March

Chineli amanakwindi adiña nalwisu nawa amuheleli, amuha ili chakwila amutambwili iluña dindi. (Ansomp. 11:1-3) Yefwata hetejeli yilwilu yawu yatama yimuluwañeshiku. Tuneluki ñahi? Chelili akulumpi jamuza enzi nakumulembelela nawu yayikwashi, wetejeli. (Ansomp. 11:4-11) Yefwata wakeñeli chikupu kukwasha antu jaYehova ilaña hashili maana kukukala kwadiñayi nakuku. (Heb. 11:32, 33) Komana ninetu tunateli kudizila kudi Yefwata? Chumanyi chitwatela kwila neyi amanakwetu akwaKristu anatuhilishi hela neyi anatwili chatama? Bayi twiteja chineñi chitukañeshi kumukalakela Yehovaku. Bayi muleka kuya kukupompa kwawakwaKristu hela kuhanjeka nawamanakwetu muchipompeluku. Tumwimbujolenu Yefwata wabulili kushaku muchima hakukala kwamweniyi, yena watwalekelihu kwila yuma yaloña niyayiwahi.—Rom. 12:20, 21; Kol. 3:13. w16.04 1:7, 9, 10

Twatela kuumika kushika nikunsa, bayi hakapinji kantesha. Fwikijenu mbopolu yinakujiya. Hakwila apuluki, antu atela kusala nakushika kuchikumu. Muntu wukuzeyela hakachi wukufwa. Cheñi, neyi muntu yazeya henohu kanda yashiki kuchikumu wukufwa. Munjila yoyimu, neyi tunakukeña netu tukashakami mwituña dadiha, twatela kutwalekahu kuumika. Twikalenu nayilwilu neyi yakapostolu Pawulu wahosheli nindi: “Hitwazeyañaku.” (2 Kor. 4:1, 16) Tweluka chikupu netu Yehova wukutukwasha kuumika kushika nikunsa. Pawulu wasonekeli hansona yaAroma 8:37-39 nindi: “Tunekali akwakwimika mushindu nikubadikamu, nañovu jayena watukeñeli. Muloña neluki chikupu nami hela kufwa, hela wumi, hela añelu, hela mawanta, hela yuma yakatataka, hela yuma yamba kenza, hela yuma yikweti ñovu, hela kuleha kwakwiwulu, hela kukunama, hela chuma chacheñi chaleñeluwu chimu, hiyikutwesha kutwambula kukukeña kwaNzambi kwekala mudi Kristu Yesu, Mwanta wetuku.” w16.04 2:17, 18

Lombenu kudi Yehova kulonda yayinki maana akwiluka chimwatela kwila neyi mudi mukukala kwakudiñija munsañu jamatuña. Neyi mumona kukala kwamuchidiwu mulombenu kulonda yayikwashi. Hadaha anateli kuyikasa mukaleya hela kuyibabesha muloña wakwikala ashinshika kudi Yehova. Neyi ayila mwenimu, lombenu kulonda mwikali ahamuka hakwila muleji antu chinaleteshi mubuli kudiñija munsañu jamatuña. Yehova wukuyikwasha kuumika. (Yil. 4:27-31) Yehova watwinka Bayibolu kulonda yitukoleshi. Toñojokenu hamavasi akuyikwasha kubula kudiñija munsañu jamatuña. Ilukenu awa mavasi nawa yanukenuña, muloña akayikwasha neyi mudana Bayibolu. Bayibolu yinateli cheñi kuyikwasha mukuhweleli chikupu yuma yakanayi Nzambi kumbidi. Twatela kukuhwelela yuma yakanayi Nzambi hakwila tuumiki makabisha. (Rom. 8:25) Tondenu mavasi alumbulula yuma yimwakelaña mwituña dadiha nawa difwikijenu mudi dehi mwomu. w16.04 4:14, 15

Akulumpi jamuKristendomu ashimwinaña wanyi nsañu yahosha haWanta waNzambi. Neyi anakuhosha haWanta, ahoshaña nawu wekala mumuchima wamuntu. (Luka 17:21) Alejaña wanyi antu nawu Wanta waNzambi hinfulumendi yamwiwulu yinakuyulewa naYesu. Ilaña avula kuhosha hadi Yesu haKrisimansi niha Isita. Ahoshaña wanyi nawu Wanta wukafumishahu kukala kwejima kunakumonawu antu makonu nikufumishahu kutama kwejima heseki. (Chim. 19:11-21) Mwalala, anlomboli jaKristendomu eluka wanyi yuma yakelayi Yesu, Mwanta waWanta waNzambi. Nawa chineli eluka wanyi mwatalisha mazu aYesu, eluka wanyi muloña waweni wuyatelela kuya nakushimwina. w16.05 2:7, 8

