February

Kuumika kunateli kukalakala ñahi “mudimu” walala wachu mudi etu? (Yak. 1:4) Neyi atweseka, twatela kudiwunjika, kuhameka nikumwekesha kukeña. Chitukuumikaña kweseka, tukwiluka chakumwekesha iyi yilwilu nawa tukwikala akwaKristu apama. Chineli kuumika kwatukwashaña kwikala akwaKristu apama, tunakukeña wanyi kufumpa nshimbi jaYehova muloña wakwila tunakukeña kumanisha kukala. Chakutalilahu, neyi mwatoñojokaña hayuma yatama, bayi mwila yuma yimwatoñojokañaku. Lombenu kudi Yehova kulonda muleki kutoñojoka yuma yatama. Mudi nantaña yenu wunakuyikañesha? Bayi muzeyaku. Fwilenu kumukalakela Yehova. Anukenu nenu: Hakwila twikali nawubwambu wawuwahi naNzambi, chiña tuumika.—Rom. 5:3-5; Yak. 1:12. w16.04 2:15, 16

Antu amavulu adisambaña nekowa, muchidi, chisemwa, musumba hela ituña dawu. Ilaña Yehova hamonaña nindi muntu hela antu amu abadika amakwawuku. Yena wamonaña nindi kwosi wabadika mukwawu. Hela chochu, Yehova watuleñeli munjila yashiyashana, nawa twazañalalaña muloña wakushiyashana mummwekenu. Wakeñaña wanyi nindi tudiwuli chisemwa chetu. Ilaña wakeñaña wanyi cheñi nindi tudimoneña netu twabadika akwetu. (Rom. 10:12) Dichi bayi tudisambeña netuña hela musumba wetu netu wabadika wukwawuku. Neyi tukudisambaña, tukudiñija mupolitiki. Chumichi chamwekeni mumafuku awapostolu. Amanakwetu amakwawu achiHeberu adiña nakwakamena wanyi anfwila awaHeleni. (Yil. 6:1) Tunateli kwiluka ñahi netu tunatachiki kudisamba? Neyi manakwetu hela muhela wakwacheñi nayileji chakwila, komana mwashikenaña kutoñojoka nenu: ‘Dichi twelaña wanyi,’ mukaana nimwanayilejiyi? Neyi dichimwelaña, toñojokenu haniku kufumba kwalema kudi munsona yefuku dalelu. w16.04 4:12, 13

Yesu washimwinini ‘nsañu yaWanta yayiwahi,’ nawa nakukeña atumbanji twindi niwena ashimwineña. Anyi anakushimwina iyi nsañu kudi antu “akunyuza yejima”? (Mat. 28:19) A Yinsahu jaYehova hohu. Niantu atuhela amakwawu etejaña nawu yetu hohu tunakushimwina. Chakutalilahu, tiyenu chamulejeliwu Chinsahu chaYehova wumu kudi kamishonali kapristu wunashakami mumatuña amavulu. Mumatuña ejima ashakaminiyi, wehwileña aYinsahu jaYehova nsañu yashimwinañawu. Kapristu wahosheli nindi, “Wejima wawu asupa muloña akwileña chochimu nawu: ‘Nsañu yayiwahi yaWanta.’” Mazu ahosheliyi kapristu amwekesheli nawu twasupa wanyi, ilaña twanuñañana chineli tudi akwaKristu alala. (1 Kor. 1:10) Kaposhi Kakutalila Kanakubidika Wanta waYehova nikena kahoshaña haWanta waNzambi. Aka kaposhi kadi mumadimi 254 nawa apulintaña naambala yakushika kwakwihi na 59,000,000, diyi magazini yinakuhanawu nankashi kudi antu mukaayi kejima. w16.05 2:6

Hadaha munakukeña kuzata wupayiniya. Munahimpi chihandilu chenu kulonda muzateña nankashi mumudimu wamwiha. Ilaña muchidi kujinoka neyi mukuzañalalaña namali antesha. Hela chochu, Bayibolu yahosha wanyi nawu twatela kuzata wupayiniya hakwila tumukalakeli Yehova. Tunateli kumukalakela Yehova nakashinshi hela chakwila tudi akwakushimwina hohu. Ilaña munjila yikwawu, Yesu wahosheli nindi Yehova wakiswilaña antu adihanaña kukalakela Wanta. (Luka 18:29, 30.) Bayibolu yahoshaña cheñi nawu Yehova watiyaña kuwaha neyi tuzata nañovu kulonda tumuhamekeña nawa wakeñaña nindi tumukalakelaña namuzañalu. (Mas. 119:108) Neyi tukulombaña hayumiyi nikutoñojokahu, tukwila yuma yikutukwasha nawa Yehova wukutukiswila. w16.05 3:13

