February

Yesu wadiña nakutiyila antu wushona. Antu amweni chayikeñeliyi nawa etejeli nsañu yaWanta. Neyi ninetu tutiyilaña antu wushona, tukukwasha antu amavulu hampinji yitunakuyishimwina. Chumanyi chinateli kutukwasha kutiyila wushona antu itwashimwinaña? Twatela kufwikija neyi yetu ana antu itwawanaña mumudimu wakushimwina nawa twatela kuyilila yuma yinakukeñawu neyi chitwadi kukeña kutwilila ninetu. (Mat. 7:12) Toñojokenu hachuma chinakukeñayi muntu himuntu. Bayi tuzatishaña njila yoyimu hakutachika kuhanjeka nawantu ejima itwawanaña mumudimu wakushimwinaku. Ilaña twatela kwiluka kukala kudi namuntu himuntu nichinakutoñojokayi. Ilaña mwihulenu mukubabala kulonda mwiluki yuma yinakutoñojokayi niyakuhwelelayi. (Yish. 20:5) Neyi tuyihulaña antu malwihu, akutuleja chinakukeñelawu nsañu yayiwahi. Chitweluka kukala kwawu, tukuyitiyila wushona nawa tukuyikwasha hakukala kukwetiwu neyi cheliliyi Yesu.—Esekejenu 1 Kor. 9:19-23. w19.03 20 ¶2; 22 ¶8-9

Adama naEva amwekesheli nawu asakililili wanyi hayuma yejima yayilililiwu kudi Yehova. Wejima wetu tunateli kumwekesha netu mwafuukwiliwu mwadiña mwaluwa. Neyi tupapatishewa, twamwekeshaña netu twamukuhwelela Yehova netu diyi wukweti wuswa wakushaku nshimbi hayuma yayiwahi niyatama. Twamwekeshaña netu twamukeña nawa twamukuhwelela Tata yetu. Neyi tunapapatishewi twatela kutwalekahu kulondela nshimbi jaYehova bayi jetuku. Ambuña aNzambi amavulu anatwalekihu kulondela nshimbi. Ninenu munateli kwikala neyi wena neyi mutwalekahu kudiza Izu daNzambi, Bayibolu; kudikunda nawamanakwetu niahela nikulejaku antu amakwawu yuma yimunadizi hadi Tata yenu wukweti kukeña. (Heb. 10:24, 25) Neyi munakukeña kufuukulahu, tiyililenu kufumba kwaYehova kwatwinkañayi Mwizu dindi nikuloñesha kwindi. (Isa. 30:21) Dichi yuma yejima yimukwilaña yikukolaña.—Yish. 16: 20. w19.03 7 ¶17-18

Yehova watwinka yakuda yayivulu yakuspiritu. Chakutalilahu, twatambwilaña nshimbi hakupompa, mumagazini nihawebusayiti yetu. Komana mwatiyililahu dehi kumpanji, kutaña chibaaba, hela kutala broadcast nawa muhosha mumuchima wenu nenu: ‘Iyi nsañu yinankoleshi’? Tunateli kumusakilila ñahi Yehova? (Kol. 3:15) Njila yimu, hikumusakilila mpinji yejima mukulomba hayawaana yayiwahi yatwinkayi. Twamusakililaña cheñi Yehova neyi tuhembaña maluña etu akudifukwila nawunyonji. Twawahishaña Matala aWanta mpinji yejima nawa amanakwetu azatilaña kuyisanji ayihembaña chiwahi kulonda yibuli kukisika. Neyi tuhembaña Matala aWanta chiwahi anateli kushakama yaaka yayivulu nawa kukukeñekaña wanyi yuma yayivulu yakuloñesha nachu. Neyi twila mwenimu, tukwikalaña namali amavulu akuzatisha kumudimu wakutuña nikuloñesha Matala aWanta mukaayi kejima. w19.02 18 ¶17-18

Yoba watoñojokeleña hayileñaleña yaYehova yakuhayamisha. (Yoba 26:7, 8) Wahayamini chatoñojokeliyi heseki, iwulu, mavu nikudidima, ilaña wetejeli nindi welukili wanyi yuma yejima. Walemesheli cheñi mazu aYehova. Yoba wahosheli nindi: “Natudekaña mazu amukanwa kindi.” (Yoba 23:12) Yoba wamulemesheli nikumutiya Yehova woma muloña wadiña wamukeña. Wamukeñeli Tata yindi nawa wakeñeleña kumutiyisha kuwaha. Chafuminimu, Yoba wadikasili mumuchima windi kutwalekahu kwikala washinshika. Twatela kwila neyi cheliliyi Yoba. Tweluka yuma yayivulu yakuhayamisha hayileñaleña kubadika antu amumafuku aYoba. Nawa tudi naBayibolu yonenawu yinateli kutukwasha kwiluka chekalayi Yehova. Yuma yitwadizaña yinateli kutukwasha kumutiya Nzambi woma. Kumutiya Yehova woma nikumulemesha kukutuleñela kumukeña, kumwovwahila nikufwila kutwalekahu kwikala ashinshika.—Yoba 28:28. w19.02 5 ¶12

