December

Kapostolu Petulu wayikolesheleña akwaKristu kuumika kweseka kwaSatana. Yakutalilahu ‘yawantu anomiki’ yatudizishaña chakwikala ashinshika, yatukoleshaña nawu tunateli kushinda nawa yatwanukishaña nawu akatukiswila neyi twikala ashinshika. (Yak. 5:11) Twili netu anakuyidimbulula hela tuhu nikuyikabisha kudi ayilumbu jenu amukudifukula kwalala. Hadaha mudi eluda muchipompelu hela nkoñi wañinza watiyaña nindi wudi nanyidimu yayivulu nankashi yakuzata. Shinshikenu chakutalilahu chaPawulu. Wamweni kukukala ‘kukwawu kwamukabishileñawu kudi akwakukabisha nawa wadiña nakukala kukwawu kwakwakamena yipompelu. (2 Kor. 11:23-29) Hela chochu, wazeyeli wanyi nawa chakutalilahu chindi chakolesheli amakwawu. (2 Kor. 1:6) Neyi munakuumika kukala, anukenu nenu chakutalilahu chenu chikukwasha amakwawu kuumika. w16.04 2:11, 14

Yesu washimwini nindi mumafuku akukuminina, nsañu yayiwahi yaWanta akayishimwañena kudi antu ejima. (Mat. 24:14) Antu mukaayi kejima atwiluka etu aYinsahu jaYehova muloña wamudimu wetu wakushimwina. Antu amakwawu atambwilaña nsañu yitwashimwinaña, amakwawu nehi. Ilaña niantu abulaña kutambwila nsañu yitwashimwinaña atulemesha muloña wamudimu wetu. Twahoshaña netu yetu twazataña mudimu washimwiniyi Yesu. Akwansakililu amavulu ahoshaña nawu ashimwinaña nsañu yahosheliyi Yesu. Ilaña ashimwinaña hohu kumachechi, haTV, haIntaneti, hela kulejaku antu chamwilukiliwu Yesu. Amakwawu atoñojokaña nawu kukwasha antu anakankili hela kuzataku nyidimu yidi neyi wundotolu, wunasi, wuntañishi diyi njila yakushimwinamu. Hanu dinu iyi nyidimu diwu mudimu washimwiniyi Yesu? w16.05 2:1, 2

Kufuma tuhu mu 1914, nfulumendi jawantu jinekali yilumbu yaWanta waNzambi. Katataka iwu Wanta wufumishuhu nfulumendi jejima jawantu. (Mas. 2:2, 7-9) Nzambi weteja nfulumendi jawantu kwikalaku muloña jinateli kuleta kuwunda. Ichi chatukwashaña kushimwina nsañu yayiwahi yaWanta waNzambi. (Rom. 13:3, 4) Dichatulejelañayi Nzambi nindi tulombeleñaku anlomboli kulonda tudifukuleña kudi yena mukuwunda. (1 Tim. 2:1, 2) Neyi anakutukabisha, tunateli kulomba wukwashu kudi akulumpi janfulumendi. Dicheliliyi Pawulu. Hela chakwila Bayibolu yahoshaña nawu Satana diyi wayuulaña nfulumendi jawantu, ilaña yahosha wanyi nawu wayuulaña nlomboli wejima wamunfulumendi. (Luka 4:5, 6) Dichi bayi tuleja antu netu nlomboli wejima wamunfulumendi amuyuulaña kudi Diyaboluku. Bayibolu yashimuna nawu bayi tuhosheña antu chatamaku.—Tit. 3:1, 2. w16.04 4:5, 6

Hanu dinu tunateli kwiluka ñahi yuma yikumutiyisha Yehova kuwaha? Neyi kwosi nshimbi yashimunawu muBayibolu, twatela kushinshika, nikwiluka chakeñañayi Yehova hanoyu nsañu. Tunateli kwila ñahi mwenimu? Twatela kulomba kudi Nzambi nikwiteja spiritu yindi kutulombola. Yesu welukileña yuma yakeñeleñayi Yehova nindi yeleña. Chakutalilahu, Yesu walombeli nawa wadishili mazaza muchihayamisha kapampa kayedi chatiyiliwu nzala. (Mat. 14:17-20; 15:34-37) Ilaña chatiyiliyi nzala muchinkalampata, Diyabolu wamwilili nindi yabalumuni malola kwikala mankendi, ilaña Yesu wakaanini. (Mat. 4:2-4.) Wamwilukili chikupu Tata yindi, dichi welukili nindi Yehova wukumwiteja wanyi kuzatisha spiritu yajila kwila yuma yakuditiyisha yomweni kuwaha. Welukili chikupu nindi Tata yindi wukumukiña nikumwinka yakuda neyi natiyi nzala. w16.05 3:7, 8