Twili netu kudi yakuvwala yimwakeña, ilaña muneluki nenu neyi muyivwala mukutuntwisha akwenu muchipompelu. Bayibolu yahoshahu wanyi hanoyu yakuvwala yimunakukeña kuvwala. Hanu dinu mukwiluka ñahi chatoñojokañayi Yehova? Bayibolu yatulejaña nawu: “Ambanda adiwahishi nakuvwala mahina chalumbuluka, nansonyi nikuwundisha mumesu; bayi nakuyindayinda nsuki, hela nawuru hela namperola, hela mahina asweja kulema wuseyaku; ilaña adiwahishi nanyidimu yayiwahi yatelela ambanda adishimunaña nawu twaakamaña Nzambi.” (1 Tim. 2:9, 10) Ilaña, ambuña aYehova ejima, kushilahu tuhu niamayala anateli kudizila kunawa mazu. Neyi tukudizoza, tukutoñojoka chakutiyawu antu amakwawu nayakuvwala yitukuvwala. Nawa chineli twayikeña amanakwetu, tukukeña wanyi kuyihilisha hela kuyituntwisha.—1 Kor. 10:23, 24; Fwi. 3:17. w16.05 3:14

Adama chadikañiliyi naNleñi yindi, hekalili mwana kaNzambi cheñiku. Ilaña anyana kaAdama amavulu atonda Yehova kwikala Nyuuli yawu. (Heb 12:1) Kuhitila mukwovwahila Nleñi yawu, anamwekeshi nawu anakukeña yekali Tata yawu nawa Kañemi kawu bayi Satanaku. (Yow. 8:44) Kashinshi kawu kudi Nzambi katwanukishaña mazu adi munsona yalelu. Akwakudifukula alala aYehova niwena makonu azataña nañovu kwikala adizoza nawa ovwahila. Eluka nawu kutena Yehova nawu Tata yawu hikukooleka, nawa akeñaña yekali Kañemi kawu. Tukwiteja kwikala neyi ndambu yayovu yinateli kuzatishayi Nzambi kuwumba chuma chalema? Twamonaña amanakwetu niahela netu achidi kuyiwumba kudi Nzambi? w16.06 1:2, 3

Chineli tudi kwakwihi nakwiñila mwituña dadiha, nawa chikuhwelelu chetu chidi mukweseka. Dichi twatela kudishinshika kulonda twiluki neyi tudi nachikuhwelelu chakola. Hanu dinu tunateli kwiluka ñahi netu tudi nachikuhwelelu chakola? Twatela kutoñojoka hamazu aYesu ekala haMatewu 6:33. Dihulenu nenu: ‘Komana yuma yinafwilaña kwila kumbidi nikufuukula kwami yamwekeshaña nawu nakuhwelela chikupu mazu aYesu? Nateli kujiña kukupompa hela kubula kuya mumudimu wakushimwina kulonda nikali namali amavulu? Nateli kwila ñahi neyi mudimu wami wunakunmanishila mpinji yeneni niñovu? Nukwiteja kaayi kuwumba hela kunkañesha kumukalakela Yehova?’ Nyichima yetu yikuchinchika neyi tukulondela wanyi chahosha Bayibolu hakudikunda nawantu atama, ahañawu muchipompelu niyisela. Munateli kwila ñahi neyi mukañanya kwovwahila? Mwatela kudishinshika swayi swayi mumoni neyi mudi nachikuhwelelu. Zatishenuña Izu daNzambi mpinji yejima kulonda mwololi yitoñojoka yenu. w16.06 2:8, 9

Mukaayi kejima, kwekala kuloñesha kumu kwekala nawantu amukeña Yehova nawa akeñaña kumukalakela. Awa antu hiyaYinsahu jaYehova. Hela chakwila awanina wanyi nawa aluwañeshaña, Yehova wayilombolaña naspiritu yindi yajila. Mu 1914, kwadiña hohu antu antesha adifukwileña kudi Yehova. Ilaña Yehova nakiswili mudimu wakushimwina. Chinafumimu, antu amavulu anadizi chalala chamuBayibolu nawa anekali aYinsahu jindi. Yehova walumbulwili iku kuvula chikukekala hahosheliyi mazu adi munsona yalelu nawa wahosheli nindi: “Ami Yehova yami nakachinyakisha hamwaka wachu.” Makonu tunakumona iwu wuprofwetu chiwunakushikijewa. Antu jaYehova adi neyi muza weneni. Muloña mukaayi kejima mwekala nyuza yayivulu yidi nawantu antesha kubadika kuvula kwawantu jaYehova. w16.06 4:1, 2