Akwakristu apama dehi atela wanyi kudimona nawu hiyatela kutaña nsañu jawatwansiku. Kukala kwakuvulu kwasonekañawu muniyi yibaaba yakundamaña kudi akwaKristu ejima. Chakutalilahu, wejima wetu twatela kuhakwilaku kudifukula kwetu, kuleka ndulu, kukaana ikakeja nikuleka kudikunda nawantu atama niyisela. Dichi hela chakwila iyi nyikanda ayisonekeleli atwansi, ilaña nsañu yekalamu yafuma muBayibolu nawa akwaKristu ejima anateli kuhetelamu. Nyikanda yasonekelawu atwansi yinateli kuyikwasha atwansi kukolesha wubwambu wawu naYehova. Akulumpi niwena anateli kuhetelamu.—Mukwa. 12:13. w16.05 5:15, 16

“Yehova Nzambi yetu hiYehova wumu hohu.” Awa mazu alema nankashi. Akolesheli aIsarela kuumika kukala cheñililiwu nikushinda Ituña daChikaninu. Awa mazu anateli kutukolesha ninetu kulonda twakapuluki lukadi lweneni nikwiñila muParadisa. Tutwalekenuhu kudifukula kudi Yehova hohu. Twatela kumukeña nikumukalakela namuchima wetu wejima, namaana etu ejima ninañovu jetu jejima nawa twatela kuzata nañovu kulonda tuleti kuwunda nikunuñañana nawamanakwetu. Neyi tukutwalekahu kwila mwenimu, Yesu wakatusompesha neyi anyikoku nawa twakamona netu awa mazu akwila nawu: “Inzenu enu anakoolekeshuwu kudi Tata yami, swanenu wanta wenu wayiloñesheleluwu kufumisha haaliluwu chikuku champata yamunu mwishina” netu alala.—Matewu 25:34. w16.06 3:2, 20

Kudivwimba kunateli kutuletesha tubuli kwiteja yiluwa yetu. Neyi tukubula kwiteja yiluwa yetu, tukwikala wanyi neyi ndambu yayovu. Ayihilishahu dehi kudi manakwetu hela muhela? Komana mwatwalekelihu kwikala aneña chayitambwiliwu kukooleka kumwadiña naku? Mwelili ñahi? Mwadivwimbili, tahindi mwelukili nenu kwikala mukuwunda nawamanakwenu nikwikala washinshika kudi Yehova dichuma chalema? (Mas. 119:165; Kol. 3:13.) Neyi muntu yatwalekahu kukoña nshidi nawa nakusweka yuma yinakwilayi, chikumukalila kwiteja kufumba kwaNzambi. Nawa chikwikala chaswayi kuvulumuna. (Mukwa. 8:11) Manakwetu wumu wadiña nachaaku chakutala nyevulu yanzekesi wahosheli nindi, “Natachikili kumona aeluda nami atama.” Chaaku chindi chatama chaluwañesheli wubwambu windi naYehova. Antu amakwawu chelukiliwu chuma chelileñayi, amukwashili kudi aeluda. Wejima wetu twawanina wanyi. Ilaña neyi twikala akalisha kudi antu anakutufumba hela tuleyaleyaña neyi tunaluwañeshi chatela tulombi Nzambi yatwanakeni nikutukwasha, muchima wetu wukuchinchika. w16.06 2:5, 6

Antiyilili jaYesu adiña nakwakama yuma yateleleliwu kubula kwakamawu. Yesu wayilejeli kuleka kwakama, nawa kudi chaletesheli yayileji mwenimu. Muloña kusweja kwakama hayuma yitunakaankili kunateli kutukañesha kusha maana kuyuma yakuspiritu. Yesu wayikeñeli atumbanji twindi dichaletesheli yayisoñamishi mapampa kawana Mumpanji yindi yahaMpidi hawubanji wekala mukwakama.(Mat. 6:27, 28, 31, 34) Yesu welukili chumichi. Welukili yuma yakeñañawu antu mukuhanda kwawu. Kubombelahu, welukili kukala kwakamonañawu atumbanji twindi akashakamaña ‘mumafuku akukuminina,’ mwakekala “nyaka yakala.” (2 Tim. 3:1) Iku kukala kunabombelimu, kubula nyidimu, kukandama wuseya, kukeha kwayakuda, niwuzweñi wunakumonawu antu amavulu. Hela chochu, Yesu welukili nindi ‘wumi wabadika kuda nawa mujimba wabadika yakuvwala.’ w16.07 1:8, 9