Kufuma tuhu kunyima, anyuuli jawantu anatwalekihu kukabisha antu jaYehova. Anateli kututwambila nawu tunakoñi ‘yuma yatama,’ ilaña muloña waweni wudi wakwila nawu ‘twovwahilaña Nzambi, bayi antuku.’ (Yil. 5:29) Anateli kutusawula, kutukasa hela kutuyandisha. Yehova wukutukwasha kubula kufuntisha katama nakatama hela chakwila anakutuvuloka nawa tukutwalekahu kwikala awunda. Shinshikenu chuma cheliliwu aHeberu asatu adiña muwunkoli, Hananiya, Mishayeli niAzariya. Amulumbulwililili mwanta mumesu awunda chuma chaletesha abuli kufukamina mukishi watuñiliyi. Dichi, etejeli chuma chidi chejima chadi kwitejayi Yehova kumwekana. (Dan. 3:1, 8-28) Tunateli kuyimbujola ñahi aHeberu asatu, neyi anatweseki nawu tufumpi kashinshi ketu kudi Nzambi? Twekala adizoza nawa twakuhwelela netu Yehova wukutukiña. (Mas. 118:7) Antu atwinkaña nyiloña twayakulaña mumesu awunda nawa nakalemesha. (1 Pet. 3:15) Nawa twakaanaña kwila chuma chidi chejima chinateli kuluwañesha wubwambu wetu naTata yetu. w19.02 10-11 ¶11-13

Tunateli kwikala ahamuka neyi tutoñojokaña hakuchiñeja kutukweti muloña wamulambu wefutu danyiloña daKristu. (Yow. 3:16; Efwe. 1:7) Munyilungu yakutwala kuChanukishu, tukweti kukooleka kwakumwekesha netu twalemesha ifutu danyiloña. Haniyi mpinji, londelenuña kutaña Bayibolu muMpinji yaChanukishu nawa toñojokenuña chikupu hayuma yamwekeni kwakwihi nakufwa kwaYesu. Dichi neyi tunapompi hamu kuKuda kwaMwanta kwaMelela, tukwiluka chikupu chalemena yifwikija yahaChanukishu nimulambu wemenañaku iyi yifwikija. Neyi twiluka yuma yinatwililiwu kudi Yesu niYehova nawa twiluka iyi yuma chiyatukwashaña nichiyakwashaña akwetu, tukutwalekahu kuchiñeja nawa chikutukwasha kuumika nakuhamuka kushika tuhu nikunsa. (Heb. 12:3) Twatiyaña kuwaha muloña Yesu, Kapristu Muneni wudi mwiwulu watuhoshelañaku, wuchidi kumwekesha iyi yilwilu. (Heb. 7:24, 25) Hakwila nawu tumwekesheña kusakilila, twatela kwanakanaña kufwa kwaYesu neyi chahosheliyi.—Luka 22:19, 20. w19.01 22 ¶8; 23-24 ¶10-11

Yehova watwinka kukooleka kwakumushimeka. Kwakulahu hakupompa kwekala hakachi ‘kamulambu wakuhameka’ nawa kwosi muntu wunateli kutulambwilaku. (Heb. 13:15) Komana Yehova wakeñaña nindi wejima wetu tuhaneña mulambu wowumu hela ñakwilu yoyimu? Inehi! Mwatela kumona kupompa neyi hiyakuda yimunakuda hamu nawamabwambu jenu. Fwikijenu neyi amabwambu jenu amuchipompelu ayitambika nawu mukadiili hamu yakuda nawa ayileja nawu mwakaloñeshihu yakuda yantesha. Munateli kwila ñahi? Munateli kwakama, ilaña mukuzata nañovu kulonda mwakasendihu yakuda yinateli kudiluñisha antu ejima. Yehova, Muntu Watutambikaña, watuloñeshela yakuda yayivulu nawa yayiwahi yitwadiluñishaña hakupompa. (Mas. 23:5; Mat. 24:45) Watiyaña kuwaha neyi tuhana chawaana chidi chejima chitunateli kutwesha. Dichi loñeshenuña chiwahi kulonda mwakuleñahu. Chimwela mwenimu, himukudaña hohu kumesa yaYehovaku, ilaña ninenu mukuhanaña chawaana chimukudiluñishilaña hamu nachipompelu. w19.01 8 ¶3; 13 ¶20

