July

Tunakushakama “mumpinji jakala” nawa chihandilu chikusweja kutaminaku chikupu henohu Yehova kanda yafumishihu yuma yatama nakuleta kuwunda kwalala hanu hamaseki. (2 Tim. 3:1) Dichi twatela kudihula netu ‘Kudihi kunatalaña nawa kwinateli kutambwila wunlomboli?’ Yaaka yayivulu yinahitihu, ñimbi yamasamu washimwini chuma chacheni chitwatela kutalila mesu etu kudi Yehova kulonda yatukwashi mumpinji yitunakaankili. (Mas. 123:1-4) Wesekejeli chitwatalaña kudi Yehova nachatalañayi ñamba kudi nkaka yindi. Ñimbi yamasamu watalishili mudihi? Ñamba hakuminaña dakushindamena hadi nkaka yindi mukumukiña nikumukeñela hohu yakudaku, ilaña washaña cheñi maana kuyuma yakeñañayi nkaka yindi nindi yazateña nikulondela yuma yakeñañayi. Munjila yoyimu, ninetu twatela kusandujola Mwizu daNzambi mafuku ejima kulonda twilukeña yuma yakeñañayi Yehova nindi twileña nikulondelamu. Iyi diyi njila yimu hohu mutwatela kukuhwelela netu Yehova nateli kutukwasha mumpinji yitunakaankili. w18.07 12 ¶1-2

Yesu wadiña nakuhosha hakukuulika kufuma muwuduñu wasweja niyuma yakabishaña antu, dikwila nawu ‘wuduñu wanshidi.’ (Yow. 8:34) Nshidi yinateli kutuleñela kwila yuma yatama nikutukañesha kwila yuma yayiwahi hela kutukañesha kwila yuma yitukutwesha kwila. Chumichi chinakumwekesha nawu tudi anduñu anshidi nawa yuma yafumañamu hichineñi, kukata, kukabakana nikufwa. (Rom. 6:23) Twakadiluñisha hohu kusubuka kwalala kwadiluñishiliwu anvwali jetu akusambila neyi yuma yatuleñelaña kukoña nshidi anayifumishihu dehi. Mazu aYesu akwila nawu “neyi mukutwalekahu kuhemba mazu ami,” amwekeshaña nawu kudi yuma yitwatela kwila hela twatela kwikala namwakukumina hakwila yatufumishi muwuduñu. (Yow. 8:31) Chineli twekala akwaKristu adihana, twadibonda etu aweni nakutondahu kwikala mumpaanda yantañishilu yaKristu nikwikala atumbanji twindi. (Mat. 16:24) Neyi chakanayi Yesu, twakekala asubuka chikupu neyi mulambu windi wefutu danyiloña wunatachiki kuzatika chikupu hadetu. w18.04 7 ¶14-16

Yehova wakamenaña chatiyañawu antu jindi hela chakwila atoñojokaña mwaluwa mpinji yikwawu. Shinshikenu chuma cheliliyi Yona. Nzambi wamutumini iwu kaprofwetu kuya nakushimuna mazu awunsompeshi kudi antu amuNineve. Chabalumukiliwu mumuchima, Nzambi wayijilumwini wanyi. Ilaña, Yona watiyili kutama chabuliliyi kuyijilumuna. “Wazuwili” muloña wakwila wuprofwetu windi wakwila nawu Nineve akumujilumuna washikijeweli wanyi. Ilaña Yehova wadiwunjikili nawa wamukwashili Yona kuhimpa yitoñojoka yindi. (Yona 3:10–4:11) Mukuhita kwampinji, Yona welukili mwatalishiliyi Yehova nawa amuzatishili kusoneka mukanda windi kulonda wutukwashi. (Rom. 15:4) Yehova chakamenañayi antu jindi chatukwashaña kwiluka nawu watiyilaña ambuña indi wushona. Weluka yihuñu nimakabi itwahitañamu hamuntu-hamuntu. Weluka yuma yitwatoñojokaña, yuma yekala mumuchima wetu nikuzeyazeya kwetu. Nawa “[hakatuleka] kuhita mukweseka kwabadika kweseka [kutunateli] kuumikaku.” (1 Kor. 10:13) Awa mazu atukundejaña chikupu. w19.03 16 ¶6-7

Munshimbi jaMosi akulumpi adiña nakusompa nyiloña yakundamini kukudifukula kudi Yehova, kubula kutiyashana nikudijaha. Talenu iyi yakutalilahu. Neyi kaIsarela yajaha mukwawu, hiyashikeneneña kumujahaku. Akulumpi amumusumba akeñakeñeleña wunsahu kulonda eluki neyi nakoñi muloña wakumujahilahu. (Kuhit. 19:2-7, 11-13) Akulumpi adiña cheñi nakusompa nyiloña yejima yamwekeneña, kushilahu ninyiloña yamuwulu. (Kwid. 21:35; Kuhit. 22:13-19) Neyi aIsarela atwalekahu kwovwahila Nshimbi nawa akulumpi niwena asompa chiwahi nyiloña, antu ejima adiña nakushakama chiwahi nawa aleteleña kalemesha kudi Yehova. (Lev. 20:7, 8; Isa. 48:17, 18) Muloña wachumichi, Yehova wamonaña yuma yejima yitwelaña muchihandilu. Wakeñaña nindi tuyikeñi akwetu nikushakama nawu chiwahi. Nawa watiyaña yuma yitwahoshaña niyitwelaña hela chakwila tudi kwankawetu. w19.02 23 ¶16-18