Neyi tulondela yuma yejima yakeñañayi Yehova, tukutambwila luwi lwindi. Ilaña twakañanyaña kwila yuma yejima yakeñayi. Dichaletesheli Mwanta wamaana Solomoni yasoneki nindi: “Hamaseki hihekala muntu waloña welaña chachiwahi, wabulaña kuvulumunaku.” (Mukwa. 7:20) Kapostolu Pawulu niyena wahosheli nindi: “Antu ejima anavulumuni, anakañanyi kushika mwashikila kulema kwaNzambi,” nawa “wufwetu wanshidi hikufwa.” (Rom. 3:23; 6:23a) Iyi diyuma yafumañamu. Hela chochu, Yehova wayimwekesheleli kukeña antu akwanshidi hayimwekesheleliyi luwi lwabadika. Waheni chawaana chalema nankashi, “Mwanindi wumu hohu,” hamaseki kulonda yatufwili. (Yow. 3:16) Dichi Pawulu wasonekeli hadi Yesu nindi “kulonda akatompeli antu ejima kufwa naluwi lwaNzambi, anamuvwiki dehi chibañula chakulema nimpuhu, nanochu chamweniyi makabi akufwa.” (Heb 2:9) Eñañi, “Chamukunkulu chaNzambi hiwumi wahaya nyaka, mudi Kristu Yesu, Mwanta wetu.”—Rom. 6:23b. w16.07 3:3, 4

Kusumbula hela kusumbuka kwatama wanyi. Kuhanjeka hachatachikili wulu ninkeñelu yawulu kukutukwasha kulemesha wulu nikudiluñisha nkisu jafumañamu. Nzambi chamanishiliyi kuleña muntu watachi, Adama, wamuleteleli atunyama kulonda yayitumbi majina. Ilaña “hikwamwekeni nkwashi yamuntu wamutelelaku.” Dichi Nzambi wamukamikili Adama mutulu twatweni, wafumishili lubavu lwindi lumu, nakutuña nachu mumbanda, nawa wamutwalili kudi iyala. (Kutach 2:20-24.) Dichi, Nzambi diyi watachikili ntanjikilu yawulu. Yesu niyena wamwekesheli hatooka nindi Yehova diyi wahosheli mazu akwila nawu: “Muntu ashiyi tata yindi nimama yindi, akakeli iñodindi, niwena ayedi akekali mujimba wumu.” (Mat. 19:4, 5) Chazatishiliyi Nzambi lubavu lwafumishiliyi kudi Adama hakuleña mumbanda watachi kwaletesheli awa adisumbula kudikunda nankashi. Kwadiña kwosi ntanjikilu yakudiseña hela kusumbula ambanda amavulu. w16.08 1:1, 2

Kakavulu Yesu wadiña nakuleja antu nsañu yaWanta hamuntu hamuntu. Chakutalilahu, wahanjekeli chachiwahi namumbanda heshima daYakoba kwakwihi namusumba waSika. (Yow. 4:5-30) Wahanjekeli cheñi naMatewu kaLevi, wadiña mukwakutambula nyisonku. Matewu wetejeli chamutambikiliwu kudi Yesu kwikala kambanji kindi. Matewu niamakwawu amutiyili Yesu chahosheliyi hampinji yayilehi hikwadiña chawija mwitala daMatewu. (Mat. 9:9; Luka 5:27-39) Yesu wahosheli cheñi munjila yayiwahi naNataneli waheleli antu akuNazareta. Hela chochu, Nataneli wahimpili yitoñojoka yindi. Wadizili yuma yayivulu yamudizishiliwu kudi Yesu, muntu wafumini muNazareta. (Yow. 1:46-51) Dichi twatela kudizisha akwakushimwina amaha kulonda ahanjekeña nawantu munjila yayiwahi. Antu itukukwasha muniyi njila akutiya kuwaha kumona antu anyichima yayovu chinakwakulawu malwihu anakuyihulawu. w16.08 4:7-9