Twatelela kutaña Bayibolu nakanañachima. Dichi henohu kanda tutañi Bayibolu, twatela kumulomba Yehova kulonda twikali nakanañachima nimaana akutiyisha nsañu yinakukeñayi nindi twiluki. (Ezera 7:10; Yak. 1:5.) Neyi munakutaña Bayibolu, hudikilenu nakudihula nenu: ‘Inakudizilaku kwodi hadi Yehova? Nukuzatisha ñahi iyi nsañu muchihandilu chami? Nukuzatisha ñahi iyi nsañu kukwasha amakwawu?’ Neyi tukutoñojoka hanawa malwihu, tukuhetelamu nankashi mukutaña Bayibolu. Tushinshikenu chakutalilahu. Bayibolu yalumbulula yuma yatela kwilawu aeluda akwaKristu. (1 Tim. 3:2-7) Hela chochu etu amavulu twekala wanyi aeluda, dichi tunateli kutoñojoka netu iyi nsañu yinatukundami wanyi. Hela chochu, tuzatishenu malwihu ejima asatu itwatena hakusambila kulonda tumoni chatela kutukwashawu. w16.05 5:7, 8

A Yudeya chayitwaliliwu muBabiloni, atachikili kushakama mumusumba mwadiña ankishi niantu adifukwileña kudi aspiritu atama. Hela chochu, aYudeya ashinshika adi neyi Danyeli niamabwambu jindi asatu, akaanini kuyiluwañesha kudi antu amuBabiloni. (Dan. 1:6, 8, 12; 3:16-18) Danyeli niamabwambu jindi amwitejeli Yehova kwikala Kañemi kawu nikutwalekahu kudifukula kudi yena. Hela chakwila Danyeli washakamineña nawantu atama, kañelu kaNzambi wamuteneni nindi wadiña “muntu wasweja kukeñewa.” (Dan. 10:11, 19) Kunyima, kañemi washileña ndambu mwakuwumbila iwumba kulonda yawumbi chuma chinakukeñayi. Makonu, akwakudifukula alala eluka nawu Yehova diyi Nyuuli wabadika mukaayi kejima nawa wukweti ñovu yakuwumba nyuza. (Yere. 18:6.) Nzambi wukweti cheñi ñovu yakutuwumba wejima wetu. Hela chochu, Yehova watukanjikijaña wanyi kuhimpa. Ilaña wakeñaña nindi tudihani kulonda yatuwumbi. w16.06 2:1, 2

Satana wazatishaña yuma yamukaayi kutukokola kulonda tutoñojokeña netu tukwikala namuzañalu chitwekala namaheta. Waletaña yuma kwesekeja ‘nakufwila kwamesu.’ (1 Yow. 2:15-17; Kutach. 3:6; Yish. 27:20) Mukaayi mudi yuma yayivulu, yayiwahi niyamukunkulwayi nawa yaletaña ikoku. Mwalandahu dehi chuma chakwila himwachikeñeliku, ilaña mwachilandili muloña mwachimweni anachitanjiki? Komana mukuhita kwampinji mwelukili nenu mwadi kutwalekahu kuhanda hela chakwila mwachilandili wanyi? Yuma yamuchidiwu yaluwañeshaña hohu chihandilu chetu nikutufuntisha munyima. Tukuleka kudiza Bayibolu, kuloñesha kupompa nikuya nakushimwina mpinji yejima. Anukenu nenu, kapostolu Yowanu watusoñamishili nindi: “Mpata yamunu mwishina yikuhita, nikufwila kwayu kwatama.” w16.07 1:3, 4

Muchipompelu chawakwaKristu akusambila, mwadiña aYudeya, aGriki, aRoma niantu afumini kumatuña acheñi. Adiña nayitachi yashiyashana, tushidikilu nawa akeñili yuma yashiyashana. Dichi, chayikalili kwiteja njila yayiha yakudifukwilamu nikuleka yuma yelileñawu kunyima. Dichaletesheli Pawulu yayanukishi nindi akwaKristu ekala naNzambi wumu, Yehova. Indi chipompelu chawakwaKristu makonu? Kaprofwetu Isaya wahosheli nindi “kunyaka yakukuminina,” antu akunyuza yejima akapompa hamu nakudifukula kudi Yehova. Akahosha nawu: ‘Wakatuleja mwendelañayi kulonda twakendaña munjila jindi.’ (Isaya 2:2, 3) Twazañalalaña hakumona iwu wuprofwetu wunakushikijewa makonu! Amanakwetu niahela afuma kumaluña ashiyashana, ahoshaña madimi amboka nawa akweti yisemwa yashiyashana. Ilaña twekala anuñañana mukudifukula kudi Yehova. w16.06 3:15, 16

