April

Indi etu? Komana twatoñojokaña yitoñojoka yaNzambi tahindi yitoñojoka yamukanu kaayi? Chakadi nikujina, twazataña nañovu kulonda twikali nayilwilu yakeñañayi Nzambi. Indi yitoñojoka yetu yekala ñahi? Komana twatoñojokaña nikumona yuma neyi chayimonañayi Yehova? Kwila mwenimu kwakeñekaña kuzata nañovu. Kwambukaku, hichakeñekaña kuzata nañovu hakwila nawu twikali nayitoñojoka yamukaayiku, muloña spiritu yamukaayi yinatandi kwejima. (Efwe. 2:2) Kubombelahu, chineli mukaayi munenzali yilwilu yakudikeña muntu yomweni, ninetu tunateli kufwila kwikala nayitoñojoka yamukaayi. Mwamweni, kutoñojoka neyi chatoñojokañayi Yehova kwakeñekaña kuzata nañovu, ilaña chapela nankashi muntu kwikala nayitoñojoka yamukaayi. Neyi twiteja kaayi kuwumba yitoñojoka yetu, tukwikala nayilwilu yakudikeña etu aweni niyilwilu yakukeña kudimena. (Maku 7:21, 22) Dichi, chalema nankashi kwikala ‘nayitoñojoka yaNzambi,’ bayi ‘yitoñojoka yawantuku.’ w18.11 18 ¶1; 19 ¶3-4

Yesu watela wakoleli chikupu chelili Yehova yamwekeshi nindi wamwiluka hahosheliyi kapampa kasatu hampinji yashiyashana iku wudi mwiwulu. Chelili hohu Yesu amupapatishi muKaloña Yodana, Yehova wahosheli awa mazu adi hewulu. Chinamwekani hatooka nawu Yowanu Mupapatishi hohu diyi muntu mukwawu watiyiliku awa mazu. Chikwashalili chaaka chimu henohu Yesu kanda yafwi, apostolu indi asatu atiyili Yehova chahosheliyi hadi Yesu nindi: “Iwu diyi Mwanami, inakeña, inatiyaña kuwaha. Mutiyililenu.” (Mat. 17:5) Nkumininaku, henohu kunashali hohu mafuku antesha hakwila nawu Yesu yafwi, Yehova wahosheli cheñi naMwanindi iku wudi mwiwulu. (Yow. 12:28) Hela chakwila Yesu welukili nindi akamujiha munjila yakusawuka, akamutwambila nawu mukwakutukana, walombeli nindi nkeñelu yaYehova yizatiki bayi nkeñelu yindiku. (Mat. 26:39, 42) “Womikili hamutondu wakuyandishila, wadiwili nsonyi,” hakeñeleña nindi amwiluki kudi kaayiku, ilaña amwiluki kudi Tata yindi hohu.—Heb. 12:2. w18.07 10-11 ¶15-16

Hanyima yakwila Yesu nanakani dehi Kuda kwaMwanta kwaMelela, wamwekesheli kuhamuka chikupu. Munjilanyi? Yesu wetejeli kwila nkeñelu yaTata yindi hela chakwila welukili nindi neyi yela mwenimu akumujaha muloña wakumutwambila nawu wahoshaña mazu akasawuntu. (Mat. 26:65, 66) Yesu watwalekelihu kwikala washinshika kulonda yalemeshi ijina daYehova, kuhakwilaku chiyuulu chaNzambi nikwenzununa njila yakupulukilamu antu akubalumuka mumuchima. Cheñi, Yesu wayikwashileña atumbanji twindi kwiluka kukala kwakayimwekena. Yesu wamwekesheli cheñi kuhamuka hakubula kwakama hakukala kwindi, ilaña washili muchima hakukwasha apostolu indi ashinshika. Chanukishu cheliliyi hanyima yakwila namuhañi dehi Yudasi, chanukishileña ana enjileña nakwikala atumbanji twindi awayishewa yuma yayiwahi yafumaña mumashi apwekesheliyi Yesu nikwikala muchitiyañenu chachiha.—1 Kor. 10:16, 17. w19.01 22 ¶7-8

Tata yindi wahosheli kufuma mwiwulu nindi: “Nadilemesha dehi, inakudilemesha nawa cheñi.” Yesu wadiña nakwakama muloña wamudimu weneni wadiñayi nawu wakutwalekahu kwikala washinshika kudi Yehova. Yesu welukili nindi akumukabisha nankashi nawa akumujaha munjila yatama. (Mat. 26:38) Chuma chalema chakeñeleñayi Yesu kwila, hikulemesha ijina daTata yindi. Yesu amwinkeli muloña nawu wadiña nakutukana, dichi wadiña nakwakama nindi kufwa kwindi keña kuleta kasawuntu hadi Nzambi. Ninetu twatela kwakamena neyi cheliliyi Yesu hakasawuntu kaletañawu hejina daYehova. Hadaha ninetu atwilaña chatama neyi chamwililiwu Yesu. Indi kwiji tunateli kuluwankana nansañu yakutwamba yinakutandishawu antu atuhela. Tunateli kutachika kutoñojoka haniyi nsañu chiyinakuleta kasawuntu hejina daYehova. Hampinji yamuchidiwu, mazu aYehova anateli kutukundeja chikupu. Yehova wukutwalekahu kulemesha ijina dindi.—Mas. 94:22, 23; Isa. 65:17. w19.03 11-12 ¶14-16

