July

Chineli wadiña ‘mukwakutala kwitala,’ hadaha daHezekiya, Shebina wadiña nawuswa chikupu. (Isa. 22:15) Chawushona, wadivwimbili nawa wakeñeleña kumulemesha. (Isa. 22:16-18) Muloña wakwila Shebina watachikili kudilemesha, Nzambi ‘wamunañumwini hakulema’ nakuhiñishahu Eliyakimi. (Isa. 22:19-21) Chumichi chamwekeni hampinji yakeñeleñayi Mwanta Senakeribi wakuAshuri kulukuka Yerusalema. Chimwahitili mpinji, iwu mwanta watemesheli akulumpi niamashidika amavulu kuYerusalema, kulonda yayichiinishi aYudeya niHezekiya kulonda adihani. (2 Anya. 18:17-25) Eliyakimu amutemesheli kuya nakuhosha nawakulumpi, ilaña wadiña nkawindi wanyi. Wayili nawakwawu ayedi, hakachi kawu hadiña Shebina, wadiña nsoneki haniyi mpinji. Komana chumichi chinakumwekesha wanyi nawu Shebina hahililiku nawa wadizozeli kutambwila chifulu chaheshina chakadi kuhemba nkunyi? w18.03 25 ¶7-8, 10

Neyi tumona netu yitoñojoka yetu yinakututwala kukufwila maheta hela yuma yakumujimbaku. Twalekenuhu kulomba spiritu nawa Yehova wukuyikwasha kuhimpa yitoñojoka yenu nakutachika kutoñojoka yuma yayiwahi. (Luka 11:13) Anukenu kapostolu Petulu. Kapampa kakavulu muchihandilu chindi, welileña yuma neyi muntu wabula kupama kuspiritu. (Mat. 16:22, 23; Luka 22:34, 54-62; Ñal. 2:11-14) Ilaña watwalekelihu kupama. Nawukwashu waYehova, Petulu watachikili chovu-chovu kutoñojoka neyi Kristu. Ninetu tunateli kwila mwomumu. Petulu washimwini yuma yimu yitwatela kuzatilahu. (2 Pet. 1:5-8) Neyi tuzata “nañovu chikupu,” kwikala nayilwilu yidi neyi kudiyuula, kuumika, kukeña kwakukeña anakwetu, yumiyi yikutukwasha kutwalekahu kwikala antu apama kuspiritu. Dihulenu enu aweni hefuku-hefuku nenu, yumanyi yinatela kuzatilahu dalelu kulonda nipaminiku kuspiritu?’ w18.02 25-26 ¶12-13

Yoba welukili chikupu yishina yaNzambi. Wamwilukili chikupu Yehova, nawa wazatishileña yuma yadiziliyi. Chakutalilahu: Yoba welukili nindi hateleli kuhosha nindi wamukeña Nzambi iku wahela akwawu antuku. (Yoba 6:14) Hadinyamwini nakumona akwawu nindi amukunkulwayiku, ilaña wayimwekesheleleña antu ejima kukeña, aheta niatuzweñi. Wahosheli nindi: “Wantuñili mwivumu damama hidiyi wamutuñili yenaku?” (Yoba 31:13-22) Mwamweni, Yoba hadivwimbileña hela kumona akwawu neyi amukunkulu muloña wamaheta adiñayi nawuku. Wambukaku chikupu nawantu akweti yifulu yamaneni nimaheta amavulu mukaayi! Yoba wakaanini yilwilu yakupesha yejima, wadiña ninakuyitoñojokahu wanyi. Welukili nindi kudifukula kwakutwamba nikusweja kukeña maheta, hikumukaana “Nzambi wekala mwiwulu.” (Yoba 31:24-28) Wamweneña nindi wulu himpaanda yajila mwekala eyala namumbanda. Wadikasili namesu indi kubula kutala chañadima namesu akumufwila.—Yoba 31:1. w18.02 11 ¶16; 12 ¶18-19

Nowa hakuminini dakwikala muntu wamuwahiku. Wekalili cheñi “mukwakushimwina kuloña,” washimwinineña hatooka yuma yakuhweleleliyi mudi Yehova. (2 Pet. 2:5) Kapostolu Pawulu wasonekeli nindi: “Kuhitila munichi chikuhwelelu, wamwekesheli nindi aka kaayi kateleleli kujilumuka.” (Heb. 11:7) Ichi chinakumwekesha nawu Nowa amudiwili, amukañesheleña, hadaha nikumuchinisha. Ilaña ‘hatiyileña antu womaku.’ (Yish. 29:25) Yehova wamukwashili kwikala wahamuka neyi chakwashañayi ambuñindi ashinshika. Hanyima yakwila Nowa nendi naNzambi kubadika yaaka 500, Yehova wamulejeli kutuña watu wakupulwishilamu antu niatunyama. (Kutach. 5:32; 6:14) Iwu mudimu wadiña weneni chikupu! Nawa Nowa welukili nindi antu akamuseha nikumukañesha. Hela chochu, wovwahilili mwamulejeliwu. “Dimu mweliliyi.”—Kutach. 6:22. w18.02 4 ¶4, 6-7

