August

Mpinji yejima, kupompa kwatwanukishaña yuma yatwililawu kudi Nzambi niYesu. Muloña wayuma yatwililawu, twafwilaña kumwimbujola Yesu muchihandilu chetu chejima. (2 Kor. 5:14, 15) Kubombelahu, muchima wetu watusañumunaña tumushimekeña Yehova hakutwinka ifutu danyiloña. Njila yimu mutunateli kumushimekela hikwakulahu chakufuma hamuchima hakupompa. Tunateli kumwekesha netu twamukeña Yehova niMwanindi neyi tudibondahu yuma yimu. Kakavulu, twadibondaña muyuma yimu kulonda tuyeña nakupompa. Yipompelu yayivulu yapompaña melela hafumañawu antu kunyidimu iku anazeyi. Kupompa kukwawu kwekalañaku kunsa yanyilungu hanookañawu antu. Komana Yehova wamonaña chitwayaña nakupompa hela chakwila tunazeyi? Eña wamonaña! Yehova wamonaña nawa watiyaña kuwaha chitwazataña nañovu kuya nakupompa.—Maku 12:41-44. w19.01 29 ¶12-13

Yesu niyena wamweni kukala kwamweneñawu antu. Chakutalilahu, hadaha Yesu amukulishili kudi anvwali atuzweñi. Yesu wazatileña naYosefu, tata yindi wakuwanamu, dichi wadizili chakuzata nyidimu yakola. (Mat. 13:55; Maku 6:3) Chinamwekani neyi Yosefu wafwili henohu Yesu kanda yatachiki mudimu windi wakushimwina. Dichi Yesu watela chamukatileña hakufwisha muntu akeñayi. Nawa welukili chichekalaña kushakama nawantu amuchisaka abula kukuhwelela yuma yoyimu. (Yow. 7:5) Iku kukala niyuma yikwawu yatela yamukwashili Yesu kwiluka kukala kwamweneñawu antu nichatiyileñawu. Yihayamisha yakoñeliyi Yesu yamwekesheleña nawu wayakameneneña antu. Yesu wakoñeleña yihayamisha muloña wayitiyilileña antu akabakeneña “wushona.” (Mat. 20:29-34; Maku 1:40-42) Yesu wayitiyilili awa antu wushona dichi wayikwashili.—Maku 7:32-35; Luka 7:12-15. w19.03 16 ¶10-11

Hadiña hawufuku wakukumishaku Yesu kwikala ahanu heseki. Fwikijenu chaneñeliyi Yesu hawuna wufuku. Wadi kutwalekahu kwikala washinshika kushika nikukufwa? Neyi wabulili kwikala washinshika, chiña kwosi muntu wadi kwikala nakuchiñeja kwakwikala nawumi. (Rom. 5:18, 19) Chuma chasweja kulema, yilwilu yindi yadi kulemesha hela kusawula ijina daTata yindi. (Yoba 2:4) Hampinji yadiileñayi kuda kwakukumishaku nawapostolu indi, nsañu yahanjekeleñawu yaleñeleli atachiki ‘kuditadikisha’ “mulwawu kulonda eluki wadiña muneni chikupu hakachi kawu.” Ilaña, Yesu wahilili wanyi. Ilaña wadiwunjikili. Wayikwashili mumesu awunda nakuyilumbulwila yilwilu yateleleliwu kwikala nayu. Kuhiñahu, wayihamekeli cheñi awa amabwambu jindi hakwikala nayena. (Luka 22:24-28; Yow. 13:1-5, 12-15) Tunateli kumwimbujola Yesu kulonda tutwalekihu kwikala awunda hela chakwila tunaneñi neyi twanuka netu wejima wetu twahoshaña nikwila yuma yaneñeshaña akwetu. (Yish. 12:18; Yak. 3:2, 5) Mpinji yejima yihamekenuña akwenu hayuma yayiwahi yineliwu.—Efwes. 4:29. w19.02 11-12 ¶16-17

Nshimbi jaMosi jakiñileña muntu kulonda abuli kumutwambila nawu nakoñi muloña. Muntu enkeleñawu muloña wadiña nawuswa wakwiluka muntu wunakumwinka muloña. (Kuhit. 19:16-19; 25:1) Henohu kanda amwinki muloña, kwateleleli kwikala ayinsahu ayedi kulonda alumbululi. (Kuhit. 17:6; 19:15) Indi neyi kaIsarela yakoña muloña nawa hekala hohu chinsahu wumu? Iwu muntu hateleli kutoñojoka wanyi nindi akumuleka hachuma chatama chinakoñiyi. Yehova wamweneña chuma chakoñeliyi. Yehova watuleja chitwatela kwila, kwosi chuma chatama chelañayiku. Wakiswilaña antu ovwahilaña nshimbi jindi, ilaña wababeshaña antu azatishaña wuswa wawu chatama. (2 Sam. 22:21-23; Ezek. 9:9, 10) Amakwawu anateli kukoña yuma yatama nawa anateli kusweka kulonda abuli kuyibabesha, ilaña Yehova wamonaña nawa washaku mpinji yatelela yakuyisompesha. (Yish. 28:13) Neyi abula kubalumuka, dihelukañawu nawu “kubabeshewa kudi Nzambi wamumi hichuma chakutiyisha woma.”—Heb. 10:30, 31. w19.02 23-24 ¶20-21

