August

Hakwila twikali antañishi amawahi, twatela kwikala atudizi amawahi. (1 Tim. 4:15, 16) Munjila yoyimu, antu enkayi Nzambi mudimu wakufumba diwu atela kusambila kwovwahila chikupu nshimbi jaYehova. Neyi ovwahila muniyi njila, akuyilemeshaña nikuyitiyilila kudi antu anakudizishawu hela anakwololawu. Shinshikenu chakutalilahu chaYesu. Yesu wovwahilileña Tata yindi mpinji yejima, hela chakwila yuma yinakali. Wakeñeleña kalemesha nimpuhu kuya kudi Tata yindi hayuma yatañishileñayi nihamaana indi. (Yow. 5:19, 30) Muloña wakwila Yesu wadiña wadizoza nawa wovwahila, wakokweli antu akweti nyichima yayovu. Antu chayiliwu kudi yena, chamukwashili kuyitiyila wushona nikuyitañisha chiwahi. (Mat. 11:29) Mazwindi awushona akwashili antu adiña nanyichima neyi iteti dachikeka hela wanda wamwinoñu wunakukeña kujima. (Mat. 12:20) Hela chakwila amwesekeleña, Yesu wamwekesheleña luwi nikukeña. Chumichi chamwekeni mpinji yayikwashiliyi atumbanji twindi chamwekesheliwu muchima wakudinyamuna.—Maku 9:33-37; Luka 22:24-27. w18.03 26 ¶15-16

Kapostolu Petulu wahosheli hadi Nowa chatuñileñayi watu. Watu watuñiliyi Nowa wamwekesheli hatooka nawu wadihanini kwila nkeñelu yaNzambi. Nowa welili mwejima mwamulejeliwu kudi Yehova. Mwamweni, kumwekesha chikuhwelelu munyidimu dikwaletesheli Nowa nichisaka chindi kupuluka haDibaji. Watu watuñiliyi Nowa wamwekesheli nawu wadiña nachikuhwelelu. Chamwekeshaña nawu mukwaKristu nadihani yomweni kudi Yehova kuhitila mukukuhwelela mukusañuka kwaKristu. Kufwana Nowa, atumbanji adihana ovwahilaña kuzata nyidimu yayinkawu kudi Nzambi. Neyi chamupulwishiliwu Nowa haDibaji, antu apapatishewa nawa ashinshika akayipulwisha neyi kaayi hikakukuma. (Maku 13:10; Chim. 7:9, 10) Chumichi dichaletesha kudihana nichipapatishu kwikali kwalema. Muntu walabaña kupapatishewa washaña wumi windi wakushakama haya nyaaka hakatoña. w18.03 4 ¶3-4

Anvwali amakwawu anateli kuhosha nawu, ‘Neyi mwanami wapapatishewa wanyi, hiyakumuhaña muchipompeluku.’ Yitoñojoka yamuchidiwu yaluwa. (Yak. 1:22) Kuhosha hohu walala, kwosi nvwali mukwaKristu wakeñaña nindi mwanindi yapapatishewi henohu kanda yashikihu kudihanaku. Hela chochu, hichinayi mukwila nawu mwana neyi yabula kupapatishewa hiyakamusompesha kudi Yehovaku. Tunahoshelidi mwenimu? Bayi neyi Yehova wakasompesha antu muloña wakupapatishewaku. Ilaña, mwana akamusompesha kudi Nzambi neyi nashiki hachipimu chakwiluka yayiwahi niyatama kwesekeja nachamonañayi Yehova. (Yak. 4:17) Dichi, enu anvwali, chatela mukañesheña mwana kupapatishewa, zatenu nañovu kulonda mwanenu yayimbujoleña. Mwatela kumudizisha mwanenu kwikala namuchima wakwovwahila nshimbi jaYehova jaloña kufuma kuwukeki. (Luka 6:40) Neyi yatachika kwovwahila, chikamukwasha kumbidi, muloña mwanenu wukwinjilila kwila yuma yakeñañayi Yehova.—Isa. 35:8. w18.03 11 ¶12-13

Nowa watwalekelihu kwikala washinshika hadi yaaka 350 hanyima yaDibaji. (Kutach. 9:28) Wamwekesheli chikupu chikuhwelelu nikwovwahila. Twatela kwimbujola chikuhwelelu nikwovwahila kwaNowa kuhitila mukuhakwilaku kuloña kwaNzambi, kubula kwila yuma yamwituña daSatana nikutwamijaku Wanta waNzambi. (Mat. 6:33; Yow. 15:19) Kuhosha hohu chalala, kaayi katuhela muloña wayilwilu yetu yayiwahi. Nimakonu, kumaluña amakwawu atuhoshaña chatama muloña wakulondela nshimbi jaNzambi jahosha hakusumbula nihawuvumbi. (Mal. 3:17, 18) Kufwana Nowa, ninetu twamutiyaña Yehova woma bayi antuku. Tweluka netu yena hohu diyi wakatwinka wumi wahaya nyaaka. (Luka 12:4, 5) Indi enu halwenu mukwiladi? Komana mukutwalekahu ‘kwenda naNzambi,’ hela chakwila antu amakwawu anakuyisupisha hela munakumona kukala kwamali muchihandilu? Neyi mwimbujola chikuhwelelu chaNowa, ilukenu nenu Yehova wukuyakamenaña.—Fwi. 4:6, 7. w18.02 4 ¶4, 8; 5 ¶9-10