Mumafuku akunyima, kudifukula kwakutwamba mwabombeleli yilwilu yawuvumbi. (Hos. 4:13, 14) Kuhosha hohu walala, antu amavulu akeñeli nankashi kudifukula kwakutwamba kulonda akoñeleñamu nshidi. Ilaña hiyatwalekeleñahu kwikala namuzañaluku. Davidi wahosheli nindi: ‘Antu adifukwileña kudi anzambi adiña nakumona yuma yakala yayivulu.’ Cheñi, awa antu alambwileña anyanawu kudi anzambi akutwamba. (Isa. 57:5) Yehova watiyili kutama naniyi yilwilu yatama. (Yere. 7:31) Nimakonu, kudifukula kwakutwamba kakavulu kwetejaña yilwilu yawuvumbi, kushilahu wuvumbi weyala neyala hela mumbanda namumbanda. Ilaña nshimbi jamuBayibolu jahosha hakuhela yuma yatama jahimpa wanyi kufuma tuhu kunyima. (1 Kor. 6:18, 19) Neyi chimunakumona, antu ‘anakumona yuma yakala yayivulu.’ Dichi enu atwansi, mutiyililenuña Tata yenu wamwiwulu. Ilukenu nenu kumwovwahila Nzambi dichuma chachiwahi chimwatela kwila. Anukenu nenu yuma yafumaña mukukoña wuvumbi yatama chikupu kubadika kuwaha kwatiyañayi muntu hakapinji kantesha.—Ñal. 6:8. w18.12 27-28 ¶16-18

Neyi mukwaKristu wasumbula hela wasumbuka yela wuvumbi, mukwaKristu wunabuli kwila wuvumbi watela kufuukulahu chuma chatela kwilayi. Yesu wahosheli nindi wunabuli kwila wuvumbi wudi nawuswa wakufuukulahu kudiseña nawa wakasunuka kusumbula hela kusumbuka. (Mat. 19:9) Munjila yikwawu, wunabuli kwila wuvumbi nateli kumwanakena mukwawu. Neyi yela mwenimu, natamishi wanyi. Hoseya wamufuntishili Gomeri. Gomeri chafuntili kudi Hoseya, hakaaminihu cheñi neyala wacheñiku. Hadi mpinji yahitilihu, Hoseya ‘hakaamini’ naGomeriku. (Hos. 3:1-3) Ilaña mukuhita kwampinji, Hoseya watachikili kukaama nindi kulonda yamwekeshi chatambwilañayi Nzambi antu afuntaña kudi yena nikutwalekahu kwikala nawubwambu nawena. (Hos. 1:11; 3:4, 5) Iyi nsañu yinakutudizishadi makonu hawulu? Muntu wunabuli muloña neyi yafuukulahu kutwalekahu kwikala muwulu, wukumwekesha nindi namwanakeni mwinikwindi neyi yatachika kukaama nindi. (1 Kor. 7:3, 5) Neyi yela mwenimu, dikwila nawu najimi muloña wakudiseñelahu. Nkumininaku, adisumbula atela kuzata nañovu kulonda amoneña wulu neyi chawumonañayi Nzambi. w18.12 13 ¶13

Neyi tunakudiza, twatela kumona yuma neyi chayimonañayi Yehova muloña chikatukwasha kufuukulahu chiwahi kumbidi. Chikafumamu, neyi tumona kukala kunakukeñeka kufuukulahu swayi, twakadiloñesha nawa twakeluka chakukwimanisha. Yosefu chashikeneniyi kukaana hamudimbekeleñawu kudi ñoda Potifwari, wamwekesheli nindi wadiña nakutoñojoka chikupu chamonañayi Yehova wulu. (Kutach. 39:8, 9) Kubombelahu, chamwakwiliyi ñoda Potifwari nindi: “Nukutwesha ñahi kukoña chumichi chasweja kutama nakumuvulumuna Nzambi?” wamwekesheli nindi wadiña nakumona yuma neyi chayimonañayi Nzambi. Indochu etu? Mukwila ñahi neyi mukwenu mumwazatilaña yatachika kuyikenkamina? Indi kwiji ayitumina nsañu yinakuhosha hawuvumbi hela mwevulu wanzekesi hafoni yenu? Chikwikala chaswayi kushinda neyi tutoñojokañahu dehi nikumona yuma neyi chayimonañayi Yehova. w18.11 25 ¶13-14

Antu adiza ahoshaña nawu iyi vasi yatalisha mukwila nawu “Nukukiluka nakuzañalala mudi Mwanta; nukuhañana nakuzañalala mudi Nzambi.” Wejima wetu twatela kudizila kunawa mazu. Bayi neyi Yehova watuleja yuma yayiwahi hohuku, ilaña watulejaña nindi katataka yashikiji yikaninu yindi. Chakadi nikujina, nsañu yalema yaHabakuki yatulejaña kumukuhwelela Yehova. (Hab. 2:4) Tunateli kumukuhwelela nikukolesha wubwambu wetu naYehova neyi hohu (1) tulombaña mpinji yejima, kumuleja Yehova kwakama kwetu kwejima (2) kutoñojoka nankashi Hezu daYehova nikulondela chatulejañayi mukuloñesha kwindi (3) nikukuhwelela nakumuchiñilila Yehova. Dichuma cheliliyi Habakuki. Hela chakwila watachikili mukanda windi namazu achineñi, wawumanishili nachikuhwelelu nimuzañalu. Twatela kwila neyi chelili Habakuki hakwila nawu ninetu atukumbati kudi Yehova. Chumanyi chinateli kutukundeja mudinu ituña datama? w18.11 17 ¶18-19

