikwiluka netu akanu kaayi kadi kwakwihi nakukuma. w15 8/15 2:1, 2

Yehova wayinkeli aIsarela nshimbi yakutuña tabanaka. (Kwid. 25:8) Chimwahitili yaaka, atuñili tembeli yakudifukwilamu kudi Yehova. (1 Anya. 8:27, 29) Chiyafuntiluwu kufuma muwunkoli muBabiloni, aYudeya adiña nakupompela mafuku ejima mumasinagogi. (Maku 6:2; Yow. 18:20; Yil. 15:21) AkwaKristu akusambila apompeleleña mumatala awantu amuchipompelu. (Yil. 12:12; 1 Kor. 16:19) Makonu, antu jaYehova apompelaña muMatala aWanta amavulu chikupu mukaayi kejima kulonda adizi nikudifukula. Yesu wakeñeli chikupu nikulemesha tembeli yaYehova yamuYerusalema chakwila nsoneki waNsañu Yayiwahi wamukunjikili mazu awuprofwetu adi munsona yefuku dalelu. (Mas. 69:9) Kwosi Itala daWanta dinateli kutenawu chikupu nawu “itala daYehova” munjila yoyimu neyi mwakunjikiluwu awa mazu kutembeli yadiña muYerusalema. (2 Kushi. 5:13; 33:4) Hela chochu, muBayibolu mwekala nshimbi yatulejaña chitwatela kuzatisha nikulemesha maluña etu akudifukwila amakonu. w15 7/15 4:1, 2

Komana muChiyuulu chaKristu chaYaaka Ikombakaji, twakadikeña nikudanakena wumu namukwawu? Neyi twikala nachililu chakwanakena nikwikala nawubwambu wawuwahi nawakwetu makonu, chumichi chikatukwasha kwila mwenimu hayina mpinji. (Kol. 3:12, 13) Mwituña dadiha bayi neyi yuma yejima yitukakeñaña akatwinkaña hayoyenoyu mpinji yitunakuyikeñaku. Kafwampi, ichi chihandilu chikabombelamu kusakilila hayuma yitukweti kwesekeja nachihandilu chetu kushilahu nikwovwahila chiyuulu chaYehova chakukeña. Dikwila nawu twakazatishaña iyi yililu yitunashimuni yinakutudizishayi Yehova nindi twikali nayu makonu. Neyi tudiza chakushakama chiwahi makonu neyi chitunakukeña netu twakashakameña, dikwila nawu tunakwikala nayililu yitwakamwekeshaña haya nyaka. Tunakukolesha chikuhwelelu chetu kulonda tudiloñeshi chakushakama ‘heseki dawantu dakenza.’ (Heb. 2:5; 11:1) Kubombelahu, twamwekeshaña netu twasha muchima kuyuma yaloña yakekala heseki. Mwamweni, tunakudiloñesha kulonda twakekali nawumi wahaya nyaka mwituña daNzambi dadiha. w15 8/15 3:11, 12

Neyi mutala nyikabu yekalaña hachisankanu, mukuwana yikwawu yanha yikwawu yahisha wanyi. Ilaña, kunateli kwikala yuma yikuyileñela mwiluki nenu iyi nyikabu yinanhi. Dichekala niakwaKristu apama. Ekala esekana wanyi. Muloña afuma kumatuña nikuyitachi yashiyashana. Akweti yaaka yoyimu wanyi nawa niyuma yakeñañawu niyabula kukeñawu yashiyashana. Hela chochu, akwaKristu ejima akweti yililu yimu yesakana yayileñelaña kuyitena nawu apama. Yililwinyi yeniyi? MukwaKristu wapama wembujolaña Yesu nikulondela “mumahaji indi.” (1 Pet. 2:21) Yesu wahosheli nindi muntu watela kumukeña Yehova namuchima windi, wumi nimaana indi ejima nawa watela kukeña mukwawu neyi chadikeñayi yomweni. (Mat. 22:37-39) MukwaKristu wapama wovwahilaña iku kufumba. Yuma yelañayi muchihandilu chindi yamwekeshaña nawu walemesha nankashi wubwambu windi naYehova nikukeña kwakeñayi akwawu. w15 9/15 1:3-5