Mukaayi mudi yilwilu yatama yakukeña yuma yakumujimba. Pawulu wahosheli haniyi yilwilu nindi hispiritu “yinakuzatika mudi antu adikañaña.” (Efwes. 2:2) Iyi spiritu yinakuletesha antu kwikala nayilwilu yidi nawantu amavulu kuhitila mukwimbujola antu. Chinakufumamu, antu amavulu anakwila yuma yinakeñiwu nawa chinakuyiletesha kubula kulondela nshimbi jaNzambi. Muntu wakumujimba, himuntu watoñojokaña hohu hakwikala namaheta hela wamonaña hohu neyi yitoñojoka yindi diyaloña. Antu elaña “nyidimu yamujimba” hiyantu akumujimba. (Ñal. 5:19-21) Yilwilu yakumujimba mwabombela kuleta chaambu, kuhakwilaku, kuleta ntaadi, kuditwala kuyoota, kubula kulemesha wumutu nikusha maana hayakuda nikunwa. Muntu wukweti yitoñojoka yakumujimba, neyi naholokeli mukweseka wazeyeshaña yitoñojoka nakukoña nshidi.—Yish. 7:21, 22. w18.02 19 ¶3-5

Chatama wanyi kuditiyisha kuwaha munjila yayiwahi, neyi chichabula kutama kudikeña etu aweni nikukeña mali munjila yayiwahi. Yehova watukaanishaña wanyi kwila yuma yitwakeña yinateli kutuzañalesha. Bayibolu yakoleshaña antu ashinshika nawu: “Yaña kweyi, dyaña yakudya yeyi nakuluña, nwaña vinyu yeyi nakutiya kuwaha mumuchima weyi.” (Mukwa. 9:7) 2 Timotewu 3:4 yatenaña antu afwilaña yuma yakudizañalesha aweni. Neyi mushinshika, iyi vasi yahosha wanyi nawu antu akakeña jakudizañalesha aweni kubadika Nzambi, neyi kwiji amukeñahu chanti. Ilaña yahosha nawu “chatela akeñi Nzambi.” Muntu wadiza Bayibolu chikupu wasonekeli nindi: “Iyi [vasi] yatalisha wanyi mukwila nawu amukeñahu Nzambi chanti. Yatalisha mukwila nawu amukeña wanyi Nzambi.” Hikufumba kwakuwahi chikupu kudi antu akeña yuma yakuditiyisha kuwaha! Nhoshelu yakwila nawu “antu akeñaña jakuditiyisha aweni kuwaha” yalumbulula antu ‘akamaña yuma yawumi wunu yakuzañalesha.’—Luka 8:14. w18.01 25 ¶14-15

Yehova hiNzambi wukweti chisambu. Yuma yejima yitukweti yafuma kudi yena. Yehova waheta wuru nisiliva kushilahu niyuma yejima yidi hamaseki, nawa wayizatishaña kukwasha mawumi ejima. (Mas. 104:13-15; Hag. 2:8) Hadi yaaka 40, Yehova wayinkeleña aIsarela manina nimenji hampinji yadiñawu muchinkalampata. (Kwid. 16:35; Nehe. 9:20, 21) Yehova welili chihayamisha kuhitila mudi kaprofwetu Elisha chakuvulisha manji antuluwa washinshika. Chawaana chaNzambi chamukwashili kufweta nyikudi nawa chumichi chamukwashili kwikala namali akudikwashamu yena nimwanindi. (2 Anya. 4:1-7) Nawukwashu waYehova, Yesu welishileña yakuda nimali muchihayamisha. (Mat. 15:35-38; 17:27) Yehova wukweti maheta amavulu anateli kukwasha yileñaleña yindi yejima yahamaseki. Hela chochu, walejaña ambuñindi kuzatisha maheta awu kulonda akwashi mudimu wamukuloñesha kwindi.—Kwid. 36:3-7. w18.01 17 ¶1-3

Bayibolu yashimuna nawu ambuña ashinshika akunyima kakavulu amweneña nawu ñovu jinayimani. (Yoba 7:7) Hela chochu, chatela aleki, atwalekelihu kulomba ñovu kudi Yehova. Nzambi wayikwashili, muloña yena “wamwinkaña muntu wazeya wuswa.” (Isa. 40:29) Chawushona, antu amakwawu anu mafuku elaña neyi amona kukala ‘akunooka chanti kunyidimu yakuspiritu,’ amonaña neyi kwiji nyidimu yanetu akwaKristu hichiteli. Dichi alekaña kutaña Izu daNzambi, kupompa nikuya nakushimwina, neyi chakeñañayi Satana nindi eleña. Diyabolu weluka chikupu nindi neyi tuzataña chikupu nyidimu yakuspiritu tukwikala nañovu, nawa wakeñaña wanyi nindi twikali nañovu. Neyi muzeya kumujimba nimuyitoñojoka, kufuma kudi Yehova nehi. Swinenu kwakwihi nayena, muloña yena “wakayikolesha, wakayinka ñovu.”—1 Pet. 5:10; Yak. 4:8. w18.01 7-8 ¶2-3