Neyi tunaneñi, chekalaña chakala kwikala adizoza. Tunateli kuyihosha akwetu mazu atama hela kuyila chatama. Neyi mwaneñahu dehi, shinshikenu chuma cheliliyi Yesu. Chikwashalili tukweji twantesha nakufwa, Yesu wadineñeli chikupu. Welukili nindi wukukabakana nankashi nawa akumujaha. (Yow. 3:14, 15; Ñal. 3:13) Tukweji twahitilihu henohu kanda yafwi, wahosheli nindi waneñeli nankashi. (Luka 12:50) Nawa chikwashalili mafuku antesha nakufwa, Yesu wahosheli nindi: “Innakudishona.” Awa mazu anakumwekesha nawu wadiña wadizoza nawa wamwovwahilili Nzambi. (Yow. 12:27, 28) Chashikili mpinji, Yesu wahamukili nakudihana yomweni kudi ayilumbu jaNzambi, amujahili munjila yatama nawa yakasawuntu. Hela chakwila waneñeli nikukabakana, Yesu wadizozeli nakwila nkeñelu yaNzambi. Chakadi nikujina, tunateli kuhosha netu Yesu wadizozeli hampinji yaneñeliyi, dichi twatela kumwimbujola!—Isa. 53:10. w19.02 11 ¶14-15

Hakwila nawu tupompeña mpinji yejima, twatela kwikala ahamuka hampinji yitunakumona kukala. Amanakwetu niahela amakwawu ayaña nakupompa hela chakwila ananeñi, neyi kudi yuma yinakuyikañesha hela kukata kumujimba. Amakwawu niwena amwekeshaña kuhamuka kulonda ayi nakupompa hela chakwila anakuyidimbulula kudi yisaka yawu hela nfulumendi. Toñojokenu yuma yitwelaña chiyakwashaña amanakwetu akasawu mukaleya muloña wachikuhwelelu chawu. (Heb. 13:3) Neyi atiya nawu tunatwalekihu kumukalakela Yehova hela chakwila tunakumona kukala, chikuhwelelu chawu chakolaña, ekalaña ahamuka nawa ashinshika. Hampinji yadiñayi Pawulu mukaleya muRoma, wazañaleleña neyi yatiya nawu amanakwindi anakumukalakela Nzambi nakashinshi. (Fwi. 1:3-5, 12-14) Henohu kunashali kwanti nakumufumisha mukaleya hela hanyima yakwila anamufumishi dehi mukaleya, Pawulu wayisonekeleli aHeberu mukanda. Muniwu mukanda wayilejeli akwaKristu ashinshika nindi atelakupompelaña hamu.—Heb. 10:25. w19.01 28 ¶9

Satana wakeñaña nindi twikali neyi yena, mbanji wadiwulaña nshimbi jaYehova nawa wasweja kudikeña yomweni. Twashakamaña nawantu aluwañeshayi dehi nawa weluka nindi anateli “kukisañanaña” hela ‘kutamisha’ yitoñojoka niyilwilu yetu. (1 Kor. 15:33; tth.) Satana wakeñaña cheñi kuluwañesha muchima wetu kuhitila mukukuhwelela maana awantu chatela tukuhweleli yitoñojoka yaYehova. (Kol. 2:8) Shinshikenu yitoñojoka yaSatana yakwila nawu kwikala namaheta dichuma chalema muchihandilu. Antu atoñojokaña muniyi njila anateli kwikala namaheta hela nehi. Hela chikali chochu, ekalaña muwubanji. Muloñadi? Muloña Ashaña maana hakwikala namali chakwila ashaña niwumi wawu muwubanji, alekaña kudikunda nachisaka chawu nawa alekaña kumukalakela Nzambi kulonda ekali nayuma yinakufwilawu. (1 Ti. 6:10) Twatiyaña kuwaha muloña Tata yetu wamwiwulu watukwashaña kubula kusweja kukeña mali.—Mukwa. 7:12; Luka 12:15. w19.01 15 ¶6; 17 ¶9

Nihampinji yelili Mwana kaYehova kanda yenzi hamaseki nakuyileja chakukolesha antu, ambuña aYehova ashinshika adiña nakukolesha akwawu. Hayitiyishiliwu woma kudi Ashuri, Hezekiya wapompesheli akulumpi anjita niantu amuYuda nakuyikolesha. “Nawa antu hiyakushindamena hamazu [indi.]” (2 Kushi. 32:6-8) Hela chakwila Yoba wakeñekeleña kumukolesha, ilaña wayikolesheli “akwakukundeja akukabisha” asatu, chuma chitwatela kudizilaku neyi tunakukolesha akwetu. Wayilejeli nindi neyi yena diyi wadiña wakola, ‘wadi kuyikolesha nakanwa kindi, wadi kuwundisha chikela chawu nakuyikokweja nanyivumbu yindi.’ (Yoba 16:1-5) Nkumininaku, Yoba amukolesheli kudi Elihu niYehova yomweni.—Yoba 33:24, 25; 36:1, 11; 42:7, 10. w18.04 16 ¶6; 17 ¶8-9

