July

Mwana kaYefwata wamubanda wafumishiliku muchima wakusumbuka nikwikala nanyana kulonda yamukalakeli Yehova. Tunateli kumwimbujola ñahi? Atwansi amavulu akwaKristu anakudihana kubula kwiñila mumalu hela kukwata kuñoji chakatataka. Muloñadi? Muloña anakukeña kumukalakela Yehova chikupu. Cheñi, atushinakaji amavulu amanishaña wanyi mpinji yeneni nakuhanjeka nawanyanawu niezukulu awu. Ilaña azatishaña mpinji niñovu yawu kumukalakela Yehova. Amakwawu anakuzata mudimu wakutuña hela kuya Kushikola Yawakwakushimwina aWanta nikuzatila kuyipompelu kudi kukaankila kwawakwakushimwina. Amakwawu afwilaña kuzata nañovu mumudimu waYehova mumpinji yamakampeni. Wakavulamena wanyi nyidimu yanawa antu ashinshika. (Heb. 6:10-12.) Indenu? Munateli kudihana kulonda mumukalakeli chikupu Yehova? w16.04 1:16, 17

Yesu wadesekejeli nakabiña nawa wesekejeli atumbanji twindi namukanka wanyikoku. Toñojokenu hachumichi: Neyi anyikoku ayedi adi hampidi, ayedi adi muchinekineki nawa wumu wudi kwacheñi, mwalala tukuhosha netu awa anyikoku atanu adi mukanka wumu? Inehi, muloña mukanka wanyikoku wekalaña hamu nawa walondelaña kabiña. Munjila yoyimu, bayi tudambulaña kudi amanakwetu kuhitila mukubula kupompaku. Twatela kupompa hamu kulonda twikali “mukanka wumu” nikulondela “kabiña wumu.” Kupompa kwatukwashaña kwikala anuñañana neyi chisaka chakeñañana. (Mas. 133:1) Antu amakwawu muchipompelu ayihela kudi yisaka yawu, anvwali, amanakwawu hela ahelawu. Ilaña Yesu wayikana kuyinka chisaka chayikeña nawa chakayakamenaña. (Maku 10:29, 30) Neyi mukupompaña mpinji yejima, mukwikala neyi tata, mama, manakwa hela muhela muntu muchipompelu. Neyi tutoñojoka hachumichi, tukufwilaña kupompaña mpinji yejima. w16.04 3:9, 10

Makonu, neyi tunakulomba, tunakushimwina nikuya nakupompa dikwila nawu tunakudifukula kudi Yehova. Neyi tubula kuleta kuwunda nawamanakwetu, Yehova wukwiteja wanyi kudifukula kwetu. Hakwila nawu twikali amabwambu jaYehova, twatela kwanakena akwetu neyi anatuvulumuni. (Luka 11:4; Efwes. 4:32) Yehova wakeñaña ambuñindi ejima anakeneña akwawu nikwikala mukuwunda nawantu. Twatela kudihula netu: ‘Nanakenaña amanakwami swayi? Natiyaña kuwaha kuhanjeka nawu?’ Chimweluka nenu chayikalilaña kwanakena akwenu, mulombenu Yehova yayikwashi kulonda mwanakeneña. Tata yetu wamwiwulu wukutiya kulomba kwamuchidiwu nawa wukukwakula.—1 Yow. 5:14, 15. w16.05 1:6, 7

Mudimu wakushimwina wukamana mpinjinyi? Yesu wahosheli nindi nsañu yayiwahi akayishimwina nichakenza kukuma. Etu aYinsahu jaYehova, tunomiki mumudimu wakushimwina mumafuku akukuminina muloña tukweti spiritu yajila yaYehova. (Yil. 1:8; 1 Pet. 4:14) Antu amakwawu ayaña kumachechi ahoshaña nawu: “Akweti spiritu yajila.” Mwalala anateli kuzata mudimu wunakuzatawu aYinsahu jaYehova munanu mafuku akukuminina? Antu amakwawu esekaña kushimwina neyi chitwelaña, ilaña akañanyaña. Amakwawu anakushimwina, ilaña hakapinji kantesha hohu. Amakwawu anakushimwina kwitala nikwitala ilaña anakushimwina wanyi nsañu yayiwahi yaWanta. Kwila azata mudimu wazatiliyi Yesu nehi. w16.05 2:13, 16