Kusañuka kwamuchiyedi kwashimunawu muNsona akwilili kudi nswana yaElija, kaprofwetu Elisha. Mumbanda waya mpuhu wakuShunemi wamumwekesheleli Elisha chisambu chasweja. Kuhitila mudi iwu kaprofwetu, Nzambi wamukiswilili iwu mumbanda nshinta ninfumwindi wadiña wakula dehi kwikala namwana weyala. Chimwahitili yaaka, ona mwana wafwili. Iwu mumbanda watela waneñeli chikupu. Hanyima yakutambula lusesa kudi nfumwindi, wendeli makilomita 30 nakuya kudi Elisha kuMpidi yaKarameli. Iwu kaprofwetu wamutemesheleñahu dehi Gehazi kalama kindi kuShunemi. Gehazi hatwesheli kumusañula mwanaku. Iwu mumbanda wafwishili washikilili hamu naElisha. (2 Anya. 4:8-31) Chashikiliwu muShunemi mwitala mwadiña chibimbi, Elisha walombeli. Muchihayamisha, iwu mwana wafwili wasañukili nawa wamwinkeliyi mama yindi. (2 Anya. 4:32-37) Chakadi nikujina, Nzambi diyi wamusañwili ona mwana kuShunemi, nakumwekesha nindi Wukweti ñovu jakusañula. w17.12 4 ¶7-8

Kuhosha hohu chalala, maana—diwu amwekeshaña muntu nawu nakuli bayi wusupiku. Bayi neyi yaaka diyaleteshaña muntu kwikala wapama kuspirituku, ilaña kumwakama Yehova nikwovwahila nshimbi jindi dikwamwekeshaña muntu kupama. (Mas. 111:10) Atwansi apama chachiwahi kuspiritu, hiyayilelujolaña “kudi mpepela nimankanda” kuhitila mukufwila kwawu hela ikakeja dawakwawu atwansiku. (Efwes. 4:14) Ilaña, atwalekañahu kwikala ‘nañovu jawu jakutoñojoka chiwahi jakwaambula yuma yayiwahi nayatama.’ (Heb. 5:14) Amwekeshaña nawu anakupama chikupu kuhitila mukufuukula chachiwahi. (Fwi. 2:12) Maana amuchidiwu akayikwasha kupuluka. (Yish. 24:14) Munateli kukwasha ñahi anyanenu kwikala namaana amuchidiwu? Chatachi, yilejenu anyanenu chalumbuluka kulema kwayuma yekala muBayibolu. Nhoshelu yenu niyuma yimwelaña, yatela kumwekesha nawu ninenu mwalemesha yuma yalema yaMwizu daNzambi.—Rom. 2:21-23. w17.12 20-21 ¶12-13

Antu amavulu mukaayi adi nayitoñojoka yakwila nawu anateli kumanisha kukala kwawu. Muloñadi? Neyi dimu, dikwila nawu antu hiyatela kuyilombola kudi Nzambiku nawa atela kwila yuma yejima yinakeñiwu. Cheñi, yitoñojoka yakwila nawu antu anateli kumanisha kukala yinateli kumwekana neyi yalala, muloña yileji yikwawu yinakumwekesha nawu njita, wubanji, yikatu niwuzweñi jinakukehelaku. Chileji chimu chahosheli nawu: “Chuma chinakuletesha yuma kuwahilaku muloña antu anafuukulihu kuwahisha kaayi.” Neyi mutiya antu anakuhosha nsañu yinateli kuzeyesha chikuhwelelu chenu, sandujolenu chahosha Izu daNzambi hanoyu nsañu nawa lejenumu mukwenu mukwakwitiya wapama. Shinshikenu iyi nsañu chiyinateli kuyikokola, iyi yitoñojoka chiyatamina nichimunateli kuyikaana. Mwamweni, wejima wetu twatela kudikiña kuyitoñojoka yamukaayi neyi tulondela kufumba kwaPawulu kudi munsona yefuku dalelu. w17.11 24 ¶14, 17