Kukala kweneni neyi kutwalekahu muwulu kunateli kuletesha adisumbula kwambuka hela kudiseña. Hela chochu, nsañu yahosha hakwambuka kweyala namumbanda bayi ayimona neyi yapelaku. Hela chakwila kwambuka kunateli kumwekana neyi diyi njila yayiwahi yakumanishilamu kukala, kunateli kuleta kukala kwakuvulu. Hanyima yakuhosha cheñi mazu ahosheliyi Nzambi hadi iyala kushiya tata yindi namama yindi Yesu wahosheli nindi: “Anabombuwu kudi Nzambi, bayi ayambula kudi muntuku.” (Mat. 19:3-6; Kutach. 2:24) Ichi chalumbulula cheñi nawu kwosi iyala hela mumbanda watela ‘kwambula anabombuwu kudi Nzambi.’ Yehova wamonaña wulu kwikala mpanda yahaya nyaaka. (1 Kor. 7:39) Kwiluka netu wejima wetu akatusompesha kudi Nzambi, kwatela kuletesha adisumbula kuzata nañovu kumanisha kukala swayi swayi kulonda kubuli kutoha. w16.08 2:10, 11

Ayilumbu jetu anateli kutulukuka hampinji yitunabuli kukuhwelela nikutweta hampinji yitunazeyi. Mazu akukolesha akwila nawu ‘kutama bayi kutwimika mushinduku’ amwekeshaña nawu tunateli kushinda kutama. Tunateli kushinda kutama neyi tutwalekahu kuzuña naniwu chilumbu. Ilaña, neyi tubula kwikala atona nikuleka kuzuña, anateli kutushinda kudi Satana, kaayi kindi katama nikubula kuwanina kwetu. Bayi mumwiteja Satana yayitiyishi woma kulonda muzeyeshi makasenu hampinji yimunakuzuñaku! (1 Pet. 5:9) Antu anakudibecha atela kusha maana hachuma chinakufwilawu hakwila nawu ashindi. Hakwila nawu Nzambi yayitiyi kuwaha nikuyinka nkisu, atela kutwalekahu kutoñojoka mazu akukolesha itwatañaña hamukanda waaHeberu 11:6 akwila nawu: “Muntu wukwinza kudi Nzambi chiña etiya nindi wudi kwoku, nindi wasomonaña antu amukeñakeñaña.” Izu dachiGiriki dabalumunawu nawu ‘kukeñakeña’ datalisha mukwila nawu kufwila chikupu nikuzata nañovu yayeni.—Yil. 15:17. w16.09 2:4, 5

Mwizu daNzambi mwekala kufumba kwakuwahi kukutukwasha kutonda yakuvwala yayiwahi yikuleta kalemesha kudi Nzambi. Hela chochu, neyi tuvwala chuma dikwila nawu tunachikeñi. Yakuvwala yitwakeña kulanda hamuntu-hamuntu yaambuka kwesekeja namali itukweti. Ilaña, yakuvwala yetu yatela kwikala yayiwahi, yakadi majilu, yashikila nawa yetejewa mwiluña detu. Tweluka netu chakala kutonda yakuvwala yayiwahi, yatelela nawa yashikila. Mumasitolu amavulu mudi yuma yayivulu yakatataka, dichi chinateli kusenda mpinji yeneni niñovu hakwila nawu muntu yawani masiketi, madiresi nimabulawuzi amawahi hela masuti niyakuvwala yikwawu yabulaña kulamata hamujimba. Hela chochu, akwetu akwakwitiya akumona nawa akuhameka neyi tuzata nañovu kukeña yakuvwala yashikila nawa yatelela. Nawa muzañalu wutwatiyaña hakumulemesha Tata yetu wamwiwulu waleteshaña tudihaneña kuvwala yakuvwala yamulemeshaña yena. w16.09 3:15, 16