Chinleji chafumbewa chatusoñamishaña kubula kwila yuma yatama, nawa chatusañumunaña kwila yuma yayiwahi. Njila yimu yidi yakushimwina kwitala nikwitala nikudi antu itwabulakanaña. Dicheliliyi Pawulu. Wasonekeli nindi: “Anankunjiki mudimu wakushimuna, chiña nishimuni hohu. O yihuñu yinukumonami neyi nukubula kushimuna nsañu yayiwahi!” (1 Kor. 9:16) Chitukumwimbujolaña Pawulu, tukwikala nachinleji chitooka, muloña tuneluki netu yuma yitunakwila yayiwahi. Neyi tunakuyishimwina antu nsañu yayiwahi, dikwila nawu tunakukeña kubalumuna yinleji yawu yiteji. Chinleji chetu chinateli kutukwasha kwila mwenimu. Tukufumba chinleji chetu neyi tudizaña, kutoñojoka chikupu Hezu daNzambi nikuzatisha yuma yitunadizi. Ichi chawaana chatwinkawu chikutukwasha muchihandilu chetu. w15 9/15 2:16, 18

Chakutalilahu, Yosefu, Mosi, niDavidi ahitili mukweseka kweneni. Hadiñawu mukweseka, Yehova wayikwashileña. Nawa yuma yadiziluwu hadiñawu mukweseka yayikwashili hayinkeliyi Yehova nyidimu yamaneni. Neyi tutañaña muBayibolu Yehova chakwashiliyi nikufumba antu jindi, twelukaña chikupu netu watukeña. Hela chakwila tunaluwañeshi, Yehova watumwekeshelaña kukeña. Neyi twiteja kufumba kwindi nawa tubalumuka mumuchima, wakatwanakena “nankashi.” (Isa. 55:7) Chumichi chinatalishi mudi? Mazu ahosheliyi Davidi hachanakenañayi Yehova amwekeshaña nawu hiTata yetu wukweti luwi, wahosheli nindi: “Wakwanakenaña mwejima muwaluwilaña; wakuukaña nyisoñu yeyi yejima; Wakuulaña wumi weyi wubuli kukisika; wakuvwikaña chibañula chaluwi nawushona.” (Mas. 103:3, 4) Yehova watufumbaña nikutulombola munjila jashiyashana. Mwahimpaña swayi neyi ayifumba? Anukenuña mpinji yejima nenu Yehova watufumbaña muloña watukeña.—Mas. 30:5. w15 9/15 4:13, 14

Mata wadiña nakumuloñeshela Yesu yakuda niyuma yikwawu. Chamweniyi nindi Mariya nakumukwashaku wanyi, wahilili nawa wamulejeli Yesu. Yesu welukili nindi Mata washili maana kuyuma yelileñayi, dichi wamulejeli nindi: “Mata, Mata, yuma yayivulu wudi nakwakama, wudi nakudikabisha tuhu kweyi.” Wamulejeli cheñi nindi yaloñeshi yakuda yantesha hela chuma chimu. Dichi Yesu wamuhamekeli Mariya hakutiyilila nakanañachima. Wamulejeli nindi: “Chuma chanatondiyi Mariya, dichuma chasweja kuwaha, hiyakamutambulachuku.” (Luka 10:38-42) Mariya watela wajimbeli yakuda yadiliyi, ilaña wajimbeli wanyi yuma yadiziliyi kudi Yesu nichamuhamekeliyi. Chimwahitili yaaka 60, kapostolu Yowanu wasonekeli nindi: “Yesu wakeñeli Mata nimana kwindi wamumbanda.” (Yow. 11:5) Awa mazu anakumwekesha nawu Mata wetejeli kufumba kwaYesu nawa wamukalakeleli Yehova nakashinshi mukuhanda kwindi kwejima. w15 10/15 3:3, 4

Tukweti wunsahu wawuvulu wunakumwekesha nawu Yehova nakukwasha antu makonu. Kakavulu twatiyaña nsañu yahoshaña hadi antu amulombeli Nzambi kuyikwasha nawa wakwili kulomba kwawu. (Mas. 53:2) Chakutalilahu, mpinji yashimwinineñayi Allan hakachitutu kanyanya muPhilippines, wawanini mumbanda watachikili kudila. Allan wahosheli nindi, “Iwu mumbanda walombeli nantetemena nindi aYinsahu jaYehova ayi nakumushimwina.” Nzambi wakwili kulomba kwindi mukunyakashana chakwila watiyili kuwaha. Chimwahitili tukweji, wadihanini kudi Yehova. Ambuña aYehova amavulu, amona Nzambi chayikwashayi kuleka yililu yatama yidi neyi kunwa makanya, kuzatisha yitumbu yashetana hela kutala nyevulu yanzekesi. Ahoshaña nawu esekeli kuleka aweni ilaña akañenyeña. Chamulombeluwu Yehova kuyikwasha, wayinkeli “ñovu jabadika nankashi,” nawa atwesheli kuleka yililu yawu yatama.—Mas. 37:23, 24. w15 10/15 1:10, 11