Atumbanji twaYesu akuhweleleli wanyi nsañu yatiyileñawu. Yesu, muntu akuhweleleliwu nawu wukufuntisha wanta muIsarela, wahosheli nindi keña yakabakani nikufwa. Kapostolu Petulu wahosheli nindi: “Mwanta bayi wuhosha chuma chamuchidiwuku; iyi yuma hiyakakumwekena hela hantiku.” Yesu wamwakwili nindi: “Eyi Satana, hitaku kunyima yami! Eyi wudi chuma chakunhukesha, muloña eyi watoñojokaña yitoñojoka yawantu bayi yitoñojoka yaNzambiku.” (Mat. 16: 23; Yil. 1:6) Yesu chahosheliyi awa mazu, wamwekesheli chaambu chekala hayitoñojoka yaNzambi nayitoñojoka yidi mukaayi kanakuyuulawu kudi Satana. (1 Yow. 5:19) Petulu wamwekesheli yitoñojoka yamukaayi yakudikeña muntu yomweni. Ilaña Yesu welukili nindi Tata yindi wadiña nayitoñojoka yambukaku. Mazu amwakwiliyi Petulu amwekeshaña nawu, Yesu wakaanini yitoñojoka yamukaayi nakwiteja yitoñojoka yaYehova. w18.11 18 ¶1-2

Toñojokenu yuma yamonañayi Yehova hadi antu amavulu neyi anapompi kuKuda kwaMwanta kwaMelela. Hakuminaña hohu dakushinshika hakuvula kwawantu anenziku; ilaña washinshikaña hadi muntu wejima wunapompi. Chakutalilahu, wamonaña antu ashinshika enzaña yaaka yejima. Hakachi kawu amakwawu enzaña hela chakwila anakuyikabisha nankashi. Amakwawu hiyenzaña mpinji yejima kukupompa kukwawuku, ilaña amonaña nawu Chanukishu chalema nankashi. Yehova washinshikaña cheñi antu anenzi kuChanukishu katachi, hamwaha hamuloña wakwila anakukeña kwiluka yuma yamwekanaña. Chakadi nikujina, Yehova watiyaña kuwaha hakumona antu amavulu anapompi kuChanukishu. (Luka 22:19) Hela chochu, chuma chaleteshaña antu enzeña kuchanukishu dichuma chasweja kulema kudi Yehova. Komana twafwilaña kutudizisha kudi Yehova nikuloñesha kunakuzatishayi?—Isa. 30:20; Yow. 6:45. w19.01 26 ¶1-3

Yesu wadihanini kulonda yafwili atumbanji twindi hohuku, ilaña washili cheñi muchima hayuma yakeñeleñawu. Chakutalilahu, wadiña nakuwanika nawatumbanji twindi hela chakwila nazeyi kumujimba hela muyitoñojoka. (Luka 22:39-46) Washili muchima hayuma yatela kwinkayi antu amakwawu bayi yinateli kumwinkawuku. (Mat. 20:28) Twekala muchisaka chawakwaKristu alala nawa twatiyaña kuwaha kutambikaku antu amakwawu kulonda tudibombi nawu. Hela chochu, twakeñaña nankashi kukwasha “akwetu akwakwitiya” aleka dehi kushimwina nikupompa. (Ñal. 6:10) Twamwekeshaña netu twayikeña neyi tuyikoleshaña netu enzeña kukupompa, sweje-e kuChanukishu. Kufwana Yehova niYesu, twatiyaña kuwaha neyi muntu wazeya yafunta kudi Yehova.—Mat. 18:14. w19.01 29 ¶12, 14; 30 ¶15

Hampinji yatachikiliyi Chanukishu chakufwa kwindi Yesu wazatishili hohu dinkendi nivinyu yadiña haChipandakenu. Yesu walejeli apostolu indi nindi iyi yuma yadiña nakwimenaku mujimba windi nimashi indi, ahanineñayi hanyijimba yawu. Apostolu atela ahayamini wanyi chaloñesheliyi ichi chawija chalema munjila yapela. Muloñadi? Mutukweji twafuminihu hampinji yendeleliyi amabwambu jindi, Lazaru, Mata niMariya, Yesu watachikili kutañisha. Mata wadiña hohu, ilaña washili maana hakumuloñeshela yakuda yayivulu. Yesu chamweniyi chumichi, wamufumbili Mata nakumuleja nindi hikwakeñekeleña yakuda yayivuluku. (Luka 10:40-42) Chikwashalili maora antesha nakufwa kwindi, Yesu wazatishili kuna kufumba kwindi. Waloñesheli yakuda yantesha haChanukishu. w19.01 20-21 ¶3-4

