January

Hampinji yadiñayi nakushakama Mosi muchipañu muEjipitu, wadiña wadizoza wanyi. Wadiña nakuhila swayi chakwila wajahili iyala wumu wamweniyi nindi waluwañesheli. Mosi watoñojokeli nindi Yehova watiyili kuwaha nachuma chakoñeliyi. Hadi yaaka 40, Yehova wamudizishili Mosi kwikala wahamuka nawa wadizoza hakwila nawu yalomboli aIsarela. Nawa hakwila nawu yekali wadizoza, wateleleli kwikala wawunda, wamwovu nawa wadikehesha. Wadizili kwikala naniyi yilwilu nawa wekalili nlomboli wamuwahi. (Kwid. 2:11, 12; Yil. 7:21-30, 36) Nyitu yayisaka niakulumpi atela kumwimbujola Mosi. Neyi anakuyilemesha wanyi, bayi mutiya kutamaku. Dizozenu nawa itejenu yiluwa yenu. (Mukwa. 7:9, 20) Londelenuña wulomboli waYehova hakumanisha kukala. Mpinji yejima akulenuña mukuwunda. (Yish. 15:1) Nyitu yayisaka niakulumpi neyi akulaña mukuwunda akumutiyishaña Yehova kuwaha, akuleta kuwunda nawa akuletesha antu amakwawu kwikala adizoza. w19.02 8 ¶1; 10 ¶9-10

Talenu chuma chaletesheli Yesu yayitiyili awa antu wushona hela kuyakamena. Wahosheli nindi “adiña neyi anyikoku akadi kabiña.” Yesu watela wamweni nindi amakwawu adiña atuzweñi nawa adiña nakuzata nañovu kulonda akeñeli yisaka yawu yuma yakeñekaña. Hadaha amakwawu aneñeli muloña wakwila afwishili antaña jawu. Neyi dimu, dikwila nawu Yesu welukili kukala kwadiñawu naku. Niyena wamweni kukala kwamuchidiwu. Yesu wadiña nakutoñojokelaku antu, nawa wayilejeleña nsañu yakuyikundeja. (Isa. 61:1, 2) Chumanyi chitwadizilaña kudi Yesu? Kufwana Yesu, twashakamaña nawantu adi “neyi anyikoku akadi kabiña.” Anakuhita mukukala kwakuvulu. Tukweti chuma chinakukeñawu, nsañu yaWanta. (Chim. 14:6) Twamwimbujolaña Mwanta wetu nawa twashimwinaña nsañu yayiwahi muloña ‘twayitiyilaña wushona azeya niabula yuma.’ (Mas. 72:13) Twayitiyilaña antu wushona nawa twafwilaña kuyikwasha. w19.03 21-22 ¶6-7

Kudi yuma yayivulu yatuleñelaña tumukeñi Yehova. Watwinkaña yuma yayiwahi yitwadiluñishaña mafuku ejima nawa watudizishaña chekalayi ninkeñelu yindi. (Yow. 8:31, 32) Watwinka chipompelu chawakwaKristu kulonda chitulomboleña nikutukwasha. Watukwashaña kuumika kukala nawa watwinka kuchiñeja kwakushakama haya nyaaka nawumi wawanina kumbidi. (Chim. 21:3, 4) Neyi tutoñojokaña chikupu hayuma yatwililayi Yehova yinakumwekesha nawu watukeña, tukusweja kumukeña. Nawa neyi tumukeña Yehova, tukutiyaña woma wakwila yuma yikumuneñesha. Twachinaña kutiyisha kutama Muntu itwakeña nankashi. Neyi mutwalekahu kutoñojoka hayuma yayiwahi yinafumi mukulondela nshimbi jaYehova, mukusweja kumukeña yena ninshimbi jindi. Chikufumamu, kwosi chuma chikwilayi Satana chinateli kuyikañesha kumukalakela Yehovaku. Fwikijenu hanahiti dehi yaaka ikombakaji. Mukwanuka nenu mwelili chiwahi chimwafuukwilihu kupapatishewa. w19.03 6 ¶14; 7 ¶19

Antu ejima muchisaka ekalaña namuzañalu neyi adisakililaña. Adisumbula adikundaña chikupu neyi adisakililaña. Nawa chekalaña chaswayi kudanakena neyi wumu naluwañeshi. Iyala wakeña ñodindi wamonaña yuma yayiwahi yelañayi niyahoshaña mwinikwindi nawa “wamuhamekaña.” (Yish. 31:28) Mumbanda wakeña nfumwindi niyena wamusakililaña nfumwindi hachuma chachiwahi chinamwililiwu. Enu anvwali, munateli kudizisha ñahi anyanenu kwikala namuchima wakusakilila? Anukenuña nenu anyanenu akwimbujolaña yuma yimwelaña niyimwahoshaña. Dichi, yisakililenuña anyanenu neyi ela chuma chachiwahi. Kubombelahu, yidizishenu anyanenu asakilileña neyi antu anayilili yuma yayiwahi. Yikwashenuña eluki nawu kusakilila kwatela kufuma hamuchima nawa mazu akusakilila iyakuhoshawu anateli kukwasha antu. w19.02 17 ¶14-15