Mosi washili maana hadi Yehova kulonda yamulomboleña nikumutwaminina. Kafwampi, “muloña watwalekelihu kukola mbe-e neyi kwiji nakumona Owu abulaña kumonawu.” (Heb. 11:24-27) Kwakwihi natukweji tuyedi kufuma hafumini aIsarela muEjipitu, kwamwekeni kukala kweneni henohu kanda ashiki kuMpidi yaSinayi. Antu atachikili kuhoshahosha muloña wakubula menji. Atachikili kumutobela Mosi nawa yuma yamukalilili chakwila wabileleli kudi Yehova nindi: “Awa antu nukuyila ñahi? Keña ansoweli malola!” (Kwid. 17:4) Yehova wamwakwili kuhitila mukumwinka nshimbi jakulondela. Wamulejeli kunona mukombu windi nakuweta kwilola dakuHerobi, nawa nindi menji akutachika kwichika. Twatañaña netu: “Dichi cheliliyi Mosi kumesu awakulumpi awaIsarela.” Dichi aIsarela anwini menji nawa kukala kwamanini.—Kwid. 17:5, 6. w18.07 13 ¶4-5

Njila yimu mwatutuñilañayi Yehova mukukeña hikuhitila muchipompelu chawakwaKristu. Hamuntu-hamuntu, tunateli kumwekesha kukeña kwindi neyi tukeñaña nikutuña amanakwetu niahela kuspiritu nimuyitoñojoka. (1 Yow. 4:19-21) Kapostolu Pawulu wayikonkomweneni akwaKristu nindi: “Dikoleshenuña wumu namukwawu nikudituña wumu namukwawu neyi chimunakwila.” (1 Tes. 5:11) Aeluda niantu ejima amuchipompelu atela kumwimbujola Yehova niYesu hakukolesha nikutuña amanakwetu niahela muchipompelu. (Rom. 15:1, 2) Antu amakwawu amuchipompelu anakukabakana nachineñi hela kusweja kwakama akeñekaña kuyitwala kuchipatela kulonda ayikwashi. (Luka 5:31) Aeluda niantu amakwawu amuchipompelu eluka nawu wena hiyayidizisha jakuchipatelaku. Ilaña wena niantu amuchipompelu akweti mudimu walema, ‘wakukundeja antu ananeñi, kukolesha azeya nikwikala mukuwunda nawantu ejima.”—1 Tes. 5:14. w18.09 14 ¶10-11

Twaswejaña kumukuhwelela Yehova neyi tumwiluka chikupu. Njila yimu yakumwilukilamu Yehova chikupu hikutaña Bayibolu nikutoñojokahu chikupu hansañu yitwatañaña. MuBayibolu mwekala nsañu yashimuna chakiñiliyi Yehova antu jindi kunyima. Iyi nsañu yatukwashaña kwiluka netu watwakamenaña. Shinshikenu mazu azatishiliyi Isaya hakulumbulula chatukiñañayi Yehova. Wamutena Yehova nindi kabiña nawa antu jaNzambi wayitena nindi anyana kanyikoku. Isaya wahosheli nindi: Yehova “wakakuñwila anyana muchikasa chindi, wakayisendela hantulu yindi.” (Isa. 40:11) Neyi twiluka netu Yehova natukwati mumakasa indi añovu, twakiñewaña nawa twekalaña awunda. Hakwila chiyikwashi kwikala awunda hela chakwila munakumona kukala, mazu akukolesha adi munsona yefuku dalelu. Akuyikoleshaña chikupu hampinji yimukumona kukala. w19.01 7 ¶17-18

Komana kudihu nyidimu yakuspiritu yimunakufwila kwila? Hadaha mwafwilaña kutaña Bayibolu ifuku nifuku. Indi kwiji munakufwila kwilukisha chakuhosha hela kutañisha. Neyi mumona yuma yayiwahi yinafumimu hela antu amakwawu amona yuma yayiwahi yinafumimu nawa ayihameka, mukutiya ñahi? Chakadi nikujina mukutiya kuwaha nankashi. Munateli kuzañalala muloña munakutwamijaku kwila nkeñelu yaNzambi neyi cheliliyi Yesu. (Yish. 27:11) Neyi munakufwila kuzata nyidimu yakuspiritu dikwila nawu munatondi chuma chachiwahi muloña hichakakisikaku. Kapostolu Pawulu wasonekeli nindi: “Ikalenu akola mbe-e chakadi kuswijewa, mpinji yejima ikalenuña nayuma yayivulu yakuzata mumudimu waMwanta, nanochu chimuneluki nenu kudikita kwenu kumunakudikita mudi Mwanta kwamukunkulwayi wanyi.” (1 Kor. 15:58) Ilaña neyi antu afwilaña yuma yakumujimba nikuya mpuhu, ekalaña namuzañalu wanyi. Hela chakwila akwikala naniyi yuma, kakavulu ekalaña nachineñi.—Luka 9:25. w18.12 22 ¶12-13