Wunsahu wukwawu wunakumwekesha nawu Yehova wakeña akwaKristu alala, wudi wakwila nawu: Yena “wakeñeli nankashi kaayi chakwila watemesheli Mwanindi wumu hohu, kulonda muntu wejima wukumukuhwelela yakabuli kujilumuka, ilaña yakekali nawumi wahaya nyaaka.” (Yow. 3:16) Yesu niyena wamwekesheli kukeña hakuhana wumi windi kukoola etu. Iku kukeña kwatukoleshaña chikupu. Izu daNzambi datukana nawu “Lukadi” hela “yihuñu” “hijinateli kutwambula kukukeña kwaNzambi kwekala mudi Kristuku.” (Rom. 8:35, 38, 39) Neyi tunakuhita mukukala kunakutuzeyesha muyitoñojoka hela kumujimba, kukeña kwatukeñayi Kristu kukutwinka ñovu yakuumika. (2 Kor. 5:14) Kukeña kwaYesu kukweti ñovu yinateli kutukwasha kubula kuzeya hela chakwila tunakumona kweseka kudi neyi wubanji, ikabisha, chineñi hela kwakama. w18.09 14 ¶8-9

Hakwila nawu tutwalekihu kwenda muchalala, twatela kwiteja nikwovwahila yuma yejima yatulejañayi Yehova. Twatela kutwamijaku chalala muchihandilu chetu nikwila yuma kwesekeja nayishina yamuBayibolu. Kufwana Davidi wafuukwilihu kwenda muchalala, twatela kuzata nañovu kulonda tutwalekihu kwenda muchalala chaNzambi. Neyi kuzata nañovu nehi, tunateli kutachika kutoñojoka yuma yitwalekeli hakwiluka chalala, hadaha tunateli kutachika kuyila cheñi. Ilaña, twatela kutwalekahu kwenda muchalala mpinji yejima. Tweluka netu kwosi chalala chitunateli kudiwulaku. Ilaña twatela kwendaña “muchalala chejima.” (Yow. 16:13) Hakwila nawu tubuli kufuma muchalala, twatela kuzatisha chiwahi mpinji yetu. Neyi kubabala nehi, tunateli kutachika kumbila mpinji yeneni kuyuma yitwakeña, yisela, kuya haintaneti hela kutala TV. Hela chakwila iyi yuma yatama wanyi, ilaña tunateli kutachika kukisila mpinji yitwazatishileña hakudiza nkawetu niyuma yikwawu yakuspiritu kwililamu iyi yuma. w18.11 10 ¶7-8

Neyi chihandilu chetu chihimpika mukukasumwisha, tunateli kuneña nikwakama. (Yish. 12:25) Chinateli kutukalila kwiteja netu yuma yinahimpiki. Mumpinji yamuchidiwu, tunateli ñahi ‘kumwenesha muchima wetu nakuduñumika nzo-o?’ (Mas. 131:1-3) Hela chakwila tunakuhita mukukala kwasweja makonu, ninetu tunateli kwikala ‘nakuwunda kwaNzambi’ kwahembaña yitoñojoka yetu. (Fwi. 4:6, 7) Dichi neyi tumukuhwelela Yehova hampinji yitunaneñi, kuwunda kwaNzambi kunateli kutukolesha kutwalekahu kumukalakela nikutukwasha kubula kuzeya. Kubombela hakuwundisha nyichima yetu, spiritu yaNzambi yinateli kutukwasha kuwana nsona jinateli kutukwasha kutwamijaku yuma yakuspiritu.—Yow. 14:26, 27. w18.10 27 ¶2; 28 ¶5, 8