Kapostolu Pawulu walejeli akwaKristu nindi: ‘Vuulenu muntu wenu wamukulu wachisemwa chachikulu, waditamishaña mwaya kufwila kwatama kwayidimbilaña. Nawa mutwalekuhu kwikala antu amaha muyitoñojoka yaspiritu yenu. Mudivwiki muntu wamuha aleñeluwu mwekalilayi Nzambi mukuloña nakujila kwansañu yalala.’ (Efwes. 4:22-24) Ichi chinayi mukwila nawu twatela kutwalekahu kuhimpa ‘nakuvwala muntu wamuha.’ Hela chakwila tunamukalakeli Yehova hadi yaaka yayivulu, twatela kutwalekahu kwiluka yilwilu yindi. Nawa Bayibolu yikutukwasha kutwalekahu kuhimpa yilwilu yetu kulonda twikali neyi yena. w16.05 4:8, 9

Tunakushakama muparadisa yakuspiritu. Yehova nakuloñesha iyi ntanjikilu yayiwahi kulonda yatuwumbi. (Isa. 64:8) Muniyi paradisa yakuspiritu, twakiñewa hela chakwila tudi mukaayi mudi antu atama. Tunamwiluki Yehova nawa tuneluki netu watukeña. (Yak. 4:8) Mwituña dadiha, twakahetelamu chikupu muparadisa yakuspiritu. Tukadiluñisha cheñi wumi muparadisa yamaseki yikayulewaña naWanta waNzambi. Hayina mpinji, Yehova wukatwalekahu kutuwumba nikutudizisha munjila yitunateli kukañanya kufwikija makonu. (Isaya 11:9) Cheñi Yehova wakelisha nyijimba niyitoñojoka yetu kwikala yawanina. Chumichi chikaletesha tukatiyishisheña nshimbi jindi nikujovwahila. Dichi tutwalekenuhu kumwiteja Yehova kutuwumba, nawa tumusakililenu hachatumwekeshelañayi kukeña. w16.06 1:8, 9

Awa mazu ekala mumpanji yakukumishaku yahaniniyi Mosi kudi aIsarela. Muchaaka cha 1473 henohu Kristu kanda yavwaliki, aIsarela adiña mwituña daMowabi kulonda azambuki Kaloña Yodana nakushinda Ituña daChikaninu. (Kuhit. 6:1) Mosi walombweli antu hadi yaaka 40 nawa wakeñeleña nindi ekali ahamuka kulonda ashindi kukala kwejima kwakumonawu. Ateleleli kumukuhwelela Nzambi yawu, Yehova nikwikala ashinshika. Dichi mazu akukumishaku ahosheliyi Mosi ayikolesheli kumukuhwelela Nzambi nikwikala ashinshika. Hanyima yakushimuna Nshimbi Ikumi ninshimbi jikwawu jafumini kudi Yehova, Mosi wayanukishili antu mazu ekala haKuhituluka 6:4, 5. A Isarela elukili nawu Yehova Nzambi yawu “hiYehova wumu hohu.” A Isarela ashinshika adifukwileña kudi Nzambi wumu hohu, Nzambi yawankakulula jawu. w16.06 3:2, 3

Yesu wahosheli awa mazu ahampinji yadiñayi ahamaseki. Ilaña Kristu amwinka ñovu mwiwulu kulonda yalwi njita nakaayi kaSatana. (Chim. 19:11-16) Dichi, tunateli kuhosha netu chayinu mpinji Yesu weluka mpinji yikatachika njita yaAmagedoni. Ilaña etu tweluka wanyi. Dichi tutwalekihu kwikala atona sampu lukadi lwasweja lunatachiki. Yehova weluka mpinji yakatachika lukadi lwasweja. Watonda mpinji yikenza kukuma. Nakuchinda mpinji kushika nifuku hamba katachika lukadi lwasweja nawa ‘hilwakalabajalaku!’ (Hab 2:1-3.) Tukwiluka ñahi? Wuprofwetu waYehova washikijewaña mumpinji! Tunakuhweleli netu Yehova wukatupulwisha halukadi lwasweja neyi chatukanayi. Ilaña neyi tunakukeña netu twakapuluki hakajilumunawu kanu kaayi, twatela kwikala atona. w16.07 2:4-6

Chiyashikili mpinji yakala, apostolu amushiyili Yesu. Petulu wahosheli nindi wakamushiya wanyi Yesu hela chakwila ejima akamushiya. (Maku 14:27-31, 50) Ilaña chamukwatiliwu Yesu, apostolu indi ejima, kushilahu niPetulu amushiyili. Nawa, Petulu wahosheli kapampa kasatu nindi wamwilukili wanyi Yesu. (Maku 14:53, 54, 66-72) Ilaña Petulu waneñeli nankashi nayuma yeliliyi. Dichi Yehova wamwanakeneni nawa watwalekelihu kumuzatisha. Neyi mwadiña kambanji hayina mpinji nawa mwiluka yuma yeliliyi Petulu, mwadi kutwalekahu kumukuhwelela Yehova? Makonu, mpinji yikwawu muntu wunavulumuni nateli kubalumuka wanyi mumuchima. Mukukuhwelela nenu Yehova neluki iyi yuma nawa wakazatilahu hampinji yatelela? Nateli nikumuhaña iwu muntu muchipompelu neyi nakeñi. Mwakuhwelela nenu Yehova welaña yuma yaloña mpinji yejima? w16.06 4:8, 9