Yehova Wamulemesheli Yesu munjila yambukaku kuhitila mukumusañula “nakumwinka chifulu chahewulu” nikumwinka chuma chiyabulilihu kutambwila antu amakwawu kushika nihayina mpinji, wumi wakafwaña. (Fwi. 2:9; 1 Tim. 6:16) Muloña wakashinshi kindi, Yesu amwilukili munjila yambukaku chikupu. Chumanyi chikutukwasha kutondolwelela mpuhu yamukanu kaayi? Anukenuña nenu mpinji yejima Yehova welukaña ambuña indi ashinshika nawa kakavulu wayifwetaña munjila yinabuli kukuhwelelawu. Hinyi wuneluki yuma yitunabuli kukuhwelela yitukatambwila kumbidi? Ilaña chayinu mpinji, chitunakutwalekahu kuumika makabi nikweseka mukanu kaayi katama, mpinji yejima twanukeña netu kanu kaayi kanakuhita. (1 Yow. 2:17) Tata yetu wukweti kukeña, Yehova, ‘waloña hakavulamena nyidimu yetu nikukeña kutwakeña ijina dindiku.’—Heb. 6:10. w18.07 11 ¶17-18

Yesu wadiña nakwakamena hakunuñañana hampinji yadiileñayi kuda kwakukumishaku nawapostolu indi. Halombeleñayi hamu nawu, washimwini nindi atumbanji twindi ekali wumu neyi chekalayi yena naTata yindi wumu. Neyi ekala anuñañana chadi kuhana wunsahu nawu Yehova diyi wamutemesheli Yesu hamaseki nakwila nkeñelu yaNzambi. Kukeña dichinjikijilu chiyadi kuyilukilawu nawu hiyatumbanji alala aYesu nawa kwadi kuyikwasha kwikala anuñañana. (Yow. 13:34, 35) Yesu welili chiwahi chakonkomweneniyi hakunuñañana. Wamweni kubula kunuñañana hakachi kawapostolu indi, chidi neyi hampinji yadiileñayi hamu nawu kuda kwakukumishaku. Neyi chichamwekeni hakusambila, ntaadi yavulumukili nawu “eluki wadiña muneni chikupu hakachi kawu.” (Luka 22:24-27; Maku 9:33, 34) Mpinji yikwawu cheñi Yakoba naYowana amulombeli Yesu nawu yakayinki yifulu muWanta windi.—Maku 10:35-40. w18.06 8 ¶1-2

Yehova wakeñaña nindi adisumbula atwalekihu kwikala adikeña chikupu. (Mat. 19:3-6) Muntu neyi yela wujila, himuloña weneni chikupu muloña namwekeshi kukeña wanyi. Dimuloña waweni Nshimbi yamu 7 yekala hakachi kaNshimbi 10, yakaanishili kwila wujila. (Kuhit. 5:18) Neyi muntu yela wujila ‘hinshidi kudi Nzambi’ nawa nateli kumuneñesha mwinikwindi. (Kutach. 39:7-9) Muntu wukweti mwinikwindi wuneli wujila nateli kuneña hadi yaaka yayivulu. Yehova wakeñaña nindi anyana ekaleña namuzañalu nawa akiñewa. Yehova walejeli anvwali kukeñela anyanawu yuma yakumujimba nikuyikwasha kulonda ekali nawubwambu wawuwahi naNzambi. Anvwali azatileña nañovu kukwasha anyanawu kwiluka Nshimbi jaYehova nikumukeña. (Kuhit. 6:6-9; 7:13) Anvwali hiyateleleli kumona anyanawu neyi amukunkulwayi hela kuyila chatamaku, ilaña ateleleli kuyimona neyi hiwuswana, chawana chalema kufuma kudi Yehova.—Mas. 127:3. w19.02 21 ¶5, 7