Njila yalema yitwaletelañamu kunuñañana hikwikala nakukeña kwekalayi naku Yehova, Nzambi wakukeña. (1 Yow. 4:8) Bayi tuhosha nakutena akwetu akwakwitiya netu “namukeña kumesu, ilaña kumuchima namuhelaku.” Neyi twilaña chamuchidiwu dikwila nawu tunakwila chuma chambukaku nakufumba kwaPawulu kwakwila nawu ‘ditiyililenuña wumu namukwawu mukukeña.’ (Efwes. 4:2) Mwatela kwiluka nenu Pawulu hakuminini dakuhosha nindi twatela ‘dakuditiyilila wumu namukwawu hohuku’ ilaña wabombelelihu nindi twatela kwila mwenimu “mukukeña.” Hadi chaambu. Yehova waletaña antu akweti yitachi yashiyashana muchipompelu. (Yow. 6:44) Chineli Yehova diyi wayiletaña, twatela kuyikeña. Muloñadi chitukuyihelela akwetu akwakudifukula? Dichi twatela kuyikeña muloña Yehova watuleja nindi tuyikeñeña!—1 Yow. 4:20, 21. w18.01 16 ¶14

Anvwali amakwawu alejaña anyanawu nawu akapapatishewa kumbidi neyi anatañi dehi shikola hela neyi aneñili dehi nyidimu. Iyi yitoñojoka yayiwahi, ilaña mwalala yikukwasha mwanawu kwikala namuzañalu walala? Komana mwalala iyi yitoñojoka yinesekani nachahosha Nsona? Chalema nankashi kwanukaña netu kanu kaayi niyuma yekalamu yinambuki nachatoñojokañayi nichakeñañayi Yehova. (Yak. 4:7, 8; 1 Yow. 2:15-17; 5:19) Kwikala nawubwambu wawuwahi naYehova dikunateli kumukiña mwanenu kudi Satana, kaayi kindi niyitoñojoka yatama. Dichi neyi nvwali yalejaña mwana kufwila yuma yakumujimba, mwana wukuluwankana nawa wukwiluka wanyi yuma yalala yatela kwilayi. Komana anvwali akwaKristu akweti kukeña, mwalala anateli kwiteja mwanawu kumuluwañesha nayitoñojoka yamukaayi? Kuhosha hohu walala, twekalaña namuzañalu walala neyi tumutwamijaku Yehova muchihandilu chetu.—Mas. 1:2, 3. w18.03 10-11 ¶10-11

Amavulu eluka nawu kushakama chihandilu chapela kwayizañaleshaña nawa kwayikwashaña kwikala nampinji yeneni yakumukalakela Yehova. Jack walandishili itala dindi deneni nikuleka bizinisi yindi muloña welukili nindi neyi yela mwenimu wukukalakala chiwahi wupayiniya hamu nañodindi. Wahosheli nindi: “Hayaaka yayivulu henohu kanda, nafuntileña kwitala iku nahili muloña wakukala kunamweneña kumudimu. Ñodami, yena wadiña payiniya wampinji yejima nawa wadiña namuzañalu mpinji yejima. Wahosheleña nindi, ‘Nikweti mukulumpi wami wamudimu wamuwahi!’ Ichi ninami nazataña wupayiniya, wejima wetu twazatilaña mukulumpi wamudimu wumu, Yehova.” Hakwila twiluki neyi twalemesha mali hela nehi, twatela kwakula awa malwihu chakubula kutwamba: ‘Komana nakuhwelela nikulondela chahoshaña Bayibolu kutalisha hamali? Nalemesha nankashi kuwana mali muchihandilu chami? Nalemesha nankashi yuma yakumujimba kubadika wubwambu wami naYehova niakwetu antu? Namukuhwelela Yehova nami wukunkwasha muyuma yejima yinakaankili?’ Twatela kwiluka netu hanateli kukañanya kukwasha antu amukuhwelelaku. w18.01 25 ¶12-13

Watela kufwila kutambwila wamwinu. Hakachi kayuma yiwatela kwila hikutaña Izu daNzambi nikutoñojokahu chikupu, kumulomba Yehova nikutoñojoka hayuma yayiwahi yakwililayi Yehova halweyi. Kwila iyi yuma kukukukwasha kutwalekahu kwikala nawubwambu wawuwahi naYehova. Chumichi, chikukukwasha kulejaku amakwawu yuma yimwakuhwelela. (Mas. 73:28) Yesu wahosheli nindi: “Neyi muntu nakukeña kunlondela, yadibondi yomweni nakusenda mutondu windi wakuyandishila nawa yatwalekihu kunlondela.” (Mat. 16:24) Mwamweni, mukwaKristu wejima watela kwikala kambanji, watela kudihana nawa watela kupapatishewa. Hela chochu, kwenzununaña chiisu chankisu jajivulu katataka nihaya nyaaka mwituña dadiha daNzambi. Muloña wayumiyi, twalekakuhu kufwila kutambwila wamwinu! w17.12 27 ¶18-19