Nkisu yeneni yitwatambwila kuhitila muluwi lwaYehova yakundejaña muchima waneña. (Mas. 51:17) Pawulu wasonekeli awa mazu adi munsona yefuku dalelu. Twatiyaña kuwaha kwiluka netu Yehova watwakamenaña muloña wakukeña kwindi kwabadika. Chineli tudi akwanshidi, twadi kwikala wanyi nakuchiñeja halwetu. (Mas. 49:7, 8.) Ilaña Yehova watukwasha kwikala nakuchiñeja kwakuwahi. Yesu washikili atumbanji twindi nindi: “Muloña muchima waTata yami, nakeñi antu ejima atalaña Mwana amwitiyaña chakukuhwelela, muntu himuntu, amoni wumi wahaya nyaka.” (Yow. 6:40) Kuchiñeja kwakushakama haya nyaka, hichawaana mwamwekeshelañayi Nzambi luwi lwindi. Pawulu welukili ichi chikuma nakuhosha nindi: “Luwi lwaNzambi lwaletaña wamwinu wawantu ejima, lunamwekani dehi.”—Tit. 2:11. w16.07 3:14, 15

Makonu, antu jaYehova ayiteja wanyi kukwatila enikwawu makasu. Indi neyi manakwetu hela muhela wasumbula yela wuvumbi nañodambala hela nanfumwambala nawa adisumbula hanyima yakudiseña namwinikwindi? Neyi kubalumuka mumuchima nehi, muntu wunakoñi nshidi akumuhaña muchipompelu kulonda akiñi chipompelu. (1 Kor. 5:11-13) Samuloña watela ‘kwila yuma yatelela antu anabalumuki mumuchima’ henohu kanda amufuntishi muchipompelu. (Luka 3:8; 2 Kor. 2:5-10) Hela chakwila asha wanyi mpinji yatela kuhitahu hakwila amufuntishi muchipompelu, ilaña nshidi yakoñeliyi akayidiwula wanyi. Hanateli kuhita mpinji yeneni, chaaka hela kubadikahu hakwila muntu yamwekeshi nindi nabalumuki chikupu mumuchima. Hela chakwila muntu anamufuntishi mukuloñesha, ‘wakalumbulula kudi Nzambi’ neyi mwalala wabalumukili chikupu mumuchima.’—Rom. 14:10-12. w16.08 1:12, 13

Mazu achiGiriki abalumunawu nawu ‘muntu nakeñi mudimu’ atalisha mukwila nawu muntu wunakufwila nankashi kuzata mudimu. Chazatishiliyi awa mazu, kapostolu Pawulu wakonkomweneni nindi, hakwila nawu muntu yayiliku hambidi kuspiritu watela kuzata nañovu. Fwikijenu manakwetu nakutoñojoka hanyidimu yikazatañayi muchipompelu kumbidi. Hadaha chayinu mpinji hinkoñi wakuzatila wanyi, ilaña neluki nindi watela kuzata nañovu kwikala nayilwilu yakuspiritu. Chatachi, wukuzata nañovu kulonda ekali nkoñi wakuzatila. Mukuhita kwampinji, nakufwila kushikahu kuspiritu kulonda yekali eluda. Muniyi yakutalilahu yejima, nakuzata nañovu kulonda yashikiji yuma yakeñekaña hakuzata nyidimu yamuchipompelu. Munjila yoyimu, amanakwetu niahela akeñaña kuzata wupayiniya, kuzatila haBeteli, hela kukwasha mudimu wakutuña Matala aWanta atela kuzata nañovu kulonda eli munakukeñawu. w16.08 3:3, 4

Fwikijenu chatiyiliyi Nehemiya hampinji yayiliyi kuYerusalema. Musumba hiwadiña wakiñewaku nawa akwawu aYudeya azeyeli nankashi. Chayilukukileñawu kudi akwakunyi nawu chakojejeli aYudeya azeyi nikuleka kutuña mpwembu jaYerusalema. Komana Nehemiya niyena wetejeli iku kukala kuzeyeshi makasindi tahindi? Inehi! Kufwana Mosi, Asa, niambuña amakwawu ashinshika aYehova, Nehemiya wadiña nachaaku chakushindamena hadi Yehova mukulomba. (Kwid. 17:8-13; 2 Kushi. 14:8-13) Nihampinji yamwekeni iku kukala dicheliliyi. Hampinji yamweniwu aYudeya kukala kwamwekeni neyi kweneni nankashi, Yehova waakwili kulomba kwaNehemiya kwakudikehesha. Nzambi wazatishili ‘ñovu yindi yeneni nichikasa chindi chañovu’ kukolesha makasa awaYudeya azeyeli. (Nehe. 2:17-20; 6:9.) Komana munakuhweleli nenu Yehova wazatishaña ‘ñovu jindi jabadika nichikasa chindi chañovu’ kukolesha ambuñindi makonu? w16.09 1:9