Awa mazu anakumwekesha nawu Yoba wafwilileña kuhemba kashinshi kindi hela kukumwekana kukala kwamuchidinyi. Yoba wakaanini kufumpa kashinshi kindi, ninetu dichitwatela kwila. Nsañu yahosheliyi Satana hadi Yoba yinatukundami ñahi ninetu? Satana wahoshaña nindi mwamukeña wanyi Yehova Nzambi, munateli kuleka kumukalakela kulonda mudipulwishi nawa nindi kashinshi kenu kakutwamba. (Yoba 2:4, 5; Chim. 12:10) Awa mazu ayitiyishaña ñahi? Ayitiyishaña kutama, netu? Hela chochu, ilukenu nenu: Yehova wayikuhwelela dichayinkelayi nyidimu yayivulu. Yehova wamwitejaña Satana kweseka kashinshi kenu. Yehova wayikuhwelela chikupu nindi munateli kutwalekahu kwikala ashinshika nawa nateli kuyikwasha kumwekesha nawu Satana hisakutwamba. Wakana nindi wukuyikwashaña kwikala ashinshika. (Heb. 13:6) Hikukooleka chikupu kuyikuhwelela kudi Mwanta wakuleña kwejima! Munamoni kashinshi chikalemena? Katukwashaña kwiluka netu Satana hisakutwamba, katukwashaña kuhakwilaku ijina dadiwahi daTata yetu nichiyuulu chindi. w19.02 5 ¶9-10

Yesu wayilejeli cheñi apostolu kukala kukamonawu kumbidi. Chahosheliyi nindi amwimbujoleña, wayilejeli nindi ekali ‘akola.’ (Yow. 16:1-4a, 33) Chimwahitili yaaka, atumbanji twaYesu achidiña nakwimbujola muchima windi wakudihana nawa adiña ahamuka. Hela chakwila amweni yihuñu, adikwashileña wumu namukwawu mukukala kwamweneñawu. (Heb. 10:33, 34) Ninetu makonu, twamwimbujolaña Yesu hakumwekesha kuhamuka. Chakutalilahu, twatela kwikala ahamuka hakwila tukwashi amanakwetu anakukabishawu muloña wachikuhwelelu chawu. Mpinji yikwawu amanakwetu anateli kuyikasa chakadi muloña. Neyi chuma chamuchidiwu chimwekana, twatela kuzata nañovu kulonda tuyikwashi nikuyihakwilaku. (Fwi. 1:14; Heb. 13:19) Njila yikwawu mutunateli kumwekeshela kuhamuka, hikutwalekahu kushimwina “nakuhamuka.” (Yil. 14:3) Kufwana Yesu, tunakufwila chikupu kushimwina nsañu yaWanta hela chakwila antu anakutudimbulula nikutukabisha. w19.01 22-23 ¶8-9

Yumanyi yinateli kuyikwasha kwakula chiwahi hakupompa? Chuma chalema hikuloñeshela chadimu henohu kanda muyi nakupompa. Neyi muloñesha chadimu, chikuyikalilaña wanyi kwakulahu. (Yish. 21:5) Yumanyi yinadibombeli mukuloñesha chiwahi? Mulombenu Yehova yayinki spiritu yajila henohu kanda mutachiki kuloñesha. (Luka 11:13; 1 Yow. 5:14) Shinshikenu chikupu chidi mutu wansañu, tunyitu twanyanya tudimu, yakutalilahu niyikasha yidimu. Hampinji yimunakuloñesha, tañenu nsona jejima jidi mumaparagilafu. Toñojokenu chikupu hansañu yimunakuloñesha nawa shenu muchima hayikuma yimukwakulahu. Neyi muloñeshaña chiwahi, chikuyipelela kwakula nawa mukudiluñishaña.—2 Kor. 9:6. w19.01 9 ¶6; 11-12 ¶13-15

Yehova chamoneneniyi Habakuki kusoneka yitoñojoka yindi, watulejaña chikuma chalema nindi: Twatela kumuleja Nzambi yuma yejima yitunakutoñojoka. Mwamweni, watulejaña nindi twichileña nyichima yetu kudi yena mukulomba. (Mas. 50:15; 62:8) Habakuki wazatili nañovu hakuswina kwakwihi naYehova, Ibwambu dindi wakuhwelelayi nawa Tata yindi. Habakuki hashindameneni hakashinshi kindi yomweni, nindi yamanishi kukalaku. Ilaña walombeli hachineñi nikwakama kwadiñayi naku, chuma chitunateli kwila ninetu. Dichi, Yehova Watiyaña mwalombañawu antu nakututambika nindi tumukuhweleli kuhitila mukulomba nakumuleja kwakama kwetu. (Mas. 65:2) Neyi twila mwenimu, tukumona Yehova chikwakulayi kulomba kwetu, chatukumbatañayi nakukeña hakutulombola. (Mas. 73:23, 24) Wukutukwasha kwiluka yitoñojoka yindi hela chakwila tudi mukukala. Kulomba kwakufuma hamuchima kwamwekeshaña nawu twamukuhwelela Nzambi. w18.11 13 ¶2; 14 ¶5-6