Neyi anvwali adiwunjika hampinji yinakudizishawu, anyana akutachika kwiluka chovu-chovu “mwatalisha wihi, kuleha, chiminu nikukunama” kwachikuhwelelu. (Efwes. 3:18) Yidizishenu nsañu yinesekani nayaaka niwuswa wukwetiwu. Chakuhwelelawu yuma yinakudizawu, akutachika kulejaku akwawu yuma yadizawu, kubombelahu niakwawu akashikola. (1 Pet. 3:15) Chakutalilahu, komana anyanenu anateli kulumbulula chahosha Bayibolu kutalisha hakufwa? Komana atiyishisha chalumbulula Bayibolu? Mwamweni, kuleja anyana Izu daNzambi kwakeñekaña kudiwunjika, ilaña twatela kuzata nañovu. (Kuhit. 6:6, 7) Hela chochu, enu anvwali yenu mwatela kutachikilahu kumwekesha chikuhwelelu hakwila nawu mukwashi anyanenu. Stephanie, wudi nawanyana awambanda asatu, wahosheli nindi: “Hadiñawu atwansi, nadihwileña nami, ‘Komana nayilejaña anyanami chaletesha nikuhweleli nami Yehova wekalakwoku, wukweti kukeña nawa nshimbi jindi jajiwahi? Hinatela kukuhwelela anyana kuyishinjila henohu amaweni hinadishinjiliku.” w17.12 20 ¶8-10

Muloñadi Mata chakuhweleleliyi nindi manakwindi akamusañula? Wakuhweleleli muloña wayihayamisha yatiyiliyi henohu Yesu kanda yatachiki mudimu windi. Wayitiyili hadiñayi kansi kwitala nimusinagogi. Hadaha wanukili yihayamisha yisatu yasonekawu muNsona yonenawu. Kusañuka kwatachi kwamwekeni hampinji yamuzatishileñawu kaprofwetu Elija kudi Nzambi kwila yihayamisha. Mumbanda nfwila kazweñi wamumwekesheleli chisambu kaprofwetu muZarefwati, musumba wakumenji wawaFwenisa. Nzambi watwalekelihu kumwinka wuña nimanji muchihayamisha, kulonda yena nimwanindi weyala atwalekihu kuhanda. (1 Anya. 17:8-16) Mukuhita kwampinji, mwanindi wakatili nawa wafwili. Elija wenjili nakumukwasha. Iku nakwati chibimbi, Elija walombeli nindi: “Nzambi yami amufuntishili cheñi mwani iwu mwana wumi windi.” Nawa wamufuntishilili! Nzambi watiyili chalombeliyi Elija, nawa mwana wahandili cheñi. Iku dikusañuka kwatachi kwashimunawu muBayibolu. (1 Anya. 17:17-24) Chakadi nikujina, Mata welukili iyi nsañu yayiwahi. w17.12 3 ¶1; 4 ¶3, 5-6

Antu amavulu atukanjikijaña kufwila nyidimu yakumujimba muchihandilu chetu. Nyidimu yaletaña mpuhu, chifulu, nimaheta. Chineli antu amavulu afwilaña nyidimu yakumujimba, mukwaKristu niyena nateli kutachika kutoñojoka munjila yoyimu. Komana mwalala nyidimu yakumujimba yinateli kutuletela muzañalu? Inehi! Anukenu nenu Satana wafwilileña kuyuula amakwawu nikuya mpuhu, ilaña chayinu mpinji wahila nawa wudana muzañalu. (Mat. 4:8, 9; Chim. 12:12) Esekejenu muzañalu wenzaña hamuloña wakukwasha antu amakwawu kumwiluka Nzambi kulonda akatambuli wumi wahaya nyaaka namudimu wakumujimba wakapinji kantesha. Kubombelahu, antu mukanu kaayi adi nachilwilu chakudibecha. Chinakuletesha antu kuditiya, kuditiyila lwisu nawa nkuminaku ‘anakukabila tuhu mpepela.’—Mukwa. 4:4. w17.11 23 ¶11-13