Anyana afwikijaña chiwahi. Dichi, anvwali esekenuña kuzatisha yakutalilahu yayivulu hampinji yimunakuyidizisha. Yakutalilahu yashikaña hanyichima yinateli kuletesha mwana yakuhweleli chikupu nindi Bayibolu yoloka. Chakutalilahu, shinshikenu mazu adi munsona yefuku dalelu. Munateli kulumbulula ñahi nenu iwu mukanda awonena? Munateli kutena hohu yikuma yalala. Kwila mumukwasha mwanenu yafwikiji yuma nehi? Mulejenu nenu Yoba wadiñaku henohu kanda kwikali makina akutalisha nachu mwiwulu atenañawu nawu matelescope nimaspaceship. Mwanenu wukwikala namudimu wakutoñojoka chichinateli kukala kudi amakwawu kwiteja nawu chuma cheneni chidi neyi iseki chikali hamukunkulu. Mwana nateli kuzatisha ngunja hela ilola kulonda yalumbululi chikuma kuhitila mukumwekesha nawu chuma chalema nankashi chatela kushakama hachuma chikwawu. Nsañu yamuchidiwu yinateli kuhayamisha mwanenu kwiluka nindi Yehova wadiña nayikuma yasonekeliwu muBayibolu henohu antu kanda ayiluki.—Nehe. 9:6. w16.09 5:9, 12

Chikuhwelelu hichatalisha mukwiluka hohu nkeñelu yaNzambiku. Hichilwilu chaleteshaña muntu kwila yuma kwesekeja nankeñelu yaNzambi. Kukuhwelela njila jaNzambi jakwamwinamu antu, kwakojejaña mukwakwitiya kushimwina nsañu yayiwahi kudi antu. Hakwila nawu twakadiluñishi chihandilu chachiwahi mwituña dadiha daNzambi, twatela kwikala nachikuhwelelu nikuchikoleshaña. Kukolesha chikuhwelelu chetu anateli kukufwanisha kumutondu wakeñekaña menji. Kwambuka namutondu wakutuña kudi muntu, mutondu waweni watwalekañahu kuhimpa. Mutondu waweni womaña muloña wakubula menji hela watwalekañahu kuhanda namukekemena. Neyi wukwikala namenji wanyi, mutondu waweni womaña. Dichekala nichikuhwelelu chetu. Chikukeha nawa chikujiya neyi kuchisha maana nehi. (Luka 22:32; Heb. 3:12) Ilaña neyi tukushaku muchima, chikuhwelelu chetu chikutwalekahu kuhanda, ‘chikupaminaku’ nawa chikwikala ‘chakola.’—2 Tesa. 1:3; Tit. 2:2. w16.10 4:4, 5

Hampinji yadiñawu aDanyeli nialunda nindi muwunkoli, akwaBabiloni akeñeleña ayikwokweji kulonda ayibalumuni ekali amuchisemwa chawu kuhitila mukuyidizisha “idimi dawaKaladeya.” Kubombelahu, akulumpi jachota chanyiloña adiña nakuyidizisha, atumbili aDanyeli nialunda nindi majina achiBabiloni. (Dan. 1:3-7) Ijina damwinkeliwu Danyeli datalishili kudi Bayali nzambi yawu. Chakadi nikujina, Mwanta Nebukaneza wakeñeleña nindi yamutiyishi Danyeli kuwaha nansañu yakwila nindi Nzambi yindi Yehova anamubadiki ñovu kudi nzambi yawaBabiloni. (Dan. 4:8) Hela chakwila Danyeli amwinkelihu yakuda yayiwahi yadileñayi mwanta, “wafuukwili mumuchima windi” nindi ‘kwonti kwindi kudijilola.’ (Dan. 1:8) Muloña wakwila watwalekelihu kudiza ‘nyikanda yajila’ mwidimi dindi, watwalekelihu kwikala wakola kuspiritu hela chakwila wadiña nakushakama mwituña dacheñi. (Dan. 9:2) Dichi, chimwahitili yaaka 70 kufuma hampinji yayiliyi muBabiloni, amwilukili nejina dachiHeberu.—Dan. 5:13. w16.10 2:7, 8

Yesu watondeli ‘nduñu wakashinshi’ kulonda yekali njila yimu hohu yakuhaninamu yakuda yakuspiritu. (Mat. 24:45-47) Kufuma tuhu mu 1919, Yesu Kristu alemeshawu nazatishi iwu nduñu kulonda akwashi atumbanji twindi kutiyishisha Mukanda waNzambi nikulondela kufumba kwekalamu. Neyi twovwahila nshimbi jamuBayibolu, tukukwasha chipompelu kwikala chakadi majilu, chawunda nawa chanuñañana. Wejima wetu twatela kudihula netu, ‘Komana novwahilaña njila yinakuzatishayi Yesu makonu?’ Izu daYehova datunuñañeshaña nachibalu chamwiwulu chakuloñesha kwindi. Chakutalilahu, kaprofwetu Ezekeli wamweni chimwenu mwadiña ikalu damwiwulu demeneneñaku chibalu chakuloñesha kwaNzambi kwamwiwulu. (Ezek. 1:4-28) Chineli Kristu niañelu ajila keña ajilumuni kanu kaayi katama, ikalu daYehova dinakwenda lufuchi kulonda dihakwiliku chiyuulu chindi nikujilika ijina dindi dajila! w16.11 3:9, 10