Ñimbi yamasamu Davidi wakwatili wubwambu nawantu adiña nayaaka yashiyashana. Munakwanukahu ijina damuntu ‘walema’ wadiña ibwambu daDavidi? Wadiña Jonatani. Wubwambu wawu wekala hakachi kawubwambu wawuwahi washimunawu muNsona. Hela chochu, Jonatani wamubadikilimu Davidi kwakwihi nayaaka 30. Hanu dinu, wubwambu wawu washindameneni hayumanyi? Washindameneni hakumukuhwelela Nzambi, kudilemesha nikuhamuka kwamweneñawu mudi wumu namukwawu hazuñileñawu nawayilumbu jaNzambi. (1 Sam. 13:3; 14:13; 17:48-50; 18:1) Kufwana aDavidi naJonatani, ninetu ‘twatiyaña kuwaha’ kudikunda nawantu amukeña Yehova niantu amukuhwelela. Kiera wunamukalakeli Nzambi yaaka yayivulu wahosheli nindi: “Nidi nawamabwambu mukaayi kejima, antu akuyisemwa yacheñi nikuyitachi yashiyashana.” Neyi ninenu mwikala nawamabwambu amukeña Nzambi, mukumona nenu mwalala Izu daNzambi nispiritu yindi yatunuñañeshaña hamu. w18.12 26 ¶11-13

Izu dakwila nawu “wuvumbi” munabombelimu nshidi yawuvumbi yabula kwikala muwulu: wuvumbi, wujila, wuvumbi welaña antu abula kudisumbula, wuvumbi weyala neyala hela mumbanda namumbanda nikudikaama nawatunyama. Chakutalilahu, neyi iyala wasumbula yela wuvumbi, ñodindi nateli kufuukulahu kudiseña hela nehi. Yesu hashimwini nindi muntu wunabuli kwila wuvumbi watela kushikena kuseña mukwawu wuneli wuvumbiku. Chakutalilahu, mumbanda nateli kufukulahu kutwaleka kushakama nanfumwindi wuneli wuvumbi. Watela kutwalekahu kumukeña, kumwanakena nikuzatila hamu kulonda akoleshi wulu wawu. Ilaña neyi adiseña nawa yashakama wujiki, wukumonaña kukala muchihandilu. Wukudihembaña ñahi kuyuma yakumujimba hela kumpwila yakubulakana? Indi wudi wakwikala nkawindi? Indi neyi wudi nawanyana? (1 Kor. 7:14) Mwamweni, neyi adiseña mumbanda wunabuli muloña wukumonaña kukala kwasweja. w18.12 12 ¶10-11

Yehova wahela yuma yaheña. (Isa. 61:8) Yehova weluka nindi twakoñaña yuma yatama muloña wakubula kuwanina kutwaswana, ilaña watulejaña nindi ninetu twatela kuhela yuma yatama. Kutoñojoka chikupu chaletesha Yehova yaheli yuma yatama kukutukwasha kutoñojoka neyi chatoñojokañayi nawa tukutondolwelaña kwila yuma yatama. Neyi tumonaña yuma yatama neyi chayimonañayi Yehova chikutukwasha cheñi kwiluka yilwilu yikwawu yatama hela chakwila hiyayishimuna Mwizu daNzambiku. Chakutalilahu, yilwilu yakuhañena muntu hamakata yinatandi nankashi mukaayi. Antu amakwawu anateli kudiwula iyi yilwilu nakutoñojoka nawu hikwila wuvumbiku. Komana iyi yilwilu yamwekeshaña yitoñojoka yaNzambi wahela yuma yatama yejima? Tutondolweleña yuma yatama kuhitila mukwikala nachilwilu chakudihemba nikuhela yuma yejima yahelayi Yehova.—Rom. 12:9. w18.11 25 ¶11-12

Kapostolu Pawulu wamweni kulema kwanichi chikaninu chaYehova chakwila wachizatishili kapampa kasatu munyikanda yindi. (Rom. 1:17; Ñal. 3:11; Heb. 10:38) Hela chakwila muntu waloña wukumona kukala, chikuhwelelu chindi chikumukwasha kuchiñilila mpinji yakashikijayi Nzambi yikaninu yindi. Yehova watulejaña nindi tutwalekihu kutalila yuma yakumbidi. Mukanda waHabakuki watudizishaña yikuma yalema wejima wetu tunakushakama munanu mafuku akukuminina. Yehova wayikana antu aloña nawa amukuhwelela nindi wakayinka wumi. Dichi, tutwalekihu kumukuhwelela Nzambi hela chakwila tunakumona makabi asweja. Nsañu yamulejeliwu Habakuki kudi Yehova yatukoleshaña nawu Nzambi wukatwalekahu kutukwasha nawa wakatwamwina. Watulejaña nindi tumukuhweleli nikuchiñilila mpinji yatoñolayi, mpinji yitukashakamaña muWanta waNzambi, iseki dejima dakenzala nawantu adi namuzañalu nawa awunda adifukulaña kudi Nzambi.—Mat. 5:5; Heb. 10:36-39. w18.11 16-17 ¶15-17