Davidi wadiña nakutena mpinji yakashakamaña antu heseki kwesekeja nachakeñañayi Nzambi. (2 Pet. 3:13) Wuprofwetu wekala haIsaya 65:22 wahosha nawu: “Mafuku awantu ami akekala neyi mafuku amutondu.” Chumichi chinakumwekesha nawu antu akashakamaña haya nyaaka. Chimwekeshu 21:1-4 yamwekesha nawu, Nzambi wakayikiswila antu nawa nkisu yimu yayikanayi yidi yakwila nawu “hikwakekala nawa cheñi kufwaku” kudi antu akamukalakelaña Nzambi nakashinshi mwituña dadiha. Adama naEva ajimbesheli Paradisa yadiña muEdeni, ilaña, bayi neyi yajimbeli haya nyaakaku. Neyi chakanayi Nzambi, antu ashakamaña heseki keña ayikiswili. Davidi amoneneni kusoneka nawu antu adizoza niakwakuloña akaswana ituña nawa akashakamamu haya nyaaka. (Mas. 37:11) Wuprofwetu wekala mumukanda waIsaya wunateli kutukolesha kuhembelela mpinji yayiwahi yinakwinza yitwakadiluñishaña muparadisa. (Isa. 11:6-9; 35:5-10; 65:21-23) Chumichi chikamwekana mpinjinyi? Mpinji yikashikijewa chikaninu chaYesu chamukaniniyi ona kapondu. (Luka 23:43) Munateli kushakama muniyi Paradisa. w18.12 7 ¶22-23

Komana tunateli kutondolwela yitoñojoka yejima yamukaayi? Inehi, tukutwesha wanyi muloña dimu twashakamaña. Muloña yuma yikwawu kwila tuyitemuka nehi. (1 Kor. 5:9, 10) Mumudimu wakushimwina, tunateli kuwana antu anakuhosha hantañishilu yakutwamba. Hela chochu, chineli hitukutwesha kutondolwela yitoñojoka yatamaku, bayi tuyitejaña hela kuyitoñojokañaku. Kufwana Yesu, tunyakaleña kutondolwela yuma yamutiyishaña Satana kuwaha. Kubombelahu, tunateli cheñi kudikiña kuyitoñojoka yamukunkulwayi yidi mukaayi. Chakutalilahu, twatela kusoñama hakutonda amabwambu. Bayibolu yatusoñamishaña nawu neyi tudikundaña nawantu abulaña kudifukula kudi Yehova, yitoñojoka yawu yikutamisha yitoñojoka yetu. (Yish. 13:20; 1 Kor. 15:12, 32, 33) Neyi tukaanaña yisela yatiyakeshaña nawu yuma yadileñeli yayeni, madombu, yilwilu yatama, dikwila nawu tunakutondolwela kutoñojoka hayuma “yakañeshaña antu kumwiluka Nzambi.”—2 Kor. 10:5. w18.11 21 ¶16-17

Tunateli kutwalekahu ñahi kwenda muchalala? Njila yimu hikudizisha antu amakwawu chalala chamuBayibolu. Neyi twila mwenimu, tukutwalekahu kukobeka mpoku yetu yakabali yakuspiritu, dikwila nawu ‘Izu daNzambi.’ (Efwe. 6:17) Wejima wetu twatela kuzata nañovu kulonda twikali antañishi ashikahu “[atañishaña] nikulumbulula chiwahi mazu achalala.” (2 Tim. 2:15) Neyi tuzatishaña Bayibolu hakukwasha amakwawu hakwila alandi chalala nikuleka ntañishilu yakutwamba, twashimatishaña mazu aNzambi muyitoñojoka nimumuchima wetu. Muniyi njila, twamwekeshaña netu tunakufwila kutwalekahu kwenda muchalala. Chalala hichawaana chalema chatwinkayi Yehova. Muloña wanichi chawaana, tukweti iheta dasweja kulema, wubwambu wetu naTata yetu wamwiwulu. Yuma yejima yinatudizishiyi Nzambi, hintachikilu hohu. Nzambi watukana nindi wakatwalekahu kutudizisha haya nyaaka kulonda tubombeleña hachalala chitweluka dehi. Dichi, lemeshenuña chalala neyi mperola yayiwahi. Twalekenuhu ‘kulanda chalala, bayi muchilandishaku.’—Yish. 23:23. w18.11 8 ¶2; 12 ¶15-17