Yesu welukili chikupu nindi chineli Tata yindi wamwiwulu wakamenaña atujila, kwila yakañanya kwakamena antu nehi. (1 Pet. 5:6, 7) Bayi neyi wukusha yakuda mukanwa ketuku, ilaña nateli kutukiswila neyi tuzata nañovu kudima yakuda hela kuwana mali akulanda yuma yakudikwasha nachu. Neyi tunakankili, nateli kuzatisha antu amakwawu kutukwasha. Hela chakwila Yesu wahosheli wanyi Yehova chayakamenañayi atujila hakukama, wayinka maana niyuma yayivulu yakutuñisha nachu yisakala. Munjila yoyimu, Yehova nateli kutukwasha kwikala netala dakushakamamu nachisaka chetu. Hampinji yadiña nakuhoshayi mazu adi munsona yefuku dalelu, Yesu chakadi nikujina, welukili nindi keña yahani wumi windi kukoola antu. (Esekejenu Luka 12:6, 7.) Yesu wafwilili wanyi atujila ahaluzwizu, ilaña wafwilili etu kulonda twakadiluñishi wumi wahaya nyaaka.—Mat. 20:28. w16.07 1:11-13

Antu aswanini ñahi nshidi nikufwa kwatusambukila wejima wetu? Bayibolu yahoshaña nawu: “Chavulumwiniyi muntu wumu [Adama], kufwa hikukwila mwanta” hadi anyana kaAdama. (Rom. 5:12, 14, 17) Ilaña tukweti kukooleka, muloña tunateli kutondahu kubula kutuyuula kudi nshidi. Neyi tukuhwelela mulambu wefutu danyiloña waKristu, tukwikala muchiyuulu chaYehova chakukeña. (Rom. 5:20, 21) Hela chakwila tudi akwanshidi, bayi twiteja nshidi yitwiyuleña muchihandilu chetuku. Neyi tuvulumuna, twatela kulomba Yehova yatwanakeni. Dichi, twekala muchiyuulu chaNzambi chakukeña. Yumanyi yafumañamu? Pawulu walumbulwili nindi: “Luwi lwaNzambi . . . lwatufumbaña nawu tuleki kusekesha Nzambi, nikufwila yatama yampata yamunu mwishina, tushakami nyaka yinu nakuwundisha mumesu, nikuloña nikwakama Nzambi.”—Tit. 2:11, 12. w16.07 3:5, 6

Wulu watachi wadiña mukukala muloña Adama naEvu afumpili nshimbi jaYehova. “Kapela mukulu,” Satana Diyabolu, wamudimbili Evu nindi kuda ‘kumutondu wakwiluka nachu yayiwahi niyatama’ kukumuletesha yekali nawuswa wakufuukulahu yayiwahi niyatama. Chabuliliyi kumwihula nfwimwindi haniyi nsañu, walemesheli wanyi mutu wachisaka. Adama chatela yovwahili Nzambi, watambwili mukabu wamwinkeliwu kudi Evu. (Chim. 12:9; Kutach. 2:9, 16, 17; 3:1-6) Nzambi chamwihwileñayi Adama chuma chakoñeliyi, watachikili kufwisha ñodindi namuloña Evu niyena welili nindi kapela diyi wamudimbili. (Kutach. 3:12, 13) Iku kwadiña hikutwamba hohu! Chineli awa antu atachi amwovwahilili wanyi Yehova, ekalili ayilumbu jindi. Bayi tuyimbujolaku! Hakwila nawu wulu wukoli, adisumbula atela kwiluka yuma yatela kwilawu nawa atela kumwovwahila Yehova. w16.08 1:1, 4, 5

Muwulu mwekalaña kukala neyi yuma yinakukeñawu adisumbula yabadika muchipimu chawu kumwekana nehi. Neyi muntu kuwana muzañalu wakeñeleñayi muwulu nehi, waneñaña, nawa wahilaña. Kwambuka munkulilu, chakuzatisha mali, chakuhanda nawatuwuku nichakukulisha nyana kunateli kuleta kukala muwulu. Hela chochu, akwaKristu amavulu adisumbula awanaña njila yatelela yakumanishilamu iku kukala muloña etejaña Nzambi kuyilombola. AkwaKristu adisumbula adi nakukala kweneni atela kulomba wukwashu kudi aeluda. Awa amanakwetu akuluka yitembi anateli kukwasha adisumbula kuzatisha kufumba kwekala Mwizu daNzambi. Hakumanisha kukala kwamuwulu, adisumbula atela kulomba spiritu yaYehova kuyikwasha kuzatisha nshimbi yamuBayibolu nikumwekesha nyikabu yindi yakuspiritu.—Ŋal. 5:22, 23. w16.08 2:11-13