“Mwadimwena nvwalilu yabula kutelela yashiyashana, sweje-e chikwasweja iyena,” ichi dachahosheli chipapilu chansañu chamwidimi daDutch kutalisha hadi anlomboli jamachechi chavwaliliwu hapompeliwu. Chahosheli cheñi nawu: “Ilaña aYinsahu jaYehova dichiyavwalañawu wanyi hakupompa.” Mwamweni, aYinsahu jaYehova kakavulu ayihamekaña hakudiwahisha ‘nakuvwala mahina chalumbuluka, nakalemesha nikutoñojoka mwamaana . . . avwalaña yakuvwala yatelela aditenaña nawu amwakama Nzambi.’ (1 Tim. 2:9, 10) Kapostolu Pawulu wahosheleña hadi ambanda, ilaña iyi nshimbi yoyimu yakundama nikudi amayala akwaKristu. Yakuvwala yatelela yalema kudi etu antu jaYehova nawa yalema nikudi Nzambi wutwadifukulañaku. (Kutach. 3:21) Chahosha Nsona kutalisha hayakuvwala nikudiwahisha chamwekeshaña hatooka to-o nawu, nleñi wakuleña kwejima wakeñaña nindi akwakudifukula indi alala avwaleña yakuvwala yatelela. Dichi, twatela kudiwahisha nikuvwala yakuvwala yinakuzañalesha Mwanta Wakuleña, Yehova. w16.09 3:1, 2

Amakwawu atondahu kudiza hawuprofwetu wamuBayibolu hela kwesekeja nsañu yamuBayibolu nansañu yahoshawu antu adiza hansañu yakunyaaka, asayantisiti niakwakuvumbujola yuma. Wuprofwetu wumu wawuwahi wutwatela kushinshikahu hiwuprofwetu wekala haKutachika 3:15. Iyi vasi yashimuna nsañu yalema yamuBayibolu, dikwila nawu kuhakwilaku Wanta waNzambi nikujilika ijina dindi kuhitila muWanta. Iyi vasi yimu hohu, yamwekeshaña Yehova chakamanishayi kukala kunamoniwu antu kufuma tuhu muEdeni. Munateli kudiza ñahi Kutachika 3:15? Njila yimu hikutanjika nsañu mundonda. Hadaha kusoneka nsona jalema jamwekeshaña Nzambi chakwashileñayi antu kwiluka chalala chovu-chovu nintanjikilu yekala muniyi vasi ninsañu yamwekeshaña iwu wuprofwetu chiwakashikijewa. Chimukumonaña nsona chijinakudinuña hamu, chakadi nikujina mukukunkulula nenu atuprofwetu amuBayibolu ‘ayilombweli naspiritu yajila.’ w16.09 4:8

Mpinji yimu, kapostolu Petulu wadiña nachaambu nawantu abulili kwikala aYudeya, ilaña watachikili kuleka chovu-chovu yitoñojoka yatama yadiña mumuchima windi. (Yil. 10:28, 34, 35; Ŋal. 2:11-14) Munjila yoyimu, neyi tumona netu tunatachiki kwikala nachaambu hela kudisamba muloña wekowa detu, twatela kuzata nañovu kulonda tuyifumishi mumuchima wetu. (1 Pet. 1:22.) Twatela kwiluka netu kwosi wumu hakachi ketu watelela kupulukaku; wejima wetu twekala antu abula kuwanina hichidi namuloña namuza wetuku. (Rom. 3:9, 10, 21-24) Hanu dinu, chumanyi chikuletesha tudimoneña kulema kubadika ejima? Twatela kumona neyi chamweneñayi kapostolu Pawulu, wasoñamishili akwawu kwaKristu awayishewa dehi nindi hiyadiña ‘cheñi antu acheñi hela añiinzaku, ilaña hiyenimbu nawa antu amuchisaka chaNzambi.’ (Efwes. 2:19) Neyi tuzata nañovu kulonda tushindi yilwilu yakwikala nachaambu kutalisha hadi antu akuyitachi yashiyashana kukutukwasha kuvwala muntu wamuha.—Kol. 3:10, 11. w16.10 1:9