Chakala kwiluka yuma yayitentekelayi Yehova akwaKristu awayishewa neyi anashakami dehi hamatanda nakuyuula hamu naKristu mwiwulu. (Luka 22:28-30; Fwi. 3:20, 21; 1 Yow. 3:2) Akekala “Yerusalema Yayiha,” nsumbuki waKristu. (Chim. 3:12; 17:14; 21:2, 9, 10) Akazatila hamu naYesu ‘hakuuka nyuza,’ kulombola antu ovwahila nakuyisubula kunshidi nikukufwa nakuyilisha kwikala awanina. (Chim. 22:1, 2, 17) Hakachi kayuma yamaneni yakamwekesha luwi lwaYehova lwasweja hikusañula afu kufuma “mumajamu.” (Yoba 14:13-15; Yow. 5:28, 29) Amayala niambanda ashinshika afwili henohu mulambu waKristu kanda, kubombelahu “nianyikoku acheñi” ashinshika anakufwa munanu mafuku akukuminina, akayisañula kulonda akatwalekihu kumukalakela Yehova.—Yow. 10:16. w16.07 4:13-15

Kwikala ‘atona’ kuspiritu kwatalisha hohu wanyi mukwikala namuchima wakufwila kutona. Henohu kunashali mafuku antesha nakumukwata Yesu mwitempa daÑesemani, wayilejeli atumbanji twindi kulomba nakulembelela Yehova. (Luka 21:36.) Dichi hakwila nawu tutwalekihu kwikala atona kuspiritu, twatela kulombaña mpinji yejima. (1 Pet. 4:7) Chineli Yesu wahosheli nindi kukuma kwakenza ‘hampinji [yitukubula] kutoñojoka,’ ayinu bayi neyi himpinji yakunoñoka kuspiritu nakufwila yuma yamwituña yaletaña ikoku yakokwelañamu Satana niantu jindi niyuma yafwilaña mujimba wetuku. (Mat. 24:44) Nzambi naKristu atulejaña yuma yinatuhembeliwu kumbindi kuhitila muBayibolu nichitunateli kutwalekahu kwikala atona. Twatela kusha maana kuyuma yakuspiritu, wubwambu wetu naYehova nikutwamijaku Wanta hambidi. Twatela kwiluka mpinji niyuma yinakumwekana kulonda tudiloñeshi nayuma yinakwinza hambidi. (Chim. 22:20) Wumi wetu wudi hakatoña! w16.07 2:15-17

Wulu wekalaña wakola neyi adisumbula adanakenaña wumu namukwawu. ‘Adovwahilaña nikudanakena wumu namukwawu.’ Hela chochu, adisumbula ejima akuluwañeshaña. Neyi chuma chamuchidiwu chimwekana, atela kudizila kuyiluwa yawu, kudanakena wumu namukwawu nikwiteja kukeña kuyinuñi neyi “mpanda yasweja.” (Kol. 3:13, 14) Kubombelahu, “kukeña kwadiwunjikaña, kukweti niluwi. . . . Hikwafuukwilaña mukwawu chuma chatamaku.” (1 Kor. 13:4, 5) Atela kumanisha kubula kutiyashana mukunyakashana. Dichi, akwaKristu adisumbula atela kumanisha kukala henohu itena kanda dihumi. (Efwes. 4:26, 27) Muntu watela kudizoza nikuhamuka hakwila yahoshi nindi, “Ñanakeniku hakukutiyisha kutama,” kwila mwenimu kukukwasha adisumbula kumanisha kukala nawa akwikala anuñañana. w16.08 2:6

Yesu wadiña namudimu wakushimwina nsañu yayiwahi yaWanta mpinji yejima. Hela chochu, wadiña cheñi nampinji yakudizisha amakwawu kwikala atubiña niantañishi. (Mat. 10:5-7) Fwilipu niyena wadiña namudimu wakushimwina nsañu yayiwahi mpinji yejima, ilaña wakwashili anyanindi awaana awambanda kwikala adikita mukushimwina chalala chamuNyikanda yajila kudi akwawu. (Yil. 21:8, 9) Iwu mudimu wakudizisha walema nimakonu, muloñadi? Mukaayi kejima, antu anakutambwila nsañu yayiwahi anakuvulilaku. Amaha achidi kanda apapatishewi atela kwiluka kulema kwakwikala nakudiza Bayibolu kwahalwawu. Atela cheñi kuyidizisha chakushimwina nsañu yayiwahi nikuyidizisha chalala. Muyipompelu yetu, amanakwetu anakukeñeka kuyikwasha azati nañovu kulonda ashikihu kwikala ankoñi akuzatila niaeluda. AkwaKristu apama atela kuzatisha “kuleja kwakuwahi” hakwila nawu akwashi amaha kuyilaku hambidi kuspiritu. w16.08 4:1, 2