Muloñadi aFwarisi chiyabulileña kutiyila akwawu luwi? Bayibolu yahosha nawu “amweneña akwawu nawu amukunkulwayi.” (Luka 18:9-14) Imbujolenuña Yehova bayi kaFwarisiku. Mwekeshenuña wushona. (Kol. 3:13) Njila yimu yakumwekeshelamu wushona, hikwikala akasunuka kulonda akwenu alombeña kwanakena. (Luka 17:3, 4) Dihulenu enu aweni nenu: ‘Komana nanakenaña antu anvulumuna kapampa kakavulu? Komana nafwilaña kuleta kuwunda namuntu wunanvulumuni?’ Neyi muntu wadizoza nateli kwanakena. A Fwarisi abulileña kwanakena akwawu muloña ayimweneña nawu hiyashikilamuku. Etu akwaKristu, twatela kudizoza ‘nakumona akwetu netu atubadika,’ kulonda tuyanakeneña. (Fwi. 2:3) Komana mukumwimbujola Yehova nakwikala adizoza? Enzununenu “mukwakwa” wenu wakwanakena nawa wuwahishenuña. Nyakalenuña kutiyila akwenu luwi bayi munyakala kuzuwaku.—Mukwa. 7:8, 9. w17.11 14-15 ¶6-8

Munateli kutiya kutama, hela kutiya nsonyi neyi mwesekeja izu denu nachinakwimbawu. Chumichi bayi chiyikañesha kwimba nakumushimeka Yehovaku. Ilaña, neyi munakwimba, nyamunenu mukanda wenu hewulu, bandulenu mutu wenu nawa imbenu namuchima wejima. (Ezera 3:11) Chayinu mpinji, muMatala aWanta amavulu, mazu adi mukamina, anakuyimwekesha hanyivwimbimbi, nawa chumichi chinakutukwasha kwimba chikupu. Nawa ntanjikilu yakwimba tumina twaWanta anayinki muchibalu chamuShikola yaMudimu waWanta yawaeluda. Chumichi chinakumwekesha nawu aeluda atela kulombolaña mudimu wakwimba muchipompelu. Chuma chimu chakañeshaña antu amakwawu kwimba nezu datiyakana hiwoma. Hadaha achinaña nawu izu dawu dinateli kuya hewulu hela nawu datama. Ilaña twatela kwanuka netu neyi tunakuhosha “wejima wetu twahukanaña kakavulu.” (Yak. 3:2) Hela chochu, chumichi chatulekeshaña wanyi kuhosha. Hanu dimu, muloñadi chitukwitejela kubula kuwanina kwetu kutukañeshi kumushimeka Yehova? w17.11 4-5 ¶9-10

Chimwenu chaZekariya chamu 7 chichamanini, iwu kaprofwetu watachikili kutoñojoka chikupu yuma yamweniyi. Amulejeli kudi Yehova nawu Wukababesha antu abula kushinshika muloña wayilwilu yawu yatama. Ichi chikaninu chamukolesheli chikupu Zekariya. Hela chochu, kwosi chuma chamwekeni. Antu atwalekelihu kubula kwikala ashinshika nawa elileña yuma yatama nawa tembeli yaYehova yatuñulwileñawu muYerusalema yadiña kanda yimani. Muloñadi aYudeya chalekeleliwu swayi-swayi mudimu wayinkeliwu kudi Nzambi? Komana afuntili kulonda ashi maana kuyuma yawu aweni? Yehova welukili chuma chakeñekeleña kudi antu Jindi. Yehova wamumwekesheleli Zekariya chimwenu chakukumishaku chayilejeliyi nindi wayikeña aYudeya nikuyisakilila hanyidimu yazatiliwu nikuyikana nindi wukuyikiña neyi afunta nakuzata mudimu Windi. Yehova wayikanini kutalisha kumudimu wakutuña namazu adi munsona yefuku dalelu. w17.10 26 ¶1; 27 ¶5

Chipompelu chahetelañamu chikupu neyi amayala ekala namuchima wakufwila kukalakala nyidimu yayivulu. (1 Tim. 3:1) Hela chochu, antu amakwawu akeñaña wanyi kukalakala nyidimu muchipompelu. Hadaha manakwetu wakoñelihu chiluwa kunyima, dichi nakutoñojoka nindi washikilamu wanyi kukalakala neyi eluda hela nkoñi wakuzatila. Manakwetu wumu nateli kutoñojoka nindi wukukañanya kuzata mudimu. Neyi dichimwatoñojokaña, Yehova nateli kuyikwasha kwikala ahamuka. (Fwi. 4:13) Anukenu nenu, mpinji yimu Mosi niyena watoñojokeleña nindi wukutwesha wanyi kuzata mudimu wamwinkeliwu. (Kwid. 3:11) Ilaña, Yehova wamukwashili nawa chimwahitili mpinji, Mosi wekalili wahamuka nawa wazatili mudimu wamwinkeliwu. Manakwetu wapapatishewa niyena nateli kwikala wahamuka neyi yalombaña wukwashu kudi Nzambi chakadi kuleka nikutaña Bayibolu mpinji yejima. Kutoñojokahu chikupu cheñi hadi antu amwekesheli kuhamuka kunateli kumukwasha. Nateli kulomba wukwashu mukudizoza kudi aeluda kulonda amudizishi nawa watela kwikala wakasunuka kuzataku nyidimu yidi yejima muchipompelu. w17.09 32 ¶19