Kutoñojoka hankisu yakamukiswilawu kudi Nzambi kwamukwashili Yoba kutwalekahu kwikala nakashinshi. Yoba wakuhweleleli nindi Nzambi welukili nindi wadiña washinshika. Hela chakwila wahitileña muyihuñu, Yoba welukili chikupu nindi Yehova wakamukiswila. Ichi chikuhwelelu chamukwashili kutwalekahu kuhemba kashinshi kindi. Yehova watiyili kuwaha nakashinshi kaYoba, dichi Wamukiswilili chikupu henohu kanda yekali wawanina. (Yoba 42:12-17; Yak. 5:11) Yoba wakatambwila cheñi nkisu jabadika kumbidi. Nzambi yetu wahimpa wanyi. (Mal. 3:6) Neyi twiluka netu walemesha kashinshi ketu, tukutwalekahu kuchiñeja. (1 Tes. 5:8, 9) Mpinji yikwawu munateli kutoñojoka nenu kwosi muntu wunakutwalekahu kwikala nakashinshi, ilaña mwatela kwanukaña nenu himudi nkawenuku. Mukwikala hakachi kawantu amavulu ashinshika anatwalekihu kwikala nakashinshi mukaayi kejima. Mukekala cheñi hakachi kawamayala niambanda adi nachikuhwelelu atwalekelihu kuhemba kashinshi kawu hela chakwila ayichiniishileña nawu akuyijaha.—Heb. 11:36-38; 12:1. w19.02 7 ¶15-16

Chineli Chanukishu chinakumi dehi, twatela kudihula awa malwihu: ‘Nateli kumwimbujola ñahi Yesu hakumwekesha kukeña? Komana natoñojokaña hayuma yakeñañawu akwetu akwakudifukula tahindi natoñojokaña hohu hakuditiyisha ami aweni kuwaha? Komana nakeñaña amanakwetu niahela kwila yuma yikubula kutweshawu, tahindi neluka hakumina ñovu yawu? Tumwimbujolenuña Yesu mpinji yejima ‘nikudakamena.’ Hitwakatwalekahu kwanakana Chanukishu chakufwa kwaKristuku. Yesu neyi ‘nenzi’ hampinji yalukadi lwasweja wakapompesha antu indi “atondewa” akashalahu nakuyitwala mwiwulu nawa twakaleka kwanakana Chanukishu. (1 Kor. 11:26; Mat. 24:31) Nihampinji yitukaleka kwanakana Chanukishu, antu jaYehova akanukaña ichi chanukishu nawu hichinjikijilu chakudizoza, kuhamuka nikukeña kwabulahu dehi kumwekesha kudi muntu wejima. w19.01 25 ¶17-19

Shinshikenu kukola kumujimba chikwamwekeshaña mujimba wetu chiwalema mukachi. Chatachi, hakwila nawu twikala akola kumujimba, twatela kutonda yakuda yayiwahi nawa twatela kwolola mujimba mpinji yejima. Munjila yoyimu, hakwila twikali akola kuspiritu, twatela kutañaña Bayibolu, nyikanda yashindamena haBayibolu mpinji yejima nikumwekesha nawu twamukuhwelela Yehova. Kwila mwenimu munabombeli kuzatisha yuma yitwadizaña nikulejaku akwetu yuma yitwakuhwelela. (Rom. 10:8-10; Yak. 2:26) Chamuchiyedi, kwesekeja nanochu chitwamwekanaña hanji, tunateli kutoñojoka netu twakola kumujimba hela chakwila twakata. Munjila yoyimu, kwesekeja nayuma yakuspiritu yitwelaña, tunateli kutoñojoka netu chikuhwelelu chetu chakola, ilaña yitoñojoka yatama yinateli kwikala mudi etu. (1 Kor. 10:12; Yak. 1:14, 15) Twatela kwanuka netu Satana wakeñaña kutuluwañesha nayitoñojoka yindi. w19.01 15 ¶4-5

Twatela kudihula etu aweni netu: ‘Inakwila chochimu? Inakumwekesha wushona neyi chamwekesheliyi kaSamariya?’ (Luka 10:30-35) ‘Komana namwekeshaña luwi nikuzataku nyidimu yayiwahi nakukwasha antu anakukabakana? Chakutalilahu, kwila nikwashaku akwetu akwaKristu akula dehi, anfwila, nianyana akweti atata jawu abulaña kupompa nehi? Komana kwila ‘nikundejaku antu ananeñi’ nehi?’ (1 Tes. 5:14; Yak. 1:27) Neyi tutiyilaña antu amakwawu luwi, twekalaña namuzañalu wafumaña mukuhana. Kubombelahu, tweluka netu tunakumutiyisha Yehova kuwaha. (Yil. 20:35; Heb. 13:16) Mwanta Davidi wahosheli hadi muntu wakamenaña akwawu nindi: “Yehova wakamuhemba, wakamuhemba wamumi, wakakooleka munu mwituña.” (Mas. 41:1, 2) Neyi tumwekesha luwi niwushona kudi akwetu, Yehova niyena wakatutiyila luwi nawa twakekala namuzañalu haya nyaaka.—Yak. 2:13. w18.09 19 ¶11-12

