June

Yefwata wadiña namwana wumu hohu, dichi hikwadi kwikala muntu wakuswana ijina niiluña daYefwataku. (Ansomp. 11:34) Hela chochu, Yefwata wahosheli nindi: “Yehova namwasamina dehi mukanwa kami, hinukutwesha kubalumuna mwokuku.” (Ansomp. 11:35) Yehova wetejeli mulambu wabadika waYefwata nawa wamukiswilili. Komana ninenu mwadi kwikala ashinshika neyi Yefwata? Neyi tudihana kudi Yehova, twamukanaña netu tukwilaña nkeñelu yindi hela chikukala ñahi. Tuneluki netu mpinji yikwawu chatukalilaña kwila yuma yitunakani. Twatiyaña ñahi neyi anatwili nawu twili yuma yitunabuli kukeña? Neyi tuleka kwakama nawa tumwovwahila Nzambi, tukumwekesha netu twelaña mutunakani. Kudihana kwetu kunateli kutuneñesha, ilaña nkisu yaYehova yabadika.—Mal. 3:10. w16.04 1:11, 14, 15

Yesu wazatishaña iyi spiritu yajila kulombola nachu yipompelu. Watuleja nindi twatela ‘kutiya munakuhosha spiritu nayipompelu.’ Spiritu yajila yinateli kutukwasha kushinda kweseka nikushimwina chakadi woma. Yinateli cheñi kutukwasha kufuukula chiwahi. Dimuloña waweni wutwatela kuzatila nañovu tupompeña mpinji yejima kulonda tutambwili wukwashu waspiritu yaNzambi. Kakavulu, twahoshaña hawuprofwetu wamuBayibolu chiwunashikijewi. Chumichi chatukwashaña kukuhwelela chikupu netu yikaninu yaYehova yakashikijewa. Amanakwetu niahela atukoleshaña hampinji yahanañawu jimpanji, kwakulahu nikumuhameka Yehova mukwimba chakufuma hamuchima. (1 Kor. 14:26) Nawa neyi tuhanjeka nawu henohu kupompa kanda hela hanyima yakupompa, twatiyaña kuwaha muloña twekalaña nawamabwambu amavulu atwakamenaña.—1 Kor. 16:17, 18. w16.04 3:6, 7

Yesu wahosheli nindi atumbanji twindi akadizisha nikushimwina nsañu yayiwahi “mwahita matuña ejima.” Ayilejeli kwilisha atumbanji “munyuza yejima.” (Mat. 24:14) Dikwila nawu nsañu yayiwahi atela kuyishimwina mukaayi kejima. A Yinsahu jaYehova hohu diwu anashikiji wuprofwetu waYesu wakwila nawu nsañu yayiwahi akayishimwina mukaayi kejima. Muloñadi wutunahosheli mwenimu? MuUnited States, mwekala akulumpi jaKristendomu kwakwihi na 600,000, ilaña mudi aYinsahu jaYehova akubadika 1,200,000 anakushimwina nsañu yayiwahi. Mukaayi kejima, mwekala atupristu awaKatolika kwakwihi na 400,000, ilaña mudi aYinsahu jaYehova kubadika ha 8 miliyoni anakushimwina nsañu yayiwahi mumatuña 240. Mwamweni, aYinsahu jaYehova anakushimwina mukaayi kejima nsañu yayiwahi nawa chumichi chinakuleta mpuhu nikalemesha kudi Yehova.—Mas. 34:1; 51:15. w16.05 2:13, 14

Antu amavulu atoñojokaña nawu akweti wuswa wakutonda yuma yinakeñiwu. Hiyakwakudivwimba, akwalwisu, akwakudibecha nawa abulaña kwakamena nawu kufuukula kwawu kukuneñesha akwawu. Yilwilu yamuchidiwu yaleteña yikonkojola kudi antu. (Kutach. 3:1-5) Bayibolu yatulejaña nawu neyi tunyakalaña kuzuwa, tukutiyañanaña wanyi nawakwetu nawa tukukoñaña nshidi. Yesu chahaniniyi Mpanji yindi yahaMpindi, walejeli atumbanji twindi kwikala mukuwunda nikubula kutoboka, hela chakwila amweni neyi hiyatela kwila mwenimuku. Chakutalilahu, wayilejeli kwikala naluwi, kwikala mukuwunda nawantu, kuleka kuzuwa, kumanisha kukala swayi nikukeña ayilumbu jawu.—Mat. 5:5, 9, 22, 25, 44. w16.05 1:4, 5