AkaKristu makonu atela kwiluka nawu mudimu wakubalumuna Bayibolu yaSeptuagint, Bayibolu yaWycliffe, King James Version hela maBayibolu abalumunawu awonena wanyi. Hela chochu, neyi tutoñojoka chabalumwineñawu awa maBayibolu nimaBayibolu amakwawu, chikutukwasha kwiluka netu Izu dindi saña dakolela neyi chochahosheliyi Yehova. Komana chumichi hichayikwashaña kukuhwelela chikupu muyikaninu yaYehova nenu yikashikijewaku? (Yosh. 23:14) Kubombela hakukolesha chikuhwelelu chetu, kwiluka Bayibolu chiyinatwalekihu kukutukwasha kumukeña Yehova nankashi. Muloñadi chatwinkeleliyi Izu dindi? Nawa muloñadi chahosheleliyi nindi yikatwaleka kwikalaku? Muloña watukeña nawa nakukeña kutudizisha njila yinateli kutukwasha. (Isa. 48:17, 18) Dichi, twatela kumukeña Yehova chakufuma hamuchima nikovwahila nshimbi jindi neyi chochatukeñayi.—1 Yow. 4:19; 5:3. w17.09 21-22 ¶13-14

Chakala kudizisha anyana neyi mwinikwenu hetiyaku. Indi neyi mwinikwenu walondelaña wanyi chikupu nshimbi jamuBayibolu? Tachikilenuhu kumulemesha mwinikwenu. Monenuña yilwilu yindi yayiwahi nawa muhamekenuña mwinikwenu. Bayi muhosha yuma yatama hadi mwinikwenu hamesu awanyanaku. Ilaña, yilumbulwilenu nenu muntu wejima watela kutonda kumukalakela Yehova hela nehi. Yilwilu yayiwahi yawanyana yinateli kuletesha nvwali wabula kwitiya kwiteja chalala. Amayala amakwawu anateli kukaanisha añodijawu akwaKristu kudizisha anyana Bayibolu. Hela chochu, mumbanda mukwaKristu watela kuzata nañovu kulonda yadizishi anyana Bayibolu. (Yil. 16:1; 2 Tim. 3:14, 15) Hela chakwila wukulondela munafuukuli iyala, mumbanda watela kumwekesha chikuhwelelu chindi hamesu awanyana neyi iyala hosi, watela kuyileja yilwilu yayiwahi nikuyidizisha hadi Yehova.—Yil. 4:19, 20. w17.10 14 ¶9-10

Antu ayileñeli neyi chekalayi Nzambi. Chineli Yehova wekala nawushona, antu ejima ayileña nachilwilu chakwakamena antu amakwawu. Niantu abula kumwiluka Nzambi walala ekala nawushona. (Kutach. 1:27) MuBayibolu ashimunamu antu amavulu amwekesheli wushona. Anukenu nsañu yawayivumbi ayedi awambanda aditadikishileña kumesu aSolomoni, nawu wumu yodihi wadiña mweni mwana. Solomoni chayesekeliyi nakuhosha nindi mwana amubaluli hakachi, yomweni mwana watiyili wushona. Watiyili wushona chakwila wakeñeli nindi mwana amuhani kudi mukwawu. (1 Anya. 3:23-27) Hela toñojokenu hadi mwana kaFwaru wamumbanda wamupulwishili Mosi hadiñayi nkemba. Hela chakwila welukili nindi wadiña mwana kawaHeberu nawa ateleleli kumujaha, yena “wamutiyilili wushona” nawa wamuhembeli neyi mwanindi wakudisemena.—Kwid. 2:5, 6. w17.09 8-9 ¶2-3

Akwakudifukula alala ejima atela kwikala adizoza. (Yish. 22:4) Mukudizoza mwafumaña yuma yayiwahi. Neyi twikala adizoza chikutukwasha kuleta kuwunda nikunuñañana muchipompelu. Neyi tukutwalekahu kwikala adizoza, Nzambi wukututiyila luwi lwasweja. Kapostolu Petulu wasonekeli nindi: “Wejima wenu dizozenuña kudi wumu namukwawu, muloña Nzambi wadikañaña nawakwakudivwimba, ilaña akwakudizoza wayitiyilaña luwi lwasweja.” (1 Pet. 5:5) Mukanu kaayi kamakonu, antu awunda nawa adiwunjika ayimonaña nawu azeya. Yitoñojoka yamuchidiwu yambukaku chikupu nachalala. Iyi yilwilu yayiwahi yafuma kudi Nleñi wayuma yejima. Yehova Nzambi diyi muntu wawunda nawa wadiwunjika. Shinshikenu chayakwiliyi aAbarahama niLoti kuzatisha añelu. (Kutach. 18:22-33; 19:18-21) Cheñi, hadi yaaka yakubadika ha 1, 500, Yehova wanakeneni muza wawaIsarela.—Ezek. 33:11. w17.08 25 ¶13-14