Muhela Yoshiko amulejeli nsañu yamuneñesheli. Ndotolu wamulejeli nindi kunashali hohu tukweji twantesha nakufwa. Welili ñahi? Yoshiko wanukili nsona yakeñeliyi, yidi munsona yalelu. Wamulejeli ndotolu nindi wadiña nakutiya woma wanyi muloña Yehova wamukwatili kuchikasa. Mazu akukundeja ekala haniyi vasi, amukwashili iwu muhela kumukuhwelela Yehova chikupu. Iyi vasi yinateli kutukwasha ninetu kwikala awunda neyi tudi mukukala. Hakwila nawu twiluki chiyinateli kutukwasha, tushinshikenu chaletesheli Nzambi yamuleji Isaya kusoneka awa mazu. Hakusambila, Yehova wamulejeli Isaya kusoneka awa mazu kulonda akundeji aYudeya ayileña muwunkoli muBabiloni. Hela chochu, bayi neyi Yehova wasonekeleli hohu aYudeya ayileña muwunkoli awa mazu akukundejaku, ilaña antu ejima kushilahu ninetu. (Isa. 40:8; Rom. 15:4) Makonu tunakushakama ‘mumpinji jakala,’ dichi tunakukeñeka kutukundeja namazu ekala haIsaya.—2 Tim. 3:1. w19.01 2 ¶1-2

Muloña eluka nawu hela anadambuli, achidi adisumbula. Neyi ambuka, wejima wawu akumonaña kukala kwakuvulu. Kapostolu Pawulu washimwini muloña wuyatela kutwalekelahu kushakama hamu. Wasonekeli nindi: “Iyala wabula kwitiya najilikewi namuloña wañodindi, nimumbanda wabula kwitiya najilikewi namuloña wamanakwetu; neyi nehi, anyanenu akwikala amajilu, ilaña ichi ajila.” (1 Kor. 7:14) AkwaKristu ashinshika amavulu anatwalekihu kushakama nawenikwawu abula kwitiya hela chakwila anakumona kukala kwasweja. Atiyili kuwaha chafuukwiliwu kwila mwenimu muloña chaletesheli mwinikwawu kwinza muchalala. (1 Kor. 7:16; 1 Pet. 3:1, 2) Makonu kunyeñumuka kaayi kejima, muyipompelu yawakwaKristu mudi antu adi nawulu wawuwahi. Munateli kuwana antu amavulu adisumbula muchipompelu chenu adi namuzañalu. Mwekala amanakwetu ashinshika akeña añodi jawu nawa añodi jawu akeña anfumu jawu, wejima wawu ayedi alemesha wulu.—Heb. 13:4. w18.12 14 ¶18-19

Edeni yalumbuluka nawu “Kuwaha,” nawa chalala idi itempa dadiña dadiwahi. Mwadiña yakuda yayivulu, iluña dadiwahi nawa antu adiña nakuhema nawatunyama amavulu. (Kutach. 1:29-31) Pa·raʹdei·sos hizu dachiGiriki dabalumunawu kufuma muchiHeberu nawu “itempa.” Mukanda waCyclopaedia waM’Clintock niStrong wahosha hapa·raʹdei·sos nawu: “Iluña deneni, dadiwahi, mwosi yuma yaletaña wubanji, mwosi majilu, mudi nyitondu yayiwahi yayilehi yasoñaña nyikabu, dazowaña namenji afumaña mutuloña twatuwahi, kuyikumu yatuloña kwahemenaña anchila hela anyikoku nawa idi hiluña dadiwahi dadiña nakutoñojokayi mukwakwenda wahosheleña idimi daGreek.” (Esekejenu Kutachika 2:15, 16.) Nzambi wayishili aAdama naEva muyina paradisa, ilaña hiyatwalekelihu kushakamamuku. Amwovwahilili Nzambi wanyi. Dichi, wena kushilahu tuhu nianyanawu ajimbesheli Paradisa. (Kutach. 3:23, 24) Hela chakwila mwashakamineña antu wanyi, hadaha idi itempa datwalekelihu kushika nimpinji yaDibaji daNowa. w18.12 3-4 ¶3-5

Anvwali akeñaña kukulisha anyanawu munjila yayiwahi. Neyi atondahu kulondela yuma yayidizishiliwu kudi anvwali jawu, akufuukulahu kwila yuma yayiwahi yakabula kuditoñeshawu. Chikafumamu, hiyakamonaña kukala nikwakamaku. Kufwana nvwali wamuwahi, Yehova wakeñaña nindi anyanindi ekali nachihandilu chachiwahi. (Isa. 48:18) Dichi, watwinkaña yishina yatukwashaña kwikala nayilwilu yayiwahi nichitunateli kushakamaña nawakwetu. Muniyi njila, watulejaña nindi tutoñojokeña neyi chatoñojokañayi nikwila yuma yakeñañayi. Nshimbi jindi hijatukañeshañaku, ilaña jatukwashaña kutoñojoka munjila yayiwahi. (Mas. 92:5; Yish. 2:1-5; Isa. 55:9) Jatukwashaña kwila yuma yinateli kutuletela muzañalu nikwikala antu amawahi. (Mas. 1:2, 3) Mwamweni, kutoñojoka neyi chatoñojokañayi Yehova kwakuwahi nawa kwakwashaña! w18.11 19-20 ¶7-8