Kuzatila hamu nawamanakwetu niahela kwatunuñañeshaña. Kwakoleshaña cheñi wubwambu wetu nikwikala nachikuhwelelu chakola hankisu jitukukeña kutambwila muWanta waNzambi. Chitunakukolesha makasa awakwetu, tunakuyikwasha kushinda kukala kunakumonawu nikuyikwasha kutwalekahu kuchiñeja chikupu yuma yayiwahi yinakwinza kumbidi. (Isa. 35:4) Hela chochu, kwila mwenimu kwatukwashaña kwikala atona kuspiritu nikukuhwelela chikupu yuma yinatuhembeliyi Nzambi. Cheñi nawa, chumichi chakoleshaña makasetu. Kumona Yehova chakwashiliyi nikukiña ambuñindi kunyima hampinji jashiyashana, kwatela kukolesha chikuhwelelu chetu nikumukuhwelela makonu. Dichi, neyi mumona kukala, “makasenu bayi azeyaku”! (Zef. 3:16) Ilaña, hanjekenu naYehova mukulomba nawa itejenu chikasa chindi chañovu chiyikoleshi nikuyilombola kunkisu jakaleta Wanta.—Mas. 73:23, 24. w16.09 1:16-18

Neyi anakufuukula yuma yatela kuvwalawu, ambuña aNzambi atela kutoñojoka hamazu adi munsona yefuku dalelu. Tuneluki netu kushiyashana kwamaluña niyilaaka dikunateli kutuletesha kuvwala yuma yashiyashana. Cheñi, chihandilu niyuma yamwekanaña jashiyashanaña. Hela chochu, yilaaka hiyahimpaña yuma yakeñañayi Yehovaku. (Mal. 3:6) Kumaluña kutata, chinateli kukala kuvwala yakuvwala yakalemesha, yayiwahi nawa yatelela. Dichi, amanakwetu niahela atiyaña kuwaha neyi tubula kuvwala yakuvwala yinatulamati hamujimba hela yazumbula nankashi. (Yoba 31:1) Cheñi, neyi tunakunooka kuchikumu chakaloña hela kuchiwelelu, yakuvwala yakuwela nachu yatela kwikala yatelela. (Yish. 11:2, 20) Hela chakwila antu amavulu mukaayi avwalaña yakuvwala yakuwela nachu yamwekeshaña yidi yamujimba, etu twamukalakelaña Yehova twakeñaña wanyi kumuneñesha Nzambi wajila itwakeña. w16.09 3:11, 12

Yesu watiyileña wanyi woma kwihula atumbanji twindi yuma yakuhweleleliwu. Mwimbujolenuña. Mwatela kwihula anyanenu munjila yayiwahi chinakutoñojokawu. Neyi mwana neluki wanyi yuma yimunakumudizisha, bayi mumuzuwila hela kumwakula munjila yatamaku. Mukwashenu mukuwunda kulonda yatoñojoki hanoyu nsañu. Neyi mwanenu nayihuli, chamwekeshaña nawu nakwakamena nawa nakukeña kwiluka. Yesu wehwileña malwihu alema nihampinji yadiñayi nayaaka 12 yakusemuka. (Luka 2:46) Yilukenu anyanenu chikupu, ilukenu chatoñojokañawu, chatiyañawu niyuma yayakameshaña. Bayi mutoñojoka nenu adi nachikuhwelelu muloña ayaña kukupompa kwawakwaKristu nawa mwayaña nawu hamu mumudimu wakushimwinaku. Hampinji yimunakuzata nyidimu yakumujimba, hanjekenuña nawu nihayuma yakuspiritu. Lombenuña nawu hamu nawa yilombelenukañaku. Fwilenu kwiluka yuma yesekaña chikuhwelelu chawu nawa yikwashenu kulonda ashindi kweseka kunakumonawu. w16.09 5:3-5

Makonu, aYinsahu jaYehova amavulu anakuzata mudimu wakushikija chimwenu chakushimwina nsañu yayiwahi ‘kunyuza yejima, kunyichidi yejima, kumadimi ejima, nikumatuña ejima.’ (Chim. 14:6) Komana mudi hakachi kawantu anakudiza idimi dacheñi? Komana munakuzata wumishonali hela kukalakela mwiluña dacheñi kudi kukaankila indi kwiji munatachiki kupompa muchipompelu mwazatishañawu idimi dacheñi mwiluña denu? Hakwikala ambuña aNzambi, wejima wetu twatela kutwamijaku wuspiritu wetu niwachisaka chetu hambidi. Mpinji jikwawu, chinateli kutukalila kwikala nakudiza kwahalwetu munjila yayiwahi muloña wakwikala nanyidimu yayivulu. Hela chochu, antu akalakelaña mwituña dacheñi amonaña kukala kwakuvulu.Kubombela hakudiza idimi, antu akalakelaña kwituña dacheñi atela cheñi kwiluka nawu anakudiisha nyichima yawu nayakuda yakola yakuspiritu.—1 Kor. 2:10. w16.10 2:1-3