Etu amavulu twahimpili yilwilu yetu kulonda twileña yuma kwesekeja nachahosha Bayibolu. Ilaña niyinu mpinji, kudi yilwilu yitwatela kuleka hakwila nawu twikali neyi Nzambi niKristu. (Efwes. 5:1, 2; 1 Pet. 2:21) Chakutalilahu, hadaha twatobaña nankashi hela kutuñula nikuhosha chatama hadi akwetu. Indi kwiji tunateli kwakamena netu akwetu akutoñojoka hela kuhosha nawu tunakwila yuma yaloña wanyi. Hela tuneseki kuleka yilwilu yatama hadi yaaka yayivulu ilaña tunakañanyi. Anukenu nenu twawanina wanyi. (Kol. 3:9, 10) Hela chakwila hanashimbuli kufuma hitwapapatisheweli, twatwalekañahu kukoña yiluwa. Kakavulu, tunateli kutachika kufwila kwatama hela chinateli kutukalila kuhimpa yilwilu yetu. Hadaha, chinatukalili kuleka iyi yilwilu hadi yaaka yayivulu.—Yak. 3:2. w16.05 4:3-5

Antu amakwawu anateli kuhosha nawu, ‘Natachikili kulemesha mwanfumbiliwu anvwali jami hinekalili nanyana.’ Chitunakukula, tunateli kutachika kulemesha kufumba muloña kwamwekeshaña kukeña. (Heb. 12:5, 11.) Yehova watukeña muloña tudi anyanindi, dichaleteshaña yatufumbeña nikutuwumba. Wakeñaña nindi twikali namaana nimuzañalu nawa tumukeñi neyi hiTata yetu. (Yish. 23:15) Watiyaña kutama neyi yamona tunakukabakana, nawa nakukeña wanyi nindi tukafwi nanshidi jetu. (Efwes. 2:2, 3) Henohu kanda tumwiluki Yehova, twadiña nayilwilu yatama. Ilaña Yehova watuwumbili nikutukwasha kuhimpa, chakwila tukweti yilwilu yayiwahi.—Isa. 11:6-8; Kol. 3:9, 10. w16.06 1:7, 8

Atwansi amavulu ekala adizoza nawa afwilaña kudiza. (Mat. 18:1-3) Dichi anvwali atela kukwasha anyanawu kwiluka chalala nikuchikeña henohu achidi atwansi. (2 Tim. 3:14, 15) Hakwila nawu anvwali eli mwenimu, atela kukeña chalala awenawu nikuzatisha yuma yadizañawu muBayibolu muchihandilu chawu. Neyi anvwali ela mwenimu, anyana chikuyipelela kukeña chalala. (Dan. 10:11, 19) Cheñi, anyana akwiluka nawu kufumba kwawanvwali jawu kwamwekeshaña nawu ayikeña kudi anvwali jawu nikudi Yehova. w16.06 2:14, 17

Davidi wadiña nayilwilu yayiwahi, dichaletesheli Yehova yamukeñi nankashi. (1 Sam. 13:13, 14) Hela chochu, Davidi niyena wakoñeli nshidi. Uriya chayiliyi kunjita, Davidi welili wuvumbi naBatisheba ñoda Uriya, nawa wemitili. Davidi wakeñeleña wanyi antu kwiluka yuma yeliliyi. Dichi walejeli Uriya kufunta kunjita kwayiliyi, nawa wamukanjikijili kuya kwitala dindi. Davidi watoñojokeleña nindi Uriya wukukaama nañodindi kulonda chemitayi antu akamoni nawu diyi mweni mwana. Ilaña Uriya wayili wanyi kwitala. Dichi Davidi wakwatili kafuta kakumujaha Uriya kunjita. Hamuloña wanshidi yahamesu bwi-i yakoñeliyi, Davidi nichisaka chindi ayibabesheli. (2 Sam. 12:9-12) Ilaña Yehova wamutiyilili luwi nawa wamwanakeneni. Welukili nindi Davidi wadiña muntu wamuwahi. (1 Anya. 9:4) Neyi mwadiñaku, mwadi kutiya ñahi nanshidi yakoñeliyi Davidi? Mwadi kuleka kumukalakela Yehova? w16.06 4:7