Chakadi nikujina, mudimu wakushimwina wazatileña Nowa henohu Dibaji kanda mwabombeleli kusoñamisha antu hakujilumuka kwenjileña. Tunahoshelidi mwenimu? Talenu mazu ahosheliyi Yesu: “Muloña mumafuku wenowu chelili Dibaji kanda dinzi, antu adiileña nikunwa, amayala asumbwileña, ambanda asumbukileña kushika nihanodu ifuku deñililiyi Nowa muwatu, wena hiyashiliku maanaku, nichenjili Dibaji nakuyijilumuna wejima wawu. Nimpinji yakwikalahu kwaMwana kamuntu dichiyikekala.” (Mat. 24:38, 39) Hela chakwila antu adiwili, Nowa watwalekelihu kuyileja nsañu yakusoñamisha yamulejeliwu. Makonu, twashimwinaña nsañu yaWanta kulonda antu eluki nkeñelu yaNzambi kutalisha kudi antu. Kufwana Yehova, twafwilaña netu antu ejima atiyi iyi nsañu nawa ‘akatwalekihu kuhanda.’ (Ezek. 18:23) Hampinji yoyimu, neyi tushimwina kwitala nikwitala nikumaluña kwekala antu amavulu, twayisoñamishaña antu amavulu netu Wanta waNzambi wukenza nakujilumuna kanu kaayi katama.—Ezek. 3:18, 19; Dan. 2:44; Chim. 14:6, 7. w18.05 19 ¶8-9

Chakutalilahu, munateli kwila ñahi neyi akwanshimbi alekesha mudimu waWanta mwiluña denu nawa ayitambika nakuyihula malwihu hadi amanakwenu? Komana mukuyileja wunsahu wejima? Yesu welili ñahi chamwihwileñawu kudi Nguvulu wawaRoma? Kwesekeja nachishina chamuNsona, kudi “mpinji yakumwena, nimpinji yakuhosha,” dichi mpinji yikwawu Yesu wamweneneñahu kwindi! (Mukwa. 3:1, 7; Mat. 27:11-14) Haniyi mpinji, mwatela kuzatisha maana kulonda mubuli kusha amanakwetu mukukala. (Yish. 10:19; 11:12) Indi neyi muneluki nsañu yamwekeni? “Muntu washimunaña hatooka nsañu.” Mwatela kuyileja akulumpi nsañu yejima chakubula kushiyahu wunsahu wukwawu hela kuhimpa nsañu. Atela kwiluka wunsahu walala kulonda amoni njila yayiwahi yakukwashilamu muntu wunakoñi chiluwa hakwila yekala cheñi nawubwambu wawuwahi naYehova.—Yak. 5:14, 15. w18.10 10 ¶17-18

Tunateli kutuña ñahi akwetu mukukeña? Njila yimu hikwikala antiyilili amawahi. (Yak. 1:19) Kutiyilila nawushona kwamwekeshaña kukeña. Mwatela kuyihula chiwahi malwihu anateli kuyikwasha kwiluka chinakutiyayi muntu wunakukabakana. Kuhiñahu, chikuyikwasha kumutiyila wushona nikumukwasha mukwenu mukwaKristu. Mwekeshenu hamesu nenu munaneñi. Neyi mukwenu mukwaKristu nakukeña kulumbulula nsañu yayivulu, diwunjikenu nakutiyilila nawa bayi mumukañeshaku. Neyi mudiwunjika nakumutiyilila nakanañachima, mukwiluka chinakutiyayi. Chumichi chinateli kumukwasha manakwenu hela muhela wunakukabakana kuyishindamena nawa anateli kuyitiyilila hampinji yimunakufwila kumutuña. Neyi muyakamenaña chikupu, anateli kukundejewa. w18.09 14 ¶10; 15 ¶13

Mpinji dichuma chatela kufwetawu antu ejima alandaña chalala. Mpinji yakeñekaña hakwila nawu tutiyi nsañu yaWanta, kutaña Bayibolu ninyikanda yashindamena haBayibolu, kudiza Bayibolu nkawetu, kuloñesha nikuya nakupompa. Twatela ‘kulanda’ hela kwikala nampinji kuhitila mukuleka yuma yamukunkulwayi yatudilaña mpinji. (Efwe. 5:15, 16, tth.) Mpinji yishika hadihi yakeñekaña hakwila nawu twiluki chalala chamuBayibolu? Chumichi chashindamena hachihandilu chetu. Hosi mwakukumina kutalisha hakudiza kwiluka kwaYehova, njila jindi ninyidimu yindi. (Rom. 11:33) Kaposhi Kakutalila katachi kesekejeli chalala “nankenu yanyanya” nawa kahosheli nawu: “Bayi mumona hohu muchidi wumu wankenu yachalala nenu wunawanini. Neyi nkenu yimu yachalala yashikilili, chiña Nzambi watwinkelañahu chalala chikwawu wanyi. Keñelenuhu jikwawu jajivulu.” Hela chakwila tunateli kushakama haya nyaaka, tunateli kutwalekahu kudiza yuma yayivulu hadi Yehova. Makonu, chuma chalema hikuzatisha mpinji yetu chiwahi hakulanda chalala neyi chakwila chihandilu chetu chinatwiteji. w18.11 4 ¶7