A Yinsahu jaYehova atwalekañahu kuchiñilila namuzañalu hela chakwila anakutwalekahu kumona makabi. Chakutalilahu, amanakwetu niahela amavulu anayikasi mutuleya muEritrea, Singapore, nimuSouth Korea, kakavulu ayikasaña muloña wakulondela mazu aYesu akubula kwiñila wushidika. Antu jaYehova amavulu anamoni wanyi kweseka kweneni. Chikuhwelelu chawu achesekaña munjila jamboka-mboka hamuntu-hamuntu. Amavulu anomiki wuzweñi hela kukabakana mumpinji yanjita nimukukala kwadimwekenaña. Amakwawu adi neyi Mosi niankakulula amakwawu munjila yakwila analeki chihandilu chakufwila kuya mpuhu. Anakuzata nañovu kutondolwela chihandilu chakudishindamena, chakufwila maheta amavulu. Chumanyi chayikwashaña kwila mwenimu? Hikukeña Yehova nikukuhwelela chikupu nawu wakaleta wuñanji waloña nikwinka ambuñindi ashinshika wumi wahaya nyaaka mwituña dadiha dakuloña.—Mas. 37:5, 7, 9, 29. w16.10 3:15, 16

Hampinji Yeremiya yatiyiliyi woma nawa yaneñeliyi, Yehova wamukwashili kwikala nachikuhwelelu chakola. (Yere. 1:6-10) Nawa toñojokenu chatiyiliyi kaprofwetu wakashinaji Danyeli hampinji yelili Nzambi yatemeshi kañelu kulonda yamukoleshi. Wamuteneni nindi “muntu wasweja kukeñewa,” hela iyala ‘wasweja kulemeshewa.’ (Dan. 10:8, 11, 18, 19) Komana ninenu kwila mukoleshaku akwakushimwina, apayiniya niamanakwetu nawahela ashinakaja dehi anakukeñeka wukwashu nehi? Nzambi wamweni wanyi nindi hatela kumukolesha nikumuhameka Yesu hampinji yadiñayi hamaseki muloña azatilili hamu hadi yaaka yayivuluku. Ilaña, Yesu watiyili Tata yindi nakuhosha kufuma mwiwulu nindi: “Diyi Mwanami nakeña, natiyaña kuwaha nankashi mudi yena.” (Mat. 3:17; 17:5) Ilaña Nzambi wamuhamekeli Yesu nakumuleja nindi nakwila chiwahi. Yehova watemesheli cheñi kañelu nakumukolesha Yesu hawufuku wakukumishaku hakabakeniyi henohu kanda yafwi.—Luka 22:43. w16.11 1:7, 8

Chakala kudiyuula neyi atwila chatama. Chinateli kutuneñesha nankashi neyi atwila chatama muloña wachisemwa chetu, ikowa hela kukala kukwawu kwakumujimba. Sweje-e dinu, chakataña nankashi neyi mukwetu mukwaKristu diyi wunatwili chatama! Dichi, chalema nankashi kuzatisha kufumba kwamuBayibolu kulonda tubuli kwila chatama. (Yish. 16:32) Chakadi nikujina, wejima wetu twatela kuzata nañovu kulonda tubuleña kusha muchima hayiluwa yawakwetu nawa tuyanakeneña. Yehova niYesu alemesha chikupu kwanakena. (Mat. 6:14, 15) Komana mwakeñaña kwanakena hela kuyuula yitoñojoka yenu? Antu akañanyaña kuyuula yitoñojoka yawu avula kwikala azuwa. Chafumañamu, akwawu akuleka kudikunda nawu. Muntu wazuwa nateli kutamisha chipompelu.— Lev. 19:17, 18. w16.11 3:4-6

Mukumana kwachaaka cha 1800 Charles Taze Russell nialundanindi adiña nampwila yakudiza Bayibolu. Hatachi, Manakwetu Russell wakeñeleña kwiluka nsakililu yayeni yadizishileña chalala. Wesekejeleña yuma yadizishileñawu mujinsakililu yashiyashana, ninsakililu yabula kwikala yawakwaKristu nayuma yahosha Bayibolu. Welukili nindi kwosi nsakililu niyimu yadizishileña antu yuma yashindamena Hezu daNzambi. Mpinji yimu, Russell wadiwanini nawakulumpi jansakililu iku nakuhweleli nindi akutiya chalala chasandujoleliyi hamu nawalundanindi nawa nindi akuya nakudizisha antu amuchipompelu chawu. Ilaña akulumpi jansakililu akaanini yuma yayilejeliyi. Atudizi aBayibolu elukili chikupu nawu: Hiyatela kudibomba nawantu adi munsakililu yakutwambaku. w16.11 4:14