Isaya washimwineñahu dehi chakayinkayi Yehova antu jindi ñovu hela kuyikolesha, chahosheliyi nindi: “[Yehova] wakenza neyi chenzaña mukwañovu, chikasa chindi chikamuyulila.” (Isa 40:10) Kakavulu, Bayibolu yazatisha izu dakwila nawu “chikasa” kwimenaku ñovu. Dichi mazu akwila nawu “chikasa [chaYehova] chikamuyulila” atwanukishaña nawu Yehova hiMwanta wañovu. Wazatishili ñovu yindi yabadika hakukwasha nikukiña ambuñindi akunyima nawa natwalekihu kukolesha nikukiña antu amukuhwelela makonu. (Kuhit. 1:30, 31; Isa. 43:10) Sweje-e neyi ayilumbu jetu anakutukabisha, Yehova watulejaña nindi: ‘Nukukwinkaña ñovu.’ Mumatuña amakwawu, ayilumbu jetu anakuzata nañovu kulonda alekeshi mudimu wetu wakushimwina nikuloñesha kwetu. Hela chakwila yuma yamuchidiwu yinakumwekana, ilaña hitwakamaña nankashiku. Yehova watukana mazu atukoleshaña nikwikala nachikuhwelelu. Watukana nindi: “Hikwakekala chitwa, chakachilawu nawu akukatishi nachu, chakakolaku.”—Isa. 54:17. w19.01 5-6 ¶12-13

Kwambukaku nawatunyama, enu munateli kuda yakuda yakuspiritu nawa Nleñi yenu hohu diyi wunateli kuyinka. (Mat. 4:4) Neyi mumutiyilila nakanañachima, mukwikala nakashinshi, maana nimuzañalu. Nzambi wayinkaña yakuda yakuspiritu Mwizu dindi niyakuda yakuspiritu yayivulu yahanañayi kuhitila mudi “nduñu wamaana nikashinshi.” (Mat. 24:45) Iyi yakuda yalema nawa yayiwahi! (Isa. 65:13, 14) Yakuda yakuspiritu yatwinkañayi Nzambi yikuyikwasha kwikala namaana nikutoñojoka chiwahi, yuma yinateli kuyikiña munjila jashiyashana. (Yish 2:10-14) Chakutalilahu, iyi yilwilu yikuyikwasha kwiluka ntañishilu yakutwamba yakwila nawu kwosi Nleñi. Yikuyikiña kukutwamba kwakwila nawu mali nimaheta diyi yuma yinateli kuyiletela muzañalu. Yikuyikwasha cheñi kwiluka nikukaana kufwila kwatama niyilwilu yinateli kuyiletela kukala. Dichi, twalekenuhu kukeñakeña maana aNzambi niyitoñojoka yindi nawa yimonenuña nenu himaheta. w18.12 20 ¶6-7

Komana kwakekalahu mpinji yitwakashakamaña mafuku amavulu “neyi mafuku amutondu”? Nyitondu yikwawu yashakamaña yaaka yayivulu. Antu atela kwikala akola kumujimba hakwila nawu ashakameña yaaka yayivulu. Neyi atachika kushakama neyi chashimwineñahu dehi Isaya, yuma yitwatalilaña yikashikijewa, dikwila nawu paradisa! Iwu wuprofwetu wukashikijewa. Shinshikenu yikaninu yitunahanjekihu chiyinamwekeshi nawu kwakekala paradisa kumbidi: Antu ejima akashakamaña heseki akayikiswila kudi Nzambi. Kwosi muntu niwumu wakatiyaña woma atunyama hela antu adi neyi atunyama ayisumiku. Amputamesu, ajika matu niayifwayi akayuuka. Antu akatuñaña matala awu nikudima yakuda yayiwahi. Akashakamaña mafuku amavulu kubadika nyitondu. Mwamweni, twawanaña wunsahu muBayibolu wunakumwekesha nawu yuma yamuchidiwu yikamwekana kumbidi. Hela chochu, antu amakwawu anateli kuhosha nawu iwu wuprofwetu hiwatalisha mukwila nawu kumbidi kwakekala paradisaku. Wunsahwinyi wayileteshaña mukuhweleli nenu hanu hamaseki hakekala paradisa? Muntu wabadika antu ejima watulejeli muloña waweni waleteshaña tukuhweleli.—Luka 23:43. w18.12 5 ¶13-15