Twapompaña hamu kulonda tudizi nikudikolesha wumu namukwawu neyi chochelileñawu atumbanji twaYesu. (1 Kor. 14:31) Niambuña aNzambi akuluka yitembi akeñekaña kuyikolesha. Toñojokenu hadi Yoshuwa. Wamukalakeleli Nzambi nakashinshi hadi yaaka yayivulu. Ilaña, Yehova wamulejeli Mosi kulonda yamukoleshi nindi: “Chiña wumuleja Yoshuwa, wumukundeji, wumukoleshi; muloña yena diyi wakazambukañahu dehi kumbidi yawantu awa, wakayiswanisha ituña diwakamona.” (Kuhit. 3:27, 28) Yoshuwa amwinkeli mudimu weneni wakulombola aIsarela Mwituña daChikaninu. Wamweni ikañesha nikumushinda kamu kunjita. (Yosh. 7:1-9) Dichi Yoshuwa wateleleli kukoleshewa. Dichi tuyikolesheña aeluda kushilahu niankoñi añinza azataña nañovu kwakamena nyikoku yaNzambi.—1 Tesa. 5:12, 13. w16.11 1:12, 13

Atudizi aBayibolu elukili nawu hiyateleleli kulejamu antaña jawu, amabwambu jawu akwawu akwachechi hakufuma kwawu mukudifukula kwakutamba hohuku. Akeñeleña nawu kaayi kejima keluki mwatalisha Babiloni Muneni, chivumbi wansakililu. Chakadi nikujina, mukachi ka December 1917 nikumatachikilu achaaka cha 1918, Atudizi aBayibolu antesha ahanini makopi amatilakiti 10,000,000 mwadiña mutu wakwila nawu, “Kuhumuka kwaBabiloni” kumwekesha kutama kwaBabiloni. Fwikejenu chahililiwu akulumpi jansakililu; ilaña Atudizi aBayibolu atwalekelihu kwiluka kulema kwaniwu mudimu. Atwalekelihu kwovwahila ‘Nzambi bayi antuku.’ (Yil. 5:29) Tunateli kukunkulula netudi? Kufuma tuhu hampinji yafuminiwu muwuduñu muBabiloni Muneni hampinji yikwadiña njita, awa amayala niambanda akwaKristu adiña nakuleka yilwilu yatama nikukwasha amakwawu kwila mwenimu. w16.11 5:2, 4

Amakwawu anateli kuhosha nawu aka kapetulu kahosha hadi antu ekala muchalala nawantu abula kwikalamu hela akwaKristu nawabula kwikala akwaKristu. Hela chochu, Pawulu wasonekeleleña ‘ejima adiña muRoma akeñawu kudi Nzambi, atambikawu kwikala akwakujila.’ (Rom. 1:7) Dichi, Pawulu wambwileña akwaKristu endeleña mwaya mujimba nawakwaKristu endeleña mwaya spiritu. Wesekejeli ‘kushakama mwaya mujimba’ ‘nakufwila nshidi’ yadiña ‘nakuzatika muyidi yawu yamujimba.’ (Rom. 7:5) Pawulu hahosheleñayi hadi ‘afwilileña yuma yakumujimba,’ wateneneña antu aluwankana hela asha maana kuyuma yafwilañawu aweni. Awa diwu antu eñija nyitu yawu chikupu muyilwilu yawuvumbi hela yuma yikwawu. w16.12 2:5, 7