Lombenu kulonda mwikali nakuwunda kwaNzambi. Ilaña ilukenu nenu “kuwunda kwaNzambi kwabadika kwiluka kwejima.” Chumichi chinatalishi mudihi? Akwakubalumuna amakwawu abalumuna awa mazu nawu “kwabadika yafwilañayi muntu” hela “kwabadika yuma yejima yafuukulañayi muntu.” Dichi Pawulu watalishili mukwila nindi “kuwunda kwaNzambi” kwasweja kubadika yuma yidi yejima yitunateli kufwikija. Etu antu tukutwesha wanyi kumona njila yakumanishilamu kukala. Ilaña Yehova yena weluka nawa nateli kwila yuma yitunabuli kukuhwelela. (2 Pet. 2:9) Tunateli kwikala ñahi ‘nakuwunda kwaNzambi’ hampinji yitunakumona kukala? Hikutwalekahu kwikala nawubwambu wawuwahi naNzambi yetu Yehova. Tunateli kwikala naniwu wubwambu wamuchidiwu “kuhitila mudi Kristu Yesu” wahanini wumi windi kwikala ifutu danyiloña. Idi ifutu danyiloña damwekeshaña yuma yakuhayamisha yelañayi tata yetu. Yehova wazatishaña ifutu danyiloña kubuta nshidi yetu, kutukwasha kwikala nachinleji chitooka nikuswina kwakwihi nayena.—Yow. 14:6; Yak. 4:8; 1 Pet. 3:21. w17.08 10 ¶7; 12 ¶15

Mpinji yikwawu, muntu wukufwila tuhu mukachi nachineñi, kulejaku antu amakwawu nehi. Hela chakwila muntu wukushimuna chinakutiyayi, chakala kutiyishisha chinakuhoshayi. Mwamweni, chinateli kukala kwiluka mazu akuhosha namuntu wunaneñi. Kakavulu, chuma chapela chimwatela kwila hikudilila “hamu nawantu adilaña.” (Rom. 12:15) Neyi chayikalilaña kukundeja muntu namazu amukanwa, munateli kumukundeja kuhitila mukumutemeshela kaadi, e-melu, meseji hela mukanda. Munateli kusonekamu mazu akukundeja ekala munsona, yuma yelileñayi muntu wunafwi, yilwilu yindi yayiwahi nichuma chachiwahi chayilililiyi chimwamwanukilañahu. Ilukenu nenu kulombelaku akwenu akwaKristu anafwishi kwalema. w17.07 14-16 ¶13-16

Indi neyi chihandilu chamuwulu chikola kubadika chimwakuhweleleli? Indi neyi yuma yiswejelaku nikutama? Mwatela kutoñojoka chelileñayi Yehova nawaIsarela. Waditeneni yomweni kwikala nfumwaniwu muza wakushakunkulu. (Isa. 54:5; 62:4) “Wulu” wawu wadiña mukukala! Hela chochu, Yehova hashikeneni dakuwulekaku. Watwalekelihu kuwutiyila luwi iwu muza nikuhemba chitiyañenu chindi chatiyañeniwu. (Mas. 106:43-45) Komana twatiyaña kuwaha nakukeña kwamuchidiwu kwamwekeshañayi Yehova? Antu adisumbula akeña wunlomboli waYehova amwimbujolaña. Hiyadiseñaña hanyiloña yabula kushimunawu munsonaku. Eluka nawu Yehova wayibomba hamu nawa nakukeña nindi ‘adikakeli.’ Muloña wumu hohu wetejawu muNsona wuyatela kudiseñelawu chiña neyi wumu yela wuvumbi. (Mat. 19:5, 6, 9) Neyi amanisha kukala kunakumonawu nikufwila kushakama chiwahi, akuhakwilaku chiyuulu chaYehova. w17.06 31 ¶17-18

Yuma yeliliyi Satana Diyabolu yamwekeshaña nawu wajinokeli wuswa waYehova wakuyuula. Wahoshaña nindi Nzambi wayuulaña chiwahi wanyi nawa Yehova wakanishaña yileñaleña yindi yuma yayiwahi. Diyabolu wahoshaña nindi, antu akwikala namuzañalu neyi adiyuulaña awenawu. (Kutach. 3:1-4) Yehova wenkaku mpinji kulonda antu amoni neyi mwalala anateli kudiyuula aweni chakadi chiyuulu chaNzambi. Hela chochu, Yehova weluka nindi Diyabolu watwambili. Hanu dinu muloñadi Nzambi chinetejeliyi iku kukala kutwalekahu nakumwinka Satana mpinji yakumwekesha neyi mwahosheliyi mwalala? Antu niañelu niwena atela kwakula ilu lwihu. (Mas. 83:18) Muloña antu atachi akaanini chiyuulu chaYehova nawa antu amakwawu achidi kukaana. Chumichi chikuletesha antu kujinoka neyi Diyabolu wahosheli mwalala. w17.06 22-23 ¶3-4