Yesu wadiña nakushimwina mpinji yejima. Hela chochu, wadiña nampinji yakukwasha antu amwekesheleña mpwila yansañu yayiwahi. Chakutalilahu, Yesu wadizishili izaza dawantu, iku nemani muwatu. Haniyi mpinji, wamwinkeli Petulu mudimu wakukwata nshi nakuhosha mazu adi munsona yefuku dalelu. Mazu ahosheliyi Yesu niyuma yeliliyi mwafuminidi? Petulu nialunda nindi ‘ashiyili yuma yejima nakumulonda Yesu.’ (Luka 5:1-11) Nikodemu, wadiña wamuchota chanyiloña chaSanihedirini, watiyili kuwaha chatañishileñayi Yesu. Wakeñeleña kudiza nsañu jajivulu, ilaña watiyileña woma wawakwawu neyi wukuhosha naYesu mukachi kawantu. Yesu wazatishileña mpinji yindi chiwahi chakwila ayili nakumuwana kudi Nikodemu nawufuku. (Yow. 3:1, 2) Mwana kaNzambi washiyileñaku mpinji yakukolesha chikuhwelelu chawantu. Kwila tuzata nañovu kufuntila kudi antu anamwekeshi mpwila nikuyidizisha Bayibolu nehi? w16.08 4:10, 11

Twelukaña chikupu netu Yehova wajila nawa hakweti majiluku, nawa yuma yakeñañayi diyi yinateli kutukwasha. Cheñi kwabombelamu kulemesha chinakutiyawu nichinakutoñojokawu akwetu. Dichi, ‘twendaña naNzambi yetu chakudizoza’ kuhitila mukwikala nachihandilu chachiwahi kwesekeja nayuma yakeñañayi nikulemesha chatiyañawu antu amakwawu. Yakuvwala yetu bayi yiletesha antu atujinokeña nawu twadifukulaña wanyi kudi Yehova. Amanakwetu niahela kushilahu niantu acheñi atela kutumona nawu tunashikilimu chikupu kwimenaku Nzambi waloña. Wakeñaña nindi tuvwaleña chiwahi nawa twafwilaña kulondela mwatulejañayi. Kuhameka amanakwetu niahela hanvwalilu yawu, kukuletesha akokoli antu akweti nyichima yayiwahi kwiteja nsañu yawumi yekala muBayibolu nikuleta kalemesha nimuzañalu kudi Yehova. w16.09 3:18-20

Yakoba wadiña mukwakulwisha chikupu nawa wamwekesheli chikupu nindi wazatili nañovu. Chakadi nikujina, amusomweneni muloña wakutatakena kwindi. (Kutach. 32:24-26) Amutumbili ijina dadiwahi nawu Isarela, (datalisha mukwila nawu “Mukwakulwisha [Mukwakutatakena] naNzambi” hela “Nzambi Walwishaña”). Yakoba watambwili nkisu yitunakufwila ninetu, dikwila nawu kututiya kuwaha nikutukiswila kudi Yehova. Racheli ñoda Yakoba nawa akeñeliyi, wafwilili kumona chakashikijayi Yehova chakakiswilayi anyana kanfumwindi. Ilaña, hadiña nanyanaku. Mumafuku indi, kubula kwikala nanyana kwadiña hikukala kweneni. Indi Racheli wekalili ñahi nañovu jakutwalekahu kuzuña nakukala kwamuzeyesheli nawa kwabadikili muñovu jindi? Hazeyeli nakuleka kuchiñejaku. Ilaña watwalekelihu kulwisha kuhitila mukulomba nankashi. Yehova watiyili kulomba kwaRacheli kwakulembelela kwakufuma hamuchima, nawa nkumininaku amukiswilili, wekalili nanyana.—Kutach. 30:8, 20-24. w16.09 2:6, 7