Antu amakwawu akamaña muloña wayuma yeliliwu kunyima. Mpinji yikwawu Mwanta Davidi watiyileña nindi ‘kuluwaluwa kwindi kwabadikili nihamutu windi.’ Wahosheli nindi: “Nabulumi chakubuluma nakutaza mumuchima wami.” (Mas. 38:3, 4, 8, 18) Hanu dinu, Davidi wadi kwila ñahi? Welili ñahi? Wamukuhweleleli Yehova nindi wukumutiyila luwi nikumwanakena. (Mas. 32:2, 3, 5) Mpinji yikwawu munateli kwakama nakukala kumukweti. Chakutalilahu, Davidi hasonekeliyi Masamu 55, wakameneni nindi akumujaha. (Mas. 55:2-5) Hela chochu, wetejeli wanyi kwakama kuzeyeshi chikuhwelelu chindi mudi Yehova. Davidi walombeleña mpinji yejima haniku kukala nawa welukili nindi watela kuzatila hayuma yeletesheleña yakameña. (2 Sam. 15:30-34) Dizilenu kudi Davidi. Chatela mwakameña nakukala kumukweti, zatenu hakumina ñovu jenu kumanisha kukala kwenu nawa shilenu jejima mukasa aYehova. w16.12 3:14, 15

Davidi watambwilili kufumba kwamufumbiliwu kudi Kaprofwetu waYehova Natani. Davidi walombeli cheñi kudi Yehova, nakushimuna nshidi jindi nawa wamulombeli Yehova chakufuma hamuchima kumwanakena. (Mas. 51:1-17) Chatela yatwalekihu kuneña nanshidi yakoñeliyi, Davidi wadizilili kuyiluwa yindi. Wafuntishilihu wanyi nshidi yakoñeliyi. Wadiña washinshika kushika nimpinji yafwiliyi; niyinu mpinji Yehova wuchidi kwanuka kashinshi kindi. (Heb. 11:32-34) Tukudizila kwodi kudi Davidi? Neyi tukoña nshidi yahamesu bwi-i, twatela kubalumuka chikupu mumuchima nikulomba kwanakena kudi Yehova. Twatela kushimuna nshidi jetu. (1 Yow.1:9) Twatela cheñi kudimona nawa eluda kulonda atukwashi kuspiritu. (Yak. 5:14-16) Neyi tulondelaña ntanjikilu yaYehova twamwekeshaña netu twakuhwelela netu wukutuuka nikutwanakeña. Dichi twatela kudizila kuyiluwa yetu, kusha maana hakumukalakela Yehova nikutalila yuma yatushiikayi.—Heb. 12:12, 13. w17.01 1:13, 14

‘Yilwilu yakudinka wanta’ hiyilwilu yamuchidinyi? Bayibolu yazatisha iyi nhoshelu hakutena muntu welaña chuma mukunyakashana chinabuli kumwitejawu kwila, dikwila nawu nakudinka wanta. Hamuloña wanshidi yitwaswana, mpinji yikwawu twadinkaña wanta. Ilaña neyi chinamwekeshi chakutalilahu chaMwanta Sawulu, neyi tukwikala nachilwilu chakukeña kwikala atachi, tukwikala hela twakekala mukukala naNzambi. Masamu 119:21 yahoshaña nawu Yehova, ‘wayihosholaña adinka wanta.’ Muloñadi chayihosholelañayi? Yilwilu yakudinka wanta yatama kubadika yiluwa yitwakoñaña chakadi kwiluka. Chatachi, neyi tubula kudikehesha, tukukañanya kulemesha Wunyuuli waYehova. Chamuchiyedi, neyi tuzata nyidimu yinabuli kutwinkawu, tukutiyashana wanyi nawakwetu. (Yish. 13:10) Nawa chamuchisatu, neyi antu eluka nawu tunamwekeshi yilwilu yakudinka wanta, chikutwitiyisha nsonyi nawa tukusawuka. (Luka 14:8, 9) Yilwilu yakudinka wanta yayiwahi wanyi. Neyi chochahosha Nsona, kudikehesha kwakuwahi nankashi. w17.01 3:4, 5

Muntu wukutwesha wanyi kumwekesha yilwilu yaNzambi yawanina muloña wakubula kuwanina. Adama wajimbesheli chihandilu chindi chakumbidi nawa wasambwishili anyanindi kubula kuwanina, nshidi nikufwa. (Rom. 5:12) Waletesheli anyanindi abuli kwikala nakukooleka kwakushakama haya nyaaka. Kubombelahu, Adama naEva adi kwikala wanyi namwana hela ejikulwawu awanina. Kufuma tuhu hadikañiluwu Adama naEva naNzambi, Satana Diyabolu natwalekihu kudimba antu kushika nikulelu. (Yow. 8:44) Hela chochu, Nzambi wuchidi wakeña antu. Hela chakwila Adama naEva adikañili, Yehova nakukeña antu ekali nawubwambu wawuwahi nayena. Hakeñaña antu kufwaku. (2 Pet. 3:9) Hanyima yakuvulumuna, Nzambi waloñesheli njila yakukwashilamu antu kwikala nawubwambu wawuwahi nayena hampinji yoyimu alondeleña nshimbi jindi jaloña jenkeliku.—Yow. 3:16. w17.02 1:12-14