Etu aYinsahu jaYehova, twatiyililaña kukusoñamisha kwaYesu. Tuneluki netu tunakushakama ‘mumpinji yakukuminina’ nawa katatakichi “lukadi lwasweja” lutachiki. (Dan. 12:4; Mat. 24:21) Tunakumona majita, yilwilu yatama yinakuswejelaku, kuluwa, nsakililu yinakudambujola, kukeha kwayakuda, yipupu ninyitentashi yinakumwekana mukaayi. Tuneluki chikupu netu mudimu wakushimwina waWanta anakuwuzata kudi antu jaYehova mukaayi kejima. (Mat. 24:7, 11, 12, 14; Luka 21:11) Tunakutalila yuma yakatwililayi Mwanta neyi nenzi nichikashikijewa nkeñelu yaNzambi. (Maku 13:26, 27) Ilaña, hela tukweseka chamuchidinyi tukutwesha wanyi kwiluka chaaka, ifuku hela mpinji yikatachika lukadi lwasweja. w16.07 2:2-4

Yehova watwinka kukooleka kwakukundama kwakwihi netanda dindi damwiwulu mukulomba muloña waluwi lwindi. Watwinka iku kukooleka kuhitila mudi Mwanindi, “mudi yena dimu mutunabulili woma, tunamoni dehi hawiñililu wakadi kwakama, nakukuhwelela kutwamukuhwelelaña.” (Efwes. 3:12) Mwamweni, Yehova wamwekeshaña luwi hakutwinka kukooleka kwakumulomba. Pawulu watukolesheli kulomba kudi Yehova chakadi woma, kulonda “tutambuli kwanakena, tumoni luwi lwakutukwasha hitukumona kukala.” (Heb. 4:16b) Neyi tuholokela mukukala kudi kwejima, twatela kumulomba Yehova kulonda yatukwashi. Kakavulu, Yehova wakulaña kulomba kwetu kuzatisha akwetu akwaKristu, kulonda ‘tuhosheña chakadi woma netu, Yehova diyi nkwashi yami, hinukutiya womaku, antu akuñila chumanyi?’—Heb. 13:6. w16.07 3:12, 13

Hela chakwila Nowa nianyanindi asatu asumbwili ambanda wumu wumu, kwadiña antu adiña nawuhadi. Muyisemwa yayivulu, antu elileña wuvumbi, nawa ichi chaaku cheñilili nimujinsakililu. Abarama (Abarahama) nañodindi Sarayi (Sara), chamwovwahililiwu Nzambi ayili kuKenani, idi ituña denzeli yilwilu yabulileña kulemesha wulu. Dichi Yehova wahosheli nindi, Sodoma naGomora yatela kujilumuka muloña muniyi nyisumba antu akoñeleña nshidi yahamesu bwi-i. Abarahama walombweleña chiwahi chisaka chindi, nawa Sara washili chakutalilahu chachiwahi chakwovwahila nfumwindi. (1 Pet. 3:3-6) Abarahama wazatili nañovu hakwila mwanindi Isaka yasumbuli mumbanda wadifukwileña kudi Yehova. Chuma chochimu chakwashili mwana kaIsaka Yakoba, wukweti anyana ekalili ankakulula yanyichidi 12 yawaIsarela. w16.08 1:10

Awa mazu awuprofwetu anakushikijewa munanu mafuku akukuminina. Chaaka chamudimu cha 2015 mukaayi kejima mwadiña akwakushimwina aWanta azataña mpinji yejima, 8,220,105. Mazu akukumishaku amuniwu wuprofwetu akundama mukwaKristu wejima, muloña Tata yetu wamwiwulu wahosha nindi: “Ami Yehova yami nakachinyakisha hamwaka wachu.” Neyi chochelukañayi muntu wudi mumotoka nindi motoka yinakutemuka, ninetu twelukaña iwu mudimu wakwilisha atumbanji chiwunakuyilaku hambadi. Tunakutiya ñahi halwetu nachinakuyilaku mudimu hambidi? Tunakuzata neyena chineli tudi akwakushimwina aWanta? Amanakwetu niahela amavulu anakusonekeshaku wupayiniya wakukwasha hela wampinji yejima. Tunakuzañalala wanyi chitunakumona antu amavulu anakuya nakuzatila kudi kukankila hela kuzataku nyidimu yikwawu yakuspiritu? Hela tudi amanakwetu hela ahela twatela ‘kusweja kukalakala mumudimu waMwanta.’—1 Kor. 15:58. w16.08 3:1, 2