Chikwikala chalema neyi mukudizisha anyanenu kulema kwakulondela yishina yamuBayibolu. (Mas. 1:1-3.) Kudi njila jajivulu jakwililamu mwenimu. Chakutalilahu, munateli kuleja anyanenu afwikiji nawu anakubuukila kuyitutu kwekala antu antesha, nawa atela kutonda antu antesha atela kuya nakushakama nawu. Kuhiñahu yihulenu nenu, “Antu atela kwikala nayilwilu yamuchidinyi hakwila nawu akashakami chiwahi nawakwawu?” Munateli cheñi kuyileja kufumba kwakuwahi kwekala ha Aŋalija 5:19-23. Muniyi njila munateli kudizisha anyanenu yikuma yiyedi. Chatachi, nshimbi jaNzambi jaletaña kuwunda nikunuñañana. Chamuchiyedi, Yehova nakutuloñeshela chihandilu chachiwahi mwituña dadiha kuhitila mukutudizisha makonu. (Isa. 54:13; Yow. 17:3) Munateli kwidisha iyi yikuma kuhitila mukutondahu nsañu yimu yamwekeni munyikanda yetu. Yinateli kufuma muyibaaba yidi neyi, “Bayibolu Yahimpa Yihandilu Yawantu,” muKaposhi Kakutalila. w16.09 5:13, 14

Hela chakwila tukweti nyidimu yayivulu, twatela kwikala nampinji yakwikala nakudiza kwahalwetu nikudifukula kwachisaka. (Efwes. 5:15,) Hela chochu, bayi tufwileña kutaña mafu amavulu hela kuloñesha kupompa kulonda twakuleñahu hakupompa hohuku. Twatela kuzata nañovu kulonda Izu daNzambi ditushiki hanyichima nikukolesha chikuhwelelu chetu. Hitwatela kutoñojoka hohu hayuma yinakukaankilawu akwetu kuspirituku, ilaña twatela nikutoñojoka hayuma yitunakaankili etu kuspiritu. (Fwi. 1:9, 10) Twatela kwiluka netu neyi tunakuloñesha kuya mwiha, kupompa, hela mpanji, nsañu yitwatañaña hitunateli kuyikundamisha kudi etu aweni hohuku. Chakutalilahu: Hela chakwila mukwakuteleka yakuda wasambilaña kuyitompa henohu kanda yayihani kudi antu, hanateli kuhanda hohu nayakuda yatompañayiku. Neyi nakukeña kutwalekahu kwikala wakola kumujimba, watela kuloñesha yakuda yayiwahi yatela kudayi. Munjila yoyimu, twatela kuzata nañovu kulonda tudiishi muchima wetu nayakuda yakuspiritu yikumanisha kukaankila kwetu. w16.10 2:10, 11

Bayibolu yalumbulula mwatalisha chikuhwelelu hamukanda waHeberu 11:1. Chikuhwelelu chashindamena hayuma yiyedi yitwabulaña kumona: (1) “Yuma yitwachiñejaña”—yinateli kubombelamu yuma yatukanawu kumbidi yakamwekana yitwabulahu dehi kumona ilaña yichidi kanda yimwekani, chidi neyi kukuma kwayuma yatama yejima nikwinza kwetuña dadiha. (2) “Yuma yakadi kumonewa.” Muniyi nsañu, izu dachiGiriki dabalumunawu nawu ‘chinjikijilu chamwekeshaña’ datalisha kuwunsahu walala wayuma yabulaña kumwekana, yidi neyi kwikalaku kwaYehova Nzambi, Yesu Kristu, añelu niyuma yikwawu yekala muWanta wamwiwulu. Twamwekeshaña ñahi netu yuma yitwachiñejaña yalala nawa netu twakuhwelela muyuma yitwabula kumonahu dehi yashimunawu Mwizu daNzambi? Twamwekeshaña netu tukweti chikuhwelelu kuhitila munhoshelu nimuyilwilu yetu. w16.10 4:6

Yehova niYesu alemesha chikupu yuma yitwelaña hakukwasha Wanta, hela chakwila twahanaña yuma yantesha kwesekeja nahanakumi ñovu jetu. (Luka 21:1-4; 2 Kor. 8:12.) Chakutalilahu, amanakwetu niahela ashinakaja dehi azataña nañovu kulonda ashimwini nikupompa mpinji yejima. Kwila tuyihameka nikuyikolesha nehi? Koleshenuña akwenu mpinji yejima. Neyi mumona muntu neli chuma chachiwahi, kwila mumusakilila nehi? Toñojokenu yuma yayimwekeneni aPawulu niBaranaba hampinji yadiñawu kuAntiyoki muPisidiya. Anyuuli amusinagogi ayilejeli nawu: “Enu ana kwetu, neyi mukwetuhu kadizu kakukundeja nachu antu, kihoshenu.” Pawulu wayikundejeli kuhitila mukuhana mpanji. (Yil. 13:13-16, 42-44) Neyi mudi nezu dakukolesha, kwila mudihosha nehi? Neyi tukukoleshaña akwetu, niwena akatukoleshaña.—Luka 6:38. w16.11 1:3, 15, 16