Antu amakwawu atiyili kuntañishilu yaYesu mumafuku awapostolu, hiyatwalekelihu kwenda muchalalaku. Chakutalilahu, hanyima yakwila Yesu nadiishi dehi izaza dawantu muchihayamisha, izaza damulondeleli kwishinadi daKaluñalwiji kaÑaliliya. Kweniku, Yesu wahosheli mazu ayineñesheli nindi: “Neyi enu kuda mujimba waMwana kamuntu hela kunwa mashi indi nehi, himwakekala nawumiku.” Chatela amwihuli Yesu mwatalishiliyi, ilaña mazu indi ayituntwishili nawa ahosheli nawu: “Awa mazu akala; hinyi wukuyitiya?” Chafuminimu, “atumbanji twindi amavulu afuntili kuyuma yashiliwu nawa alekeli kwendela hamu nindi.” (Yow. 6:53-66) Chawushona, antu amakwawu makonu niwena anakañanyi kutwalekahu kwenda muchalala. Amakwawu atuntukili namazu ahosheliyi hela yuma yeliliyi manakwetu akuhwelelawu. Amakwawu atuntukili muloña wakufumba kwamuNsona kwatambwililiwu, indi kwiji afumini muchalala muloña wakubula kutiyañana namukwawu mukwaKristu. w18.11 9 ¶3-5

Neyi tuneluki wanyi yuma yinaleteshi mukuloñesha mwikali kuhimpika, tukwila chiwahi neyi tutoñojoka chalombweliyi Yesu kunyima. Kufuma tuhu mumafuku aYoshuwa nimafuku awapostolu, Kristu natwalekihu kunlombola nikukiña antu jaNzambi, kukolesha chikuhwelelu chawu nikukwasha ambuña aNzambi kwikala anuñañana. (Heb. 13:8) Yesu wamwekeshaña hatooka nindi watwakamenaña kuspiritu kuhitila muwunlomboli wutwatambwilaña kudi “nduñu wamaana nikashinshi.” (Mat. 24:45) Neyi tumona chinakulombolayi Kristu, tukwiluka netu nakukeña nindi tukoleshi chikuhwelelu chetu. Kubombela hakutwakamena kuspiritu, Kristu nakutukwasha chikupu kusha maana hamudimu wasweja kulema wunakuzatewa hamaseki makonu, dikwila nawu mumudimu wetu wakushimwina.—Maku 13:10. w18.10 25 ¶13-16

Chakutalilahu chachiwahi chakudizoza chatukwashaña kudiyuula neyi anatuvuloki chawanikaña ha 2 Samweli 16:5-13. Davidi niantu jindi omikili chayitukiliwu kudi Shimeyi, ntaña yaMwanta Sawulu. Davidi womikili hela chakwila wadiña nañovu yakumanisha iku kukala. Chumanyi chamukwashili Davidi kudiyuula? Twadizaña chuma chamukwashili Davidi Mwisamu damuchisatu. Mazu ekala heSamu damuchisatu amwekeshaña nawu ayisonekeli hampinji Davidi “hatemukiliyi mwanindi Abisalomi.” Vasi 1 ni 2 yashimuna nsañu yidi mukapetulu 16 kaSamweli wamuchiyedi. Masamu 3:4 yashimuna chikuhwelelu chamwekesheliyi Davidi, chahosheliyi nindi: “Nenda nimutambika Yehova nezu dami.” Ninetu twatela kulomba neyi anatulukuki. Yehova nateli kutwinka spiritu yindi yajila, yinateli kutukwasha kuumika. Komana munateli kudiyuula hela kwanakena muntu neyi yayitiyisha kutama? Komana mwakuhwelela nenu Yehova nateli kumona yihuñu yenu nawa wukuyikwasha? w18.09 6-7 ¶16-17

Neyi tunakushimwina, mpinji yejima twatela kuyitoñojokelañaku nikuyilemesha antu, dikwila nawu twatela kuyiluka chiwahi antu itwashakamaña nawu. Mwatela kwanuka nenu kwosi watutambikaña neyi tunakushimwina kwitala nikwitala. Dichi chachiwahi kuyaña hampinji yatelela yinateli kutiyawu antu kunsañu yetu. (Mat. 7:12) Chakutalilahu, komana mwiluña denu antu ahindukaña swayi wanyi kunsa yanyilungu? Neyi dichelañawu, mwatela kutachika kushimwina munyikwakwa, kumaluña kudi antu amavulu hela kuya nakufuntila kudi antu imuneluki nenu atela adi hohu. Antu amavulu ekala nanyidimu yayivulu, dichi neyi munakuhanjeka nawu katachi, mwatela kukeheshaku mazu. Bayi mushimbulaña neyi munakuhanjekaku. (1 Kor. 9:20-23) Neyi antu eluka nawu tunakuyakamena nakubula kuyidila mpinji, hadaha akukeñaña nawu tukafuntiku cheñi. Mwamweni, nyikabu yaspiritu yaNzambi twatela kuyimwekeshaña mumudimu wakushimwina. Neyi twila mwenimu, tukwikala “akwakukalakala hamu naNzambi,” nawa Yehova nateli kutuzatisha kudizisha antu chalala.—1 Kor. 3:6, 7. w18.09 32 ¶15-17