Chihahitili mpinji yantesha hohu hanyima yakuyifumisha muwuduñu muEjipitu, aIsarela ayilukukili kudi aAmaleki. Yoshuwa wadiña wahamuka walombweli aIsarela kunjita kuhitila mukulondela mwashimwiniyi Mosi. Hayina mpinji, Mosi wasendeli Aroni naHuri kuya hampidi yadiña kwakwihi hatwesheliwu kumona hazuñilileñawu. Mosi walondeleli kafuta kakasiliwu hakwila nawu ashindi. Mosi watwalekelihu kunyamuna mwiwulu makasindi nimukombu waNzambi walala. Mosi chatwalekelihu kwila mwenimu, Yehova wenkeli ñovu makasa awaIsarela kulonda ashindi aAmaleki. Hela chochu, chelili makasa aMosi azeyi nawa atachiki kufunta mwishina, aAmaleki atachikili kushinda. Dichi, Aroni naHuri anyakeli ‘nakunona ilola, amushililidu Mosi kwishina, washakaminihu; Aroni naHuri akwatilili makasindi, iwu mbadiyi, iwu mbadiyi makasindi akola nikukola nakushika nihaholokeli itañwa.’ Mwamweni, aIsarela ashindili muloña wachikasa chaNzambi chañovu chayikwashili.—Kwi. 17:8-13. w16.09 1:5-7

Pawulu wakuhweleleli chikupu nindi nateli kushinda kuhitila mukushindamena hadi Yehova mukulomba nikukuhwelela mulambu waYesu wefutu danyiloña. Indetu? Neyi tukulwishaña hakufwila kushinda kuzeyazeya kwetu kwakumujimba, twakatwesha. Munjilanyi? Kuhitila mukwimbujola Pawulu, kushindamena chikupu hadi Yehova bayi hañovu jetuku nikuhwelela mwifutu. Mpinji jikwawu Nzambi nateli kutwiteja kulonda tumwekeshi chitunakutiya hakukala kutukweti. Chakutalilahu, tunateli kwila ñahi neyi (hela muntu wamuchisaka) tunakati chikatu cheneni hela tunakukabakana nankashi? Twatela kumwekesha netu twamukuhwelela Yehova chikupu kuhitila mukulomba kulonda yatwinki ñovu yakutwalekahu kwikala ashinshika, kutwalekahu kwikala namuzañalu nikwikala akola kuspiritu. (Fwi. 4:13) Yuma yamonañawu antu amavulu, chili mumafuku aPawulu hela chayinu mpinji, yamwekeshaña nawu kulomba kunateli kutukwasha kwikala cheñi nañovu nikukuhwelela nakutwalekahu kuumika. w16.09 2:14, 15

Chipompelu chawakwaKristu akusambila chichatoheli, kukala kwachaambu kwatachikili cheñi. A Yudeya ahosheleña idimi dachiGiriki atachikili kutooba nawu antuluwa jawu adiña nakuyakamena wanyi. Hakwila nawu amanishi iku kukala, apostolu atondeli amayala 7 kulonda akameneña antuluwa. Awa amayala ejima adiña namajina achiGiriki, chamwekesheleña nawu apostolu akeñeleña kumanisha swayi kukala kwamwekeni kwachaambu chayisemwa chadiña hakachi kawakwaKristu akusambila. (Yil. 6:2-6) Hela chakwila tuneluki hela nehi, wejima wetu twaluwankana nachisemwa chetu. (Rom. 12:2) Kubombelahu, kakavulu twatiyaña antuñi netu, akwetu itwazataña nawu hela akwetu akashikola, anakuhosha chatama hadi antu afuma kwituña dacheñi, akumuchidi wacheñi hela ekowa dacheñi. Komana yilwilu yamuchidiwu yatuluwañeshaña? Nawa twelaña ñahi neyi muntu nakusupisha muza wetu, hadaha kulebumuna yuma yekala muchisemwa chetu? w16.10 1:7, 8

‘Kwiteja chikupu’ kwatalisha mukwiluka yuma yitunateli kubula kumona hanoyu mpinji. (Heb. 11:3) Dichi, antu etejaña chikupu, azatishaña yitoñojoka yawu, bayi neyi mesu nimatu awu hohuku. Kuloñesha kwaYehova kunaloñeshi yitwa yayivulu yasandujolawu chiwahi kulonda yitukwashi. Yitwa yeniyi yinateli kutukwasha ‘kumona’ Nleñi yetu namesu etu achikuhwelelu. (Heb. 11:27) Yitwa yeniyi hiyozelu yidi neyi vidiyo yaThe Wonders of Creation Reveal God’s Glory, mabuloshuwa aWas Life Created? niThe Origin of Life—Five Questions Worth Asking, nimukanda waIs There a Creator Who Cares About You? Kakavulu, muAwake! mwekalaña yibalu yehujolañawu asayantisiti niantu amakwawu ashimunaña yuma yayiletesheli atachiki kumukuhwelela Nzambi. Yibaaba yahoshaña hamutu wakwila nawu, “Was It Designed?” mwekalaña yakutalilahu yanyitapu nanyitapu yayileñaleña yakuhayamisha yitwamonaña. Kakavulu, asayantisiti afwilaña kwimbujola yileñaleña yamuchidiwu. w16.09 4:4, 5