Antu amakwawu atañaña, kutoñojoka nikulomba nantetemena, amakwawu hachayili. Hadaha enu mpinji yayiwahi kutaña Bayibolu himelela hela henohu kanda muyi nakukama. Amakwawu niwena atañaña Bayibolu nantetemena nihakukama. (Yosh. 1:8) Chuma chalema ‘hikuzatisha mpinji yenu chiwahi,’ dikwila nawu kuzatisha mpinji yenu kutoñojoka Hezu daNzambi mafuku ejima bayi yuma yamukunkulwayiku. Bayibolu yakana nawu Yehova wakakiswila antu ejima atoñojokaña Hezu dindi nawa elaña mwadizañawu. (Mas. 1:1-3) Yesu wahosheli nindi: ‘Antu akutiya mazu aNzambi hiyakwilamu anakooleki.’ (Luka 11:28) Dichi kutoñojoka Hezu daYehova mafuku ejima kukutukwasha kwila yuma yikuleta kalemesha kudi Nzambi. Neyi twila mwenimu, Yehova wukutukiswila chayinu mpinji nawa twakatambwila wumi wahaya nyaka mwituña dadiha.—Yak. 1:25; Chim. 1:3. w15 10/15 4:17, 18

Chelili Yesu yaleji atumbanji twindi nindi akumujaha, Petulu wamulejeli Yesu nindi watela kuditiyila luwi. Yesu welukili nindi Petulu wadiña wamukeña, ilaña welukili cheñi nindi watoñojokeli mwaluwa. Yesu wamukwashili ñahi Petulu niatumbanji amakwawu? Chatachi, wamufumbili Petulu. Kuhiñahu, Yesu walumbulwili yuma yikamwekena antu abulaña kwila nkeñelu yaYehova mumpinji yakala. Wahosheli cheñi nindi Yehova wakakiswila antu ahanaña. (Mat. 16:21-27) Petulu wadizililuku. (1 Pet. 2:20, 21) Lombenu Yehova yayikwashi mwikali nakashinshi kulonda mwiluka chakukwasha mwanenu wakampululu. (Mas. 32:8) Hadaha mwanenu nakumwekana kuneña hela natachiki kuhosha chatama hadi amanakwetu. Indi kwiji munakutoñojoka nenu kudi nsañu yinakuyijindayi. Bayi mutachika kutoñojoka nenu mwanenu nakwila yuma yatama kumbaduku. Ilaña bayi mudiwulaku hohuku hela nenu kukala kukamana kwakweni. Hadaha mwatela kumukwasha kwikala nachikuhwelelu chakola. w15 11/15 2:12, 13

Kukeña kwalala nikunuñañana kwekala nawambuña Yehova kwamwekeshaña nawu diwu ekala munsakililu yalala. Yesu wahosheli nindi: “Neyi mukukeñañana, dihu hakayilukilawu antu ejima nawu mudi atumbanji twami.” (Yow. 13:34, 35) Kapostolu Yowanu niyena wasonekeli nindi: “Kweniku diku kwamwekenaña anyana kaNzambi nianyana kadiyabolu; muntu wabulaña kwila yaloña, hela wabulaña kukeña mana kwindi, hiwakudi Nzambuku. Diyi nsañu yimwatiyili kufumisha kutachi, nawu tukeñañani.” (1 Yow. 3:10, 11) Kukeña nikunuñañana kwamwekeshaña nawu aYinsahu jaYehova hiyatumbanji twaKristu alala, antu anakuzatishayi Nzambi kushimwina nsañu yayiwahi yaWanta mukaayi kejima.—Mat. 24:14. w15 11/15 4:10, 11

Ninetu twatela kwiluka chekala chisemwa niyuma yakuhwelelawu antu amwiluña detu kulonda twiluki mpinji yayiwahi yakuhosha nawu. Mpinjinyi yikwawu yitwatela kuhembelela mpinji yatelela kuhosha? Hekwawu mukwetu yahosha nsañu yinatutiyishi kutama. Chatela tushikeni dakuhosha yuma yatama, twatela kumwena nikudihula netu: ‘Watalisha mudihi? Komana natela kuhosha nindi hansañu yahoshayi?’ Chikuwaha neyi mubula kuhosha. Ilaña neyi tunakukeña kuhosha nindi, twatela kuhembelela neyi tunawundishi muchima. (Yish. 15:28) Hadaha tunakukeña kukwasha antu amuchisaka chetu abula kwikala aYinsahu kulonda amwiluki Yehova. Twatela kuhembelela nikutoñojoka chikupu nsañu yitukuhosha nikwiluka mpinji yayiwahi yinateli kutiyililawu. w15 12/15 3:6, 8, 9