Chumanyi chinaluwañeshi antu chikupu? Kutwamba! Hikuhosha yuma yinabuli kwikala yalala kulonda wudimbi muntu. Hinyi watachikili kutwamba? Yesu Kristu wamuteneni “Diyabolu” nindi “tata yakutwamba.” (Yow. 8:44) Mpinjinyi yatachikiliyi kutwamba? Watachikili kutwamba mwitempa daEdeni hadi yaaka yayivulu yinahitihu. Eyala namumbanda atachi, aAdama naEva adiluñishileña muParadisa yayinkeliwu kudi Nleñi yawu. Ilaña Diyabolu wenjili nakuyiluwañesha. Welukili nindi Nzambi wayikaanishili eyala namumbanda kuda “[kumutondu] wakwiluka nachu niyayiwahi niyatama,” muloña neyi adaku akufwa. Hela chochu, Satana wazatishili kapela nakumuleja Eva nindi: “Chalala, himwakafwaku [kutwamba kwindi kwatachi]; muloña Nzambi neluki nindi ifuku dimukudya, mesu enu akatona, mwakekala neyi chadiyi Nzambi, mwakeluka niyayiwahi niyatama.”—Kutach. 2:15-17; 3:1-5. w18.10 6 ¶1-2

Hakwila nawu twikali atooka munyichima, twatela kwikala awunyonji mukachi kamuchima nimuyitoñojoka. Twatela kwikala nayitoñojoka yitooka kulonda twikali nawubwambu wakadi majilu naYehova. (2 Kor. 4:2; 1 Tim. 1:5) Hanu dinu, antu atooka munyichima “[akumumona] Nzambi” ñahi henohu ‘kwosi muntu wukumona Nzambi ahandaku’? (Kwid. 33:20) Izu dachiGiriki dabalumunawu nawu “kumona” datalisha mukwila nawu “kumona nayitoñojoka, kwiluka.” Antu amumonaña Nzambi ‘namesu amuchima’ hiyantu amwiluka chikupu, embujolaña yilwilu yindi. (Efwes. 1:18) Kubombela hakwiluka yilwilu yaNzambi, akwakudifukula alala anateli “[kumumona] Nzambi” kuhitila mukushinshika hayuma yayililañayi. (Yoba 42:5) Ashinshikaña cheñi ‘mesu awu amuchima’ hayuma yayiwahi yashiikayi Nzambi antu anakuzata nañovu kulonda atwalekihu kwikala atooka nikumuzatila nakashinshi. w18.09 20 ¶13, 15-16

Kwila yuma yitweluka netu yaloña mwafumaña yuma yayiwahi. Hela chakwila maana ashindamena hakwiluka, hiyashindamena hayuma yitwelukaku, ilaña ashindamena hayuma yitwafuukulaña. Anzenkeneni niwena amwekeshaña maana. Anzenkeneni amwekeshaña maanawu kuhitila mukuloñeshela chadimu yakuda munoña. (Yish. 30:24, 25) Kristu, “maana aNzambi,” mpinji yejima welaña yuma yamuzañaleshaña Tata yindi. (1 Kor. 1:24; Yow. 8:29) Nzambi weluka chaambu chekala hakufuukula yuma yayiwahi nikuzatisha yuma yitunafuukuli. Nawa wakiswilaña antu ejima adizoza nawa atwalekañahu kuumika nakwila yuma yelukawu nawu yalala. (Mat. 7:21-23) Dichi, twalekenuhu kwikala adizoza kulonda muchipompelu mwikali kunuñañana. Kuzatisha yuma yitweluka netu diyalala, chakeñekaña mpinji nikudiwunjika, ilaña hakwila twikali namuzañalu chayinu mpinji nihaya nyaaka chiña twikala adizoza. w18.09 7 ¶18

Nleñi wakeñeleña nindi antu awanina akazatileña hamu nindi hakushikija nkeñelu yindi. Hela chakwila antu makonu hiyawaninaku, antu ashinshika anateli kuzatila hamu naYehova mafuku ejima. Chakutalilahu, twekalaña “akwakukalakala hamu naNzambi” kuhitila mukushimwina nsañu yayiwahi yaWanta windi nikwilisha atumbanji. (1 Kor. 3:5-9) Tukweti kukooleka chikupu kwakukalakela hamu naNleñi wabadika ñovu mumudimu walema! Hela chochu, bayi neyi tunateli hohu kukalakela hamu naYehova kuhitila mukushimwina nikwilisha atumbanjiku. Njila jikwawu mutunateli kukalakela hamu naNzambi, hikuhitila mukukwasha amwitala detu, akwetu akwakudifukula, kumwekesha chisambu, kudihana kukalakalaku nyidimu yaWanta yakutuña nikudikita chikupu munyidimu yaYehova yikwawu. (Kol. 3:23) Hela chochu, bayi mwesekejaña chimunateli kumukalakela Yehova nachinateli kumukalakelawu amakwawuku. Mwatela kwanukaña nenu antu ejima ambuka muyaaka, kukoola kumujimba, chihandilu niwuswa wukwetiwu. w18.08 23 ¶1-2