Hakwila nawu tukoleshi chikuhwelelu chetu, Yehova natuloñesheli Izu dindi Bayibolu yamukuma. Hakwila nawu twikali ‘namuzañalu’ nawa ‘yuma yendi chiwahi,’ twatela kutañaña Izu daNzambi mpinji yejima neyi chinatwesheki. (Mas. 1:1-3; Yil. 17:11.) Dichi, kufwana antu adifukwileña kudi Yehova adiñaku henohu akwaKristu kanda, twatela kutwalekahu kutoñojoka hayikaninu yaNzambi nikwovwahila nshimbi jindi. Yehova watwinkaña yakuda yakuspiritu yayivulu kuhitila mudi ‘nduñu wamaana nikashinshi.’ (Mat. 24:45) Dichi, neyi tukulemesha yakuda yakuspiritu yinakutuloñeshelawu kudi Yehova, tukufwana antu akushankulu adiña nachikuhwelelu ‘akuhweleleli chikupu’ mukuchiñeja kwaWanta. (Heb. 11:1) Kulomba nikwena kwayikwashili kutwalekahu kukolesha chikuhwelelu chawu. Chikuhwelelu chawu chadiña nakukolelaku hampinji yakwileñayi Nzambi kulomba kwawu kwejima. (Nehe. 1:4, 11; Mas. 34:4, 15, 17; Dan. 9:19-21) w16.10 3:7, 8

Yesu wakonkomweneni hakulema kwejima kwakumukeña Nzambi hampinji yaakwiliyi lwihu lwakwila nawu: “Lushimbi lwabadika nshimbi jejima lushimbinyi?” (Mat. 22:35-40) Muloña wakulema kwachikuhwelelu nikukeña, ansoneki aBayibolu akwaKristu asonekeli iyi yilwilu kapampa kakavulu, nankashi mumukuku wumu. Pawulu walejeli amanakwindi nindi ‘vwalenu chikuñu chakujika hantulu chakukuhwelela nakukeña.’ (1 Tesa. 5:8) Yowanu wasonekeli nindi: ‘Ilu dilu lushimbi [lwaNzambi] lwakwila nawu: tukuhweleli mwijina daMwanindi Yesu Kristu nikudikeña wumu namukwawu.’ (1 Yow. 3:23) Hela chakwila chikuhwelelu chalema, ichi chilwilu chakamana hampinji yitwakamona Nzambi chakashikijayi yikaninu yindi niyuma yitwachiñejaña. Ilaña kukeña Nzambi niantuñi netu kwakatwalekahu. Dichi, Pawulu wasonekeli nindi: ‘Ichi dinu kwekala kukuhwelela, kuchiñeja, nikukeña, yumiyi yisatu; chasweja kulema yowu kukeña.’—1 Kor. 13:13. w16.10 4:15-17

Amanakwetu endeleña adiña nakwimenaku izanvu dalombweleña ‘ayinkeleña antu nshimbi jakasiliwu apostolu niakulumpi adiña muYerusalema.’ (Yil. 16:4) Yipompelu chiyalondeleleña iyi nshimbi ‘yatwalekelihu kwikala nachikuhwelelu chakola nawa antu avulilileñaku hefuku-hefuku.’ Yumanyi yitwatela kwila neyi tutambwila nshimbi kufuma mukuloñesha kwaNzambi? Mukanda waYehova watulejaña kwikala ovwahila. (Kuhit. 30:16; Heb. 13:7, 17) Mukuloñesha kwaNzambi mwekala wanyi antu akalisha hela akwakudikaña, muloña yilwilu yamuchidiwu yinateli kuluwañesha kukeña, kuwunda nikunuñañana kwamuchipompelu. Hela chochu, kwosi mukwaKristu washinshika wakeñaña kumwekesha yilwilu yakasawuntu nikubula kashinshi neyi Diyotefwesi. (3 Yow. 9, 10.) Tunateli kudihula netu: ‘Komana nakoleshaña amanakwami kuspiritu? Komana netejaña nikulondela wunlomboli wahanañawu amanakwetu alombolaña?’ w16.11 2:10, 11

A Yudeya ovwahilili nshimbi jaNzambi ashakamini chihandilu chachiwahi muBabiloni. Eni Babiloni etejeli aYudeya kushimuna yuma yejima yakeñeleñawu. Antu adiña muwunkoli adiña akasunuka kuya kudi kwejima kwakeñeleña kuyawu mwituña. Mumpinji yakunyima, ituña daBabiloni dadiña dakuselujolela nawa nyikanda yakunyima yamwekeshaña nawu aYudeya adizili chakulanda nakulandulula munidi ituña, nawa amakwawu elukili chakusoña. A Yudeya amakwawu aheteli nankashi. Wuduñu wamweniwu aIsarela muEjipitu waswejeli kubadika wadiña muBabiloni. (Kwid. 2:23-25) Komana aIsarela adifukukwilihu cheñi kudi Nzambi munjila yayiwahi? Haniyi mpinji, chamwekeni neyi akadifukulahu wanyi munjila yayiwahi. Eni Babiloni ombileñaku wanyi anduñu jawu. Ilaña. Yehova wakanini nindi antu jindi akayifumisha muwuduñu, nawa dichamwekeni. Yuma yakanañayi Nzambi yashikijewaña.—Isa. 55:11. w16.11 4:3, 5