Kudizoza kunateli kutuleñela ñahi kwikala namuzañalu? Muntu neyi neluki chalala wahimpaña. Hadaha kunyima adiña azuwa, adiña nayikonkojola nawa akwamadombu. Ilaña ichi avwala dehi “wuntu wawuha” nawa amwekeshaña “muchima wawushona, luwi, kudizoza, kwovwaha nikudiwunjika.” (Kol. 3:9-12) Chafumamu, awunda, akweti kukeña nawa adi namuzañalu muchihandilu chawu. Kubombelahu, Izu daNzambi dakana nawu antu amuchidiwu “akaswana ituña.” (Mas. 37:8-10, 29) Munjilanyi antu adizoza “[muyakaswaninawu] iseki”? Atumbanji twaYesu awayishewa naspiritu akaswana iseki hampinji yikayuulañawu iseki neyi anyanta nawa atupristu. (Chim. 20:6) Hela chochu, antu amavulu abula kwikala nakuchiñeja kwakuya mwiwulu, akaswana iseki, dikwila nawu akashakama hamaseki haya nyaaka, akekala awanina, akekala mukuwunda nawa naMuzañalu. w18.09 19 ¶8-9

Yehova yomweni wamwekesha chitwatela kutiyilila antu. (Kutach. 18:32; Yosh. 10:14) Shinshikenu yuma yitwatela kudizila kumazu ekala ha Kwidika 32:11-14. Hela chakwila Yehova wakeñeleña wanyi nindi Mosi yahoshihu, ilaña wamwitejeli kushimuna yuma yadiña kumuchima windi. Hinyi wunateli kutiyilila mpinji yayilehi kudi muntu wunakuluwañesha nawa nkumininaku azatisha nimazu anamulejiwu? Hela chochu, Yehova wadiwunjikaña nakutiyilila kudi antu alombaña nachikuhwelelu. Dichi twatela kudihula netu: ‘Neyi Yehova wukudizoza nakutiyilila antu adi neyi Abarahama, Racheli, Mosi, Yoshuwa, Manowa, Elija niHezekiya, kwila ninami nilemesha amanakwami, kutiyilila yuma yinakuhoshawu nikwila munahoshiwu nehi? Kudihu muntu muchipompelu hela muchisaka inatela kukwasha? Chumanyi chinatela kwila? Nawa nateli kwila ñahi mwenimu?’—Kutach. 30:6; Ansomp. 13:9; 1 Anya. 17:22; 2 Kushi. 30:20. w18.09 6 ¶14-15

Chinateli kutukalila kumwekesha chisambu neyi twashakamaña nawantu akeñaña yuma yakuditiyisha awenawu kuwaha. Hela chochu, Yesu washimwini nshimbi jiyedi jabadika nindi tukeñi Yehova namuchima wetu wejima, nawumi wetu wejima, nayitoñojoka yetu yejima niñovu jetu jejima nawa nindi tukeñi akwetu neyi chitwadikeña etu aweni. (Maku 12:28-31) Antu amukeña Yehova amwimbujolaña. Yehova niYesu ahanaña. Nawa akeñaña ninetu tuhaneña muloña kuhana kwaletaña muzañalu. Neyi tumwekeshaña chisambu kudi Yehova nikudi akwetu antu, tukumulemeshaña Yehova nawa tukwikala namuzañalu kushilahu niakwetu. Chakadi nikujina, mwakwashaña akwenu, sweje-e akwetu akwakwitiya. (Ñal. 6:10) Neyi mutwalekahu kwila mwenimu, akwenu akuyikeña nikuyisakilila nawa mukwikalaña namuzañalu. w18.08 22 ¶19-20

Yehova weluka nindi kwosi chuma chabadika, hela ikowa, hela muchidi, hela ituña hela chisemwa hela idimiku. Muntu wejima wamutiyaña Nzambi woma nawa welaña mwaloña hela hiyala hela mumbanda yena wamutambwilaña. (Ñal. 3:26-28; Chim. 7:9, 10) Chakubula nikujina, munateli kwiteja nenu dimu. Indi neyi mwakulila mwituña hela muchisaka mwekala chaambu? Munateli kumona neyi mudana chaambu, ilaña mumuchima wenu munateli kwikala chaambu. Petulu wakwashili akwawu kwiluka nawu Yehova wekala nachaambu wanyi, ilaña mukuhita kwampinji wamwekesheli chaambu. (Ñal. 2:11-14) Tunateli ñahi kuleka kusompesha kwesekeja nachinakumwekanayi muntu? Twatela kudishinshikaña etu aweni kuhitila mukutaña Izu daNzambi kulonda twiluki neyi tukweti chaambu hela nehi. (Mas. 119:105) Twatela cheñi kutambwilaña wukwashu kudi akwetu anamoni yilwilu yachaambu mudetu hela chakwila etu aweni tuneluki wanyi netu tudi nachaambu. (Ñal. 2:11, 14) Iyi yilwilu yinateli kwikala mudi etu ilaña tunateli kwiluka wanyi. w18.08 9 ¶5-6