Yehova chamulejeliyi Habakuki nindi wakakula malwihu indi. Yihuñu yindi yadiña kwakwihi nakumana. Nzambi wamulejeli kaprofwetu nindi: “Wundaku, nkuhweleli. Nakakwakula hela chakwila nakalaba!” Yehova wamwanukishili nindi Watoñola dehi mpinji yakushikija yikaninu Yindi. Wamukolesheli Habakuki kutwalekahu kuchiñilila mpinji yakashikijayi yikaninu Yindi. Chafuminimu, yuma yakeñeleñayi kaprofwetu yazatikili. Neyi tudiwunjikaña nakumuchiñilila Yehova nikutiyilila yuma yatulejañayi tukuwundisha nyichima yetu hela chakwila tunakuhita mukukala kwakuvulu. Yesu wamwekesheli nindi twatela kumukuhwelela Yehova Mukwakuhemba Mpinji Muneni, chatela tusheña maana “[hampinji] hela yilaaka” yabula kushimunayi Nzambi. (Yil. 1:7) Dichi, bayi tuleka kuhembelela nakudizoza, nachikuhwelelu nikudiwunjikaku, tuzatisheña mpinji yetu chiwahi kumukalakela Yehova hanakumini ñovu jetu jejima.—Maku 13:35-37; Ñal. 6:9. w18.11 16 ¶13-14

Petulu niakwawu aYudeya adiñaku mumpinji yindi, akuhweleleli nawu aJentili adiña amajilu. Hela chochu, kudi yuma yamuletesheli Petulu yahimpi yitoñojoka yindi. Chakutalilahu, Petulu wamweni chimwenu muchihayamisha. (Yil. 10:9-16) Kufwana Petulu, twatela kudishinshikaña nikwiteja neyi anatukwashi hakwila nawu tumoni yilwilu yitukweti yinateli kuleta chaambu. Chumanyi chikwawu chitwatela kwila? Neyi twikala nakukeña, hitukwikala nachaambuku. (2 Kor. 6:11-13) Komana mwekala nachaaku chakudikunda hohu nawantu ekowa denu, chisemwa, ituña hela ahoshaña idimi denu? Neyi dimu, tachikenu kudikunda nawantu ejima. Kwila mutambikaku antu afuma kuyitachi yacheñi kuzata nenu mumudimu wakushimwina hela kuyitambika kwitala denu kulonda mudiili hamu nawu yakuda nehi? (Yil. 16:14, 15) Neyi mwila mwenimu, mukudikeña chikupu wumu namukwawu chakwila himukwikalaña nachaambuku. w18.08 9 ¶3, 6; 10 ¶7

A Yinsahu amakwawu aleka wanyi yilwilu yamukaayi. Chahañanañawu hayawija niyilwilu yamwekeshañawu hiyatelela kudi akwaKristuku. Nyevulu yawu yashañawu haintaneti nimazu asonekañawu haintaneti amwekeshaña nawu hiyantu abula kwikala akwaKristu. Dichi anateli kuluwañesha akwawu anakufwila kutwalekahu kwikala nayilwilu yayiwahi hakachi kawantu jaYehova. (1 Pet. 2:11, 12) Kaayi kanakutiyakesha nankashi “yuma yafwilaña mujimba, yuma yafwilaña mesu nikudisamba nayuma yikwetiyi muntu.” (1 Yow. 2:16) Hela chochu, chineli tudi antu jaYehova, atukonkomwenaña “kukaana yilwilu yakubula kumwakama Nzambi nikufwila kwayuma yamukaayi, nakutoñojoka mwamaana, nakulondela mwaya kuloña nikumwekesha yilwilu yakumwakama Nzambi muyinu nshakaminu yamakonu.” (Tit. 2:12) Nhoshelu yetu, chitwadaña, chitwanwaña, nvwalilu nimmwekenu yetu, nyidimu yetu hela yuma yejima yitwelaña yatela yimwekaneña kudi antu nawu twadihana kudi Yehova. w18.07 25 ¶13-14

Neyi tutalaña mesu etu achifwikija kudi Yehova, tukwiteja wanyi yilwilu yawakwetu kutuhilisha hela kuluwañesha wubwambu wetu nayena. Chumichi chalema nankashi sweje-e neyi tudi nanyidimu mukuloñesha kwaNzambi neyi chadiña Mosi. Dichi wejima wetu ‘twatela kwikala nawoma nikuzaala hampinji yitunakufwila kutambwila wamwinu,’ twatela kwanuka netu Yehova hekala nanjila yimu yatusompeshelañamuku. (Fwi. 2:12) Ilaña, wakeñaña etu kudishaku kwesekeja nanyidimu yitukweti. (Luka 12:48) Ilaña neyi twamukeña Yehova nankashi, kwosi chuma chikutudimbwisha hela kutwambula kukukeña kwindiku. (Mas. 119:165; Rom. 8:37-39) Muyinu mpinji yakala, tutwalekihu kufumbula mesu etu nakutala kudi Yena “washakama mumawulu,” kulonda tutwalekihu kwila nkeñelu yindi. (Mas. 123:1) Bayi twiteja wubwambu wetu naYehova awuluwañeshi nayilwilu yatama yawakwetuku. w18.07 16 ¶19-20