Yitoñojoka yinateli kuhimpika mpinji yidi yejima. Ilaña iku kuhimpika kunashindameni hayuma yitwatoñojokaña niyuma yitwatondaña kwila muchihandilu chetu. Neyi tushindamena nikutoñojoka chikupu chamonañayi Yehova yuma, tukwiluka netu yitoñojoka yindi yayiwahi. Chumichi, chikutukwasha kutoñojoka neyi chatoñojokañayi. Hela chochu, hakwila nawu tuhimpi yitoñojoka yetu nakutachika kutoñojoka neyi chatoñojokañayi Yehova, twatela ‘kuleka kwiteja yuma yamunshakaminu yamakonu yitubalumuni.’ Twatela kuleka kutoñojoka yuma yahelayi Nzambi. Hakwila twiluki kulema kwanichi chikuma, tutoñojokenu hachakutalilahu chayakuda. Muntu wunakukeña kwikala namujimba wawuwahi, watela kudaña yakuda yayiwahi. Hanu nateli kwikala ñahi namujimba wawuwahi neyi nakuda cheñi yakuda yamajilu hela yatoka? Munjila yoyimu, yitoñojoka yaYehova yinateli kuzatika wanyi mudi etu neyi twiteja cheñi yitoñojoka yatama yamukaayi. w18.11 21 ¶14-15

Twatela kuzata nañovu kulonda tuzatisheña chalala chitunakudiza mafuku ejima. Vwalenu mushipi wachalala mumbunda yenu. Mumafuku akunyima, mushipi wamushidika wamukwashileña nikukiña mbunda niyiidi yamukachi. Hela chochu, hakwila nawu mushipi wumukiñi, wateleleli kuwukasisha. Ilaña neyi kuwukasisha nehi, hiwukumukiña nankashiku. Mushipi wetu wachalala wakuspiritu watukiñaña ñahi? Chalala chikutukiña kuyitoñojoka yatama nikutukwasha kufuukula chiwahi neyi tutwalekahu kuchikasisha hamujimba wetu neyi mushipi. Neyi tudi mukweseka hela mukukala, chalala chamuBayibolu chikutukwasha kwila yuma yayiwahi. Neyi chochabulañayi mushidika kuya kunjita chakadi mushipi, ninetu hitwatela kubumbulwisha hela kukasununa mushipi wetu wachalalaku. Ilaña twatela kuzata nañovu kulonda tuchikasishi hamujimba wetu kuhitila mukuzatisha chalala muchihandilu chetu. w18.11 12 ¶15

Twatela kuzata nañovu hakwila nawu twiluki chalala chaMwizu daNzambi. Kudi yuma yitwatela kwila hakwila twiluki chalala. Nsoneki waYishimu wahosheli nindi, neyi ‘tulanda’ hela tuheta ‘chalala’ twatela kwikala asoñama kulonda tubuli ‘kuchilandisha’ hela kuchijimbesha. Chuma chawaana nichena chakeñekaña kuzata nañovu hakwila nawu twikali nachu. Izu dachiHeberu dekala haYishimu 23:23 dabalumunawu nawu “landaku,” dalumbuluka cheñi nawu “hetaku.” Mazu ejima ayedi atalisha mukwila nawu, kuzata nañovu hela kuhimpa chuma chimu nachuma chawuseya. Kulanda chalala tunateli kukulumbulula muniyi njila. Tuhoshenu netu hachisankanu anakuhana “Makondi Awaana.” Komana awa makondi anateli kudinjila hohu aweni? Kwakulehi! Twatela kuzata nañovu kulonda tuyi nakuyisenda kuchisankanu. Komana awa makondi awaana? Eña, ilaña twatela kuzata nañovu nikuzatisha mpinji kulonda tuyi kuchisankanu. Munjila yoyimu, bayi neyi twatela kufweta mali hakwila tulandi chalalaku. Hela chochu, twatela kuzata nañovu hakwila twiluki chalala. w18.11 4 ¶4-5

Yesu wayilejeli aPetulu, Yakoba niYowanu kulonda amutwaliku hampidi yayilehi. Chadiñawu kumpidi, amweni chimwenu chakuhayamisha. Kumesu aYesu kwatoñekeli nawa yakuvwala yindi yatookeli nankashi neyi chejeji. Kwamwekeni antu ayedi, wumu wemeneneñaku Mosi mukwawu Elija, atachikili kuhanjeka naYesu hansañu yakufwa kwindi nikusañuka kwindi. (Luka 9:29-32) Kuhiñahu, Ivu ditooka dayibutili nawa atiyili izu daNzambi kufuma mwivu. Ichi chimwenu chadiña nakumwekesha kulema niñovu yikekala naYesu hakekalayi Mwanta waWanta waNzambi. Chakadi nikujina, Kristu amukolesheli nikumwinka ñovu yakuumika makabi nikufwa kwayeña. Ichi chimwenu chakolesheli cheñi chikuhwelelu chawatumbanji. Chumichi chayikwashili kudiloñeshela chadimu hakukala kwayileñawu nakumona nimudimu weneni wayileñawu nakuzata. Chimwahitili yaaka 30, kapostolu Petulu wahosheli hanichi chimwenu chakuhimpika kwammwekenu, nindi wachidiña nakuchanuka.—2 Pet. 1:16-18. w19.03 10 ¶7-8