Antu ashinshika ashimunawu mumukanda waAheberu kapetulu 11 afwili henohu “mwana” akaniniwu, Yesu Kristu, kanda yenzululi njila yakuya mwiwulu. (Ŋal. 3:16) Hela chochu, awa antu akayisañwila kuwumi wahaya nyaaka muparadisa hamaseki. (Mas. 37:11; Isa. 26:19; Hos. 13:14) Mukanda waaHeberu 11:13 wahosha hadi antu amakwawu adiñaku henohu akwaKristu kanda nawu: “Wenawa ejima afwili mukukuhwelela chakadi kutambula yikaninu, akuminini dakuyimwena maaya, nakuyisambilila iku yichidi kwakulehi.” Wumu hakachi kanawa wadiña Abarahama. Komana welukili kuwaha kwakuchiñeja chihandilu chachiwahi hampinji yakayuulañayi “mwana” akaniniwu? Yesu waheni ñakwilu yalumbuluka yanilu lwihu hampinji yahosheliyi kudi ayilumbu jindi nindi: “Tata yenu Abarahama waluñili chamweniyi ifuku dami; chadimweniyi hakuzañalala.” (Yow. 8:56) Chumichi dichamwekeni kudi Sara, Isaka, Yakoba niantu amakwawu achiñejeli haWanta wakumbidi wakwila, ‘mukwakuwupima nikuwutuña yowu Nzambi.’—Heb. 11:8-11. w16.10 3:4, 5

Twatela kumusakilila Yehova chikupu hakuzatisha spiritu yindi yajila kulonda yatumwekesheli chalala nikutuletesha tukuhweleli nsañu yayiwahi. (Luka 10:21.) Bayi tuleka kumusakilila Yehova hakutukundamisha kwakwihi nayomwenindi kuhitila mudi Mwanindi, ‘Ntwamina Muneni nawa Mukwakuwanisha chikuhwelelu chetu.’ (Heb. 12:2) Hakwila nawu tumwekeshi kusakilila haluwi lwasweja lwamuchidiwu, twatela kutwalekahu kukolesha chikuhwelelu chetu kuhitila mukulomba nikudiza Izu daNzambi. (1 Pet. 2:2) Twatela kutwalekahu kukuhwelela muyikaninu yaYehova. Twatela kwila mwenimu kuzatisha njila jinakumonawu antu. Chakutalilahu, twatwalekañahu kushimwina haWanta waNzambi nikuzataku mudimu wakwilisha atumbanji. Twelilaña cheñi ‘yuma yayiwahi kudi antu ejima, sweje-e dinu kudi akwetu akwakwitiya.’ (Ŋal. 6:10) Nawa twazataña nañovu ‘kuvuula muntu wamukulu nimwelañayi.’—Kol. 3:5, 8-10. w16.10 4:11, 12

Mawulu nimaseki ayiloñesha chiwahi. Dichi twatela kwiluka netu Yehova wakeñaña akwakudifukala indi kwikala anuñañana. Nawa hakwila nawu twili mwenimu Nzambi watwinka Bayibolu kulonda yitukwashi. Kushakama chakadi wukwashi wamukuloñesha kwaNzambi ninshimbi jindi kukutuleñela kwikala mukukala nikubula kwikala namuzañalu. A Isarela akunyima adiña anuñañana. Chakutalilahu, munshimbi jaMosi ‘ambanda ayinkeli mudimu wakukalakela kuchisu chetenti dakubulakena.’ (Kwid. 38:8) Kuhiñahu, Mwanta Davidi wapompesheli aLevi niatupristu kulonda yayinki nyidimu. (1 Kushi. 23:1-6; 24:1-3) Chipompelu chawakwaKristu akusambila chadiña chanuñañana, nawa ayilombweleña kudi izanvu dalombweleña, dadiña nawapostolu. (Yil. 6:1-6) Ahanineña kufumba ninshimbi kuhitila munyikanda yonenewa yasonekeleñawu.—1 Tim. 3:1-13; Tit. 1:5-9. w16.11 2:3, 6, 8, 9