Dihulenu nenu: ‘Komana antu amakwawu ammonaña nawu nadihana kudi Yehova? Komana nadimwekeshaña nami nidi chiNsahu chaYehova?’ Yehova nateli kutiya kutama neyi yamona nindi tunakudimwekesha wanyi netu tudi antu jindi henohu watutonda kwikala antu jindi. (Mas. 119:46; Maku 8:38) Chawushona, antu amakwawu anateli kukañanya ‘kuyambula nawantu abulaña kumukalakela Nzambi’ muloña wakwimbujola “spiritu yamukaayi.” (1 Kor. 2:12) Iyi diyi spiritu ‘yakufwila kwamuntu wakumujimba.’ (Efwe. 2:3) Chakutalilahu, hela chakwila anayifumbi chamuchidinyi, antu amakwawu atondañahu kuvwala yakuvwala yabula kutelela. AkwaKristu amakwawu avwalaña yakuvwala yayikwata hamujimba niyamwekeshaña mujimba. Amakwawu atewulaña chatama nikuyinda hela kusakula nsuki chatama. (1 Tim. 2:9, 10) Dichi, neyi adi hadi antu amavulu, chakalaña kuyiluka neyi hiyantu jaYehova hela hiyantu akwata “wubwambu nakaayi.”—Yak. 4:4. w18.07 24-25 ¶11-12

Chuma chimu chatuleñelaña kwikala “amanakwamuntu” chidi chakwila nawu ejima wetu twafuma kudi Adama. (Yil. 17:26) Ilaña kudi yuma yikwawu. Yesu walumbulwili nindi atumbanji twindi hiyamanakwetu niahela muloña elukili nawu Yehova hiTata yawu wamwiwulu. (Mat. 12:50) Kubombelahu, ekalili amuchisaka cheneni chakuspiritu, chanuñañana nakukeña ninachikuhwelelu. Dimuloña waweni wasonekeleliwu apostolu munyikanda yawu nakutena akwawu atumbanji nawu ‘amanakwetu niahela.’ (Rom. 1:13; 1 Pet. 2:17; 1 Yow. 3:13) Hanyima yakulumbulula hatooka nindi twatela kudimona wumu namukwawu netu tudi amanakwamuntu niahela, Yesu washimwini nindi twatela kwikala adizoza. (Mat. 23:11, 12) Kudivwimba kwawusupi kwaletesheli apostolu atachiki ntaadi. Kuditiya muloña wekowa nikwena kwatela kwaleteleña kukala. Komana aYudeya aditiyileña muloña wakwila nawu adiña anyana kaAbarahama? A Yudeya amavulu dichakuhweleleliwu. Ilaña Yowanu Mupapatishi wayilejeli nindi: “Nzambi nateli kubalumuna awa malola kwikala anyana kaAbarahama.”—Luka 3:8. w18.06 9-10 ¶8-9

Neyi anatuhilishi hela tunambukilimu nawakwetu, komana twafumbaña kanwa ketu nikubula kuhila? (Yish. 10:19; Mat. 5:22) Neyi anatuhilishi kudi akwetu, twatela “[kumulekela] . . . yamwekeshi kuzuwa kwindi.” Kuzuwa kwanyi? Kuzuwa kwaYehova. (Rom. 12:17-21) Neyi tutwalekahu kutala kudi Yehova, tukumulemesha kuhitila mukumulekela kuzuwa kwindi, tukudiwunjika nakuhembelela kulonda yakoñi chuma chimu neyi chinatwesheki. Neyi tuditenda etu aweni chikumwekesha nawu tunamulemeshi wanyi Yehova. Komana mpinji yejima twalondelaña wunlomboli wakatataka watwinkañayi Yehova? Neyi twalondelañamu, mpinji yejima hitukushindamenaña hakwila yuma neyi chitwayilileña kunyimaku. Ilaña tukulondelaña wunlomboli wejima wakatataka wunakutwinkayi Yehova kuhitila mukuloñesha kwindi. (Heb. 13:17) Hampinji yoyimu, tukwikalaña asoñama kulonda tubuli “[kubadika] hayuma yasonekawu.” (1 Kor. 4:6) Neyi twilaña mwenimu, dikwila nawu tunakutala mesu etu kudi Yehova. w18.07 15-16 ¶17-18