Chikuma chidi chakwila nawu kumusakilila Nzambi haluwi lwindi lwasweja bayi neyi hikuleka hohu kwila wuvumbi, kusheta walwa hela kwila nshidi jelileñawu akwaKorindaku. (1 Kor. 6:9-11) Kumusakilila Nzambi haluwi lwindi lwasweja bayi neyi kwabombelamu hohu kuleka wuvumbiku ilaña kwabombelamu kulwisha nañovu kulonda tuleki kutala nyevulu yatama. Kulubula yidi yetu yikali anduñu jakuloña kukutukwasha kubula kusheta nawa tukutondolwelaña yaaku yakunwa nakusheta. Twatela kuzata nañovu hakwila nawu tushindi iyi yaaku yatama; hela chochu hikukala kutunateli kushinda. Tunakufwila kubula kwila nshidi yahamesu bwi-i, kushilahu tuhu ninshidi yamwekanaña neyi yanyanya. Ilaña tukuluwañeshaña mpinji jikwawu. Hela chochu, twatela kuzata nañovu neyi cheliliyi Pawulu. Wayikonkomweneni amanakwindi nindi: ‘Bayi mwiteja nshidi yikali mwanta munyijimba yenu yakufwaku kulonda mutweshi kwovwahila kufwila kwayuku.’—Rom. 6:12; 7:18-20. w16.12 1:16, 19-21

Yesu wahosheli nindi Tata yetu wamwiwulu wukakañanya wanyi kwinka spiritu yajila ejima Amulombaña. (Luka 11:10-13) Iyi yilwilu yayiwahi yitwekalañanayu muloña wañovu jaNzambi yamwekeshaña chekalayi Nzambi wañovu. (Kol. 3:10) Neyi mwikala nanyikabu yakuspiritu, wubwambu wenu nawakwenu wukukola. Dichi, kukala kunateli kuleñela kwakama kukwikalaku wanyi. Mwatela kwikala adizoza kulonda mwovwahili “chikasa chaNzambi chañovu” ‘nikumutwika kwakama kwenu kwejima.’ (1 Pet. 5:6, 7) Neyi mwikala adizoza, mukwikala nawuselewa waNzambi nawa wukuyikwashaña. (Mika 6:8) Neyi mwiluka hakumina ñovu jenu, mukwakamaña nankashi wanyi muloña mukushindamenaña hadi Nzambi. w16.12 3:7, 12

Chineli wadiña “mukwakushimwina kuloña,” Nowa washimwinini nsañu yamwinkeliwu yakusoñamisha nakashinshi. Chakubula nikujina, kwila mwenimu kwamukwashili Nowa kwikala nachikuhwelelu chakola. Kubombela hakushimwina, wazatishili cheñi wuswa windi wakutoñojoka hakuzata mudimu wamwinkeliwu kudi Nzambi wakutuña watu. (Heb. 11:7) Neyi chocheliliyi Nowa, twafwilaña ‘kwikala nayuma yayivulu yakuzata mumudimu waMwanta.’ (1 Kor. 15:58) Iyi nyidimu yinabombelimu kutuña nikuwahisha maluña akudifukwila, kukwasha hakupompa kwañinza nikwamaluña hela kuzatila hakasanji kamutayi hela kakubalumwinahu nyikanda. Kubombelahu, twadikitaña mumudimu wakushimwina muloña tweluka netu iwu mudimu watukoleshaña. Mwamweni, kushimwina kwatukwashaña kutwalekahu kutemuka lufuchi lwakuwumi.—1 Kor. 9:24. w17.01 1:8, 9

Njila yimu yikumwekesha nawu tukweti mwakumina kusubuka kwetu hikulemesha wuswa wukwetiwu akwetu wakudifuukwila muchihandilu chawu. Muloñadi? Chineli wonsu wetu tudi nachawaana chakudifuukwila, akwaKristu ayedi hiyanateli kufuukula mwomumu mpinji yejimaku. Chumichi chinateli kumwekana nimunsañu yakundama kuyilwilu nimukudifukula. Neyi twiluka netu akwaKristu ejima atela ‘kudisendela yiteli yawu,’ tukulemesha wuswa wukwetiwu akwetu wakuzatisha chawaana chawu chakudifuukwila kushilahu tuhu neyi tunakufuukula hayuma yabula kulema. (1 Kor. 10:32, 33) Yehova watwinka chawaana chakudifuukwila nawa twasubuka chikupu. (2 Kor. 3:17) Ichi chawaana twachilemesha muloña chatukwashaña kufuukula yuma yamwekeshaña nawu twamukeña Yehova. Dichi, tutwalekenuhu kuhameka hachawaana chabadika chatwinkawu kuhitila mukuchizatisha munjila yaletaña mpuhu kudi Nzambi nikulemesha munafuukuliwu akwetu kuzatisha chawaana chawu. w17.01 2:15, 17, 18