Chatachikiliwu chipompelu chawakwaKristu, tumina twatwalekelihu kwikala chibalu chakudifukula kwalala. Hefuku dalema muchihandilu chawantu, hanyima yakwila Yesu nawapostolu indi anadi dehi Kuda kwaMwanta kwaMelela, embili tumina. Twatela kwimbujola akwaKristu amumafuku awapostolu embileña hamu hakumushimeka Nzambi natumina. Hela chakwila kakavulu adiña nakubulakena mumatala, chumichi hichakañesheleña iyena dawu dakumwimbila Yehovaku. Kapostolu Pawulu amoneneni kusonekela amanakwindi akwaKristu nawu: “Ditañishenuña nikudikolesha wumu namukwawu namasamu, muhamekenuña Nzambi, imbenuña tumina twakuspiritu nakusakilila, mwimbilenuña Yehova munyichima yenu.” (Kol. 3:16) Tumina tudi mumukanda watumina mwalala ‘hitumina twakuspiritu twakwimba nakusakilila.’ Twekala hakachi kayakuda yakuspiritu yatuloñeshelawu kudi “nduñu wamaana nikashinshi.”—Mat. 24:45. w17.11 4 ¶7-8

Nyisumba 6 yakubatamina yadiña yaswayi kuwana. Yehova wayilejeli aIsarela kutonda nyisumba kwishinadi nikwishinadi daKaloña Yodana. Muloñadi? Kulonda itunduka yawani kwakubatamina swayi-swayi chakadi kukala kudi kwejima. (Kuch. 35:12-14) Nyikwakwa yaya kunyisumba yakubatamina yadiña yayiwahi. (Kuhit. 19:3) A Yudeya, ashileña yinjikijilu kunyikwakwa yaya kunyisumba yakubatamina kulonda itunduka yabuli kujimbala. Chineli ashiliku nyisumba yakubatamina yayivulu, muntu wunajahañani chamaposu hateleleli kutemukila kunyisumba yacheñiku, kuchina wakenda katachika kudifukula kudi anzambi akutwamba. Toñojokenu chumichi: Yehova yowumu wenkeliku lushimbi lwakubabesha muntu wunajahi mukwawu mumushikila, diyi cheñi wapulwishileña muntu wunajahi mukwawu chamaposu. Muntu wumu wahosheli nindi: “Yuma yejima yadiña yoloka nawa yapela. Ilu lwadiña luwi lwaNzambi.” Yehova hiñanji wabula lukambu, hababeshaña ambuñindi chatamaku. Ilaña, “wasweja luwi nankashi.”—Efwes. 2:4. w17.11 14 ¶4-5

Wamweni mukanda wavuñañawu neyi chikaña, wunakutuuka. Mukachi kachimpaya mudi mumbanda iyanabutilimu nawa ambanda ayedi akweti mpuula neyi jakakumbikumbi anakutuuka. (Zek. 5:1, 7-9) Muloñadi Yehova chamumwekesheleliyi kaprofwetu kindi iyi yimwenu? Yimwenu yamweniyi Zekariya yamu 6 ni 7 yasoñamishaña antu elaña yuma yatama, yayisoñamishaña nawu Yehova wahela antu elaña yuma yatama. Sweje-e akwakudifukula indi alala, atela kuhela chikupu yuma yatama. Iyi yimwenu mudi cheñi yikaninu yayiwahi yatukanayi Tata yetu wamwiwulu. Neyi tukuzata nañovu kwikala amabwambu jaNzambi nikwikala mukuloñesha kwindi, hitwakamona ishiñu dakufwaku. Ilaña, Yehova wakatukiswila. Neyi tukuzata nañovu kwikala akadi majilu mwakafuma yuma yayiwahi. Twatela kukuhwelela netu Yehova wukutukwasha kushinda kutama. w17.10 21 ¶1; 25 ¶19

Ahela ajiki atela kuzataku wupayiniya, kuya nakuzatila kudi kukankila, kuzataku mudimu wakutuña nikuya kuShikola Yawakwakushimwina aWanta. Amakwawu ayaña nikuShikola yaGileyadi. Kwikala nawakulumpi awambanda muchipompelu kwakuwahi. Twayikeña chikupu awa ahela. Amakwawu hiyanakuzata mumudimu waNzambi neyi chiyazatileñawu kumafuku akunyimaku, ilaña anakudikwatisha chikupu nikukoñamu. Chakutalilahu, muhela wamukulumpi watela kwikala wahamuka neyi anamuleji nawu yahanjeki namuhela wakansi wunakubula kuvwala chiwahi. Hatela kumuhoshola muhela wakansi hayakuvwala yinakuvwalayiku, ilaña watela kumuleja muhela wakansi nvwalililu yindi chiyinateli kuneñesha antu amakwawu. (1 Tim. 2:9, 10) Kumuleja muniyi njila yayiwahi kunateli kumukwasha kuhimpa. w17.09 31-32 ¶17-18