Chimwekala mukwaKristu wapama, mukusweja kukeñesha nakashi yishina. Muloña mukuzatishaña nshimbi muyuma yantesha, ilaña yishina yikuzatikaña muyuma yayivulu. Chakutalilahu, mwana wanyanya welukaña wanyi wubanji wafumaña mukudikunda nawantu atama, dichi nvwali wukweti kashinshi nateli kushaku nshimbi jakukiña mwanindi. (1 Kor. 15:33) Ilaña mwana neyi nakuli dehi, wekalaña nayitoñojoka yakwiluka nawa nateli kutoñojoka hayishina yashindamena haBayibolu. Dichi nateli kufuukula mwamaana hakutonda amabwambu. (1 Kor. 13:11; 14:20) Neyi tutoñojokaña hayishina yaNzambi, tukusweja kushindamena hachinleji chetu kulonda chitulomboleña kwesekeja nachatoñojokañayi Nzambi. Komana tukweti yuma yayivulu yinateli kutukwasha kufuukulahu chiwahi kulonda tumutiyisheña Yehova kuwaha? Eña yidi kwoku. Kuhitila mukuzatisha chiwahi nshimbi niyishina yekala Mwizu daNzambi, tukwikala muntu “washikilamu chikupu, wadiloñesha chikupu kuzata nyidimu yayiwahi yejima.”—2 Tim. 3:16, 17. w18.06 19 ¶14; 20 ¶16-17

Muchishimu, Yesu wamwekesheli nindi kaSamariya watela kuyidizisha aYudeya chalumbuluka kukeña kwalala kwakukeña akwetu. (Luka 10:25-37) Hakwila nawu azati mudimu wayinkeliyi, atumbanji twaYesu ateleleli kuleka kudivwimba nichaambu chiyadiñawu nachu. Henohu kanda yayi mwiwulu, wayinkeli mudimu wakushimwina wunsahu “muYudeya nimuSamariya mwejima nikwakumina iseki dejima.” (Yil. 1:8) Yesu wadiña wayiloñeshela dehi chakuzata iwu mudimu kuhitila mukuyileja nindi amoneña yilwilu yayiwahi yekala nawantu akumatuña acheñi. Wamuhamekeli mukulumpi wamashidika wakwituña dacheñi hakumwekesha chikuhwelelu. (Mat. 8:5-10) Mumusumba wawu waNazaleta, Yesu washimwini Yehova chakwashiliyi antu akumatuña acheñi, adi neyi ntuluwa Fwenisa wakuZarefwati nimukwambumba Nayamani wakuSiriya. (Luka 4:25-27) Nawa Yesu hakuminini dakushimwina mumbanda kaSamariyaku, ilaña washakamini mumusumba waSamariya muloña antu akeñeleña kutiya nsañu yindi.—Yow. 4:21-24, 40. w18.06 10 ¶10-11

Kapostolu Pawulu wesekejeli chihandilu chanetu akwaKristu namushidika wunadimanyeki chikupu kuzuña njita mukamwihi nayitwa yakumakasa. Hela chochu, njita yitwazuñaña yakuspiritu, bayi yakumujimbaku. Ilaña, ayilumbu jetu ekala kwoku. Satana niandemoni himashidika akuluka yitembi mukwasa njita. Hakusambila, tunateli kufwa mutentu. Sweje-e atwansi akwaKristu anateli kutiya woma. Anateli kukuhwelela ñahi nawu akushinda yileñaleña yatama yakuspiritu? Walala wudi wakwila nawu, atwansi anateli kushinda nawa anakushinda! Muloñadi? Muloña atambulaña “ñovu kufuma kudi Mwanta.” Hiyashindamenaña hohu hakutambula ñovu kudi Nzambiku, ilaña kudi yuma yikwawu yelañawu. Adiloñeshaña kwasa njita. Neyi chelañawu mashidika adiza chikupu, niwena adimanyekaña “yitwa yanjita yejima yafuma kudi Nzambi.” (Efwe. 6:10-12) Hampinji yashimwineñayi ichi chakutalilahu, hadaha Pawulu watoñojokeleña chadimanyekeleñawu mashidika awaRoma.—Yil. 28:16 w18.05 27 ¶1-2

Chuma chacheni chaleteshaña tuzateña mudimu wakushimwina hikumulemesha Yehova nikujilika Ijina dindi kudi antu. (Yow. 15:1, 8) Hela chochu kwila tujilika ijina daNzambi chikupu nehi. Dekala dajila dehi chadimu. Ilaña talenu chahosheliyi kaprofwetu Isaya nindi: “Yehova wamazaza diyi mukujilikaña.” (Isa. 8:13) Njila yimu mutwajilikilaña ijina daNzambi kubadika majina ejima hikukwasha amakwawu kulonda adijilikeña. Chakutalilahu, twahakwilañaku ijina daNzambi kukutwamba kwaSatana neyi tushimwinaña hayilwilu yayiwahi yekala naYehova nihankeñelu yindi kutalisha kudi antu. (Kutach. 3:1-5) Cheñi, twajilikaña ijina daNzambi neyi tuyikwasha antu mwiluña detu kwiluka nawu Yehova diyi watelela “kutambwila kulema, kalemesha niñovu.”—Chim. 4:11. w18.05 18 ¶3-4