Amayala ayileja kushakama nawañodi jawu “nakuyiluka chiwahi chadiwu,” awa mazu anateli cheñi kuyibalumuna nawu “nakuyitoñojokelaku.” (1 Pet. 3:7; tth.) Mazu akwila nawu kwiluka nikutoñojokelaku endelaña hamu. Chakutalilahu, iyala watoñojokelañaku weluka nindi, ñodindi wamutelela, yena wambukaku chikupu munjila jajivulu, ilaña hatela kumumona neyi wamukunkulwayiku. (Kutach. 2:18) Dichi wamutoñojokelañaku kwesekeja nachatiyañayi, nikumulemesha. Iyala watoñojokelañaku, wamutoñojokelañaku chikupu ñodindi neyi nakuhanjeka nawambanda amakwawu. Hakenkamaña nawu hela kuyikeña munjila yatamaku. Cheñi nawa wamutoñojokelañaku hakuzatisha jinjila jakuhanjekelamu jahaIntaneti hela neyi nakuzatisha Intaneti. (Yoba 31:1) Wekala washinshika muyuma yejima muloña wamukeña ñodindi nawa wamukeña Nzambi nakuhela yatama.—Mas. 19:14; 97:10. w18.09 29 ¶3-4

Muloñadi chichakalilaña kuzatisha yuma yitwadizaña Mwizu daNzambi? Chuma chimu chidi chakwila nawu chakeñekaña kwikala adizoza hakwila nawu twili yuma yayiwahi neyi tudi mukweseka. Munanu “mafuku akukuminina,” tunakushakama nawantu “akwakudikeña awenawu, asweja kukeña mali, akwakudinka wanta, akwakuditohesha” nawa “abulaña kudiyuula.” (2 Tim. 3:1-3) Antu jaNzambi anateli kuhela yuma yakoñañawu antu atama ilaña hampinji yoyimu anateli kutiya ichima muloña wayuma yikwetiwu. (Mas. 37:1; 73:3) Tunateli kudihula netu: ‘Komana kudi chuma chikuletesha nitwamijiku yuma yinakukeñawu akwetu? Komana neyi ‘nidikehesha,’ antu akunlemeshaña wanyi? Neyi twiteja yilwilu yakudikeña kutuluwañesha, yinateli kumanisha wubwambu wetu wutwadiluñishaña muchipompelu nawa antu akutwiluka wanyi nawu tudi akwaKristu. Neyi tudiza nsañu yahosha hadi antu ashimunawu muBayibolu adiña nayilwilu yayiwahi nikuyimbujola mwafumaña yuma yayiwahi. w18.09 3 ¶1

Hela chakwila Yehova wadiña nkawindi hampinji yatachikiliyi kuleña yuma, hadiña nakutoñojoka kwikala nkawindi hohuku. Dichi, waleñeli añelu niantu. Yehova “Nzambi wamuzañalu,” wahanaña yuma yayiwahi. (1 Tim. 1:11; Yak. 1:17) Chineli wakeñaña nindi twikali namuzañalu, watudizishaña kumwekesha chisambu. (Rom. 1:20) Nzambi waleñeli muntu neyi chekalayi yomweni. (Kutach. 1:27) Dikwila nawu watuleñeli nayilwilu yikwetiyi. Hakwila nawu twikali namuzañalu nichihandilu chachiwahi, twatela kumwimbujola Yehova kuhitila mukutoñojokelaku akwetu antu nikuhana chakufuma hamuchima. (Fwi. 2:3, 4; Yak. 1:5) Muloñadi? Muloña Yehova dichatuleñayi. Hela chakwila twawanina wanyi, tunateli kumwimbujola Yehova kuhitila mukumwekesha chisambu. Yehova wakeñaña nindi antu jindi amwimbujoleña nawa watiyaña kuwaha neyi tumwekesha chisambu.—Efwe. 5:1. w18.08 18 ¶1-2; 19 ¶4

Antu amulondelaña Kristu amwekeshaña nawu amutiyililaña Yesu kuhitila mukutiyilila kumazu indi nikuyizatisha. Hiyaluwankanaña ‘nakwakama kwamuwumiku.’ (Luka 21:34) Ilaña ovwahilaña nshimbi jaYesu muchihandilu chawu hela chakwila yuma yinakali chamuchidinyi. Hela chakwila amanakwenu anakumona kukala kwamuchidiwu, atwalekañahu kwikala ashinshika kudi Yehova. Njila yikwawu mutunateli kumutiyilila Yesu, hikwovwahila antu atondayi kulombola mukachi ketu. (Heb. 13:7, 17) Hadi yaaka yinahitihu, mukuloñesha kwaNzambi mudi kuhimpika kwakuvulu, kushilahu chakuzatisha yozelu yayiha ninjila jakushimwinamu, chakupompa mukachi kamulungu, chakutuña, kutuñulula nikuwahisha Matala aWanta. Iwu wunlomboli watukwashaña nawa wamwekeshaña chatukeñayi Nzambi. Dichi twatela kuwulondelaña. Yehova wukutukwashaña kulondela wulomboli wudi mukuloñesha. w19.03 10-11 ¶11-12