AkwaKristu alala ambukaku ñahi nawantu amunsakililu yakutwamba? ‘Twahoshaña walala.’ (Zek. 8:16, 17) Tukuhosha walala kutalisha hatuyuma twanyanya nimuyuma yamaneni, wukuhosha walala kudi antu abula kwilukayi, akwawu mwazatilañawu, amabwambu niantaña jindi. Indi neyi wudi kansi wunakukeña kwila yuma yinakwilawu akwenu? Bayi wila yuma yatama kumbadiku, ilaña neyi wudi nachisaka hela nawantu amuchipompelu hiwukumwekesha neyi wudi nayilwilu yayiwahi. Neyi wudi nawakwenu atwansi hela neyi wudi haintaneti, wunakwila yuma yambukaku. Iku hikutwamba kudi anvwali jenu, kudi akwenu akwakudifukula nikudi Nzambi. (Mas. 26:4, 5) Yehova weluka neyi chakwila ‘tunakumulemesha hohu nanyivumbu yetu, ilaña nyichima yetu yidi kwakulehi nayena.’ (Maku 7:6) Chikuwaha neyi tulondela chahosha chishimu chakwila nawu: “Muchima weyi bayi wutiyila akwanshidi ichimaku, mwakamaña kweyi Yehova mwaana wejima.”—Yish. 23:17. w18.10 9 ¶14-15

Antu jaNzambi mukaayi kejima hichisaka chakuspiritu chikweti kukeña. (1 Yow. 4:21) Kukeña kwawu hiyakwimwekeshelaña muyuma yamaneni hohuku ilaña nimutuyuma twanyanya, chidi neyi kutoñojokelaku nikutiyila antu luwi. Neyi tuyitiyila antu amakwawu luwi nikuyitoñojokelaku, tukwikala “akwakwimbujola Nzambi, neyi anyana akeñayi.” (Efwe. 5:1) Yesu wamwimbujoleleña Tata yindi. Dichi Yesu wahosheli nindi: “Twayenu kudi ami, enu ejima munakukabakana, nukuyihizumwisha . . . , muloña ami nadikehesha nikudizoza mumuchima.” (Mat. 11:28, 29) Neyi tumwimbujola Yesu kuhitila “[mukutoñojokelaku] atuzweñi,” tukutambwila nkisu yafumaña kudi Tata yetu wekala mwiwulu nimuzañalu chikupu. (Mas. 41:1) Dichi tutwalekihu kumwekesha kukeña kuhitila mukutoñojokelaku antu amakwawu, muchisaka, muchipompelu nimumudimu wakushimwina. w18.09 28 ¶1-2

Neyi kumwekana wubanji wadimwekenaña, antu jaNzambi ekalaña nakukooleka kwakukalakela hamu naNzambi kuhitila mukukwasha amanakwawu munjila jashiyashana. Chakutalilahu, ahanaña mali kudi amanakwetu adi mukukaankila. (Yow. 13:34, 35; Yil. 11:27-30) Cheñi ayikwashaña kuhitila mukuwahisha nikutuñulula matalawu anahumuki. Gabriela muhela wakuPoland, itala dindi dakisikili nadibaji. Watiyili kuwaha chelili amanakwetu amuyipompelu yadiña mukamwihi enzi nakumukwasha. Wahosheli nindi: “Nukuhosha wanyi hayuma yinajimbesheli muloña hiyuma yakumujimba hohu. Ilaña nukuhosha hayuma yayivulu yinnatambwili. Ichi chuma chinankwashi kwiluka nami kwikala muchipompelu chawakwaKristu hikukooleka chikupu nawa mwafumaña muzañalu.” Amavulu akwashañawu hanyima yakumona kukala ahoshaña nawu ekala namuzañalu chikupu. Antu akalakelaña hamu naYehova niwena ekalaña namuzañalu chikupu.—Yil. 20:35; 2 Kor. 9:6, 7. w18.08 26 ¶12

Neyi tunakukeña netu tuhembeña muchima wetu, twatela kwiluka yuma yinateli kuluwañesha muchima wetu nawa twatela kuzatilahu swayi kulonda tudikiñi. Izu dabalumunawu nawu “hembaku,” datwanukishaña mudimu wazatileñawu akwakutalatala. Mumafuku aMwanta Solomoni, akwakutalatala emeneña hewulu dampwembu yamusumba nawa avumishileña mpuña neyi amona nawu kudi ayilumbu anakwinza. Neyi tunakufwikija iyi yuma chikutukwasha kwiluka chuma chitwatela kwila hakwila tumukañeshi Satana yabuli kuluwañesha yitoñojoka yetu. Mumafuku akunyima, akwakutalatala azatilileña hamu nawakwakuhemba kuyiisu. (2 Sam. 18:24-26) Wejima wawu azatilileña hamu hakukiña musumba nikushinka yiisu neyi amona nawu kunakwinza chilumbu. (Nehe. 7:1-3) Chinleji chetu chadizishewa naBayibolu chinateli kuzata neyi mukwakutalatala nikutusoñamisha neyi Satana hakukeña kuluwañesha muchima wetu, dikwila nawu kuluwañesha yitoñojoka yetu, chitwatiyaña, yilwilu yetu hela yuma yitwafwilaña. Neyi chinleji chetu chitusoñamisha, twatela kuchovwahila nikutondolwela wubanji. w19.01 17 ¶10-11