Kwikala mukuloñesha kwaYehova hikukooleka kweneni. Chineli tweluka yuma yakeñañayi Nzambi, twatela kwila yuma yayiwahi nikuhakwilaku chiyuulu chindi. Twatela ‘kuhela yuma yatama’ neyi chelañayi Yehova, muloña kaayi kanakutaminaku chikupu. (Mas. 97:10) Twakaanaña kudibomba nawantu atama elaña nawu: “Yatama nawu yayiwahi, yayiwahi nawu yatama.” (Isa. 5:20) Twafwilaña kwikala akadi majilu kumujimba, muyitoñojoka nikuspiritu muloña twakeñaña kumuzañalesha Nzambi. (1 Kor. 6:9-11) Twamukeña Yehova, twamukuhwelela nawa twamwekeshaña netu twashinshika kudi yena kuhitila mukulondela nshimbi jindi jasonekawu muMukanda windi wajila. Nawa twalondelaña iji nshimbi hetala, muchipompelu, kumudimu, kushikola nikudi kwejima. w16.11 3:13

Atudizi aBayibolu adiña nakudikita chikupu. Ilaña kutachika mu 1914 nakushika mu 1919 hiyadiña nakwovwahila mpinji yejima jinfulumendi jamwituña dawuku. Dichi, mpinji yikwawu, adiña nakudiñija munjita. Chakutalilahu, chelili presindenti wamuUnited States yahoshi nindi ifuku daMay 30, 1918, dakekala ifuku dakulomba kuwunda, Kaposhi Kakutalila kalejeli Atudizi aBayibolu kudibomba munichi chidika. Amanakwetu amakwawu ahaniniku mali akukwasha antu ayileña kunjita nawa amakwawu asendeli mata nijimpoku nakuya kunjita. Chadi kuluwa kukunkulula netu Atudizi aBayibolu hatachi ayitwalili muwunduñu muBabiloni Muneni muloña akeñekeleña kuyikwasha nikuyifumba. Hela chochu, elukili chikupu nawu atela kudambula nansakililu yakutwamba nawa hampinji yaNjita Yakaayi Yatachi afuminimu chikupu.—Luka 12:47, 48. w16.11 5:9

Ilaña munateli kujinoka nenu muloñadi Pawulu chayisoñamishileñayi akwaKristu awayishewa kuwubanji wakushakama ‘mwaya munjimba.’ Komana akwaKristu makonu etejayi Nzambi kwikala amabwambu jindi nawa amonañayi kuloña anateli kwikala muwubanji wamuchidiwu? Chawushona, mukwaKristu wejima nateli kutachika kwenda mwaya mujimba wanshidi. Chakutalilahu, Pawulu wasonekeli nindi amanakwetu amakwawu muRoma adiña anduñu “amavumu awu,” dikwila nawu afwilileña wuvumbi, yakuda, yakunwa hela yuma yikwawu. Amakwawu adiña ‘nakudimbeka akadi maana.’ (Rom. 16:17, 18; Fwil. 3:18, 19; Yuda 4, 8, 12) Anukenu, mpinji yimu, manakwetu wumu muKorinda wakamineña “ñoda tata yindi.” (1 Kor. 5:1) Dichi, Nzambi wawahishili hakumuzatisha Pawulu kusoñamisha akwaKristu ‘kubula kwenda mwaya mujimba.’ (Rom. 8:5, 6) Iku kusoñamisha kuchidi nikuzatika makonu. w16.12 2:5, 8, 9

Kuhanjeka namuntu imwakuhwelela, kunateli kuyikwasha kubula kwakama. Mwinikwenu, ibwambu denu hela aeluda muchipompelu anateli kuyikwasha kubula kwakama nankashi. Kuhosha chakadi kuhita mumbadi kukuleñela ayikwashi kumanisha kukala kwenu. Bayibolu yatulejaña nawu: “Habula mpuña yuma yiwafuukwili kwila hiyamwekanañaku; ilaña havula akwakushakama hampuña yakolaña.” (Yish. 15:22) Yehova wakwashaña cheñi akwaKristu kubula kwakama kuhitila mukupompa kwamulungu nimulungu. Haniku kupompa, mukwikalaña nawakwenu akwakwitiya ayikeña nawa afwilaña kudikolesha wumu namukwawu. (Heb. 10:24, 25) Iku ‘kukwashañana’ kukuyikolesha nawa chikuyipelela kubula kwakama.—Rom. 1:12. w16.12 3:17, 18