Mpinji yikwawu, akwakuyuula aneseki kukañesha kubalumuna Bayibolu mwidimi dahoshañawu antu amavulu. Hela chochu, antu akeña Bayibolu anashindi idi ikañesha. Chakutalilahu, shinshikenu John Wycliffe muntu wadizili hadi Nzambi wamuyaaka yamuma 1300. Wakuhweleleli chikupu nindi, antu ejima atela kutiyishisha Izu daNzambi. Ilaña haniyi mpinji, antu amuEngland hiyadiña namaBayiboluku. Mu 1382, edishili Bayibolu yaChizungu yabalumwiniyi Wycliffe. Antu jaWycliffe atachikili kuzatisha Bayibolu yindi. Awa antu ayiteneneña nawu maLollard. Ayileña munyikala hamaseki mwahita ituña dejima daEngland nakutañisha antu muloña akeñeleña antu amavulu atiyi Izu daNzambi. Kakavulu maLollard ayitañilileña antu muBayibolu yaWycliffe nawa ayishilileña makopi akusoneka kumakasa. Mudimu wazatiliwu wakwashili antu kutiya Izu daNzambi. Hayaaka yayivulu yalondelelihu, antu amavulu muEurope nimumatuña amakwawu atachikili kubalumuna maBayibolu nikuyipulinta mumadimi atiyileñawu antu amavulu. w17.09 20-21 ¶10-12

Kusumbula hela kuvwala anyana diyi yihuñu hohu wanyi, ilaña neyi muntu nakufwila kuvwala mwana ilaña kuvwala nehi niyena ‘hiyihuñu mumujimba.’ (Yish. 13:12) Kunyima, kubula kusema kwatiyishileña nsonyi. Racheli, ñoda Yakoba watiyili kutama kumona muhelindi nakuvwala nyana. (Kutach. 30:1, 2) Neyi tunakuhosha hayihuñu yakundama kuwulu kudi chuma chimu chabulaña kwinza muyitoñojoka yawantu. Hikufwisha. Mwamweni antu amavulu anamoni kukala kwakufwisha enikwawu. Iku dikukala kwabulaña kukuhwelelayi muntu. AkwaKristu akuhwelela chikupu muchikaninu chaYesu chakusañuka. (Yow. 5:28, 29) Ichi chikaninu chikumukwasha ñahi muntu wunafwishi? Chamukundejaña chikupu. Tata yetu wukweti kukeña wakwashaña nikukundeja antu amonaña yihuñu kuhitila Mwizu dindi. w17.06 4 ¶1; 5 ¶6; 6 ¶9

Mpinji yimu, Nzambi washimwini ijina Dindi niyilwilu yindi hadimwekesheliyi kudi Mosi. Yilwilu yatachi yashimwiniyi yadiña wushona nikutoña. (Kwid. 34:5-7) Yehova wadi kuhosha hañovu yindi hela hamaana indi. Ilaña, Yehova wakonkomweneni hayilwilu yamwekeshaña nawu wafwilaña kukwasha ambuñindi hakumuleja Mosi wakeñeleña wukwashu kudi Nzambi. (Kwid. 33:13) Hela chakwila, antu ayileñeli nawushona, nshidi yitwaswana kudi Adama yatuleñelaña kuditiyisha etu aweni kuwaha. Mpinji yikwawu chatukalilaña kukwasha amakwawu, ilaña twavula kudisha maana etu aweni. Antu amakwawu, chayikalilaña hakwila nawu atachiki kukwasha antu amakwawu. Chumanyi chikuyikwasha kwikala nikutwalekahu kumwekesha wushona? Chatachi, ikalenu nampinji yakushinshika Yehova chinamwekeshiyi wushona nichinamwekeshiwu antu amakwawu wushona. Chamuchiyedi, ilukenu chimunateli kumwimbujola Nzambi kumwekesha wushona nichikunateli kuyikwasha. w17.09 8 ¶1; 9 ¶3

Yilwilu yetu yakuvwala wuntu wawuha yatela kumulemesha Yehova bayi kutuhamekelahu kudi antuku. Anukenu nenu chileñaleña wawanina wakuspiritu wavulumwini muloña wakudivwimba. (Esekejenu Ezekeli 28:17.) Etu antu akwanshidi chinateli kutukalila kutondolwela kudivwimba hela kudinka wanta. Hela chochu, tunatweshi kuvwala kudizoza. Chumanyi chikutukwasha kwila mwenimu? Hakwila nawu tudizozi, twatela kwikalaña nampinji yakutoñojakahu chikupu hansañu yitwadizaña Mwizu daNzambi. (Kuhit. 17:18-20) Sweje-e dinu, twatela kutoñojoka hantañishilu yaYesu nichakutalilahu chindi chachiwahi chakuzata nyidimu yakehelamu. (Mat. 20:28) Yesu wawelesheli atumbanji twindi kunyendu. (Yow. 13:12-17) Twatela cheñi kulomba spiritu yaNzambi yitukwashi kulonda tuleki yilwilu yakuditohesha nakudimona neyi twabadika akwetu.—Ñal. 6:3, 4. w17.08 9 ¶4, 6; 10 ¶10