Hakwila nawu tutwalekihu kwenda muchalala, bayi twiteja antu amakwawu kutuluwañeshaku. Hampinji yitwatachikili kwenda muchalala, twalekeli kudikunda nawantaña nimabwambu abula kwikala aYinsahu. Amakwawu atiyili kuwaha ilaña amakwawu atiyili kutama. Antaña jetu, akwetu mutwazatilaña niakwetu akashikola, anateli kutuleja nawu twanakaneña nawu hamu mafuku akusemuka nimafuku akunooka. Tunateli kutondolwela ñahi ikakeja dachisemwa nikwanakana mafuku akunooka amuneñeshaña Yehova? Hakwila twili mwenimu, twatela kumonaña yumiyi neyi chayimonañayi Yehova. Kutaña nyikanda yetu yahosha kwafumini mafuku akunooka, yinateli kutukwasha. Neyi tutoñojokaña muloña waweni Nsona chiyakaanishila kwanakana mafuku akunooka, twelukaña netu tunakwenda munjila “yetejañayi Mwanta.” (Efwe. 5:10) Kumukuhwelela Yehova niIzu dindi dachalala kukutukwasha kubula “kutiya antu woma.”—Yish. 29:25. w18.11 11 ¶10, 12

Neyi chihandilu chetu chihimpika mukukasumwisha, tunateli kutachika kutoñojoka hohu hakukala kutukweti. Chumichi chadi kumumwekena Yosefu. Ilaña womikili nakumwinka Yehova chuma chinateli kukiswilayi. Hela chakwila wadiña mukaleya, Yosefu wazatili nañovu nyidimu yejima yamwinkeleñawu kudi mukulumpi wawakwakuhemba kaleya neyi chochazatileñayi kudi Potifwari. (Kutach. 39:21, 22) Kufwana Yosefu, ninetu tunateli kwikala mukukala kutunateli kukañanya kumanisha. Hela chochu, neyi tudiwunjika nikuzata nañovu hakukala kutukweti muchihandilu, tukumwinka Yehova chuma chikukiswilayi. (Mas. 37:5) Mwamweni, mpinji yikwawu tunateli ‘kuluwankana,’ ilaña hitunateli ‘kudihombaku’ neyi chahosheliyi kapostolu Pawulu. (2 Kor. 4:8; tth.) Awa mazu aPawulu anateli kuzatika nikudi etu, sweje-e neyi tutwalekahu kusha muchima hakushimwina. w18.10 29 ¶11, 13

Mwatiyaña ñahi neyi muntu imweluka hela imwalemesha yajimbala ijina denu, sweje-e dinu neyi nakañanyi kuyiluka? Munateli kutiya kutama. Muloñadi? Muloña wejima wetu twakeñaña kutwiluka. China chitwakeñaña netu atwiluki hitwafwilaña hohu netu atwilukiku, ilaña twakeñaña netu eluki chitwekala niyuma yituneli. (Kuch. 11:16; Yoba 31:6) Neyi chekala kufwila kukwawu kutwekala naku, kufwila kutwafwilaña netu atuhameki kunateli kuhambakana nikutuluwañesha muloña wakubula kuwanina. Kunateli kutuleñela kusweja kukeña kutwiluka munjila yabula kutelela. Kaayi kaSatana kakeñaña antu asweji kutumbakana nikuyiluka kulonda abuli kwiluka muntu wuyatela kwilukawu nawa itwatela kudifukulaku, Tata yetu wamwiwulu Yehova Nzambi.—Chim. 4:11. w18.07 7 ¶1-2

Hitwahayamaña hakwiluka netu Satana niandemoni jindi anakuluwañesha antu adi hayifulu yamaneni ‘kuhoshaña makudiku.’ (1 Tim. 4:1, 2) Dichelañawu niantu akweti mabizininsi amaneni, alandishaña yuma yafwana nikuzatisha tufuta kulonda adileña antu mali kuhitila mukutiyakesha iyi yuma. Sweje-e dinu akulumpi jansakililu akweti muloña chikupu hansañu yamakudi awu muloña akaleñela antu ayikuhwelelaña kubula kwikala nawumi kumbidi. Neyi muntu yeteja ntañishilu yakutwamba nawa yatachika kwila yuma yakaanishayi Nzambi, chinateli kumuleñela kubula kwikala nawumi wahaya nyaaka. (Hos. 4:9) Yesu welukili nindi akulumpi jansakililu amumafuku indi niwena adiña naniwu muloña wakudimba antu. Wayilejeli hatooka nindi: “Oyihuñu yimwakamona enu ansoneki nawaFwarisi, anfwikiji! muloña mwazambukaña kaluñalwiji nikuhita mumaluña oma kulonda mubalumuni muntu wumu yekali kaYudeya nawa neyi nekali dehi kaYudeya, mwamwilishaña kwikala watama nankashi neyi enu kulonda yekali watelela kuya muGehena [kujilumuka kahaya nyaaka.]” (Mat. 23:15, tth) Yesu wayilejeli awa akulumpi jansakililu chakubula kuhita mumbadi nindi adiña nakuluwañesha. Mwalala ‘afumini kudi tata yawu Diyabolu, mukwakujaha antu.’—Yow. 8:44. w18.10 7 ¶5-6