Atwansi awamayala atela kuyishinshika bayi kwesekeja nachinakumwekanawu hela kulondela chisemwaku, ilaña atela kuyishinshika kuzatisha Izu daNzambi. (2 Tim. 3:16, 17) Nshimbi yachisemwa yinateli kukañesha amanakwetu anashikihu kuyitonda. Mwituña dimu, manakwetu nkoñi wakuzatila washikahu amwinkeli nyidimu yalema. Hela chakwila aeluda amuchipompelu mwadiñayi etejeli nawu nashikiji yuma yamuNsona yakeñekaña kwikala eluda, ilaña amuhamekeli wanyi kulonda amutondi. Aeluda amakwawu awakulumpi akaanini nawu manakwetu wuchidi kwila yekala eluda nehi. Chawushona, iwu manakwetu amutondeli wanyi muloña wayaaka yadiñayi nayu. Chileji chinakumwekesha nawu iyi yitoñojoka yinaluwañeshi antu amavulu muyipompelu mukaayi kejima. Mpinji yejima twatela kushindamenaña haNsona chatela tushindameneña hamaana awuntu. Diyi njila mutunateli kumwovwahila Yesu nikuleka kusompesha kwesekeja nachinakumwekanayi muntu.—Yow. 7:24. w18.08 12 ¶16-17

Kudi chuma chikwawu chafwana chafumaña mukutemesha maemelu nimameseji swayi-swayi. Mumaluña amakwawu, mudimu wetu awukañeshaña hela awulekesha. Mumaluña amuchidiwu, antu atudimbululaña anateli kutandisha nsañu yinateli kututiyisha woma hela kutuleñela kubula kudikuhwelela wumu namukwawu. Talenu chuma chamwekeni muSoviet Union. Atupokola atenañawu nawu KGB, atandishili nsañu yakutwamba nawu amanakwetu amavulu alombolaña analeki kwikala aYinsahu jaYehova. Amavulu akuhweleleli yina nsañu yakutwamba nawa afumini mukuloñesha kwaYehova. Chatamini nankashi! Ilaña mukuhita kwampinji, amavulu afuntili, amakwawu hiyafuntiliku. Chikuhwelelu chawu chakisikili. (1 Tim. 1:19) Tunateli kutondolwela ñahi chuma chamuchidiwu? Bayi mutandishaña nsañu yakutwamba hela yimunabuli kwilukishaku. Bayi mwitejaña nsañu yejimaku. Mwatela kwikala nawunsahu walala. w18.08 4 ¶8

Mamanyusikiliputi akusambila achiGiriki adiña nakuzatisha tunookelu hadi hejima. Tunateli kudihula netu: Komana Yesu wahosheleña nindi, “Nukukuleja chalala nami, lelu nukwikala neyi muParadisa”? Tahindi wahosheleña nindi, “Inakukuleja chalala dalelu nami, wakekala nanami muParadisa”? Ilukenu nenu Yesu wayilejeleñahu dehi atumbanji twindi nindi: “Mwana kamuntu wakekala mwijamu mafuku asatu mwaana niwufuku.” (Mat. 12:40; 16:21; 17:22, 23; Maku 10:34; Yil. 10:39, 40) Dichi, Yesu ninona kapondu hiyayili muParadisa yidi yejima hanyima yakufwa hadina ifukuku. Yesu wadiña “Mwijamu [hela “Hadesi”]” hadi mafuku antesha kushika nimpinji yamusañwiliwu kudi Nzambi. (Yil. 2:31, 32; tth.) Ona kapondu wafwili welukili wanyi nindi Yesu watiyañeni chitiyañenu nawapostolu indi ashinshika nindi wakekala nawu muWanta wamwiwulu. (Luka 22:29) Kubombelahu, ona kapondu wadiña wapapatishewa wanyi. (Yow. 3:3-6, 12) Paradisa yakaniniyi Yesu hadaha wadiña nakutena paradisa yaheseki yikashikijewa kumbidi. w18.12 6 ¶17-18, 20-21

Hashimbwili wanyi aIsarela atachikili kudifukula kudi mwana kañombi. Hela chakwila elileña chumichi, aIsarela adidimbileña nakutoñojoka nawu achidi kukabadi kaYehova. Dichaletesheli Aroni kutena kudifukula kudi mukishi nindi “chawija chaYehova”! Yehova welili ñahi? Wazuwili. Yehova wamulejeli Mosi nindi antu “anaditokeshi dehi bululu,” nawa “anasenuki dehi munjila [Mwayilejeliyi.]” Kuzuwa kwindi “kuyitatili neyi kesi,” Yehova wakeñeleña kujilumuna muza wawuha waIsarela watuñiliyi. (Kwid. 32:5-10) Hela chochu, Yehova wafuukwilihu kubula kuyijilumuna aIsarela. (Kwid. 32:14) Hela chakwila Aroni niyena wadibombelimu mukutuña mukishi, wabalumukili mumuchima nakudinuña hamu nawaAlevi kukabadi kaYehova. Chineli antu amavulu afwili hansañu yakudifukula kumukishi, adiña kukabadi kaYehova ayikanini nawu akuyikiswila.—Kwid. 32:26-29. w18.07 20 ¶13-16