Kufwana Pawulu, hadaha ninetu twatiyahu dehi netu tunakulondela chinakutulombolawu kudi spiritu yajila yaNzambi, ilaña yuma kuzatika kwesekeja nachitwakuhweleleli nehi. Twadiña mukukala hela yuma yahimpikili chakwila chakeñekeleña kuhimpa chihandilu chetu. (Mukwa. 9:11) Chumanyi chinateli kutukwasha kubula kusweja kwaakama nikwikala ‘nakuwunda kwaNzambi’? Mumazu ayisonekeleliyi Pawulu akwaFwilipi anakumwekesha nawu kulomba dikunateli kuyikwasha kubula kwaakama. Dichi neyi tunakwaakama, twatela kulomba. (1 Pet. 5:6, 7) Mulombenu Yehova nachikuhwelelu nawa ilukenu nenu wayakamenaña. Lombenu kudi yena “nakusakilila” hayuma yayiwahi yinakuyililayi. Tukusweja kumukuhwelela neyi twiluka netu “nateli kukoña yuma yabadika chikupu yuma yitwamulombaña hela yitwatoñojokaña.”—Efwes. 3:20. w17.08 9-10 ¶4, 6, 10

AkwaKristu amavulu adiña namuzañalu hampinji yazatileñawu wupayiniya henohu achidi atwansi. Neyi mudi atwansi kwila muhanjeka nawu yuma yimunakufwila kwila nehi? Awa antu apama kuspiritu anateli kuyileja nawu mumudimu wampinji yejima munateli kudiza yuma yimukazatishaña muchihandilu chenu chejima. Hanyima yakumudizisha kudi Tata yindi mwiwulu, Yesu watwalekelihu kudiza nihampinji yazatileñayi mudimu wakushimwina hamaseki. Chakutalilahu, wamweni muzañalu wafumaña mukushika antu hanyichima nansañu yayiwahi nimuzañalu wenzaña muloña wakutwalekahu kwikala washinshika neyi wudi mukweseka. (Isa. 50:4; Heb. 5:8; 12:2) Yesu wahosheli nindi: “Yenu mwakelishi antu . . . ekali atumbanji . . . muyidizisheña.” (Mat. 28:19, 20) Neyi munakufwila kwikala mukwakwilisha atumbanji, mukutonda mudimu wawuwahi, wakumulemesha Nzambi. Neyi chochekala nyidimu yejima, hatela kushimbula hakwila nawu mukulukili. w17.07 23 ¶6-7

Chakadi nikujina, muntu watukundejaña hiTata yetu, Yehova. (2 Kor. 1:3, 4) Antu ananeñi atambwilaña kukundejewa kuchipompelu chawakwaKristu. (1 Tesa. 5:11) Munateli kukolesha nikukundeja ñahi antu akweti “muchima wabaluka”? (Yish. 17:22) Ilukenu nenu kwekala “mpinji yakumwena, nimpinji yakuhosha.” (Mukwa. 3:7) Dalene wafwishili wahosheli nindi: “Antu anafwishi akeñaña kushimuna chinakutoñojokawu nichinakutiyawu. Dichi, chuma chimwatela kwila kudi muntu wunafwishi hikumutiyilila chakadi kumuketula neyi nakuhosha.” Junia, wadiña namanakwindi wadijahili niyena wahosheli nindi: “Hela chakwila hiwukutwesha kwiluka chinaneñiwuku, chuma chalema hikwiluka chinakutiyawu.” Ilukenu cheñi nenu, yuma yayineñeshaña antu yekala yambuka nawa hiyaneñaña munjila yoyimuku. w17.07 13 ¶3; 14 ¶11-13

Antu amavulu makonu asha maana hamali. Afwilaña kwikala namaheta amavulu hela kutwalekahu kwikala namaheta akwetiwu. Amakwawu asha maana hachisaka chawu, kukola kwakumujimba nihayuma yafwilaña kwilawu. Hela chochu, chuma chalema chitwatela kusha maana hikuhakwilaku chiyuulu chaYehova. Twatela kutondolwela yuma yikutuleñela kuleka kusha maana kukuhakwilaku ichi chiyuulu. Chumichi chinateli kumwekana ñahi? Tunateli kusha maana kuyuma yitwakamenaña hefuku-hefuku chakwila tukukañanya kwiluka kulema kwakuhakwilaku chiyuulu chaNzambi. Hela tunateli kwiteja makabi kutukañesha kumona kulema kwakuhakwilaku chiyuulu. Munjila yikwawu, neyi tukumona kulema kwakuhakwilaku chiyuulu chaYehova, chikutukwasha kushinda kukala kutwamonaña. Nawa chumichi chikutukwasha kuswina kwakwihi naYehova. w17.06 22 ¶1-2