Nsañu yimunabuli kwilukisha hela yimukweti wunsahu wantesha, yakalaña kukunkulula chiwahi. Shinshikenu chuma chayimwekeneni aIsarela ashakamineña kukabadi kamujika kaKaloña Yodana mumafuku aYoshuwa. (Yosh. 22:9-34) Atambwilili mazu nawu aIsarela adiña nakushakama kukabadi kakumusela anatuñi kameña keneni nawa kakawahi. Iyi nsañu yatiyiliwu yadiña yalala. Muloña wakubula kutiyishisha nsañu yejima, aIsarela ashakamineña kumujika akunkulwili nawu amanakwawu anadikañi naYehova. (Yosh. 22:9-12) Henohu kanda ayi nakuyilukuka, atemesheli akulumpi kulonda ayi nakutiya wunsahu walala. Wunsahwinyi wawaniniwu? Hiyatuñili kameña nawu alambwileñahuku, ilaña akanukileñahu kumbidi nawu niwena adiña ambuña aYehova ashinshika. Awa aIsarela atela atiyili kuwaha hakubula kujaha amanakwawu hamuloña wawunsahu wabuliliwu kutiyishisha chiwahi, ilaña asambilili kukeñakeña wunsahu walala. w18.08 5 ¶9-10

Neyi chashimwiniyi Pawulu, niakwakudifukula alala anateli kudiñija muyilwilu yatama. Antu elaña yuma yatama anateli kutoñojoka nawu achidi amabwambu jaYehova. Kukeña kwikala ibwambu daYehova hela kumwekesha neyi tudi ashinshika kudi yena hichinayi mukwila nawu Yehova hibwambu detuku. (1 Kor. 10:1-5) Neyi chochakameneniwu aIsarela nawu Mosi nashimbuli hampidi yaSinayi, akwaKristu makonu niwena anateli kwakamena nawu ifuku daYehova dakusompesha niituña dadiha dinalabi kwinza. Kushikijewa kwaniwu wuprofwetu kunateli kumwekana neyi kudi kwakulehi chikupu hela netu wukashikijewa wanyi. Neyi kubabala nehi, yitoñojoka yamuchidiwu yikuletesha tutachiki kutwamijaku yuma yakumujimba chatela tufwileña yuma yakeñayi Yehova. Mukuhita kwampinji tunateli kufuma kudi Yehova nakutachika kwila yuma yitwamweneña netu yatama hitwadiña nawubwambu wawuwahi naNzambi. w18.07 21 ¶17-18

Ninetu tunateli kutambwila nkisu neyi Yehova yatwiluka hamuntu. Tunateli kwila ñahi hakwila Yehova yatwiluki? Tunateli kwila mwenimu kuhitila mukumukeña nikuhana wumi wetu kudi yena. (1 Kor. 8:3) Hela chochu, twatela kutwalekahu kuhemba wubwambu wetu naTata yetu wamwiwulu. Kufwana akwaKristu amuÑalija asonekeleliyi Pawulu, ninetu twatela kutondolwela kukalakela ‘yuma yabula kukola nawa yamukunkulwayi’ yamukanu kaayi kushilahu nikukeña netu atuhameki. (Ñal. 4:9) Awa akwaKristu amumafuku awapostolu asonekeleliyi Pawulu adiña apama dehi nikushika hakuyiluka kudi Nzambi. Hela chochu, Pawulu wahosheli nindi amanakwetu wowamu ‘afuntileña cheñi’ kuyuma yamukunkulwayi. Munjila yikwawu Pawulu wayilejeleña nindi: “Henohu munafumi dehi kwakulehi, muloñadi chimunakufuntila kuyuma yawusupi, yuma yakadi mudimu yimwashili dehi kunyima?” w18.07 8 ¶5-6

Tunakukeña wanyi kumona kukala kwafumaña mukufumpa nshimbi jaNzambi kulonda tudiziliku. Twatela kudizila kudi antu aluwañesheli asonekawu nshidi yawu Mwizu daNzambi. Mwamweni, twatambwilaña kufumba kwakuwahi kufuma kudi Nzambi, neyi tutaña nikutoñojoka nsañu yawantu ashimunawu muBayibolu. Chakutalilahu, toñojokenu chichamukatili Mwanta Davidi chafumpiliyi nshimbi jaYehova nakwila wuvumbi naBatisheba. (2 Sam. 12:7-14) Hampinji yitunakutaña nikutoñojoka haniyi nsañu, twatela kudihula netu: ‘Mwanta Davidi wadi kutondolwela ñahi kutiya kutama kwatiyiliyi hamuloña wakwila wuvumbi naBatisheba? Neyi yami namweni kweseka kwamuchidiwu, nadi kwikala nañovu yakutondolwela kukoña nshidi? Nadi kutemuka neyi cheliliyi Yosefu tahindi nadi kukoña nshidi neyi cheliliyi Davidi?’ (Kutach. 39:11-15) Neyi tutoñojoka hayuma yatama yafumaña mukwila nshidi, tukudikasa mumuchima wetu ‘nakuhela yatama.’—Amosa 5:15. w18.06 17 ¶5, 7