Chatela tutachiki kuditiya hela kwila yuma yimu yikuletesha antu atulemesheña, twatela kumwekesha ‘spiritu yakuwunda nikwovwaha.’ (1 Pet. 3:3, 4; Yere. 9:23, 24) Mukuhita kwampinji, twakadimwekesha chitwekala muyilwilu yetu. Chakutalilahu, tukutachika kumwekesha yilwilu yimu yinakumwekesha nawu twakeña nyidimu yikwawu yitukweti, tweluka yuma yayivulu, hela twadiluka chikupu nawamanakwetu alombolaña. Hadaha, tukutachika kuhosha yuma chakwila antu akutachika kutuhameka hayuma yitwazatili nawakwetu. Yesu watwimikila chakutalilahu chachiwahi. Yuma yayiwahi yikwawu yahosheliyi hayifumishileña hela hiyakundamini kuNsona yachiHeberuku. Wahosheli muniyi njila kulonda antu eluki nawu yuma yahosheleñayi yafumineña kudi Yehova bayi chatoñojokeleñayiku. w17.01 4:12

Chadiña chakala wanyi kudi aAdama naEva kwiluka iyi nshimbi; hela kuyovwahila. Adiña nayakuda yayivulu yiyadi nikukañanya kudawu. Satana Diyabolu wazatishili kapela kumudimba Eva kulonda yabuli kumwovwahila Tata yindi, Yehova. (Kutach. 3:1-5; Chim. 12:9) Satana watwambili nindi anyana kaNzambi ahamaseki ayitejeli wanyi ‘kudya kunyitondu yamwitempa.’ Chidi neyi wahosheleña nindi: ‘Kwila mwila yuma yimunakeñi nehi?’ Kuhiñahu, wamudimbili chikupu nindi: “Chalala, himwakafwaku.” Dichi wesekeli kumushinjila Eva nindi watela wanyi kumwovwahila Nzambi chahosheliyi nindi: “Nzambi neluki nindi ifuku dimukudya, mesu enu akatona.” Satana wahosheleña nindi Yehova wakeñeleña wanyi wena kuda nyikabu muloña yikuyitonesha. Kuhiñahu, Satana wayishiikili mwakutwamba nindi: “Mwakekala neyi chadiyi Nzambi, mwakeluka niyayiwahi niyatama.” w17.02 1:8, 9

Isaya washimwineñahu dehi nindi Wakekala ‘nlomboli yawantu nimukwakuyileja.’ (Isa. 55:4) Nawa Danyeli amoneneni kusoneka kutalisha hakwinza ‘kwaMesiya Kalamba.’ (Dan. 9:25) Nkumininaku, Yesu waditeneni yomweni nindi diyi “Nlomboli” yawantu jaNzambi. (Mat. 23:10.) Atumbanji twaYesu amulondeleli chakudikeñela nawa elukili nawu amutondeli kudi Yehova. (Yow. 6:68, 69) Chumanyi chaletesheli akuhweleli nawu Yesu Kristu diyi adiña nakuzatishawu kudi Yehova kulombola antu jindi? Hamupapatishileñawu Yesu, Yowanu Mupapatishi wamweni “iwulu dinakwenzunuka nawa spiritu yajila yamwekeneña neyi kapompa yenjileña nakuwila hadi yena.” Kuhiñahu, “spiritu yamutwalili mwisaña.” (Maku 1:10-12) Yesu chazatileñayi mudimu windi hamaseki, spiritu yaNzambi yamukwashili Yesu kwila yihayamisha nikuhosha kuzatisha wuswa wamwinkeliwu kudi Nzambi. (Yil. 10:38) Kubombelahu, spiritu yajila yamukwashili Yesu kwikala nanyikabu yakuspiritu yidi neyi kukeña, muzañalu nichikuhwelelu chakola. (Yow. 15:9; Heb. 12:2) Kwosi nlomboli wadiña neyi yena. Yesu amutondeli kudi Yehova. w17.02 3:15, 16