Tukuhosheladi netu ‘afwili dehi kunshidi’ henohu achidiña amomi hamaseki? Nzambi wazatishili ifutu danyiloña hadi Pawulu niantu amakwawu adiñaku hayina mpinji. Dichi Yehova wayanakeneni nshidi jawu, wayiwayishili naspiritu yajila nawa wayitondeli kwikala anyanindi akuspiritu. Dichi adiña nakuchiñeja kwakushakama mwiwulu. Neyi ekalili ashinshika, adi kushakama mwiwulu nikuyuula hamu naKristu. Ilaña Pawulu wahosheleña hadi wena hampinji yachidiñawu amomi hamaseki nakumukalakela Nzambi nindi ‘afwili dehi kunshidi.’ Wazatishili chakutalilahu chaYesu, wafwili neyi muntu ilaña amusañwili nawumi wakaafwaña nakuya mwiwulu. Kufwa hikwadiña mwanta hadi Yesuku. Dichadiña nikudi akwaKristu awayishewa, adimweneña nawu ‘afwili kunshidi, hakwinza mudi Kristu Yesu ekalili amomi nakuhandila Nzambi.’ (Rom. 6:9, 11) Chihandilu chawu chadiña wanyi neyi chichadiña hatachi. Hiyayilombolweleña kukufwila kwawu kwatama nikwanshidiku. Afwili kuchihandilu chawu chatachi. w16.12 1:9, 10

Bayi neyi chinayi mukwila nawu muntu watela kutoñojoka hohu nikuhosha hadi Bayibolu hela hawubwambu windi naNzambi nihakuchiñeja kwindi kwakumbidiku. Anukenu nenu Pawulu niantu amakwawu amumafuku awapostolu amukalakeleleña Nzambi adiña nakwila yuma yeleñawu antu ejima. Adiileña nikunwa. Amavulu asumbwili, adiña nawanyana nawa azatileña nyidimu yakumujimba. (Maku 6:3; 1 Tesa. 2:9) Hela chochu, ana ambuña aNzambi hiyishili hohu maana haniyi yuma muchihandilu chawuku. Hela chakwila Pawulu wadiña nakuchima matenti, nsona jamwekeshaña nawu: Washili muchima hamudimu wakushimwina nikutañisha. (Yil. 18:2-4; 20:20, 21, 34, 35.) Walejeliyi amanakwidi niahela muRoma kwila mwelileñayi. Pawulu washili maana hayuma yakuspiritu nawa wazatileña ninyidimu. AkwaRoma ateleleli kumwimbujola nawa ninetu twatela kumwimbujola.—Rom. 15:15, 16. w16.12 2:5, 15, 16

Yehova watiyaña kuwaha nachitwazataña hakumina ñovu jetu. Weluka yuma yejima yatwakameshaña. Watutiyilaña luwi neyi tudi nakukala kwamali, yikatu hela tunaneñi chakwila tunakukañanya nikumukalakela nankashi mumudimu windi. Yehova watutiyilaña luwi neyi tutwalekahu kwikala ashinshika. (Heb. 6:10, 11) Ilukenu nenu, tunateli kulomba kudi “watiyaña mwalombañawu” nakukuhwelela netu wukutiya mutunalombi. (Mas. 65:2) “Tata wavulishaña luwi, Nzambi wakukundeja kwejima” wakatukwasha kuspiritu nikumujimba, hadaha kuhitila mudi akwetu akwaKristu. (2 Kor. 1:3) Yehova watiyaña kuwaha neyi tutiyilaña akwetu luwi. (Mat. 6:3, 4) Nawa washiika nindi wakatufweta. w16.12 4:13, 14

Chenjiliyi Yesu hamaseki, wazatishili wuswa windi wakudifuukwila kulonda yakaani kumweseka kudi Chilumbu muneni. (Mat. 4:10) Henohu kanda yafwi, Yesu walombeli nawufuku chakufuma hamuchima nindi, yatwalekihu kwila nkeñelu yaNzambi. Dichi wahosheli nindi: “Tata, neyi wunakukeña, fumishaku aka kaapu kudi ami. Hela chochu, itejaku nkeñelu yeyi yishikijewi, bayi yamiku.” (Luka 22:42) Dichi, tumwimbujolenu Yesu kulonda tuzatisheña chawaana chitukweti nakumulemesha Yehova nawa twileña nkeñelu yindi. Tunateli kwila mwenimu? Tunateli kwila yuma yelileñayi Yesu, muloña ninetu atuleña muchifwanisha chaNzambi. (Kutach. 1:26) Hela chochu, hadi hitwatela kukumina. Tukweti wanyi wuswa wakwila yuma neyi chelañayi Yehova. Izu daNzambi datulejaña nawu wuswa wetu wukweti hakukumina nawa twatela kulondela nshimbi jajiwahi jatwinkayi Yehova. Cheñi, ambanda atela kwovwahila anfumu jawu, anyana niwena atela kwovwahila anvwali jawu.—Efwes. 5:22; 6:1. w17.01 2:4, 5