Wuñanji waheña kakavulu waleteshaña antu kudiñija munsañu jamapolitikisi. Mumpinji yaYesu nsañu yamapolitikisi yahosheleñawu antu nankashi hinyisonku. Antu ashakamineña muRoma, kushilahu niantu amutiyilileña Yesu, ayifwetesheleña nyisonku yayivulu yidi neyi yuma, mpata nimatala. Akwakusonkesha nyisonku aswejeli majika kanwa. Akandamishili wuseya chakwila antu akañenyeña kufweta. Akwakusonkesha nyisonku ahanineña majika kanwa kudi akulumpi janfulumendi kulonda asonkesheña nyisonku yayivulu. Zakewu, mukulumpi wawansonkeshi muYeriku, waheteli muloña wakudiila antu mali. (Luka 19:2, 8) Akwawu akwakusonkesha nyisonku amavulu atachikili kumwimbujola. Ayilumbu jaYesu amwihwili Yesu mukubabala kulonda yatachiki kuhosha hansañu yanyisonku. Amwihwili hamusonku wadenari yimu, walejeliwu antu ejima amuRoma kuhana. (Mat. 22:16-18) A Yudeya atiyileña kutama naniwu musonku. Wayiletesheleña ayovwahileña aRoma. w18.06 5-6 ¶8-10

Kwikala kukabadi kaSatana mwafumaña yuma yatama mpinji yejima. Kwosi yuma yayiwahi yafumañamu. (Yoba 21:7-17; Ñal. 6:8) Yumanyi yayiwahi yafumañamu neyi twiluka hakumina kutwamba kwaSatana? Chatukwashaña kwiluka hakukumina neyi tunakwovwahila nfunlumendi yawantu nawa chatusañumuna kuzata mudimu wetu wakushimwina. Tweluka netu Yehova wakeñaña nindi tulemesheña akulumpi janfulumendi. (1 Pet. 2:17) Nawa wakeñaña nindi twovwahileña nshimbi janfulumendi jawantu chakala hohu jinambuki wanyi nachakeñañayi. (Rom. 13:1-4) Ilaña twatela kwiluka netu hitwatela kudiñija munsañu jamapolitikisi hela kuhakwilaku nlomboli wumu hela chiyuulu chimuku. (Yow. 17:15, 16; 18:36) Muloña tweluka netu Satana wakeñaña kusweka nikutamisha ijina daYehova, dichaleteshaña tushimwineña antu kulonda amwiluki Nzambi. Twatiyaña kuwaha kututena nejina dindi nikudizatisha nawa tweluka netu kumukeña yena kwabadika kukeña mali hela yuma yikwawu.—Isa. 43:10; 1 Tim. 6:6-10. w18.05 24 ¶8-9

Komana kwambuka diyi njila yayiwahi yakumanishilamu kukala? Nsona yahosha nawu antu atela kudiseña hamuloña wawuvumbi, ilaña yahosha wanyi muloña watela kwambukilawu. Pawulu wasonekeli nindi: “Neyi mumbanda wudi neyala wabula kwitiya nawa owu iyala neteji kushakama hamu nindi, owu mumbanda hatela kumushiya iwu nfumwindiku.” (1 Kor. 7:12, 13) Chumichi chinatukundami ninetu makonu. Kuhosha hohu walala, kudi mpinji yikwawu yelaña ‘iyala wabula kwitiya’ nateli kumwekesha nindi nakukeña wanyi “kushakama hamu nindi.” Hadaha wetaña ñodindi chakwila nateli nikumukatisha. Hadaha nateli nikukaana kumwakamena yena nichisaka hela kumukañesha kudifukula kudi Nzambi. Mpinji yamuchidiwu, akwaKristu amakwawu afuukulañahu kukaana “kushakama” hamu hela chakwila mwinikwawu wukulomba kwanakena chamuchidinyi nawa nateli kufuukulahu kwambuka. Ilaña akwaKristu amakwawu hela chakwila anakumona kukala kwamuchidiwu, anatwalekihu kuumika nikuzata nañovu kulonda amanishi kukala. w18.12 13 ¶14, 16; 14 ¶17

Muchishimu chamukwakukuwa chekala haLuka 8:5-8, 11-15, mbutu yemenañaku “izu daNzambi,” hela nsañu yaWanta. Maseki emenañaku muchima wamuntu wachifwikija. Mbutu yaholokeleli hamaseki amawahi yelili nyiji, yatutukili (yabalukili) nawa yakulili “jasoñeli nyikabu 100.” Neyi chochekala maseki amawahi ashimunawu muchishimu chaYesu akwashili kwidisha mbutu yacheñi, ninetu twetejeli nsañu nawa twayihembeli. Chafuminimu, nsañu yaWanta yidi neyi mbutu yelili nyiji nawa yakulili, nakwikala neyi nsachi yatidiku yasoñeli nyikabu mukuhita kwampinji. Nawa neyi chasoñaña nsachi yatidiku nyikabu, bayi nsachi yayihaku ilaña mbutu yayiha, munjila yoyimu ninetu twasoñaña nyikabu yayiha, bayi atumbanji amahaku, ilaña mbutu yayiha yaWanta. Twasoñaña ñahi mbutu yayiha yaWanta? Mpinji yejima yitwashimwinaña nsañu yaWanta, twelishaña nikuvulisha mbutu yatumbiliwu munyichima yetu. (Luka 6:45; 8:1) Dichi, ichi chishimu chatudizishaña nawu neyi tutwalekahu kushimwina nsañu yaWanta, dikwila nawu “[tunakusoña] nyikabu nakuumika.” w18.05 14 ¶10-11