Muntwinyi wabadika itwatela kufwila netu yatwiluki? Bayi neyi himpuhu yafwilañawu antu amavulu nawu ayiluki munsañu jakutaña, jakulanda nakulandulula nimujayisela yamukaayiku. Ilaña, hikwiluka kwashimwiniyi Pawulu munawa mazu nindi: “Chineli munamwiluki dehi Nzambi, hela netu chinayilukiwu dehi kudi Nzambi, muloñadi chimunakufuntila cheñi kuyuma yabula kukola nikuyuma yawansi yamukunkulwayi nakukeña kwikala anduñu ayumiyi cheñi?” (Ñal. 4:9) Hikukooleka chikupu “[hakutwiluka] kudi Nzambi,” Nyuuli Wabadika wakuleña kwejima! Wakeñaña nindi twikali nawubwambu wakola nayena. Neyi chahosheli muntu wumu wadiza chikupu nindi: “twekalaña yuma yaswejayi kusha maana nankashi.” Neyi Yehova yatwiluka nindi tudi amabwambu jindi, twelukaña chuma chacheni chitwekalilaku.—Mukwa. 12:13, 14. w18.07 8 ¶3-4

Hakwila nawu nshimbi jaNzambi jitukwashi, twatela kujikeña nikujilemesha. (Amosa 5:15) Hanu dinu tunateli kwila ñahi mwenimu? Twatela kumona yuma neyi chayimonañayi Yehova. Chakutalilahu: Fwikijenu munakukamaña wanyi. Ndotolu yayileja nindi mudeña yakuda yayiwahi, kwolola mujimba nikuhimpa yuma yimu muchihandilu. Hanyima yakulondela yuma yinayilejiyi ndotolu, nawa mumona nenu yinazatiki, chakadi nikujina mukumusakilila ndotolu hakuyikwasha kuwahishaku chihandilu chenu. Munjila yoyimu, Nleñi yetu watwinka nshimbi jinateli kutukiña kuyuma yinateli kutuluwañesha yafumaña kunshidi nawa yinateli kuwahishaku chihandilu chetu. Toñojokenu yuma yayiwahi yafumaña mukulondela nshimbi yamuBayibolu yahosha hakutwamba, kufwila yatama, wukombi, yilwilu yawuvumbi, madombu nikupanda. (Yish. 6:16-19 Chim. 21:8) Neyi tumona yuma yayiwahi yafumaña mukwila yuma yakeñañayi Yehova twaswejaña kumukeña Yehova ninshimbi jindi. w18.06 17 ¶5-6

Hadaha nguvulu watiyili woma nindi Yesu wukuleta wufwinda mumapolitikisi, chuma chabulileñayi kukeña Pilatu muchiyuulu chindi. Yesu wamwakwili nindi: “Wanta wami hiwudi wamukanu kaayiku.” (Yow. 18:36) Hateleleli kudiñija mumapolitikisiku muloña Wanta windi wadiña wamwiwulu. Wamulejeli Pilatu nindi mudimu windi hamaseki wadiña “[wakushimuna] wunsahu wachalala.” (Yow. 18:37) Neyi twiluka mudimu wetu neyi chelukiliyi Yesu mudimu windi, tukuleka kwiteja, kuhosha hela kwila yuma yinakumwekesha nawu tunakuhakwilaku mazanvu amapolitikisi akeñaña kudimena. Chumichi chapela wanyi. Nkoñi wumu wañinza wahosheli nindi: “Antu mwiluña detu anakukeña kuhimpa yuma chikupu. Yilwilu yakukeña kudimena yinaswejeliku nawa antu amavulu anakutoñojoka nawu mazanvu adimena ajipolitiki anateli kuyiwahishila yuma. Twatiyaña kuwaha hakumona amanakwetu chiyanakutwalekahu kuhemba kunuñañana kwawu kwawakwaKristu kuhitila mukusha maana hakushimwina nsañu yayiwahi yaWanta. Amutalilaña Nzambi kulonda yakafumishihu wuñanji waheña nikukala kukwawu kutwamonaña.” w18.06 4-5 ¶6-7

Nyikanda yiwana hohu yaNsona yachiHeberu, 1 Kushindulula, Yoba niZekariya, diyatena nawu Satana, chaya mukwila nawu “Mukwakudimbulula.” Muloñadi chiyabulili kumutena chilumbu chetu kakavulu henohu Mesiya kanda yenzi? Chinamwekani neyi Yehova hakeñeleña kumutiyakesha nankashi Satana kuhitila mukumutena kakavulu muNsona yachiHeberu hakulumbulula chekalayi ninyidimu yindiku. Nkeñelu yaYehova yasonekeleliyi chibalu chayina Nsona yadiña yakuleja antu jaNzambi kulonda eluki kwinza kwaMesiya nawa amulondeleña. (Luka 24:44; Ñal. 3:24) Chelili nkeñelu yindi yishikijewi nawa Mesiya yenzi, Yehova wamuzatishili yena niatumbanji twindi kulonda asololi yuma yitweluka hadi Satana niañelu adibombeli nindi. Chidi hohu chiwahi, muloña Yehova wakazatisha Yesu niawayishewa hakumuchika Satana niejima amulondelaña. (Rom. 16:20; Chim. 17:14; 20:10) Diyabolu ñovu jindi jakehelamu. Atukwashaña kudi Yehova, Yesu niañelu ashinshika. Tunateli kumushinda chilumbu chetu nawukwashu wawu. w18.05 22-23 ¶2-4