Neyi tunakufuukula njila yakutuukilamu twatela “kuwundisha mumesu,” nikuzatisha kashinshi. Twatela kwila mwenimu sweje-e neyi tunakujinoka yitumbu yinakukeña kutwinkawu. Muntu wutunakwihula nateli kulumbulula chazataña oyu yitumbu? Yuma yinakulumbululayi yinakutiyakana chacheñi? Komana andotolu eteja nawu iyi yitumbu yinateli kuuka antu? (Yish. 22:29) Hadaha muntu wukutuleja nindi kudi yitumbu yinawanuwu yinakuuka antu ilaña andotolu kanda ayiluki. Ilaña kuduhu wunsahu wunakumwekesha nawu mwalala iyi yitumbu yidikwoku? Antu amakwawu anateli kuyileja yitumbu yinabombelumu kupesha. Kwila mwenimu kwatama nankashi. Anukenu nenu, Nzambi watukaanisha kupesha nikupanda.—Isa. 1:13; Kuhit. 18:10-12. w15 12/15 4:16

MuBayibolu mwekala yakutalilahu yawantu amavulu adiña nachikuhwelelu atambwilili spiritu yajila yaYehova ilaña ayili wanyi mwiwulu. Chakutalilahu, Yowanu mpapatishu. Yesu wahosheli nindi kwosi muntu wabadika Yowanu, ilaña wahosheli cheñi nindi Yowanu wakayuula wanyi neyi mwanta mwiwulu. Davidi niyena amulombweli naspiritu yajila. (1 Sam. 16:13) Spiritu yajila yamukwashili kwiluka yuma yakunama hadi Yehova nawa yamukwashili kusoneka nyikanda yikwawu muBayibolu. (Maku 12:36) Hela chochu, kapostolu Petulu wahosheli nindi Davidi “hakandamini mumawuluku.” (Yil. 2:34) Yehova wazatishili spiritu yindi yajila kulonda yiyikwashi kukoña yihayamisha, ilaña hazatishili spiritu yindi kuyitonda kuya mwiwuluku. Komana chinayi mukwila nawu adiña ashinshika wanyi hela hiyashikililumu wanyi kwikala anyuuli mwiwulu? Inehi. Yehova wakayisañula nakushakama muParadisa hamaseki.—Yow. 5:28, 29; Yil. 24:15. w16.01 3:16

Neyi tukuzatilaña hamu nawantu itwakeña, tukukundama kwakwihi nawena. Twayilukaña chikupu chekalawu niyililu yawu. Twelukaña yuma yafwilañawu kwila nichakayilawu. Yesu wazatili naYehova hadaha hadi mabiliyoni ayaaka. Wubwambu wawu wakoleleluku chakwila kwosi chuma chateleleli kuwijimbesha. Adiña anuñañana chikupu nawa adiña nakudikwasha chiyadiña nakuzatila hamu. Yesu walombeli kudi Yehova kukiña atumbanji twindi. Muloñadi? Walombeli nindi: “Kulonda ekali wumu neyi chitwekaletu.” (Yow. 17:11) Neyi twilaña yuma kwesekeja nachakeñañayi Nzambi nikushimwina, tukwiluka chekalayi. Tukwiluka chichawahila kukuhwelela mudi yena nikulondela nshimbi jindi. Nawa neyi tukukundama kwakwihi naNzambi, wukukundama kwakwihi nanetu. (Yak. 4:8) Tukukundama cheñi kudi amanakwetu niahela muloña tunakuhita mukukala kwokumu nawa twelaña yuma yoyimu. w16.01 5:9, 10