Muchaaka cha 607 B.C.E., amashidika amavulu awaBabiloni alombweleñawu kudi Mwanta Nebukaneza II alukukili musumba waYerusalema. Bayibolu yahosha kutalisha hamashi amwañiliwu hayina mpinji nawu: ‘Nebukaneza watapili anyikwenzi awu nampoku yakabali mwomwitala damalalawu kachi, hela mukwenzi, hela chañadima, hela kashinakaji, hela ipala dadeni kumutiyila wushona nehi. . . . Hakwocha itala daNzambi hakuhumona mpwembu yaYerusalema hakwocha nimatala awanta ejima nakesi hakukisañana niyuma yejima yasweja kuwaha yadiñumu.’ (2 Kushi. 36:17, 19) Kujilumuka kwaYerusalema hikwateleleli kuyikasumwisha antu ejima adiñamuku. Hayaaka yahitilihu, atuprofwetu adiña nakusoñamisha aYudeya nawu neyi akutwalekahu kufumpa nshimbi jaNzambi, akayihana mumakasa aweni Babiloni. A Yudeyi amavulu afwili kumpoku, nawa muntu wejima watemukili washakamineña muwunkoli muBabiloni haya nyaaka. w16.11 4:1, 2

Adama diyi “iyala wumu” mweñilili nshidi nikufwa “mumpata yamunu mwishina.” Dichi “chavulumwiniyi muntu wumu, kufwa hikukwila mwanta.” Pawulu wabombelelihu nindi “luwi olu [lwaNzambi] lwasweja kuvula” alumwekesheli kuhitila mudi muntu wumu, “Yesu Kristu.” (Rom. 5:12, 15, 17) Nawa ilu luwi lwasweja lunakwashi antu ejima. “Antu amavulu akayibalumuna kwikala aloña nakwovwahila kwawumu [Yesu].” Dichi luwi lwasweja lwaNzambi lwalombolaña “kuwumi wahaya nyaaka, mudi Mwanta wetu Yesu Kristu.” (Rom. 5:19, 21) Yehova hateleleli kutemesha Mwanindi kwinza hamaseki nakuhana ifutu danyiloñaku. Kubombelahu, Nzambi naYesu hiyateleli kwinka antu abula kuwanina nawa akwanshidi ifutu danyiloña kulonda ayanakeni nshidiku. Dichi, atumwekesheleli luwi lwasweja hatwanakeneniwu nshidi nikwikala nakuchiñeja kwakushakama haya nyaaka. Twatela kulemesha chawaana chaNzambi chaluwi lwasweja nawa twatela kuchilemesha mukuhanda kwetu. w16.12 1:1, 6, 7

Kudishinshika kwalema. Muloñadi? Pawulu wasonekeli nindi: ‘Yitoñojoka yamujmba hikufwa.’ (Rom. 8:6) Dikwila nawu tukufwa kuspiritu chayinu mpinji nawa twakafwa kumujimba kumbidi. Hela chochu, Pawulu wahosheleña wanyi nindi neyi muntu yekala ‘nayitoñojoka yamujimba’ dikwila nawu wakafwa. Muntu nateli kuhimpa. Toñojokenu hadi iyala wadiña nayilwilu yatama muKorinda welileña yuma ‘yakumujimba’ nawa wahañiliwu muchipompelu. Ilaña wahimpili. Walekeli kwenda mwaya mujimba nawa watachikili kwenda munjila yoloka. (2 Kor. 2:6-8) Chineli ona muntu wahimpili, dikwila nawu mukwaKristu niyena makonu nateli kuhimpa, sweje-e neyi nakwila wanyi yuma yatama yelileñayi ona iyala muKorinda. Dichi kusoñamisha kwaPawulu hayuma yafumaña ‘mukutoñojoka yuma yakumujimba’ kwatela kukwasha akwaKristu kuhimpa! w16.12 2:5, 12, 13

Chatukundejaña kwiluka netu neyi ‘tumbila chiteli chetu hadi Yehova wukutukwasha’! Twatela kumukuhwelela chikupu Nzambi netu “natweshi kwila chakubadika nankashi mutukulomba hela mutukutoñojoka mwejima.” (Efwes. 3:20) Mwalala, nateli kwila chakubadika nankashi mutukumulomba. Hakwila tukatambwili masomu, twatela kumukuhwelela chikupu Yehova nikulondela nshimbi jindi. Mosi walejeli aIsarela nindi: “Yehova wakabadika kukukoolekesha mwituña dakukwinkayi Yehova Nzambi yeyi dawuswana wakuheta; neyi wakatiyilila chachiwahi mwizu daYehova Nzambi yeyi nakusha muchima wakwila kulejiku kwejima kunukukuleja lelu. Muloña Yehova Nzambi yeyi wakakukoolekesha mwakukaniniyi.” (Kuhit. 15:4-6) Mwamukuhwelela chikupu Yehova nenu wakayikiswila neyi mutwalekahu kwikala ashinshika? Mwatela kumukuhwelela. w16.12 4:8, 9