Yehova watumonaña nindi tudi ambuña indi chiña hohu neyi tunakusoña nyikabu. (Mat. 13:23; 21:43) Dichi, muchishimu chekala haYowanu 15:1-5, nyikabu yatela kusoñayi mukwaKristu wejima hiyatalisha kudi atumbanji amaha itwelishañaku. (Mat. 28:19) Neyi nehi, chikumwekana neyi aYinsahu ashinshika ashimwinaña mumaluña mwabulañawu antu kwiteja chalala akwikala neyi nyitayi yabulaña kusoña yidi muchishimu chaYesu. Hela chochu, chaluwa kutoñojoka muniyi njila! Muloñadi? Muloña hitwatela kukanjikija antu netu ekali atumbanjiku. Yehova yomweni hakanjikijaña ambuña indi kwila yuma yikubula kutwesha kwilawuku, dichi bayi tuyikanjikijaku. Yuma yejima yatulejañayi Yehova yapela kwila. (Kuhit. 30:11-14) Hanu dinu nyikabu yamuchidinyi yitwatela kusoña? Nyikabu yatela kutalisha kumudimu wutunateli kutwesha kuzata wejima wetu. Mudimwinyi? Mudimu wakushimwina nsañu yayiwahi yaWanta waNzambi.—Mat. 24:14. w18.05 14 ¶8-9

Makonu, akulumpi jansakililu anavuli chikupu mukaayi. Ayitenaña nawu mapasta, atupristu, arabi kushila nimajina amakwawu. Kufwana awa akulumpi jansakililu amumafuku awapostolu, niwena “elaña yuma yatama yakañeshaña antu kwiluka chalala” chaMwizu daNzambi. (Rom. 1:18, 25) Atandishaña ntañishilu yakutwamba yidi neyi “muntu neyi amutena nawu mukwaKristu dikwila nawu wakajilumuka wanyi,” wumi wamuntu wafwaña wanyi, muntu neyi nafwi wasañukilaña muchuma chacheñi nawa atañishaña nawu Nzambi weteja eyala neyala hela mumbanda namumbanda kudisumbula. Akwamapolitiki analuwañeshi antu chikupu muloña wakutwamba. Katataka keña tutiyi kutwamba kwasweja, hakabidikawu antu nawu “kuwunda nikukiñewa!” Ilaña “hohenohu kujilumuka kwakayishikena.” Bayi twiteja nsañu yawu yakukeña kumanisha yuma yatama yamunshakaminu yamakonu kutuluwañeshaku. ‘Tuneluki chikupu netu, ifuku daYehova dinakwinza neyi chenzañayi ikombi nawufuku.’—1 Tes. 5:1-4. w18.10 7-8 ¶6-8

Yesu Kristu wakoleshaña nikulombola ananeñi nianazeyi muyinu mpinji yakala, wazatishaña amanakwetu awayishewa ‘niatulamba’ ahadi anyikoku acheñi. Niaeluda dichatela kwilawu, bayi neyi “hiyanyanta” hachikuhwelelu chawakwawuku ilaña ‘hiyakwakukalakala hamu nawu’ kulonda amanakwawu azañalaleña. (Isa. 32:1, 2; 2 Kor. 1:24) Kapostolu Pawulu watuleja yuma yitwatela kwila. Wayisonekeleli akwaKristu akabishileñawu muTesalonika nindi: “Chineli twayikeñeli nankashi, hitwafwilileña hohu kuyileja enu nsañu yayiwahi yaNzambiku, ilaña twahanini nimawumi etu muloña twayikeñeli chikupu.” (1 Tes. 2:8) Pawulu wamwekesheli nindi izu dakukolesha hadu hidinateli kukwasha muntu mpinji yejimaku. Dichi wayilejeli aeluda amuEfwesesa mazu adi munsona yalelu. w18.04 21-22 ¶6-8

Hakwila tudiluñishi iku kusubuka, twatela ‘kubalumukila kudi Yehova,’ dikwila nawu kwikala ibwambu dindi. (2 Kor. 3:16) A Isarela hadiñawu muchinkalampata hiyamweneña chayikwashileñawu kudi Yehovaku. Nyichima niyitoñojoka yawu yabutikili nawa yachinchikili, ashili maana hakudiluñisha kusubuka kwakumujimba kwabuliliwu muEjipitu. (Heb. 3:8-10) Kusubuka kwenzaña hamuloña waspiritu yaYehova kwabadika chikupu kusubuka kwakufuma muwuduñu wakumujimba. Antu akañanyaña kuleta kusubuka kwalala. Ilaña spiritu yaYehova yaletaña kusubuka kwalala kwakwikala asubuka kunshidi nikukufwa, nikusubuka muwuduñu wakudifukula kwakutwamba nitushidikilu twaku. (Rom. 6:23; 8:2) Iku hikusubuka kwakweni chikupu! Muntu nateli kudiluñisha iku kusubuka hela chakwila anamukasi hela wudi muwuduñu.—Kutach. 39:20-23. w18.04 9 ¶3-5