Yehova wazatishaña wuswa windi wakuyuula munjila yayiwahi. Munjila yoyimu, nyitu yayisaka niaeluda akeña chiyuulu chindi akwikalaña akalisha wanyi neyi kwiji akweti wuswa wanti wakuyuula. Ilaña, akumwimbujolaña Yehova. Pawulu wamwimbujoleli chikupu Nzambi niMwanindi. Pawulu hasawileña antu amakawu hela kuyikanjikija kwila yumaku. Ilaña, wadiña nakuyilembelela. (Rom. 12:1; Efwes. 4:1; Fwil. 8-10) Dichelañayi Yehova. Dichatela kwilawu niantu ejima akeña chiyuulu chindi nawa achihakwilañaku. Chumanyi chitwatela kwila kudi antu enkawu mudimu wakulombola? Neyi tuzatilaña nawu hamu munjila yayiwahi, tukumwekesha netu twahakwilañaku chiyuulu chaYehova. Hela chakwila tuneluki wanyi hela kwiteja munafuukuliwu, twatela kulondela nshimbi yamukuloñesha. Antu amukaayi dichelañawu wanyi, ilaña antu ayuulañawu kudi Yehova dichelañawu.—Efwes. 5:22, 23; 6:1-3; Heb. 13:17. w17.06 30 ¶14-15

Amanakwetu niahela ejima chili atwansi hela akulumpi anateli kuneña hela kumona kukala kudi kwejima, dichi wejima wawu akeñekaña kuyikundeja nikuyikolesha. (Yish. 12:25; Kol. 4:11) Twamwekeshaña chikupu netu twakeña amanakwetu munhoshelu nimuyilwilu kuhitila mukwakamena “akwetu akwakwitiya.” (Ñal. 6:10) Bayibolu yashimwineñahu dehi nawu “mafuku akukuminina” akanu kaayi katama antu akadikeñaña aweni nawa akekala nalwisu. (2 Tim. 3:1, 2) Etu akwaKristu, twatela kuzata nañovu kulonda tutwalekihu kumukeña Nzambi, kukeña chalala chamuBayibolu niakwetu antu. Mpinji yikwawu tunateli kubula kutiyañana nawakwetu akwakwitiya. Hela chochu, neyi tumanisha kukala munjila yakukeña nawa mukuwunda, chipompelu chikwikala mukuwunda! (Efwes. 4:32; Kol. 3:14) Dichi, tutwalekenuhu kumukeña Yehova, Izu dindi niamanakwetu. w17.05 21 ¶17-18

AkwaKristu eluka nawu anateli kumona kukala kudantu abula kwikala muchipompelu chawakwaKristu. Hela chochu, kashinshi ketu anateli kukesaka neyi tumona netu anakutwila chatama mukachi kachipompelu. Munateli kwila ñahi neyi mumona nenu anayili chatama muchipompelu hela kudi mukwenu mukwaKristu? Komana munateli kwiteja ayituntwishi? Chineli wejima wetu twawanina wanyi nawa twavulumunaña, tweluka chikupu netu anateli kutwila chatama hela tunateli kwila akwetu chatama muchipompelu. Hela chakwila yuma yamuchidiwu yavula kumwekana wanyi, akwaKristu ashinshika atela kuhayama wanyi hela kutuntuka neyi amona yuma yamuchidiwu. Yehova watuleja Mwizu dindi yuma yakwila yatukwashaña kutwalekahu kwikala ashinshika hela anatwili chatama kudi akwetu akwakwitiya.—Mas. 55:12-14. w17.04 19 ¶4-5

Neyi mwinikwenu hiChinsahu wanyi, mukumonaña kukala nawa mukwakamaña nankashi muwulu wenu. Hela chochu, mwatela kumona yuma neyi chayimonañayi Yehova. Himwatela kwaambuka hela kudiseña muloña mwinikwenu nakaani kumulondela Kristuku. (1 Kor. 7:12-16) Hela chakwila iyala wabula kwikala Chinsahu watela wanyi kulombola yuma yakuspiritu, ilaña watela kulemeshewa muloña diyi mutu wachisaka. Munjila yoyimu, iyala mukwaKristu wasumbula mumbanda wabula kwitiya watela kumumwekeshela ñodindi kukeña nawa watela kumwakamena. (Efwes. 5:22, 23, 28, 29) Mukwila ñahi neyi mwinikwenu nakuyikañesha kudifukula? Chakutalilahu, muhela wumu amwinkeli mafuku amu mumulungu akuya mumudimu wamwinha kudi nfumwindi. Neyi munakumona kukala kwamuchidiwu, dihulenu nenu: ‘Mwalala nakunkaanisha kudifukula kudi Nzambi yami? Neyi nakunkaanisha wanyi, kwila nila chananlejiyi nehi?’ Kwovwaha kukuyikwasha kutondolwelela yikonkojola yabula kutelela.—Fwi. 4:5. w17.10 13 ¶7-8