Tunakushakama mumpinji yakala. Chibalu chakuloñesha kwaYehova chahamaseki chinakuyilaku hampidi muyuma yayivulu, dichi yuma yalema yinakuhimpika. Neyi iku kuhimpika kutuwana, twikalenu adizoza, nakufwila yuma yamutiyishaña Yehova kuwaha bayi etu aweni. Kwila mwenimu kwaletaña kunuñañana. Pawulu wasonekeleli akwaKristu amuRoma nindi: “Neyi chochitwekala nayiidi yayivulu kumujimba wumu, ilaña yiidi yejima hiyakalakalaña mudimu wowumuku, dichi chitwekala ninetu nawa, hela tudi amavulu, tudi mujimba wumu mudi Kristu.” (Rom. 12:3-5) Hichikweti muloña nachidi yumaku, wejima wetu twatela kuzata nañovu kutwala Wanta waYehova hambidi. Enu akulumpi, dizishenu atwansi nyidimu yimwazataña. Enu amanakwetu atwansi, itejenu nyidimu yanayinkiwu, dikeheshenu nawa tiyililenuña nakalemesha mwanakuyilejawu akulumpi. Enu ambanda mwasumbuka, imbujolenu ñoda Akwila, Prisila, wendeleña hamu nanfumwindi nakumukwasha nihahimpili yuma.—Yil. 18:2. w17.01 5:15, 16

Gideyona wamwekesheli kudikehesha hakutoñojoka kwafumayi. Hanyima yakwiteja mudimu wamwinkeliwu kudi Yehova, Gideyona wakeñeleña kwiluka chakuzata mudimu nawa walombeli wukwashu kudi Yehova. (Ansomp. 6:36-40) Gideyona wadiña wahamuka. Ilaña wazatileña mukubabala nawa namaana. (Ansomp. 6:11, 27) Wazatishili wanyi chifulu chindi kulonda yayi mpuhu. Ilaña chakumishiliyi mudimu windi, wafuntili kumukala wawu namuzañalu. (Ansomp. 822, 23, 29) Kudikehesha hikwatalisha mukubula kufwila hela kukaana kukooleka kukwawu kwanatwinkiwuku. Nsona yatukoleshaña wejima wetu kuyilaku hambidi. (1 Tim. 4:13-15) Komana twatela kuhimpa mudimu kulonda tuyiliku hambidi? Inehi mwani. Nawukwashu waYehova, tunateli kuyilaku hambidi namudimu wudi wejima wutunakuzata chakatataka. Tunateli kwikala nayilwilu yakeñañayi Nzambi nikuzata nañovu nyidimu yayiwahi. w17.01 3:15, 16

Yehova waloñesheli ifutu danyiloña hela chakwila chamuneñesheli. (1 Pet. 1:19) Walemesha chikupu antu chakwila wafwilileña kuhana mwanindi wumu hohu wakeñayi kulonda yatufwili. Munjila yikwawu, Yesu wekalili tata yetu watachi bayi Adama. (1 Kor. 15:45) Yesu welili yuma yayivulu kubadika hakutwinka wumi; watwinka kukooleka kwakufunta muchisaka chaNzambi. Eña, kushindamena hamulambu waYesu, Yehova weteja antu kufunta muchisaka chindi chakadi kufumpa nshimbi jindi. Komana twazañalalaña wanyi neyi tutoñojoka mpinji yakela antu ejima ashinshika anekali awanina? Kwakekala kunuñañana kwakweni hakachi kachisaka chamwiwulu nichahamaseki. Dikwila nawu, twakekala anyana kaNzambi chikupu. (Rom. 8:21) Kumwekesha kusakilila hefutu danyiloña kukuletesha tukwashi akwetu niwena akaheteli munichi chawaana. w17.02 1:17, 19