Ha Pentekosta 33 C.E., apostolu atachikili kulombola muchipompelu chawakwaKristu. Hanidi ifuku, “Petulu wemeni hamu nanowu 11” nawa washimwinini nsañu yalala yakupuluka kudi mazaza awaYudeya niantu abalumukili kwikala aYudeya. (Yil. 2:14, 15) Antu amavulu ekalili akakwitiya. Kuhiñahu, awa akwaKristu amaha “atwalekelihu kwovwahila ntañishilu yawapostolu.” (Yil. 2:42) Awa apostolu azatishileña chiwahi mali achipompelu. (Yil. 4:34, 35) Adiña nakwakamena antu jaNzambi kuspiritu, ahosheli nawu: “Tukusha maana chikupu kukulomba nikumudimu wakushimwina mazu.” (Yil. 6:4) Nawa enkeli akwaKristu ashikahu mudimu wakushimwina kumaluña amakwawu. (Yil. 8:14, 15) Mukuhita kwampinji, aeluda awayishewa amakwawu adibombeli nawapostolu hakuzata nyidimu yikwawu muchipompelu. Chineli adiña izanvu dalombolaña, adiña nakuhana nshimbi kuyipompelu yejima.—Yil.15:2. w17.02 4:4

Antu amavulu abula kuwanina anakuyiluwañesha chikupu kudi spiritu yamukaayi kaSatana. Dichinaleteshi antu kudifukula kudi amayala niambanda amakwawu chatela ayilemesheña hohu nikuyinka kavumbi katelela. Alemeshaña akulumpi jansakililu, akulumpi jamapolitiki, antu aya mpuhu muyisela yakudibecha, akwayisela, niantu amakwawu aya mpuhu chakwila ayimonaña neyi hiyantu alema chikupu. Dichi, atwansi niakulumpi akeñaña chikupu kuyimbujola, hadaha akeñaña kuyimbujola munvwalilu nimuyilwilu. AkwaKristu alala hiyalemeshaña antu muniyi njilaku. Kristu diyi muntu hohu itwatela kwimbujola. (1 Pet. 2:21) Nzambi wukutiya kutama neyi tukusweja kulemesha antu kubadika chitwatela kuyilemesha. Twatela kwanuka walala wakwila nawu: “Antu ejima anavulumuni, nawa anakañanyi kushika mukulema kwaNzambi.” (Rom. 3:23) Kuhosha hohu chalala, kwosi muntu wutwatela kulemesha munjila yinakumwekesha nawu tunakudifukula kudi yena. w17.03 1:6-8

Wejima wetu twatela kudishinshika munyichima yetu tumoni neyi twadihana chikupu kudi Nzambi. Dihulenu nenu, ‘Nafwilaña kumutiyisha Yehova kuwaha, kuhakwilaku kudifukula kwalala nikukiña antu jindi kuyuma yatama?’ Chakutalilahu, mukwila ñahi neyi ibwambu denu amuhaña muchipompelu? Komana mukuleka kudikunda naniwu muntu? Muchima wenu wukuyisañumuna kwiladi? Kufwana Asa, munateli kumwekesha nenu munakukalakala namuchima wejima neyi mushindamena chikupu hadi Nzambi hampinji yimunamoni ikañesha dimunateli kukañanya kuumika. Anateli kuyiseha hela kuyidiwula hashikola hakwikala Chinsahu chaYehova. Hadaha akwenu imwazataña nawu anateli kuyisawula muloña munatambuli mafuku akunooka kulonda mukazati nyidimu yakuspiritu hela munabuli kuzata maora amavulu kumudimu akutambwila nachu mali amavulu. Neyi mudi mukukala kwamuchidiwu, lombenu kudi Nzambi neyi cheliliyi Asa. (2 Kushi. 14:11) Kolelenu kuyuma yimuneluki nenu diyi yaloña nawa yamaana. Anukenu nenu Nzambi wamukolesheli nikumukwasha Asa nawa wukuyikolesha ninenu. w17.03 3:6-8

Izu daNzambi datufumbaña nawu twatela wanyi kushikena dakufuukula hohenohu neyi tunakufukuula hayuma yalema. Neyi tutoñojokaña chiwahi hawunsahu wejima wutukweti hayuma yitunakufuukula, tunateli kufuukula mwamaana. (1 Tesa. 5:21) Mutu wachisaka watela kusandujola muNsona nimunyikanda yetu yawakwaKristu henohu kanda yafuukuli nawa watela kwihula chinakutojokawu amakwawu muchisaka. Anukenu nenu Nzambi wamulejeli Abarahama kutiyilila mwahosheliyi ñodindi. (Kutach. 21:9-12) Aeluda niwena atela kwikala nampinji yakusandujola. Neyi amwovu nawa adikehesha, akuhimpa mwafuukwiliwu neyi chakwila atambwila nsañu yayiha nawa yalala kutalisha hayuma yafuukwiliwu dehi. Atela kuhimpa yitoñojoka yawu nimunafuukuliwu neyi chinatwesheki, nawa wejima wetu twatela kwila mwomumu. Chumichi chinateli kuleta kuwunda nikunuñañana muchipompelu.—Yil. 6:1-4. w17.03 2:16