Twazañalalaña hakutiya nyidimu yawantu jaYehova chiyinakuyilaku hambidi. Mu 2017 twalombweli atudizi aBayibolu kubadika ha 10,000,000. Chumichi chinakumwekesha hatooka nawu ambuña aNzambi anakwiteja chejeji chawu kutoñeka. Nawa toñojokenu cheñi hadi mamiliyoni awantu akweti mpwila enjili kuChanukishu. Adizili kukeña kwamwekesheliyi Nzambi hakuhana ifutu danyiloña. (1 Yow. 4:9) Kunyeñumuka kaayi kejima, antu jaYehova ahoshaña madimi ashiyashana. Hela chochu, chumichi hichatukañeshaña kumushimeka Tata yetu, Yehova mukunuñañanaku. (Chim. 7:9) Hichikweti muloña nedimi ditwahoshaña hela kwiluña kutwashakamañaku, tunateli kutoñeka “neyi yejeji mukaayi.” (Fwi. 2:15) Kuvula kutunakumona, kunuñañana kutwadiluñishaña niyilwilu yayiwahi yitwekala nayu yaletaña kalemesha kudi Yehova. w18.06 21 ¶1-3

Yesu chayakwiliyi chamwekesheli nawu washili maana hayuma yakuspiritu chakwila nzala yalekeli kutiyakana. Kushimwina, hela kudi mumbanda kaSamariya, kwadiña hikwila nkeñelu yaTata yindi nawa kwadiña neyi kwiji diyi yakuda yindi. (Yow. 4:32-34) Yakoba naYowanu hiyatiyishishili ichi chikumaku. Hahitileñawu naYesu mumusumba waSamariya, apostolu akeñeleña kukamina mumukala waSamariya. Ilaña aSamariya akaanini kuyitambwila, dichi Yakoba naYowanu ahilili nawa akeñeleña nawu atambiki kesi kufuma mwiwulu kulonda kajilumuni mukala wejima. Yesu wayizuwilili chikupu. (Luka 9:51-56) Tuneluki wanyi neyi dichadi kuhoshawu aYakoba naYowanu neyi chakwila antu akaanini kuyitambwila adiña amumusumba wawu waÑaliliya. Chinamwekani neyi chaambu dichayiletesheli azuweña nankashi. Chelili aSamariya atambwili nsañu yayiwahi hampinji yadiñawu mukampeni yakushimwina, kapostolu Yowanu watela watiyili nsonyi chazuwiliyi swayi.—Yil. 8:14, 25. w18.06 10-11 ¶12-13

Neyi chalala chamuBayibolu tunachikasi chikupu hamujimba, tukulondelaña yuma yidimu nawa tukuhoshaña walala mpinji yejima. Muloñadi chitwatela kutondolwela kutwamba? Muloña kutwamba dichitwa chasweja kuzatishayi Satana. Kutwamba kwatamishaña muntu wunakutwamba niwunakulejayi. (Yow. 8:44) Twatela kuzata nañovu kulonda tubuleña kutwamba. (Efwe. 4:25) Ilaña chapela wanyi. Abigail wudi nayaaka 18 wahosheli nindi: “Chapela wanyi kuhosha walala mpinji yejima, sweje-e neyi wunamoni neyi chiwatwamba wukufuma mukukala.” Muloñadi chafwilañayi kuhosha walala mpinji yejima? Wahosheli nindi: “Neyi nihosha walala, nukwikala nachinleji chitooka kudi Yehova. Nawa anvwali niamabwambu jami akunkuhwelelaña.” Victoria wudi nayaaka 23, wahosheli nindi: “Neyi wuhosha walala nawa wuhakwilaku yuma yiwakuhwelela, akwenu anateli kukuhela. Ilaña mwafumaña yuma yayiwahi: Wukwikala nachikuhwelelu, wukuswina kwakwihi naYehova nawa akukulemeshaña kudi antu akukeña.” Mwamweni, chalema kutwalekahu ‘kukasa mushipi wachalala mumbunda’ mpinji yejima. w18.05 28 ¶3, 5