Kudi chuma chaletesheli yafuukuli mwenimu. Yehova wakeñeleña kuhemba chikaninu chashiikiliyi ibwambu dindi Abarahama kunyima. (Kutach. 22:15-18) Cheñi, Yehova wazatishaña wuswa wukwetiyi kwesekeja nayilwilu yindi yakukeña niwuñanji. Chumichi chamwekeni hayibabesheliyi aIsarela adiña nachaaku chakuleka kudifukula kwalala. Chabalumukiliwu chikupu mumuchima, Yehova wayikeñeli nakuyimwekeshela luwi nakuhosha nindi: “Nakayuka kukuselumukila kwaselumukañawu hanyima, nakayikeña namuchima wejima.” (Hos. 14:4) Yehova wazatishaña chiwahi ichi chawaana kulonda antu amakwawu ahetelimu. Chatachikiliyi Yehova kuleña yuma, wamwekesheli kukeña kuhitila mukuyinka yileñaleña yindi yikweti maana wuswa wakudifuukwila. Mwanindi wawedi, “chifwanisha chaNzambi abulaña kumonawu,” diyi wadiña watachi kwikala nanichi chawaana. (Kol. 1:15) Henohu kanda yenzi hamaseki, Yesu wadiña washinshika kudi Tata yindi nawa hadibombeli naSatana mukudikañaku. w17.01 2:3, 4

Kuhimpika kwayuma kunateli kutuletesha kuzata nankashi hela nehi. Wudi kansi tahindi munashinakaji dehi? Komana mwakola kumujimba tahindi mwakata? Yehova weluka chinateli kuzatishayi wejima wetu mumudimu windi. Wakeñaña nindi tuzateña hakumina ñovu jetu nawa wahamekaña nyidimu yejima yitwadikitaña. Yesu wazatileña namuzañalu nyidimu yejima, ninetu tunateli kuwana muzañalu. (Yish. 8:30, 31) Muntu wadikehesha wamonaña wanyi kukooleka ninyidimu yamwinkawu muchipompelu nindi yinakehi. Wakamenaña wanyi kwikala nakukooleka kumbidi hela neyi akwawu anayinki kukooleka. Ilaña washaña maana hamudimu wunakuzatayi hanoyu mpinji muloña neluki nindi wunafumi kudi Yehova. Hampinji yoyimu, walemeshaña mudimu wayinkayi Yehova akwawu. Kudikehesha kwatukwashaña kulemesha akwetu nikuyikwasha.—Rom. 12:10. w17.01 3:13, 14

Atwansi amakwawu anakulombola mudimu mudi niakulumpi akuluka yitembi. Hela chakwila anamwinki wukulumpi, chikuwaha neyi atiyililaña munakuhoshawu akulumpi akuluka yitembi neyi anakufuukula hansañu. Timotewu, mukwenzi weyala, wazatilili hamu naPawulu hadi yaaka yayivulu. Pawulu wayisonekeleli akwaKorinda nindi: “Dichi chinaleteshi nimutemeshi Timotewu kudi enu, muloña himwanami inakeña nawa washinshika mudi Mwanta. Wakayanukisha njila jami jinelilañamu yuma mumudimu waKristu Yesu.” (1 Kor. 4:17) Ichi chinakumwekesha nawu aPawulu naTimotewu azatilileña hamu. Pawulu wadiña nakumudizisha Timotewu njila jindi jelilileñamu “yuma mumudimu.” Timotewu wadizili chikupu nawa adikundili naPawulu nawa Pawulu welukili chikupu nindi Timotewu wukayakamena chikupu kuspiritu antu amuKorinda. Aeluda makonu atela kumwimbujola kuhitila mukudizisha amakwawu muchipompelu kulombola. w17.01 5:13, 14

Yehova wakeñaña nindi antu ejima ahandeña bayi kufwaku. Chineli diyi Nsulu yawumi, wekalaña Tata yawantu ejima asañukaña. (Mas. 36:9) Dichi, Yesu welili chiwahi kutuleja kulombaña netu: “Tata yetu wekala mwiwulu.” (Mat. 6:9) Yehova namwinki Yesu mudimu walema wakusañula afu. (Yow. 6:40, 44) MuParadisa, Yesu wakashikija mudimu windi hamu neyi “kusañuka niwumi.” (Yow. 11:25) Yehova wamwekeshaña wanyi chisambu kudi antu antesha hohu, muloña Yesu wahosheli nindi: “Muntu wejima welaña nkeñelu yaNzambi, yenowu diyi manakwami, diyi muhelami nawa diyi mama yami.” (Maku 3:35) Nzambi wakeñaña nindi antu amavulu ‘amwizaza deneni’ afuma kunyuza, kunyichidi yejima nikumadimi ejima kulonda ekali akwakudifukula indi. Antu akuhwelelaña mumulambu waKristu nikwila nkeñelu yaNzambi akekala hadi antu akahosha nawu: “Wamwinu wetu wafuma kudi Nzambi yetu washakama hetanda nikudi Mwana kaMukoku.”—Chim. 7:9, 10. w17.02 2:10, 11