Neyi twakata hela tudi nakukala kudi kwejima kutukukañanya kumanisha, twatela kuumbila kwakama kwetu hadi Yehova nakukuhwelela netu wukutwakamena. (1 Pet. 5:6, 7) Nawa twatela kuzata nañovu kulonda tuheteleñamu mukupompa kwawakwaKristu niyuma yikwawu yakuspiritu. (Heb. 10:24, 25) Indi anvwali ashinshika akweti anyana ahañewa? Samweli wakanjikijileña wanyi anyanindi akula dehi kutwalekahu kwikala ashinshika kunshimbi jayidizishiliyi. (1 Sam. 8:1-3) Washili yuma yejima mumakasa aYehova. Hela chochu, Samweli watwalekelihu kwikala washinshika nikumutiyisha Tata yindi wamwiwulu Yehova kuwaha. (Yish. 27:11) Makonu, chuma chamuchidiwu chinakuyimwekena nianvwali akwaKristu. Eluka nawu Yehova watambwilaña akwanshidi abalumukaña mumuchima. (Luka 15:20) Hampinji yoyimu, awa anvwali azataña nañovu kulonda ekali ashinshika kudi Yehova, nakukuhwelela nawu yakutalilahu yawu yikukwasha anyanawu kufunta mwiyinda. w17.01 1:15, 16

Muntu wadizoza wekala wadikehesha, welukaña hakumina ñovu niyuma yinateli kwilayi, wetejaña neyi naluwañeshi nikwiteja munahoshi akwawu. Kudizoza kwamutiyishaña Yehova kuwaha. MuBayibolu, kudikehesha kwatalisha mukwiluka chitwekala niyuma yitunateli kubula kwila. Kwesekeja nachazatishileñawu idi izu mwidimi dadeni kwafumishiliwu, idi izu datela damwekesheleña chitwatela kumona akwetu. Tunateli kwikala ñahi nayitoñojoka hela yilwilu yakubula kudikehesha? Talenu yuma yamwekeshaña kubula kudikehesha. Tunateli kutachika kudimona kulema kubadika amakwawu muloña wakukooleka kutukweti. (Rom. 12:16) Tunateli kutachika kwila yuma yikuletesha antu kutumona nawu twadivwimba. (1 Tim. 2:9, 10) Hela tunateli kutachika kuleja antu yuma yatela kwilawu niyatela kubula kwilawu chakubula kwiluka netu tunatachika kudinka wanta.—1 Kor. 4:6. w17.01 3:6-8

Chayinu mpinji, mudimu wawantu jaYehova wunatandi kwejima. Chitunakuzata nyidimu yayiha, kunakwinza njila yayiha yakuzatilamu nawa iyi njila yinabombelimu kuzatisha tekinoloji. Akulumpi amakwawu chinakuyikalila kwendela hamu naniku kuhimpa. (Luka 5:39) Hela chakwila amakwawu anakutwesha, atwansi akweti ñovu yakuzata kubadika akulumpi. Dichi, akulumpi akumwekesha kukeña neyi akwasha atwansi kudiloñesha kuzata nyidimu yikwawu. (Mas. 71:18). Chinateli kuyikalila amanakwetu adi nakukooleka kweneni mukuloñesha kudizisha atwansi. Amakwawu achinaña nawu akuyitambula kukooleka kukwetiwu nawa atoñojokaña nawu atwansi hiyakutwesha kuzata neyi chazatañawuku. Amakwawu niwena nawu hiyakweti mpinji yakudizisha amakwawuku. Ilaña atwansi, atela kudizoza neyi anayinki wanyi kukooleka. w17.01 5:3, 4

Yesu wekalili wawanina neyi chadiñayi Adama. (Yow. 1:14) Ilaña kwambukaku naAdama, Yesu wamwovwahilili Yehova neyi chakeñeleña muntu wawanina kumwovwahila. Nihampinji yadiñayi mukweseka kweneni, Yesu wavulumwini wanyi hela kufumpa nshimbi jaNzambi. Chineli wadiña wawanina, Yesu wakuulili antu kunshidi nikukufwa kuhitila mukuyifwila. Wadiña muntu wawanina, washinshika nawa wamwovwahila Nzambi, chuma chateleliyi kwilayi Adama. (1 Tim. 2:6) Yesu wekalili mulambu wefutu danyiloña denzulwili njila yakukuulilamu “antu amavulu,” amayala ambanda nianyana. (Mat. 20:28) Mwalala, ifutu danyiloña diyi nsapi yakwenzunwina chisu chakushikija nkeñelu yaNzambi yatachi. (2 Kor. 1:19, 20) Ifutu danyiloña dakwashaña antu ashinshika kwikala nakuchiñeja kwakwikala nawumi wahaya nyaaka. w17.02 1:15, 16