Kwilisha atumbanji kunateli kuyikwasha kwikala nayilwilu yayiwahi, kwiluka chakuhosha nawantu, kudikuhwelela nikwikala ababala. (Yish. 21:5; 2 Tim. 2:24, tth.) Ilaña kakavulu kwaletaña muzañalu muloña kwayikwashaña kwiluka jiNsona hashindamena chikuhwelelu chenu. Mukwiluka cheñi chakuzata naYehova. (1 Kor. 3:9) Munateli kwikala namuzañalu wakwilisha atumbanji hela chakwila antu antesha mwiluña denu diwu etejaña nsañu yayiwahi. Kwilisha atumbanji himudimu wakuzatila hamu. Chipompelu chejima chakeñakeñaña antu ovwaha nyichima. Hela chakwila manakwetu hela muhela diyi wunamwilishi muntu kwikala kambanji, ejima wawu azatili mudimu wakukeñakeña nawa wejima wawu akwikala namuzañalu. Chakutalilahu, Brandon wazatili hadi yaaka 9 wupayiniya mwiluña mwabulaña kutambwilawu nsañu yayiwahi. Wahosheli nindi: “Hela chakwila hinadizishihu muntu hela wumu kushika kuchipapatishiku, ilaña amakwawu ayidizishaña nawa apapatishewaña. Natiyaña kuwaha muloña nafuukwilihu kuzata mudimu wakwilisha atumbanji.”—Mukwa. 11:6. w17.07 23 ¶7; 24 ¶9-10

Hana, ñoda Elikana wamweni kukala. Wadiña nakuvwala anyana wanyi ilaña muhadika nindi Penina ñoda Elikana mukwawu wavwalileña nyana. (1 Sam. 1:4-7) Hana amuvulokeleña nankashi kudi muhadika nindi Penina “hamwaka hamwaka.” Chumichi chamutiyisheleña kutama Hana nikumukatisha kumuchima. Wamulejelimu Yehova kukala kwadiñayi naku mukulomba. (1 Sam. 1:12) Wakuhweleleli nindi Yehova wukumukwasha kwikala nanyana hela kumukwasha munjila yikwawu. Kukala niyihuñu jikutwalekañahu chineli twawanina wanyi nawa tunakushakama mukaayi kanakuyuulawu kudi Satana. (1 Yow. 5:19) Twazañalalaña hakwiluka netu Yehova ‘hiNzambi wakukundeja kwejima’! (2 Kor. 1:3) Kulomba hinjila yimu yinateli kutukwasha kutambwila wukwashu wakumanisha kukala niyihuñu. Hana wamulombeli Yehova chakufuma hamuchima. Munjila yoyimu, neyi tudi muyihuñu twatela kumulejamu Yehova yuma yayivulu kubadika chitunakutiya hohu. Twatela kulemba nakumulejamu yuma yejima yitunakutiya kuhitila mukulomba chakufuma hamuchima.—Fwi. 4:6, 7. w17.06 6 ¶10-11

Yesu asañwiliwu chayimweniyi anakañanyi kukwata inshi wayilejeli nindi: “‘Lalumwinenu kaleñi kumbavu yawatu yakuchidiilu nawa mukukwata inshi.’ Dichi akilalumwini, ilaña akañenyi kukikokela muwatu muloña mwafwili inshi jajivulu nankashi.” (Yow. 21:1-6) Hanyima yakuyinka yakuda, Yesu wabalumukilili kudi Shimona Petulu nakumwihula mazu adi munsona yefuku dalelu. Yesu wateneneñadi? Petulu wakeñeli nankashi mudimu wakukwata inshi. Dichi, chidi neyi Yesu wamwihwileña yuma yakeñeliyi. Komana wakeñeli chikupu mudimu wakukwata nikulandisha inshi kubadika Yesu niyuma yadizishileñayi? Petulu wamwakwili nindi: “Eña Mwanta, weluka neyi nakukeña.” (Yow. 21:15) Chakadi nikujina Petulu welili mwahosheliyi. Kufuma hayina mpinji, wamwekesheli nindi wamukeña Kristu kuhitila mukwilisha atumbanji nikwikala chishimi muchipompelu chawakwaKristu amumafuku awapostolu. w17.05 22 ¶1-2

Hampinji yahitiliyi mukukala kweneni, Pawulu watwalekelihu kumukeña Nzambi. Chumanyi chamukwashili kuumika? Watwalekelihu kumushindamena “Nzambi wakukundeja kwejima, watukundejaña mulukadi lwetu lwejima.” (2 Kor. 1:3, 4) Kuhanjeka naNzambi mukulomba dichuma chinateli kukolesha wubwambu wetu nayena. (Mas. 86:3; 1 Tesa. 5:17; Rom. 12:12) Neyi twikalaña nampinji yakumulejamu Yehova chitunakutoñojoka nichitunakutiya, chikutukwasha wanyi ilaña tukukundama kwakwihi naTata yetu wamwiwulu “watiyaña mwalombañawu antu.” (Mas. 65:2) Kubombelahu, neyi twiluka netu Yehova nakuli kulomba kwetu, kukeña kwetu kutwamukeña kukutwalekahu. Tukwiluka netu “Yehova wudi kwakwihi nawantu ejima akumutambika.” (Mas. 145:18) Neyi tumukuhwelela Yehova chikupu, chikatukwasha kuumika kukala kwasweja. w17.05 19 ¶9-10