Antu “akunyuza yamadimi ejima” anakwinza mukuloñesha kwaYehova neyi chashimwineñahu dehi. (Zek. 8:23) Ilaña kubula kwiluka muchidi kunateli kuyikojeja mukañanyi kudizisha anyanenu chalala. Anyana diwu atudizi aBayibolu amawahi imwatela kudizisha kulonda ‘amwiluki’ Yehova hakwila nawu akahandi haya nyaaka. (Yow. 17:3) Hakwila nawu anyanenu amwiluki Yehova, mwatela ‘kuhanjeka nawu’ mpinji yejima yayiwahi. (Kuhit. 6:6, 7) Anyanenu anateli kudiza muchidi wahoshañawu munodu iluña kushikola hela muchituñilu, ilaña hakwila nawu eluki chikupu muchidi wenu mwatela kuhanjeka nawu. Kubombela hakuhanjeka nawu munjila yayiwahi, mwatela kuyidizisha idimi denu. Kuhosha madimi ayedi kwakwashaña anyanenu kutoñojoka nakashinshi nikwiluka chakwila yuma. w17.05 9 ¶5-6

A Isarela adiña nañovu wanyi, nawa adiña adana yitwa hela yakuvwala yakudikiña nachu, ilaña ayilumbu jawu adiña namakalu ayikuñu anjita 900. (Ansomp. 4:1-3, 13; 5:6-8) Hela chochu, Yehova wamulejeli Baraka iyi nshimbi yidi hewulu. Baraka welili mwamulejeliwu kudi Yehova chakadi kumba mpinji. (Ansomp. 4:14-16) Hampinji yazuñileñawu muTanaki, kwanokeli nvula yeneni chakwila yelishili malowa. Baraka wayihañili mashidika aSisera hadi makilomita 24 kushika kuHarosheti. Chashikiliwu hakachi, Sisera wayitemukili mashidika indi akuhwelelayi nakuya kuZayananimi, hadaha kwakwihi naKadeshi. Wayili nakuswama mwitenti daYahela, ñoda Heberi kaKeni nawa amutambwilili kudi Yahela. Wakaamini muloña wazeyeli kunjita. Sisera wazeyeli chikupu chakwila Yahela wahamukili nakumujaha. (Ansomp. 4:17-21) Chilumbu chawaIsarela amujahili! w17.04 29-30 ¶6-8

Neyi Amagedoni yinamani, kwakekalahu chipompelu chidi chejima hamaseki? Bayibolu yashimunaña nawu: “Kudi mawulu amaha niiseki dadiha jitwatalilaña kwesekeja nachikaninu chindi, nawa mwenimu dimu mwakekalaña kuloña.” (2 Pet. 3:13) Mawulu niiseki dadikulu, dikwila nawu nfulumendi yatama ninyitayi yahamaseki yalombolañawu kudi nfulumendi, yakahita. Yumanyi yakasinsahu? Mazu akwila nawu “mawulu amaha nimaseki amaha” aya mukwila nawu kwakekala nfulumendi yayiha niantu amaha hamaseki akayuulañawu kudi iyi nfulumendi. Wanta wakayuulañawu kudi Yesu Kristu wakamwekesha yilwilu yaYehova Nzambi, Nzambi wabulaña kuluwañesha. (1 Kor. 14:33) Dichi “iseki dadiha” akadiwahisha munjila yayiwahi. Muloña mwekala amayala amawahi akalombolaña. (Mas. 45:16) Akayilejaña yuma yakwila kudi Kristu nia 144,000. Twakadiluñisha chikupu kushakama mwituña dakabula yipompelu yatama yawakwamatuña yakasinsawu kudi chiyuulu chimu, chanuñañana nawa chachiwahi. w17.04 11 ¶8-9

Wulu wajila. Kalemba nakankaña adikanaña kumesu aNzambi nihamesu awayinsahu. Adikanaña chikupu nawu akadikeña, akadakamenaña nikudilemesha wumu namukwawu nawa akela mwenimu “mukuhanda [kwawu] kwejima hanu hamaseki kwesekeja nantanjikilu yaNzambi yawulu.” Amakwawu hiyahoshaña awa mazuku, ilaña chochimu adikanaña kumesu aNzambi. Ayibidikaña nawu ichi dinu anadisumbuli nawa wulu wawu wahaya nyaaka. (1 Kor. 7:39) “Dichi,” Yesu wahosheli nindi, “anabombuwu kudi Nzambi, bayi ayambula kudi muntuku,” chili iyala hela mumbanda hela muntu wudi wejima. Dikwila nawu, anakudisumbula atela kwiluka nawu atela kudiseña wanyi. (Maku 10:9) Hela chochu, kwekala wanyi wulu wawanina. Muwulu wejima mwekala antu ayedi abula kuwanina. Dichaletesha Bayibolu kuhosha nawu mpinji yikwawu antu adisumbula “akumonaña yihuñu.”—1 Kor. 7:28. w17.04 7 ¶14-15