Wejima wetu twatela kutwalekahu kwikala atona chineli yuma yinakutaminaku muyinu mpinji yakala. Yehova wakaleta kukuma hampinji yatelela nawa yatoñolayi dehi. (Mat. 24:42-44) Ilaña chayinu mpinji, twatela kuduñumika nikwikala atona mpinji yejima. Tañenuña Izu daNzambi mafuku ejima nikwikala adiloñesha kulonda mulombeña. (1 Pet. 4:7) Dizilenuña kudi amanakwetu niahela adi namuzañalu muloña wakwikala atona nikwiteja chejeji chawu kutoñeka. Zatenuña nyidimu yinateli kuyikolesha nawa dikundenuña nawantu anateli kuyikolesha. Chumichi chikuyiletela muzañalu chikupu nawa mukumona nenu mafuku anakwenda swayi-swayi. (Efwe. 5:16) Chikuhwelelu chetu chakolaña hakwiluka netu kubula kuwanina kwetu kwatukañeshaña wanyi kumukalakela Yehova. Dichi, musakililenuña Yehova hakuhana “amayala kwikala yawaana,” aeluda muchipompelu. (Efwe. 4:8, 11, 12) Neyi anayendeli kudi aeluda, zatishenu iku kukooleka kulonda mudizili kumaanawu nikuzatisha wukwashu wawu. w18.06 24-25 ¶15-18

Yesu wayilejeli apostolu kwikala mukukeña kwindi nikutwalekahu “kushakama mukukeña kwindi.” Muloñadi? Muloña twatela kuumika hakwila nawu tutwalekihu kwikala atumbanji twaKristu alala chaaka nichaaka. Yesu wakonkomweneni hakuumika chazatishiliyi izu dakwila nawu “kushakama” kapampa kakavulu mumazu antesha ekala haYowanu 15:4-10. Twamwekeshaña ñahi netu tunakukeña kushakama mukukeña kwaKristu nikutwalekahu kwikala amabwambu jindi? Kuhitila mukulondela nshimbi jaYesu. Munjila yikwawu, Yesu nakuhosha nindi, ‘Ñovwahilenuña.’ Yesu watulejaña kwila yuma yelileñayi, muloña wabombelelihu nindi: “Neyi chochinovwahilaña nshimbi jaTata nawa natwalekahu kushakama mukukeña kwindi.” Twatela kumwimbujola Yesu. (Yow. 13:15) Neyi tulondela lushimbi lwaYesu lwakuya nakushimwina, dikwila nawu ninetu tunakumwekesha netu twamukeña Nzambi muloña nshimbi jaYesu jamwekeshaña chatoñojokañayi Tata yindi. (Mat. 17:5; Yow. 8:28) Neyi tumumwekeshelaña Yehova niYesu kukeña, niwena akutukeña. w18.05 18 ¶5-7

Atumpululu atela kufuukulahu hakutaña shikola, kwiñila mudimu niyuma yikwawu. Neyi muneluki kumunakuya, chikuyikalila wanyi kutonda njila yakuya. Munjila yoyimu, neyi muneluki yuma yimukela kumbidi chikuyikalilaña wanyi kufuukula. Neyi mutoñojokaña yuma yimukela kumbidi henohu muchidi atwansi, chikayipelela kuyila. Atwansi amavulu muyipompelu kunyeñumuka kaayi kejima akeñekaña kuyihameka chikupu. Adihana chikupu kumukalakela Yehova nawa afwilaña kuzata nyidimu yakuspiritu. Atwansi wenawa adiluñishaña chikupu muchihandilu iku anakulondelaña nshimbi jaYehova muyuma yejima yelañawu. Munabombeli kukwasha chisaka. Solomoni wasonekeli nindi: “Mukuhweleli Yehova namuchima weyi wejima . . . Mwitijaña Yehova mwejima muwukwilaña, niyena wakakwolwelaña njila jeyi.” (Yish. 3:5, 6) Yehova walemesha chikupu atwansi amuchipompelu chawakwaKristu, wayikeña nankashi nawa wayihembaña, wayikwashaña nikuyikiswila. w18.04 26 ¶7; 27 ¶9

Kapostolu Yowanu wadiña chishimi muchipompelu chawakwaKristu akusambila. Nsañu Yayiwahi yasonekeliyi hamudimu waYesu yinakoleshi akwaKristu kufuma tuhu kunyima kushika nimakonu. Hakachi kanyikanda yaNsañu Yayiwahi, mumukanda waYowanu hohu dimwekala mazu ahosheliyi Yesu akwila nawu kukeña dichinjikijilu chakuyilukilaku atumbanji twindi alala. (Yow. 13:35) Munyikanda yisatu yaYowanu mwekala cheñi nsañu yikwawu yalema. Neyi tunaneñi hamuloña wanshidi, komana twazañalalaña wanyi neyi tutaña netu “mashi aYesu . . . atutookeshaña kunshidi jejima”? (1 Yow. 1:7) Nawa neyi tutwalekahu kudinka nyiloña, komana twakokeleshewaña wanyi nikusakilila neyi tutaña netu “Nzambi wabadika nyichima yetu”? (1 Yow. 3:20) Yowanu hohu nkawindi diyi wasonekeli nindi “Nzambi hikukeña.” (1 Yow. 4:8, 16) Mukanda windi wamuchiyedi niwamuchisatu wahamekaña akwaKristu “anakwenda muchalala.”—2 Yow 4; 3 Yow 3, 4. w18.04 18 ¶14-15