Yesu watalishili mudihi chahosheliyi awa mazu? Watwalekelihu cheñi nindi: “Zañalalenu nawa tiyenu kuwaha chikupu, muloña wufwetu wenu weneni mwiwulu, dichakabishiliwu niatuprofwetu adiñaku henohu enu kanda muvwaliki.” (Mat. 5:12) Apostolu chayivupoleliwu yikoti nikuyileja nawu aleki kushimwina, “afumini kudi akwaSanihedirini iku anazañalali.” Hela chochu, bayi neyi azañaleli muloña wayikoti yayeteliwuku. Ilaña azañaleli “muloña ayisawili hamuloña wakuzatisha ijina [daYesu.]” (Yil. 5:41) Munanu mafuku, antu jaYehova omikaña namuzañalu neyi anakuyikabisha muloña wejina daYesu hela neyi anakuhita mukweseka kwasweja. (Yak. 1:2-4) Kufwana apostolu, hitwazañalalaña nayihuñu yitwamonañaku. Ilaña neyi tutwalekahu kwikala ashinshika kudi Nzambi mumpinji yakweseka, Yehova wukutukwasha kuumika chikupu. Neyi twikala namuzañalu wafumaña kudi “Nzambi wamuzañalu,” tunateli kwikala namuzañalu hela chakwila anakutukabisha muloña wayuma yitwakuhwelela, kutudimbulula muchisaka, yikatu hela muloña wawushinakaji.—1 Tim. 1:11. w18.09 21 ¶18-20

Hamuloña wakwila antu amavulu muyinu “mpinji jakala” anakumona kukala kwamboka-mboka, amavulu atoñojokaña hohu jakudijaha. (2 Tim. 3:1-5) Kusandujola kumu kunakumwekesha nawu antu akubadika ha 800,000 anakudijaha hachaaka-hachaaka. Dikwila nawu hadi masekondi 40 muntu wumu chiña yadijahi. Chawushona, niakwaKristu amakwawu anadijahi. Hela chakwila amanakwetu niahela hiyakeñaña nawu afwiku, amavulu makonu ahitaña mukukala kwasweja, dichi akeñekaña kuyituña mukukeña. Amakwawu ayikabishaña nikuyiseha. Amakwawu niwena ayihosholaña nikuyifukejela kunyidimu. Hadaha azeyaña muloña wakuzata mpinji yeneni hela muloña wakufwila kumanisha nyidimu yinayinkiwu. Hela chochu amakwawu amonaña kukala kwasweja muyisaka yawu, hadaha ayikabishaña kudi enikwawu abula kwitiya. Muloña wayumiyi nikukala kukwawu, antu amavulu muchipompelu azeyaña muyitoñojoka nikumujimba. w18.09 13 ¶3, 5

Anvwali akwaKristu akalakelaña hamu naYehova neyi akwashaña anyanawu kuzata nyidimu yaYehova. Anvwali amavulu dichinakwilawu. Nawa anyanawu amavulu eñila mumudimu wampinji yejima nawa akalakelaña kwakulehi nanyikala yawu. Amakwawu hiyamishonali, amakwawu hiyapayiniya akalakelaña kudi kukaankila kwawakwakushimwina nawa amakwawu akalakelaña haBeteli. Muloña wakuleha kwamaluña kwakalakelañawu, hiyadikundaña nayisaka yawu neyi chadikundileñawu hakusambilaku. Hela chochu, anvwali adihana ayikoleshaña anyanawu kutwalekahu kuumika mumudimu wawu. Muloñadi? Muloña azañalalaña chikupu hakwiluka nawu anyanawu anakutwamijaku Wanta. Hadaha anvwali amavulu atoñojokaña neyi chatoñojokeleñayi Hana, wahosheli nindi ‘namwinki’ Yehova mwanindi Samweli. Awa anvwali eluka nawu hikukooleka chikupu kukalakela hamu naYehova. Hiyakeñaña yuma yacheñiku.—1 Sam. 1:28. w18.08 24 ¶4