Neyi tukumonaña kakawahi mudi akwetu neyi chelañayi Nzambi, tukusweja kulemesha mudimu wutukweti mukuloñesha kwaYehova. Chatela tufwileña yifulu hela kudiñija munyidimu yawakwetu kulonda tutambuli oku kukooleka, twatela kudikehesha kulonda tulombeña wukwashu nikulondela munafuukuliwu akwetu. Twazañalalaña neyi akwetu anayinki kukooleka. Nawa tukumuhameka Yehova hakumona chinakukiswilayi ‘anakwetu ejima mukaayi.’ (1 Pet. 5:9) Cheñi, tukufuukulaña chiwahi neyi tudikehesha kulonda tumoneña yuma neyi chayimonañayi Yehova. Kuhitila mukudiza mpinji yejima, kulomba nikuzatisha yuma yitwadizaña kukutukwasha kwikala nachinleji chachiwahi. (1 Tim. 1:5) Tukulemeshaña akwetu nankashi. Neyi tuzata nañovu, chikaninu chaYehova chakwila nawu ‘wakamanisha kutudizisha,’ chakatukwasha kusoña mukabu wakudikehesha niyilwilu yikwawu yayiwahi.—1 Pet. 5:10. w17.01 4:17, 18

Akwetu akwakwitiya atelela kulemeshewa nikuyinka kavumbi. Sweje-e aeluda anakulombola atelela kulemeshewa. Twayilemeshaña awa amanakwetu hichidi namuloña netuña kwafumawu, shikola yatañawu, kwashakamañawu hela mali akwetiwuku. Bayibolu yayitenaña nawu ‘yawaana yawamayala,’ nawa diwu akamenaña antu mukuloñesha kwaNzambi. (Efwes. 4:8) Toñojokenu hadi aeluda amuchipompelu, ankoñi añinza, amamembala amuKometi yaMutayi niamamembala aMwizanvu Dalombolaña. Amanakwetu niahela amuyaaka yawapostolu alemesheli chikupu amanakwetu alombweleña, ninetu makonu dichitunakwila. Twadifukulaña wanyi kudi añimenu achipompelu chawakwaKristu hela kuyimona nawu hiyañelu neyi tudi nawu. Hela chochu, twayinkaña kavumbi nikalemesha awa amanakwetu hanyidimu yakalakalañawu nihakudizoza kwawu.—2 Kor. 1:24; Chim. 19:10. w17.03 1:13

Yesu wambukili chikupu naHerodi Agiripa I, wadiña mwanta hela netu nlomboli wawaYudeya chimwahitili yaaka 8. Hachidika hadiña antu alema, Herodi wavwalili “yakuvwala yawanta.” Izaza dawantu adiñaku dahosheli nawu: “Idi hiizu danzambi, bayi neyi damuntuku!” Herodi watiyili kuwaha nankashi nachamuhamekeliwu. Ilaña “kañelu kaYehova wamuleteleli Herodi yikatu muloña wamulemesheli Nzambi wanyi, kuhiñahu amudiili kudi mavunyi nawa wafwili.” (Yil. 12:21-23) Chakadi nikujina, kwosi wunsahu wunakumwekesha nawu Herodi amutondeli kudi Yehova kwikala nlomboli. Kwambukaku, Yesu wamwekesheli nawu amutondeli kudi Nzambi, nawa watwalekelihu kumulemesha Yehova hamu neyi Nlomboli Wabadika wawantu jindi. Chiyuulu chaYesu bayi neyi chateleleli kushakama hohu yaaka yantesha. Hanyima yakumusañula Yesu wahosheli nindi, “Wanyinka wuswa wejima wakutala yuma yamwiwulu niyahamaseki.” Nawa wahosheli cheñi nindi “Tiyenu! Ami nukwikalaña nanenu mafuku ejima kushika nikukukuma kwanshakaminu yamakonu.”—Mat. 28:18-20. w17.02 3:20, 21