Chuma chatachi chalema chikuletesha tutoñojoki kuzataku nyidimu yakuspiritu, hikumwekesha kusakilila kudi Yehova hakukeña kwindi niyuma yatwililayi. Enu atwansi, toñojokenu yuma yayinkayi Yehova. Wumi wenu, chikuhwelelu chimukweti, Bayibolu, chipompelu niyuma yimwachiñejaña kumbidi. Kutoñojoka kuzataku nyidimu yakuspiritu hinjila yimu yakumwekeshelamu kusakilila kudi Nzambi haniyi yuma yayinkayi nawa yikuyileñela kuswina kwakwihi nayena. Chuma chamuchiyedi chidi chakwila nawu chimwatachika kuzata nyidimu yakuspiritu, Yehova wukutachika kuchinda nyidimu yenu yayiwahi. Nawa chumichi chikuyikwasha kuswina kwakwihi nayena. Kapostolu Pawulu wakanini nindi: “Nzambi waloña nawa hakavulamena mudimu wenu nikukeña kumwakeñeli ijina dindiku.” (Heb. 6:10) Bayi mutoñojoka nenu muchidi atwansi kutoñojoka kuzataku nyidimu yakuspirituku. Kwila mutoñojoka hayuma yimukela nikutachika kuzatilahu nehi?—Fwi. 1:10, 11. w18.04 26 ¶5-6

Antu adiña muRoma, ashakamineña nawakwaKristu akusambila, adivwimbileña nakudimona nawu diwu eluka nshimbi, eluka kusompa nawa asubuka. Ilaña, ñovu nikulema kwaWanta wawaRoma akwimwekesheleleña hadi anduñu. Mpinji yimu, antu akushika kuma pesenti 30 amwituña adiña anduñu. Chakadi nikujina, antu niakwaKristu ahosheleña nankashi hawuduñu nihakusubuka. Nyikanda yasonekeliyi kapostolu Pawulu yahosha nankashi hakusubuka. Hela chochu, bayi neyi yahosheleña hansañu yakusubuka kwakeñeleñawu antu mwituña hayina mpinjiku. Pawulu niakwawu akwaKristu hiyayileña kudi anyuuli nakulomba lusesa kulonda ekali asubukaku, ilaña azatileña nañovu kukwasha antu amakwawu kulonda eluki nsañu yayiwahi yaWanta waNzambi nikuyileja kulema kwefutu danyiloña dahaniniyi Yesu Kristu. Pawulu wayilejeli amanakwindi akwakwitiya kunateli Kuwanawu kusubuka kwalala. w18.04 8 ¶1-2

Hawufuku wakwila kanda yafwi, Yesu wamulejeli kapostolu Petulu awa mazu adihewulu. Petulu wekalili chishimi muchipompelu chawakwaKristu akusambila. (Ñal. 2:9) Wakolesheli amanakwindi muloña wakuhamuka kwamwekesheliyi haPentekosta nihanyima yaPentekosta. Kumakumishilu amudimu windi wakushimwina wazatiliyi mpinji yayilehi, wayisonekeleli akwawu akwaKristu. Walumbulwili nindi: “Nayisonekeli enu mazu antesha kulonda niyikoleshi nikuyileja wunsahu waweni chikupu nami ilu hiluwi lwaNzambi lwalala. Kolelenuña chikupu muluwi lwenilu.” (1 Pet. 5:12) Nyikanda yonenewa yasonekeliyi Petulu yinatwalekihu kukolesha akwaKristu ejima kufuma kunyima kushika niyinu mpinji yitudi kwakwihi netuña dadiha ditwatalilaña kwesekeja nachikaninu chaYehova.—2 Pet. 3:13. w18.04 17 ¶12-13

Chinakumwekana neyi antu kwejima akeñaña nankashi kwila yuma yinakukeñawu kwila hela kushakama kwesekeja nachinakukeñawu. Hela chochu, chapela wanyi hakwila yuma yejimiyi yizatiki. Hansañu jamapolitikisi amwiluña hela amwituña, antu amavulu atuñaña mazanvu adikaañaña hatooka nachiyuulu chimu, mazanvu akuhanjeka hansañu yakudikaña hela kuhakwilaku nlomboli wumu, mazanvu akeñaña kufumishahu nlomboli wudihu hela kumufumishahu chikupu nlomboli wudihu. Komana muniku kulwisha mwafumaña yuma yafwilañawu? Inehi, ilaña yuma yafumañamu hiyihuñu nikufwa. Yuma yejimiyi yamwekeshaña nawu mazu amoneneniwu Mwanta Solomoni kusoneka alala, akwila nawu: “Kudi mpinji yekalaña muntu nañovu namukwawu kulonda kumutamisha.” (Mukwa. 8:9) Munsona yalelu Yakoba washimwini chuma chinateli kutukwasha kwikala namuzañalu walala. Yehova, wahanini ilu lushimbi lwawanina, weluka chiwahi yuma yakeñekaña hakwila muntu yekali namuzañalu walala. Wayinkeli eyala namumbanda atachi yuma yejima yaletaña muzañalu, kubombelahu nikusubuka kwalala. w18.04 3 ¶1-3