Fwikijenu mudi halwendu. Hakwila mushiki kumunakuya mwatela kwenda wufuku wejima. Nawa kudi mwidima. Ilaña muneluki nenu chikwacha mukumona chejeji. Chihandilu chinateli kwikala neyi ilu lwendu. Hadaha munateli kuhita mukukala kweneni, nawa mukuneña. Yesu niyena dichatiyiliyi. Chamujahileñawu hamutondu wakuyandishila, amusawili nawa watiyili kukata. (Heb. 12:3) Iyi yatela diyi yadiña mpinji yakala nankashi muchihandilu chindi! Chumanyi chamukwashili kuumika? Bayibolu yahoshaña nawu womikili. Yesu washili maana hamasomu adi kutambwilayi neyi yomika, sweje-e muloña wafwilileña kujilika ijina daNzambi nikuhakwilaku wuswa windi wakuyuula. Welukili nindi iku kweseka kwadiña kwakapinji kantesha ilaña masomu akatambwilayi mwiwulu ahaya nyaaka. Kweseka kumunakumona makonu hadaha kweneni nankashi, ilaña anukenu nenu kwakapinji kantesha. w16.04 2:10

Mukanu kaayi katama, antu neyi avulumuna amonaña nawu chidi hohu chiwahi, dichi eluka wanyi muloña waweni chakeñekelañawu ifutu danyiloña. Antu amavulu elukaña chekala nshidi, yuma yafumaña munshidi nichitwatela kwila hakwila nawu tusubuki kuwuduñu wanshidi. Antu akweti nyichima yayovu adizaña nawu Yehova watemesheli Mwanindi hamaseki kulonda yatukuuli kunshidi nikukufwa muloña wakukeña kwindi kwabadika niluwi lwindi lwasweja. (1 Yow. 4:9, 10) Mulambu wefutu danyiloña daKristu wamwekeshaña kukeña kwaNzambi kwabadika niluwi Lwindi lwasweja. Neyi tukuhwelela mumulambu wefutu danyiloña daYesu, nshidi jetu akajanakena nawa chinleji chetu akachitookesha. (Heb. 9:14) Iyi hinsañu yayiwahi twatela kulejaku antu amakwawu! w16.07 4:6, 7

Tunateli kumwekesha chikupu netu twanakenaña neyi tukuhwelela mwifutu danyiloña. Izu daNzambi datukana nawu nshidi jetu anateli ‘kujijimañesha.’ (Yil. 3:19-21.) Yehova watenaña ambuñindi awayishewa naspiritu yindi nindi anyanindi kushindamena hefutu danyiloña. (Rom. 8:15-17) Etu amavulu twekala hadi “anyikoku acheñi” chidi neyi Yehova wasoneka majina etu hasetifiketi yakukundaminamu kudi yena. Neyi tunekali dehi awanina nawa tunahiti dehi hakweseka kwakukumishaku, Yehova wakatutambwila neyi anyanindi ahamaseki akeñewa, munjila yikwawu chidi neyi wakasayina hasetifiketi. (Rom. 8:20, 21; Chim. 20:7-9) Kukeña kwaYehova kwakeñayi anyanindi kwahaya nyaaka. Nkisu jakaleta ifutu danyiloña yahaya nyaaka. Ichi chawaana chakamana wanyi. Kwosi muntu wunateli kututambula. w17.02 2:15, 16

Hela chakwila twawanina wanyi, tunateli kwikala ibwambu daYehova nikumukalakela. Mpinji yejima anukenuña chimwekalili ibwambu daYehova, welukili cheñi nindi mwaluwañeshaña nawa mwakaluwañeshaña. Ilaña Yehova wayitondeli kwikala ibwambu dindi. Yehova watukeñeli nankashi chakwila watwinkeli chawaana chalema. Watemesheli Yesu hamaseki kulonda yahani wumi windi neyi ifutu danyiloña. (Yow. 3:16) Neyi tunakoñi chiluwa, twatela kulomba kudi Yehova kulonda yatwanakeni. Nawa hamuloña wefutu danyiloña, tunateli kukuhwelela chikupu netu akutwanakena nawa tukwikala amabwambu jindi hela chakwila twawanina wanyi.—1 Tim. 1:15. w16.05 4:6, 7