Hakwila nawu chalala chamuBayibolu chishiki mumadimi ashiyashana, atondeli Charles Taze Russell kwikala presidenti waZion’s Watch Tower Tract Society yatachikili kuzatika mu 1884. Wadiña kadizi waBayibolu chikupu, nawa wamwekesheli hatooka makudi akudifukula kwakutwamba adi neyi Nzambi wekala musatu nawa nawu wumi wafwaña wanyi. Welukili nindi kwosi wakamona chakafuntayi Kristu nawa nindi “mpinji yatoñolawu yawakwanyuza” yakamana mu 1914. (Luka 21:24) Manakwetu Russell wadihanini kuzatisha mpinji, ñovu nimali indi kulejaku amakwawu ichi chalala. Mwamweni, haniyi mpinji, Manakwetu Russell amuzatishili kudi Yehova nikudi mutu wachipompelu. Manakwetu Russell wakeñeli wanyi kumulemesha kudi antu. Mu 1896, wasonekeli nindi: “Hitunakukeña kutulemesha, hela kudifukula kudetu muloña wanyikanda yitunakusoneka; hela kututena nawu Reverend hela Rabiku. Hela muntu kuditumba ijina detu.” Kuhiñahu wahosheli nindi: “Iwu himudimu wamuntu wanyi.” w17.02 4:8, 9

Kudi yuma yitwatela kutondahu nikufuukulahu. Bayi neyi yuma yejima yitwafuukulaña yinateli kutujahisha hela kutuhandishaku. Hela chochu, muyuma yitwafuukulaña niyitwatondaña munateli kufuma yuma yayiwahi hela yatama. Dichi, neyi tuzatisha wuswa wetu wakufuukula munjila yayiwahi chikutukwasha kushakama mukuwunda chakadi kutoboka nikuneña. Chumanyi chinateli kutukwasha kufuukula chiwahi? Twatela kumukuhwelela chikupu Nzambi nikukuhwelela netu nakufwila kutukwasha nawa wukutwinka maana kulonda tufuukuleña chiwahi. Twatela cheñi kukuhwelela Izu daYehova nichelañayi yuma, nikukuhwelela kufumba kwaNzambi konenewa. (Yak. 1:5-8.) Chitwaswina kwakwihi nayena nikukeña Izu dindi, tukukuhwelela netu wunsompeshi windi waloña. Nawa tukwikala nachaaku chakusandujolaña Mwizu daNzambi henohu kanda tufuukuli. w17.03 2:2, 3

Kufwana tata yindi, Asa, Yehoshafwati watwalekelihu kumukuhwelela Nzambi nihampinji yamutiyishiliwu woma kudi ayilumbu jindi. (2 Kushi. 20:2-4) Yehoshafwati watiyili woma chikupu! Ilaña, ‘wakeñakeñeli Yehova nakushaku nimuchima.’ Hampinji yalombeleñayi, wadizozeli nakuhosha nindi antu jindi ‘hiyakweti ñovu jakuzuña nanilu luntu lwaluvuluku’ nawa yena niantu jindi elukili wanyi yuma yateleliwu kwila. Washindameneni hadi Yehova chikupu, nakuhosha mazu adi munsona yefuku dalelu. Kufwana Yehoshafwati, ninetu mpinji yikwawu twelukaña wanyi chakwila hadaha nikutiya woma. (2 Kor. 4:8, 9) Ilaña anukenu nenu Yehoshafwati washimwini woma watiyiliyi yena niantu jindi mukulomba kwindi kwahatooka. (2 Kushi. 20:5) Antu alombolaña yisaka kuspiritu anateli kwimbujola Yehoshafwati kuhitila mukukeñakeña wunlomboli waYehova niñovu jakuumika kukala kunakumonawu. Bayi mutiya nsonyi antu amuchisaka chenu kutiya kulomba kwamuchidiwuku. Akwiluka nawu mwamukuhwelela Yehova. Nzambi wamukwashili Yehoshafwati, wukuyikwasha ninenu nawa. w17.03 3:12, 13