Yesu wahosheli wanyi nindi wakakañanya kwiñila. Wahosheli cheñi nindi: “Enu atuzweñi mudi namuzañalu, muloña Wanta waNzambi wenu.” (Luka 6:20) Ilaña ichi hichatalisha mukwila nawu atuzweñi ejima ayikiswililiku. Nawa hiyalondeleleña yuma yatañishileñayi Yesuku. Atuzweñi amavulu atiyilili wanyi kunsañu yindi. Ilaña chikuma chidi chakwila nawu, Hitwatela kusompeshaña wubwambu wukwetiyi muntu naYehova muloña wamaheta akwetiyiku. Tukweti amanakwetu niahela aheta niatuzweñi amukalakelaña Yehova namuchima wawu wejima. Nsona yalejaña antu aheta nawu bayi “[akuhwelelaña] mumaheta anoñañaku, ilaña akuhweleleña mudi Nzambi.” (1 Tim. 6:17-19) Cheñi, Izu daNzambi dasoñamishaña antu jaNzambi ejima, aheta niatuzweñi kubula kusweja kukeña mali. (1 Tim. 6:9, 10) Dichi, neyi tuyimonaña amanakwetu neyi chayimonañayi Yehova, hitukuyisompeshaña kushindamena hamaheta akwetiwu hela hawuzweñi wawuku. w18.08 10-11 ¶11-12

Mwamweni twatela kumusakilila Yehova hakututonda kwikala antu jindi. Twamwekeshaña netu twekalaña antu jindi, chitwadihana namuchima wumu kudi yena. Twakaanaña kwila yuma yatama. Nawa twakeña nikulemesha akwetu akwakudifukula, tweluka netu niwena hiyantu jambala jaYehova. (Rom. 12:10) Bayibolu yashiika nawu: “Yehova wukuumba antu indi wanyi.” (Mas. 94:14) Hela chakwila tukumona kukala kwamuchidinyi, Yehova hakutwishiyaku. Hela kufwa hikunateli kutwambula kukukeña kwatukeñayi Yehovaku. (Rom. 8:38, 39) “Dichi neyi tunakuhanda hela tunafwi, tudi antu jaYehova.” (Rom. 14:8) Twatalilaña mpinji yakasañulayi Yehova amabwambu jindi ashinshika afwa dehi. (Mat. 22:32) Nimakonu twadiluñishaña nkisu yayivulu. Neyi chahoshaña Bayibolu, “Muza wukweti Nzambi yawu Yehova wunakooleki, diwu antu anatondiyi kwikala wuswana [windi.]”—Mas. 33:12. w18.07 26 ¶18-19

Antu amakwawu atoñojokaña nawu chineli kutondahu yuma yimu muchihandilu yidi neyi shikola hela mudimu hichisenda chamuntu yomweni, atela kwikala asubuka kutonda yuma yinayitiyishi kuwaha chakala hohu chinleji chawu chinayiteji. Hadaha anukaña mazu aPawulu ayisonekeleliyi akwaKristu akuKorinda kutalisha hayakuda nindi: “Muloñadi kusubuka kwami chiyakukusompeshelawu nachinleji chamuchima chamuntu wacheñi?” (1 Kor. 10:29) Hela chakwila twasubuka kutondahu kwila iyi yuma, ilaña twatela kwanuka netu kusubuka kwetu kukweti mwakukumina nawa yuma yejima yitukufuukula kwila munateli kufuma yuma yayiwahi hela yatama. Dichaletesheli Pawulu kuhosha mazu adi munsona yalelu. Awa mazu atukwashaña kwiluka nawu kudi yuma yalema yitwatela kwila kubadika yuma yitwakeñaña neyi hitukuzatisha kusubuka kutukweti muyuma yejima yitwelaña muchihandilu. w18.04 10 ¶10

Mukwakristu nateli kudifukula kudi Yehova iku nakukoña yuma yatama kumbadi. (Yuda 11) Chakutalilahu, muntu wumu nateli kwikala nayilwilu yakufwila kwila wuvumbi, lwisu hela kuhembela mukwawu mukwaKristu nkunyi. (1 Yow. 2:15-17; 3:15) Yitoñojoka yamuchidiwu yinateli kuleñela muntu kukoña nshidi. Hampinji yoyimu, muntu nateli kwikala wadikita mumudimu wakushimwina nikupompa mpinji yejima. Antu amakwawu hiyanateli kwiluka yitoñojoka niyilwilu yetuku, ilaña Yehova wamonaña yuma yejima nawa weluka neyi twadihana kwikala kukabadi kindi namuchima wejima hela nehi. (Yere. 17:9, 10) Hela chochu, Yehova washikenaña dakutulekaku wanyi. Neyi muntu yafuma kudi Nzambi, Yehova wamulejaña nindi: ‘Funtaku cheñi kudami.’ Sweje-e neyi tunakulwisha nakuzeyazeya kwetu, Yehova wakeñaña nindi tutondolweleña yuma yatama. (Isa. 55:7) Neyi twikala kukabadi kindi, niyena wukwikala kukabadi ketu kuhitila mukutwinka ñovu niyitoñojoka ‘yakwikala mwanta’ hanshidi jetu.—Kutach. 4:7. w18.07 18 ¶5-6