Pawulu hafwilileña hohu kukolesha amanakwindiku ilaña ‘wadihanini yomweni kukoola wena’. (2 Kor. 12:15) Munjila yoyimu, aeluda hiyatela kukolesha nikuyizañalesha amanakwawu namazu hohuku ilaña atela kuyikolesha kuhitila mukuyimwekeshela kukeña. (1 Kor. 14:3) Mukudituña wumu namukwawu mwabombela kufumba, hela chochu aeluda atela kulondela yakutalilahu yekala muBayibolu yashimuna chakufumba munjila yakukolesha. Hanyima yakufwa nikusañuka kwindi, Yesu wamwekesheli chitwatela kufumba muntu munjila yayiwahi. Wafumbili yipompelu yimu yamuAsia Minor chakadi kuhita mumbadi, ilaña talenu chayifumbiliyi. Henohu kanda yayifumbi, wahamekeli chikupu chipompelu chamuEfwesesa, muPerigamu nichamuTiyatira. (Chim. 2:1-5, 12, 13, 18, 19) Aeluda atela kumwimbujola Kristu hakufumba muntu. w18.04 22 ¶8-9

Enu anvwali, mukweti mudimu weneni wakukiña anyanenu, chakadi nikujina, mwazataña nañovu hakukiña anyanenu kuyikatu. Mwahembaña matala enu nawunyonji nawa mwanataña yuma yejima yinateli kuletesha enu nianyanenu kukata. Munjila yoyimu, mwatela kukiña anyanenu kumafwilimu, maprogilamu aha TV yisela yahayozelu yakesi kawuneñu nimawebusayiti anateli kuyiluwañesha nayitoñojoka yaSatana. Yehova wayinka mudimu wakukwasha anyanenu kulonda ekali amabwambu jindi. (Yish. 1:8) Dichi, mwatela kushaku nshimbi yashindamena haBayibolu yinatela kukwasha chisaka chenu. Mwatela kuleja anyanenu yuma yatela kutalawu hela yinateli kubula kutalawu. Yikwashenu eluki yuma yinaleteshi mushiku nshimbi. (Mat. 5:37) Anyanenu chinakukulawu, yidizishenuña kwambula yuma yayiwahi nayatama kwesekeja nanshimbi jaYehova. (Heb. 5:14) Anukenu nenu, anyanenu anateli kudizilaku sweje-e dinu yuma yimwelaña.—Kuhit. 6:6, 7; Rom. 2:21. w19.01 16 ¶8

Neyi wudi mukwenzi mukwaKristu, kwila wufwilaña kudikunda nawakulumpi nehi? Mwatela kuyihula nakalemesha kulonda ayilumbulwiliku yuma yinadiluñishiwu mumudimu waNzambi. Chumichi chikuyikolesha nawa chikuyikwasha enu niwena kutoñeka chejeji chachalala. Nawa wejima wetu twatela kwikala nachaaku chakutambwila antu enzaña kukupompa Kwitala daWanta. Neyi anayinki kulombola mudimu wakuya nakushimwina, mwatela kuzata nañovu mukwasheña anakuli kulonda ashimwineña. Komana akweti iluña dadiwahi dakushimwinamu? Neyi chinatwesheki, munateli kuyambula nakansi wunateli kuyikwasha kumujimba. Mwatela cheñi kutoñojokelaku anakukañanya kuzata nankashi muloña wakukata kumujimba. Kuyitoñojokelaku nikashinshi kenu chinateli kuyikwasha atwansi niakulumpi akulukila niabula kukulukila kushimwina nsañu yayiwahi neyena.—Lev. 19:32. w18.06 23-24 ¶10-12

Twatela kulemesha chatukuulayi Yehova kuwuduñu wanshidi nikufwa. Hamuloña wefutu danyiloña, tunateli kumukalakela Nzambi nachinleji chitooka nikwikala namuzañalu hakumukalakela. (Mas. 40:8) Kubombela hakumwekesha kusakilila, bayi tuzatishaña chatama kusubuka kwetuku. Kapostolu Petulu watusoñamishili kubula kuzatisha kusubuka kwetu kulonda tukoñeleñamu yuma yafwilaña mujimba. Komana iku kusoñamisha, kunayanukishi wanyi yuma yayimwekeneni aIsarela muchinkalampata? Nawa ninetu tudi muniku kukala, hadaha kunabadiki nankashi. Satana nikaayi kindi aletaña yuma yakokolaña kuhitila munvwalilu nimmwekenu, yakuda niyakunwa, kuhema niyisela, kushilahu niyuma yikwawu. Antu atiyakeshaña yuma yawu yakulandisha kakavulu azatishaña antu amwekanaña lubanji kulonda atukokoli tulandi yuma yitunakubula kukeña. Dichi tunateli kuzatisha kusubuka kwetu chatama kuhitila mukulanda yuma yitwabula kukuhwelela. w18.04 10 ¶7-8