Kaposhi Kakutalila kaJuly 15, 2013, kashimwini nawu “nduñu wamaana nikashinshi” hikadizanvu kanyanya kawamanakwetu awayishewa ekala Mwizanvu Dalombolaña. Izanvu Dalombolaña dafuukulaña yuma yalema chiwahi. Munjilanyi? Amamembala ahumañanaña mulungu nimulungu, kulonda ahanjekeña chiwahi nawa mukuwunda. (Yish. 20:18) Hachaaka-hachaaka ahimpaña cheyamani haniku kubulakana, chineli kwosi membala waMwizanvu Dalombolaña amonañawu nawu wabadika amakwawu. (1 Pet. 5:1) Nawa ahimpaña wucheyamani kumakometi ejima 6 aMwizanvu Dalombolaña hachaaka-hachaaka. Nawa membala wejima mwizanvu wadimonaña wanyi yomweni nindi hinlomboli hadi manakwindi, ilaña wadimonaña neyi “wamwitala,” adishañawu kudi nduñu wamaana nikashinshi nikudi antu azatañawu nawu. Izanvu Dalombolaña hidahoshaña naspiritu yajilaku nawa hidelaña yuma yaloña mpinji yejimaku. Dichi, dinateli kuluwañesha munsañu yakushimuna chalala hela mukuloñesha. w17.02 4:10-12

Njila yimu yitwamwekeshelañamu kusakilila hefutu danyiloña hikudihana kudi Yehova kushindamena hachitwakuhwelela mwifutu danyiloña nikupapatishewa. Chipapatishu chetu chamwekeshaña nawu “tudi antu jaYehova.” (Rom. 14:8) Chineli Yehova welaña yuma yejima muloña wakukeña, wakeñaña nindi antu ejima adifukulaña kudi yena ekali nachilwilu chakukeña. (1 Yow. 4:8-11) Neyi tukeña akwetu tukumwekesha netu tunakukeña kwikala “anyana kaTata [yetu] wekala mwiwulu.” (Mat. 5:43-48) Lushimbi lwakukeña mukwetu dilushimbi lwamuchiyedi halushimbi lwakukeña Yehova. (Mat. 22:37-40) Njila yimu yitwamwekeshelañamu kukeña kudi akwetu hikwovwahila lushimbi lwakushimwina nsañu yayiwahi yaWanta waNzambi. Neyi tukeña akwetu antu, tukumwekesha kulema kwaNzambi. Neyi twovwahila lushimbi lwakukeña akwetu sweje-e amanakwetu, kukeña kwaNzambi ‘kukuwanina mudi etu.’—1 Yow. 4:12, 20. w17.02 2:13, 14

Munateli kutoñojoka nenu chadiña chapela kutonda muloña kumukalakela Yehova dichuma chachiwahi. Kwosi muntu wamaana watela kukundama kudi Bayali hela kumukalakela. Hela chochu, aIsarela adiña ‘nakululuta, niniku kwakukundama nehi.’ Mukubabala, Elija wayilejeli njila yayiwahi yakudifukwilamu kudi Yehova. Muloñadi chitukuhoshela netu aIsarela chatela chayikalilili kufuukula mwamaana? Chatachi, alekeli kumukuhwelela Yehova nawa akaanini kutiyilila izu dindi. Adiña wanyi nachikuku chakwiluka kwalala hela maana aNzambi nawa amukuhweleleli wanyi Yehova. Neyi elileña yuma kwesekeja namwaya kwiluka kwalala chadi kuyikwasha kufuukula chiwahi. (Mas. 25:12) Kubombelahu, etejeli antu amakwawu kuyiluwañesha nikuyifuukwila. Antu amunidi ituña abulileña kudifukula kudi Yehova aluwañesheli yitoñojoka yawaIsarela, chakwila atachikili kulondela ntañishilu yakutwamba. Yehova wayisoñamishileñahu dehi nindi chuma chamuchidiwu chikamwekana.—Kwid. 23:2. w17.03 2:6, 7

Neyi tutoñojoka chakutalilahu chaHezekiya, tunateli kumona yuma yitwatela kuleka yinateli kutukañesha kwikala nawubwambu wawuwahi naNzambi hela kutufumisha mukudifukula kwalala. Mwamweni, tunakukeña wanyi kwimbujola antu akwituña azatishaña intaneti kulonda amoneña antu neyi kwiji hiyanzambi. Hela chochu, akwaKristu amakwawu anateli kutiya kuwaha kuhanjeka nawantaña jawu kuzatisha iyi njila. Ilaña antu amavulu mukaayi azatishaña intaneti munjila yatama chakwila alondelaña amayala niambanda abula kwilukawu. Hela kumanishila mpinji nakutala nyevulu hela kutaña nsañu jahosha hadi awantu. Mwekala wubanji mukutaña nsañu yawusupi yasonekañawu antu hadi awa antu. MukwaKristu nateli kutachika kudivwimba neyi yamona antu amavulu anakeñi yuma yashayi haintaneti, nikutiya kutama neyi abula kumulondela. Tunateli kudihula netu, ‘Komana natondolwelaña kudifukula kudi antu hela kuzatisha mpinji yami kuyuma yamukunkulwayi?’—Efwes. 5:15, 16. w17.03 3:14, 17