Mukwila ñahi neyi aeluda ela yuma yimunabuli kwiluka hela yimunabuli kukeña? Yuma yamuchidiwu yinateli kutuletesha tubuli kumukuhwelela Yehova nintanjikilu yakuloñesha kwindi. Kudizoza kunateli kuyikwasha ñahi neyi chuma chamuchidiwu chinayimwekeni? Shinshikenu yikuma yiyedi. Chatachi, kudizoza kukutukwasha kwiluka netu tuneluki wanyi nsañu yejima. Hela chakwila tuneluki nsañu yejima, ilaña Yehova hohu diyi welukaña yuma yidi mumuchima wamuntu. Neyi twiluka chumichi, chikutukwasha kwikala adizoza, kwiluka hakukumina nikumona yuma munjila yoloka. Chamuchiyedi, kudizoza kukutukwasha cheñi kutiyilila nikudiwunjika hitunakuhembelela Yehova kwolola yuma. Muntu wamaana wasonekeli nindi: “Amwakamaña Yehova . . . , akamona kuwaha . . . , ilaña mukwakwila yatama hakamona kuwahaku, hakamona mafuku amavuluku.” (Mukwa. 8:12, 13) Dichi, kudizoza kukutukwasha kushilahu tuhu niantu amakwawu.—1 Pet. 5:5. w17.04 25-26 ¶10-11

Chakadi nikujina, Yosefu amwilili chatama. Wahosheli chakadi nikuhita mumbadi nindi kwosi chuma chatama cheliliyi chaletesheli amukasi. Dichi, wamulejeli mukwakutwala lupasa nindi yamulejimu Fwaro. Muloñadi? Walumbulwili chuma chakeñeleñayi nindi: “Kulonda akanfumishi mwitalidi.” (Kutach. 40:14) Komana Yosefu wetejeli hohu mwejima mwamwililiwu chakadi kwilahu chuma chidi chejima? Inehi mwani. Welukili chikupu nindi amwilileña chatama. Wamulejeli yuma yejima mukwakutwala lupasa, hadaha wadi kumuhakwilaku. Hela chochu, ilukenu nenu, kwosi Nsona yamwekeshaña nawu Yosefu walejelimu muntu wudi wejima hela Fwaro nindi amanakwindi diwu amwiyili nakumulandisha. Chelili amanakwindi enzi kuEjipitu nawa adimoni cheñi naYosefu, Fwaro wayitambwilili chiwahi nikuyileja nindi ashakami muEjipitu kulonda adiluñisheña “yuma yayiwahi yamwituña.”—Kutach. 45:16-20. w17.04 20-21 ¶12-13

Chuma chimu chaletesha Yehova kwikala Nyuuli waloña, muloña wukweti maana nikwiluka kwakwakamena yileñaleña. Chakutalilahu, toñojokenu Nzambi chamwinkeliyi Mwanindi ñovu yakuuka yikatu yinakukañanya kuukawu andotolu makonu. (Mat. 4:23, 24; Maku 5:25-29) Kudi Yehova, chumichi chadiña chihayamisha wanyi. Welukili ñovu jazatishiliyi hakuuka nawa wukweti ñovu jakuyifumishahu. Nateli cheñi kusañula afu nikukañesha wubanji wadimwekenaña. Kaayi kanakuluwañeshawu kudi Satana kanakañanyi kuwana njila yakumanishilamu yikonkojola yinakumwekana munyuza. Yehova hohu diyi wukweti maana akuleta kuwunda mukaayi. (Isa. 2:3, 4; 54:13) Chitweluka maana nikwiluka kwaYehova, tukutiya neyi chatiyiliyi kapostolu Pawulu, oneneniwu kusoneka mazu adi munsona yefuku dalelu. w17.06 28 ¶6-7

Antu amavulu mukanu kaayi alemesha wanyi wulu. Neyi amona kukala muwulu wawu, ambukaña nakushiya mwinikwawu. AkwaKristu atela wanyi kwila mwenimu. (1 Kor. 7:27) Kukojeja mukwenu kubula kushikija chikaninu chindi chawulu, hikutwamba kudi Nzambi nawa Nzambi wahela antu atwambaña! (Lev. 19:12; Yish. 6:16-19) Yehova wahela kudiseña. (Mal. 2:13-16) Yesu wahosheli nindi Nsona yeteja antu kudiseña neyi wumu hakachi kawu neli wuvumbi nawa mukwawu nakaani kumwanakena. (Mat. 19:9; Heb. 13:4) Indi neyi muntu yafuukulahu kwaambuka? Bayibolu yashimuna cheñi hatooka haniyi nsañu. (1 Kor. 7:10, 11) Bayibolu yashimuna wanyi nawu antu atela kudaambula. Hela chochu, akwaKristu amakwawu adambulaña neyi mwinikwawu nakwila yuma yinateli kujimbesha wumi windi hela nakumukañesha kwila yuma yakuspiritu. w17.04 7 ¶14-16