Nyawomi niakuwindi awambanda aLuti naOripa, endeli njila yayilehi kufuma kuMowabi nakuya kuIsarela. Hiyayileña, Oripa wafuukwili kufunta kumukala wawu kuMowabi. Ilaña Nyawomi wayili kuIsarela kumukala wawu. Luti welili ñahi? Wateleli kutonda kwakuya. Wukufunta kumukala wawu kuMowabi nakushakama nachisaka chindi tahindi wukuya naNyawomi mukuwindi kuBetelemi? (Luti 1:1-8, 14) Antaña jaLuti ashakamineña kuMowabi. Wadi kufunta kudi antaña jindi nawa adi kumuhemba chiwahi. Welukili antu akuMowabi, idimi nichisemwa chawu. Nyawomi wamulejeli wanyi Luti chisemwa nidimi dakuBetelemi. Nawa Nyawomi wakameneni nindi wakatwesha wanyi kumuwanina Luti iyala hela itala mwakukama. Dichi Nyawomi wamulejeli Luti kufunta kuMowabi. Neyi chitwamona, Oripa “wafuntili kumukala wawu nikudi ankishi indi.” (Luti 1:9-15) Ilaña Luti wafuntili wanyi kudi antaña jindi niankishi jawu. w16.02 2:4, 5

Sawulu nawamashidika indi 3,000 adiña nakumukeñakeña Davidi muchinkalampata muYuda kulonda amujahi. Ilaña ifuku dimu nawufuku, Davidi niantu jindi amuwanini Sawulu niamashidika indi. Adiña mutulu twatweni, dichi Davidi naAbishayi abezeli nakuhita amashidika ejima nakuwana Sawulu. Abishayi wamushawutwilili Davidi nindi: “Ñitiji nimutapi mwani iyoña dimu hohu zwa-a niheseki, hinukumutapa kayeduku.” Ilaña Davidi wamwitejeli wanyi kujaha Sawulu. Wamulejeli Abishayi nindi: “Bayi wumukisañanaku, wambala waYehova awayishawu dehi manji wukutwesha kumwolwela chikasa yobula muloña hinyi?” Davidi hakwila nindi: “Ami kwolwela chikasa wambala waYehova awayishawu dehi manji chinjila nonaku kweyoña dindi didi kwakwihi namutu windi ninsaba yameji tuyi kwetu mwani.” (1 Sam. 26:8-12) Davidi welukili yuma yateleliyi kwila kulonda yekali washinshika kudi Yehova. Welukili nindi watela kumulemesha Sawulu, nawa hamwililuhu chuma chatamaku. Muloñadi? Muloña Nzambi wamutondeli Sawulu kwikala mwanta wawaIsarela. Makonu, neyi chichadiña kunyima, Yehova nakukeña ambuñindi ejima kwikala ashinshika kudi yena nikulemesha antu atondayi kulombola. w16.02 4:1, 2

Wudi kansi wunakukeña kupapatishewa? Neyi dimu, hikukooleka kwakweni. Ilaña chipapatishu hichuma chakuhemesha wanyi. Chamwekeshaña kudi antu nawu wunadihani kudi Yehova, dikwila nawu wunamukani neyi wukutwalekahu kumukalakela haya nyaka nikwila nkeñelu yindi muchihandilu cheyi. Chineli Nzambi walemesha chipapatishu, dichi watela kupapatishewa neyi wunapami chikupu, wukweti mpwila, nawa wuneluki chalumbuluka kudihana kudi Nzambi. Hadaha wunakudimona neyi wunashikilimu wanyi kupapatishewa. Indi kwiji wunakudimona neyi wunashikilimu ilaña anvwali jeyi anakutoñojoka nawu wuchidi kansi nawa kanda wiluki yuma yayivulu. Wukwila ñahi? Bayi wuzeyaku. Ilaña, zatishaku iyi mpinji kulonda wukashikihu kupapatishewa.—w16.03 2:1, 2

Kudi amanakwetu niahela asumbula hela asumbuka namuntu wabula kwikala Chinsahu chaYehova. Amu adizili chalala henohu adisumbula dehi, ilaña mwinikwawu yakaana kwikala Chinsahu. Amakwawu asumbwili hela kusumbuka naChinsahu, ilaña nfumwawu indi kwiji ñodawu wafumini muchipompelu. Satana nakulukuka yisaka. Dimuloña waweni iyala namumbanda amuzatilaña Yehova chatelelelawu kunuñañana. Hela chakwila munashimbuli muwulu hela nehi, toñojokenu yuma yimunateli kwila kulonda mukoleshi wulu wenu. Neyi munashimbuli mumaluwi, munateli kwikala chakutalilahu chachiwahi kudi anadisumbuli katataka. Hadaha munateli kuyitambika kukudifukula kwenu kwachisaka. Akwiluka nawu hela chakwila munashimbuli mumaluwi, mwatela kudikeña nikwikala anuñañana.—Tit. 2:3-7. w16.03 3:14, 15